Obalaŋtai—Mɛni Nyɛkɛ Nyɛwala Baafee?
“Koni mɛi ni hiɛ kamɔ lɛ ahiɛ akakamɔ miiha amɛ diɛŋtsɛ amɛhe dɔŋŋ, shi moŋ, amɛhiɛ akamɔ aha mɔ ní egbo ni atee lɛ shi ekoŋŋ aha amɛ lɛ.”—2 KORINTOBII 5:15.
1. Mɛɛ shidaa wiemɔi ji nɔ ni gbɔmɛi ewie ni mɛni hewɔ?
‘MIIDAO shi! Mihiɛo nyɔmɔ yɛ miwala hewɔ!’ Gbɔmɛi ni ahere amɛyiwala kɛjɛ shĩai ni miishã mli aloo kɛjɛ faa ni miisha amɛ mli Iɛ ekɛɛ gbɔmɛi ni here amɛyiwala lɛ nɛkɛ. Obalaŋtai Kristofoi ni hiɛ sɔɔ nii ewie wiemɔi ni tamɔ nɛkɛ amɛtsɔɔ amɛfɔlɔi. Jeee wala ni ji gbɔmɔtsoŋ nɔ ni amɛnine shɛ nɔ kɛjɛ amɛfɔlɔi edɛŋ lɛ pɛ kɛkɛ shi moŋ, titri lɛ kwɛmɔ ni suɔmɔ yɔɔ mli kɛ tsɔsemɔ ni ha obalaŋtai nɛɛ bayi gbɛ ni aaaha amɛnine ashɛ ‘shi ni ewo amɛ, ni ji naanɔ wala’ lɛ nɔ lɛ hewɔ.—1 Yohane 2:25.
2. Mɛɛ sane ni eba lɛ hewɔ ni esa akɛ wɔsusu sanebimɔ, Mɛni okɛ owala baafee, lɛ he lɛ?
2 Suɔmɔ ji nɔ ni tsirɛ Yehowa Nyɔŋmɔ ni ha ekɛ naanɔ wala, “anɔkwa wala lɛ” hegbɛ ha wɔteŋ mɔ fɛɛ mɔ. “Esumɔ wɔ ni etsu e-Bi lɛ akɛ ebafee wɔhe eshai lɛ ahekpatamɔ nɔ.” (1 Timoteo 6:19; 1 Yohane 4:10) Agbɛnɛ susumɔ suɔmɔ ni e-Bi Yesu jie lɛ kpo akɛni egbo gbele ni piŋmɔ babaoo yɔɔ mli eha wɔ koni wɔnine ashɛ naanɔ wala nɔ lɛ he okwɛ! (Yohane 15:13) Yɛ enɛɛmɛi ahewɔ lɛ, mɛni ji nɔ ni okɛ owala baafee?
3. Yɛ be babaoo mli lɛ, mɛni tsɔɔ nɔ ni gbɔmɛi kɛ amɛwala be tsuɔ?
3 Nikaselɔi eŋaawolɔi ni yɔɔ skul aloo mɛi krokomɛi ni yɔɔ amɛwɔsɛɛ be he miishɛɛ lɛ biɔ obalaŋtai nɛkɛ saji nɛɛ, yɛ gbɛ kome aloo ekroko nɔ yɛ bei babaoo mli. Mɛni baatsɔɔ hetoo ni obaaha? Ani nɔ ni bo diɛŋtsɛ lɛ osumɔɔ ji nɔ ni baatsɔɔ enɛ? Ani nɔ ni baatsɔɔ enɛ lɛ ji ŋaawoo ni mɛi ni sumɔɔ ni oyɛ hiɛ ni ona gbɛhe kpakpa yɛ je lɛŋ nitsumɔi amli lɛ kɛbaaha? Aloo nɔ ni okɛ owala feɔ Iɛ baadamɔ nibii ni kwɔlɔ lɛ ahesusumɔ nɔ? Sane ni jɛ mumɔŋ ni kaiɔ wɔ Iɛ kɛɔ akɛ: “Ni egbo mɛi fɛɛ yigbele, koni mɛi ni hiɛ kamɔ lɛ ahiɛ akakamɔ miiha amɛ diɛŋtsɛ amɛhe dɔŋŋ, shi moŋ amɛ́hiɛ akamɔ aha mɔ ni gbo ni atee lɛ shi ekoŋŋ aha amɛ lɛ.” (2 Korintobii 5:15) Hɛɛ, kwɛ bɔ ni ehi jogbaŋŋ ha akɛ bɔ ni wɔhiɔ shi wɔhaa lɛ tsɔɔ shidaa ni wɔyɔɔ kɛha nɔ ni Yesu Kristo kɛ eŋwɛi Tsɛ lɛ efee kɛha wɔ lɛ!
Mɛi Ni Ehe Gbɛi Ni Akaseɔ Amɛ
4. Namɛi ji mɛi ni ehe gbɛi ni akaseɔ amɛ waa ŋmɛnɛ?
4 Ni kɛlɛ, namɛi ji mɛi ni ale amɛ ni amɛhe gbɛi waa ŋmɛnɛ, mɛi ni obalaŋtai fɔɔ amɛkasemɔ akɛ nɔkwɛmɔ nii lɛ? Ani jeee niiatsɛmɛi kɛ mɛi ni he gbɛi yɛ je lɛ mli lɛ, ni bɔ ni amɛjeŋba ji lɛ kɔɔɔ he eko lɛ? Kɛ okwɛ obalaŋtai pii atsũi amli ŋmɛnɛ lɛ, namɛi ahe mfonirii onaa ni tsotsoro gbogboi ahe lɛ? Yɛ bei babaoo mli lɛ lalafolɔi, sini mli gbɔmɛi, kɛ foidalɔi. Obalaŋtai fɔɔ lamɔ akɛ gbi ko baashɛ ni amɛ hu amɛbaaye omanye loo amɛbaahe gbɛi yɛ je lɛŋ ekolɛ amɛkɛ mɔ ko ni hiɛ gbɔmɔtsoŋ sui loo nikee nii ni tamɔ nɛkɛ baabote gbalashihilɛ mli. Shi bo hu? Mɛni otaoɔ yɛ shihilɛ mli?
5, 6. (a) Mɛni hewɔ abaanyɛ akɛɛ akɛ omanye ni ayeɔ yɛ je lɛŋ lɛ nyɛɛɛ ekɛ tsui ni nyɔɔ mɔ mli diɛntsɛ aba lɛ? (b) Mɛni ji tsui ni nyɔɔ mɔ mli diɛŋtsɛ lɛ?
5 Kɛji akɛ oye omanye yɛ je lɛŋ akɛ mɔ ni ehe gbɛi ni ale waa lɛ ani no baaha ona miishɛɛ ni otsui anyɔ omli diɛŋtsɛ? Hollywood sini mli gbɔmɛi ni amɛye omanye fe fɛɛ lɛ ateŋ mɔ kome ni ji yoo lɛ kɛɛ: “Mikɛ ninamɔ kɛ heloo gbɛfaŋ nibii fɛɛ eko esa minaa. Amɛjeee nɔ ko nɔ ko. Jwɛŋmɔŋ hela he nilelɔi nyiɛ kpaakpoi ni wɔsereɔ yɛ mli lɛ he yɛ be fɛɛ mli yɛ biɛ kɛ emli gbalamlitsemɔ kɛ gbekɛbii ni nyɛ̃ɔ amɛfɔlɔi.”—Jajelɔ 5:10; 1 Timoteo 6:10.
6 Nikaselɔ foidalɔ ko ni ekaaa, mɔ ni ye omanye yɛ 1981 yei afoidamɔ ko ni ji shitoi 6.2 mli omanye yɛ New York lɛ bafee mɔ ni hiɛnɔkamɔ efee yaka aahu akɛ ebɔ mɔdɛŋ ni egbe ehe. Eŋma yɛ sɛɛ mli akɛ: “Mikase anɔkwalei pii ni kɔɔ shihilɛ he yɛ nyɔji fioo ni eho lɛ mli. Ekome ji akɛ tsui ni nyɔɔ mɔ mli diɛŋtsɛ lɛ baaa kɛtsɔɔɔ gbɛi ni gbɔmɛi pii bɔɔ mɔdɛŋ ni amɛtsɔ nɔ amɛna emuuyeli kɛ kunimyeli lɛ anɔ. Tsui ni nyɔɔ mɔ mli kɛhami lɛ baaa kɛtsɔɔɔ nikaselɔ ni bɔɔ mɔdɛŋ waa, maŋ foidalɔ ni yeɔ omanye aloo gbɔmɔtso ni yɔɔ fɛo ni miyɔɔ lɛ nɔ.” Hɛɛ, esa akɛ gbɔmɛi akase ni amɛle akɛ tsui ni nyɔɔ mɔ mli diɛŋtsɛ baa kɛtsɔɔ jeŋba kpakpa ni aaaka mɔ kɛ Nyɔŋmɔ, mɔ ni baanyɛ ekɛ anɔkwale toiŋjɔlɛ kɛ miishɛɛ aha mɔ lɛ teŋ lɛ nɔ.—Lala 23:1, 6; 16:11.
7. Ani kɔlegi nikasemɔ kɛ omanye ni aaaye yɛ je lɛŋ lɛ he hiaa dani gbɔmɔ tsui anyɔ emli yɛ anɔkwale mli?
7 Eka shi faŋŋ akɛ, osumɔŋ ni okase mɛi ni bɔɔ mɔdɛŋ kɛkɛ ni ale amɛ ni amɛna nii babaoo lɛ. Jeŋ niŋmalɔi po eyoo bɔ ni omanye ni ayeɔ yɛ je lɛŋ lɛ nyɛɛɛ eha mɔ ana tsui ni nyɔɔ mɔ mli diɛŋtsɛ lɛ. Niŋmalɔ Bill Reel ŋma akɛ: “Ogbeɔ kɔlegi tsɔsemɔ naa kɛ lamɔi kɛha wɔsɛɛ be. Nɔ ni yɔɔ mɔbɔ ji akɛ nɔ ni oshweɔ lɛ babaoo lɛ baatsɔ lamlu. Misumɔɔɔ ni maje nyɛnijiaŋ wui, shi ehe miihia hu ni nyɛle anɔkwale lɛ: Kɛ onine shɛ heloo gbɛfaŋ nibii ni ohiɛ kɔ̃ɔ nɔ lɛ anɔ lɛ, kɛ onine shɛ nɔ, ni oye omanye yɛ nɔ ni otaoɔ lɛ mli lɛ, kɛ onine shɛ nɔ diɛŋtsɛ lɛ, amɛhaŋ otɔ. Shi yɛ be lɛ nɔŋŋ mli ni oookpa gbɛ akɛ oooye kunimyeli mli ŋɔɔmɔ lɛ, obaanu he akɛ ofee shwɛm moŋ fe ni oootɔ kɛ nibii, ooonu nɔnyɛɛ moŋ he fe ni aaawo onɔ, haomɔ fe ni ooona toiŋjɔlɛ.”—New York Delila News, May 26, 1983.
8. Mɛɛ yiŋtoo titri ko yɔɔ ni no hewɔ ni esaaa akɛ adiɔ je lɛŋ nitsumɔi esɛɛ lɛ?
8 Shi kɛha wɔteŋ mɛi ni wɔhiɛ yɔɔ wɔhe nɔ ni wɔle nɔ ni je lɛŋ saji tsɔɔ yɛ Biblia gbalɛ naa lɛ, wɔyɛ yiŋtoo ko ni mli wa ni no haaa ni wɔkɛ je lɛŋ nitsumɔ ko aye klɛŋklɛŋ gbɛhe yɛ wɔshihilɛ mli lɛ. (Mateo 24:3-14) Wɔbaanyɛ ni wɔkɛ wɔhe ato mɔ ko ni naa Okadi ko ni aŋma yɛ tsu ko hiɛ ni kaneɔ nɛkɛ lɛ he: “Nɛkɛ Nitsumɔ He Nɛɛ Miifɔɔ Nitsumɔ.” Ani obaaya ni oyatao nitsumɔ yɛ jɛmɛ? Dabida! Ni kɛji akɛ otsuɔ nii yɛ nɛkɛ nitsumɔ he nɛɛ lɛ, okɛ nilee baatsu nii ni otao nitsumɔ yɛ he kroko. Ojogbaŋŋ, Okadi lɛ yɛ faŋŋ yɛ he fɛɛ he yɛ je nɛɛ nitsumɔ hei fɛɛ kɛ gbɛjianɔtoi ahe: “Aafɔɔ Nitsumɔ—Naagbee lɛ Ebɛŋkɛ!” Hɛɛ, Biblia lɛ maa nɔ mi kɛhaa wɔ akɛ, “Je lɛ miiho aya.” (1 Yohane 2:17) No hewɔ lɛ wɔkɛ nilee ekaseŋ mɛi ni ehe gbɛi ni kɛ amɛhe ewo je lɛŋ vii lɛ.
Nɔ Ŋaawoo Ni Esa Ni Wɔnyiɛ Sɛɛ
9. Mɛɛ je lɛŋ ŋaawoo komɛi mɛi ni susuɔ akɛ amɛmiitao nɔ ni hi fe fɛɛ amɛha bo lɛ kɛbaahao?
9 Jeee akɛ mɛi ni obuɔ amɛ waa lɛ pɛ ji mɛi ni kudɔɔ oshihilɛi, shi yɛ be babaoo mli lɛ, owekumɛi kɛ nanemɛi, ni taakɛ amɛkɛɔ lɛ, ‘amɛmiitao nɔ ni fe fɛɛ amɛha bo.’ Amɛbaakɛɛ akɛ, ‘esa ni ona nɔ ni obaaye.’ No hewɔ lɛ amɛbaawo bo ŋaa koni oya kɔlegi loo univɛsiti oyakase nii koni osaa ohe kɛha nitsumɔ ni awoɔ nyɔmɔ babaoo yɛ mli. Amɛbaanyɛ amɛkɛɛ akɛ, ‘Biblia mli niŋmalɔ ni ji Luka lɛ datrɛfonyo ni, ni bɔfo Paulo hu kase Mla yɛ mla tsɔɔlɔ Gamaliel shishi.’ (Kolosebii 4:14; Bɔfoi lɛ Asaji 5: 35; 22:3) Ni kɛlɛ, esa akɛ opɛi nɛkɛ ŋaawoi nɛɛ amli jogbaŋŋ.
10. Mɛɛ ŋaawoo Luka kɛ Paulo kɛha, ni mɛni abaanyɛ akɛɛ yɛ amɛnitsumɔ dani amɛbatsɔmɔ Kristofoi lɛ he?
10 Datrɛfonyo Luka wooo Kristofoi ahewalɛ ni amɛnyiɛ etsutsu nitsumɔ lɛ sɛɛ ni amɛbatsɔmɔ datrɛfoi; shi moŋ, Luka kɛ Yesu kɛ bɔfoi lɛ ashihilɛ mamɔ mɛi ahiɛ akɛ amɛkase. Eka shi faŋŋ akɛ Luka ji datrɛfonyo jeeŋmɔ dani ekase Kristo he nii shi yɛ sɛɛ mli lɛ ekɛ e-Kristofoi asɔɔmɔ nitsumɔ lɛ bafee klɛŋklɛŋ nii yɛ eshihilɛ mli. Shihilɛ lɛ yɛ nakai nɔŋŋ yɛ Paulo gbɛfaŋ Ni eeewo mɛi krokomɛi ahewalɛ ni amɛkase lɛ taakɛ bɔ ni ekase Gamaliel lɛ, Paulo wo ŋaa akɛ: “Nyɛkasea, mi, taakɛ bɔ ni mihu mikaseɔ Kristo lɛ.” Bɔ ni Paulo buɔ Kristo, ni ele akɛ enɔ kwɔ sɔŋŋ ha hewɔ lɛ ekɛɛ akɛ, kɛ́ ekɛaato he lɛ, ebuɔ etsutsu nibii asɛɛdii lɛ akɛ “tumu nɔ nii.”—1 Korintobii 11:1; Filipibii 3:8.
11. (a) Mɛni Petro kɛɛ Yesu, ni mɛni hewɔ? (b) Te Yesu ha hetoo eha tɛŋŋ?
11 Kaimɔ akɛ, henumɔ baaha mɛi ni sumɔɔ bo lɛ awo bo ŋaa fɔŋ. Akɛ nɔkwɛmɔ nɔ lɛ, beni Yesu wie nɔ ni mɛɔ lɛ yɛ e-Yerusalem sɔɔmɔ lɛ naagbee lɛ he lɛ, bɔfo Petro kɛɛ lɛ akɛ: “Naa ohe mɔbɔ Nuŋtsɔ, enɛ akagbaleo fɔɔŋfɔ!” Petro sumɔɔ Yesu ni esumɔɔɔ ni ena amanehulu. Shi Yesu kã Petro hiɛ ejaakɛ E-yoo akɛ Nyɔŋmɔ suɔmɔnaa nii ni eeeha aba mli lɛ kɔɔ piŋmɔ ni eeepiŋ kɛ ehenyɛlɔi ni aaagbe lɛ lɛ fɛɛ he.—Mateo 16:21-23.
12. Mɛɛ ŋaawoo gbɔmɛi ni hiɛ jwɛŋmɔ kpakpa lɛ baanyɛ amɛkɛha obalaŋtai, ni mɛni hewɔ?
12 Nakai nɔŋŋ hu fɔlɔi loo nanemɛi komɛi baaje onijiaŋ wui ni okɛ ohe akawo shihilɛ gbɛ ko ni haa okɛ ohe shaa afɔle mli. Yɛ henumɔ ni akɛwoɔ ŋaa fɔŋ nɛɛ hewɔ lɛ, amɛbaashashao shi akɛ amɛaawo bo hewalɛ ni okɛ ohe awo sɔɔmɔ lɛ mli akɛ be fɛɛ gbɛgbalɔ, koni osɔmɔ akɛ maŋsɛɛ sanekpakpashiɛlɔ, aloo okɛ ohe aha nitsumɔ ko yɛ be kukuo mli yɛ Yehowa Odasefoi anitsumɔ he nine lɛ. Amɛbaakɛɛ akɛ: ‘Mɛni hewɔ oboteee gbalashihilɛ mli ni Obɛŋkɛ wɔ moŋ?’ Aloo, ‘Ole akɛ Betel nitsumɔ wa. Ekolɛ ebaahi moŋ akɛ okɛwɔ aaahi shi.’ Yɛ gbɛ kroko nɔ lɛ, taakɛ Petro wie he lɛ, “Naa ohe mɔbɔ.”
13. (a) Mɛɛ jwɛŋmɔ ni ajaje lɛ Petro kɛha?(b) Mɛni yɔɔ anɔkwale Kristofonyo ni mɔ ko aaaji lɛ mli?
13 Yɛ bei komɛi amli po lɛ ehe bahiaa ni Yehowa tsuji ajaje amɛsusumɔi loo jwɛŋmɔi. Ehe bahia ni Petro afee nakai, ni eŋma kɛ jwɛŋmɔ ni ajaje akɛ: “Ejaakɛ enɛ nɔŋŋ hewɔ atsɛnyɛ, ejaakɛ Kristo hu na amanehulu ehanyɛ ni ekɛto Okadi efɔ shi ehanyɛ, koni nyɛnyiɛ enanemaa hei lɛ asɛɛ.” (1 Petro 2:21) Ní aaahi shi akɛ anɔkwale Kristofonyo Jɛ biɔ he ni akɛshaa afɔle, hɛɛ, nɔnaa po. Ejeee gbɛ ni yɔɔ mlɛo, eji nɔ ni atsɛ wɔ akɛ Kristofoi Ni wɔɔkpɛlɛ nɔ lɛ tsɔɔ akɛ ‘wɔhiii shi wɔhaaa wɔ diɛŋtsɛ wɔhe dɔŋŋ, shi moŋ wɔbaahi shi wɔha mɔ ni gbo kɛha wɔ lɛ. (2 Korintobii 5: 15) Kɛ wɔkɛ mɛi ni fee nɔkwɛmɔ nɔ kpakpa lɛ to wɔhiɛ lɛ eeeye ebua wɔ ni wɔkɛ wɔwala atsu nii yɛ afɔleshaa gbɛ nɔ.
Nɔkwɛmɔ Nii Ni Wɔkɛaamamɔ Wɔhiɛ
14. Mɛɛ nɔkwɛmɔ nɔ Yesu kɛha?
14 Nɔkwɛmɔ nɔ ni he hiaa titri ni ekɛma ohiɛ ji nɔ ni Yesu kɛfɔ shi lɛ. Akɛ gbɔmɔ ni yeɔ emuu lɛ, ebaanyɛ efee foidalɔ, lalafolɔ, datrɛfonyo, aloo mlalelɔ ni fe fɛɛ eko ni je lɛ kɛkpe pɛŋ. Shi egbala ejwɛŋmɔ kɛtee e-ŋwɛi Tsɛ lɛ ni eeesa ehiɛ lɛ nɔ, yɛ be mli ni eji gbekɛ lɛ po. (Luka 2:42-49) Yɛ sɛɛ mli lɛ ekɛɛ: “Esa akɛ miyajajeɔ maŋtsɛyeli lɛ he sanekpakpa lɛ miitsɔɔ maji krokomɛi hu, ejaakɛ no hewɔ atsu mi.” (Luka 4:43) Wolo ko ni aŋmaa yɛ sɔlemɔ ko wolo tɛtɛrɛɛ ni atsɛɔ lɛ Ministry lɛ mli yɛ nyɛsɛɛ latsa be mli lɛ tsɔɔ mli akɛ: “Wɔ Yiwalaherelɔ lɛ miisumɔ ni etsi ehe kɛjɛ asafo babaoo he, akɛni E-tee shia kɛ shia—eetao susumai. Nɔ ni E-sumɔɔ ji susuma kome ni ekɛaakpe. ‘Kɛkɛ lɛ E- fɔse anɔkwale lɛ eshwie enɔ—Nyɔŋmɔ suɔmɔ lɛ.”—Luka 10:1-16.
15. (a) Mɛni hewɔ shia kɛ shia sɔɔmɔ lɛ ji nitsumɔ ko ni kaa mɔ lɛ? (b) Mɛni tsɔɔ akɛ sɛɛnamɔi babaoo yɛ obalaŋtai ashia kɛ shia sɔɔmɔ lɛ
15 Ŋɔɔ lɛ akɛ eji anɔkwale akɛ shia kɛ shia shiɛmɔ bɛ mlɛo. Ebiɔ nikasemɔ ni mli wa koni anu Maŋtsɛyeli lɛ he sanekpakpa lɛ shishi kɛ nitsumɔ babaoo koni akɛsaa shiɛmɔ wiemɔ ni shishinumɔ yɔɔ mli. Agbɛnɛ hu, nɛkɛ sɔɔmɔ nɛɛ biɔ ekãa, ejaakɛ shiatsɛmɛi babaoo bɛ wiemɔ lɛ he miishɛɛ, ni mɛi komɛi po amli woɔ la amɛwoɔ wɔ. Ni kɛlɛ, shia kɛ shia sɔɔmɔ lɛ ni nyɛ obalaŋtai lɛ nyɛkɛ nyɛhe woɔ mli lɛ miiye omanye babaoo yɛ naakpɛɛ gbɛ nɔ, taakɛ Italia sɔlemɔ ko wolo tɛtrɛɛ ni ji La Voce lɛ kadi lɛ. Niŋmalɔ lɛ kɛɛ: “Mi diɛŋtsɛ lɛ, misumɔɔ Yehowa Odasefoi asane,” ni etsɔɔ mli akɛ, “amɛbaa amɛbasaraa bo yɛ shia.” Ewie akɛ: “Mɛi ni mile lɛ baa amɛjeŋ fɛfɛo ni tɔmɔ ko bɛ amɛhe, amɛwieɔ blɛoo; amɛhe yɛ fɛo ni amɛteŋ mɛi pii ji obalaŋtai. Kɛ aajie hefɛo kɛ obalaŋtaiaŋ kpo aaatsɔ lɛ, etsɔɔ mɔ yiŋ yɛ be babaoo mli.”
16. (a) Mɛɛ nitsumɔ ji nɔ ni esa akɛ ajie obalaŋtai ayi yɛ mli? (b) Kɛ akɛ Yehowa Odasefoi agbɛjianɔtoo lɛ to sɔlemɔi lɛ ahe yɛ nitsumɔ ni he hiaa fe fɛɛ eko yɛ shikpɔŋ nɛɛ nɔ ŋmɛnɛ lɛ he lɛ, mɛni anaa?
16 Yɛ anɔkwale mli lɛ, nyɛ obalaŋtai lɛ ni nyɛkpɛlɛɔ Kristo nɔ akɛ nyɛnɔkwɛmɔ nɔ lɛ sa yijiemɔ! Obalaŋtai fe 12,000 ni yeko afii 25 yɛ gbɛgbamɔ nitsumɔ lɛ mli yɛ U.S. Amerika pɛ, ni akpei nyɔŋmai abɔ kɛ amɛhe ewo gbɛgbamɔ sɔɔmɔ lɛ mli yɛ hei krokomɛi (Lala 110:3) Na nɔmimaa akɛ nitsumɔ ko kwraa bɛ ni oootsu ni he hiaa babaoo tamɔ enɛ! Niŋmalɔ ni atsi eta yɛ sɔlemɔ ko wolo tɛtrɛɛ lɛ mli lɛ po kɛɛ akɛ: “Nyɔŋmɔ kɛɛ nitsumɔ ni he hiaa fe fɛɛ lɛ ji shia kɛ shia saramɔ—susumai ataomɔ,” ni etee nɔ akɛ, “Mɛni okɛɔ yɛ enɛ he? Shii enyiɛ bo okɛmi fɛɛ yaa wɔyasaraa mɛi? Minako ni atsi nitsumɔ nɛɛ ta yɛ SƆƆMƆ lɛ mli pɛŋ.” Ani wɔdaaa shi akɛ wɔkɛ wɔhe ebɔ gbɛjianɔtoo ko ni maa bɔ ni ehe hiaa akɛ wɔɔkase Yesu nɔkwɛmɔ nɔ yɛ shiɛmɔ mli lɛ nɔ mi lɛ he?
17. Mɛni ji nɔ ni Timoteo atsu yɛ be mli ni eka he eji obalanyo fioo lolo, ni mɛni tsɔɔ akɛ ebaanyɛ etse mɔ ni edako lolo yɛ nakai be lɛ mli?
17 Akɛni nɔ ni okɛ owala baatsu lɛ damɔ hewalɛ ni mɛi ni ohiɛ sɔɔ amɛ lɛ naa yɛ onɔ lɛ nɔ titri hewɔ lɛ, na hiɛsɔɔ hu oha nɔkwɛmɔ nɔ ni obalanyo fioo Timoteo kɛfɔ shi lɛ. Afɔ lɛ etsɛɛɛ ni Yesu gbo, ni akɛ obalanyo fioo lɛ, Timoteo shi eweku lɛ ni ekɛ ehe yabɔ bɔfo Paulo he yɛ emaŋsɛɛ sanekpakpashiɛmɔ gbɛfaa ni ji enyɔ lɛ mli. Nyɔji fioo ko sɛɛ Iɛ, asafo yuu ko ni kɛ gidigidi feɔ amɛ nii ye Paulo kɛ Sila nɔ ni amɛjo foi kɛjɛ Tesalonika, shi dani amɛaafee nakai lɛ, no mli lɛ amɛna kaselɔi komɛi yɛ jɛmɛ. (Bɔfoi lɛ Asaji 16:1-3; 17:1-10, 13-15) Etsɛɛɛ ni Paulo tsɛ Timoteo kɛtee nakai shikpɔŋkuku ni yɔɔ gbeyei lɛ mli koni eyashɛje nɛkɛ kaselɔi nɛɛ amii yɛ amɛmanehului amli. (1 Tesalonikabii 1:1-3) Eeenyɛ efee akɛ no mli lɛ, Timoteo ena kɛjɛ afii nyɔŋma kɛ enumɔ kɛmiiya, ejaakɛ no sɛɛ aaafee afii 12 kɛmiiya 14 lɛ, Paulo tee nɔ ewie ehe lolo akɛ “obalanyo.” (1 Timoteo 4:12) Ani ohiɛ esɔɔɔ obalanyo ni yɔɔ ekaa ni kɛ ehe shaa afɔle ni tamɔ nɛkɛ?
18. Mɛni hewɔ Paulo baatsu Timoteo kɛya Korintobii lɛ aŋɔɔ lɛ?
18 Timoteo nitsumɔ akɛ eyawo nyɛmimɛi ni yɔɔ Tesalonika lɛ hewalɛ lɛ sɛɛ afii enumɔ lɛ, Paulo ŋma wolo eha Korintobii lɛ kɛjɛ Efeso akɛ: “Nyɛkasea mi. No hewɔ ni miitsu Timoteo . . . lɛ nyɛŋɔɔ, ni ebakai nyɛ migbɛ́i ni yɔɔ Kristo mli Iɛ, bɔ ni miitsɔɔ yɛ asafo fɛɛ asafo mli, yɛ he fɛɛ he lɛ.” (1 Korintobii 4: 16, 17) Obalanyo Timoteo, ni kɛ Paulo etsu nii fe afii enumɔ lɛ le gbɛ̀i ni Paulo tsɔɔ nɔ etsuɔ nii lɛ jogbaŋŋ. Ele gbɛ ni Paulo tsɔ nɔ ekɛ sane lɛ ha Efesobii lɛ, kɛ gbɛ ni etsɔ nɔ etsɔɔ amɛ nii “yɛ faŋŋ yɛ shia kɛ shia.” (Bɔfoi lɛ Asaji 20:20, 21) Akɛni atsɔse lɛ jogbaŋŋ yɛ nɛkɛ shiɛmɔ gbɛi nɛɛ anɔ hewɔ lɛ, mɛɛ yelikɛbualɔ kpakpa po Timoteo baanyɛ afee aha asafoi lɛ nɛkɛ!
19. Mɛni ji nɔ ni Paulo wie yɛ Timoteo he yɛ be mli ni amɛsɔmɔ fe afii nyɔŋma yɛ ekomefeemɔ mli lɛ sɛɛ?
19 Afii enumɔ aloo ekpaa kroko, ni awo Paulo tsuŋ yɛ Roma. Timoteo, ni lɛ diɛŋtsɛ lɛ nyɛsɛɛ nɛɛ nɔŋŋ ajie lɛ kɛjɛ tsuŋwoo lɛ ekome mli lɛ kɛ lɛ yɛ. (Hebribii 13:23) Kwɛmɔ bɔ ni shihilɛ baatamɔ: Ekolɛ ekɛ Timoteo miitsu nii akɛ woloŋmalɔ, Paulo miiha eŋma wolo ko ekɛyaha Filipibii lɛ. Eje gbɛ ebɔi wiemɔ, ni Paulo tee nɔ akɛ: “Mihiɛ ka yɛ Nuŋtsɔ Yesu mli, akɛ etsɛŋ ni matsu Timoteo nyɛŋɔɔ . . . Ejaakɛ mibɛ mɔ ko ni ejwɛŋmɔ kɛ mijwɛŋmɔ yeɔ egbɔ ni nyɛhe sane dɔɔ lɛ krɔŋŋ tamɔ lɛ . . . Shi nyɛle etɛ naa akɛ ekɛmi sɔmɔɔ yɛ sanekpakpa lɛ hewɔ tamɔ bi kɛ etsɛ.” Filipibii 1:1; 2:19-22.
20. Mɛni haa Timoteo bafeɔ nɔkwɛmɔ nɔ kpakpa ni sa kasemɔ kɛha obalaŋtai lɛ?
20 Yɛ anɔkwale mli lɛ obalanyo Timoteo ji nɔkwɛmɔ nɔ kpakpa ni hiɛ sɔɔ lɛ! Eji Paulo hefatalɔ enɔkwafo ni enyɛɔ ekɛ ehe fɔɔ enɔ, ekɛ ehe kpɛtɛɔ ehe yɛ be mli ni nibii amli wa kɛ be mli ni nibii amli waaa, eyeɔ ebuaa lɛ yɛ shiɛmɔ nitsumɔ lɛ mli, ni ejɛɔ esuɔmɔ mli ekɛ ehe haa akɛ eeesɔmɔ yɛ he fɛɛ he ni aaatsu lɛ. Ekɛ eshihilɛ kpakpa yɛ shia sha afɔle, ni kɛlɛ, mɛɛ tsui ni nyɔɔ mɔ mli eshihilɛ yɛ Nyɔŋmɔ sɔɔmɔ mli lɛ kɛbaha lɛ nɛkɛ! Yɛ anɔkwale mli lɛ Timoteo ‘ehiii shi kɛhaaa lɛ diɛŋtsɛ ehe dɔŋŋ, shi moŋ, ehi shi kɛha Kristo ni gbo kɛha Iɛ lɛ.’ (2 Korintobii 5:15) Ani enɛ kanyaaa bo ni okase enɔkwɛmɔ nɔ lɛ?
Hii Shi Oha Nyɔŋmɔ Jeŋ Hee
21. Mɛni hewɔ wɔbaanyɛ wɔkɛɛ akɛ Timoteo ji mɔ ko ni jwɛŋmɔ yɔɔ mumɔŋ nibii anɔ?
21 Enɛ tsɔɔ akɛ Timoteo miihi shi aha Nyɔŋmɔ jeŋ hee lɛ. Esusuuu nɔ ni yɔɔ biɛ amrɔmrɔ nɛɛ he shi moŋ ewala ni ekɛaasɔmɔ ni ekɛna naanɔ sɛɛnamɔi (Mateo 6:19-21) Akɛni Timoteo tsɛ lɛ ji Helanyo ni eka shi faŋŋ akɛ ejeee heyelilɔ hewɔ lɛ, ebaanyɛ ewo Timoteo hewalɛ ni etiu nilee ni yaa hiɛ kɛ je lɛŋ nitsumɔ ko sɛɛ. Shi yɛ tsɔsemɔ ni Nyɔŋmɔ gbeyeishemɔ yɔɔ mli ni ena kɛjɛ enyɛ kɛ enaa ŋɔɔ hewɔ lɛ, Timoteo shihilɛ bafee nɔ ni ebɔle Kristofoi asafo lɛ nɔ̃. Edi mumɔŋ nibii asɛɛ, eka shi faŋŋ akɛ ehi shi akɛ oshijafonyo kɛ hoo lɛ yɛ be kpalaŋŋ mli, ni ebafee mɔ ni he esa akɛ ekɛ bɔfo Paulo aaasɔmɔ.—2 Timoteo 1:5.
22. Yɛ mɛɛ gbɛ nɔ School Wolo bibioo lɛ maa shihilɛ gbɛ ko ni tamɔ Timoteo nɔ̃ lɛ nɔ mi kɛhaa obalaŋtai ŋmɛnɛ?
22 Shi bo hu? Ani okɛ Obalahiiaŋ aloo obalayeiaŋ baatsu nii tamɔ bɔ ni Timoteo fee lɛ? Wolo bibioo ni atsɛɔ lɛ School and Jehovah’s Witnesses lɛ wie shihilɛ gbɛ ni tamɔ nɛkɛ he yɛ be mli ni etsɔɔ mli nɛkɛ yɛ obalaŋtai Odasefoi ahe lɛ akɛ: “Oti ni ma amɛhiɛ yɛ shihilɛ mli ji ni amɛsɔmɔ jogbaŋŋ akɛ Nyɔŋmɔ sɔɔlɔi, ni amɛhiɛ sɔɔ akɛ skul nikasemɔ yeɔ ebuaa amɛ ni amɛnyɛɔ amɛfeɔ nakai. No hewɔ lɛ, amɛhalaa nikasemɔi ni sɛɛnamɔ yɔɔ he ni baaye abuɔ amɛ ni amɛnyɛ amɛhi shi yɛ ŋmɛnɛŋmɛnɛ je nɛɛ mli lɛ. No hewɔ lɛ amɛteŋ mɛi pii halaa ŋaa nitsumɔi aloo amɛyaa skul ni atsɔɔ ŋaa nitsumɔi yɛ mli. Kɛ amɛshi skul lɛ, amɛsumɔɔ ni amɛna nitsumɔ ni baaha amɛna be ni amɛkɛjwɛŋ amɛnitsumɔ titiri ni ji Kristofoi asɔɔmɔ lɛ nɔ.”
23. Mɛni hewɔ esaaa akɛ ewaa kɛhaa obalaŋtai ni ji Kristofoi akɛ amɛaaha sanebimɔ ni ji, Mɛni mikɛ miwala baafee, lɛ hetoo lɛ?
23 Kɛha nyɛ mɛi ni nyɛhiɛ sɔɔ nɔ ni Yehowa kɛ Ebi lɛ efee kɛha nyɛ lɛ, esaaa akɛ ewaa kɛhaa nyɛ akɛ nyɛaaha sanebimɔ, mɛni mikɛ miwala baafee? lɛ hetoo. Ní nyɛaahi shi nyɛha nyɛ diɛŋtsɛ nyɛhe ni nyɛdi miishɛɛnamɔ sɛɛ lɛ, nyɛkɛ nyɛshihilɛ baatsu nii ni nyɛkɛfee Nyɔŋmɔ suɔmɔnaa nii. Nyɛbaahi shi, tamɔ Timoteo hi shi lɛ, akɛ mumɔŋ gbɔmɔ.
[Shishigbɛ niŋmai]
Ajie kɛjɛ August 15, 1987 Watchtower lɛ mli.
Sanebimɔi Ní Akɛtiɔ Mi
◻ Mɛni hewɔ esaaa akɛ anɔkwale Kristofoi kɛ je lɛŋ nitsumɔ yeɔ klɛŋklɛŋ gbɛhe yɛ amɛshihilɛ mli?
◻ Mɛɛ ŋaawoo fɔŋ mɛi komɛi kɛha, ni kɛlɛ mɛni wɔbaanyɛ wɔkase kɛjɛ hetoo ni Yaa kɛho Petro Iɛ mli?
◻ Yesu kɛ Timoteo fee nɔkwɛmɔ nii kpakpai amɛha obalatai yɛ mɛɛ gbɛi anɔ?
◻ Mumɔŋ nibii ni mɔ ko jwɛŋmɔ yɔɔ nɔ Iɛ tsɔɔ mɛni?
[Mfoniri ni yɔɔ baafa 22]
Eyɛ mli okɛ Luka ji datrɛfonyo moŋ, shi ekɛ Kristofoi anitsumɔ ye klɛŋklɛŋ gbɛhe yɛ eshihilɛ mli