Gbɛi Ni Obaanyɛ Otsɔ Nɔ Olɛɛ Osɔɔmɔ Lɛ Mli

BE NI be shɛ ni Yesu baatsu ekaselɔi lɛ ni amɛyashiɛ Maŋtsɛyeli sane lɛ, ekɛɛ amɛ akɛ: “Nikpamɔ lɛ fa, shi nitsulɔi lɛ faaa.” Nitsumɔ babaoo yɛ ni esa akɛ atsu, no hewɔ lɛ ekɛfata he akɛ: “Nyɛkpaa nikpamɔ Nuŋtsɔ lɛ fai koni etsu nitsulɔi kɛba enikpamɔ lɛ mli.” (Mat. 9:37, 38) Yesu tsɔɔ kaselɔi lɛ bɔ ni esa akɛ amɛtsu amɛsɔɔmɔ nitsumɔ lɛ amɛhã. Nɔ ni ewie lɛ tsɔɔ akɛ, esa akɛ akɛ oyaiyeli atsu nitsumɔ lɛ. Ekɛɛ akɛ: “Nyɛgbeŋ Israel maji lɛ fɛɛ anaa kɛyashi gbɔmɔ Bi lɛ baaba.”​—Mat. 10:23.

² Ŋmɛnɛ hu lɛ, nitsumɔ babaoo yɛ ni esa akɛ atsu yɛ shiɛmɔ nitsumɔ lɛ mli. Esa akɛ ashiɛ Maŋtsɛyeli lɛ he sane kpakpa nɛɛ dani naagbee lɛ aba, ni be ni eshwɛ lɛ faaa dɔŋŋ! (Mar. 13:10) Akɛni ŋmɔ lɛ ji je lɛ hewɔ lɛ, wɔshihilɛ lɛ tamɔ nɔ ni Yesu kɛ ekaselɔi lɛ kɛkpe lɛ nɔŋŋ, shi ŋmɔ ni wɔtsuɔ mli nii lɛ da kwraa fe amɛnɔ lɛ. Kɛ́ akɛ wɔyifalɛ lɛ to mɛi akpekpei akpei abɔ ni yɔɔ je lɛ mli lɛ ahe lɛ, wɔyi faaa kwraa, shi wɔbaanyɛ wɔná nɔmimaa akɛ Yehowa baaye abua wɔ. Abaashiɛ Maŋtsɛyeli lɛ he sane kpakpa lɛ yɛ shikpɔŋ lɛ nɔ fɛɛ, ni kɛ́ be ni Yehowa eto lɛ shɛ lɛ, naagbee lɛ baaba. Ani wɔkɛ Nyɔŋmɔ Maŋtsɛyeli lɛ baaye klɛŋklɛŋ gbɛhe yɛ wɔshihilɛ mli koni wɔnyɛ wɔtsu wɔsɔɔmɔ lɛ he nii pɛpɛɛpɛ? Mɛɛ teokrase otii wɔbaanyɛ wɔkɛmamɔ wɔhiɛ koni wɔnyɛ wɔtsu enɛ?

³ Yesu tsɔɔ nɔ ni Yehowa biɔ kɛjɛɔ E-tsuji ni ejɔɔ amɛhe nɔ lɛ adɛŋ. Ekɛɛ akɛ: “Suɔmɔ Yehowa, o-Nyɔŋmɔ lɛ, kɛ otsui muu fɛɛ kɛ osusuma muu fɛɛ kɛ ojwɛŋmɔ muu fɛɛ kɛ onyɛmɔ fɛɛ.” (Mar. 12:30) Esa akɛ wɔkɛ wɔsusuma muu fɛɛ atsu Nyɔŋmɔ sɔɔmɔ nitsumɔ lɛ. Enɛ tsɔɔ akɛ, esa akɛ wɔfee bɔ fɛɛ bɔ ni wɔbaanyɛ yɛ Yehowa sɔɔmɔ lɛ mli kɛtsɔɔ akɛ suɔmɔ ni wɔyɔɔ kɛhã lɛ lɛ mli wa waa, ni wɔjɔɔ wɔhe nɔ wɔhã lɛ lɛɛlɛŋ. (2 Tim. 2:15) Hegbɛi yɛ kɛhã wɔteŋ mɔ fɛɛ mɔ yɛ bɔ ni wɔshihilɛi kɛ wɔnyɛmɔi ji lɛ naa. Hã wɔsusu hegbɛi nɛɛ ekomɛi ahe wɔkwɛ, koni no sɛɛ lɛ, okwɛ oti ni obaanyɛ okɛma ohiɛ yɛ Yehowa sɔɔmɔ lɛ mli.

⁴ Mɔ fɛɛ mɔ ni mɔɔ anɔkwale lɛ mli lɛ náa hegbɛ akɛ eshiɛ sane kpakpa lɛ. Enɛ ji nitsumɔ ni Yesu kɛwo ekaselɔi lɛ adɛŋ akɛ amɛtsu. (Mat. 24:14; 28:19, 20) Bei pii lɛ, kɛ́ Yesu Kristo kaselɔi nu sane kpakpa lɛ, amɛ hu amɛkɛ mɛi gbaa he sane amrɔ nɔŋŋ. Nakai ji bɔ ni Andrea, Filipo, Kornelio, kɛ mɛi krokomɛi fee. (Yoh. 1:40, 41, 43-45; Bɔf. 10:1, 2, 24; 16:14, 15, 25-34) Ani enɛ tsɔɔ akɛ mɔ ko baanyɛ eshiɛ sane kpakpa lɛ dani abaptisi lɛ po? Hɛɛ! Kɛ́ mɔ ko batsɔ shiɛlɔ ni abaptisiko lɛ yɛ asafo lɛ mli nɔŋŋ lɛ, ebaanyɛ ekɛ ehe awo shĩa fɛɛ shĩa shiɛmɔ nitsumɔ lɛ mli. Kɛfata he lɛ, ebaanyɛ ekɛ ehe awo shiɛmɔ nitsumɔ lɛ fãi krokomɛi lɛ amli yɛ bɔ ni enyɛmɔ kɛ eshihilɛ baaŋmɛ lɛ gbɛ lɛ naa.

⁵ Kɛ́ abaptisi shiɛlɔ ko lɛ, ŋwanejee ko bɛ he akɛ ebaasumɔ ni efee bɔ fɛɛ bɔ ni ebaanyɛ kɛye ebua mɛi krokomɛi koni amɛle sane kpakpa lɛ. Hii kɛ yei fɛɛ yɛ hegbɛ akɛ amɛshiɛɔ sane kpakpa lɛ. Eji hegbɛ kpele ni wɔná akɛ wɔ hu wɔbaatsu nɔ ko fioo koni Nyɔŋmɔ Maŋtsɛyeli lɛ he nibii lɛ ashwere. Mɔ fɛɛ mɔ ni tsuɔ sɔɔmɔ nitsumɔ lɛ mli nitsumɔi krokomɛi kɛlɛɔ esɔɔmɔ lɛ mli lɛ náa miishɛɛ.

⁶ Eeenyɛ efee akɛ, atsuɔ osafo lɛ shikpɔŋkuku lɛ mli nii shii abɔ, ni aaye mɛi odase jogbaŋŋ yɛ mli. Kɛ́ nakai ni lɛ, ekolɛ obaanu he akɛ ofã kɛya he ko ni shiɛlɔi babaoo ahe miihia yɛ koni okɛlɛɛ osɔɔmɔ lɛ mli. (Bɔf. 16:9) Kɛ́ amrɔ nɛɛ oji asafoŋ onukpa loo asafoŋ sɔɔlɔ lɛ, ekolɛ oyelikɛbuamɔ he baahia asafo kroko. Nyɛkpokpaa nɔkwɛlɔ lɛ baanyɛ awo bo ŋaa yɛ bɔ ni obaanyɛ oye obua asafo kroko ni yɔɔ kpokpaa lɛ nɔ lɛ he. Kɛ́ oosumɔ ni oyasɔmɔ yɛ nyɛmaŋ lɛ mli he kroko lɛ, nitsumɔhe nine lɛ baanyɛ ahã onine ashɛ saji ni sa ni he baahia bo lɛ anɔ.

⁷ Ani obaasumɔ ni oyasɔmɔ yɛ maŋsɛɛ? Kɛ́ nakai ni lɛ, esa akɛ osusu nibii ahe jogbaŋŋ. Mɛni hewɔ okɛ osafoŋ onukpai lɛ susuuu enɛ he? Ekã shi faŋŋ akɛ, kɛ́ ofã lɛ, ebaasa bo kɛ mɔ fɛɛ mɔ ni baafata ohe kɛya lɛ he. (Luka 14:28) Shi kɛ́ oyatsɛŋ yɛ jɛmɛ lɛ, no lɛ, ekolɛ ebaahi moŋ akɛ obaayasɔmɔ yɛ he ko yɛ nyɛmaŋ lɛ mli.

⁸ Yɛ maji komɛi anɔ lɛ, nyɛmimɛi hii ni sɔmɔɔ akɛ nɔkwɛlɔi lɛ ba anɔkwale lɛ mli etsɛko. Nyɛmimɛi hii ni yɔɔ hei nɛɛ baa amɛhe shi, ni amɛmiisumɔ ni asafoŋ onukpai ni yɔɔ niiashikpamɔ afã kɛba amɛsafo lɛ mli ni amɛbanyiɛ hiɛ. Kɛ́ oji asafoŋ onukpa ni ootao ofã kɛya maŋ ko ni tamɔ nɛkɛ nɔ lɛ, hã ehi ojwɛŋmɔŋ akɛ, oti hewɔ ni oyaa jɛmɛ lɛ jeee ni oyaye nyɛmimɛi hii ni yɔɔ jɛmɛ lɛ anajiaŋ kɛsɔmɔ. Moŋ lɛ, ooya koni okɛ amɛ ayafee ekome kɛsɔmɔ. Wo amɛ hewalɛ koni amɛbɔ mɔdɛŋ ni amɛsa kɛhã sɔɔmɔ hegbɛi ni amɛkpɛlɛ asafoŋ sɔ̃i hu anɔ. (1 Tim. 3:1) Kɛ́ amɛfeee nibii komɛi tamɔ bɔ ni afeɔ lɛ yɛ nyɛmaŋ lɛ mli lɛ, too otsui shi ohã amɛ. Okɛ niiashikpamɔ ni oná akɛ asafoŋ onukpa lɛ aye abua nyɛmimɛi lɛ jogbaŋŋ. Kɛ́ ofee nakai, ni eba lɛ akɛ esa akɛ oku osɛɛ kɛya omaŋ lɛ, asafoŋ onukpai ni oshi amɛ lɛ baanyɛ akwɛ asafo lɛ nɔ jogbaŋŋ fe tsutsu lɛ.

⁹ Esa akɛ Asafoŋ Sɔɔmɔ Ajinafoi Akuu lɛ aŋma wolo kɛjie oyi dani nitsumɔhe nine lɛ baanyɛ ahã ole asafoi ni oyelikɛbuamɔ he baahia amɛ. Kɛ́ oosɔmɔ akɛ asafoŋ onukpa jio, asafoŋ sɔɔlɔ jio, gbɛgbalɔ jio, shiɛlɔ jio lɛ, esa akɛ amɛŋma wolo nɛɛ. Sɔɔmɔ ajinafoi akuu lɛ kɛ oyijiemɔ wolo lɛ kɛ wolo ni obaaŋma kɛbi maŋ ni oosumɔ ni oyasɔmɔ yɛ nɔ lɛ he saji lɛ baamaje nitsumɔhe nine ni yɔɔ nakai maŋ lɛ nɔ lɛ tɛ̃ɛ.

¹⁰ Bɔ ni afee ni olɛɛ osɔɔmɔ lɛ mli lɛ, ekolɛ obaasumɔ ni okase wiemɔ kroko ni mumuii awiemɔ hu fata he. Kɛ́ okɛma ohiɛ akɛ obaakase wiemɔ kroko koni oshiɛ yɛ mli lɛ, mɛni hewɔ okɛ asafoŋ onukpai lɛ kɛ kpokpaa nɔkwɛlɔ lɛ ewieee he? Amɛbaanyɛ amɛwo bo ŋaa ni amɛwo bo hewalɛ hu. Kpokpai komɛi eto wiemɔ kasemɔ skul he gbɛjianɔ yɛ nitsumɔhe nine lɛ gbɛtsɔɔmɔ shishi koni amɛkɛtsɔse shiɛlɔi kɛ gbɛgbalɔi ni sa, bɔ ni afee ni amɛshiɛ yɛ nakai wiemɔ lɛ mli.

¹¹ Esa akɛ shiɛlɔi fɛɛ ale taomɔ nii ni esa akɛ mɔ ashɛ he kɛ́ eetao esɔmɔ akɛ gbɛgbalɔi awalɔ, daa gbɛgbalɔ, gbɛgbalɔ krɛdɛɛ, loo eetao ekɛ ehe awo be fɛɛ sɔɔmɔ nitsumɔ lɛ fã kroko ko mli. Esa akɛ gbɛgbalɔ afee Kristofonyo ni abaptisi lɛ ni feɔ nɔkwɛmɔnɔ kpakpa ni shihilɛ baaŋmɛ lɛ gbɛ koni ekɛ ŋmɛlɛtswai pɔtɛɛ ko ashiɛ sane kpakpa lɛ. Asafoŋ Sɔɔmɔ Ajinafoi Akuu lɛ kpɛlɛɔ shiɛlɔi anɔ koni amɛsɔmɔ akɛ gbɛgbalɔi awalɔi kɛ daa gbɛgbalɔi, ni nitsumɔhe nine lɛ ni halaa shiɛlɔi koni amɛsɔmɔ akɛ gbɛgbalɔi krɛdɛi.

¹² Abaanyɛ akpɛlɛ shiɛlɔi anɔ koni amɛkɛ kɛ́ hooo kwraa lɛ, nyɔɔŋ kome asɔmɔ akɛ gbɛgbalɔi awalɔi. Shi gbɛgbalɔi awalɔi baanyɛ asɔmɔ nyɔji enyɔ loo nɔ ni fa fe nakai kɛtsara nɔ, loo amɛsɔmɔ aahu kɛyashi amɛshihilɛ eŋmɛŋ amɛ gbɛ dɔŋŋ. Shiɛlɔi babaoo sɔmɔɔ akɛ gbɛgbalɔi awalɔi yɛ bei krɛdɛi amli, tamɔ Kaimɔ be lɛ loo nyɔɔŋ ni kpokpaa nɔkwɛlɔ lɛ baaba ebasara amɛsafo lɛ nɛkɛ. Mɛi komɛi sɔmɔɔ akɛ gbɛgbalɔi awalɔi yɛ nyɔji ni amɛkɛbaa nitsumɔ mli hejɔɔmɔ lɛ amli. Shiɛlɔi ni abaptisi amɛ ni miiya skul lɛ ateŋ mɛi komɛi sɔmɔɔ akɛ gbɛgbalɔi awalɔi kɛ́ ahã skul gbɛ. Shiɛlɔi baanyɛ ahala akɛ amɛkɛ ŋmɛlɛtswai ni atse nɔ baasɔmɔ akɛ gbɛgbalɔi awalɔi yɛ March kɛ April mli, kɛ agbɛnɛ hu, yɛ nyɔɔŋ ni kpokpaa nɔkwɛlɔ lɛ baaba ebasara amɛsafo lɛ mli. Ekɔɔɔ he eko shihilɛ mli ni oyɔɔ lɛ, kɛ́ ooba ojeŋ jogbaŋŋ ni ofeee nɔ ko ni esaaa yɛ Nyɔŋmɔ hiɛ, ni obaanyɛ oto obe he gbɛjianɔ koni oshɛ ŋmɛlɛtswai ni abiɔ ni ashɛ he lɛ he, ni oyɛ nɔmimaa akɛ obaanyɛ osɔmɔ akɛ gbɛgbalɔi awalɔ nyɔɔŋ kome loo nɔ lɛ, asafoŋ onukpai lɛ baasumɔ ni amɛsusu ogbɛbimɔ kɛhã sɔɔmɔ hegbɛ nɛɛ he.

¹³ Dani obaanyɛ osɔmɔ akɛ daa gbɛgbalɔ lɛ, esa akɛ ofee mɔ ko ni shihilɛ ŋmɛɔ lɛ gbɛ amrɔ nɛɛ ni ekɛ ŋmɛlɛtswai abɔ ni abiɔ ni gbɛgbalɔi kɛshiɛ daa afi lɛ ashiɛ. Akɛ daa gbɛgbalɔ lɛ, esa akɛ okɛ asafo ni osɔmɔɔ yɛ mli lɛ afee ekome kɛtsu nii. Gbɛgbalɔi ni yɔɔ ekãa lɛ yeɔ amɛbuaa asafo lɛ waa, ejaakɛ ekãa ni amɛyɔɔ yɛ shiɛmɔ nitsumɔ lɛ mli lɛ tsɛŋeɔ mɛi krokomɛi, ni amɛbaanyɛ amɛwo mɛi hewalɛ ni amɛ hu amɛbatsɔmɔ gbɛgbalɔi. Dani obaanyɛ obi gbɛ koni ahã osɔmɔ akɛ daa gbɛgbalɔ lɛ, esa akɛ ofee shiɛlɔ ni feɔ nɔkwɛmɔnɔ kpakpa ni abaptisi lɛ kɛ́ hooo kwraa lɛ nyɔji ekpaa.

¹⁴ Bei pii lɛ, ahalaa gbɛgbalɔi krɛdɛi lɛ kɛjɛɔ daa gbɛgbalɔi ni shiɛmɔ nitsumɔ lɛ mɔɔ shi jogbaŋŋ lɛ ateŋ. Esa akɛ amɛfee mɛi ni baanyɛ ayasɔmɔ yɛ he fɛɛ he ni nitsumɔhe nine lɛ kɛ amɛ baaya. Bei pii lɛ, hei nɛɛ ji hei ni etse amɛhe banee ni abaanyɛ ana mɛi ni yɔɔ wiemɔ lɛ he miishɛɛ yɛ ni ato asafoi hei ashishi hu yɛ. Bei komɛi lɛ, ahãa gbɛgbalɔi krɛdɛi yasɔmɔɔ yɛ asafoi ni nyɛɛɛ atsu amɛshikpɔŋkuku lɛ mli nii lɛ amli. Ahãa gbɛgbalɔi krɛdɛi komɛi ni ji asafoŋ onukpai hu lɛ yayeɔ amɛbuaa asafoi bibii, kɛ́ shiɛlɔi babaoo ahe ehiaaa amɛ po. Ahãa gbɛgbalɔi krɛdɛi shika fioo koni amɛkɛwo amɛhe nyɔji. Aholeɔ mɛi komɛi akɛ gbɛgbalɔi krɛdɛi be kukuoo.

¹⁵ Gbɛtsɔɔmɔ Kuu lɛ Sɔɔmɔ Nitsumɔ Ajinafoi Akuu lɛ ji mɛi ni holeɔ maŋsɛɛ sɔɔlɔi, ni no sɛɛ lɛ, maŋ nɔ ni akɛ amɛ baaya lɛ Nitsumɔhe Nine Ajinafoi Akuu lɛ hãa amɛyasɔmɔɔ yɛ hei ni mɛi fa babaoo yɛ. Amɛhãa shiɛmɔ nitsumɔ lɛ mɔɔ shi ni atsuɔ asafoŋ nitsumɔi lɛ jogbaŋŋ. Bei pii lɛ, dani abaahã mɔ ko asɔmɔ akɛ maŋsɛɛ sɔɔlɔ lɛ, belɛ etee Skul Kɛhã Maŋtsɛyeli Sane Kpakpa Jajelɔi lɛ. Ahãa maŋsɛɛ sɔɔlɔi wɔɔhe kɛ shika fioo koni amɛkɛwo amɛhe nyɔji.

¹⁶ Mɛi ni Gbɛtsɔɔmɔ Kuu lɛ holeɔ amɛ akɛ kpokpaa nɔkwɛlɔi lɛ sɔmɔɔ klɛŋklɛŋ akɛ kpokpaa nɔkwɛlɔi ayelikɛbualɔi koni akɛtsɔse amɛ ni amɛná niiashikpamɔ. Hii nɛɛ sumɔɔ shiɛmɔ nitsumɔ lɛ waa ni amɛsumɔɔ amɛnyɛmimɛi lɛ hu. Amɛji gbɛgbalɔi ni hiɛ dɔɔ yɛ shiɛmɔ nitsumɔ lɛ he, ni kaseɔ Biblia lɛ jogbaŋŋ, ni amɛbɔɔ mɔdɛŋ waa yɛ wiemɔhãmɔ kɛ nitsɔɔmɔ mli. Amɛjieɔ mumɔ lɛ yibii lɛ kpo jogbaŋŋ, ni amɛŋmɛɔ pɛpɛɛpɛ, amɛnuɔ nii ashishi, ni amɛkɛ sɛɛyoomɔ tsuɔ nii. Kɛ́ nyɛmi nuu lɛ ebote gbalashihilɛ mli lɛ, esa akɛ eŋa ni ji gbɛgbalɔ lɛ afee mɔ ni feɔ nɔkwɛmɔnɔ kpakpa yɛ ejeŋba kɛ bɔ ni ekɛ mɛi yeɔ ehãa lɛ mli. Esa akɛ eŋa lɛ afee shiɛlɔ ni shiɛmɔ nitsumɔ lɛ mɔɔ shi. Kɛfata he lɛ, esa akɛ efee ŋa ni baa ehe shi, ni ewieee ewu naa loo eheee wiemɔ yɛ ewu naa kɛ́ amɛkɛ mɛi miigba sane. Dekã bɛ nitsumɔ ni kpokpaa nɔkwɛlɔi kɛ amɛŋamɛi lɛ tsuɔ lɛ he kwraa, no hewɔ lɛ, esa akɛ mɛi ni miibɔ mɔdɛŋ ni amɛshɛ sɔɔmɔ hegbɛ nɛɛ he lɛ afee mɛi ni yɔɔ gbɔmɔtsoŋ hewalɛ kpakpa. Gbɛgbalɔi ŋmalaaa gbɛbimɔ woji anɔ nii koni ahole amɛ kpokpaa nɔkwɛlɔi. Moŋ lɛ, kɛ́ amɛmiishwe ni amɛtsu kpokpaa nɔkwɛmɔ nitsumɔ lɛ eko lɛ, amɛhãa amɛkpokpaa nɔkwɛlɔ lɛ leɔ, ni lɛ hu ekɛ ehe ŋaawoo hãa amɛ.

¹⁷ Skul Kɛhã Maŋtsɛyeli Sane Kpakpa Jajelɔi: Ehe miihia ni aná Maŋtsɛyeli sane kpakpa shiɛlɔi babaoo ni baatsu shikpɔŋkukuji ni afɔɔɔ amɛmli nitsumɔ lɛ amli nii, ni agbɛnɛ hu, amɛtswa asafoi lɛ amɛma shi yɛ hemɔkɛyeli lɛ mli. No hewɔ lɛ, hii kɛ yei oshijafoi, kɛ gbalashihilɛ mli hefatalɔi baanyɛ aŋmala gbɛbimɔ woji anɔ nii koni akɛ tsɔsemɔ krɛdɛɛ ahã amɛ yɛ Skul Kɛhã Maŋtsɛyeli Sane Kpakpa Jajelɔi lɛ. Kɛ́ amɛgbe skul nɛɛ naa lɛ, ahãa amɛyasɔmɔɔ akɛ daa gbɛgbalɔi yɛ hei ni shiɛlɔi babaoo ahe miihia yɛ, yɛ amɛmaŋ lɛ mli. Shi amɛteŋ mɛi ni shihilɛ baaŋmɛ amɛ gbɛ ni amɛyɛ he miishɛɛ hu lɛ, ahãa amɛ sɔɔmɔ hegbɛi krokomɛi yɛ amɛmaŋ lɛ mli loo yɛ maŋ kroko nɔ. Ahãa amɛteŋ mɛi fioo yasɔmɔɔ akɛ gbɛgbalɔi krɛdɛi be kukuoo ko loo ahãa amɛtsɔmɔɔ gbɛgbalɔi krɛdɛi kwraa. Gbɛgbalɔi ni miisumɔ ni amɛya skul nɛɛ eko lɛ baanyɛ ana taomɔ nii kɛhã skul lɛ kɛ́ amɛtee kpee ni afeɔ kɛhã skul nɛɛ yɛ kpokpaa wulu nɔ kpee shishi lɛ eko.

¹⁸ Buu-Mɔɔ Gilead Biblia Skul: Nyɛmimɛi hii kɛ yei oshijafoi kɛ gbalashihilɛ mli hefatalɔi ni ahalaa koni amɛya skul nɛɛ eko lɛ wieɔ Blɔfo ni amɛmiisɔmɔ momo akɛ be fɛɛ sɔɔlɔi krɛdɛi. Amɛji mɛi ni ana akɛ amɛbaanyɛ amɛwo asafoi srɔtoi lɛ amli bii lɛ hewalɛ ni amɛhã shiɛmɔ nitsumɔ lɛ amɔ shi loo amɛbaanyɛ amɛye amɛbua koni nitsumɔ ni atsuɔ yɛ nitsumɔhe niji srɔtoi lɛ amɔ shi. Amɛsumɔɔ ni amɛsɔmɔ nyɛmimɛi lɛ, ni amɛjɛɔ mlihilɛ mli amɛyeɔ amɛbuaa amɛ koni amɛna Ŋmalɛ mli gbɛtsɔɔmɔ kɛ teokrase gbɛtsɔɔmɔ ni amɛkɛtsu nii. Nitsumɔhe Nine Ajinafoi Akuu lɛ hãa mɛi ni baanyɛ aya skul nɛɛ eko lɛ ŋmalaa gbɛbimɔ woji anɔ nii. Kɛ́ mɛi tee skul nɛɛ eko amɛgbe naa lɛ, abaanyɛ ahã amɛyasɔmɔ yɛ nitsumɔhe nine lɛ loo he kroko, kɛ́ yɛ amɛmaŋ lɛ mli jio, maŋsɛɛ jio.

¹⁹ Sɔɔmɔ ni asɔmɔɔ yɛ Betel lɛ ji sɔɔmɔ hegbɛ krɛdɛɛ. Gbɛ́i Betel lɛ shishi ji “Nyɔŋmɔ Shĩa,” ni eji gbɛ́i ni sa jogbaŋŋ kɛhã hei nɛɛ ni atsuɔ teokrase nitsumɔi yɛ lɛ. Nyɛmimɛi hii kɛ yei ni sɔmɔɔ yɛ Betel lɛ yeɔ amɛbuaa ni afeɔ Biblia kasemɔ woji, atsɔɔ shishi kɛyaa wiemɔi krokomɛi amli, ni akɛyahãa asafoi srɔtoi lɛ, ni eji nitsumɔ ko ni he hiaa waa. Amɛsɔɔmɔ nitsumɔ lɛ yeɔ ebuaa Gbɛtsɔɔmɔ Kuu lɛ waa ni enyɛɔ ekwɛɔ asafoi srɔtoi ni yɔɔ shikpɔŋ lɛ nɔ fɛɛ lɛ anɔ ni ekɛ gbɛtsɔɔmɔ hãa amɛ. Betel weku lɛ mli bii ni sɔmɔɔ akɛ wiemɔ shishitsɔɔlɔi lɛ ateŋ mɛi babaoo hiɔ nitsumɔhe nine lɛ shikpɔŋkuku lɛ mli hei ni awieɔ wiemɔ ni amɛtsɔɔ shishi lɛ yɛ lɛ ni amɛtsuɔ amɛnitsumɔ lɛ yɛ jɛmɛ. Enɛ hãa amɛnuɔ ni aawie wiemɔ lɛ yɛ shihilɛi srɔtoi amli. Amɛnaa hu kɛji mɛi nuɔ wiemɔi ni amɛkɛtsuɔ nii yɛ woji ni amɛtsɔɔ shishi lɛ amli lɛ ashishi loo amɛnuuu shishi.

²⁰ Nitsumɔi ni atsuɔ yɛ Betel lɛ babaoo wa waa. No hewɔ lɛ, mɛi ni atsɛɔ koni amɛbasɔmɔ yɛ Betel lɛ ateŋ mɛi babaoo ji nyɛmimɛi oblahii ni ejɔɔ amɛhe nɔ ni abaptisi amɛ ni yɔɔ gbɔmɔtsoŋ hewalɛ kpakpa. Kɛ́ oosumɔ ni oyasɔmɔ yɛ Betel lɛ, naa osafoŋ onukpai lɛ koni amɛtsɔɔ bo taomɔ nii kɛhã Betel sɔɔmɔ.

²¹ Nitsumɔ ni atsu kɛma Solomon sɔlemɔ shĩa lɛ ji sɔɔmɔ krɔŋŋ, ni nakai nɔŋŋ eji yɛ nitsumɔ ni atsuɔ kɛmamɔɔ tsũi kɛhã teokrase nifeemɔi lɛ agbɛfaŋ. (1 Maŋ. 8:13-18) Nyɛmimɛi hii kɛ yei babaoo kɛ amɛbe kɛ amɛnibii shãa afɔle kɛyeɔ amɛbuaa ni amamɔɔ tsũi kɛhã teokrase nifeemɔi kɛtsɔɔ akɛ amɛhiɛ dɔɔ Nyɔŋmɔjamɔ he waa.

²² Ani obaanyɛ oye obua? Kɛ́ oji shiɛlɔ ni abaptisi bo ni oosumɔ ni otsu nitsumɔ nɛɛ eko lɛ, nyɛmimɛi ni kwɛɔ tsumaa nitsumɔ lɛ nɔ, ni yɔɔ he ni oyɔɔ lɛ baasumɔ ni obatsu eko, ni kɛ́ nɔ ko fioo pɛ po ole yɛ tsumaa he lɛ, amɛbaasumɔ ni amɛtsɔɔ bo. Mɛni hewɔ ohãaa osafoŋ onukpai lɛ ale akɛ oosumɔ ni oye obua kɛtsu nitsumɔ nɛɛ? Shiɛlɔi komɛi ni abaptisi amɛ ni shɛɔ taomɔ nii lɛ ahe lɛ enyɛ amɛkɛ amɛhe ehã kɛye amɛbua ni amamɔ tsũi kɛhã teokrase nifeemɔi yɛ maji krokomɛi anɔ.

²³ Hegbɛi pii yɛ kɛhã wɔ akɛ wɔbaafata he kɛmamɔ tsũi kɛhã teokrase nifeemɔi. Kɛ́ aama tsũ kɛhã teokrase nifeemɔ yɛ he ko, ni shiɛlɔi ni abaptisi amɛ ni feɔ nɔkwɛmɔnɔ kpakpa ni le tsumaa he nɔ ko lɛ ashĩa bɛŋkɛ jɛmɛ lɛ, amɛbaanyɛ amɛsɔmɔ akɛ Maŋ Tsumaa nitsulɔi ni kɛ amɛhe ehã. Kɛ́ aama tsũ lɛ yɛ shɔŋŋ lɛ, nitsumɔhe nine lɛ halaa mɛi komɛi akɛ tsumalɔi ni kɛ amɛhe ehã koni amɛyaye amɛbua otsii enyɔ kɛmiimɔ nyɔji etɛ. Atsɛɔ mɛi ni ahalaa koni amɛsɔmɔ be kpalaŋŋ lɛ akɛ tsumaa sɔɔlɔi. Kɛ́ ahã tsumaa sɔɔlɔ ko yasɔmɔ yɛ maŋsɛɛ lɛ, atsɛɔ lɛ maŋsɛɛ tsumaa sɔɔlɔ. Tsumaa sɔɔlɔi kɛ tsumaa nitsulɔi ni kɛ amɛhe ehã ji mɛi ni feɔ Tsumaa Kuu, ni amɛ amɛnyiɛɔ hiɛ yɛ tsumaa nitsumɔ lɛ eko fɛɛ eko mli, ni Maŋ Tsumaa nitsulɔi ni kɛ amɛhe ehã kɛ asafoi ni amaa tsũ lɛ ahãa amɛ lɛ mli bii yeɔ amɛbuaa. Kɛ́ Tsumaa Kui lɛ eko ma tsũ lɛ eko amɛgbe naa lɛ, amɛshiɔ ni amɛyamaa ekroko yɛ nitsumɔhe nine lɛ shikpɔŋkuku lɛ mli.

²⁴ Kɛ́ ojɔɔ owala nɔ ohã Yehowa lɛ, no tsɔɔ akɛ ooshwe ni osɔmɔ Yehowa kɛya naanɔ. Shi be ni ofeɔ enɛ lɛ, mɛɛ mumɔŋ otii okɛmamɔɔ ohiɛ? Kɛ́ okɛ mumɔŋ otii mamɔ ohiɛ lɛ, no baahã okɛ ohewalɛ kɛ nibii krokomɛi ni oyɔɔ lɛ atsu nii jogbaŋŋ. (1 Kor. 9:26) Kɛ́ okɛ enɛɛmɛi fee oti lɛ, ebaahã ohe awa yɛ hemɔkɛyeli lɛ mli ni ebaaye ebua bo ni okɛ ojwɛŋmɔ ama nibii ni he hiaa waa lɛ anɔ be ni obɔɔ mɔdɛŋ koni oshɛ sɔɔmɔ hegbɛi krokomɛi ahe lɛ.​—Fip. 1:10; 1 Tim. 4:15, 16.

²⁵ Bɔfo Paulo fee nɔkwɛmɔnɔ kpakpa yɛ Nyɔŋmɔ sɔɔmɔ lɛ mli ehã wɔ koni wɔkase. (1 Kor. 11:1) Paulo kɛ ehe shã afɔle waa yɛ Yehowa sɔɔmɔ lɛ mli. Ekpɛlɛ nɔ akɛ Yehowa hã lɛ hegbɛ babaoo. Paulo ŋma kɛmaje nyɛmimɛi ni yɔɔ Korinto lɛ akɛ: “Agbele shinaa wulu ko naa ahã mi kɛhã nitsumɔ.” Ani enɛ jeee anɔkwale yɛ wɔ hu wɔgbɛfaŋ? Hɛɛ, nibii pii yɛ ni wɔbaanyɛ wɔfee koni wɔnyɛ wɔkɛ asafo lɛ afee ekome kɛtsu nii yɛ Yehowa sɔɔmɔ lɛ mli, titri lɛ yɛ Maŋtsɛyeli lɛ he sane kpakpa lɛ shiɛmɔ lɛ mli. Shi tamɔ bɔ ni eba lɛ yɛ Paulo gbɛfaŋ lɛ, wɔ hu wɔkɛ “shiteekɛwolɔi babaoo” baakpe be ni wɔboteɔ “shinaa wulu” lɛ mli lɛ. (1 Kor. 16:9) Paulo tswa efai shi akɛ ebaatsɔse ehe. Kadimɔ nɔ ni ekɛɛ lɛ: “Migbálaa migbɔmɔtso lɛ mai ni miyeɔ lɛ nyɔŋ.” (1 Kor. 9:24-27) Ani wɔ hu wɔtswa wɔfai shi nakai nɔŋŋ?

²⁶ Esa akɛ wɔteŋ mɔ fɛɛ mɔ kɛ teokrase otii amamɔ ehiɛ yɛ bɔ ni eshihilɛ ji lɛ naa. Mɛi babaoo miisɔmɔ yɛ be fɛɛ sɔɔmɔ lɛ fã ko mli amrɔ nɛɛ akɛni amɛkɛ teokrase otii mamɔ amɛhiɛ mra mli yɛ amɛshihilɛ mli lɛ hewɔ. Be ni amɛji gbekɛbii po lɛ, amɛfɔlɔi kɛ mɛi krokomɛi wo amɛ hewalɛ koni amɛfee nakai. No hewɔ lɛ, amɛtsu nitsumɔi srɔtoi ni hãa mɔ náa miishɛɛ yɛ Yehowa sɔɔmɔ lɛ mli, ni amɛshwako amɛhe. (Abɛi 10:22) Otii krokomɛi ni sa ni wɔbaanyɛ wɔkɛmamɔ wɔhiɛ ji, ni wɔya shiɛmɔ daa otsi, wɔje Biblia mli nikasemɔ shishi ni wɔtsa nɔ, loo wɔkɛ be babaoo baasaa wɔhe kɛhã asafoŋ kpeei. Nɔ ni he hiaa ji, ni wɔbaafi shi ni wɔtsu wɔsɔɔmɔ lɛ he nii pɛpɛɛpɛ. Kɛ́ wɔfee nakai lɛ, wɔbaawo Yehowa hiɛ nyam ni wɔbaashɛ oti ni fe fɛɛ ni wɔkɛma wɔhiɛ lɛ he, no ji, ni wɔsɔmɔ lɛ kɛya naanɔ.​—Luka 13:24; 1 Tim. 4:7b, 8.