Aajaje Sanekpakpa Ni Kɔɔ Nɔ Ko Ni Hi Jogbaŋŋ He
“Ohiɛ atsɛ̃, ohiɛ otsɛ̃! Okɛ ohewalɛ lɛ aha ohe, Zion!”—YESAIA 52:1
1. (a) Je lɛ adafitswaa woji anine enyɛ shi yɛ mɛɛ gbɛ nɔ? (b) Mɛni adafitswaa Jɛɛhe ni le nii fe fɛɛ lɛ haa aleɔ?
1 TSƐMƆ ni mli ka shi faŋŋ kɛha nifeemɔ nɛɛ gbɛɛ yɛ wɔ afii ohai 20 nɛɛ shishijee mli. Ni mɛni hewɔ? Ejaakɛ be ni akɛaajaje sanekpakpa ni kɔɔ nibii ni hi jogbaŋŋ he aha adesai lɛ eshɛ. Ani wɔkaneɔ sanekpakpa nɛɛ yɛ je lɛŋ adafitswaa woji amli? Dabi, ejaakɛ adafitswaa woji lɛ sumɔɔ ni amɛha mɛi ale jeŋ saji ni koneɔ amɛtoiiaŋ aloo ni amɛaaha mɛi fɛɛ ale efɔŋfeemɔ kɛ jeŋba shara ni yaa nɔ. Shi amɛnyɛɛɛ amɛtsɔɔ he ni enɛɛmɛi anaa tsabaa yɔɔ. Ŋmɛnɛ, mɛi pii ji mɛi ni sheɔ la hiɛkpatamɔ ko gbeyei, nuklea tawuu nii ni gbɔmɔ diɛŋtsɛ efee ni kɛ nɛkɛ jeŋ hiɛkpatamɔ nɛɛ baaba. Shi mɔ ko ni le nii kwraa fe adesa ni gboɔ nɛɛ kɛɔ wɔ akɛ, je lɛ naagbee baaba kɛjɛ Jɛɛhe ko ni yɔɔ sɔrɔto kwraa. Ebaaba kɛtsɔ fɔbuu kojomɔ ni Nyɔŋmɔ kɛbaaba gbɔmɛi fɔji kɛ maji fɔji lɛ anɔ lɛ nɔ. (Lala 110:5, 6) Nɛkɛ adafitswaa Jɛɛhe nɛɛ hu gbaa wɔ afii akpe nibii asaamɔ ni baanyiɛ sɛɛ lɛ he sane, beni akɛ wɔ shikpɔŋ lɛ kɛ adesai ni yɔɔ nɔ lɛ baaba emuuyeli shihilɛ ni yɔɔ nyam mli. Enɛ ji sanekpakpa lɛlɛŋ! —Kpojiemɔ 20:6; Lala 72:16, 18, 19; Romabii 8:21.
2. Mɛɛ bolɔmɔ loo tsɛmɔ ni he hiaa yaa nɔ bianɛ, ni te esa akɛ aha hetoo aha tɛŋŋ?
2 Yesaia bolɔ akɛ, ‘Ohiɛ atsɛ̃, ohiɛ atsɛ!’ Mɛni hewɔ ehe hiaa nɛkɛ? Ojogbaŋŋ, Biblia mlibaai ni yɔɔ naakpɛɛ, kɛjɛ afi 1914 nɔ kɛbaa nɛɛ tsɔɔ akɛ, Nyɔŋmɔ Maŋtsɛyeli kɛtsɔ Kristo Yesu nɔ, ni ji “Nyɔŋmɔ hiɛkalɔ lɛ maŋ ni ji ŋwɛi Yerusalem lɛ,” miiye nɔ agbɛnɛ yɛ ŋwɛi. Esa akɛ Nyɔŋmɔ ŋwɛi gbɛjianɔtoo lɛ atsĩɛ Zion najiaŋdamɔlɔi ni yɔɔ shikpɔŋ nɔ lɛ kɛha nitsumɔ kɛ ekãa. Esa akɛ amɛshiɛ sanekpakpa nɛɛ yɛ hewalɛ ni Nyɔŋmɔ kɛhaa mɛi ni boɔ lɛ toi akɛ nɔyelɔ lɛ mli.—Hebribii 12:22; Bɔfoi 5:32.
3. Namɔ Yesaia wieɔ etsɔɔ lɛ, kɛ mɛɛ ninefɔɔ?
3 Yesaia tee nɔ akɛ: “Wo enunyam atadei lɛ, Yerusalem, maŋ krɔŋkrɔŋ! Ejaakɛ kɛjɛ ŋmɛnɛ nɔ kɛyaa nɛɛ, foolɔ loo mɔ ni he tseee ko boteŋ omli dɔŋŋ. Hosomɔ ohe mlu lɛ oshwie, tee shi ota shi, Yerusalem! Fɛnemɔ okuɛ kpaai lɛ, bo Zion biyoo ni aŋɔ bo nom.”—Yesaia 52:1, 2.
4. Gbalɛ lɛ eba mli yɛ afii ohai 20 nɛɛ mli yɛ mɛɛ gbɛ nɔ?
4 Nɛkɛ gbalɛ nɛɛ ena emlibaa ni yɔɔ miishɛɛ yɛ afii ohai 20 nɛɛ mli! Kristofoi ni afɔ amɛ mu lɛ batsɔmɔ nyɔji yɛ mumɔŋ yɛ 1914-18 Ta Kpele lɛ mli, ni awo amɛteŋ mɛi komɛi ni Watch Tower Asafo lɛ onukpai lɛ ateŋ mɛi komɛi fata he lɛ tsuŋ. Shi kpɔmɔ ba yɛ afi 1919. Akɛni amɛdamɔ ŋwɛi Zion najiaŋ hewɔ lɛ, kɛkɛ ni nɛkɛ Kristofoi nɛɛ wo amɛ “atadei” ni yɔɔ nyam loo fɛo yɛ Nyɔŋmɔ hiɛ lɛ nɔ ni haa ayɔseɔ amɛ akɛ Jeŋ Muu Fɛɛ Nuŋtsɔ lɛ tsuji lɛ. Amɛtsi amɛhe kɛjɛ jeŋba kɛ mumɔŋ muji nii fɛɛ he.—Okɛto 2 Korintobii 6:17, yɛ he ni bɔfo Paulo tsɛ wiemɔ kɛjɛ Yesaia 52:11 lɛ he.
5. Nyɔŋmɔ webii ebo Yesaia tsɛmɔ kɛ Yesu nɔkwɛmɔ nɔ lɛ toi yɛ mɛɛ gbɛ nɔ?
5 No hewɔ lɛ Nyɔŋmɔ diɛŋtsɛ webii lɛ ye amɛhe kwraa kɛjɛ apasa jamɔ tsɔɔmɔi kɛ nifeemɔi ahe. Akɛni amɛkase nɔkwɛmɔ nɔ ni Yesu fee beni eyɔɔ shikpɔŋ nɔ lɛ hewɔ lɛ, amɛ hu amɛjaje akɛ amɛ “jɛɛɛ je” kɛ emaŋkwramɔŋ kpɔtɔmɔ kɛ awuyeli ni faa babaoo “nɛɛ mli? (Yohane 18:36; Kpojiemɔ 18:2, 4) Shi esa akɛ amɛnyiɛ amɛ Nuŋtsɔ lɛ nanemaahei asɛɛ diɛŋtsɛ agbɛnɛ yɛ be mli ni amɛteɔ shi kɛjɛɔ amɛnɔnaamɔ shihilɛ nɛɛ mli kɛyaa shihilɛ ni nɔkpɛlɛmɔ yɔɔ mli yɛ Nyɔŋmɔ hiɛ nɛɛ mli, taakɛ wɔbaana agbɛnɛ lɛ.—1 Petro 2:21.
“O-Nyɔŋmɔ Lɛ Yeɔ Matsɛ Lɛ!”
6. Namɔ “naji” kɛ sanekpakpa baa agbɛnɛ lɛ, ni mɛɛ yiŋtoo hewɔ ebaa agbɛnɛ lɛ?
6 Bo gbalɔ lɛ wiemɔi krokomɛi lɛ atoi jogbaŋŋ: “Kwɛ bɔ ni sanekpakpajajelɔ ni shiɛɔ hejɔlɛ lɛ, sanekpakpajajelɔ ni shiɛɔ yiwalaheremɔ lɛ naji yɔɔ fɛo yɛ gɔji lɛ anɔ, mɔ ni kɛɛɔ Zion akɛ: O-Nyɔŋmɔ lɛ yeɔ maŋtsɛ lɛ!” (Yesaia 52:7) Nɛkɛ hejɔlɛ loo toiŋjɔlɛ he Bɔfo loo Tsulɔ nɛɛ jeee mɔ ko mɔ ko akɛ Maŋtsɛ Yesu Kristo. Akɛ Nyɔŋmɔ mumɔ krɔŋkrɔŋ lɛ fɔ lɛ mu beni eyɔɔ shikpɔŋ nɔ lɛ koni ejaje sanekpakpa lɛ etsɔɔ ohiafoi kɛ mɛi ni amɛtsuii ekumɔ lɛ. Shi akɛni “jeŋmaji abe” lɛ shɛ yɛ 1914 hewɔ lɛ ‘ebaa yɛ enunyam lɛ mli ni bɔfoi krɔŋkrɔŋ lɛ fɛɛ fata ehe,’ koni ebaŋɔ emaŋtsɛyeli lɛ ni ekojo jeŋmaji lɛ kɛ shikpɔŋ lɛ nɔ bii.—Luka 4:18; 21:24; Mateo 25:31, 32.
7. Mɛɛ saji bɔfo loo tsulɔ lɛ kɛbaa?
7 Ŋɔɔ lɛ akɛ oona Bɔfo loo Tsulɔ nɛɛ he ninaa, ni eetu kɛmiijɛ gɔŋ kome nɔ kɛmiiya gɔŋ kroko nɔ, ni ehe miitswa shi akɛ eeejaje nɔ ko ni hi jogbaŋŋ he sanekpakpa etsɔɔ mɛi ni taoɔ Nyɔŋmɔ sɛɛgbɛ lɛ. Kwɛ bɔ ni “enaji” yɔɔ fɛo ha! Amɛkɛ lɛ yaa etoiŋjɔlɛ nitsumɔ lɛ nɔ yɛ oyaiyeli mli. Ekɛ ekaa jajeɔ yiwalaheremɔ etsɔɔ be ko “Zion biyoo” ni aŋɔ lɛ nom lɛ, mumɔŋ Israel 144,000 lɛ mli shwɛɛnii ni akpɔ amɛ lɛ, ni yɛ mɛi nɛɛ asɛɛ lɛ kɛhaa ‘asafo babaoo ko ni jɛ jeŋmaji fɛɛ mli’ ni akaneko amɛ lɛ.—Kpojiemɔ 7:4, 9, 10.
8. Mɛɛ sane ko ni kanyaa mɔ ajajeɔ agbɛnɛ, ni mɛni hewɔ?
8 Toiŋjɔlɛ kɛ sanekpakpa shiɛmɔ lɛ gbalaa jwɛŋmɔ kɛyaa sane jajemɔ ni kanyaa mɔ: O-Nyɔŋmɔ lɛ yeɔ maŋtsɛ!” lɛ nɔ. Namɔ ji nɛkɛ Nyɔŋmɔ nɛɛ, ni mɛɛ gbɛ etsɔɔ nɔ ebatsɔɔ Maŋtsɛ? Lɛ ji Nyɔŋmɔ ni asumɔɔɔ egbɛi ni afɔɔɔ tã-tsii yɛ Kristendom jamɔi ateŋ, Nuŋtsɔ Maŋtsɛ YEHOWA. Lɛ ji Mɔ ni jaje yɛ Yesaia 52 lɛ shishijee kukuji lɛ mli akɛ: “Ni daa jetsɛremɔ lɛ awieɔ musubɔɔ wiemɔi ashiɔ migbɛi lɛ. Hewɔ lɛ mimaŋ lɛ aaale migbɛi lɛ.” Esa ni abu egbɛi ni eko kɛ lɛ yeee egbɔ lɛ bem agbɛnɛ ejaakɛ ŋmlɛtswaa ni ekɛaakojo jeŋmaji lɛ eshɛ agbɛnɛ. Esa akɛ mɛnɛɛmɛi hu ashe lɛ gbeyei akɛ “jeŋmaji a-Maŋtsɛ.”—Yeremia 10:7; Kpojiemɔ 14:7.
9. (a) Kɛ akɛ “wɔ-Nuŋtsɔ” lɛ kɛ “e-Kristo” lɛ gbɛhei to he lɛ te anaa tɛŋŋ? (b) Mɛi fɛɛ ni jieɔ Nyɔŋmɔ yi lɛ baanyɛ ada shi yɛ mɛni he?
9 Nɛkɛ Maŋtsɛ kpeteŋkpele nɛɛ ji Nuŋtsɔ lɛ ni gbeei ni yɔɔ ŋwɛi lɛ wie ehe kɛkɔ saji ni ba kɛjɛ 1914 kɛ no sɛɛ lɛ he lɛ, akɛ: “Je nɛŋ maŋtsɛyeli lɛ etsɔ wɔ-Nuŋtsɔ lɛ kɛ e-Kristo lɛ nɔ̃, ni eeeye maŋtsɛ kɛaatee naanɔi anaanɔ.” Nyɔŋmɔ jalɔi krokomɛi kɛ yijiemɔ wiemɔi ni jɛ tsuiŋ tɔ̃ɔ fataa he akɛ: “Wɔmiidao shi, bo Nuŋtsɔ Nyɔŋmɔ Ofe lɛ, bo mɔ ni oyɔɔ ni oyɛ ni obaaba lɛ, akɛ oŋɔ ohewalɛ kpeteŋkpele lɛ koni oye maŋtsɛ, ni jeŋmaji lɛ amli efu, ni omlifu eshɛ.” Yɛ be ni ato Maŋtsɛyeli lɛ ama shi nɛɛ mli lɛ, Kristo Yesu yeɔ nɔ akɛ Maŋtsɛ-Hefatalɔ kɛ e-Tsɛ, Nuŋtsɔ Yehowa, nii lɛ ejalɛ kojomɔi ahe nii etsuɔ lɛ.—Kpojiemɔ 11:15, 17, 18; 12:10; Yohane 5:30.
10. Mɛni Paulo tsɔɔ beni etsɛ wiemɔ kɛjɛ Yoel 3:5 kɛ Yesaia 52:7 lɛ?
10 Jeee Bɔfo loo Tsulɔ kɛ Maŋtsɛ nɛɛ pɛ kɛ ehe ewo toiŋjɔlɛ shiɛmɔ lɛ mli. Bɔfo Paulo tsɔɔ nɔ hewɔ, ni etsɛ wiemɔ kɛjɛ Yoel 3:5 akɛ: “Ni aaaba mli akɛ mɔ fɛɛ mɔ ni aaatsɛ Yehowa gbɛi anɔ lɛ, aaahere eyiwala.” Kɛkɛ ni Paulo bi saji sɔrɔtoi komɛi, ni ekɛba naagbee kɛ Yesaia 52:7 he wiemɔ akɛ: “Shi te aaafee tɛŋŋ ni amɛaabo amɛtsɛ mɔ ni amɛheko lɛ amɛyeko lɛ? Ni te aaafee tɛŋŋ ni amɛaahe mɔ ni amɛnuko ehe sane lɛ amɛyeŋ? Ni asaŋ te aaafee tɛŋŋ amɛaanu kɛ shiɛlɔ ko bɛ lɛ? Ni te aaafee tɛŋŋ ni amɛaashiɛ, kɛ atsuko amɛ lɛ? Taakɛ bɔ ni aŋma akɛ: ‘Kwɛ bɔ ni hejɔlɛ he sanekpakpashiɛlɔi ni shiɛɔ nii kpakpai lɛ anaji yɔɔ fɛo ha!’”—Romabii 10:13-15.
11. Yɛ mɛɛ gbɛ nɔ mɛi pii etsɔɔ ŋmɛnɛ akɛ ‘amɛnaji yɛ fɛo’?
11 No hewɔ lɛ mɛi krokomɛi hu ‘anaji yɛ fɛo.’ Nɛkɛ gbɔmɛi nɛɛ ebo sanekpakpa ni Nyɔŋmɔ Tsulɔ loo Bɔfo lɛ jajeɔ lɛ toi. Ni amɛ hu amɛbatsɔmɔ sanekpakpa Iɛ shiɛlɔi—Maŋtsɛyeli shiɛlɔi ata babaoo. Ŋmɛnɛ amɛ yibɔ shɛɔ akpekpei enyɔ kɛ fã, ni amɛji hii, yei kɛ gbekɛbii ni jɛ shikpɔŋ nɔ jeŋmaji fɛɛ mli! Kwɛ hegbɛ ni ona, kɛ oji mɛnɛɛmɛi ateŋ mɔ kome, ni shiɛɔ ‘nɔ ko ni hi jogbaŋŋ he sanekpakpa’! Ni onaji diɛŋtsɛ nɛɛ hu ji nibii ni jara wa kɛji akɛ onyiɛɔ nɔ daa kɛjɛɔ shia kome mli kɛyaa shia kroko mli yɛ be mli ni ojajeɔ yiwalaheremɔ otsɔɔ lɛ! Yɛ nɛkɛ gbɛ nɔ lɛ belɛ oona Lala 19:5 mlibaa ni Paulo wie he yɛ Romabii 10:18 akɛ: “Amɛgbee ejije kɛtee shikpɔŋ muu, lɛ fɛɛ nɔ, ni amɛwiemɔi lɛ eshɛ jeŋ naagbeehei lɛ” mli gbɛfaŋnɔ.—Kwɛmɔ Lala 99:1-3; 148:12, 13 hu.
Nyɔŋmɔ Gbɛjiantoo Lɛ Miitsu Nii
12. (a) Enɛ ji be ni he hiaa fe fɛɛ kɛha mɛni? (b) Mɛɛ anɔkwalei ni ekaaa ajie lɛ kpo yɛ 1925?
12 Hɛɛ, “o-Nyɔŋmɔ lɛ yeɔ maŋtsɛ lɛ!” No hewɔ lɛ, amrɔ nɛɛ ji bei amli be ni esa akɛ awó Nyɔŋmɔ hiɛkalɔ lɛ, Yehowa, gbɛi anɔ ni aha ale yɛ he fɛɛ he akɛ lɛ ji Jeŋ Muu Fɛɛ Nuŋtsɔ. Yɛ 1920 afii lɛ amli lɛ, Nyɔŋmɔ tsuji ni efɔ amɛ mu lɛ ateŋ shwɛɛnii lɛ kɛ shidaa babaoo ha akɛ la ni kɔɔ Nyɔŋmɔ Maŋtsɛyeli lɛ he lɛ “kpɛ́ kɛha jalɔ” shii abɔ. Ni ashɛ tsakemɔ be ko he kɛ Blɔfo Buu-Mɔɔ ni ji March 1, 1925 nɔ̃ ni akala lɛ. Emli wiemɔ titri ni ji “Maŋ lɛ Fɔmɔ” ha gbalɛi ni tsɔɔ akɛ ato Nyɔŋmɔ Maŋtsɛyeli ni awo shi yɛ he lɛ ama shi yɛ ŋwɛi yɛ 1914, ni akɛ Mesia Maŋtsɛ lɛ eshɛrɛ Abonsam kɛ ebɔfoi lɛ eshwie shikpɔŋ nɔ, ni akɛ esa akɛ Nyɔŋmɔ gbɛjianɔtoo lɛ kɛ Satan gbɛjianɔtoo lɛ awuu ta kɛgbe naa lɛ mli bafee faŋŋ.—Lala 97:11; Kpojiemɔ 12:1-12.
13. (a) Mɛɛ nɔyaa Nyɔŋmɔ webii ná aahu kɛbashi 1938? (b) Mɛni ba yɛ ebe naa pɛpɛɛpɛ yɛ 1938?
13 Yɛ be mli ni nɛkɛ mumɔŋ ta nɛɛ yaa hiɛ lɛ, mɛi ni sɔmɔɔ yɛ Yehowa gbɛjianɔtoo lɛ mli lɛ na miishɛjemɔ kɛtsɔ Biblia mli shishinumɔ ni tee nɔ ekpɛ kɛha amɛ lɛ nɔ, ni amɛ yibɔ lɛ tee nɔ efa aahu kɛyashi yɛ 1938 mli lɛ, mɛi ni shɛɔ 50,769 bu Maŋtsɛyeli sɔɔmɔ he akɔntaa yɛ majimaji ateŋ odaseyeli be kpalaŋŋ ko mli. Bɔ ni yifalɛ lɛ tee nɔ oyayaayai lɛ bi gbɛjianɔtoo kpakpa, ni Yehowa kɛ no ha yɛ ebe mli pɛpɛɛpɛ! June 1 kɛ 15, 1938 Buu-Mɔɔ lɛ ni ji Blɔfo nɔ̃ lɛ mli nikasemɔ lɛ hiɛ yitso ni ji: ‘Gbɛjianɔtoo.’ Nɔ ni nyiɛ enɛ sɛɛ ‘yɛ July kɛ August mli hu ji ‘E-Ta Lɛ’ ni aŋmala lɛ shii ejwɛ kɛtsara nɔ. Akɛ teokrase gbɛjianɔtoo diɛŋtsɛ ba Yehowa Odasefoi ateŋ, ni enɛ wo amɛ hewalɛ kɛha mumɔŋ ta babaoo ni amɛbaawuu. Taakɛ Yesaia gbalɛ lɛ etsɔɔ yɛ yitso 60 kukuji 17 kɛ 22 lɛ, shihilɛ yɛ Nyɔŋmɔ webii ateŋ ni etee hiɛ lɛ baakanya Yehowa Maŋtsɛyeli nitsumɔ lɛ ni eya nɔ kɛ foi.
14. (a) Mɛni ni yɔɔ ŋmɛnɛŋmɛnɛ beaŋ tamɔ Salomo tsutswaa he gbɛjianɔtoo lɛ? (b) Ni yɛ enɛ hewɔ lɛ, mɛɛ sane abiɔ?
14 Nɛkɛ Buu-Mɔɔ nɛɛ mli nikasemɔi ni kɔɔ ‘Gbɛjianɔtoo’ he lɛ kɛ bɔ ni Salomo nɔyeli yɛ afii ohai 11, D.Ŋ.B. lɛ mli lɛ kɛ Yesu ni ta maŋtsɛsɛi nɔ lɛ nɔ̃ ni je shishi yɛ 1914 Ŋ.B. lɛ ni je amɛhe lɛ to he. Salomo je etsutswaa gbɛjianɔtoo lɛ shishi yɛ enɔyeli afi ni ji ejwɛ lɛ mli. Sɔlemɔtsu lɛ maa he afii 7, kɛ afii 13 kroko ni akɛgbe maŋtsɛ lɛ shia lɛ naa. Nakai nɔŋŋ hu etamɔ nɔ ni Nuŋtsɔ Yesu Kristo tsu tsutswaa ni tsumɔ ko ni kɔɔ anɔkwale jamɔ ni aaato ama shi ekoŋŋ kɛ agbɛnɛ “Nyɔŋmɔ” mumɔŋ “we” ko tswaa he kɛjɛ 1918 kɛbashi 1938. (1 Petro 4:17) Naagbee Buu-Mɔɔ lɛ ni wieɔ ‘Gbɛjianɔtoo’ he lɛ kɛ wiemɔi nɛɛ gbe naa:
“Ŋmalɛi lɛ tsɔɔ akɛ, yɛ be mli ni Salomo egbe etsutswaa he gbɛjianɔtoo ni he afii nyɔŋmai enyɔ taakɛ atsɔɔ mli yɛ yiteŋgbɛ lɛ naa lɛ, eje maŋ lɛ fɛɛ mli tsutswaa nitsumɔ ko shishi. (1 Maŋts. 9:10, 17-23; 2 Kron. 8:1-10) Kɛkɛ ni Sheba maŋnyɛ lɛ ‘jɛ shikpɔŋ lɛ naagbeehe tɔ̃ɔ koni ebabo Salomo nilee toi.’ (Mat. 12:42; 1 Maŋts. 10:1-10; 2 Kron. 9:1-9, 12) Enɛ kɛ sanebimɔ nɛɛ baa: Mɛni yɔɔ wɔsɛɛ be ni ka wɔhiɛ nɔŋŋ nɛɛ kɛha Yehowa webii ni yɔɔ shikpɔŋ nɔ lɛ? Wɔkɛ hekɛnɔfɔɔ ni yeɔ emuu baamɛ, ni wɔbaana.”
Ojogbaŋŋ, mɛni wɔnaa bianɛ, yɛ afii 46 sɛɛ nɛɛ?
Mlilɛɛmɔ Ko Ni Yɔɔ Naakpɛɛ!
15. (a) Mɛɛ ŋmɛnɛŋmɛnɛ beaŋ “Sheba maŋnyɛ” epue? (b) Mɛɛ gbɛjianɔtoo ãtsɔ nɔ akɛsɔmɔ nɛkɛ kuu nɛɛ, ni yɛ mɛɛ gbɛ nɔ?
15 Ŋmɛnɛŋmɛnɛ beaŋ “Sheba maŋnyɛ” kuu lɛ ni ji Nuŋtsɔ lɛ “tooi krokomɛi” lɛ “jɛ shikpɔŋ lɛ naagbeehei” kɛmiiba babaoo koni amɛbabo Maŋtsɛ, Yesu Kristo ni akɛ lɛ eta sɛi nɔ lɛ nilee lɛ toi. Lɛlɛŋ akɛ, “eji mɔ ni fe Salomo.” Etsɔɔ “tsulɔ anɔkwafo kɛ nilelɔ”—nakai Kristofoi ni afɔ amɛ mu lɛ akuu ni Nuŋtsɔ lɛ eto amɛ gbɛjianɔ ni ekɛ nitsumɔ ewo amɛdɛŋ yɛ shikpɔŋ nɛɛ nɔ lɛ—anɔ ekɛ mumɔŋ niyenii ni ŋɔɔ babaoo miiha. (Mateo 12:42; 24:45-47) Ni yɛ be mli ni Jeŋ Ta II yaa nɔ ni emli ewa po lɛ, nɛkɛ “tsulɔ” nɛɛ tee nɔ ejaje sanekpakpa lɛ babaoo kɛtee he fɛɛ he moŋ. Afi 1943 mli lɛ, agbele Buu-Mɔɔ Biblia Skul ni ji Gilead ni yɔɔ South Lansing New York, U.S.A lɛ naa. Atsɔseɔ sɔɔlɔi ni amɛdara yɛ mumɔŋ ni amɛyafee maŋsɛɛ sanekpakpashiɛlɔi, ni yɛ daa nyɔji ekpaa mli lɛ, atsuɔ mɛi ni amɛkase nii amɛgbe naa aaafee oha kɛyaa shikpɔŋ lɛ naagbeehei .
16. (a) Mɛni akɔntaabuu tao ni fata he lɛ tsɔɔ yɛ mlilɛɛmɔ kɛjɛ 1943 mli kɛbaa nɛɛ? (b) Mɛni nibii etee nɔ yɛ afii nyɔŋma ni eho nɛɛ mli?
16 Ani Yehowa eha edasefoi lɛ anitsumɔ ni amɛto he gbɛjianɔ lɛ eshwere? Akɔntaabuu ni yɔɔ baafa 11, ni tsɔɔ Maŋtsɛyeli shiɛlɔi ayibɔ ni aja mli ni buɔ amɛsɔɔmɔ kɛha Yehowa lɛ he akɔntaa yɛ daa afii nyɔŋma mli kɛjɛ 1943 lɛ kɛ hetoo lɛ haa wɔ. Bɔ ni nibii etee nɔ eshwere eha, titri lɛ yɛ nyɛsɛɛ afii nyɔŋma ni eho nɛɛ amli lɛ haa wɔnaa miishɛɛ krɛdɛɛ ko bianɛ. Nɛkɛ afii nɛɛ ji be ni akɛkaa ni akɛshaa mɛi amli, ejaakɛ hemɔkɛyelikwalɔi ni nibii esaaa amɛhiɛ lɛ ateŋ mɛi komɛi shi asafo lɛ. Ni efee afii ni nyamɔ yɔɔ mli hu yɛ jeŋ fɛɛ tsumaa kɛ gbɛjianɔtoo he nii ni atsu, kɛ nyɛmimɛi lɛ ahewalɛwoo kɛha nitsumɔ ni ka wɔhiɛ lɛ. Ejaakɛ ŋwanejee ko bɛ he akɛ “gwantɛŋi” nɛɛ anaabuamɔ babaoo lolo yɛ ni esa akɛ afee dani “maji lɛ atsɔmɔ amaŋfo.”—Yesaia 6:11; okɛto Luka 22:31, 32; Mateo 25:31-32 he.
17. Mɛni hewɔ Yehowa Odasefoi ni yɔɔ jeŋ fɛɛ lɛ baanyɛ ana miishɛɛ agbɛnɛ lɛ?
17 Yɛ afi 1983 mli lɛ, Maŋtsɛyeli nitsumɔ lɛ tee nɔ fɛfɛo yɛ naakpɛɛ gbɛ nɔ. Maji sɔrɔtoi je shishi amɛbɔ shiɛlɔi ayifalɛ ni fe fɛɛ he amaniɛ yɛ shikpɔŋ lɛ fɛɛ nɔ. Akrabatsa ni afo ni yɔɔ yiteŋgbɛ nɛɛ tsɔɔ miishɛɛ ko ni nyɛmimɛi naa yɛ be mli ni Yehowa baa ewebii ayi faa lɛ. Yifalɛ lɛ tee hiɛ babaoo yɛ agbiɛnaa kɛ latsaa bei lɛ amli, no hewɔ lɛ amrɔ nɛɛ shiɛlɔi ni yɔɔ jeŋ fɛɛ lɛ eyashɛ yifalɛ ni fe fɛɛ ni ji shiɛlɔi 2,652,323—yifalɛ ko ni fe 1982 yifalɛ lɛ kɛ 174,715—yɛ shikpɔji sɔrɔtoi 205 nɔ. Wɔmiijie Yah yi yɛ nɛkɛ jɔɔmɔ nɛɛ hewɔ!—Maleaki 3:10; 5 Mose 28:12, 13.
18. Esa akɛ akɔntaabuu ni kɔɔ baptisimɔi ahe lɛ akanya wɔ ni wɔfee mɛni?
18 Kwɛ bɔ ni wɔmii hu eshɛ wɔhe, ákɛ wɔɔna ni mɛi babaoo kɛ nu mli baptisimɔ miifee amɛhenɔjɔɔmɔ kɛha Yehowa lɛ he okadi! Yɛ “Maŋtsɛyeli Ekomefeemɔ” Kpokpaa Wuji anɔ kpeei ni afee yɛ 1983 lɛ ashishi lɛ, akɛ mɛi heei babaoo ba Kristofoia ekomefeemɔ yɛ Nyɔŋmɔ gbɛjianɔtoo lɛ mli lɛ he. Yibɔ ni abaptisi amɛ lɛ fɛɛ yafee 161,896 yɛ 1983, ni eji oha mlijaa 17 nɔyaa fe nyɛsɛɛ afi lɛ nɔ̃. Eba akɛ Yehowa aaaha wɔ ‘wuoyaa kɛ gbɔbimɔ’ nitsumɔ lɛ afa ekoŋŋ yɛ 1984 mli! (Yeremia 16:16) Ni yɛ be mli ni wɔnaa mɛi ni sa lɛ, nyɛhaa wɔtsɔa Nyɔŋmɔ Wiemɔ lɛ ni wɔkɛaatsu nii yɛ ŋaa mli loo yɛ hesaa mli lɛ nɔ wɔlɛ amɛ, kɛ woji kpakpai heei enyɔ ni ji Obaanyɛ Ohi Shi Kɛya, Naanɔ yɛ Paradeiso yɛ Shikpɔŋ Nɔ kɛ United in Worship of the Only True God lɛ.—Mateo 10:7, 11.
19. Mɛni 1938 Kaimɔ lɛ he akɔntaabuu tsɔɔ?
19 Nɔ ni yɔɔ miishɛɛ fe fɛɛ ji Kaimɔ lɛ, ni afee yɛ March 29, 1983 gbɛkɛnaashi ni asafoi ni yɔɔ jeŋ fɛɛ ni naa shɛɔ 46,235 kɛ amɛhe wo mli lɛ. Amɛteŋ mɛi 9,292 pɛ tsɔɔ akɛ amɛyɛ ŋwɛi hiɛnɔkamɔ kɛtsɔ kaimɔ lɛ nibii ni amɛye eko lɛ nɔ, ni enɛ tsɔɔ akɛ “tooi krokomɛi” lɛ ji mɛi ni fa titri yɛ yibɔ ni ji 6,767,707 ni ba shishi lɛ ateŋ—yifalɛ ni ji 514,920 fe 1982 yibɔ lɛ. Mɛɛ gbɔmɛi heshibalɔi ni fa po tsɔɔ miishɛɛ yɛ Yehowa Maŋtsɛyeli lɛ yiŋtooi amli nɛkɛ!
20. Mɛni esa akɛ wɔtsu agbɛnɛ yɛ mɛi heei ni kɛ amɛhe babɔɔ wɔhe lɛ kɛ agbɛnɛ mɛi ni amɛhe ejɔ kwraa yɛ sɔɔmɔ lɛ mli lɛ ahe, ni mɛni hewɔ?
20 Maŋtsɛ David jaje yɛ Nyɔŋmɔ mumɔ lɛ tsirɛmɔ shishi akɛ: “Shi mɛi ni he jɔ lɛ shikpɔŋ lɛ aaatsɔ amɛnɔ, ni amɛmii aaashɛ amɛhe yɛ hejɔlɛ babaoo mli.” (Lala 37:11; kwɛmɔ Mateo 5:5 hu.) Ha Yehowa Odasefoi ni yɔɔ he fɛɛ he lɛ kɛ mɔdɛŋbɔɔ atswa heshibalɔi ni baa koni amɛkɛ amɛ ababɔ lɛ, tamɔ mɛi ni baa Kaimɔ lɛ shishi lɛ nɛkɛ amɛma shi, ni agbɛnɛ amɛkɛ suɔmɔ aye abua mɛi ni kɛ amɛ bɔɔ tsutsu ni ekolɛ amɛkɛ amɛhe wooo nitsumɔ lɛ mli dɔŋŋ lɛ. Amɛwala jara wa yɛ Yehowa hiɛ. (Mateo 18:14) Kɛ amɛyi aaana wala kɛtsɔ “amanehulu kpeteŋkpele” lɛ mli lɛ, belɛ esa akɛ mɛnɛɛmɛi ‘afɔ amɛ atadei lɛ ahe ni amɛha eyɛ futaa yɛ Toobi lɛ lá lɛ mli’ bianɛ, ni amɛha eya nɔ eyɛ futaa. Eba akɛ “asafo babaoo” lɛ aaaya nɔ ni amɛyi afa babaoo ni heshibalɔi babaoo ahɛle shi ni amɛjie amɛhe kpo akɛ Yehowa tsuji ni amɛjɔɔ amɛhe nɔ amɛha lɛ ni amɛkɛ ewebii lɛ afee ekome yɛ ‘sane ko ni hi jogbaŋŋ ni ajajeɔ atsɔɔ’ lɛ mli yɛ miishɛɛ mli.—Kpojiemɔ 7:9, 14.a
[Shishigbɛ niŋmai]
a Ajie kɛjɛ January 1, 1984 Blɔfo Buu-Mɔɔ lɛ mli.
Te obaaha hetoo oha tɛŋŋ?
□ Yesaia 52:1, 2 ena mɛɛ ŋmɛnɛŋmɛnɛ beaŋ mlibaa ni yɔɔ naakpɛɛ?
□ Yɛ mɛɛ gbɛ nɔ Yesaia 52:5-7 mlibaa kɔɔ Maŋtsɛyeli shiɛlɔi ahe?
□ Mɛɛ gbɛ Yehowa tsɔ nɔ esaa ewebii kɛha wɔsɛɛ be mligbelemɔ?
□ Mɛɛ odaseyeli yɔɔ ni tsɔɔ Yehowa jɔɔmɔ yɛ afii nyɔŋmanyɔŋmai abɔ Iɛ amli, ni titri lɛ yɛ afi 1983 mli?
[Akrabatsa ni yɔɔ baafa 12]
Nɔ ni nyiɛ sɛɛ nɛɛ ji afi 1983 mɔdɛŋbɔi ahe amaniɛbɔɔ ni Buu-Mɔɔ Nitsumɔhe He anine shɛ nɔ:
▪ Canada: Afi lɛ efee yifalɛ afi, shiɛlɔi 77,003 tsu nii ni eji oha mlijaa 13 nɔyaa fe nyɛsɛɛ afi lɛ mlijaa.
▪ Chile: Wɔna shiɛlɔi ayibɔ ni fe fɛɛ ni ji 21,344, oha mlijaa 25 nɔyaa; 70,522 ba Kaimɔ lɛ.
▪ El Salvador: Shiɛlɔi ayifalɛ etee hiɛ yɛ be fɛɛ mli kɛjɛ January kɛbashi August mli ni 12,008 bu amɛsɔɔmɔ he akɔntaa. Eji oha mlijaa 25 nɔyaa, ni 44,967 ba Kaimɔ lɛ shishi.
▪ lreland: Wɔkwɔ kɛyashɛ shiɛlɔi ayifalɛ hee ni fe fɛɛ ni ji 2,215 yɛ August mli; 127 ni abaptisi amɛ lɛ ji oha mlijaa 17 nɔyaa.
▪ Israel: Wɔshiɛlɔi ayifalɛ hee ni fe fɛɛ ji 297 yɛ April mli, ni eji oha mlijaa 14 nɔyaa.
▪ Philippines: Yɛ Kpokpaa Wulu nɔ kpee ni wɔfee yɛ 1982 mli lɛ sɛɛ lɛ, shiɛlɔi ayifalɛ tu kɛjɛ 60,000 kɛtee nɔ ni fe 70,000.
▪ Sri Lanka: Wɔbɔ shiɛlɔi ayifalɛ heei sɔrɔtoi enumɔ he amaniɛ kɛtsara nɔ, kɛ shiɛlɔi ayifalɛ ni fe fɛɛ ni ji 764 yɛ May mli—oha mlijaa 14 nɔyaa.
▪ Afrika maŋ ko ni agu sɔɔmɔ nitsumɔ lɛ: Mɛi ni ba Kaimɔ ni shɛɔ 25,430 lɛ ji shiɛlɔi ni yɔɔ nakai maŋ lɛ mli lɛ nɔ toi enyɔ kɛ fa.
[Akrabatsa ni yɔɔ baafa 11]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
MAŊTSƐYELI NƆYAA yɛ Daa Afii Nyɔŋma Mli
Shiɛlɔi Ayibɔ ni Aja Mli Ni Buɔ Sɔɔmɔ he Akɔntaa
1943 109,794
1953 468,106 Nɔyaa: 358,312
1963 956,648 Nɔyaa: 488,542
1973 1,656,673 Nɔyaa: 700,025
1983 2,501,722 Nɔyaa: 845,049