Yohane Saa Gbɛ Lɛ

Zakaria kɛ Elizabet bi Yohane da ebatsɔ gbalɔ. Yehowa tsɔ Yohane nɔ ehã mɛi le akɛ Mesia lɛ miiba. Shi yɛ nɔ najiaŋ ni Yohane baashiɛ yɛ kpeehei lɛ loo maji lɛ amli lɛ, eshiɛ yɛ ŋa lɛ nɔ. Mɛi jɛ Yerusalem kɛ hei srɔtoi yɛ Yudea amɛba koni Yohane atsɔɔ amɛ nii. Yohane hã amɛle akɛ, dani amɛbaanyɛ amɛtsɔmɔ Nyɔŋmɔ nanemɛi lɛ, esa akɛ amɛkpa nibii gbohii ni amɛfeɔ lɛ. Mɛi ni bo lɛ toi lɛ ateŋ mɛi pii kpa eshai ni amɛfeɔ lɛ. Amɛtsake amɛtsui ni Yohane baptisi amɛ yɛ Yordan Faa lɛ mli.

Yohane kɛ heloonaa nibii pii gbaaa ehe naa. Ewo atade ni akɛ afukpɔŋɔ hetsɔi fee, ni niyenii ni eyeɔ ji baalabii kɛ ŋa mli wo. Yohane he fee mɛi pii naakpɛɛ. Farisifoi kɛ Sadukifoi lɛ wóɔ amɛhe nɔ. Shi amɛ po amɛba amɛbakwɛ Yohane. Be ni Yohane na amɛ lɛ, ekɛɛ amɛ akɛ: ‘Nyɛkpaa nibii gbohii ni nyɛfeɔ lɛ ni nyɛtsakea nyɛtsui. Nyɛkasusua akɛ Abraham bii ni nyɛtsɛɔ nyɛhe lɛ hewɔ lɛ nyɛhi fe mɛi krokomɛi. Kɛ́ Abraham bii ji nyɛ po lɛ, no etsɔɔɔ akɛ Nyɔŋmɔ bii ji nyɛ.’

Yudafoi pii ba Yohane ŋɔɔ ni amɛbabi lɛ akɛ: ‘Mɛni esa akɛ wɔfee koni wɔsa Nyɔŋmɔ hiɛ?’ Yohane kɛɛ amɛ akɛ: ‘Mɔ ni yɔɔ atadei enyɔ lɛ, ekɛ mɔ ni bɛ eko lɛ aja.’ Ani ole nɔ hewɔ ni ekɛɛ amɛ nakai lɛ? Eetao amɛle akɛ dani mɔ ko baanyɛ asa Nyɔŋmɔ hiɛ lɛ, esa akɛ mɔ lɛ asumɔ mɛi krokomɛi.

Yohane kɛɛ toohelɔi lɛ akɛ: ‘Nyɛyea anɔkwa ni nyɛkashishiua mɔ ko mɔ ko.’ Ekɛɛ asraafoi lɛ akɛ: ‘Nyɛkahea mɛi anibii yɛ amɛdɛŋ, ni nyɛkamalea hu.’

Osɔfoi kɛ Levibii hu ba Yohane ŋɔɔ amɛbabi lɛ akɛ: ‘Namɔ ji bo? Mɔ fɛɛ mɔ miitao ale.’ Yohane kɛɛ amɛ akɛ: ‘Miji mɔ gbee ni Yesaia gba akɛ eboɔ yɛ ŋa lɛ nɔ koni etsɔɔ mɛi gbɛ kɛya Yehowa ŋɔɔ lɛ.’

Mɛi nya nibii ni Yohane tsɔɔ amɛ lɛ ahe waa. Mɛi pii po susu akɛ lɛ ji Mesia lɛ. Shi ekɛɛ amɛ akɛ: ‘Mɔ ko ni nɔ kwɔ fe mi miiba, ni misaaa mɔ ni fɛneɔ nakai mɔ lɛ tokota naa kpãa po. Mi lɛ, nu mikɛbaptisiɔ nyɛ, shi lɛ lɛ, ekɛ mumɔ krɔŋkrɔŋ ni baabaptisi nyɛ.’