Nikpamɔ Nitsulɔi Babaoo—He Miihia Waa!
“Nikpamɔ lɛ fa, shi nitsulɔi lɛ faaa. No hewɔ lɛ nyɛkpaa nikpamɔ Nuŋtsɔ lɛ fai, koni etsu nitsulɔi kɛba enikpamɔ lɛ mli.”—LUKA 10:2.
1. Mɛni obaanyɛ osusu yɛ Yesu wiemɔi ni yɔɔ Luka 10:2 lɛ he, shi mɛɛ ŋaa abaawo bo ni ofee moŋ?
YƐ BE mli ni okaneɔ Yesu wiemɔi nɛɛ lɛ, ani onuɔ he akɛ ekɔɔ ohe? Akɛni nɔ ni fe afii ohai 19 nɛ ni ewie hewɔ lɛ, ekolɛ ebaaha osusu akɛ amɛhe ehiaaa dɔŋŋ. Ni akɛ oyaiyeli aaamu sane naa nɛkɛ lɛ baafee tɔmɔ diɛŋtsɛ. Bɔni afee ni ona nɔ ni Yesu wiemɔi lɛ tsɔɔ diɛŋtsɛ lɛ mli jogbaŋŋ lɛ, nyɛhaa wɔkwɛa sɛɛ mli beni awie wiemɔ nɛɛ klɛŋklɛŋ kwraa lɛ, kɛ nɔ ni ba, ni agbɛnɛ wɔpɛi shihilɛ ni wɔyɔɔ mli ŋmɛnɛ lɛ mli wɔkwɛ.—Okɛto 1 Korintobii 10:11, he.
2. Mɛɛ shihilɛ ni biɔ ni afee nɔ ko oya Yesu kɛkpe yɛ afi 32 Ŋ.B., ni te etsu shihilɛ nɛɛ he nii eha tɛŋŋ?
2 Yɛ afi 32 Ŋ.B., yɛ be mli ni Asesei Agbijurɔ lɛ eho lɛ, no mli lɛ eshwɛ nyɔji ekpaa ni Yesu kɛ sɛŋmɔtso nɔ gbele baakpe. Bɔni afee ni eye ebua ni shiɛmɔ nitsumɔ lɛ aya oya lɛ, Yesu tsu kaselɔi 70 “enyɔnyɔ kɛtsɔ ehiɛ kɛtee maŋ fɛɛ maŋ kɛ he fɛɛ he ni lɛ diɛŋtsɛ ebaaya lɛ.” Amɛtee akɛ mɛi ni Yesu wiemɔi nɛɛ miijije yɛ amɛtoiiaŋ: “Nikpamɔ lɛ fa, shi nitsulɔi lɛ faaa. No hewɔ lɛ nyɛkpaa nikpamɔ Nuŋtsɔ lɛ fai, koni etsu nitsulɔi kɛba enikpamɔ lɛ mli.”—Luka 10:1, 2.
Nikpamɔ Babaoo Jɛ Mli Ba
3. Tsɔɔmɔ nɔ ni jɛ shiɛmɔ ni tee nɔ babaoo yɛ Yesu sɔɔmɔ lɛ naagbee nyɔji fioo lɛ amli ba lɛ mli.
3 Mɛni jɛ shiɛmɔ babaoo ni abɔ he mɔdɛŋ nɛɛ mli ba? Wɔkaneɔ akɛ: “Ni mɛi nyɔŋmai kpawo lɛ ku amɛsɛɛ amɛba kɛ miishɛɛ amɛbakɛɛ: ‘Nuŋtsɔ, ogbɛi lɛ ahewɔ lɛ daimonioi tete baa amɛhe shi amɛhaa wɔ.’” Mɛɛ hewalɛ ni Nyɔŋmɔ yɔɔ yɛ daimonioi lɛ anɔ lɛ kpojiemɔ yɛ naakpɛɛ gbɛ nɔ nɛ! Eka shi faŋŋ akɛ sɔɔmɔ amaniɛbɔɔ fɛfɛo nɛɛ ha Yesu na miishɛɛ, ejaakɛ ekɛɛ akɛ: “Mina Satan tamɔ sarawa jɛ ŋwɛi bagbee shi.” (Luka 10:17, 18) Yesu le akɛ yɛ naagbee lɛ abaashɛrɛ Satan kɛ edaimonioi lɛ kɛjɛ ŋwɛi ashwie yɛ Mesia Maŋtsɛyeli lɛ fɔmɔ yɛ ŋwɛi lɛ sɛɛ. Shi beni Yesu yɔɔ shikpɔŋ nɔ lolo lɛ, nɛkɛ fa ni adesai kɛkɛ famɔ daimonioi ni anaaa amɛ lɛ ma nakai miishɛɛ be ni baa lɛ nɔ mi kɛha lɛ. No hewɔ lɛ Yesu wie Satan shigbeemɔ kɛmiijɛ ŋwɛi ni baaba yɛ wɔsɛɛ be mli lɛ he akɛ eji anɔkwale.—Kpojiemɔ 12:5, 7-10.
4. Mɛni ji nikpamɔ nitsumɔ ni Yesu kɛ ekaselɔi lɛ tsu dani Nisan 14, afi 33 Ŋ.B. ba lɛ yiŋtoo?
4 Nikpamɔ ni Yesu wie he lɛ jeee ŋmãa aloo aduawai anɔ̃, shi moŋ gbɔmɛi anɔ̃, gbɔmɛi ni tamɔ gwantɛŋi ni baakpɛlɛ Maŋtsɛyeli lɛ he sane lɛ nɔ amrɔ nɔŋŋ lɛ. Aje shishi aana nikpamɔ nɛɛ mli yibii lɛ momo po. Shi nikpamɔ ni Yesu kɛ esɛɛnyiɛlɔi lɛ tsu yɛ nakai nyɔji fioo ni tsɔ Nisan 14, afi 33 Ŋ.B. lɛ hiɛ lɛ mli lɛ ji shishitoo kɛkɛ kɛha nikpamɔ kpeteŋkpele ko ni baanyiɛ Yesu gbele kɛ eshitee lɛ sɛɛ aba lɛ.—Okɛto Lala 126:1, 2, 5, 6 he.
5. Mɛɛ nibii ni yɔɔ miishɛɛ ba yɛ Pentekoste, afi 33 Ŋ.B., ni te enɛɛmɛi sa nikpamɔ nitsumɔ ni baanyiɛ sɛɛ lɛ he eha tɛŋŋ?
5 Pentekoste, afi 33 Ŋ.B. gbi lɛ eshɛ agbɛnɛ. Yesu sɛɛnyiɛlɔi lɛ ateŋ mɛi aaafee 120 ekpe yɛ Yerusalem. “Ni trukaa lɛ gbɛɛmɔ ko ni tamɔ ahum ni tswaa waa jɛ ŋwɛi ba, ni ebayi shia, he ni amɛtara lɛ fɛɛ obɔ. . . . Ni mumɔ krɔŋkrɔŋ bayimɔ amɛ fɛɛ amɛmli obɔbɔ, ni amɛbɔi wiemɔi sɔrɔtoi sɔrɔtoi awiemɔ taakɛ bɔ ni mumɔ lɛ ŋɔwo amɛnaa lɛ.” Nikpamɔ ko ni yɔɔ naakpɛɛ shishijee nɛ! “Ni nakai gbi lɛ nɔ nɔŋŋ lɛ aŋɔ susumai aaafee akpei etɛ afata amɛhe.” (Bɔfoi lɛ Asaji 1:15; 2:1-4, 41) “Ni daa gbi lɛ amɛkɛ jwɛŋmɔ kome yaa sɔlemɔwe lɛ, . . . ni amɛjieɔ Nyɔŋmɔ yi ni amɛhiɛ ba nyam yɛ maŋ muu lɛ fɛɛ hiɛ. Ni Nuŋtsɔ lɛ ŋɔɔ mɛi ni ahere amɛyiwala lɛ efataa asafo lɛ he gbi fɛɛ gbi.”(Bɔfoi lɛ Asaji 2:46, 47) Yɛ sɛɛ mli lɛ wɔna akɛ: “Ni asaŋ akɛ mɛi ni heɔ Nuŋtsɔ lɛ nɔ amɛyeɔ, hii kɛ yei babaoo bafata amɛhe!” Yɛ sɛɛ mli lolo lɛ: “Ni Nyɔŋmɔ wiemɔ lɛ shwere, ni kaselɔi lɛ ayi bafa babaoo diɛŋtsɛ yɛ Yerusalem; ni osɔfoi lɛ tete ateŋ mɛi pii boɔ hemɔkɛyeli lɛ toi.”—Bɔfoi lɛ Asaji 5:14; 6:7.
6. Shitee kɛ woo ni ba shiɛmɔ nitsumɔ lɛ nɔ lɛ sa Maŋtsɛyeli yibiiwoo lɛ he yɛ mɛɛ gbɛ nɔ?
6 Kɛkɛ ni shi ni ateɔ awoɔ Maŋtsɛyeli lɛ he sane lɛ mli bawa waa. Shi ani enɛ ba nikpamɔ nitsumɔ lɛ shi? Dabi, “kɛkɛ ni mɛi ni egbɛ eshwa lɛ yakpa shi ni amɛjaje sanekpakpa lɛ.” Filipo tee Samaria maŋ lɛ mli; ni asafoi babaoo kɛ miishɛɛ bo lɛ toi; atsa mɛi ni mumɔi fɔji yɔɔ amɛnɔ, mɛi ni amɛkumɔ kɛ obubuafoi fɛɛ ahelai. Ŋwanejee ko kwraa bɛ he akɛ no hewɔ ni “miishɛɛ babaoo ba nakai ma lɛŋ” lɛ.—Bɔfoi lɛ Asaji 8:1-8.
7. Yɛ naagbee lɛ atsu Yesu famɔ ni ekɛha ekaselɔi lɛ ni yɔɔ Bɔfoi lɛ Asaji 1:8 lɛ he nii kɛyashɛ nɛgbɛ?
7 Yesu ni atee lɛ shi lɛ ekɛɛ ekaselɔi lɛ akɛ: “Nyɛaatsɔmɔ midasefoi yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbee hei lɛ.” (Bɔfoi lɛ Asaji 1:8) Bɔ ni nitsumɔ lɛ da ha lɛ biɔ nitsulɔi babaoo—kɛ hehiamɔ hu! Mɛɛ nikpamɔ ko ni ji kaselɔi abaakpa gbɛ nɛkɛ! Ni eeba mli po—fɛɛ yɛ Nyɔŋmɔ mumɔ krɔŋkrɔŋ lɛ kudɔmɔ shishi. Beni atsake Saul ni awuyeli yɔɔ ejwɛŋmɔ mli lɛ sɛɛ lɛ, abɔ wɔ amaniɛ akɛ: “Agbɛnɛ lɛ asafo lɛ na hejɔlɛ yɛ Yudea kɛ Galilea kɛ Samaria fɛɛ, ni enane mɔ shi, ni enyiɛɔ yɛ Nuŋtsɔ lɛ gbeyeishemɔ mli, ni ekɛ mumɔ krɔŋkrɔŋ miishɛjemɔ lɛ shwereɔ.” (Bɔfoi lɛ Asaji 9:31) Beni mɛi ni tamɔ gwantɛŋi lɛ anaabuamɔ lɛ tee nɔ ni aabua mɛi pii anaa lɛ, ŋwanejee ko kwraa bɛ he akɛ nakai klɛŋklɛŋ Kristofoi lɛ baakai Yesu wiemɔi nɛɛ yɛ be fɛɛ mli: “Nyɛkpaa nikpamɔ Nuŋtsɔ lɛ fai, koni ewo nitsulɔi pii agbɛ kɛba enikpamɔ lɛ mli.” Ani Yehowa, “nikpamɔ Nuŋtsɔ lɛ” ha nakai sɔlemɔ lɛ hetoo? Efee nakai diɛŋtsɛ! Kɛ jeee nakai lɛ kulɛ te aaafee tɛŋŋ ni aaaŋma yɛ: “Sanekpakpa lɛ ni nyɛnu ni ashiɛɔ atsɔɔ bɔɔ nii fɛɛ ni yɔɔ ŋwɛi shishi lɛ” he lɛ?—Kolosebii 1:23.
Hehiamɔ Waa Ŋmɛnɛ
8. Mɛni hewɔ Maŋtsɛyeli nitsulɔi babaoo he ehia waa yɛ 1980 afii lɛ amli fe be fɛɛ lɛ?
8 Ŋmɛnɛ, yɛ 1980 afii nɛɛ amli lɛ, nitsulɔi babaoo he ehia fe be fɛɛ. Mɛni hewɔ? Ejaakɛ nɔ ni atsuɔ yɛ je muu fɛɛ lɛ da waa diɛŋtsɛ. Nɔ ni ejɛ mli eba ji akɛ, nibaa nii ni abaabua naa lɛ fa babaoo diɛŋtsɛ. Enɛ kɛ nɔ ni Yesu gba fɔ shi lɛ kpaa gbee. Ekɛɛ akɛ esɛɛnyiɛlɔi lɛ baatsu nitsumɔi wuji fe nɔ ni etsu yɛ be mli ni eyɔɔ shikpɔŋ nɔ lɛ, yɛ sanekpakpa lɛ shiɛmɔ gbɛfaŋ.—Yohane 14:12.
9. (a) Ama bɔ ni shiɛmɔ nitsumɔ lɛ he hiaa ŋmɛnɛ lɛ nɔ mi yɛ ninaa ni akɛha Yohane taakɛ atsɔɔ mli yɛ Kpojiemɔ 7:1-3 lɛ mli yɛ mɛɛ gbɛ nɔ? (b) Mɛɛ shishinumɔ abaanyɛ aná kɛjɛ wiemɔ “klɛŋklɛŋ yibii [kɛha] Nyɔŋmɔ kɛ toobi lɛ” mli?
9 Ama hehiamɔ ni yɔɔ shiɛmɔ nitsumɔ lɛ mli ŋmɛnɛ lɛ nɔ mi yɛ ninaa ko ni akɛha Yohane lɛ mli, taakɛ atsɔɔ mli yɛ Kpojiemɔ 7:1-3 lɛ. Jɛmɛ ni ana ni “ŋwɛibɔfoi ejwɛ damɔ shikpɔŋ koji ejwɛ lɛ nɔ, ni amɛhiɛ shikpɔŋ lɛ nɔ kɔɔyɔi ejwɛ lɛ mli.” Be enyiɛ amɛbaaya nɔ amɛhiɛ “kɔɔyɔi ejwɛ” lɛ mli kɛyashi? ‘Kɛyashi be mli ni wɔkɛ naasɔomɔ nɔ̃ aaakadi wɔ Nyɔŋmɔ lɛ tsuji lɛ ahiɛŋtsei anɔ da.’ Be enyiɛ enɛ baahe? Yɛ anɔkwale ni eji akɛ yɛ Kaimɔ gbijurɔ ni aye yɛ April 15, 1984 lɛ shishi lɛ, mɛi 9,081 pɛ tsɔɔ akɛ amɛfata 144,000 lɛ ahe lɛ tsɔɔ. Mɛi ni afɔ amɛ mu lɛ ni yɔɔ ŋmɛnɛ lɛ ji mɛi ni atsɔɔ yɛ Kpojiemɔ 14:4 akɛ “ahé kɛjɛ gbɔmɛi ateŋ ni amɛtsɔmɔ klɛŋklɛŋ yibii amɛha Nyɔŋmɔ kɛ toobi lɛ” naagbee mɛi kwraa ni eshwɛ. No hewɔ lɛ etamɔ nɔ ni abua “klɛŋklɛŋ yibii” lɛ ateŋ mɛi pii anaa kɛtee momo. Shi ani wiemɔ “klɛŋklɛŋ yibii” lɛ tsɔɔ akɛ yibii krokomɛi yɛ ni baanyiɛ sɛɛ? Hɛɛ, nakai etsɔɔ! Nɔ ni feɔ enɛ he mfoniri ji aduawai loo yibii krokomɛi babaoo ni abuaa naa yɛ Yudafoia Okwaayeli afi lɛ naagbee yɛ Asesei Agbijurɔ lɛ nɔ lɛ.—5 Mose 16:13-15.
10. Mɛɛ nikpamɔi enyɔ etee nɔ yɛ ŋmɛnɛŋmɛnɛ beaŋ, ni mɛni hewɔ anɔkwasane nɛɛ maa bɔ ni nikpamɔ nitsulɔi babaoo he hiaa ha lɛ nɔ mi lɛ?
10 No hewɔ lɛ, ebafeɔ faŋŋ akɛ, yɛ be mli ni shwɛɛnii ni afɔ amɛ mu lɛ anaabuamɔ lɛ baa naagbee lɛ, nikpamɔ ni ji naabuamɔ kroko naa miigbele. Ani jeee enɛ ji nɔ ni jeɔ kpo yɛ nɔ ni Yohane na yɛ eninaa lɛ mli yɛ enɛ sɛɛ lɛ? “Nii nɛɛ asɛɛ lɛ mikwɛ, ni naa, asafo babaoo ni mɔ ko mɔ ko nyɛŋ akane ni jɛ jeŋ maŋ fɛɛ jeŋ maŋ kɛ akutsei kɛ maji kɛ majianɔ wiemɔi amli.” Akɛɛ Yohane akɛ: “Mɛnɛɛmɛi ji mɛi ni jɛ amanehulu kpeteŋkpele lɛ mli lɛ.” (Kpojiemɔ 7:9, 14) Be ni afo he husu pɛ eshwɛ ni akɛbaagbe “asafo babaoo” lɛ anaabuamɔ lɛ naa. Kɛ aŋmɛɛ nakai “shikpɔŋ lɛ nɔ kɔɔyɔi ejwɛ” ni tsɔɔ “amanehulu kpeteŋkpele” lɛ shishijee lɛ mli pɛ lɛ, ebaafee nɔ ni ekpe sɛɛ tsɔ! Ani onaaa akɛ ehe miihia waa ni akɛ nikpamɔ nitsulɔi pii aba ni amɛbabua gbɔmɛi babaoo ni yɔɔ lolo ni abaana amɛ lɛ anaa lo?
Akpei Abɔ Miihere Nɔ Bianɛ
11. (a) Yesu “toi krokomɛi” lɛ miina nikpamɔ lɛ mli gbɛfaŋnɔ babaoo yɛ mɛɛ gbɛ nɔ? (b) Mɛni ji nɔ ni mɛi ayibɔ ni ba 1984 Kaimɔ shishi lɛ tsɔɔ?
11 Yesu gba bɔ ni enikpamɔ nitsumɔ ni ji mɛi ni tamɔ gwantɛŋi lɛ anaabuamɔ lɛ mli baalɛɛ aha lɛ yɛ be mli ni ekɛɛ akɛ: “Ni miyɛ toi krokomɛi ni jɛɛɛ toi atsu nɛɛ mli; ni nomɛi hu, ja miŋɔ amɛ kɛba, ni amɛbanu migbee, ni toi lɛ fee kuu kome kɛ kwɛlɔ kome.” (Yohane 10:14, 16) Amrɔ nɛɛ “toi krokomɛi” nɛɛ ateŋ mɛi ni fe 3,000,000 ni amɛjie amɛhe kpo momo akɛ amɛfata nakai “kuu kome” lɛ he lɛ yɛ. Abaptisi yibɔ nɛɛ ateŋ mɛi 179,421 yɛ 1984 sɔɔmɔ afi lɛ mli! Ni kɛlɛ mɛi ni ba Kaimɔ lɛ yeli shishi ji 7,416,974. Mɛni ji nɔ ni enɛ tsɔɔ? Ákɛ mɛi krokomɛi pii yɛ ni amɛnu Kwɛlɔ lɛ gbee, shi yɛ enɛ loo enɛ hewɔ lɛ amɛnyɛko amɛhere Yesu tsɛmɔ kɛ miishɛɛ akɛ: “Nyiɛmɔ misɛɛ” lɛ nɔ.—Luka 5:27.
12. Mɛɛ sanebimɔi ni he hiaa waa esa akɛ wɔbi wɔhe agbɛnɛ?
12 Nɛgbɛ ji he ni odamɔ yɛ nikpamɔ nitsumɔ ni yaa nɔ yɛ “je nɛŋ naagbee” nɛɛ mli? (Mateo 13:39) Ani akaneɔ bo afataa mɛi babaoo ni yɔɔ miishɛɛ ni amrɔ nɛɛ amɛnaa nikpamɔ nitsumɔ lɛ mli nyamɔ lɛ mli gbɛfaŋnɔ lɛ ahe? Aloo oka he oji mɔ ni kwɛɔ nɔ ni yaa nɔ lɛ, ni yɛ ojwɛŋmɔ mli lɛ oosumɔ ni otsi ohe kɛya sɛɛ koni okakpɛlɛ Tookwɛlɔ Kpakpa lɛ ninefɔɔ: “Nyiɛmɔ misɛɛ” lɛ nɔ yɛ faŋŋ mli? Eka shi faŋŋ akɛ mɔ ko bɛ ni ŋmɛnɛ ebaasumɔ ni ejie enaa tamɔ bɔ ni hii etɛ ni awie amɛhe yɛ Luka yitso 9, ni yɔɔ nikasemɔ ni tsɔ hiɛ lɛ mli lɛ jie amɛnaa lɛ. Susumɔ nɔ ni nakai hii etɛ lɛ laaje lɛ he okwɛ—Maŋtsɛyeli sɔɔmɔ mli miishɛɛ, ni ekolɛ hegbɛ ni amɛaana akɛ amɛaafata he ni afamɔ daimonioi kɛjɛ mɛi ni amɛyɔɔ amɛmli lɛ amli!—Luka 9:57-62; 10:17.
13. Hemɔkɛyeli naa gbɛfaŋnɔ babaoo ni he hiaa yɛ nikpamɔ nitsulɔ ni jɛɔ esuɔmɔ mli etsuɔ nii lɛ mli yɛ mɛɛ gbɛ nɔ?
13 Bɔfo Paulo kɛɛ: “Kɛ hemɔkɛyeli bɛ lɛ, anyɛŋ Nyɔŋmɔ hiɛ asa.” (Hebribii 11:6) Oo, hɛ̃ɛ, ebiɔ hemɔkɛyeli yɛ mɔ fɛɛ mɔ gbɛfaŋ dani ekɛ hesuɔmɔ aŋmɛ afa, ni ejɛ esuɔmɔ mli ejɔɔ ehe nɔ eha Nyɔŋmɔ akɛ nikpamɔ nitsulɔ. Akɛ nɔkwɛmɔ nɔ lɛ, ekolɛ oyɛ hela ko ni gbaa onaa waa; ekolɛ oweku lɛ mlibii lɛ ateŋ mɛi komɛi sumɔɔɔ Yehowa Odasefoi asane kwraa aloo amɛteɔ shi amɛwoɔ amɛ; ekolɛ onuɔ he akɛ óda fe bɔ ni ooonyɛ ofee tsakemɔi ni he hiaa lɛ yɛ oshihilɛ mli; yɛ gbɛ kroko nɔ lɛ, obaanyɛ osusu ohe akɛ mɔ ni nyɛɛɛ adamɔ nɔnyɛɛ ni otipɛŋfoi kɛbaa onɔ yɛ skul lɛ naa. Bɔ fɛɛ bɔ ni shihilɛ ni oyɔɔ mli lɛ ji lɛ, kaaha ohiɛ miikpa nɔ akɛ Yehowa nuɔ onaagbai loo ohaomɔi lɛ ashishi jogbaŋŋ fe mɔ fɛɛ mɔ. Agbɛnɛ efee klalo akɛ eeetsi ebɛŋkɛ bo koni ewo ofai shi ni otswa akɛ ooosɔmɔ lɛ lɛ mli hewalɛ, kɛ bo diɛŋtsɛ lɛ oto gbɛjianɔ ni he hiaa kɛha enɛ feemɔ lɛ.—Lala 103:13, 14.; Yakobo 4:8.
Hemɔkɛyeli Famɔɔ ‘Gɔji’
14. Tsɔɔmɔ nɔ ni Yesu wiemɔi ni yɔɔ Mateo 17:20 lɛ shishinumɔ ji diɛŋtsɛ lɛ mli?
14 Yesu kɛɛ: “Kɛji nyɛyɛ hemɔkɛyeli ni tamɔ sinapi wu lɛ, nyɛaakɛɛ gɔŋ nɛɛ akɛ, ‘Faa yɛ biɛ kɛya jɛi!’ ni eeefa; ni nɔ ko bɛ ni nyɛnyɛŋ nyɛfee.” Enɛ ji nɔ ni mɛi akpei ohai abɔ ni amɛkpɛlɛ tsɛmɔ kɛha nikpalɔi babaoo yɛ 1980 afii lɛ amli lɛ nɔ lɛ ekpa shi amɛna yɛ amɛshihilɛ mli. Amɛ diɛŋtsɛ amɛshihilɛ mli naagbai kɛ haomɔi ni tamɔ gɔji kɛha amɛ yɛ be ko mli lɛ efee nɔ ni amɛtsɔ Yehowa yelikɛbuamɔi anɔ amɛye nɔ kunim. (Mateo 17:20; 19:26) Susumɔ niiashikpamɔi ni nyiɛ sɛɛ nɛɛ lɛ ahe:
15, 16. Tsɔɔmɔ bɔ ni obalanyo ko ni yɔɔ U.S. Amerika lɛ kɛ wu Katoleknyo ko ni yɔɔ Brazil lɛ ye gbɛtsii nii wuji ni tsiɔ amɛbaptisimɔ gbɛ lɛ nɔ kunim lɛ mli.
15 Obalanyo ko yɛ Kalifornia, U.S. Amerika ní hela ko ni mɔ lɛ lɛ eha etsɔ obubuafo kwraa ni enyɛɛɛ nɔ ko efee ni ewekumɛi hu ekpoo lɛ. Kɛkɛ ni Yehowa Odasefonyo ko ni miiya shia kɛ shia na lɛ. Akɛ lɛ je Biblia lɛ kasemɔ shishi. Shi ehiɛ gboɔ nii aahu akɛ kɛ Odasefonyo lɛ ba koni ekɛ lɛ abakase nii lɛ, etsiɔ sɛi ni etaa mli lɛ kɛyaa tsu lɛ koŋ nɔ ni etsɔɔ ehiɛ ehaa gbogbo lɛ koni akana ehiɛ. Ehe obalanyo nɛɛ nyɔji abɔ dani eye enaagbai lɛ ekomɛi anɔ kunim. Enyɛ efee nakai moŋ, ni amrɔ nɛɛ eyɛ miishɛɛ akɛ Odasefonyo ni abaptisi lɛ.
16 Wu kɛ ŋa ko ni yɔɔ Katolek jamɔ lɛ mli yɛ Brazil amii shɛɛɛ amɛjamɔ lɛ he ni yɛ naagbee lɛ amɛje Biblia lɛ kasemɔ shishi kɛ Yehowa Odasefoi. Amɛnu he akɛ amɛnine miishɛ amɛmumɔŋ hiamɔ nii anɔ agbɛnɛ. Shi naagba agbo ko ni tamɔ gɔŋ yɛ: Wu lɛ, Antonio, eshɛre zigarɛt afii 48, kɛjɛ be mli ni eye afii kpawo, ni enɛ eka enɔ! Ebɔ mɔdɛŋ be ko ni eŋmɛɛ su fɔŋ nɛɛ he yɛ afii lɛ amli shi enyɛɛɛ. Shi agbɛnɛ lɛ eji sane kroko kwraa, taakɛ Antonio gba lɛ: “Agbɛnɛ mikase akɛ kɛji akɛ miisumɔ ni masa Nyɔŋmɔ hiɛ ni majɔɔ miwala nɔ akɛ mafee esuɔmɔnaa nii lɛ, esa akɛ makpa shɛremɔ. Yɛ sɔlemɔ babaoo sɛɛ lɛ, minyɛ mifee nakai yɛ naagbee.” Kwɛ miishɛɛ ni ena beni ekɛ nu mli baptisimɔ fee ehe ni ejɔɔ eha Yehowa lɛ he okadi lɛ!—Lala 66:19; Marko 11:24.
17. (a) Mɛɛ efɔŋ hewalɛ ko ni Yesu kɛ ekaselɔi lɛ kɛkpe emli ewa waa fe be fɛɛ ŋmɛnɛ lɛ? (b) Te Yesu kɛ ekaselɔi lɛ tsu daimonioi ni yɔɔ mɛi anɔ yɛ klɛŋklɛŋ afii oha lɛ mli lɛ ahe nii amɛha tɛŋŋ, ni te atsuɔ he nii ahaa tɛŋŋ yɛ ŋmɛnɛ?
17 Daimonioi ni yɔɔ Yudafoi anɔ lɛ he naagba lɛ ji sane ni Yesu kɛ ekaselɔi lɛ kɛkpe yɛ be babaoo mli. Nakai efɔŋ ni naa mɛi anɔ hewalɛ lɛ miitsu nii bianɛ lolo, titri lɛ akɛni ashɛrɛ Satan kɛ edaimonioi asafoi kɛ kɛjɛ ŋwɛi ashwie shikpɔŋ nɛɛ nɔ lɛ hewɔ. (Kpojiemɔ 12:7-9, 12, 17) Nɔ ni kɛ Kristo jamɔ shishijee kpaaa gbee lɛ, Yehowa kɛ naakpɛɛ hewalɛi hako ewebii ni yɔɔ ŋmɛnɛ lɛ koni amɛkɛfamɔ daimonioi. Shi mumɔŋ tawuu nii ni ekɛha Kristofoi lɛ baanyɛ atsu nii akɛ hebuu nɔ̃ ashi daimonioi ahewalɛ, ni abaanyɛ akɛtsu nii akɛ nɔ ni abaanyɛ atsɔ nɔ ni akɛha mɛi krokomɛi aye amɛhe kɛjɛ daimonioi ahewalɛ shishi. (Efesobii 6:10-18) Amaniɛbɔɔ ni jɛ Ghana nɛɛ tsɔɔ akɛ: “Yɛ nyɛmimɛi lɛ afaishitswaa kɛ mɔdɛŋbɔɔ hewɔ lɛ, aaha mɛi pii miiye amɛhe kɛmiijɛ daimonioi lɛ ahewalɛ shishi.” Odasefonyo ko kɛ yoo ko kpe yɛ sɔɔmɔ nitsumɔ lɛ mli, ni beni akɛ lɛ je Biblia lɛ he sanegbaa shishi pɛ kɛkɛ ni “yoo lɛ bɔi yaafó.” Mɛni gbaa enaa? Odasefonyo lɛ bɔ amaniɛ akɛ: ‘Mumɔ loo daimonio ko yɛ emli, ni be fɛɛ be ni esumɔɔ lɛ, ehaa efóɔ, ni shika fɛɛ shika ni ehiɛ laajeɔ.’ Daa Biblia kasemɔ ye bua lɛ ni eye ehe kɛjɛ daimonio nɛɛ naagba lɛ shishi, ni enyɛ ejɔɔ ehe nɔ eha Yehowa.—Yohane 8:32.
18. Mɛɛ niiashikpamɔ tsɔɔ akɛ ŋwɛi bɔfoi miitsu nii waa yɛ shiɛmɔ nitsumɔ lɛ kudɔmɔ mli?
18 Naagbai ni wɔtsi ta yɛ yiteŋgbɛ nɛɛ ekomɛi baanyɛ atsɔ nɔ ko wulu ko yɛ mɔ ko jwɛŋmɔ mli aahu akɛ nɔ ni mɔ lɛ baasusu he nɔŋŋ ji ehe ni eeegbe. Okɛ obalayoo ko ni yɔɔ New Zealand lɛ sane lɛ afee nɔkwɛmɔ nɔ. Odasefonyo ni tee eŋɔɔ klɛŋklɛŋ lɛ yoo akɛ “nɔ ko miigba obalayoo lɛ naa ni ehao waa yɛ henumɔŋ.” Yɛ sɛɛ mli lɛ nɛkɛ gbɔmɔ nɛɛ kpɛlɛ nɔ akɛ “kulɛ ebaagbe ehe shi ekpɛ eyiŋ akɛ ebaasɔle eha Nyɔŋmɔ ni ebi eyelikɛbuamɔ klɛŋklɛŋ da.” Nakai be lɛ mli Odasefonyo lɛ shi eshinaa lɛ, no hewɔ lɛ “eda Nyɔŋmɔ shi diɛŋtsɛ akɛ eha esɔlemɔ lɛ hetoo.” Ani sane ni kɛ ehe kpeɔ kɛkɛ nɛ? Belɛ mɛni hewɔ saji ni tamɔ nakai fɔɔ kaa lɛ? Mɛni Yesu kɛɛ? “Beni gbɔmɔ bi lɛ aaaba yɛ enunyam lɛ mli, ni bɔfoi krɔŋkrɔŋi lɛ fɛɛ aaafata ehe lɛ, . eeegbala [gbɔmɛi] amɛmli, taakɛ bɔ ni tookwɛlɔ gbalaa gwantɛŋi kɛ abotiai amli lɛ.” (Mateo 25:31, 32; kwɛmɔ Kpojiemɔ 14:6 hu.) Ŋwɛibɔfoi lɛ miiye kɛmiibua Yesu yɛ tookwɛmɔ nitsumɔ lɛ mli, ni amɛkudɔɔ Nuŋtsɔ lɛ “hefatalɔi nitsulɔi” lɛ kɛyaa mɛi ni boɔ tsɛɔ Lɛ kɛhaa yelikɛbuamɔ lɛ aŋɔɔ.—1 Korintobii 3:6, 9; kwɛmɔ Bɔfoi lɛ Asaji 8:26-39; 16:9, 10.
19. Mɛɛ shihilɛ ko yɔɔ je lɛŋ fɛɛ ŋmɛnɛ, ni ebiɔ ni ofee mɛni yɛ he?
19 Ŋmɛnɛ, wɔnaa gbɔmɛi akpei abɔ ni naagbai ni Yehowa webii eye nɔ kunim momo lɛ nɔŋŋ etsɔmɔ jatsũi ni tere amɛ, ni he ni mɔ ko yɔɔ lɛ kɔɔɔ he eko. Amɛteŋ mɛi komɛi yɛ ni amɛshinaa tsa onɔ̃ nɔ kpaakpa! Yelikɛbuamɔ he miihia amɛ waa. Yɛ anɔkwale mli lɛ, taakɛ Yesu kɛɛ lɛ: “Nikpamɔ lɛ fa moŋ.” Wɔmiikpa nikpamɔ Nuŋtsɔ lɛ fai bianɛ koni etsu nitsulɔi pii kɛba enikpamɔ lɛ mli yɛ 1986 afi nɛɛ mli. Eba akɛ otsui aaatsirɛ bo koni ohere tsɛmɔ: Nikpamɔ Nitsulɔi Babaoo He Miihia Waa! lɛ nɔ.a
[Shishigbɛ niŋmaa]
a Ajie kɛjɛ December 15, 1985 Watchtower lɛ mli.
Sanebimɔi ni Akɛtiɔ Mli
◻ Namɔ ji nikpamɔ Nuŋtsɔ lɛ?
◻ Mɛɛ nikpamɔi sɔrɔtoi enyɔ etee nɔ?
◻ Mɛni ji nitsumɔi wuji ni Yesu kɛɛ akɛ esɛɛnyiɛlɔi lɛ baatsu lɛ?
◻ Mɛni hewɔ hemɔkɛyeli he hiaa nikpamɔ nitsulɔi fɛɛ lɛ?