Lalai
Lalai Awolo Lɛ Ji Tsamɔ-Tsofa Kɛha Tsui Lɛ
LALAI awolo lɛ ji wiemɔ-lalai awolo kɛ lala, wolo diɛŋtsɛ kɛha blema Hebri maŋ lɛ. Akɛ emli wiemɔi lɛ sɔ̃ lalai ni akɛtsu nii yɛ Yehowa jamɔ mli yɛ Yerusalem sɔlemɔwe lɛ, dani agbɛnɛ hu nomɛi titri Israelbii aŋkroaŋkroi lá yɛ amɛshiai kɛ amɛtsuii amli. Bɔni ato nomɛi amli wiemɔi lɛ aha lɛ damɔɔɔ wiemɔi ni je amɛhe anɔ, ni nakai nɔŋŋ hu edamɔɔɔ lalai amli liamɔi akɛlɛmɔ nɔ keketee. Bei pii lɛ anaa susumɔi ni eko kɛ eko nyiɛ, beikomɛi lɛ susumɔi ni je amɛhe, ni bei krokomɛi amli hu anaa susumɔi ni yɔɔ sɔrɔto yɛ eko kɛ eko he. Enɛ haa kanelɔ lɛ jwɛŋmɔ kɛ emumɔ nyiɛɔ susumɔ lɛ sɛɛ jogbaŋŋ ni enɛ haa enuɔ shishi ni etaa emli hu. Bɔni atĩ wiemɔi kɛ susumɔi komɛi amli shii abɔ aha kɛ bɔni atsake wiemɔi lɛ ekomɛi amli aha lɛ fɛɛ maa anɔkwalei ni awie lɛ anɔ mi, ni amɛhaa nomɛi jeɔ kpo jogbaŋŋ ni amɛmli feɔ faŋŋ. Enɛ he nɔkwɛmɔnii akpei abɔ ni yɔɔ lɛ amli enyɔoo ko ni nyiɛ sɛɛ nɛɛ tsɔɔ enɛ jogbaŋŋ:
“Yehowa mla lɛ hi kɛwula shi, ehaa susuma tsui nyɔɔ emli.
Yehowa odase lɛ ma shi shiŋŋ, ehaa kwashia leɔ nii.”—Lala 19:8.
“Mɔfɔŋ faa nii ni ewooo nyɔmɔ;
Shi jalɔ naa mɔbɔ ni ehaa mɔ nɔ̃.”—Lala 37: 21
“Kɛ́ minyiɛ haomɔ mli lɛ, ohaa miyi naa wala!
Okpãa onine mli owoɔ mihenyɛlɔi lɛ amlifu lɛ,
Ni oninejurɔ hereɔ miyiwala.”—Lala. 138:7.
Afee Lalai lɛ aha tsui lɛ. Amɛnaà hewalɛ kpele yɛ mɛi anɔ, ejaakɛ kɛtsɔ Lalai lɛ anɔ lɛ, Nyɔŋmɔ kpaà adesa tsui lɛ he mama, ni ewieɔ ehenumɔi kɛ ekaai fɛɛ ahe. Kanelɔ lɛ nyɛɔ enaa suɔmɔ, miishɛɛ, mlifilimɔ, yijiemɔ, awerɛhoo, nijiaŋwujee, tsuitsakemɔ, kɛ hiɛnɔkamɔ fɛɛ yɛ mli. Kanelɔ lɛ nyɛɔ ekaneɔ haomɔ ni hela kɛbaa, nanemɛi anyɛɛ ni mli wa, dɔlɛ ni baa kɛji mɔko naanyo ni eheɔlɛ eyeɔ waa lɛ tsɔ sɛɛgbɛtsɔɔlɔ, tsuikuumɔ kɛ gbeyei ni asheɔ Nyɔŋmɔ kɛji mɔko fee esha, miishɛɛ ni mɔko naà kɛji ená ele akɛ akɛ ehe eshai ekelɛ, kɛ henumɔi krokomɛi akpei abɔ ni shihilɛ mli tsakemɔi sɔrɔtoi kɛbaa lɛ ahe sane, dani agbɛnɛ enyɛɔ enuɔ enɛɛmɛi fɛɛ ahe hu.
Yɛ yiŋtoi nɛɛ ahewɔ lɛ, Lalai lɛ ji Nyɔŋmɔ Wiemɔ lɛ fã ko ni he hiaa waa ni nyɛɔ amɛhaa Nyɔŋmɔ gbɔmɔ lɛ ‘yeɔ emuu, ni asaalɛ pɛpɛɛpɛ ahaa nitsumɔ kpakpa fɛɛ nitsumɔ kpakpa.’ (2 Tim. 3:16, 17) Wolo lɛ tɛjeɔ ehiɛ esusuɔ adesa subaŋ he, ni eshɛjeɔ kanelɔ lɛ mii yɛ adesai anaagbai fɛɛ agbɛfaŋ, ni nohewɔ lɛ Lalai lɛ abe hooo, shi moŋ anyɛɔ akɛtoɔ mɛi ni yɔɔ wala mli ŋmɛnɛ lɛ ahe, tamɔ bɔni akɛto mɛi ni hi wala mli afii akpei abɔ ni eho nɛ lɛ ahe lɛ nɔŋŋ.
NYƆŊMƆ ANUNYAM KƐ EGBOJEE
Lalai lɛ wieɔ Nyɔŋmɔ sui ni ji enunyam kɛ emuuyeli lɛ ahe yɛ gbɛ ko ni hewalɛ yɔɔ mli nɔ. Amɛwieɔ bɔni Yehowa naanɔshihilɛ, egbojee, kɛ ehewalɛ ni fe fɛɛ eko lɛ yɔɔ fɛo amɛha lɛ ahe yɛ gbɛ ko ni hiɛ yɔɔ nyam nɔ. Anyɛɔ anaa enɛ he sane fioo ko yɛ wiemɔi kukuji etɛ ni atsɛ kɛjɛ Lalai lɛ amli ni nyiɛ sɛɛ nɛɛ amli:
“Nuntsɔ [Yehowa], bo ji wɔbobaahe
Yɛ yinɔi fɛɛ mli.
Beni anáko afɔ gɔji lɛ,
Ni onáko obɔ shikpɔŋ kɛ jeŋ lɛ,
Bo ji Mawu kɛjɛ naanɔ kɛyaa naanɔ. . . .
Ejaakɛ ohiɛ lɛ, afii akpe tamɔ nyɛ, kpaakpa nyɛ,
Kɛ nyɔɔŋ buuhe pɛ.”—Lala 90:1-4.
“Blema beebe oto shikpɔŋ lɛ shishi,
Ni ŋwɛi lɛ oniji anaa nitsumɔ ni.
Amɛ lɛ amɛhiɛ baakpata, shi bo lɛ, oyɛ daa:
Ni amɛ fɛɛ tswɛm amɛbaasu tamɔ atade;
Oootsake amɛ tamɔ mama, ni amɛ aaatsake.
Shi bo lɛ, oyɛ bɔni oyɔɔ lɛ nɔŋŋ, ni ofii lɛ etaaa gbikogbiko.”—Lala 102 :26-28.
“Oblɔtu kɛ duŋ kpii ebɔlelɛ kɛkpe;
Jalɛ kɛ kojomɔ ji emaŋtsɛsɛi lɛ shishitoonii.
La nyiɛɔ ehiɛ kɛyaa.
Ni eyashãa ehenyɛlɔi lɛ kɛkpeɔ.
Esarawai lɛ haa jeŋ tseɔ;
Shikpɔŋ lɛ naa ni ekpokpoɔ.
Gɔji sereɔ tamɔ wo-agbaku yɛ Yehowa hiɛ,
Yɛ shikpɔŋ muu lɛ fɛɛ Nuntsɔ lɛ hiɛ.”—Lala 97:2-5.
Nakai nɔŋŋ hu Lalai lɛ amli fɛɛ lɛ, anaa naanyobɔɔ gbagbalii ni yɔɔ Yehowa kɛ ewebii ateŋ Iɛ, taakɛ yitsei bibii komɛi ni nyiɛ sɛɛ nɛɛ tsɔɔ lɛ:
BƆNI EJWƐŊƆ EWEBII LƐ AHE KƐ SUƆMƆ EHAA LƐ
“Ejaakɛ bo, Yehowa, ji mibobaahe!
Oŋɔ Ŋwɛinyo lɛ ofee oshihilɛhe.
Efɔŋ ko efɔŋ ko baŋ onɔ,
Ni haomɔ ko bɛŋkɛŋ obuu lɛ.
Ejaakɛ eeewo ebɔfoi lɛ akpɔ yɛ ohewɔ,
Ni amɛbaa oyi yɛ ogbɛ̀i fɛɛ nɔ;
Amɛ aaahiɛo yɛ amɛdɛ̃,
Koni okaŋɔ onane oshi tɛ ko.”—Lala 91:9-12.
EMƆBƆNALƐ LƐ
“Bɔni tsɛ musuŋ tsɔɔlɛ yɛ ebii ahe lɛ,
Nakai Yehowa musuŋ tsɔɔlɛ yɛ mɛi ni sheɔlɛ lɛ ahe.
Ejaakɛ ele wɔsu kɛ wɔbaŋ,
Ekaiɔ akɛ sũ kɛkɛ ji wɔ.”—Lala 103:13, 14.
“Kɛji bo, Yehowa, okɛɛ ooodi nishaianii asɛɛ lɛ,
Kulɛ, Nuntsɔ [Yehowa], namɔ po aaanyɛ shi adamɔ?
Shi bo odɛŋ eshaifaa yɔɔ,
Beni afee ni asheo gbeyei.
Miikwɛ Yehowa gbɛ; misusuma miikwɛ gbɛ,
Ni ewiemɔ lɛ nɔ mihiɛ kã.”—Lala 130:3-5.
ESHAFEELƆ NI ADESA JI KƐ HIAMƆ NI TSUITSAKEMƆ KƐ ESHAIFAA HE EHIALƐ LƐ
“Okɛ otsulɔ akakojo;
Ejaakɛ hiɛkaalɔ ko hiɛkaalɔ ko yeŋ bem yɛ ohiɛ.”—Lala 143:2.
“Yehowa, kaakã mi yɛ omlifu mli,
Ni kaagbala mitoi yɛ omlila mli!
Ejaakɛ ogaimlibii Iɛ tsɛkɛ mimli,
Ni onine tsii yɛ minɔ naakpa.
Omlifu lɛ hewɔ lɛ mihewojiaŋ ejɔɔɔ mi,
Ni mihe esha lɛ hewɔ lɛ hewalɛ ko bɛ miwui amli.
Ejaakɛ minishaianii lɛ esu mi;
Amɛtamɔ jatsu tsiŋmoo ni tsii fe mi.
Mifáji lɛ miije fũ, amɛkpɔtɔ
Yɛ mikwashiafeemɔ lɛ hewɔ.
Midɔ kɔmɔɔ, ni mima miyi shi naakpa;
Daanɛɛ minyiɛ mɔbɔmɔbɔ.”—Lala 38:2-7.
“Naa, nɔsha mli afɔ mi yɛ,
Ni esha mli minyɛ ŋɔmi hɔ yɛ.”
“Mihe esha lɛ okɛ hisopo ajie, ni mihe atse;
Juu mihe ni maye futaa fe snoo.”
“Teemɔ ohiɛ kɛjɛ mihe eshai lɛ anɔ,
Ni ogbe minishaianii lɛ fɛɛ!”—Lala 51:7, 9, 11.
“Ajɔɔ mɔni aŋɔ enɔtɔmɔ afalɛ, ni atsimɔ ehe esha nɔ lɛ!
Ajɔɔ gbɔmɔ ni Yehowa ebuuu nɔsha ko ehaaalɛ,
Ni apasa bɛ emumɔ mli lɛ! . . .
Mijaje mihe esha mitsɔɔo, ni minɔsha lɛ mikɛteee.
Mikɛɛ akɛ: Majaje minɔtɔmɔ matsɔɔ Yehowa!
Ni bo lɛ okɛ mihe esha nɔsha lɛ fami.”—Lala 32:1-5.
NYƆŊMƆ MLI HIƐNƆKAMƆ KƐ HEKƐNƆFƆƆ
“Ajie Nuntsɔ [Yehowa] lɛ yi! Daanɛɛ etereɔ wɔjatsui lɛ ehaa wɔ;
Mawu lɛ nɔŋŋ ji wɔyiwalaheremɔ.
Sela.
Lɛ, Mawu lɛ, ji wɔyiwalahetemɔ Mawu,
Ni Nuntsɔ Yehowa lɛ ji mɔni jieɔ mɔ kɛjɛɔ gbele mli.”—Lala 68:20, 21.
“Namɔ miyɔɔ yɛ ŋwɛi?
Ni kɛ́ miná bo lɛ, mitaooo nɔko yɛ shikpɔŋ lɛ nɔ.
Kɛ̀ miheloo kɛ mitsui miitã lɛ,
Nyɔŋmɔ ji mitsui tɛsaa kɛ migbɛfaŋnɔ kɛyaa naanɔ!
Shi naa, mɛi ni kɛo teŋ jɛkɛ lɛ ahiɛ aaakpata;
Ofiteɔ mɛi fɛɛ ni jeɔ osɛɛ yabɔɔ ajwamaŋ lɛ.
Shi mi lɛ, Nyɔŋmɔ ŋɔɔ hilɛ hi ha mi;
Mikɛ Nuntsɔ Yehowa efee mibobaahe,
Koni magba onitsumɔi lɛ fɛɛ.”—Lala 73:25-28.
“Nyɔŋmɔ nɔ mihiɛ kã, misheee gbeyei;
Mɛni gbɔmɔ aaanyɛ mi afee?”—Lala 56:12.
“Nɛkɛ Nyɔŋmɔ nɛɛ ji wɔ-Nyɔŋmɔ kɛyaa naanɔ;
Lɛ nɔŋŋ eeetsɔɔ wɔ gbɛ kɛaatee naanɔ.”—Lala 48:15.
MESIA MAŊTSƐYELI LƐ
Lalai lɛ wieɔ Kristo Yesu kɛ Mesia maŋtsɛyeli lɛ he saŋŋ; atsĩii egbɛi atã moŋ, shi awieɔ ehe titri akɛ maŋtsɛ ko ni hiɛ yɔɔ nyam ni yeɔ shikpɔŋ muu lɛ fɛɛ nɔ yɛ toiŋjɔlɛ kɛ jalɛ mli. Etamɔ nɔni lalai lɛ ekomɛi gbaa yɛ Mesia lɛ he tɛ̃ɛ, tamɔ Lala 2 kɛ 110 nɛkɛ. Yɛ hei komɛi lɛ, lalai lɛ ekomɛi wieɔ Mesia lɛ he, yɛ okaditoo gbɛ nɔ, shi jeee pɔtɛɛ. No ji akɛ, lalatsɛ lɛ miisusu lɛdiɛŋtsɛ enaagbai aloo maŋ muu lɛ fɛɛ mli saji ahe, ni nɔni ekɛɛ lɛ kɔɔ egbii lɛ ahe pɔtɛɛ. Shi kɛji aawie yɛ shishitoomlai agbɛfaŋ aloo yɛ nɔni aŋma lɛ mlibaa muu aloo naagbee mlibaa kwraa gbɛfaŋ lɛ, mɛi ni ŋmala Kristofoi a-Hela Ŋmalɛi lɛ kɛ nomɛi to Kristo he. Ebaafee akɛ jeee befɛɛbe lalatsɛ lɛ susu Mesia lɛ he beni eŋmala wiemɔi komɛi lɛ, ni nakai nɔŋŋ hu efeŋ akɛ enu mɔ loo nɔ̃ he ni ewiemɔi lɛ to okadi yɛ, lɛ shishi kɛwula shi, tamɔ bɔni bɔfo Petro kɛɛ akɛ gbalɔi lɛ nuuu nibii ni amɛgba amɛto lɛ fɛɛ shishi kɛwulaaa shi befɛɛbe lɛ.—1 Pet. 1:10-12.
Enɛ he nɔkwɛmɔnɔ ko yɛ Lala 102:26-28. Nakai lala lɛ kuku ni ji enyɔ lɛ tsɔɔ akɛ Yehowa ji mɔni lalatsɛ lɛ kɛwieɔ lɛ. Shi yɛ Hebribii Awolo 1:10-12 lɛ, bɔfo Paulo kɛ sui nɛɛ wo Yesu Kristo, ejaakɛ Yesu ji mɔni Nyɔŋmɔ kɛtsu nii yɛ nibɔɔ mli, ni lɛ nɔŋŋ amrɔ nɛɛ akɛ hegbɛ eha “yɛ ŋwɛi kɛ shikpɔŋ nɔ” lɛ. (Mat. 28:18; Kol. 1:15-17) Yesu haa wɔnaa Nyɔŋmɔ sui kɛ enifeemɔi lɛ fɛɛ yɛ lɛdiɛŋtsɛ emli.
Lala 22 ni akɛɔ akɛ David ji mɔni ŋma lɛ, gbaa Kristo piŋmɔi Iɛ ekomɛi ahe sane yɛ abɛbua wiemɔ mli. (Okɛ Lala 22:2 ato Marko 15:34 he okwɛ; agbɛnɛ hu okɛ nakai Iala tso muu lɛ fɛɛ ato nɔni sanekpakpai ejwɛ Iɛ ŋmala yɛ Yesu kaa kɛ esɛŋmɔ he lɛ ahe okwɛ.) Wiemɔi ni akɛtsɔɔ nibii ni tee nɔ lɛ tsɔɔ akɛ Kristo wala shihilɛ mli nomɛi baaba mli yɛ kɛwula shi.
Shi mɛi ni ŋmala lalai lɛ ná shishinumɔ ko kɛ̃ yɛ bɔni amɛniŋmai lɛ kɔɔ Mesia lɛ he yɛ hei komɛi lɛ egbɛfaŋ. Beni David ŋma Lala 16 lɛ, ajɛ Nyɔŋmɔ mumɔ mli atsirɛlɛ ni egbɔ yɛ Mesia ni akwaŋ esusuma yɛ She’ol loo Ha’des (gbonyobu) mli kɛyaŋ naanɔ ni afuŋ eheloo lɛ ni ekpɔtɔ, lɛ he. (Bɔf. 2:31, New International Version; The Jerusalem Bible; Revised Standard Version) Nohewɔ lɛ beni bɔfo Petro kɛ Yudafoi akpei abɔ wieɔ yɛ Pɛntekoste gbi lɛ nɔ lɛ, etsɔɔ akɛ Mesia lɛ he awieɔ lɛ, ni ekɛɛ: “Akɛ nɔni gbalɔ . . . [ji David] ni ele akɛ Nyɔŋmɔ ekãlɛ kitã akɛ emusuŋbii lɛ eko baata esɛi lɛ nɔ hewɔ lɛ, ena eto ni ewie Kristo shitee lɛ he, akɛ ashiŋ esusuma yɛ gbohiiaje [Hebri wiemɔ, She’ol] ni eheloo hu enaŋ fitemɔ.”—Bɔf. 2:30, 31.
Petro kɛ nɛkɛ Sanenaatsɔɔmɔ nɛɛ tsu nii yɛ gbɛ ko ni hewalɛ yɔɔ mli nɔ yɛ Yudafoi ni ebua amɛhe naa ni kpɛlɛɔ nɔ akɛ ajɛ Nyɔŋmɔ mumɔ mli aŋmala Lalai lɛ ahiɛ, ni ekɛ no fata Lala 110 ni kɔɔ Mesia lɛ he lɛ he, ni ekɛye odase akɛ Kristo he awie lɛ, ni áteelɛ shi kɛjɛ Ha’des (She’ol) . Ekɛɛ David diɛŋtsɛ lɛ egbo ni afulɛ ni egbonyobu yɛ Yudafoi lɛ ateŋ ni yeɔ enɛ he odase. Amɛle akɛ etee She’ol aloo Ha’des, ni eheloo lɛ fite aloo ekpɔtɔ. Kɛkɛ ni amɛnu shishi agbɛnɛ akɛ David ewieee nakai wiemɔi lɛ yɛ lɛdiɛŋtsɛ ehe. Nohewɔ lɛ akɛni enɛ ji anɔkwale hewɔ lɛ, David akɛ gbalɔ lɛ, ewie lɛdiɛŋtsɛ emusuŋbii lɛ ateŋ mɔkome he akɛ lɛ enɔ enɛ baaba mli yɛ. No mli lɛ Yudafoi lɛ miina enɛ he odaseyelinii ni ji saji ni kɔɔ Yesu gbele kɛ eshitee he lɛ hu, ni nomɛi tsɔɔ faŋŋ akɛ David wie Kristo ni ji eseshinyo lɛ he yɛ gbalɛ gbɛ nɔ. (1 Pet. 1:10-12) Nɛkɛ sanenaatsɔɔmɔ nɛɛ ná Yudafoi ni bo Petro wiemɔ lɛ toi lɛ anɔ hewalɛ waa.—Bɔf. 2:29-36.
Yɛ gbɛ fɛɛ gbɛ nɔ lɛ, Lalai lɛ wóɔ Nyɔŋmɔ kɛ e-Bi lɛ anɔ ni amɛwaã wɔ ni wɔleɔ mɛi ni akɛɛ yɛ amɛhe akɛ “Enɛ ji naanɔ wala lɛ, akɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔni otsu” lɛ jogbaŋŋ. (Yoh. 17:3) Lalai lɛ wieɔ kaai ni adesai fɛɛ kɛkpeɔ lɛ ahe, ni amɛtsɔɔ wɔ bɔni wɔɔɔfee wɔsɔle yɛ be mli ni wɔmii eshɛ wɔhe kɛ be mli ni wɔhao fɛɛ. Bɔfɛɛbɔ ni naagba ni wɔkɛkpe lɛ yɔɔ eha lɛ, lala ko yɛ ni baawa wɔ ni eha wɔna tsofa wɔkɛjɔɔ wɔtsui he.
Bɔfo Paulo wie yelikɛbuamɔ ni he aaahia wɔ yɛ sɔlemɔ mli lɛ he, ni ekɛɛ: “Nɔni wɔɔɔsɔle wɔbi ni ja lɛ wɔleee.” (Rom. 8:26) Efɔɔ baa nakai yɛ Kristofonyo fɛɛ Kristofonyo gbɛfaŋ. Bei pii lɛ wɔbaanyɛ wɔna yelikɛbuamɔ ni he hiaa wɔ beni afee ni wɔnyɛ wɔjaje wɔtsuiŋ susumɔi kɛ nibii ni wɔɔɔsumɔ akɛ wɔna lɛ jogbaŋŋ wɔtsɔɔ Nyɔŋmɔ lɛ yɛ Lalai awolo lɛ mli.—Kɛto Efesobii Awolo 5:19 kɛ Kolosebii Awolo 3:16 ahe okwɛ.
Akɛni Lalai lɛ wieɔ adesai ahenumɔi sɔrɔtoi lɛ fɛɛ ahe hewɔ lɛ, amɛmɔɔ mɔ. Kanelɔ lɛ nyɛɔ enaa akɛ lɛ ji mɔni Lalai lɛ kɛwieɔ lɛ, aloo akɛ aŋmala nomɛi ahalɛ, ni enyɛɔ enuɔ he nakai hu. Lalai lɛ naa hewalɛ ko yɛ etsuiŋ susumɔi kɛ nibii ni tsirɛɔlɛ lɛ anɔ, ni amɛtaoɔ etsui mli. Nɔko taa emli akɛ efee tsakemɔi yɛ eshihilɛ mli. Ni kɛji efee nakai lɛ, oshwereɔ, ni obaleɔ Nyɔŋmɔ jogbaŋŋ. Esa akɛ mɔfɛɛmɔ akane Lalai lɛ kɛjɛ klɛŋklɛŋnɔ lɛ nɔ kɛyashi naagbeenɔ lɛ nɔ. Mɔko kwraa bɛ ni baakane nomɛi ni enaŋ he sɛɛ.
MARCH Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)