Atee Lazaro Shi

Be ni Yesu kɛ Marta kɛ agbɛnɛ hu Maria kpe yɛ Betania klotia lɛ sɛɛ lɛ, amɛ fɛɛ amɛtee Lazaro gbonyo kaimɔ bu lɛ he. Gbonyo bu nɛɛ ji tɛkplo ni akɛ tɛ etsi naa. Yesu kɛɛ akɛ: “Nyɛjiea tɛ lɛ.” Akɛni Marta leee nɔ ni Yesu miitao efee lɛ hewɔ lɛ, ekɛɛ akɛ: “Nuŋtsɔ, benɛ nɛɛ eeje fu, ejaakɛ eye gbii ejwɛ.” Shi Yesu kɛɛ lɛ akɛ: “Ani mikɛɛɛ bo akɛ kɛ́ ohe oye lɛ obaana Nyɔŋmɔ anunyam lɛ?”​—Yohane 11:39, 40.

No hewɔ lɛ, ajie tɛ lɛ. Kɛkɛ ni Yesu hole ehiŋmɛii anɔ kɛtee ŋwɛi ni esɔle ekɛɛ: “Ataa, miida bo shi akɛ obo mi toi. Anɔkwa, mile akɛ oboɔ mi toi daa; shi asafoku ni damɔ biɛ lɛ hewɔ miwieɔ lɛ, koni amɛhe amɛye akɛ bo otsu mi.” Yesu sɔle yɛ mɛi lɛ ahiɛ koni amɛna akɛ Nyɔŋmɔ hewalɛ ekɛbaafee nɔ ni ebaafee lɛ. No sɛɛ lɛ, Yesu bo kɛ gbee ni wa ekɛɛ: “Lazaro, jee kpo!” Ni Lazaro je kpo ni akɛ fuu mamai ebala enaji kɛ eniji, ni akɛ mama efi ehiɛ. Yesu kɛɛ amɛ akɛ: “Nyɛfɛnea lɛ ni nyɛhãa eyaa.”​—Yohane 11:41-44.

Yudafoi ni eba Maria kɛ Marta miishɛjemɔ lɛ na naakpɛɛ nii nɛɛ ni amɛteŋ mɛi babaoo he Yesu nɔ amɛye. Shi mɛi komɛi tee amɛyakɛɛ Farisifoi lɛ nɔ ni Yesu efee lɛ. Farisifoi lɛ kɛ osɔfoi tsiifoi lɛ bua Yudafoi asaneyeli wulu lɛ ni ji Sanhedrin lɛ naa kɛkpe. Osɔfonukpa Kaiafa fata Sanhedrin lɛ he. Amɛteŋ mɛi komɛi ye ŋkɔmɔ akɛ: “Mɛni wɔfeɔ, ejaakɛ nuu nɛɛ feɔ okadii pii? Kɛ́ wɔŋmɛ lɛ gbɛ ní eya nɔ nɛkɛ nɔŋŋ lɛ, amɛ fɛɛ amɛbaaná hemɔkɛyeli yɛ emli, ni Romabii lɛ baaba amɛbaŋɔ wɔjamɔhe kɛ wɔmaŋ lɛ.” (Yohane 11:47, 48) Eyɛ mli akɛ hii nɛɛ enu mɛi ni na akɛ Yesu miifee “okadii pii” lɛ anaa wiemɔ moŋ, shi amɛnaaa miishɛɛ yɛ nɔ ni Nyɔŋmɔ miitsɔ Yesu nɔ eefee lɛ he. Nɔ ni nɔŋŋ ni amɛsusuɔ he ji gbɛhei kɛ hegbɛi ni amɛyɔɔ lɛ.

Shi ni atee Lazaro kɛjɛ gbohii ateŋ lɛ wo Sadukifoi lɛ hiɛgbele waa, ejaakɛ amɛheee gbohiiashitee lɛ amɛyeee. Kaiafa ni eji Sadukifoi lɛ ateŋ mɔ kome lɛ wie akɛ: “Nyɛleee nɔ ko kwraa, ni nyɛsusuko he hu akɛ sɛɛnamɔ yɛ he kɛhã nyɛ akɛ gbɔmɔ kome baagbo ehã mɛi lɛ, moŋ fe nɔ ni jeŋmaŋ muu lɛ fɛɛ hiɛ baakpãtã.”​—Yohane 11:49, 50; Bɔfoi 5:17; 23:8.

Akɛni Kaiafa ji osɔfonukpa hewɔ lɛ, Nyɔŋmɔ hã ewie nakai​—“jeee lɛ diɛŋtsɛ eto eyiŋ ewie.” Nɔ ni Kaiafa taoɔ atsɔɔ lɛ ji, esa akɛ agbe Yesu koni ekaya nɔ efite hegbɛ kɛ hewalɛ ni Yudafoi jamɔŋ hiɛnyiɛlɔi lɛ yɔɔ yɛ maŋbii lɛ anɔ lɛ. Shi nɔ ni Kaiafa gbalɛ lɛ tsɔɔ moŋ ji akɛ, abaatsɔ Yesu gbele lɛ nɔ akpɔ̃ “Nyɔŋmɔ bii ni egbɛ eshwã lɛ” fɛɛ, shi jeee Yudafoi lɛ kɛkɛ.​—Yohane 11:51, 52.

Nɔ ni Kaiafa wie lɛ kɔne Sanhedrin lɛ yiŋ ni amɛkpɛ mli akɛ amɛbaagbe Yesu. Ebaanyɛ efee akɛ Nikodemo, ni ji Yesu naanyo kɛ Sanhedrin lɛ mli nyo lɛ, hã Yesu le yiŋ ni akpɛ lɛ. Bɔ fɛɛ bɔ ni sane lɛ ji lɛ, Yesu shi Yerusalem niiaŋ koni akagbe lɛ dani be ni Nyɔŋmɔ eto lɛ shɛ.