“Kulɛ Esa Akɛ Nyɛtamɔ Tsɔɔlɔi”
‘Ehe miihia ni Nuŋtsɔ Iɛ tsulɔ Iɛ ale nitsɔɔmɔ.’—2 Timoteo 2:24.
1, 2 Esa akɛ Kristofoi akase Yesu yɛ mɛɛ gbɛ sɔrɔto ko nɔ?
1 AFI 31 Ŋ.B. agbiɛnaa be ko mli ni Yesu wie etsɔɔ gbɔmɛi sɔrɔtoi babaoo ko ni bua amɛhe naa akɛ amɛbaabo enitsɔɔmɔ toi lɛ. Ewie ni tsɔnei ni ewieɔ ewoɔ mli ni gbɛɛɔ ni yɔɔ ŋmɛnɛ lɛ eko bɛ jɛmɛ, ni ekɛ gɔŋ ni eshiɛɔ yɛ he lɛ afa gbɛ ko tsii nii ni eha egbee jije ni anu bɔ ni sa. Ni nɔ ni ewie lɛ hu yɛ naakpɛɛ. Beni egbe naa lɛ, etoibolɔi lɛ kpɛlɛ nɔ akɛ amɛnuko nɔ ko ni tamɔ nɛkɛ da. Nɔ ni aŋma afɔ shi lɛ kɛɔ wɔ akɛ: “Mɛi lɛ ahe jɔ̃ amɛhe yɛ enitsɔɔmɔ lɛ hewɔ.” (Mateo 7:28) Yesu tsɔ enɛ kɛ bei krokomɛi amli hu nɔ etsɔɔ akɛ eji tsɔɔlɔ ni he esa diɛŋtsɛ.
2 Agbɛnɛ hu, ekɛɛ esɛɛnyiɛlɔi lɛ akɛ amɛ hu amɛbaafee tsɔɔlɔi. Ekɛɛ: “No hewɔ lɛ nyɛyaa ni nyɛyafea jeŋmaji lɛ fɛɛ amli mɛi lɛ kaselɔi . . . Nyɛtsɔɔa amɛ ni amɛye nii fɛɛ ni mifai nyɛ lɛ anɔ.” (Mateo 28:19, 20, NW) Bɔfo Paulo hu ma nɔ mi akɛ gbɛnaa nii ka Kristofoi anɔ akɛ amɛtsɔɔ nii. Ekɛɛ Hebri Kristofoi lɛ akɛ: “Kulɛ esa akɛ nyɛtsɔmɔ tsɔɔlɔi moŋ yɛ be lɛ naa.” (Hebribii 5:12) Ekɛɛ Timoteo akɛ: “Shi Nuŋtsɔ lɛ tsulɔ lɛ, esaaa akɛ ebéɔ, shi moŋ emli ajɔ aha mɛi fɛɛ, mɔ ni le nitsɔɔmɔ.”—2 Timoteo 2:24.
3. Mɛɛ shihilɛi amli nɛkɛ abaanyɛ abi Kristofonyo ni etsɔɔ nii yɛ?
3 Mɛni hewɔ amaa nitsɔɔmɔ nɔ mi nɛkɛ? Ojogbaŋŋ, esa akɛ Kristofoi ale gbɛ ni atsɔɔ nɔ atsɔɔ nii yɛ be mli ni amɛyaa shia kɛ shia ni amɛnyiɛ gbɛjegbɛi anɔ, aloo yɛ be mli ni amɛfeɔ sɛɛsaramɔi aloo amɛkɛ mɛi ni yɔɔ wiemɔ lɛ he miishɛɛ feɔ Biblia mli nikasemɔi lɛ. Amɛbɔɔ mɔdɛŋ ni amɛŋɔ kpe ni amɛkɛ gbɔmɛi sɔrɔtoi kpeɔ lɛ akɛ hegbɛ ni amɛna koni amɛkɛtsɔɔ nii. (Kwɛmɔ Yohane 4:7-15.) Kɛfata he lɛ, ehe miihia ni Kristofonyo sɔɔlɔ lɛ atsɔɔ nii yɛ be mli ni ewieɔ etsɔɔ asafo lɛ yɛ Maŋtsɛyeli Asa lɛ nɔ lɛ, aloo yɛ be mli ni ekɛ ŋaawoo miiha mɔ ko pɔtɛɛ. Ni awoɔ yei ni amɛdara yɛ mumɔŋ lɛ ŋaa ni amɛtsɔɔ obalayei lɛ “nii kpakpai.” (Tito 2:3-5) Fɔlɔi ni ji Kristofoi hu bɔɔ mɔdɛŋ ni amɛlɛ amɛbii lɛ yɛ “Nuŋtsɔ Yehowa tsɔsemɔ kɛ ŋaawo lɛ mli”—nɔ ko ni biɔ mɔdɛŋbɔɔ babaoo yɛ nitsɔɔmɔ mli. (Efesobii 6:4; 5 Mose 6:6-8) Belɛ ŋwanejee ko bɛ nɔ ni bɔfo Paulo kɛɛ ákɛ esa akɛ Kristofonyo lɛ afee “mɔ ni le nitsɔɔmɔ” lɛ he.
4, 5. Mɛɛ yelikɛbuamɔ wɔyɔɔ ni baaha wɔtsɔmɔ tsɔɔlɔi kpakpai?
4 Shi nitsɔɔmɔ bɛ mlɛo. Eji ŋaa nitsumɔ. (2 Timoteo 4:2) Shi te aaafee tɛŋŋ ni Kristofoi ni “jeee heloo gbɛfaŋ nilelɔi pii” ji amɛ lɛ aaanyɛ ana ŋaa nitsumɔ ni tamɔ nɛkɛ mli gbɛfaŋnɔ? (1 Korintobii 1:26) Abaanyɛ afee yɛ Yehowa yelikɛbuamɔ naa pɛ. (Mateo 19: 26) Yehowa kɛ nilee haa mɛi ni biɔ lɛ. (Yakobo 1:5) Emumɔ krɔŋkrɔŋ lɛ fiɔ mɛi ni taoɔ ni amɛfee esuɔmɔnaa nii lɛ asɛɛ, ni ebaanyɛ ni ekɛ Biblia lɛ, ni he yɔɔ “sɛɛnamɔ kɛha nitsɔɔmɔ” lɛ aha wɔ, ni ebaanyɛ eye ebua wɔ ni “ewula wɔ kɛha nitsumɔ kpakpa fɛɛ nitsumɔ kpakpa,” ni nitsɔɔmɔ fata he.—2 Timoteo 3: 16, 17, NW.
5 Biblia lɛ yeɔ buaa wɔ koni wɔtsɔmɔ tsɔɔlɔi kpakpai. Efeɔ enɛ, titri lɛ kɛtsɔɔ anɔkwayeli mli ni egbaa Yesu ni enyɛmɔ yɛ nitsɔɔmɔ mli lɛ ha mɛi ni ehi amɛteŋ lɛ ahe jɔ̃ amɛ lɛ sɔɔmɔ nitsumɔ ni ebɔɔ he amaniɛ lɛ nɔ. (Marko 1:22) Kɛ wɔkase ni wɔle nɔ ni ha efee tsɔɔlɔ kpakpa nakai lɛ, belɛ wɔbaanyɛ wɔbɔ mɔdɛŋ ni wɔkase lɛ. Anɔkwale lɛ ji akɛ, nibii sɔrɔtoi enyɔ yɔɔ nitsɔɔmɔ he sane nɛɛ mli ni esa akɛ asusu he: Tsɔɔlɔ lɛ diɛŋtsɛ hesaai kɛ gbɛ ni etsɔɔ nɔ etsɔɔ nii. Nyɛhaa wɔkwɛa bɔ ni enɛ ji anɔkwale ha yɛ Yesu sane lɛ mli, kɛ nɔ ni wɔbaanyɛ wɔkase kɛjɛ enɔkwɛmɔ lɛ mli.
Tsɔɔlɔ Lɛ . . .
6. Mɛɛ Yesu nitsɔɔmɔ lɛ fa ko yɔɔ ni ehe hiaa ni wɔkase? Mɛni hewɔ?
6 Be ko lɛ Yesu kɛɛ akɛ: “Minitsɔɔmɔ lɛ jeee minɔŋ, shi moŋ mɔ ni tsu mi lɛ nɔŋ.” (Yohane 7:16) Ekɛɛ yɛ be kroko hu mli akɛ: “Mitooo miyi mifeee nɔ ko, shi moŋ bɔ ni mitsɛ tsɔɔ mi lɛ, nakai miwieɔ.” (Yohane 8: 28) No hewɔ lɛ Yesu gbala jwɛŋmɔ kɛtee eŋwɛi Tsɛ lɛ nɔ. Eyɛ mli akɛ lɛ ji Mesia lɛ moŋ, shi ejwɛŋmɔ ji ni ewo Yehowa, gbɛi lɛ hiɛ nyam, jeee lɛ diɛŋtsɛ enɔ̃. (Mateo 6:9; Yohane 17:26) Nɛkɛ heshibaa su nɛɛ ye bua ni efee Yesu tsɔɔlɔ ni nɔ bɛ. Esa akɛ tsɔɔlɔi ni ji Kristofoi ni yɔɔ ŋmɛnɛ lɛ hu ana heshibaa su ni tamɔ nakai nɔŋŋ. Amɛjwɛŋmɔ ji ni amɛkɛ yijiemɔ aha Yehowa akɛ nɔ ni amɛtsɔɔ lɛ Jɛɛhe shi jeee kɛmiiha amɛhe akɛ tsɔɔlɔi. No hewɔ lɛ mɛi ni amɛkɛ amɛ kaseɔ nii lɛ batsɔmɔɔ Nyɔŋmɔ sɔɔlɔi, jeee adesa ko kaselɔi.—Okɛto Bɔfɔi lɛ Asaji 20:30 he.
7, 8. (a) Mɛɛ subaŋ kpakpa ko Yesu yɔɔ ni kɔɔ anɔkwale lɛ he? (Lala 119:97) (b) Mɛɛ gbɛ nɔ su ni tamɔ nakai nɔŋŋ baanyɛ aya wɔnyɛmɔ yɛ nitsɔɔmɔ mli lɛ aya hiɛ yɛ?
7 Agbɛnɛ susumɔ he akɛ Yesu ba koni “ebaye anɔkwale lɛ he odase,” ni ákɛ eyɛ esane lɛ he nilee jogbaŋŋ diɛŋtsɛ. (Yohane 17:17; 18: 37) Yɛ be mli ni eye afii 12 po lɛ, no mli lɛ eji mɔ ni nyãa Ŋmalɛi lɛ amli saji ahe waa. (Luka 2:46, 47) Eyɛ faŋŋ akɛ Yesu sumɔɔ anɔkwale lɛ. (Lala 40:9) Nɛkɛ shishinumɔ ni mli kwɔ kɛ anɔkwale lɛ he suɔmɔ nɛɛ tsɔ Yesu yiŋ akɛ ehe miihia ni mɛi krokomɛi anu esane lɛ, ni etswa efai shi akɛ ebaatsɔɔ enɛ yɛ gbɛ ni mɔɔ shi lɛ nɔ.—Yohane 1:14; 12:49, 50.
8 Ni wɔ hu? Ekolɛ wɔle babaoo yɛ anɔkwale lɛ he, shi ani wɔmiisumɔ lo? Ani wɔheɔ be koni wɔkɛkase koni wɔhe asa yɛ ekɛ-nitsumɔ mli? Ani wɔnyãa akɛ wɔkɛ mɛi krokomɛi miigba he sane? Yɛ be mli ni anɔkwale lɛ he nilee ni wɔyɔɔ lɛ mli kwɔɔ lɛ, suɔmɔ ni wɔyɔɔ kɛha lɛ lɛ hu baada, ni nakai ji wɔmiishɛɛ akɛ wɔkɛ mɛi krokomɛi aaagba enɛ he sane. Lalatsɛ lɛ tsɛ nuu ni “Yehowa mla lɛ he emii shɛɔ yɛ, ni emla lɛ he nɔŋŋ ejwɛŋɔ shwane kɛ nyɔɔŋ” lɛ akɛ mɔ ni yɔɔ miishɛɛ. Biblia lɛ kɛɔ yɛ nɛkɛ nuu nɛ he akɛ, “ni nɔ fɛɛ nɔ ni efeɔ shwereɔ,” ni ákɛ nitsɔɔmɔ hu fata enɛ he.—Lala 1:1-3.
9. Mɛɛ Yesu su kroko ye bua ni ebatsɔ tsɔɔlɔ kpakpa nakai lɛ?
9 Shi, sane ko he nilee kɛkɛ ni wɔyɔɔ lɛ nyɛŋ aha wɔfee tsɔɔlɔi ni he esa. Beni oyaa skul lɛ, ekolɛ ole tsɔɔlɔ ko ni yɔɔ nɔ ni etsɔɔ lɛ he nilee jogbaŋŋ, shi kɛlɛ ejeee tsɔɔlɔ kpakpa. Mɛni hewɔ ebaa lɛ nakai? Ekolɛ ebɛ su ni Yesu yɔɔ babaoo lɛ eko: Suɔmɔ ni mli kwɔ kɛha mɛi krokomɛi kɛ amɛhe susumɔ. Nɔ ni aŋma afɔ shi lɛ gbaa wɔ sane ni ba nɛɛ: “Shi beni [Yesu] ena mɛi babaoo lɛ, emusuŋ tsɔ lɛ yɛ amɛhewɔ, akɛni etɔ amɛ ni amɛfee yuuyaa tamɔ tooi ni bɛ kwɛlɔ lɛ.” (Mateo 9:36) Ejeee mɔ ni etɔ lɛ tsɔ, aloo ebɛ deka tsɔ ni ekɛaaye ebua mɛi krokomɛi. (Yohane 4:6-26) Emli hi, emli jɔ, ni eto etsui shi yɛ amɛgbɔjɔmɔi ahe. Eesumɔ ni eye ebua. (Luka 5:12, 13) Nɛkɛ sui nɛɛ nɔŋŋ he miihia Kristofonyo tsɔɔlɔ lɛ kɛji akɛ eeenyɛ eye omanye.
10. Mɛni hewɔ nɔkwɛmɔ nɔ kpakpa ni afeɔ lɛ ji omanye ni ayeɔ yɛ nitsɔɔmɔ mli lɛ fa ni he hiaa?
10 Kadimɔ nɔ ni ji ejwɛ ni kadi Yesu akɛ tsɔɔlɔ lɛ hu. “Lɛ mɔ ni efeee esha, ni asaŋ anaaa apasa ko yɛ edaaŋ lɛ.” (1 Petro 2:22) Efeee nɔ ko ni baagbala mɛi kɛjɛ enitsɔɔmɔ lɛ he. Ani enɛ hu ji anɔkwale yɛ wɔgbɛfaŋ? Paulo ŋma eyaha Romabii lɛ akɛ: ‘Agbɛnɛ bo mɔ ni otsɔɔ mɛi krokomɛi anii . . . akɛ “akaju” lɛ, ani ojuɔ?’ (Romabii 2:21) Yɛ nakai gbɛ nɔ nɔŋŋ lɛ, ani onukpa ni tsɔɔ asafo lɛ bɔ ni sɔɔmɔ nitsumɔ lɛ he hiaa ha lɛ diɛŋtsɛ hu yɛ ekaa yɛ shiɛmɔ mli lo? Ani mɔ ni haa maŋshiɛmɔ ni ewoɔ Biblia lɛ kanemɔ he ŋaa lɛ diɛŋtsɛ yɛ Biblia kanemɔ he gbɛjianɔtoo yɛ eshia? Yɛ shihilɛi komɛi amli lɛ jeŋba po ni wiemɔi bɛ mli ‘baanyɛ aye’ shitee-kɛ-wolɔ nɔ kunim. (1 Petro 3:1) Nifeemɔi baanyɛ awie babaoo fe wiemɔi diɛŋtsɛ. Ni eka shi faŋŋ akɛ kɛ wɔnifeemɔi kɛ wɔwiemɔi kpaaa gbee lɛ, etsɛŋ ni nikaselɔi lɛ baayoo sɔrɔtofeemɔ nɛɛ, ni eka shi faŋŋ akɛ wɔnitsɔɔmɔ lɛ baafee efolo.
11. Mɛni hu kɔɔ nitsɔɔmɔ he ni awie he yɛ biɛ?
11 Bɔ ni tsɔɔlɔ lɛ sumɔɔ akɛ ejie Yehowa yi, eshishinumɔ kɛ esuɔmɔ ni eyɔɔ kɛha anɔkwale lɛ, bɔ ni esusuɔ mɛi ahe ni emli hi ha mɛi krokomɛi kɛ enɔkwɛmɔ nii kpakpai lɛ fɛɛ ji nibii ni he hiaa ni aaaha mɔ afee tsɔɔlɔ kpakpa. Nikaselɔi anɔkwafoi nyãa sui ni tamɔ nɛkɛ lɛ ahe, kɛ tsɔɔlɔ lɛ po he esako tsɔ yɛ nitsɔɔmɔ he ŋaai amli. Shi kɛlɛ, nitsɔɔmɔ ji ŋaa nitsumɔ, ni gbɛi ni atsɔɔ nɔ atsɔɔ nii kɛ ehe ŋaai ahe susumɔ baanyɛ aha wɔnitsɔɔmɔ aya hiɛ. Susumɔ Yesu nitsɔɔmɔ lɛ mli kpɔi loo ŋaa komɛi lɛ ahe ni okwɛ akɛ ani eeeye ebua bo ni ofee tsɔɔlɔ kpakpa lo.
. . . Kɛ Enitsɔɔmɔ Lɛ
12. (a) Mɛɛ Yesu nitsɔɔmɔ le fa kroko jɛɔ kpo waa yɛ Mateo 5:3-12? (b) Te ooofee tɛŋŋ okɛ nɛkɛ gbɛ nɛɛ aaatsu nii ni eha onyɛmɔ yɛ nitsɔɔmɔ mli aya hiɛ?
12 Bɔni afee ni wɔnyɛ wɔkɛ bɔ ni Yesu tsɔɔ nii ehaa lɛ asa wɔnaa wɔkwɛ lɛ, kanemɔ e-Gɔŋ nɔ Shiɛmɔ lɛ klɛŋklɛŋ kukuji lɛ ekomɛi oha bo diɛŋtsɛ ohe. (Mateo 5:3-12) Mɛni hɛleɔ bo shi amrɔ nɔŋŋ lɛ? Ojogbaŋŋ, Yesu hala ewiemɔi lɛ jogbaŋŋ. Wiemɔi kukuji ni ekɛjeɔ ewiemɔ lɛ shishi lɛ, “Miishɛɛ ji . . . ” (aloo ajɔɔ mɛi ni) lɛ kɛ hiɛkpamɔ wiemɔ ko ni haa akaiɔ sane lɛ haa. Shi kadimɔ enɛ hu: Ekɛ wiemɔi wuji ni amɛtsɛmɔ wa ni anaaa naa tsuuu nii. Anɔkwalei ni ewie he lɛ amli kwɔlɔ, shi ewie he yɛ gbɛ ni yɔɔ mlɛo nɔ. Naa nitsɔɔmɔ ni mɔɔ shi lɛ he teemɔŋ sane ko: NƆ NI MLI KA SHI FAŊŊ. Yaa nɔ okane Yesu wiemɔi ni eshwɛ lɛ ni okadi anɔkwalei ni mli kwɔlɔ ni ewie he yɛ gbɛ ni mli ka shi faŋŋ nɔ lɛ he nɔkwɛmɔ nii lɛ ekomɛi. (Mateo 5:23, 24, 31, 32; 6:14; 7:12) Agbɛnɛ susumɔ gbɛ ni oootsɔ nɔ otsɔɔ anɔkwalei ni mli kwɔlɔ nɛɛ amli yɛ gbɛ ni mli ka shi faŋŋ nɔ lɛ he, tamɔ ekolɛ Jeŋmaji Abei lɛ, aloo nɔ hewɔ ni Biblia lɛ kɛ ŋwɛi kɛ shikpɔŋ nɔ he hiɛnɔkamɔ fɛɛ haa lɛ mli.
13, 14. Yɛ mɛɛ gbɛ nɔ nɔkwɛmɔ nii ha Yesu wiemɔi lɛ fee nɔ ni ŋɔɔ?
13 Agbɛnɛ kanemɔ Mateo 5:14-16. Yesu miiwo etoibolɔi heshibalɔi Iɛ hewalɛ ni amɛgbɛ anɔkwale lɛ amɛshwa kɛtsɔ amɛwiemɔi kɛ nifeemɔi kpakpai anɔ. Ekolɛ susumɔ nɛɛ baahɛle amɛ shi. Yɛ nakai gbii lɛ amli lɛ abuɔ woloŋmalɔi lɛ kɛ Farisifoi Iɛ akɛ Yuda maŋ lɛ tsɔɔlɔi Shi Yesu ha sane oti lɛ je kpo faŋŋ koni eha amɛnu shishi akɛ shishinumɔ yɛ he. Yɛ mɛɛ gbɛ nɔ? Kɛtsɔ abɛbua loo nɔkwɛmɔ nii ni ekɛtsu nii yɛ ŋaa mli lɛ nɔ. Naa nɔ ni yeɔ buaa nitsɔɔmɔ ni sɛɛnamɔ kpele yɔɔ he ni Yesu kɛtsu nii shii abɔ lɛ: NƆKWƐMƆ NII.
14 Mɛni hewɔ nɔkwɛmɔ nii lɛ? Ejaakɛ wɔjwɛŋmɔ tsuɔ nii jogbaŋŋ yɛ mfonirii amli. Ni kɛ agbala nibii ni ale jogbaŋŋ awo mli lɛ, abɛbuai loo nɔkwɛmɔ nii baanyɛ aha mumɔŋ nibii ashishinumɔ afee mlɛo. No hewɔ lɛ, Yesu kɛ Yehowa, sɔlemɔ Toibolɔ lɛ to tsɛ ko ni kɛ nibii kpakpai haa ebii ahe. Akɛ gbɛ ni enɔ nyiɛmɔ wa ni ekɛ mɔ yaa wala mli lɛ to agbo fintɔŋŋ kɛ gbɛ ni nɔ etsa he. Akɛ apasa gbalɔi to klaji ni lakaa mɛi ni feɔ amɛhe gwantɛŋi ahe, aloo akɛ amɛ to tsei ni woɔ yibii ni ekpɔtɔ ahe. (Mateo 7:7-11, 13-21) Nɛkɛ abɛbuai loo nɔkwɛmɔ nii ni ale yɛ shihilɛ mli diɛŋtsɛ nɛɛ ha Yesu wiemɔi lɛ fee nɔ ni ŋɔɔ. Enitsɔɔmɔ lɛ fee nɔ ni anyɛɔ akaiɔ, nɔ ni hiɛ kpaaa nɔ.
15. Okɛ nɔkwɛmɔ nii komɛi aha ni tsɔɔ bɔ ni ŋmɛnɛ Kristofoi hu baanyɛ ni amɛkɛ nɔkwɛmɔ nii atsu nii ni amɛba amɛ nitsɔɔmɔ aya hiɛ.
15 Tsɔɔlɔi Kristofoi ni yɔɔ ŋmɛnɛ Iɛ hu kɛ nɔkwɛmɔ nii tsiiɔ nii koni no aha mɛi krokomɛi akpɛlɛ susumɔi heei anɔ. Mɛi komɛi efee shishinumɔ ni bɛ hɛl-la tsɔɔmɔ lɛ mli lɛ he nɔkwɛmɔ nɔ kɛtsɔ sane ni amɛbiɔ toibolɔ lɛ yɛ nɔ ni esusuɔ yɛ fɔlɔ ni kɛ ebi nine woɔ la mli ekɛgbalaa etoi lɛ he. Abaanyɛ afee anɔkwale ni eji akɛ adesai ateŋ mɛi fioo ko pɛ yaa ŋwɛi, yɛ be mli ni amɛteŋ mɛi ni fa yɔɔ naanɔ wala yɛ shikpɔŋ nɔ he hiɛnɔkamɔ lɛ he nɔkwɛmɔ nɔ ni akɛto maŋ ko ni mɛi fioo ko pɛ feɔ nɔyeli lɛ, yɛ be mli ni mɛi pii naa nakai nɔyeli lɛ he sɛɛ lɛ he. Shi esa akɛ ajie abɛbua loo nɔkwɛmɔ nɔ lɛ kɛjɛ nibii ni toibolɔ lɛ le ni enaa faŋŋ lɛ mli. Ehe ehiaaa ni atsɔɔ mli babaoo, aloo yɛ bɔ ni ekɛ kakadaŋŋ hewɔ lɛ anaa sane oti ni ataoɔ akɛtsɔɔ mli lɛ naa.
16. Mɛɛ nɔkwɛmɔ nii nɛkɛ jeɔ kpo waa titri?
16 Kaaha ohiɛ miikpa nɔ akɛ nɔkwɛmɔ nii baanyɛ afee nibii ni hiŋmɛi naa. Beni abi Yesu kɛji akɛ eja gbɛ akɛ aaawo too aha Kaisare lɛ, ebi ni akɛ shika, dinario, abatsɔɔ lɛ. Ni ekɛ enɛ tsu nii ekɛfee ehetoo lɛ he nɔkwɛmɔ nɔ. (Mateo 22:17-22) Yɛ be mli ni emaa heshibaa nɔ mi lɛ, efee nɔkwɛmɔ nɔ kɛtsɔ gbekɛ ko ni etsɛ lɛ lɛ nɔ. (Mateo 18:1-6) Ni yɛ be mli ni ewieɔ hetuu-kɛ-hamɔ ni nɔ ko nɔ ko eshwɛɛɛ yɛ sɛɛ dɔŋŋ lɛ he lɛ, egbala jwɛŋmɔ kɛtee yoo okulafo ko ni kɛ nii fɛɛ ni eyɔɔ lɛ ha beni ekɛwo sɔlemɔwe lɛ tooyeli adeka lɛ mli lɛ—shika bibii enyɔoo ko pɛ lɛ nɔ. (Marko 12:41-44) Nakai nɔŋŋ hu wielɔi komɛi kɛ tao, mfonirii, abɛbuai loo nɔkwɛmɔ nii kɛ sini tsuɔ nii yɛ amɛwiemɔ mli yɛ Kristofoi akpeei ashishi yɛ Maŋtsɛyeli Asa lɛ nɔ, yɛ be mli ni yɛ shia Biblia mli nikasemɔi ashishi hu lɛ, mfonirii ni yɔɔ woji amli aloo yelikɛbuamɔ nibii krokomɛi hu yɛ ni akɛtsuɔ nii. Abɛbuai loo nɔkwɛmɔ nii ni anaa lɛ he yɛ sɛɛnamɔ babaoo ni ekaa mɔ jwɛŋmɔ mli fe wiemɔi kɛkɛ.
17. Tsii nitsɔɔmɔ gbɛ kroko ni Yesu kɛtsu nii shii abɔ lɛ ta.
17 Yɛ naagbee lɛ, kanemɔ bɔ ni Yesu tsu Farisinyo ni ekɛ lɛ kpe be ko taakɛ atsi ta yɛ Mateo 12:10-12 lɛ he nii eha lɛ. Kadimɔ ŋaa gbɛ ni etsɔ nɔ eha sanebimɔ ko ni ataoɔ akɛtsɔ lɛ tsɔne lɛ hetoo eha lɛ. Hɛɛ, ekɛ nɔkwɛmɔ nii tsu nii, shi ani okadi gbɛ ni etsɔ nɔ ewie enɛ he lɛ? Tamɔ sanebimɔ ko. Kɛkɛ ni ekɛ ŋaa kudɔ etoibolɔi lɛ ni amɛsusu Hejɔɔmɔ Gbi lɛ he yɛ gbɛ ni ŋmɛɔ pɛpɛɛpɛ nɔ. No hewɔ lɛ SANEBIMƆI ji yelikɛbuamɔ nibii yɛ nitsɔɔmɔ mli, ni Yesu kɛ enɛ tsu nii. Kadimɔ gbɛ ni Yesu tsɔ nɔ ekɛ sanebimɔi tsu nii koni eha etoibolɔi lɛ awa ni amɛjwɛŋ saji ahe, ni etsɔ nɔ ekɛnyɛ mɛi ni teɔ shi woɔ lɛ lɛ anɔ koni amɛjwɛŋ amɛshidaamɔ lɛ he ekoŋŋ lɛ.—Mateo 17:24-27; 21:23-27; 22:41-46.
18. Okɛ nɔkwɛmɔ nii komɛi ni tsɔɔ bɔ ni ŋmɛnɛ Kristofoi baanyɛ ni amɛkɛ sanebimɔi atsu nii yɛ be mli ni amɛsusuɔ tsɔɔmɔi ahe lɛ aha.
18 Kristofoi hu baanyɛ ni amɛkɛ sanebimɔi atsu nii nakai nɔŋŋ ŋmɛnɛ. No hewɔ lɛ kɛ mɔ ni heɔ Triniti lɛ eyeɔ Iɛ kɛ Mateo 28:18 lɛ tsu nii koni ekɛtsɔɔ akɛ Yesu yɛ hewalɛ ni fe fɛɛ ni yɛ no hewɔ lɛ ekɛ Nyɔŋmɔ yeɔ egbɔ lɛ, tsɔɔlɔi ni he esa lɛ ena akɛ ehi ákɛ akɛ sanebimɔi aaatsu nii ni akɛye abua mɔ lɛ ni esusu saji ahe. Ekolɛ wɔbaanyɛ wɔbi akɛ: ‘Kɛji ákɛ akɛ hegbɛ fɛɛ eha Yesu, taakɛ kuku lɛ kɛɔ lɛ, belɛ namɔ kɛ nakai hegbɛ lɛ ha lɛ? Ni mɛni ji Yesu gbɛhe dani akɛ hegbɛ nɛɛ ha lɛ lɛ?’ Enɛ haa ayeɔ abuaa mɔ ni heɔ Triniti eyeɔ lɛ koni esusu nakai ŋmalɛ lɛ he yɛ shishinumɔ kroko mli. Nakai nɔŋŋ hu mɔ ni heɔ hɛl-la lɛ eyeɔ lɛ baanyɛ ni ekɛ niiatsɛ lɛ kɛ Lazaro abɛbua lɛ atsu nii ni ekɛbɔ mɔdɛŋ ni ekɛtsɔɔ akɛ hɛl-la diɛŋtsɛ yɛ. (Luka 16:19-31) Sanebimɔi ni tamɔ nɛkɛ baanyɛ aye abua lɛ: Nɛgbɛ ohiafo lɛ tee beni egbo lɛ? Kɛji ŋwɛi ni lɛ, ani no tsɔɔ akɛ mɔ fɛɛ mɔ ni yɔɔ ŋwɛi lɛ hɔ Abraham mlishi? Kɛfata he lɛ, mɛni Abraham feɔ yɛ jɛmɛ, akɛni Yesu kɛɛ akɛ kɛbashi Lɛ ebe lɛ mli lɛ mɔ ko mɔ ko ekwɔko kɛyako ŋwɛi lɛ? (Yohane 3:13) Sanebimɔi ni tamɔ nɛkɛ baaye abaa ni no atsɔɔ akɛ shihilɛ mli ni ohiafo lɛ yɔɔ yɛ egbele sɛɛ ni atsɔɔ mli yɛ abɛbua lɛ mli lɛ baanyɛ afee nɔ ko he okadi. No hewɔ lɛ, niiatsɛ lɛ shihilɛ yɛ be mli ni “egbo” sɛɛ lɛ hu baanyɛ afee okadi, shi esaaa akɛ anuɔ shishi akɛ nɔ ko pɔtɛɛ diɛŋtsɛ ni ba—titri lɛ yɛ nɔ ni ŋmalɛi krokomɛi wieɔ yɛ hɛl he lɛ hewɔ.—Jajelɔ 9:10.a
19. Mɛni hewɔ sanebimɔi ahe hiaa waa yɛ nitsɔɔmɔi fɛɛ mli lɛ.
19 Sanebimɔi haa nikaselɔ lɛ kɛ ehe woɔ nitsɔɔmɔ gbɛjianɔtoo lɛ mli. Saji babaoo ni abiɔ (ni wielɔ lɛ kpaaa gbɛ akɛ etoibolɔi lɛ baaha hetoo) lɛ kanyaa toibolɔ lɛ jwɛŋmɔ koni efee nɔ ko yɛ he. Kadimɔ gbɛ ni Yesu tsɔ nɔ ekɛ saji ni ekpaaa hetoo gbɛ shi kɛlɛ ehaa afeɔ sanebimɔ lɛ he nɔ ko tsu nii yɛ Mateo 11:7-11 lɛ. Akɛ sanebimɔi tsuɔ nɔ kroko. Yɛ be babaoo mli lɛ esa akɛ wɔle nɔ ni yɔɔ mɔ lɛ jwɛŋmɔ mli dani wɔnyɛ wɔye wɔbua lɛ. Akɛni wɔtamɔɔɔ Yesu ni wɔnyɛŋ wɔle gbɔmɛi atsui mli saji hewɔ lɛ, gbɛ kome pɛ yɔɔ ni wɔɔnyɛ wɔtsɔ nɔ ni wɔnine ashɛ saji ni tamɔ nɛkɛ nɔ: Kɛtsɔ saji ni ásusu he jogbaŋŋ lɛ abimɔ nɔ.—Abɛi 18:13; 20:5.
20. Mɛɛ nyɔmɔwooi wɔnine baashɛ nɔ kɛ ‘wɔha wɔhiɛ hi wɔhe nɔ kɛ wɔtsɔɔmɔ Iɛ nɔ’? (1 Timoteo 4:16)
20 Hɛɛ, nitsɔɔmɔ lɛ, ŋaa nitsumɔ ni. Kɛ ooonyɛ oná enɛ lɛ, belɛ esa akɛ tsɔɔlɔ lɛ aná sui komɛi yɛ lɛ diɛŋtsɛ emli ni ekase bɔ ni eeefee ele gbɛ ni atsɔɔ nɔ atsɔɔ nii. Ebɛ mlɛo, shi abaanyɛ aná. Ni kɛlɛ, kɛ mɔ ko aaafee Kristofonyo lɛ, belɛ esa akɛ efee tsɔɔlɔ hu. Kristofoi agbɛnaa nii babaoo he nitsumɔ kɔɔ nitsɔɔmɔ he. No hewɔ lɛ wɔbaafee jogbaŋŋ akɛ wɔkɛ Paulo ŋaawoo nɛɛ aaatsu nii: “Ohiɛ ahi ohe nɔ kɛ tsɔɔmɔ lɛ nɔ.” Eji anɔkwale akɛ mɛi komɛi yɛ nikeenii yɛ enɛ mli fe mɛi krokomɛi. Shi mɔ fɛɛ mɔ baanyɛ atsɔɔ nii yɛ omanyeyeli mli kɛji akɛ mɔ lɛ kɛ ehe ha nikasemɔ ni ekwɛ Yehowa gbɛ akɛ eeeye ebua lɛ. Kɛ amɛfee nakai lɛ, nyɔmɔwoo lɛ baafa fe bɔ ni aaasusu Taakɛ Paulo tee nɔ ewie lɛ: “Hii shi yɛ nii nɛɛ amli; ejaakɛ kɛji ofee enɛ lɛ, ooohere bo diɛŋtsɛ kɛ mɛi ni boɔo toi lɛ fɛɛ yiwala.”—1 Timoteo 4:16.b
[Shishigbɛ niŋmai]
a Ajie kɛjɛ November 1, 1984 Watchtower lɛ mli.
b Kwɛmɔ New World Translation Reference Bible, shishigbɛ niŋmaa; agbɛnɛ Appendix 4B.
Ani Obaanyɛ Otsɔɔ Mli?
◻ Mɛɛ sui kpakpai ye bua Yesu ni eha etsɔ tsɔɔlɔ kpakpa nakai lɛ?
◻ Sui kpokpai nɛɛ baanyɛ aye abuo wɔ yɛ mɛɛ gbɛ nɔ?
◻ Mɛni hewɔ sane ni mli ka shi faŋŋ he hiaa tsɔɔlɔ lɛ?
◻ Mɛni hewɔ nɔkwɛmɔ nii kɛ sanebimɔi ni akɛtsuɔ nii lɛ baaha wɔ nitsɔɔmɔ aya hiɛ lɛ?
[Mfoniri ni yɔɔ baafa 21]
Esoro gbɛ ni Yesu tsɔɔ nɔ etsɔɔ nii lɛ yɛ jamɔ mli hiɛnyiɛlɔi lɛ anɔ̃ Iɛ he
[Mfoniri ni yɔɔ baafa 24]
Taakɛ Yesu fee lɛ, Kristofoi ni yɔɔ ŋmɛnɛ lɛ kɛ hegbɛ fɛɛ fɛɛ hegbɛ ni amɛnaa lɛ tsuɔ nii