Omanye​—Yɛ Gbɛ Fɛɛ Gbɛ Nɔ?

FAISHITSWAA akɛ aye omanye lɛ tsɔɔ akɛ mɔ ko yɛ oti ko ni ma ehiɛ. Mɛni ji oti ni ma ohiɛ . . . yɛ shihilɛ mli? Mɛni ji nɔ ni osaa ohe akɛ obaafee koni onine ashɛ nɔ? Yɛ anɔkwale mli lɛ, mɛni ji nɔ ni esa akɛ efee nɔ ni odiɔ sɛɛ fe fɛɛ bɔni afee ni otsui anyɔ omli ni ona miishɛɛ diɛŋtsɛ?

Shihilɛ yɛ maji ni kpaako amɛnaa nɔyaa lɛ amli lɛ ehiii tsɔ. Yɛ naagbai ni akɛkpeɔ yɛ jɛmɛ lɛ hewɔ lɛ, Nyɔŋmɔ Wiemɔ lɛ mli ŋaawoo lɛ ni aaasusu he lɛ baaye abua wɔ ni wɔsusu otii ni wɔkɛmamɔ wɔ diɛŋtsɛ wɔhiɛ kɛ omanye ni wɔye lɛ he jogbaŋŋ, ni hei ni wɔhiɔ lɛ kɔɔɔ he eko.

Akɛni ohia yɛ hewɔ lɛ, mɛi pii diɔ omanye ni aaaye yɛ shika gbɛfaŋ lɛ sɛɛ ni amɛkuɔ amɛhiɛ amɛshwieɔ nɔ fɛɛ nɔ nɔ. Mɛi komɛi kɛ amɛhe woɔ anɔkwale ni ayeee mli koni amɛnine ashɛ enɛ nɔ. Shi kɛ amɛbatsɔmɔ anɔkwale Kristofoi lɛ, belɛ esa akɛ amɛfee mɛi ni amɛshi nɛkɛ su nɛɛ yɛ amɛsɛɛ kwraa bɔni afee ni amɛhi shi yɛ Biblia jalɛ taomɔ nii lɛ anaa.

Shi, je lɛŋ otii nɛɛ duɔ Kristofoi lɛ ateaŋ mɛi komɛi ekoŋŋ. Amɛkɛ amɛhe baawo jeŋba ni tamɔɔɔ Kristofoi anɔ mli koni amɛye omanye. Fɔlɔi kuɔ amɛhiɛ amɛshwieɔ amɛwekui anɔ. Aŋkroaŋkroi hu kuɔ amɛhiɛ amɛshwieɔ sɔɔmɔ ni amɛkɛ haa Nyɔŋmɔ lɛ nɔ. Mɛni ji nɔ ni osusuɔ akɛ ebaajɛ tsui ni nyɔɔ mɔ mli yɛ shihilɛ mli kɛ miishɛɛ mli aba?

Yɛ be mli ni ahɛleɔ wɔ shi yɛ nɔ ni baajɛ mli aba lɛ he lɛ, Biblia lɛ bɔɔ wɔ kɔkɔ akɛ: “Shi mɛi ni taoɔ nii pii ana lɛ gbeɔ kaa kɛ tsɔnei kɛ kwashiai akɔnɔi pii ni fiteɔ mɔ . . . lɛ amli. Ejaakɛ nibii fɔji fɛɛ ashishifa ji shika suɔmɔ ni mɛi komɛi di sɛɛ ni amɛdu gbɛ kɛjɛ hemɔkɛyeli lɛ mli, ni amɛkɛ piŋmɔi babaoo egbulɔ amɛhe lɛ.”​—1 Timoteo 6:​9, 10.

“Nibii fɔji fɛɛ ahishifa.” ‘Amɛkɛ piŋmɔi babaoo egbulɔ amɛhe.’ Enɛ tamɔɔɔ tsui ni nyɔɔ mɔ mli kɛ miishɛɛ mli tsɔɔmɔ, aloo jeee nakai? Ni kɛlɛ, gbɔmɛi akpekpei abɔ aniiashikpamɔ kɛtsɔ afii ohai abɔ lɛ amli, aahu kɛbashi ŋmɛnɛ yeɔ bɔ ni Biblia mli wiemɔ nɛɛ ji anɔkwale ha lɛ he odase. Belɛ mɛni ji nɔ ni enɛ jieɔ yi ehaa akɛ oti ni esa akɛ Kristofonyo lɛ kɛmamɔ ehiɛ yɛ shihilɛ mli?

Amɛdu Gbɛ​—Yɛ Mɛɛ Gbɛ Nɔ?

Mɛɛ gbɛi anɔ nɛkɛ aaanyɛ atsɔ aha Kristofonyo lɛ adu gbɛ kɛjɛ ehemɔkɛyeli lɛ he? Mɛi komɛi etee shɔŋŋ aahu kɛyashɛ he ni amɛkpoo jeŋba kpakpa ni Nyɔŋmɔ gbeyeishemɔ yɔɔ mli kɛ nɔ ni aheɔ ayeɔ lɛ. Mɛi krokomɛi hu yɛ ni enɛ etsi amɛ kɛjɛ Nyɔŋmɔ gbeyeishemɔ mli hetuu-kɛhamɔ gbɛ lɛ nɔ, ni amɛkɛ nɛkɛ hetuu-kɛhamɔ nɛɛ po tsuɔ nii akɛ nɔ ni amɛbaatsɔ nɔ amɛshishiu ni amɛkɛna mɛi krokomɛi anɔ hewalɛ. No hewɔ lɛ Biblia lɛ wieɔ “gbɔmɛi ni amɛjwɛŋmɔi efite ni ashɔ anɔkwale lɛ yɛ amɛdɛŋ ni amɛsusuɔ akɛ Nyɔŋmɔ jamɔ ji ninamɔ” lɛ ahe. (1 Timoteo 6:⁠5) Yɛ be mli ni amɛtsiii amɛhe kɛjɛɛɛ Kristojamɔ he kwraa lɛ, amɛbaana amɛhe ni amɛmiiku Biblia mli shishitoo mlai ni he hiaa Kristofoi ahemɔkɛyeli lɛ mli.

Yesu kɛɛ ekaselɔi lɛ akɛ amɛkatamɔ je lɛŋ bii lɛ ni yeɔ mɛi krokomɛi anɔ lɛ. Ekɛɛ: “Akafee nakai yɛ nyɛteŋ; shi mɔ fɛɛ mɔ ni sumɔɔ akɛ etsɔ agbo yɛ nyɛteŋ lɛ, lɛ moŋ etsɔ nyɛsɔɔlɔ.” Yɛ be mli ni ewieɔ eshiɔ Yudajamɔ lɛ mli hiɛnyiɛlɔi lɛ, Yesu tee nɔ lolo yɛ enɛ mli. Etsɔɔ akɛ suɔmɔ babaoo ni aaana aha gbɛi yɛ je lɛŋ lɛ kɛ Nyɔŋmɔ nɔkpɛlɛmɔ baaa. (Mateo 20:​26; 23:​6-9, 33) No hewɔ lɛ, esa akɛ Kristofoi atao akɛ amɛaasɔmɔ amɛhe moŋ fe ni amɛaakpɛ fe mɛi krokomɛi loo amɛye mɛi krokomɛi anɔ. Mɔ ni sumɔɔ shika ni taoɔ ni eye omanye ni nɔ fɛɛ nɔ ni baaba lɛ kɔɔɔ he eko lɛ baanyɛ afee mɔ ni baadu gbɛ kɛjɛ gbɛ nɛɛ nɔ.

Te onaa ohe yɛ enɛ mli ohaa tɛŋŋ? Ani onaa ni okɛ omanye ni oye lɛ miito bɔ ni onaa mɛi krokomɛi anɔ hewalɛ ohaa lɛ he? Ani okudɔɔ loo otsɔmɔɔ Kristofoi ashishitoo mlai kɛ tsɔɔmɔi bɔni afee ni oye mɛi krokomɛi anɔ aloo ona enɛ? Ani onuɔ he akɛ esa akɛ ona babaoo fe otipɛŋfoi ni nɔ ni obaafite lɛ kɔɔɔ he eko? Ani onaa miishɛɛ babaoo yɛ oninamɔ loo nɔ ni otsu ni anaa yɛ faŋŋ mli lɛ ahe wiemɔ he? Kɛji nakai ni lɛ belɛ, ehe miihia ni okwɛ akɛ ani oodu gbɛ kɛmiijɛ hemɔkɛyeli lɛ he lo.

“Omanye” Mli Piŋmɔi

Yesu kɛɛ hu akɛ: “Nyɛkabɔa jwetrii nyɛhaa nyɛhe yɛ shikpɔŋ lɛ nɔ . . . shi he ni nyɛ jwetri yɔɔ lɛ jɛi nyɛtsui baahi. . . . Nyɛnyɛŋ Nyɔŋmɔ kɛ Mamona (Nifalɛ) nyɛsɔmɔ.” (Mateo 6:​19-24) Ani fɔlɔi ni kudɔɔ amɛbii titri lɛ koni amɛdi heloo gbɛfaŋ nibii asɛɛ kɛ je lɛŋ nitsumɔi asɛɛ lɛ miibo ŋaawoo ni tamɔ nɛkɛ toi? Ani omanye ni aaaye yɛ je lɛŋ lɛ nɔmimaa sa yɛ be mli ni gbekɛbii lɛ shiɔ anɔkwale lɛ ni amɛkɔɔ gbɛ ni jeee Kristofoi anɔ lɛ? Ani esa akɛ okɛ amɛmumɔŋ shihilɛ asha afɔle aloo kɛ hooo lɛ ofite lɛ yɛ ‘shikpɔŋ nɔ jwetrii’ lɛ ahewɔ? Fɔlɔi ni feɔ enɛ lɛ naa yɛ be babaoo mli akɛ ‘amɛkɛ piŋmɔi babaoo egbulɔ amɛhe’ yɛ amɛbii ahe ni amɛsusuɔ ni amɛnuɔ tsuiŋdɔlɛ he yɛ mumɔŋ nibii ni amɛlaajeɔ​—kɛ agbɛnɛ yɛ bei komɛi amli lɛ heloonaa nɔ lɛ hewɔ.

Ninamɔ he suɔmɔ etsɔ tamɔ nuŋtsɔ ni biɔ nii babaoo kɛjɛɔ mɔ dɛŋ. Eheɔ gbɔmɛi abe, hewalɛ kɛ nyɛmɔi; ni egbeɔ hetuu-kɛhamɔ ni Nyɔŋmɔ gbeyeishemɔ yɔɔ mli. Elakaa gbɔmɛi koni amɛtao ninamɔ babaoo kɛ gbɛi yɛ je lɛŋ, ni enɛ gbalaa amɛ kɛjɛɔ hemɔkɛyeli lɛ he kɛyaa shɔŋŋ. Biblia lɛ kɛɔ yɛ gbɛ ni ja nɔ akɛ: “Mɔ ni sumɔɔ shika lɛ, shika etɔŋ lɛ, ni mɔ ni sumɔɔ nifalɛ lɛ, enaŋ sɛɛ ko.”​—Jajelɔ 5:⁠9.

Yɛ be mli ebatsɔ Kristofonyo ko lɛ, Afrika nitsumɔtsɛ ko suɔmɔ kɛha omanye ni eye yɛ shika gbɛfaŋ lɛ tee nɔ ni efee nɔ ni baa klɛŋklɛŋ yɛ eshihilɛ mli. Eku ehiɛ eshwie Kristofoi anitsumɔi anɔ ni ehala saramɔ ni eeeyasara nanemɛi nitsulɔi ni ji je lɛŋ bii. Eyaaa nɔ yɛ mumɔŋ, yɛ mɔdɛŋ ni asafo lɛ mli onukpai lɛ bɔ koni amɛye amɛbua lɛ lɛ fɛɛ sɛɛ. No hewɔ lɛ ena ehe akɛ mɔ ni leee nɔ mli ni eyɔɔ yɛ mumɔŋ​—ni yɛ shikpɔŋ ko ni jeee mɔ ko nɔ nɔ, he ni ejeee Kristofonyo ni kɛlɛ eetao ni abu lɛ akɛ nakai eji. Wɔ fɛɛ wɔbaanyɛ wɔyoo akɛ shihilɛ ni tamɔ nɛkɛ kɛ tsui ni nyɔɔ mɔ mli diɛŋtsɛ yɛ shihilɛ mli baaa aloo ni ekɛ naanɔ miishɛɛ aaaba.

Bɔ fɛɛ bɔ ni eji lɛ gbɔmɛi ni tamɔ nɛkɛ kɛ mumɔŋ piŋmɔi baakpe. Nitsumɔ kɛ bɔni akɛ gbɔmɛi ni bɛ bulɛ ko kɛha anɔkwayeli loo bɔlɛnamɔ mli jeŋba kpakpa kpeɔ lɛ naa amɛnɔ hewalɛ yɛ gbɛ fɔŋ nɔ. Kristofoi ni kɛ shihilɛ ni tamɔ nɛkɛ kpe ni esa akɛ amɛwu amɛshi hewalɛi gbohii ni tamɔ enɛɛmɛi lɛ kɛ amɛhenilee peleɔ daa nɛɛ. Naagbee lɛ mɛi komɛi batsɔmɔɔ tamɔ amɛnanemɛi lɛ ni amɛduɔ gbɛ kwraa kɛjɛɔ hemɔkɛyeli lɛ he. (1 Korintobii 15:33) Mɛɛ sɛɛnamɔ yɔɔ omanye ni aye yɛ shika gbɛfaŋ ni kɛ mɔ yaa mumɔŋ kɛ jeŋba mli shigbeemɔ mli lɛ mli? Taakɛ Yesu kɛɛ lɛ: “Mɛɛ sɛɛ gbɔmɔ naa, kɛji enine shɛ jeŋ muu lɛ fɛɛ nɔ, shi elaaje esusuma lɛ?”​—Mateo 16:⁠26.

Omanye ni Hi

Niiashikpamɔ ema nɔ mi akɛ nilee yɛ mli akɛ aaabo Biblia mli ŋaawoo nɛɛ toi: “Nyɛjeŋba akatamɔ jeŋbii ajeŋba, . . . koni nyɛyoɔ nii ni ji Nyɔŋmɔ suɔmɔnaa nii kpakpai ni sa ehiɛ jogbaŋŋ ni hi kɛwula shi lɛ.” “Nyɛkasumɔa je lɛ aloo nibii hu ni yɔɔ je lɛŋ. Kɛji mɔ ko miisumɔ je lɛ, belɛ Tsɛ lɛ suɔmɔ lɛ bɛ emli.” Hɛɛ, kɛ nilelɔi ji wɔ lɛ wɔkaseŋ je lɛ aloo ni wɔɔfite wɔbe wɔha nɔ ni eyɔɔ kɛhamɔ. Esa akɛ nɔ ni he hiaa wɔ titri lɛ afee Nyɔŋmɔ nɔkpɛlɛmɔ, ni anyɛŋ ana kɛtsɔ je lɛŋ nibii asɛɛdii nɔ.​—Romabii 12:2; 1 Yohane 2:​15, 16.

Yesu kɛ okwaafonyo ko ni kɛ ehiɛ fɔ eninamɔ nɔ shi Nyɔŋmɔ wie nɛkɛ etsɔɔ lɛ lɛ fee he nɔkwɛmɔ nɔ: “Kwashia, nyɔɔŋ nɛɛŋ nɔŋŋ lɛ abaabi osusuma shi yɛ odɛŋ; ni nibii ni osaa oto lɛ, namɔ nɔ aaatsɔ?” Yɛ be mli ni emuaa enɔkwɛmɔ nɔ lɛ naa lɛ, Yesu kɛɛ: “Nakai mɔ ni bɔɔ jwetri ehaa lɛ diɛŋtsɛ ehe, shi ejeee niiatsɛ yɛ Nyɔŋmɔ gbɛfaŋ lɛ yɔɔ.” Yesu miitsɔɔ akɛ “jeee gbɔmɔ nii ni ena ni eteke nɔ lɛ mli ewala yɔɔ.”​—Luka 12:​15-21.

Yesu kɛ nɔkwɛmɔ nɔ ko ni kɔɔ niiatsɛ nɔyelɔ ko he tsu nii ni ekɛtsɔɔ nɔ kometoo lɛ nɔŋŋ. Gbɔmɔ nɛɛ eye omanye yɛ je lɛ mli, ni eka shi faŋŋ akɛ eesumɔ ni efee mɔ ni ja yɛ jeŋba mli. Shi Yesu kɛlɛ etsɔɔɔ akɛ okadi kɛha omanye. Shi moŋ, Yesu kɛɛ ebaawa kɛha gbɔmɛi ni tamɔ nɛkɛ “akɛ amɛaabote Nyɔŋmɔ Maŋtsɛyeli lɛ mli.” Mɛi pii ni yɔɔ shihilɛ ni tamɔ nakai mli lɛ sumɔɔɔ ni amɛkɛ heloo gbɛfaŋ nibii shaa afɔle koni amɛkɛtao Nyɔŋmɔ Maŋtsɛyeli lɛ akɛ oti titri ni yɔɔ amɛshihilɛ mli.​—Luka 18:​18-30.

Yɛ be mli ni emaa bɔ ni mumɔŋ nibii ji nɔ ni he hiaa titri lɛ nɔ mi lɛ, Yesu kɛɛ: “No hewɔ lɛ nyɛkahaoa nyɛhe nyɛkɛɔ akɛ: ‘Mɛni wɔɔye, aloo mɛni wɔɔnu, mɛni hu wɔɔŋɔ ha wɔhe?’ Ejaakɛ nii nɛɛ fɛɛ sɛɛ jeŋmajiaŋbii lɛ diɔ. Shi nyɛ Tsɛ lɛ ni yɔɔ ŋwɛi lɛ le akɛ nii nɛɛ fɛɛ he miihia nyɛ. Shi nyɛtaoa Nyɔŋmɔ Maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ baafata he aha nyɛ.” No hewɔ lɛ, yɛ nibii ni he hiaa lɛ agbɛfaŋ po lɛ, esa akɛ wɔto nibii ni he hiaa titri jogbaŋŋ lɛ gbɛjianɔ. Kɛ wɔɔye omanye lɛlɛŋ​—ni wɔna miishɛɛ kɛ tsui ni nyɔɔ mɔ mli diɛŋtsɛ lɛ​—esa akɛ mumɔŋ nibii lɛ aba klɛŋklɛŋ fe heloo gbɛfaŋ nibii.​—Mateo 6:​31-33.

Yaa nɔ Otao Mumɔŋ Omanyeyeli

No hewɔ lɛ eka shi faŋŋ akɛ gbɛ ni nilee yɔɔ mli ji ni atao omanyeyeli kɛtsɔ Nyɔŋmɔ Maŋtsɛyeli lɛ kɛ ejalɛ lɛ sɛɛdii nɔ. Nɔ ni enɛ biɔ ji Biblia lɛ kasemɔ bɔni afee ni “wɔyoo nii ni ji Nyɔŋmɔ suɔmɔnaa nii kpakpai ni sa ehiɛ jogbaŋŋ lɛ.” Nɔ ni kɔɔ esuɔmɔnaa nifeemɔ he ji ni okɛ esɔɔmɔ aye klɛŋklɛŋ gbɛhe yɛ oshihilɛ mli, ni ona Kristofoi asɔɔmɔ nitsumɔ lɛ mli gbɛfaŋnɔ kɛmɔ shi, ni okaku ohiɛ oshwie Kristofoi akpeei anɔ, ni ohi shi akɛ mɔ ni yɔɔ jeŋba kpakpa ni kɛ Nyɔŋmɔ jalɛ nifeemɔ kpaa gbee. Esaaa akɛ akɛ nɛkɛ nibii nɛɛ maa afa, aloo ahaa heloo gbɛfaŋ nibii haa nɔ. Enɛ ji nɔ ni Yesu ŋaawoo ni ekɛha niiatsɛ nɔyelɔ lɛ tsɔɔ: “Yaahɔɔ onibii fɛɛ ni oyɔɔ lɛ ni oŋɔja ohiafoi, ni ona jwetri yɛ ŋwɛi; ni oba obanyiɛ misɛɛ.”​—Romabii 12:2; Luka 18:⁠22.

Kɛ ofee enɛ lɛ, belɛ ootswa omumɔŋ shihilɛ kɛ oweku lɛ nɔ ooma shi. Ni ooofee mɔ ni jwɛŋɔ nibii wuji ahe aloo oŋɔɔ ohiɛ ofɔɔ ninamɔ ni bɛ shiŋŋ lɛ anɔ lɛ, obaatsɔ mɛi ni “amɛtsɔmɔ niiatsɛmɛi yɛ ejurɔfeemɔi agbɛfaŋ, . . ni amɛbɔɔ jwetri amɛhaa amɛhe ni efee shishitoo kpakpa eha be ni baaba lɛ, koni amɛmɔ anɔkwa wala lɛ mli” kpɛŋŋ lɛ ateŋ mɔ ko. Hɛɛ, oti ni ma ohiɛ lɛ baanyɛ afee naanɔ wala yɛ Paradeiso ni aku sɛɛ akɛba shikpɔŋ nɔ ekoŋŋ akɛni “je lɛ miiho aya kɛ emli sɛɛdii nii lɛ, shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ” lɛ hewɔ. Omanye ko ni da fe enɛ bɛ ni onine baanyɛ ashɛ nɔ.​—1 Timoteo 6:​17-19; 1 Yohane 2:⁠17.

[Mfoniri ni yɔɔ baafa 5]

Ani shika ji nɔ fɛɛ nɔ?

[Mfoniri ni yɔɔ baafa 7]

Ani fɔlɔi baaha amɛbii ayadi woloŋlee ni yaa hiɛ sɛɛ koni amɛye omanye?