Mɛni Hewɔ Kristendom Yi Naŋ Wala?
“Yehowa wiemɔ lɛ amɛkwa nɛɛ: ni mɛɛ nilee sɔrɔto yɔɔ amɛmli? . . . ni kɛjɛ gbalɔ nɔ kɛyashi osɔfo nɔ amɛ fɛɛ kwa amɛyeɔ kutumpɔo.”—Yer. 8:9, 10.
1. Mɛni hewɔ ebɛ naakpɛɛ akɛ Yerusalem ebɔ mɛi abolo akɛ nii ni kɛ hejɔlɛ baa lɛ?
1 YERUSALEM ni yɔɔ ŋmɛnɛ ni eji maŋwulu ko ni je nɛɛ mli Nyɔŋmɔjamɔ kui wuji lɛ ateŋ etɛ buɔlɛ waa lɛ miifee tamɔ nɔni eetsu jeŋ fɛɛ nɔko ekoŋŋ. Ani eeejie ehe kpo kɛ̃ akɛ Hejɔlɛ Lumɔ lɛ maŋwulu? Ani eeejie ehe kpo aakɛ nɔ̃ titri ko yɛ hejɔlɛ ni aaaha eba je lɛ mli fɛɛ lɛ gbɛfaŋ? Ebaaha mɛi ni huɔlɛ waa yɛ Nyɔŋmɔjamɔ gbɛfaŋ lɛ anine anyɛ shi yɛ enɛɛmɛi fɛɛ gbɛfaŋ. Esaaani enɛ haa wɔhiɛ feɔ wɔ yaa, ejaakɛ blema Yerusalem tete po bɔ Nyɔŋmɔ ni esɔlemɔtsu ni yɔɔ nyam lɛ ma Yerusalem gɔji ni hé gbɛi waa lɛ ateŋ ekome ni atsɛɔlɛ Moria lɛ nɔ lɛ abolo.
2. (a) Mɛni aaaŋmɛɛ wɔ kɛji wɔɔɔbo Kristendom naawielɔi atoi? (b) Namɛi anɔ Yehowa tsɔɔ ebɔɔ Kristendom kɔkɔ?
2 Nyɛkahaa wɔfataa mɛi ni ŋmɛnɛ amɛkɔɔ gbɛ ni baaha mɛi anine anyɛ shi bɔfɛɛbɔ ni fee lɛ ahe. Kɛjɛ blema kɛbaa nɛɛ fɛɛ lɛ, Kristendom ni kɛ ehiɛ fɔ̃ɔ ŋmɛnɛbeaŋ Yerusalem nɔ lɛ gbee naa wa yɛ Nyɔŋmɔjamɔŋ kɛ maŋkwramɔŋ saji fɛɛ amli. Yɛ gbɛhe wulu ni ehiɛ nɛɛ fɛɛ sɛɛ lɛ, wɔnaŋ naanɔ wala ni wɔtaoɔ lɛ kɛji wɔbo nɔni enaawielɔi kɛɔ yɛ adesai ayinɔsane he ni he jaraa fe fɛɛ nɛɛ mli lɛ toi. Yɛ Nyɔŋmɔ mɔni Kristendom kɛɔ akɛ ojaa lɛ Wiemɔ ni maleee naa lɛ, nakai Kristojamɔ gbɛjianɔtoo ni mɛi kɛɔ akɛ amɛhiɛ mli ni gbɛi kɛkɛ ehiɛ akɛ Kristojamɔ, lɛ hiɛ baakpata kɛ̃, taakɛ gbalɔ Yeremia gbii lɛ anɔ Yerusalem hiɛ kpata lɛ. (Yer. 6:1-8) Átsɔ gbɔmɛi ni ejɔɔ amɛhe nɔ kwraa amɛha Nyɔŋmɔ taakɛ Yeremia hu fee, lɛ anɔ abɔ Kristendom kɔkɔ bɔni sa yɛ hiɛkpatamɔ ni baaba enɔ kɛ̃ lɛ he. Hɛɛ, tamɔ bɔni ebalɛ yɛ Yeremia gbii lɛ anɔ Yerusalem lɛ naagbee gbii lɛ amli lɛ, Yehowa Nyɔŋmɔ eteé edasefoi ni afɔ amɛ mu lɛ ashi akɛ ŋmɛnɛbeaŋ Yeremia kuu ko. (2 Kron. 36:15, 16) Yehowa etsu nɛkɛ edasefoi Kristofoi nɛɛ kɛtee Kristendom sɔlemɔyalɔi lɛ aŋɔɔ daa, belɛ etamɔ nɔni ‘eteɔ shi leebi maaŋkpa etsuɔ amɛ daa.’ (Yer. 7:25, 13) Shi fɛɛ efee efolo!
3. Namɛi Kristendom “gbalɔi” kɛ “osɔfoi” lɛ ekase yɛ bɔni amɛfee amɛnii amɛha yɛ nɛkɛ kɔkɔbɔɔ nɛɛ he lɛ mli lɛ?
3 Shi Kristendom “gbalɔi” kɛ “osɔfoi” lɛ booo toi. Amɛsumɔɔɔ akɛ agbaà ‘amɛsafokui’ lɛ anaa. Nohewɔ lɛ amɛkɛ amale wiemɔi ni gbeɔ Nyɔŋmɔ gbalɛwiemɔi ahe guɔ lɛ woɔ amɛ shi. Nakai ebalɛ yɛ Yeremia gbii lɛ anɔ. Ni nakai nɔŋŋ eji yɛ Kristo bɔfoi lɛ agbii lɛ anɔ hu. (Yer. 5:20, 21; Mat. 13:13-15; Bɔf. 28:25-27) Ani wɔmiitao wɔfee wɔnii tamɔ nakai gbɔmɛi ni alaka amɛ ni booo nɔni akɛɔ amɛ lɛ toi lɛ? Kɔkɔɔkɔ!
NYƆŊMƆJAMƆ HEBUUNƆ KO MLI HEKƐNƆFƆƆ NI EDU GBƐ
4, 5. (a) Mɛɛ gbɛjianɔtoo nɛkɛ Kristendombii kɛ amɛhiɛ fɔ̃ɔ nɔ ŋmɛnɛ? (b) Te Yerermia wie mɛi ni tɔ̃ tɔmɔ ko ni tamɔ enɛ yɛ egbii lɛ anɔ lɛ ahe eha tɛɛŋ?
4 Ŋmɛnɛ, mɛi akpeiakpei abɔ kɛ amɛhe efɔ̃ Nyɔŋmɔjamɔŋ gbɛjianɔtoo ko ni hiɛ baakpata lɛ nɔ. Kristendom osɔfoi kɔneɔ amɛsɔlemɔi amlibii lɛ ayiŋ koni amɛfee nakai. Yerusalembii lɛ kɛ mɛi ni yɔɔ Yuda shikpɔŋ nɔ lɛ tɔ̃ tɔmɔ ko ni tamɔ nakai yɛ Yeremia gbii lɛ anɔ. Wɔsumɔŋ ni wɔkase amɛ. Yehowa fã Yeremia akɛ edamɔ Yerusalem sɔlemɔtsu lɛ agbo naa ni ekɛɛ mɛi ni baa jɛi lɛ yɛ faŋŋ akɛ:
5 “Nyɛkɛ nyɛhiɛ akafɔ̃a apasa wiemɔi lɛ anɔ akɛ: Yehowa sɔlemɔwe, Yehowa sɔlemɔwe, Yehowa sɔlemɔwe lɛ nɛ! . . . Naa, nyɛ lɛ nyɛŋɔɔ nyɛhiɛ nyɛfɔ̃ɔ apasa wiemɔi ni he bɛ sɛɛnamɔ lɛ anɔ! Aso nyɛ aaaju, nyɛ aaaye awui, nyɛ aaafite gbalã, nyɛ aaakãmɔ apasa kitãi, ni nyɛ aaatee nyɛyashã tsofakɛŋma nyɛha Baal, ni nyɛ ataatee aaayanyiɛ nyɔŋmɔi krokomɛi ni nyɛleee lɛ asɛɛ, dani nyɛba nyɛbadamɔ mihiɛ yɛ shia nɛɛ ni aŋɔ migbɛi awolɛ lɛ, ni nyɛkɛɛ akɛ: Wɔhe eje mli! Koni nyɛyafee nihiinii nɛɛ fɛɛ ekoŋŋ lo? Aso nɛkɛ shia nɛɛ ni aŋɔ migbɛi awolɛ lɛ etsɔ ojotswalɔi abu yɛ nyɛhiɛ lo? Mi hu, naa, mina momo! Yehowa kɛɛ.”—Yer. 7:4-11.
6. Mɛɛ nifeemɔ ko mli Yesu kɛ Yeremia okadi wiemɔi tsu nii yɛ, yɛ Yerusalem sɔlemɔtsu lɛ gbɛfaŋ?
6 Ahaaa Yeremia hegbɛ akɛ eyajie nibii fɛɛ ni buleɔ sɔlemɔwe lɛ ni mɛi ni kɛ Yehowa jamɔ futuɔ wɔŋjamɔ lɛ kɛwo jɛi lɛ. (Yer. 7:30, 31) Shi yɛ sɔlemɔtsu lɛ hiɛkpatamɔ sɛɛ fe afii 630 lɛ, Yesu Kristo, akɛ Nyɔŋmɔ Bi lɛ tsuu Yerusalem sɔlemɔtsu ni asaa ama ekoŋŋ lɛ mli shii enyɔ. Beni efeɔ nakai lɛ, Yesu kɛ Yeremia okadi wiemɔi komɛi tsu nii. Wɔkaneɔ akɛ: “Yesu tee Nyɔŋmɔ sɔlemɔwe lɛ ni eyashwie mɛi ni hɔ̃ɔ nii kɛ mɛi ni heɔ nii yɛ sɔlemɔwe lɛ, ni etsirɛ shikatsakelɔi lɛ akpɔ̃lɔi lɛ kɛ mɛi ni hɔ̃ɔ okpoi lɛ amaaŋoi lɛ etswiatswia shi. Ni ekɛɛ amɛ akɛ: Aŋma akɛ: ‘Aaatsɛ miwe lɛ sɔlemɔwe,’ shi nyɛ lɛ, nyɛkɛfee ‘ojotswalɔi abu.’” (Mat. 21:12, 13; kwɛmɔ Yohane Sanekpakpa 2:15, 16 hu.) Akpata nakai sɔlemɔwe ni abulelɛ lɛ hiɛ yɛ afi 70 Ŋ.B. mli.
7. (a) Yɛ be mli ni Kristendom Nyɔŋmɔjalɔi jaa amɛjamɔ lɛ, mɛni amɛhaa amɛ-Nyɔŋmɔjamɔ gbɛjianɔtoo lɛ tsɔɔ? (b) Mɛɛ gbɛi amɛkɛtsɛɔ Yesu Kristo; kɛlɛ mɛɛ gbɛi Yesu kɛaatsɛ amɛ?
7 Titri kɛjɛ afi 1919 Ŋ.B. nɔ kɛbaa nɛɛ, Yeremia kuu lɛ miigbala je lɛ jwɛŋmɔ kɛmiiba bɔni abule Kristendom aha lɛ nɔ. Sɔlemɔyalɔi lɛ hiɛ amɛjamɔ yɛ nɛkɛ nibii agbɛjianɔtoo ni hiɛ gbɛi kɛkɛ akɛ Kristojamɔ nɛɛ mli lɛ mli, shi yɛ nakai be mli nɔŋŋ lɛ amɛkɛ amɛhe woɔ ‘juu, gbɔmɔgbee, gbalafitemɔ kɛ apasa kitakamɔ mli.’ Amɛshãa afɔlei yɛ jamɔ mli amɛhaa nyɔŋmɔi (Baalim, Nuntsɔmɛi) krokomɛi hu amɛfataa Nuntsɔ Yesu Kristo he. Yɛ heloonaa nibii asɛɛdii gbɛfaŋ lɛ, amɛha amɛ-Nyɔŋmɔjamɔ gbɛjianɔtoo lɛ etsɔ “ojotswalɔi abu.” (Yer. 7:9-11) Yɛ nɛkɛ nibii ni Yehowa hiɔ nɛɛ fɛɛ sɛɛ lɛ, Kristendom Nyɔŋmɔjalɔi lɛ anaabui kɛkɛ amɛkɛjaà Yesu Kristo ni amɛtsɛɔlɛ “Nuntsɔ” lɛ. Efeɔ amɛ akɛ enɛ kɛkɛ ni amɛfeɔ hewɔ lɛ sane ko kwraa bɛ, ni amɛjamɔ lɛ sa Nyɔŋmɔ kɛ Kristo hiɛ. Shi Yesu Kristo baaha amɛdaaŋ agbo beni eeetsɛ amɛ ‘mɛi ni tsuɔ nibii ni ejaaa gbɛ’ yɛ e-Tsɛ suɔmɔnaanii ni amɛfeee hewɔ lɛ.—Mat. 7:21-23.
8. Mɛni hewɔ Kristendom Nyɔŋmɔjalɔi lɛ susuɔ akɛ amɛ-Nyɔŋmɔjamɔ gbɛjianɔtoo lɛ yɛ shihilɛ ko ni abuɔ he mli lɛ?
8 Taakɛ Israelbii ni Yeremia jaje Yehowa wiemɔ etsɔɔ amɛ lɛ fee lɛ, Kristendom Nyɔŋmɔjalɔi lɛ buɔ ‘amɛsɔlemɔwe’ ni amɛkɛ Kristo gbɛi efɔ̃ nɔ lɛ akɛ nɔko ni baabu amɛhe eshi hiɛkpatamɔ ni aaajɛ Nyɔŋmɔ ŋɔɔ aba amɛnɔ lɛ. Amɛwieɔ gbɛjianɔ ni amɛto kɛha jamɔ ni hiɛ gbɛi kɛkɛ akɛ Kristojamɔ lɛ he ni amɛkɛɔ akɛ: “Yehowa sɔlemɔwe lɛ nɛ!” (Yer. 7:4) Roma Katolik sɔlemɔ lɛ shiɔ etsitsi akɛ amɛjamɔ lɛ ji bɔfoi lɛ ajamɔ ni amɛto shishi lɛ ejaakɛ amɛnyɛɔ amɛtsɔɔ mɛikomɛi ni amɛkɛɔ akɛ amɛji amɛjamɔ lɛ mlibii ni baye bɔfoi lɛ asɛɛ kɛtsara nɔ aahu kɛbashi ŋmɛnɛ Ŋleshi Ablotsiri Anglikan Sɔlemɔ lɛ feɔ nɔko ni tamɔ enɛ nɔŋŋ yɛ “esɔfonukpai” (osɔfonukpai akuu) lɛ he. Bokagbɛ Ɔtodɔks Sɔlemɔi lɛ kɛ amɛhe fɔ̃ɔ osɔfonukpai komɛi ni amɛsusuɔ akɛ amɛbaye bɔfoi nyɔŋma kɛ enyɔ lɛ asɛɛ kɛtsara nɔ aahu kɛbashi ŋmɛnɛ, lɛ anɔ. Roma paapayeli lɛ kɛɔ akɛ atswa no ama bɔfo Petro nɔ akɛ “tɛ nɛɛ” ni nohewɔ lɛ “hɛl agbói” lɛ naŋ enɔ hewalɛ. (Mat. 16:18, 19, Douay) Nohewɔ lɛ yɛ nɛkɛ sɛɛyelɔi agbɛjianɔtoo ni amɛkɛɔ akɛ etsara nɔ aahu kɛjɛ Kristo gbii anɔ kɛbashi ŋmɛnɛ lɛ hewɔ lɛ, amɛsusuɔ akɛ Kristendom yɛ shihilɛ ko ni abuɔ he mli ni nohewɔ lɛ akpataŋ ehiɛ kɔkɔɔkɔ.
9, 10. (a) Mɛɛ sanebimɔ teɔ shi yɛ jálɔi ni kɛ amɛhiɛ fɔɔ Kristendom ‘wala shihilɛ ni abuɔ he’ lɛ nɔ lɛ ahe? (b) Mɛni Yehowa kɛɛ Yeremia akɛ ekɛɛ yɛ Yudafoi ni kɛ amɛhiɛ fɔ amɛsɔlemɔtsu lɛ nɔ lɛ ahe?
9 Shi kɛji mɔko kɛ ehe fɔ̃ Kristendom ‘shihilɛ ni abuɔ he’ lɛ nɔ lɛ, ani no baama nɔ mi akɛ oshra baŋ enɔ ni akpataŋ ehiɛ afataŋ Kristendom he? Bɔfo Paulo bɔ kɔkɔ akɛ yɛ “naagbee gbii” lɛ amli Iɛ, mɛikomɛi baahi shi ni amɛhiɛ “Nyɔŋmɔjamɔsu, shi amɛkwa emli hewalɛ lɛ,” ni ekɛfata he akɛ “tsi ohe kɛjɛ nɛkɛ gbɔmɛi ahe.” (2 Tim. 3:1-5) Nohewɔ lɛ kɛji mɔko miifee kponɔgbɛ kusumii komɛi kɛkɛ shi etsui bɛ mli, yɛ tsũ ko mli aloo heko ni hiɛ gbɛi akɛ nɔni ajɔɔ nɔ aha Nyɔŋmɔ shi yɛ nakai be mli nɔŋŋ lɛ akɛ apasa jamɔ kɛ jeŋbii anifeemɔi ebule no lɛ, ani enɛ baatsɔɔ akɛ Nyɔŋmɔ mlifu ni ja gbɛ lɛ baŋ enɔ bɔfɛɛbɔ ni fee? Mɛni Yehowa kɛɛ Yeremia akɛɛ Israelbii ni kɛ amɛhe fɔ̃ “amɛsɔlemɔwe’” lɛ nɔ lɛ? Bo toi:
10 “Shi agbɛnɛ nyɛyaa mishihilɛhe ni yɔɔ Shilo [maŋ ko ni yɔɔ Yerusalem kooyigbɛ aaafee shitoi 20 (kilomitai 32)] lɛ, heni miha migbɛi lɛ hi tsutsu lɛ, ni nyɛyakwɛa nɔni mifeelɛ yɛ mimaŋ Israel nifɔjianii lɛ ahewɔ. Ni agbɛnɛ lɛ, akɛni nyɛtsu nɛkɛ nitsumɔi nɛɛ fɛɛ, Yehowa kɛɛ, ni miwieɔ mitsɔɔ nyɛ, miteɔ shi leebi maaŋkpa miwieɔ daa, ni nyɛbooo toi, ni misaa mitsɛ́ɔ nyɛ, ‘ni nyɛhereee nɔ hewɔ lɛ, mafee shia nɛɛ ni aŋɔ migbɛi awolɛ, ni nyɛŋɔɔ nyɛhiɛ nyɛfɔ̃ɔ nɔ lɛ, kɛ shihilɛhe lɛ ni miŋɔha nyɛ kɛ nyɛtsɛmɛi lɛ, taakɛ bɔ nɔŋŋ ni miifee Shilo lɛ; ni mashɛrɛ nyɛ mashwie kɛaajɛ mihiɛ, taakɛ bɔni mishɛrɛ nyɛnyɛmimɛi lɛ fɛɛ, ni ji Efraim seshibii lɛ fɛɛ, mishwie lɛ!”—Yer 7:12-15.
11. Yɛ Samuel gbii anɔ lɛ, mɛni ba yɛ Shilo ni hoso Israelbii lɛ a-Nyɔŋmɔjamɔŋ susumɔi lɛ?
11 Nɔni ba Shilo nɔ yɛ gbalɔ oblanyo Samuel gbii anɔ lɛ ha Israelbii lɛ a-Nyɔŋmɔjamɔŋ henumɔi jijaa. Amɛkɛ amɛhiɛ fɔ̃ kpaŋmɔ adeka krɔŋkrɔŋ lɛ nɔ akɛ eeehere amɛ kɛaajɛ Filistibii lɛ adɛŋ koni akaye amɛnɔ kunim. Nohewɔ lɛ ayawo no kɛjɛ kpeebuu ni yɔɔ Shilo lɛ Hekrɔŋkrɔŋ Fe Fɛɛ lɛ, ni osɔfoi mlakwalɔi ni ji osɔfonukpa Eli bihii lɛ tere adeka lɛ kɛtee ta. Shi Adeka lɛ hereee amɛ kɛjɛɛɛ yibii ni Yehowa mla ni amɛkwa lɛ wo lɛ amli. Ao, kɛkɛ ni Adeka lɛ yaje Filistibii wɔŋjalɔi lɛ adɛŋ, agbe Eli bihii osɔfoi ni ji Hofni kɛ Pinehas, ni beni osɔfonukpa Eli ni eshwi tɔtɔrɔɔ lɛ nu awerɛhoosane lɛ, ekpá kɛjɛ esɛi lɛ nɔ eyagbee esɛɛgbɛ ni ekuɛ ku ni egbo. Filistibii lɛ hao Israelbii lɛ aahu ni Adeka ni damɔ shi kɛha amɛteŋ ni Yehowa yɔɔ lɛ ekuuu esɛɛ kɛbaaa egbɛhe yɛ Shilo kpeebuu lɛ mli dɔŋŋ, eyɛ mli akɛ fee sɛɛ lɛ Filistibii wɔŋjalɔi ni aha helai hao amɛ lɛ kɛ Adeka lɛ ku sɛɛ kɛba moŋ.—1 Sam. 3:1 kɛyashi 7:2.
12. Te Yehowa fee Yerusalem kɛ Yuda shikpɔŋ lɛ tɛɛŋ taakɛ etee Shilo ni kulɛ ayɔɔ he tsuijurɔ lɛ?
12 Yehowa tsɔ Yeremia nɔ ebɔ kɔkɔ akɛ ekɛ nɔni ekɛfee Shilo ni analɛ mɔbɔ be ko lɛ, eko nɔŋŋ baafee Yerusalem. Nohewɔ lɛ eha Babilonbii lɛ kpata Yerusalem hiɛ yɛ afi 607 D.Ŋ.B. mli. Akumɔ sɔlemɔtsu ni Maŋtsɛ Salomo ma ni kpaŋmɔ adeka lɛ yɔɔ mli lɛ po. Adeka lɛ diɛŋtsɛ laaje, ni anako heni etsɔ kɛbashi ŋmɛnɛ. Yɛ Shilo amanehulu lɛ sɛɛ lɛ, Filistibii lɛ ŋmɛ Israelbii lɛ gbɛ ni amɛhi jɛi. Shi beni Babilonbii lɛ kpata Yerusalem kɛ esɔlemɔtsu lɛ hiɛ sɛɛ lɛ, amɛtswa Yudafoi ni shwɛ lɛ ateaŋmɛi babaoo anane shi tu kɛtee shɔŋŋ yɛ Babilon. Yudafoi fioo ni shwɛ lɛ jo foi amɛshi shikpɔŋ lɛ kɛtee Mizraim yɛ ŋmiŋmi ni mɔmɔ amɛ lɛ hewɔ. Enɛ ha ashi Yuda shikpɔŋ lɛ fɛɛ afɔ̃ shi ni mɔko kwraa bɛ nɔ. Yɛ nɛkɛ gbɛ nɔ lɛ, Yehowa shwie nakai Yudafoi kpaŋmɔmlikulɔi lɛ kɛjɛ ehiɛ!
13. Mɛni sa akɛ wɔkaseɔ kɛjɛɔ nakai hiɛkɛnɔfɔɔ ni gbá afã lɛ he sane lɛ mli?
13 Nyɛhaa wɔkasea nɔko kɛjɛa enɛ mli ŋmɛnɛ. Nyɛkahaa wɔkɛ wɔhiɛ fãa nɔni Kristendom osɔfoi susuɔ akɛ eji Nyɔŋmɔjamɔŋ hebuunii ni baabu ehe kɛjɛ hiɛkpatamɔ mli lɛ nɔ. “Amanehulu kpeteŋkpele” ni etsɛŋ kwraa ni ebaaba Kristendom nɔ lɛ naa baawa kwraa fe nɔni ba Yerusalem kɛ esɔlemɔtsu lɛ nɔ yɛ beni Yesu etsuu Yerusalem sɔlemɔtsu ni abulelɛ ni aha etsɔ “ojotswalɔi abu” lɛ he afii 37 sɛɛ lɛ.—Mat. 24:1, 2, 21, 22.
KƐJƐ NYƆŊMƆJAMƆŊ KRƆŊKRƆŊFEEMƆ MLI KƐBOTE FITEMƆ MLI
14. Mɛni hewɔ esaaani wɔsɔleɔ wɔkpaa Nyɔŋmɔ fai akɛ ebaa Kristendom yi lɛ?
14 Mɔkomɔko bɛ ni sumɔɔ Biblia Nyɔŋmɔ lɛ lɛɛlɛŋ ni baasɔle akɛ nii ni yɔɔ naakpɛɛ nɛɛ akaba Kristendom nɔ. Yehowa fã egbalɔ Yeremia akɛ ekasɔle ekpa fai eha Yerusalem kɛ esɔlemɔtsu ni awo he muji lɛ akɛ E-jalɛ mlifu lɛ akaba enɔ. Nɔni yeɔ Yerusalem najiaŋ ŋmɛnɛ ni ji Kristendom lɛ ejie ehe kpo akɛ etsakeŋ. Yɛ afii babaoo ni Yehowa etsu edasefoi Kristofoi lɛ akɛ amɛyabɔ Kristendombii akɔkɔ nɛɛ fɛɛ sɛɛ lɛ, ékã enɔfɔŋ lɛ he aahu kɛyashɛ heko ni anyɛŋ analɛ mɔbɔ dɔŋŋ.—Yer. 7:18-26; 5:7-9.
15, 16. (a) Mɛɛ gbɛ ni Kristendom baa ejeŋ yɛ nɔ lɛ hewɔ esaaani anaalɛ mɔbɔ Iɛ? (b) Beni Yehowa haa enɛ he nɔkwɛmɔnɔ ko lɛ, mɛni ekɛɛ yɛ Yeremia Wolo 7:30 kɛ 31 lɛ?
15 Esaaani wɔkaa akɛ wɔɔɔna Kristendom mɔbɔ yɛ gbɔmɛi babaoo awala he ni ehiɛkpatamɔ baasa lɛ hewɔ. Gbɛ ni ekɔ lɛ egbe Nyɔŋmɔ he guɔ waa. Mɛni hewɔ wɔsusuuu Nyɔŋmɔ moŋ he tsutsu? Ehe hiaa fe bɔɔnii ni ji adesai Iɛ fɛɛ. Bo lɛ susumɔ bɔni Kristendom kɛ esɔlemɔyalɔi akpeiakpei abɔ lɛ eshwie Nyɔŋmɔ gbɛi lɛ hiɛ shi, ni amɛwa Nyɔŋmɔ odasefoi anɔkwafoi ni jaje ekɔkɔbɔi kɛ ewiemɔkɛtsɔɔmɔi ni haa wala lɛ ayi amɛha. Ani wɔnaa adesai ni toii egboi ni amɛbooo ŋaawoo toi lɛ moŋ mɔbɔ waa fe wɔmusuŋ ni aaashã wɔ yɛ Ŋwɛi Flooflo Nyɔŋmɔ lɛ gbɛi hewɔ? Eyɛ mli akɛ amɛhiɛ ni aaakpata afata Kristendom he lɛ yɛ awerɛhoo moŋ, shi gbɛ ni amɛkɔ amrɔ nɛɛ ni amɛfeɔ hiɛgbejianii yɛ Nyɔŋmɔjamɔ mli lɛ hu yɛ awerɛhoo nakai nɔŋŋ. Yɛ enɛ tsɔɔmɔ mli lɛ, Yehowa kɛɛ:
16 “Yudabii lɛ efee efɔŋ yɛ mihiɛ, Yehowa kɛɛ. Amɛkɛ amɛnihiinii lɛ eto shia ni aŋɔ migbɛi awolɛ lɛ, ni amɛkɛbulelɛ; ni amɛmamɔ Tofet hei grɔŋŋi lɛ ni yɔɔ Hinom bi lɛ jɔɔ Iɛŋ [yɛ Yerusalem wuoyigbɛ gbogbo lɛ sɛɛ] lɛ, koni amɛshã [mɛni? Koni amɛshã] amɛbihii kɛ amɛbiyei yɛ la mli, nɔni miwoko he kitã, ni esaa ebako miyiŋ lɛ.”—Yer. 7:30, 31; kadimɔ 3 Mose Wolo 18:21 kɛ 20:2-5 hu.
17. (a) Mɛɛ sanebimɔ teɔ shi yɛ mɔbɔ ni aaana yɛ gbɔmɛi ni akɛshã afɔle kɛ fɔlɔi ni sha nakai afɔlei ahewɔ lɛ he? (b) Namɛi kɛ nakai gbɔmɛi ni akɛshaa afɔle lɛ he jwɛŋmɔ ba?
17 Nohewɔ lɛ agbɛnɛ kɛji ebalɛ musuŋtsɔlɛ lɛ, namɔ wɔmusuŋ tsɔɔ wɔ ehaa waa? Ani wɔmusuŋ tsɔɔ wɔ haa nakai fɔlɔi amagajalɔi ni baabu Yehowa akɔntaa lɛ? Aloo bihii kɛ biyei ni bolɔɔ be mli ni ashãa amɛ akɛ afɔlei ahaa apasa nyɔŋmɔ Molek (Maŋtsɛ) yɛ afɔleshaalatɛ grɔŋŋ ni yɔɔ Tofet yɛ Hinom binuu lɛ jɔɔ lɛ mli nɔ lɛ? (Yer. 32:35) Te fɔlɔi ni musuŋ eshaaa amɛ nɛɛ aaafee tɛɛŋ amɛsusu akɛ nɛkɛ jamɔ ni amɛkɛhaa amaga Molek ni ajaalɛ akɛ nyɔŋmɔ nɛɛ tamɔ nɔni yaa nɔ yɛ sɔlemɔwe krɔŋkrɔŋ ni yɔɔ nakai jɔɔ lɛ kooyigbɛ nɔŋŋ lɛ hu? Jeee Yehowa famɔ naa amɛshã adesai hiɛkaalɔi amɛha apasa nyɔŋmɔ lɛ akɛ afɔlei lɛ. Nɛkɛ adesai ni akɛshãa afɔle nɛɛ he jwɛŋmɔ lɛ ba nakai bei lɛ amli gbɔmɛi ni ekwa Nyɔŋmɔjamɔŋ anɔkwale lɛ atsuii amli, shi ebaaa Yehowa Nyɔŋmɔ tsui mli. Mɛni sa akɛ afeɔ mɛi ni bɔɔ mɔdɛŋ akɛ amɛkɛ jamɔ ni tamɔ nakai afutu Yehowa jamɔ lɛ?
18. Kɛji aabu akɔntaa yɛ yibɔ naa lɛ, te blema afɔlei lɛ yɔɔ tɛɛŋ kɛ akɛto nɔni Kristendom esha yɛ be falɛ ni shɛɛɛ afii oha mli lɛ he?
18 Nakai be lɛ mli gbekɛbii ni “Yuda bihii” ni etee sɛɛsɛɛ lɛ kɛsha afɔle lɛ faaa kwraa kɛ́ akɛto gbɔmɛi abɔ ni Kristendom kɛ́shã afɔle eha enyɔŋmɔi ni jɛɛɛ Kristojamɔ mli, yɛ afii ohai abɔ ni eho lɛ amli he lɛ. Ekwaa efeɔ ehe Hejɔlɛ Lumɔ lɛ maŋtsɛyeli ni anaa lɛ moŋ, shi ekɛ bihii kɛ biyei babaoo ni anyɛɛɛ akane amɛ lɛ haa tawuu nyɔŋmɔ ni ji lɛdiɛŋtsɛ e-Molek aloo “Maŋtsɛ” lɛ. Amrɔ nɛɛ yɛ be falɛ ni shɛɛɛ afii oha mli lɛ, ekɛ esɔlemɔyalɔi lɛ ateaŋ oblantai tswãatswãa akpeiakpei nyɔŋmai abɔ eshã afɔle yɛ adesai ayinɔsane mli tai ni ashwie lá shi yɛ mli fe fɛɛ lɛ amli, kɛ agbɛnɛ yɛ tai krokomɛi ni amɛdaramɔ shɛɛɛ nomɛi lɛ hu amli. Kristendom bɔɔ musu ni etsɛɔ nɔni efeɔ nɛɛ akɛ Kristojamɔ. Ebuɔ afɔleshai nɛɛ akɛ “afɔleshaa ni nɔ kwɔ fe fɛɛ” ni haa mɛi ni akɛshaa afɔle lɛ naà hegbɛ amrɔnɔŋŋ kɛyaa Kristo hiɛ yɛ ŋwɛii
AFƆLEI NI SAA YEHOWA NYƆŊMƆ HIƐ
19. Nohewɔ lɛ kɛji Kristofonyo lɛ kɛ egbɔmɔtso ‘aaashɛ afɔle ni yɔɔ krɔŋkrɔŋ’ eha Nyɔŋmɔ lɛ mɛni no aaatsɔɔ ahalɛ?
19 Jeee afɔlei ni tamɔ enɛɛmɛi Yehowa Nyɔŋmɔ jieɔ yi ehaa e-Bi Yesu Kristo sɛɛnyiɛlɔi akɛ amɛshã. Nɔni bɔfo Paulo jɛ Nyɔŋmɔ mumɔ mli eŋma yɛ Romabii Awolo 12:1, 2 moŋ ji: “Anyɛmimɛi, mikɛ Nyɔŋmɔ mlitsɔlɛi miikpa nyɛ fai, akɛ nyɛŋɔ nyɛgbɔmɔtsei Iɛ nyɛdamɔ shi akɛ afɔle ni hiɛ kã ni he tse ni sa Nyɔŋmɔ hiɛ ni nyɛjamɔ Iɛ afee mumɔŋ jamɔ. Ni nyɛjeŋba akatamɔ jeŋbii ajeŋba, shi moŋ nyɛkɛ nyɛjwɛŋmɔ ni etsɔ ehee lɛ atsakea nyɛhe, koni nyɛyoo nii ni ji Nyɔŋmɔ suɔmɔnaanii kpakpai ni sa ehiɛ jogbaŋŋ ni hi kɛwula shi lɛ.” Kristofonyo lɛ gbɔmɔtso ni ekɛ aaaha akɛ “afɔle ni hiɛ kã ni he tse” lɛ etsɔɔɔ akɛ ebaagbe ehe aloo ebaaha Nyɔŋmɔjamɔŋ osɔfo ko agbelɛ ni ekɛlɛ asha afɔle yɛ afɔleshaalatɛ ko nɔ. No ebafeŋ ‘sɔɔmɔ krɔŋŋ ni akɛ jwɛŋmɔ tsuɔ.’ Nɔni etsɔɔ moŋ ji akɛ Kristofonyo lɛ baakɔ shihilɛ gbɛ ko ni haa mɔ kɛ ehe shãa afɔle yɛ Nyɔŋmɔ sɔɔmɔ hewɔ, shi jeee ni ebaaje gbɛ efee ehe lá-odasefonyo koni ekɛsa mɛi ahiɛ.
20. Kɛji Kristofonyo ni hiɛ kã lɛ aaahi shi yɛ gbɛ “ni sa Nyɔŋmɔ hiɛ” nɔ lɛ, mɛɛ afɔlei ebaanyɛ esha eha Nyɔŋmɔ?
20 Kɛji anɔkwa Kristofonyo lɛ tee nɔ ehi shi yɛ gbɛ ko “ni sa Nyɔŋmɔ hiɛ” nɔ lɛ, ebaanyɛ eshã afɔlei ni atsĩ tã yɛ Hebribii Awolo 13:15, 16 lɛ eko, akɛ: “Nyɛhaa wɔtsɔa [lɛ Kristo, akɛ Nyɔŋmɔ Osɔfonukpa lɛ,] enɔ ni wɔkɛ yijiemɔ afɔle abahaa Nyɔŋmɔ daa; no ji naabui ni jajeɔ egbɛi lɛ ayibii lɛ. Shi ejurɔfeemɔ kɛ nikee lɛ, nyɛhiɛ akakpaa nɔ; ejaakɛ nakai afɔlei saa Nyɔŋmɔ hiɛ jogbaŋŋ.”
21. Mɛni Yehowa tsɔɔ ewebii ni ehala lɛ akɛ ehe hiaa kwraa lɛ kooloi ni amɛkɛ aaashɛ afɔle lɛ; ni nohewɔ lɛ mɛni akɛɔ yɛ adesai ni akɛ aaasha afɔle lɛ he?
21 Afɔlei ni awie he nɛɛ etsɔɔɔ akɛ wɔkɛ gbɔmɛi aloo kooloi ni akɛshaa afɔle ahaa je nɛɛ mli apasa nyɔŋmɔi lɛ aaafutu Yehowa jamɔ. (Yes. 42:8) Nɔ̃ titri ni Nyɔŋmɔ taoɔ yɛ ewebii adɛŋ ji toiboo, belɛ ni wɔɔɔfee toiboo wɔha “Nyɔŋmɔ suɔmɔnaanii kpakpai ni sa ehiɛ jogbaŋŋ ni hi kɛwula shi” lɛ. Beni Yehowa here emɛi ni ehala lɛ kɛjɛ blema Mizraim amimyeli ni gbeɔ mɔ lɛ mli lɛ, ekɛ kooloi ni akɛ aaasha afɔle lɛ emaaa amɛhiɛ akɛ nii ni he hiaa fe fɛɛ, shi nɔni ekɛɛ moŋ ji: “Nɛkɛ sane nɛɛ he kitã miwo amɛ mikɛɛ: Nyɛboa migbee toi, ni matsɔ nyɛ-Nyɔŋmɔ, ni nyɛ hu nyɛ aaatsɔ mimaŋ; ni nyɛnyiɛa migbɛ́i ni miwo nyɛ kitã yɛ he lɛ fɛɛ nɔ, beni afee ni ahi aha nyɛ.” (Yer. 7:22, 23; 1 Sam. 15:22) Nohewɔ lɛ kɛji Yehowa biii ni ewebii ni ehala lɛ kɛ kooloi po ashã afɔle amɛhalɛ lɛ, ebiŋ ni amɛkɛ gbɔmɛi ashã afɔle. Gbɔmɛi ni akɛshaa afɔle tamɔ nɔni ashã aha Baal aloo Molek lɛ he jwɛŋmɔ ‘baaa etsui mli’ po.—Yer. 7:31.
22, 23. (a) Yɛ adesa lá babaoo ni Kristendom eshwie shi fɛɛ sɛɛ lɛ, mɛni hewɔ enyɛko esha afɔlei ni saa Nyɔŋmɔ hiɛ lɛ? (b) Mɛni ato akɛ ebaaba mɔni fee Kristendom he nɔkwɛmɔnɔ yɛ blema bei amli Iɛ nɔ ni tsɔɔ kɛji egbalaŋ Kristendom toi aloo abaafee nakai?
22 Yɛ adesa lá babaoo ni Kristendom eshwie shi gbeyeigbeyei lɛ fɛɛ sɛɛ lɛ, eshãko afɔlei ni saa Nyɔŋmɔ hiɛ lɛ eko ehakolɛ. Efeee toiboo ehaaa Biblia Nyɔŋmɔ lɛ. (Mika 6:6-8) Kɛbashi ŋmɛnɛ gbi nɛɛ, etsakeko etsui kɛjɛko toigbele gbɛ ni ekɔ lɛ nɔ koni eshã afɔle ni sa lɛ eha Nyɔŋmɔ, nɔni awie he akɛ “Nyɔŋmɔ afɔlei lɛ ji mumɔ ni werɛ eho ehe; tsui ni werɛ eho ehe ni tswiaa shi kɛ dɔlɛ lɛ, Nyɔŋmɔ, okpoŋ” lɛ. (Lala 51:19) Ani esa akɛ ahaa eyeɔ ehe ni agbalaaa etoi? Ani aaaha eye ehe nakai? Nɔni fee ehe mfoniri yɛ blema bei amli ni ji Yerusalem lɛ ná toigbalamɔ, tamɔ bɔni Yehowa kɛɛ lɛ pɛpɛɛpɛ:
23 “Naa, gbii miiba, Yehowa kɛɛ, ni atseŋ jɛi akɛ Tofet aloo Hinom bi lɛ jɔɔ dɔŋŋ, shi moŋ aaatsɛlɛ awuyeli jɔɔ, ni aaafu mɛi yɛ Tofet, ejaakɛ gbɛ bɛ hekoheko dɔŋŋ; ni nɛkɛ maŋ nɛɛ gbohii lɛ aaatsɔmɔ ŋwɛi loofɔji kɛ shikpɔŋ nɔ kooloi aniyenii, ni mɔkomɔko eshwieŋ amɛ. Ni maha nyam kɛ miishɛɛ gbee kɛ ayemforowu kɛ ayemforo gbee sɛɛ afo yɛ Yuda maji lɛ kɛ Yerusalem blohui lɛ amli; ejaakɛ shikpɔŋ lɛ baatsɔ kpataa.”—Yer. 7:32-34;19:6-9.
24. Mɛɛbe nakai gbalɛ ni hiɛ tsii lɛ ba mli yɛ mɔ tuuŋtu ni agba ashi lɛ nɔ?
24 Ahaaa gbalɛ ni tsii nɛɛ aba mli yɛ Maŋtsɛ Yosia ni kumɔ amagai eshwie shi ni ebule hei ni ajaa Molek kɛ daimonio nyɔŋmɔi krokomɛi yɛ, lɛ nɔyeli mli. (2 Maŋts. 23:3-20) Tofet kɛ Hinom jɔɔ ni aha amɛtsɔmɔ awuyeli jɔɔ ni mli eyi obɔ kɛ Yudabii agbohii, ni gbohiiabui bɛ ni baatsi ŋwɛi loofɔji kɛ shikpɔŋ nɔ kooloi ni yeɔ lóo lɛ agbɛnɛ koni amɛkaye gbohii, lɛ ba mli yɛ afi 607 D.Ŋ.B. mli beni Yerusalem ni awo he ka be kakadaŋŋ lɛ yaje Babilonbii adɛŋ ni atswa mɛi ni je gbele mli ni amɛnii yɔɔ mɔbɔ lɛ anane shi tu kɛtee he kroko ni ashi maŋ lɛ amaŋfɔ lɛ. Yerusalem kɛ Yuda kã shi amaŋfɔ afii 70 sɔŋŋ.—2 Kron. 36:17-21.
25. Yɛ nɔni wɔwie he nɛɛ hewɔ lɛ, mɛɛ Yeremia gbalɛ ko mlibaa mli Kristendom he ejeŋ lɛ?
25 Ŋmɛnɛbeaŋ Kristendom ni hiɛ wɔŋjalɔi akusumii, gbɔmɛi ablemasaji, kɛ Biblia mli tsɔɔmɔi ni akɛ wɔŋjalɔi asusumɔi efutulɛ lɛ naŋlɛ mɛlɛɔ fe nɔni akɛfee ehe mfoniri yɛ blema bei amli lɛ. Bɔfɛɛbɔ ni fee lɛ ehe ejeŋ Yehowa gbalɛ nɛɛ mlibaa mli, akɛ: “Ahum kpeteŋkpele aaate shi kɛaajɛ shikpɔŋ lɛ naagbeehe tɔ̃ɔ; ni mɛi ni Yehowa aaagbe yɛ nakai gbi lɛ nɔ lɛ aaakãmɔ shi kɛaajɛ shikpɔŋ lɛ naagbeehe kome kɛaatee shikpɔŋ lɛ naagbee hei kroko lɛ; afeŋ amɛyara, abuaŋ amɛnaa, ni asaŋ afuŋ amɛ: amɛ aaatsɔ tumu yɛ shikpɔŋ lɛ nɔ.” (Yer. 25:32, 33) Dabi! Kristendom yi naŋ wala yɛ “amanehulu kpeteŋkpele” ni baa lɛ, mli kɔkɔɔkɔ (Mat. 24:1, 2, 21, 22) Agbɛnɛ je lɛ apasa jamɔ maŋtsɛyeli lɛ fã ni shwɛɔ yɛ esɛɛ lɛ hu baanyiɛ Kristendom sɛɛ kpaakpa kɛbote hiɛkpatamɔ mli!a
[Shishigbɛ niŋmaa]
a Ajie kɛjɛ August 1, 1979 Blɔfo Buu-Mɔɔ lɛ mli.
[Akrabatsa ni yɔɔ baafa 9]
Yeremia gbalɛ ni yɔɔ Biblia mli lɛ tsɔɔ mɛi ni sumɔɔ jalɛ lɛ “wala gbɛ lɛ.” Etsɔɔ bɔni Yehowa Nyɔŋmɔ baakojo apasa jamɔ kɛ jeŋmaji ni teɔ shi woɔ esuɔmɔnaanii lɛ eha lɛ. Ŋmlɛtswaa nɔ ni abaafee nakai lɛ eshɛ shi etã! Belɛ eji nɔko ni sa yɛ be nɛɛ mli akɛ “Buu-Mɔɔ” nɛɛ kɛ ekrokomɛi ni baanyiɛ sɛɛ lɛ asusu Yeremia gbalɛ lɛ mlibaa yɛ ŋmɛnɛbeaŋ lɛ he.