Sanebimɔi Ni Jɛ Kanelɔi Adɛŋ
■ Ani eeenyɛ efee akɛ lá ni Biblia lɛ egu eyeli Iɛ kɔɔ kooloo ko ni gbɔmɔ egbe lɛ lɛ lá he, shi jeee kooloo ko ni lɛ diɛŋtsɛ egbo ni ashwieee elá shi aloo lá ni jɛ kooloo loo adesa ni hiɛ ka mli lɛ he?
Mɛi komɛi esusu nakai, ni amɛkɛ amɛnine tsɔɔ Biblia mli wiemɔi komɛi ni tamɔ nɔ ni efiɔ sɛɛ. Yɛ enɛ hewɔ lɛ amɛkɛɛ akɛ efeŋ nɔ ni ejaaa akɛ mɔ ko aaakpɛlɛ lá ni mɔ ko heɔ ewoɔ emli kɛjɛɔ lá halɔ ni hiɛ kã lɛ ŋɔɔ lɛ nɔ. Susumɔ ni tamɔ nɛkɛ baafee tamɔ nɔ ko ni ja shi kukuji ni akɛtsu nii lɛ amlikwɛmɔ kɛ ŋmalɛi krokomɛi ni akɛtsu nii lɛ amlitaomɔ jogbaŋŋ tsɔɔ akɛ Nyɔŋmɔ miikpa ewebii agbɛ akɛ amɛaatsi amɛhe kɛjɛ lá he kɛ lá ni aaaha amɛhi wala mli lɛ he, kɛji akɛ ejɛ bɔɔ nɔ ko ni hiɛ ka aloo egbo mli jio.
Akɛɛ Israelbii lɛ akɛ: “Nyɛkayea nɔ ko ni lɛ diɛŋtsɛ egbo; gbɔ ni hiɔ ogboi lɛ amli lɛ oŋɔha ni eye, aloo ohɔɔ oha mɔkpɔŋ ko; ejaakɛ Yehowa, o-Nyɔŋmɔ lɛ, maŋ krɔŋkrɔŋ jio.” (5 Mose 14:21) Eyɛ mli akɛ ashwieko kooloo lɛ lá shi moŋ, shi amɛbaanyɛ amɛhɔɔ eloo lɛ amɛha gbɔ loo mɔkpɔŋ. Yɛ nɔ ni tamɔ akɛ eteɔ shi ewoɔ ehe nɛɛ gbɛfaŋ lɛ, 2 Mose 17:10 kɛɔ akɛ: “Ni mɔ fɛɛ mɔ ni yɔɔ Israel we lɛ aloo gbɔ ni toɔ amɛteŋ ni yeɔ lá fɛɛ lá lɛ, majie mihiɛ maka nakai susuma lɛ, ni mafɔ lɛ kɛaajɛ ema lɛ teŋ mashɛ mafɔ.” Mɛni hewɔ sɔrɔtofeemɔ yɔɔ ŋmalɛi nɛɛ ateŋ lɛ?
Yɛ be mli ni amɛtsɔɔ amɛjwɛŋmɔ lɛ, mɛi komɛi kɛɔ akɛ 5 Mose 14:21 ŋmɛɔ gbɔ lɛ gbɛ ni eye loo ni ashwieko elá shi kɛji akɛ eji kooloo ni jeee gbɔmɔ gbe lɛ, ni kɛ eba lɛ nɛkɛ lɛ ehe ebahiaŋ ni gbɔmɔ lɛ kɛ elá (ni damɔ shi kɛha wala) lɛ aha Nyɔŋmɔ. 3 Mose 17:15 tamɔ nɔ ni eefi nɛkɛ jwɛŋmɔ nɛɛ sɛɛ; ekɛɔ akɛ ma lɛŋ nyo aloo gbɔ ni yeɔ “nɔ ko ni enyɔ loo nɔ ko etserɛ emli” lɛ “ekɛ nu aju ehe, ni ehe tseee kɛyashi gbɛkɛ.” No hewɔ lɛ etamɔ nɔ ni tɔmɔ ko baaa yɛ lá ni aaaye lɛ mli kɛji akɛ jeee gbɔmɔ gbe nɔ ni egbo lɛ. No hewɔ lɛ mɛi komɛi kɛɔ akɛ efeŋ nɔ ni ejaaa akɛ mɔ ko aaajie lá kɛjɛ bɔɔ nɔ ni hiɛ ka mli ni ekɛtsu nii akɛ niyenii aloo ni ekɛwo mɔ kroko faji amli.
Shi kɛlɛ, ani sɔrɔtofeemɔ ni yɔɔ 5 Mose 14:21 kɛ 3 Mose 17:10, 15 lɛ ji sane ni kɔɔ gbɛ ni kooloo lɛ tsɔ nɔ egbo lɛ he? Esa akɛ Ŋmalɛ naa hetoo lɛ afee, Dabi,
Israelbii lɛ le akɛ amɛnyɛŋ amɛye kooloo ko ni lɛ diɛŋtsɛ egbo aloo nɔ ni kooloo kroko egbe lɛ ni ashwieee elá shi lɛ loo. Beni amɛyɔɔ Sinai Gɔŋ lɛ he lɛ beebe ni akɛɛ amɛ akɛ amɛshɛrɛ amɛshwie. (2 Mose 22:31) 5 Mose 14:21 kɛ enɛ kpaa gbee, egbala Israelbii lɛ ni yɔɔ Shiwoo Shikpɔŋ lɛ nɔ lɛ ajwɛŋmɔ kɛtee nɔ akɛ amɛshɛrɛ kooloi in ashwieee amɛlá shi lɛ aloo amɛshwie, aloo aŋmɛ amɛ gbɛ ni amɛhɔɔ enɛ amɛha gbɔi.
Agbɛnɛ nyɛhaa wɔtaoa 3 Mose 17:10 lɛ mli jogbaŋŋ. Ekɛɔ akɛ “mɔ fɛɛ mɔ ni yɔɔ Israel we aloo bɔ ni toɔ amɛteŋ gbɔ lɛ” akaye lá ko. Ani no tsɔɔ akɛ gbɔmɔ gbe nakai kooloo lɛ, ni yɛ enɛ hewɔ lɛ akɛ elá baaku sɛɛ aha Nyɔŋmɔ? Ni aaakɛɛ nɛkɛ lɛ tsɔɔ akɛ aatsɔɔ nɔ ni kuku lɛ kɛɔ fe bɔ ni etaoɔ etsɔɔ diɛŋtsɛ. Agbɛnɛ hu kɛji akɛ ayeɔ fɔ yɛ kooloo ni gbɔmɔ egbe lɛ lɛ lá he lɛ, belɛ 5 Mose 14:21 kɛ 2 Mose 22:31 eguŋ Israelbii lɛ akɛ amɛkaye kooloi ni amɛ diɛŋtsɛ amɛgbe ni jeee gbɔmɛi gbe amɛ lɛ aloo akɛni ajeko gbɛ ashwieko amɛlá shi lɛ hewɔ. Shi kɛlɛ Israelbii lɛ le faŋŋ akɛ amɛnyɛŋ amɛye loo ni tamɔ nɛkɛ. Ezekiel jaje akɛ: “Misusuma buleko ehe, ni kɛjɛ migbekɛbiiashi aahu kɛbashi benɛ nɛɛ miyeko kooloo ko ni lɛ diɛŋtsɛ egbo aloo kooloo ko tsɛrɛ lɛ da.”—Ezekiel 4:14; Okɛto 44:31 he.
Belɛ mɛni hewɔ ni 5 Mose 14:21 kɛɔ akɛ abaanyɛ ahɔɔ loo ni ashwieko elá shi aha “gbɔ” lɛ shi 3 Mose 17:10 guɔ gbɔ lɛ akɛ ekaye lá lɛ? Nyɔŋmɔ webii lɛ kɛ mɛi ni wieɔ Biblia mli saji ahe lɛ fɛɛ eyoo akɛ sɔrɔtofeemɔ lɛ baanyɛ ajɛ jamɔ gbɛhe mli ni gbɔ lɛ yɔɔ lɛ hewɔ. Aid to Bible Understanding (baafa 51) tsɔɔ mli akɛ eshɛɔ be ni wiemɔ “gbɔ” lɛ tsɔɔ mɔ ni hiɔ Israelbii lɛ ateŋ ni atsakeko Iɛ kwraa afeko lɛ Yudanyo. Etamɔ nɔ ni gbɔmɔ ni tamɔ nɛkɛ lɛ he awieɔ yɛ 5 Mose 14:21 lɛ, gbɔmɔ ni ebɔɔɔ mɔdɛŋ akɛ eeeye Nyɔŋmɔ mlai lɛ fɛɛ nɔ ni ebaanyɛ ekɛ kooloo ni lɛ diɛŋtsɛ egbo ni Israelbii kɛ mɛi ni amɛtsɔmɔ amɛhe Israelbii buɔ akɛ ehe tseee lɛ afee nɔ ko lɛ. Woloŋlelɔi ni ji Yudafoi kɛ sane mlitsɔɔmɔ ni tamɔ nɛkɛ eha.a
No hewɔ lɛ Nyɔŋmɔ jalɔ ko nyɛŋ aye lá kɛji akɛ ejɛ kooloo ni lɛ diɛŋtsɛ egbo aloo nɔ ni gbɔmɔ gbe lɛ lɛ mli (aloo nɔ ni yɔɔ eloo lɛ mli) . Belɛ mɛni hewɔ 3 Mose 17:15 kɛɔ akɛ kooloo ni lɛ diɛŋtsɛ egbo aloo nɔ ni kooloo kroko gbe lɛ lɛ loo ni aaaye akɛni ashwieko elá shi lɛ haa mɔ ko feɔ mɔ ni he tsee lɛ?
Wɔbaanyɛ wɔna enɛ naa yɛ 3 Mose 5:2 ni kɛɔ akɛ: “Kɛ mɔ ko ta nɔ ko ni he tseee he, kooloo ni he tseee ko gbonyo ni jio . . . ni eleee lɛ, lɛ hu ebule ehe, eye sɔ̃.” Hɛɛ, Nyɔŋmɔ kpɛlɛɔ nɔ akɛ Israelnyo baanyɛ atɔ̃ ni eleee. No hewɔ lɛ abaanyɛ anu 3 Mose 17:15 shishi akɛ eeto gbɛjianɔ eha tɔmɔ ni tamɔ nɛkɛ. Akɛ nɔkwɛmɔ nɔ lɛ, kɛji akɛ Israelnyo ko ye loo ko ni yɛ sɛɛ mli lɛ ena akɛ ashwieko elá shi lɛ, eyeɔ esha he fɔ. Shi akɛni ejeee gbɛ hewɔ lɛ, ato gbɛjianɔ ni eha ehe atse, shi enɛ sa kadimɔ: Kɛji akɛ enyɛɛɛ eto gbɛjianɔ ni ehe atse lɛ, “no lɛ esɔ ka enɔ.”—3 Mose 17:16.b
No hewɔ lɛ, kooloo ni ashwieko elá shi lɛ yeli jeee sane bibioo; ebaanyɛ ekɛ gbele aba. Anɔkwale jalɔ ko (Israelnyo loo gbɔ ni etsɔ ehe Israelnyo) lɛ nyɛŋ ajɛ esuɔmɔ mli aye kooloo ni ashwieko ela lɛ loo ni ekɔɔɔ he eko akɛ lɛ diɛŋtsɛ egbo, kooloo kroko gbe lɛ, aloo gbɔmɔ gbe lɛ. (4 Mose 15:30) Bɔfoi lɛ agwabɔɔ lɛ ma enɛ nɔ mi. Yɛ be mli ni amɛŋmaa amɛyaha Kristofoi ni feɔ mumɔŋ “Nyɔŋmɔ Israel” lɛ amɛgu kooloo ni ashɔ̃tɔ ni aaaye kɛ́ loo lɛ jɛ kooloo ni ashɔ̃tɔ yɛ oshara ni ba hewɔ loo nɔ ni gbɔmɔ shɔ̃tɔ lɛ nɔ̃ mli jio.—Galatabii 6:16; Bɔfoi lɛ Asaji 21:25.
Nakai gwabɔɔ lɛ hu fa ni Nyɔŋmɔ tsuji ‘atsi amɛhe kɛjɛ lá he.’ Kɛji akɛ nakai Kristofoi ni afɔ amɛ mu Iɛ nyɛŋ aye lá ni jɛ kooloo ni ashɔ̃tɔ lɛ mli lɛ, belɛ eka shi faŋŋ akɛ amɛnyɛŋ amɛye lá ni jɛ bɔɔ nɔ ko ni yɔɔ wala mli lɛ nɔ̃. Ewaaa akɛ aaana akɛ blema Israelbii lɛ loo Kristofoi toibolɔi lɛ ekaseŋ Afrika weku ni tsɛ̃ɔ tsina sɛ̃ fãi wulu lɛ gai bɔni afee ni amɛna lá pii kɛjɛ mli ni amɛkɛ tsina fufɔ afutu mli amɛnu lɛ. Nakai nɔŋŋ hu Nyɔŋmɔ tsuji ekpɛlɛŋ adesa lá ni abuaa naa akɛwoɔ mɛi krokomɛi amli akɛkpãa wala mli lɛ nɔ. Nɛkɛ nifeemɔi nɛɛ kuɔ Nyɔŋmɔ mla ni wieɔ shiɔ “mɔ fɛɛ mɔ ni aaaye lá ko” lɛ kɛ famɔ akɛ Kristofoi ‘atsi amɛhe kɛjɛ lá he’ lɛ mli.—Bɔfoi lɛ Asaji 15:28, 29; 3 Mose 17:10.
Yɛ mɔdɛŋ ni abɔɔ koni aba hiɛdɔɔ ni yɔɔ Nyɔŋmɔ taomɔ nii nɛɛ mli lɛ ashi lɛ fɛɛ sɛɛ lɛ, anɔkwale Kristofoi le akɛ wala ji nikeenii ni jɛ Yehowa Nyɔŋmɔ ŋɔɔ ni esa akɛ akɛtsu nii ni yɛ gbɛ ni etsɔɔ lɛ nɔ. Amɛboɔ Nyɔŋmɔ toi kɛji akɛ amɛbaanyɛ amɛtsu toiboo lɛ he nii aloo amɛnyɛŋ amɛfee nakai. Akɛ nɔkwɛmɔ nɔ lɛ, Bɔfoi lɛ Asaji 15:28, 29 lɛ faa Kristofoi ni amɛtsi amɛhe kɛjɛ wɔŋjamɔ he. No hewɔ lɛ anɔkwale Kristofonyo ni akɛ gbele miiwo ehe gbeyei akɛ kɛ ekpoo wɔŋjamɔ lɛ aaagbe lɛ lɛ ejeŋ ŋwane akɛ akɛni “amaga jeee nɔ ko” hewɔ lɛ, esaaa akɛ eŋmɛɔ ewala ni eyɔɔ amrɔ nɛɛ lɛ he yɛ okadi ko pɛ ni eeefee hewɔ. (1 Korintobii 8:4) Hebribii anɔkwafoi etɛ lɛ to okadi kpakpa yɛ toiboo he amɛha wɔ, taakɛ mra be mli Kristofoi ni kpɛlɛ gbele nɔ yɛ nikwɛmɔhe fe ni amɛkɛ tsofa-kɛ-ŋma aaashwie afɔleshaa latɛ nɔ amɛkɛja wɔŋ lɛ fee lɛ.—Daniel 3:1-18.
Nakai nɔŋŋ hu kɛ naagba ko te shi yɛ lá he lɛ, tamɔ eko lɛ beni oshara loo opireshɛn eha mɔ ko elaaje lá babaoo lɛ, Kristofonyo lɛ nyɛŋ aŋmɛɛ saji ahe yɛ emuuyeli mli ni ehiɛ lɛ he. Eboɔ e-Wala-Halɔ lɛ toi kwraa kɛ nɔmimaa akɛ, kɛji akɛ yɛ mɔdɛŋ ni tsofafeemɔ aaabɔ lɛ fɛɛ sɛɛ lɛ, e-amrɔamrɔ wala nɛɛ aaalaaje lɛ lɛ, oshara ko baŋ enaanɔ wala he. Yesu kɛɛ esɛɛnyiɛlɔi lɛ akɛ: “Ni nyɛkashea mɛi ni gbeɔ gbɔmɔtso lɛ ni amɛnyɛɛɛ susuma lɛ amɛgbe lɛ agbeeyei; shi moŋ nyɛshea mɔ ni nyɛɔ susuma kɛ gbɔmɔtso fɛɛ hiɛ ekpataa yɛ gehena mli lɛ gbeyei.”—Mateo 10:28.
Shi kɛ̃lɛ, odaseyelii ni ejɛ tsofafeemɔ mli eba nyɛsɛɛ nɛɛ tsɔɔ akɛ lá ni agbalaa awoɔ mɛi amli lɛ he ehiaaa dani ahere mɔ ko yiwala, ejaakɛ tsofafeelɔi ni he esa lɛ yeɔ odase akɛ nibii krokomɛi ni akɛaato la najiaŋ lɛ baanyɛ ahi yɛ helai babaoo mli, ni abaanyɛ akɛɛ akɛ gbɔmɛi ni aaanyɛ atsɔ lá ni agbalaa awoɔ amɛmli lɛ nɔ aha amɛhi wala mli lɛ ayi faaa kwraa, kɛ akɛto mɛi ni awui ni lá ni agbala awo amɛmli lɛ eye amɛ kɛbote gbele mli lɛ ahe lɛ. Bɔ fɛɛ bɔ ni sane lɛ ji lɛ, Kristofoi etswa amɛfai shi akɛ amɛbaabo Nyɔŋmɔ toi ni amɛkɛ bulɛ aha nɔ ni esusuɔ yɛ lá he lɛ.
No hewɔ lɛ, anɔkwale jalɔi ni yɔɔ ŋmɛnɛ lɛ yeŋ kooloo ko ni ashwieko elá shi lɛ loo, kɛji akɛ kooloo ko ni gbɔmɔ gbe lɛ lɛ loo aloo bɔɔ nɔ ko ni gbo yɛ gbɛ kroko nɔ lɛ loo jio. Ni asaŋ amɛhaŋ amɛwala aya nɔ ahi shi kɛtsɔ bɔɔ nii krokomɛi alá ni amɛaagbala amɛwo amɛmli lɛ nɔ, kooloo nɔ̃ jio, adesa nɔ̃ jio. Amɛyɔseɔ Yehowa akɛ amɛ-Walahalɔ ni amɛtswa amɛfai shi akɛ amɛbaabo lɛ toi yɛ nibii fɛɛ mli.
[Shishigbɛ niŋmai]
a Akɛ nɔkwɛmɔ nɔ kome lɛ, The Pentateuch and Haftorahs ni Dr. J. Hertz ŋma lɛ kɛɔ akɛ: “Taakɛ 3 Mose 17:15 lɛ tsɔɔ lɛ, nevelah, lɛ loo ni aaata he aloo aaaye lɛ woɔ Israelnyo lɛ kɛ ‘gbɔ [aloo mɔ ni hiɔ amɛteŋ]’ lɛ he muji. Yɛ Leviticus lɛ ‘gbɔ’ lɛ ji mɔ ni jeee Israelnyo ni ebatsɔ ehe Israelnyo diɛŋtsɛ yɛ wiemɔ lɛ shishinumɔ naa, ger tzedek. Yɛ [ 5 Mose 14:21 lɛ] ‘gbɔ ni hiɔ nyɛgboi amli’ lɛ tsɔɔ be mli ni Israelbii lɛ baahi amɛ-Shikpɔŋ nɔ ni jeee mɛi ni amɛtsake amɛhe amɛtsɔmɔ Israelbii pɛ yɔɔ amɛteŋ, shi moŋ gbɔmɛi ni yɛ be mli amɛkwa amɛ wɔŋjamɔ lɛ amɛkɔɔɔ Israelbii lɛ ajamɔ nifeemɔi lɛ amɛfɔɔɔ amɛnɔ lɛ hu yɔɔ amɛteŋ lɛ. Rabifoi lɛ tsɛɔ nɛkɛ kuu ni ji gbɔi ni yɔɔ amɛteŋ nɛɛ akɛ ger toshav: ni [5 Mose 14:21] tsɛɔ nakai kuu lɛ ni jeee Israelbii yɛ fɔmɔ naa aloo jeee tsakemɔ atsake amɛ awo amɛjamɔ mli, ni asaŋ amɛjeee ‘gbɔi’ hu Iɛ nakai. Yɛ sɔrɔtofeemɔ mli lɛ, nɛkɛ wolo nɛɛ tsɔɔ mli akɛ ‘gbɔ’ ni yɔɔ 3 Mose 17:15 lɛ ji “gbɔ ni atsake lɛ awo Yudafoi ajamɔ mli kwraa, . . . kɛ jeee nakai lɛ kulɛ atsiŋ enaa koni ekaye.”
b Wɔnaa nɔkwɛmɔ nɔ ko ni tsɔɔ nibii amli tamɔ nakai nɔŋŋ yɛ Mla lɛ fa kroko ni kɔɔ lá he: Nuu ni kɛ eŋa naa bɔlɛ yɛ be mli ni efee yeianii ni jeee gbɛ eje efee nakai lɛ, abuɔ lɛ akɛ ehe tseee, esa akɛ eto gbɛjianɔ ni akɛ etɔmɔ lɛ ake lɛ. Shi Israelnyo ni jeɔ gbɛ ekuɔ ehiɛ eshwieɔ yeianii ni eŋa lɛ efee nɔ lɛ, afoɔ lɛ kɛjɛɔ ema lɛ teŋ ashɛɔ lɛ afɔ̃ɔ.—3 Mose 15:19-24; 20:18.
December Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)