Mɔ “Sanekpakpa” Lɛ Mli Waa!
“Nyɛhiɛa mli waa, kɛ jeee nakai lɛ, nyɛbatsɔmɔ heyelilɔi yakatswaa.”—1 Korintobii 15:2, NW.
1. Mɛni hewɔ Paulo kɛ henumɔ wie gbohiiashitee lɛ he waa lɛ?
1 BƆFO Paulo kɛ eklɛŋklɛŋ wolo ni eŋma eyaha Korintobii lɛ ba naagbee kɛ gbohiiashitee lɛ mlitsɔɔmɔ he sane. Mɛni hewɔ ekɛ henumɔ wie gbohiiashitee lɛ he waa nɛkɛ? Kɛha yiŋtoo ko ni ehe nitsumɔ he miihia hewɔ. Nɔ ni ebɔle nakai Korinto Kristofoi lɛ ahe ji hiɛjoomɔ jeŋ ni bɛ jeŋba, ni amɛteŋ mɛi komɛi po egbee Satan tsɔnei lɛ amli. Paulo sumɔɔɔ ni enyɛmimɛi ni esumɔɔ amɛ sane lɛ atsɔmɔ “heyelilɔi yakatswaa,” ejaakɛ no baatsɔɔ amɛ hiɛkpatamɔ. Shi moŋ, eesumɔ ni amɛdamɔ shi shiŋŋ yɛ “sanekpakpa” lɛ ni ejaje etsɔɔ amɛ lɛ mli.
2. (a) Mɛni hewɔ esa akɛ wɔtsu “sanekpakpa” lɛ he nii waa ŋmɛnɛ lɛ? (b) Yɛ mɛɛ gbɛ nɔ akɛ gbohiiashitee lɛ ekpɛtɛ “sanekpakpa” lɛ?
2 Nakai nɔŋŋ ŋmɛnɛ, jeŋ ko ni leee Nyɔŋmɔ mli wɔyɔɔ nɛɛ. No hewɔ lɛ, esa akɛ wɔ mɛi ni “wɔŋɔ wɔhiɛ wɔfɔ Nyɔŋmɔ hiɛkalɔ lɛ nɔ” lɛ atsu nii waa ni wɔwaje wɔhe wɔha “sanekpakpa” lɛ. (1 Timoteo 4:10) “Sanekpakpa” nɛɛ gbalaa jwɛŋmɔ kɛyaa wɔ ‘Nuŋtsɔ [Yehowa] kɛ e-Kristo lɛ maŋtsɛyeli’ lɛ nɔ bianɛ. Gbohiiashitee nɔ Kristo Yesu kɛ ehefatalɔi maŋtsɛmɛi 144,000 tsɔɔ ni amɛnaa nakai maŋtsɛyeli lɛ, ŋwɛi Zion Gɔŋ lɛ. Agbɛnɛ hu gbohiiashitee nɔ adesai ateŋ mɛi ni fa aaatsɔ ana Maŋtsɛyeli lɛ shikpɔŋ nɔ nɔyeli he lɛ. (Kpojiemɔ 11:15; 14:1; 20:12) No hewɔ lɛ, gbohiiashitee lɛ bafeɔ “sanekpakpa” lɛ fa ni ekaaa.
GBOHIIASHITEE HIƐNƆKAMƆ LƐ
3. Mɛɛ gbɛ nɔ gbohiiashitee he tsɔɔmɔ lɛ teɔ shi woɔ susuma ni gbooo he tsɔɔmɔ lɛ?
3 Belɛ mɛni ji nɛkɛ gbohiiashitee hiɛnɔkamɔ nɛɛ? Ejeee hiɛnɔkamɔ ni damɔ susuma ni akɛɛ egbooo, ni jeŋ apasa jamɔ maŋtsɛyeli lɛ tsɔɔ, yɛ Kristendom mli kɛ esɛɛ fɛɛ lɛ nɔ. Dabi, eji hiɛnɔkamɔ kɛha susumai ni gboiɔ! Wiemɔ “gbohiiashitee” (Hela, an·asʹtas·is) lɛ pueɔ shii 40 yɛ Kristofoi a-Hela Ŋmalɛi lɛ amli. Eshishi ji ni aaate shi adamɔ shi kɛba wala mli ekoŋŋ. Bɔni afee ni ate shi kɛba wala mli ekoŋŋ lɛ, esa akɛ klɛŋklɛŋ lɛ mɔ lɛ agbo da, ejaakɛ nɔ ni jeee wala lɛ gbele ni.—5 Mose 30:19, 20; Yesaia 38:17-19.
4. Mɛni tsɔɔ akɛ mra be mli Yudafoi lɛ he shikpɔŋ nɔ gbohiiashitee amɛye shi jeee adesa susuma ni gbooo?
4 Adesa susuma ni gbooo he tsɔɔmɔ ko bɛ Hebri Ŋmalɛi lɛ amli. Jwɛŋmɔ nɛɛ ji nɔ ko ni Yudafoi lɛ leee. Shi kɛ̃ lɛ, nibii babaoo yɛ ni tsɔɔ akɛ amɛheɔ shikpɔŋ nɔ gbohiiashitee amɛyeɔ. Eka shi faŋŋ akɛ no hewɔ ni amɛsusu akɛ Yesu baanyɛ afee ‘Yohane Baptisilɔ lɛ, Elia, Yeremia aloo gbalɔ kroko’ ni ete shi lɛ.—Mateo 16:14.
5. Mɛni gbɛ Abraham kɛ blema Nyɔŋmɔ tsuji krokomɛi lɛ kpa ni kɛ Nyɔŋmɔ yiŋtoo kpaa gbee?
5 Yɛ be mli ni etsɔɔ Habel, Henok, Noa kɛ Abraham shiabii lɛ anɔkwayeli lɛ mli lɛ, bɔfo Paulo kɛɔ wɔ akɛ: “Hemɔkɛyeli mli mɛnɛɛmɛi fɛɛ gboi yɛ, tsɛ amɛnine shɛko nii ni awo shi lɛ anɔ, shi moŋ shɔŋŋ kɛkɛ amɛna yɛ, ni amɛkɛshɛje amɛmii, ni amɛnya he, ni amɛjaje akɛ gbɔi kɛ mɛi kpɔji ji amɛ yɛ shikpɔŋ lɛ nɔ.” Amɛmiikpa gbohiiashitee ni baaba shikpɔŋ nɔ, yɛ “maŋ ni yɔɔ shishitoo ni wa” lɛ nɔyeli—Nyɔŋmɔ maŋtsɛyeli kɛtsɔ Mesia lɛ nɔ lɛ gbɛ. Beni aka lɛ ni ekɛ Isak asha afɔle lɛ, Abraham anɔkwafo lɛ “bu akɛ Nyɔŋmɔ yɛ hewalɛ ni ekɛaatee lɛ shi kɛaajɛ gbohii ateŋ tete.” Agbɛnɛ hu Abraham he Nyɔŋmɔ shiwoo ni ekɛha lɛ akɛ “ni oseshi lɛ mli aaajɛ ajɔɔ shikpɔŋ lɛ nɔ jeŋmaji fɛɛ” lɛ eye. No hewɔ lɛ yɛ sane naatsɔɔmɔ ni mli ka shi faŋŋ naa lɛ, ehe baahia ni atee nakai jeŋmaji lɛ amlibii ateŋ mɛi ni fa lɛ ashi kɛjɛ gbohii ateŋ bɔni afee ni amɛna jɔɔmɔi ni tamɔ nɛkɛ kɛtsɔ nakai “seshi” lɛ nɔ lɛ mli ŋɔɔmɔ.—1 Mose 22:18; Hebribii 11:4-19.
6. Mɛni ji nɔ ni Hiob kɛ Korabii lɛ awiemɔi lɛ tsɔɔ yɛ gbohiiashitee lɛ he?
6 Yɛ sɛɛ mli lɛ, Hiob ni hiɛɔ emuuyeli mli lɛ bi sane lɛ akɛ: “Kɛji gbɔmɔ gbo lɛ, ani ehiɛ aaaka ekoŋŋ?” Hiob he ye akɛ gbɔmɔ hiɛ baaka. Ni etsɔ hemɔkɛyeli nɔ etsɔɔ nakai kɛtsɔ bi ni ebi Nyɔŋmɔ akɛ ekɛ lɛ atee Sheol (adesai akwamaŋ gbonyobu) lɛ mli ni ekai lɛ yɛ be ko mli lɛ. (Hiob 14:13-15) Korabii lɛ gba yɛ Lala 45:16 akɛ Mesia lɛ baana “bihii” ni eeewo amɛ “lumɛi yɛ shikpɔŋ nɔ fɛɛ,” yɛ e-afii akpe nɔyeli be lɛ mli. Mɛi ni baafata nɛkɛ “bihii” nɛɛ ahe ji ‘eblematsɛmɛi’ ni eeetsɔ tsɛ kɛha amɛ kɛtsɔ shi ni eeetee amɛ kɛjɛ gbohii ateŋ lɛ nɔ lɛ.—Mateo 1:1-16; Luka 3:23-38.
7. (a) Yɛ mɛɛ gbɛ nɔ gbalɔi lɛ aniŋmaa fiɔ shikpɔŋ nɔ shitee he hiɛnɔkamɔ lɛ sɛɛ? (b) Mɛni hewɔ Daniel kɛ mɛi krokomɛi ashitee lɛ baafee “shitee ni hi” lɛ?
7 Gbalɔi ni kɛ mumɔ wie lɛ hu wie gbohiiashitee ni amɛnu shishi akɛ eeefee shikpɔŋ nɔ nɔ̃ lɛ he. (Yesaia 25:8; 26:19; Hoshea 13:14) Yɛ be mli ni egbele bɛŋkɛɔ lɛ, Daniel ni egbɔ lɛ nine shɛ shiwoo lɛ nɔ akɛ: “Ooojɔɔ ohe, ni ooote shi oyana ogbɛfaŋnɔ yɛ gbii lɛ anaagbee lɛ mli.” (Daniel 12:13) Daniel, “ni tsɔ hemɔkɛyeli nɔ . . . tsimɔ jatai anaa” lɛ kpa “shitee ni hi fe no” lɛ gbɛ. Enɛ baafee shitee kɛmiiya wala mli yɛ Nyɔŋmɔ maŋtsɛyeli ni eto ema shi lɛ shishi, nɔ ko ni tamɔɔɔ nɔ ni Elia, Elisha, Yesu kɛ bɔfoi lɛ fee yɛ gbɔmɛi ni amɛtee amɛ shi kɛjɛ gbohii ateŋ shi amɛku sɛɛ amɛgboi ekoŋŋ lɛ agbɛfaŋ lɛ.—Hebriibii 11:33, 35.
8. Mɛni ji jwɛŋmɔ ni mɛi ni Yohane tsu amɛ lɛ kɛ Marta fɛɛ hiɛ yɛ gbohiiashitee lɛ he?
8 Beni Yesu eje esɔɔmɔ lɛ shishi lɛ, Yohane Baptisilɔ lɛ ni awo lɛ tsuŋ lɛ tsu mɛi koni ayabi kɛji akɛ Yesu diɛŋtsɛ ji Mesia lɛ. Yɛ be mli ni etsu naakpɛɛ nitsumɔi ni ji tsamɔi sɔrɔtoi lɛ, Yesu kɛɛ amɛ akɛ: “Nyɛyaa ni nyɛyagbaa Yohane nibii ni nyɛna ni nyɛnu lɛ, ákɛ shwilafoi miina nii, obubuafoi miinyiɛ, kpitiyelɔi ahe miitse, toimulɔi miinu nii, gbohii miite shi, aajaje sanekpakpa lɛ aaatsɔɔ ohiafoi.” (Luka 7:19-23) No hewɔ lɛ, jeee akɛ Yesu kɛmiima shi shiŋŋ akɛ lɛ ji Mesia lɛ kɛkɛ, shi moŋ eetswa hemɔkɛyeli yɛ nɔ ni ebaatsu kɛtsɔ emaŋtsɛyeli lɛ nɔ lɛ ema shi, yɛ gbohii ni eeetee amɛ shi lɛ po he. Nɛkɛ gbɔmɛi nɛɛ nu shishi akɛ shikpɔŋ nɔ gbohiiashitee nɛ. Nakai nɔŋŋ ji Marta, mɔ ni yɛ sɛɛ mli lɛ ekɛɛ Yesu yɛ Lazaro ni gbo lɛ he akɛ: “Mile akɛ ebaate shi yɛ gbohiiashitee lɛ mli yɛ naagbee gbi lɛ nɔ” lɛ.—Yohane 11:24.
ŊWƐI GBOHIIASHITEE LƐ
9. Mɛɛ gbɛ nɔ Lazaro tsɔ ni enine shɛ ŋwɛi shitee he hiɛnɔkamɔ nɔ lɛ?
9 Eji Yesu eteee Lazaro shi yɛ nakai be lɛ mli kulɛ ehiɛnɔkamɔ lɛ baafee shikpɔŋ nɔ nɔ̃. Shi Yesu fee naakpɛɛ nii lɛ, yɛ wala mli ni ekɛ Lazaro ba kɛjɛ gbohii ateŋ kɛha be fioo. Ŋwanejee ko bɛ he akɛ Lazaro hi shi kɛtee Pentekoste gbi yɛ afi 33 Ŋ.B. lɛ sɛɛ, ni enɛ baatsɔɔ akɛ enine shɛ duromɔ kroko nɔ kɛjɛ Nuŋtsɔ lɛ ŋɔɔ. Ejaakɛ akɛ Nyɔŋmɔ mumɔ lɛ baafɔ lɛ yɛ nakai Pentekoste gbi lɛ nɔ koni ena ŋwɛi wala hiɛnɔkamɔ, kɛ ŋwɛi shitee he gbɛkpamɔ. Mɛɛ gbɛ nɔ atsɔ agbele nɛkɛ hegbɛ nɛɛ naa?
10. Mɛɛ jwɛŋmɔ ni ejaaa ji nɔ ni te shi yɛ Paulo gbii lɛ amli, shi mɛɛ gbɛ nɔ etsɔ eku enɛ naa?
10 Bɔfo Paulo wie gbohiiashitee lɛ he ni etsɔɔ mli yɛ eklɛŋklɛŋ wolo ni eŋma eyaha Korinto Kristofoi lɛ mli. Mɛi komɛi yɛ asafo lɛ mli ni miije ŋwane akɛ “gbohiiashitee ko bɛ.” Eka shi faŋŋ akɛ jwɛŋmɔ ni amɛna lɛ ji akɛ Kristofoi ni yɔɔ wala mli lɛ ena mumɔŋ “gbohiiashitee” ko momo. Ni ekolɛ mɛi komɛi kɛ enɛ miifutu Plato jeŋ nilee ni kɔɔ susuma ni gbooo lɛ he lɛ. Bɔ fɛɛ bɔ ni amɛjwɛŋmɔ ni ejaaa nɛɛ ji lɛ, Paulo na akɛ ehe miihia ni ‘ejaje amɛ’ kɛtsɔ hesaa kɛ nilee ni ekɛaatsu nii ni ekɛtsɔɔ gbohiiashitee lɛ he tsɔɔmɔ ni ji anɔkwale lɛ mli, ni ema ‘sanekpakpa lɛ ni aatsɔ nɔ ahere amɛyiwala lɛ nɔ mi.’—1 Korintobii 15:1, 2, 12.
11. “Sanekpakpa” lɛ kɛ gbohiiashitee hiɛnɔkamɔ lɛ tsa yɛ mɛɛ gbɛ nɔ?
11 Mɛni ji nɛkɛ “sanekpakpa” nɛɛ? Ekɔɔ Kristo lɛ he. Paulo kɛ “klɛŋklɛŋ saji” ni he hiaa lɛ fata anɔkwale ni eji akɛ Kristo gbo, afũ lɛ, ni atee lɛ shi, ni ákɛ ejie ehe kpo, klɛŋklɛŋ lɛ etsɔɔ Kefa (Petro) , kɛ agbɛnɛ kɛtsɔ epuemɔ yɛ gbɛi sɔrɔtoi anɔ ni ekɛ ehe tsɔɔ mɛi 500 kɛ mɛi krokomɛi babaoo lolo, kɛ agbɛnɛ yɛ naagbee lɛ Paulo diɛŋtsɛ hu, lɛ he. Lɛlɛŋ, atee Kristo shi yɛ mumɔŋ! (1 Petro 3:18) Taakɛ Paulo ma nɔ mi shii enyɔ lɛ, nɛkɛ nibii ni kanyaa mɔ nɛɛ ba “yɛ ŋmalɛ lɛ anaa,” ni emaa nibii ni Yehowa wiemɔ lɛ egba ni kɔɔ Mesia lɛ he lɛ nɔ mi. Eji jeee ákɛ akɛ wɔ hemɔkɛyeli lɛ efee tamɔ sɛkɛ awo anɔkwale ni Yesu Kristo gbohiiashitee lɛ ji lɛ mli kulɛ, ebaafee nɔ ni sɛɛnamɔ bɛ he.—1 Korintobii 15:3-8, 17.
“MƆ FƐƐ MƆ YƐ LƐ DIƐŊTSƐ EGBƐJIANƆ”
12. Kristo batsɔɔ “klɛŋklɛŋ mɔ” yɛ mɛɛ gbɛ nɔ?
12 Agbɛnɛ hu, bɔfo lɛ kɛ gbohiiashitee lɛ tsaa Yehowa Maŋtsɛyeli yiŋtooi sɔrɔtoi lɛ. Paulo kɛ hekɛnɔfɔɔ jaje akɛ: “Shi agbɛnɛ atee Kristo shi kɛjɛ gbohii ateŋ, efee klɛŋklɛŋ mɔ yɛ mɛi ni ewɔ [yɛ gbele mli] lɛ ateŋ.” Kɛji akɛ Kristo ji “klɛŋklɛŋ mɔ” lɛ, belɛ esa akɛ mɛi krokomɛi ni abaatee amɛ shi hu ahi shi, shi “mɔ fɛɛ mɔ yɛ lɛ diɛŋtsɛ egbɛjianɔ.” Esa akɛ mɛi krokomɛi amɛ kɛyashi beni Kristo,‘eba’ kɛ Maŋtsɛyeli hewalɛ lɛ, yɛ be mli ni kpɔlɔ, Yesu Kristo, jeɔ shishi ‘eteeɔ mɛi ni gboiɔ lɛ ashi kɛbaa wala mli’ lɛ, aloo beni eteeɔ mɛi ni egboi yɛ esha ni amɛna kɛjɛ Adam dɛŋ hewɔ lɛ ashi lɛ.—1 Korintobii 15:20-23, Kingdom Interlinear.
13. Gbohiiashitee lɛ yaa nɔ yɛ “gbɛjianɔtoo” loo “gbɛhe” naa yɛ mɛɛ gbɛ nɔ?
13 Yɛ Kristo sɛɛ lɛ, mɛi ni ateeɔ amɛ shi ‘yɛ amɛ diɛŋtsɛ amɛ gbɛjianɔ naa’ lɛ baafee 144,000 Maŋtsɛyeli niyelɔi ni afɔ amɛ mu lɛ ni amɛnyiɛ Yesu nanemaahei asɛɛ kɛtee gbele mli lɛ. Nɛkɛ gbohiiashitee nɛɛ jeɔ shishi ‘yɛ beni eba’ lɛ [Hela, parousia] ni je shishi yɛ 1914 afi ni sa kadimɔ jogbaŋŋ lɛ mli lɛ. Kristo mumɔŋ “nyɛmimɛi” lɛ ateŋ mɛi fioo ko miisɔmɔ lolo yɛ shikpɔŋ nɔ, ni abaatee mɛnɛɛmɛi hu shi kɛjɛ gbohii ateŋ yɛ nɛkɛ “gbɛnaa” nɛɛ mli, yɛ “hiŋmɛitswaa mli” yɛ be mli ni amɛ gboi akɛ adesai lɛ. Nɛkɛ gbɛ nɔ abaatsɔ abua “[mumɔŋ] Nyɔŋmɔ Israel lɛ” fɛɛ anaa kɛya ŋwɛi maŋtsɛyeli lɛ mli.—1 Korintobii 15:22, 23, 50-52; Hebribii 2:10-13; Kpojiemɔ 7:4-8; Galatabii 6:16.
14. Te Paulo fee ŋwɛi shitee lɛ he nɔkwɛmɔ nɔ eha tɛŋŋ?
14 Bɔfo lɛ feɔ Kristofoi ni akɛ mumɔ efɔ amɛ lɛ agbele kɛ gbohiiashitee lɛ he nɔkwɛmɔ nɔ fɛfɛo. Efeɔ enɛ kɛtsɔɔ dumɔwu kuli ko kɛkɛ, kɛ ŋmaa ni jio, aloo nii ni eshwɛ lɛ eko ni jio lɛ gbele ni no mli kwɛ̃ɛnii hee lo tso kroko jɛɔ mli kwɛ̃ɔ lɛ nɔ. Hɛɛ, “ateeɔ” gbɔmɔtso ni “aduɔ lɛ yɛ nɔ ni bɛ nyam mli” lɛ “shi yɛ anunyam mli” ákɛ anunyam mumɔŋ gbɔmɔtso ni ‘hiɛ naagbee Adam’—Nuŋtsɔ Yesu Kristo ‘su.’—1 Korintobii 15:35-49.
15. “Shitee ni hi” lɛ baa yɛ nɛgbɛ, ni namɛi fata he?
15 Shi kɛ̃ lɛ, ani 144,001 ni Kristo fata he lɛ pɛ ji mɛi ni abaatee amɛ shi yɛ gbɛjianɔtoo kpakpa nɛɛ naa? Dabi! Ejaakɛ Hebribii 11:40 kɛɔ wɔ akɛ ateeɔ amɛ shi kɛyaa “nɔ ko kpakpa” mli, mumɔŋ shihilɛ he ko mli. Enɛ ji ekpakpa fe mɛni? Fe nɔ ni anaa yɛ gbohiiashitee ni nyiɛɔ no sɛɛ baa yɛ gbɛjianɔtoo lɛ naa lɛ! Mɛi ni esa akɛ amɛfata nɛkɛ shitee nɛɛ he ji mɛi ni abaafee amɛ “mɛi yɛ shikpɔŋ lɛ nɔ fɛɛ,” mɛi ni eka shi faŋŋ akɛ amɛbaafata mɛi ni abaatee amɛ shi klɛŋklɛŋ yɛ shikpɔŋ nɔ yɛ be mli ni Yehowa eye kunim kwraa yɛ Harmagedon ta lɛ mli lɛ sɛɛ lɛ ahe. Kɛkɛ lɛ amɛbaanyɛ amɛtsu nitsumɔi ni ekɛbaawo amɛ dɛŋ yɛ “shikpɔŋ hee”—teokrase asafo ni ji Nyɔŋmɔ webii ni yɔɔ shikpɔŋ ni atsumɔ nɔ fɛfɛo lɛ nɔ lɛ he nii jogbaŋŋ. Amɛ nɔ̃ lɛ ji “shitee ni hi,” ejaakɛ ebaa yɛ Nyɔŋmɔ maŋtsɛyeli lɛ shishi, kɛ naanɔ wala gbɛkpamɔ kɛha mɛi ni ateeɔ amɛ shi lɛ. Kuu ni baa yɛ nɛkɛ be nɛɛ mli wɔkpaa gbɛ akɛ wɔbaana Kristofoi anɔkwafoi ni amɛjɔɔ amɛhe nɔ ni ŋmɛnɛ amɛyɔɔ shikpɔŋ nɔ hiɛnɔkamɔ ni gboi yɛ nibii sɔrɔtoi ahewɔ dani “shikpɔŋ hee” lɛ ba lɛ.—Yesaia 32:1; Kpojiemɔ 16:14, 16; 21:1, 3, 4.
KUU NI ADURO AMƐ
16. Mɛɛ kuu kroko naa duromɔ krɛdɛɛ ko, ni mɛɛ hegbɛi amli gbɛfaŋnɔ amɛnaa?
16 Shi kɛ̃ lɛ, kuu kome ko yɛ ni aduro amɛ yɛ gbɛ krɛdɛɛ nɔ. Mɛnɛɛmɛi baanyɛ afee namɛi? Amɛji “asafo babaoo” lɛ ni bɔfo Yohane tsɔɔ mli fitsofitso yɛ Kpojiemɔ 7:9-17 lɛ. Amɛhiɛnɔkamɔ ji naanɔ wala yɛ “shikpɔŋ hee” lɛ nɔ. Akɛ kuu lɛ, amɛtsɔɔ “amanehulu kpeteŋkpele” lɛ mli ni ehe ehiaaa ni amɛgboi. Mɛɛ hegbɛ ni sa po mɛnɛɛmɛi naa mli ŋɔɔmɔ nɛkɛ yɛ amɛtadei lɛ ni amɛfɔ he yɛ Toobi lɛ lá lɛ mli ni amɛha eyɛ futaa lɛ hewɔ! Yɛ naagbee gbii nɛɛ naagbee kwraa ni he hiaa waa nɛɛ mli, yɛ be mli ni esa akɛ aye jeŋmaji kɛ shikpɔŋ nɔ gbɔmɛi odase kpeteŋkpele nɛɛ mli lɛ, aana ni nɛkɛ “asafo babaoo” ni amɛyibɔ fe 2,300,000 bianɛ lɛ miitsu nɛkɛ “sɔɔmɔ krɔŋkrɔŋ” nɛɛ he nii yɛ Yehowa gbɛjianɔtoo kɛha jamɔ lɛ shikpɔŋ nɔ kpoi lɛ anɔ. Ŋwɛi kojomɔ “hulu loo latsaa ko esaŋ” nɛkɛ “asafo babaoo” nɛɛ “ahe.” Ni mɛni hewɔ? “Ejaakɛ Toobi [Yesu Kristo] lɛ ni yɔɔ [ŋwɛi] maŋtsɛsɛi lɛ teŋ lɛ aaalɛ amɛ, ni eeetsɔɔ amɛ gbɛ kɛaatee wala nu bui ahe, ni Nyɔŋmɔ aaatsumɔ amɛhiɛaŋ yaafonui fɛɛ.”
17. (a) Mɛɛ miishɛɛ mɛɔ “asafo babaoo” lɛ? (b) Yɛ mɛɛ gbɛ nɔ naakpɛɛ nii ni ji gbohiiashitee lɛ baaya nɔ kɛyashɛ enaagbee kwraa?
17 Ŋwanejee ko bɛ he akɛ “asafo babaoo” lɛ amii baanyɛ ashɛ amɛhe yɛ be mli ni amɛyaa ni amɛyabote shikpɔŋ ni atsumɔ nɔ fɛfɛo lɛ nɔ ni amɛhereɔ anɔkwafoi ni ateeɔ amɛ shi kɛjɛɔ gbohii ateŋ kɛbaa lɛ atuu lɛ. Agbɛnɛ hu, yɛ Nyɔŋmɔ be ni sa mli lɛ, ni agbɛnɛ yɛ gbɛjianɔtoo kpakpa naa lɛ, adesai akpekpei toi akpekpei abɔ ni yɔɔ “kaimɔ gbohiiabui” amli lɛ baaje kpo kɛba shikpɔŋ nɔ yɛ adesai ni eshwɛ lɛ fɛɛ agbohiiashitee lɛ mli. (Yohane 5:28, 29; Kpojiemɔ 20:12) Yɛ be mli ni “shikpɔŋ hee” lɛ nɔ bii lɛ jeɔ nitsumɔ shishi, ni agbɛnɛ Kristo kɛ ehefatalɔi nɔyelɔi lɛ kɛ ekpɔmɔ afɔleshaa lɛ mli sɛɛnamɔi lɛ tsuɔ nii ni amɛtsaa adesai ni amɛwoɔ amɛnɔ kɛshɛɔ jwɛŋmɔŋ kɛ gbɔmɔtsoŋ emuuyeli he lɛ, mɛɛ nyamɔ po baaba adesai awekui ni amɛfee ekome ni yɔɔ miishɛɛ lɛ ateŋ nɛkɛ!—Yesaia 65:17, 18; 2 Petro 3:13.
18. Mɛɛ gbɛ nɔ Nyɔŋmɔ yiŋtoo kpeteŋkpele ni kɔɔ wɔshikpɔŋ lɛ he lɛ baaba mli kwraa yɛ naagbee?
18 Afii akpe baaho tamɔ gbi kome, kɛ hoo kwraa lɛ, yɛ Yehowa hiɛ. (2 Petro 3:8) Adesai ni eye emuu baayi shikpɔŋ nɔ obɔ, taakɛ Yehowa to eyiŋ be mli ni ebɔ gbɔmɔ klɛŋklɛŋ kwraa, aaafee afii 7,000 ni eho lɛ. E-afii 7,000 hejɔɔmɔ “gbi” lɛ baaba enaagbee, ni efeee efolo, ejaakɛ eyiŋtoo kpeteŋkpele ni kɔɔ shikpɔŋ lɛ he lɛ eba mli. Agbɛnɛ mɛni?
19. Mɛni baa yɛ sɛɛ mli beni akpata “naagbee henyɛlɔ” lɛ hiɛ lɛ?
19 Bɔfo Paulo kɛɔ wɔ: “No sɛɛ dani naagbee lɛ baaba, beni [Kristo] eeeŋɔ maŋtsɛyeli lɛ eha Nyɔŋmɔ kɛ Tsɛ lɛ, ni eeefo nɔyeli fɛɛ kɛ hegbɛ fɛɛ kɛ hewalɛ fɛɛ [ni teɔ shi woɔ lɛ] sɛɛ lɛ. Shi ja eye maŋtsɛ kɛyashi beyinɔ ni eeeŋɔ henyɛlɔi lɛ fɛɛ eto enajiashi. Naagbee henyɛlɔ ni abaafo esɛɛ ji gbele. . . . no lɛ [Bi] lɛ diɛŋtsɛ hu aaaŋɔ ehe eto Mɔ ni ŋɔ nii fɛɛ to eshishi lɛ shishi, koni Nyɔŋmɔ afee nibii fɛɛ yitso.” (1 Korintobii 15:24-28) Agbɛnɛ abaafɛne Satan, taakɛ atsɔɔ mli yɛ Kpojiemɔ 20:7-10 lɛ, koni eka emuuyeli mli ni aŋkroaŋkroi ni ji adesai ni aha amɛye emuu lɛ hiɛ lɛ ekwɛ. Kɛkɛ lɛ abaashɛrɛ lɛ kɛ mɛi ni baanyiɛ esɛɛ lɛ awo mfonirifeemɔ “la kpaakpo” ni damɔ shi kɛha naanɔ hiɛkpatamɔ lɛ mli.
20. Mɛɛ anunyam gbɛkpamɔ ji nɔ ni baaka adesai ahiɛ be mli ni Nyɔŋmɔ hejɔɔmɔ gbi lɛ baa naagbee lɛ?
20 Akɛni Nyɔŋmɔ gbi ni “ejɔɔ ehe kɛjɛ enitsumɔi fɛɛ” ni etsu yɛ shikpɔŋ lɛ bɔɔ he lɛ eba naagbee agbɛnɛ hewɔ lɛ, ŋwanejee ko bɛ he akɛ ebaaje nitsumɔi heei ni baabote naanɔi fɛɛ mli lɛ shishi. Be ko baŋ ni anaaa nɔ ko atsu yɛ be mli ni shikpɔŋ lɛ nɔ bii ni yɔɔ miishɛɛ lɛ nyãa yɛ be fɛɛ mli yɛ obalaŋtai ahewalɛ ni yɔɔ ehee daa mli ni amɛnaa nitsumɔ fɛɛ nitsumɔ ni Nyɔŋmɔ ni yɔɔ yiŋtoo lɛ kɛhaa amɛ akɛ amɛtsu lɛ mli gbɛfaŋnɔ lɛ.—1 Mose 2:3; Yesaia 66:22.
NƆ NI HE HIAA TITRI LƐ
21. Mɛɛ gbɛ wɔɔtsɔ nɔ ni Paulo wiemɔ ni yɔɔ 1 Korintobii 15 lɛ he aba sɛɛnamɔ aha wɔ?
21 Esa akɛ ‘wɔmɔ sanekpakpa lɛ mli waa,’ kɛ gbohiiashitee he hiɛnɔkamɔ ni fata he lɛ, ejaakɛ gbohiiashitee lɛ ji nɔ ni he hiaa Nyɔŋmɔ tsuji fɛɛ waa. Hii kɛ yei anɔkwafoi ni hi shi yɛ blema bei lɛ amli lɛ hé shikpɔŋ nɔ gbohiiashitee amɛye ni amɛkpa enɛ gbɛ. (Hebribii 11:13-16) Atee Kristo Yesu shi akɛ “klɛŋklɛŋ mɔ” yɛ gbohiiashitee lɛ mli, ni mɛi ohai babaoo kɛ amɛhiŋmɛi ye enɛ he odase. Kristofoi ni afɔ amɛ mu ni akɛ Nyɔŋmɔ mumɔ lɛ efɔ́ amɛ lɛ ‘shiɛ tsɔɔ bɔɔnii fɛɛ ni yɔɔ ŋwɛi shishi lɛ,’ yɛ bɔfoi lɛ abeaŋ kɛ ŋmɛnɛŋmɛnɛ beaŋ hu, no hewɔ lɛ “sanekpakpa” lɛ ni kɔɔ gbohiiashitee lɛ he lɛ ebɔle jeŋ kuturuku nɛɛ fɛɛ. (Kolosebii 1:23) Yɛ be mli ni mɛi ni afɔ amɛ mu lɛ ni amɛshwɛ lɛ gbeɔ amɛshikpɔŋ nɔ nitsumɔ lɛ naa ni amɛnaa amɛ ŋwɛi nyɔmɔwoo lɛ, “asafo babaoo” ko hu ni hiɛ naanɔ wala yɛ shikpɔŋ nɔ he hiɛnɔkamɔ kɛ amɛhe ewo Maŋtsɛyeli lɛ he “sanekpakpa” lɛ jajemɔ mli.—Mateo 24:14.
22. Mɛɛ naagbee ŋaawoo Paulo kɛha yɛ ewolo lɛ mli, ni mɛni hewɔ esa akɛ wɔnyiɛ sɛɛ lɛ?
22 Mɛɛ hegbɛ nɛkɛ kui nɛɛ fɛɛ ena nɛkɛ, yɛ be mli ni amɛnine shɛɔ otii ni mamɔ amɛhiɛ lɛ nɔ lɛ, mɔ fɛɛ mɔ yɛ egbɛjianɔtoo loo egbɛhe mli! Yɛ anɔkwale mli lɛ, wɔ ni wɔyɔɔ wala mli ŋmɛnɛ lɛ yɛ nɔ fɛɛ nɔ ni wɔbaadamɔ nɔ wɔnyiɛ Paulo ŋaawoo kroko ni ekɛha nɛɛ sɛɛ: “Nyɛbua, nyɛdamɔa shi shiŋŋ yɛ hemɔkɛyeli lɛ mli, nyɛfea hii, ni nyɛhe awaa! Nyɛfea nyɛnii fɛɛ yɛ suɔmɔ mli.” (1 Korintobii 16:13, 14) Enɛ baaha wɔtsɔmɔ heyelilɔi ni naa amɛhemɔkɛyeli lɛ he sɛɛ.a
[Shishigbɛ niŋmai]
a Ajie kɛjɛ December 15, 1981 Blɔfo Buu-Mɔɔ lɛ mli
Ani ooonyɛ oha nɔ ni nyiɛ sɛɛ nɛɛ ahetoo?
◼ Mɛni tsɔɔ akɛ hii kɛ yei ni yɔɔ hemɔkɛyeli ni hi shi yɛ mra bei lɛ amli lɛ kpa gbohiiashitee kɛmiiba shikpɔŋ nɔ gbɛ?
◼ Yɛ Kristo ni ji “klɛŋklɛŋ mɔ” lɛ sɛɛ lɛ, mɛi enyiɛ naa “mɔ fɛɛ mɔ yɛ lɛ diɛŋtsɛ egbɛjianɔ” ni kɛ mɔ yaa ŋwɛi shitee mli lɛ mli gbɛfaŋnɔ?
◼ Mɛɛ be ni mɛɛ kui naa shitee ni kɛ mɔ baa shikpɔŋ nɔ lɛ mli gbɛfaŋnɔ?
◼ Yɛ mɛɛ gbɛ nɔ aduro kuu ko jogbaŋŋ yɛ wala ni amɛnaa yɛ shikpɔŋ nɔ ni gbohiiashitee he ehiaaa amɛ lɛ hewɔ?
◼ Mɛni esa akɛ wɔfee bɔni afee ni wɔkatsɔmɔ “heyelilɔi yakatswaa”?