Yesu Shihilɛ Kɛ Esɔɔmɔ Nitsumɔ

Gwantɛŋi Atsũi Lɛ Kɛ Tookwɛlɔ Lɛ

YESU yɛ Yerusalem yɛ Henɔjɔɔmɔ Gbijurɔyeli loo Hanukkah be lɛ mli, eji gbijurɔ ni ayeɔ ni akɛkuɔ sɛɛ ajɔɔ sɔlemɔ tsu lɛ nɔ ahaa Yehowa. Yɛ afi 168 D.Ŋ.B., aloo aaafee afii 200 ni tsɔ hiɛ lɛ mli lɛ, Antiochus lV Epiphanes ye Yerusalem nɔ kunim ni ebule sɔlemɔtsu lɛ kɛ efɔleshaa latɛ lɛ. Shi, afii etɛ sɛɛ lɛ, aku sɛɛ ahe Yerusalem ekoŋŋ ni aku sɛɛ ajɔɔ sɔlemɔ tsu lɛ nɔ. Yɛ no sɛɛ lɛ, ayeɔ enɔjɔɔmɔ ekoŋŋ akɛ gbijurɔ daa afi.

Nɛkɛ Henɔjɔɔmɔ Gbijurɔ nɛɛ baa yɛ Chislev 25, Yudafoi anyɔŋ ni kɛ November naagbee fa Iɛ kɛ December shishijee yɛ wɔŋmɛnɛŋmɛnɛ kalenda lɛ nɔ lɛ kpaa gbee lɛ. No hewɔ lɛ bei fioo ko ni fe gbii oha pɛ eshwɛɔ dani Hehoo lɛ ni baa yɛ afi 33 Ŋ.B. Iɛ ashɛ. Akɛni eji fɛi be ni kɔɔyɔɔŋ jɔɔ ŋanii hewɔ lɛ, bɔfo Yohane tsɛ lɛ “fɛi be.”

Agbɛnɛ Yesu kɛ nɔkwɛmɔ nɔ ko tsu nii ni emli ni etsi gwaŋtɛŋi atsũi etɛ kɛ enitsumɔ akɛ Tookwɛlɔ Kpakpa lɛ ta. Klɛŋklɛŋ tooi atsũ ni ewie he Iɛ kɔɔ Mose Mla kpaŋmɔ gbɛjianɔtoo lɛ he. Mla lɛ tsu nii tamɔ afabaŋ ko ni gbala Yudafoi lɛ mli kɛjɛ gbɔmɛi ni bɛ kpaŋmɔ krɛdɛɛ ni akɛ Nyɔŋmɔ efee nɛɛ nifeemɔi ni ehiii lɛ teŋ. Yesu tsɔɔ mli akɛ: “Lɛlɛŋ, lɛlɛŋ, miikɛɛ nyɛ akɛ: Mɔ ni tsɔɔɔ shinaa lɛ ni ekɛbote gwaŋtɛŋi atsu lɛ mli, shi moŋ etsɔɔ he kroko ekwɔɔ lɛ, julɔ kɛ ojotswalɔ ji lɛ. Shi mɔ ni tsɔɔ shinaa lɛ kɛboteɔ mli lɛ, tooi lɛ akwɛlɔ ji lɛ.”

Mɛi krokomɛi etsɔ hiɛ amɛba ni amɛbakɛɛ akɛ amɛji Mesia loo Kristo lɛ, shi amɛjeee anɔkwa tookwɛlɔ lɛ ni Yesu tee nɔ ewie ehe nɛkɛ lɛ: “Lɛ shinaakwɛlɔ lɛ gbeleɔ haa, ni tooi lɛ nuɔ egbee, ni ekɛ lɛ diɛŋtsɛ etooi lɛ agbɛi tsɛɔ amɛ, ni ekɛ amɛ jeɔ kpo. . . . Shi mɔ kpɔŋ lɛ, amɛnyiɛŋ esɛɛ, shi moŋ amɛaajo foi yɛ eŋɔɔ, ejaakɛ amɛleee mɛi kpɔji agbee?

Klɛŋklɛŋ tooi atsu lɛ “shinaakwɛlɔ” lɛ ji Yohane Baptisilɔ lɛ. Akɛ shinaakwɛlɔ lɛ, Yohane ‘gbele’ shinaa lɛ eha Yesu kɛtsɔ okadi tooi lɛ ni ebaanyiɛ amɛhiɛ kɛya lɛɛhei lɛ ni eha amɛle lɛ lɛ nɔ. Akɛ nɛkɛ tooi nɛɛ ni Yesu kɛ amɛgbɛi tsɛɔ amɛ ni enyiɛɔ amɛhiɛ nɛɛ yaa tooi atsu kroko mli, taakɛ etsɔɔ mli lɛ: “Lɛlɛŋ, lɛlɛŋ miikɛɛ nyɛ akɛ: Miji tooi lɛ ashinaa lɛ,” ni ji akɛ, tooi atsu hee ko shinaa. Beni Yesu kɛ ekaselɔi lɛ to kpaŋmɔ hee lɛ ni ejɛ ŋwɛi efɔse mumɔ krɔŋkrɔŋ lɛ eshwie amɛnɔ yɛ Pentekoste ni nyiɛ sɛɛ ba lɛ nɔ lɛ, kɛkɛ ni aŋɔ amɛ awo nɛkɛ tooi atsu hee nɛɛ mli.

Yɛ be mli ni etsɔɔ enitsumɔ lɛ mli lolo lɛ, Yesu kɛɛ: “Miji shinaa lɛ. Mi lɛ, kɛji mɔ ko tsɔ minaa etee mli lɛ, aaahere eyiwala, ni eeetee mli ni eeeje kpo, ni eeena Iɛɛnii. . . . Mi lɛ miba bɔni afee ni amɛna wala ni amɛna ni ateke nɔ. . . . Mi ji tookwɛlɔ kpakpa lɛ, ni mile mɛi ni ji mimɛi, ni mimɛi lɛ hu le mi, taakɛ bɔ ni Tsɛ Iɛ le mi, ni mi hu mile Tsɛ Iɛ; ni miŋɔɔ miwala miŋmɛɔ shi yɛ tooi lɛ anajiaŋ lɛ.”

Etsɛko tsɔ ni Yesu shɛje esɛɛnyiɛlɔi lɛ amii akɛ: “Kaashe gbeyei, asafo kuu bibioo; ejaakɛ nyɛ-Tsɛ lɛ yɛ he tsuijurɔ akɛ eeeŋɔ maŋtsɛyeli lɛ eha nyɛ.” Nɛkɛ asafo kuu bibioo nɛɛ, ni yɛ naagbee lɛ amɛyifalɛ bashɛ 144,000 lɛ baa nɛkɛ tooi atsu hee loo nɔ ni ji enyɔ nɛɛ mli. Shi Yesu tee nɔ ekɛɛ: “Ni miyɛ tooi krokomɛi ni jɛɛɛ tooi atsu nɛɛ mli; ni nomɛi hu, ja miŋɔ amɛ kɛba, ni amɛbanu migbee, ni tooi lɛ fee kuu kome kɛ kwɛlɔ kome.”

Akɛni “tooi krokomɛi” Iɛ “jɛɛɛ tooi atsu nɛɛ mli” hewɔ lɛ, belɛ amɛjɛ tooi atsu kroko mli, nɔ ni ji etɛ. Nɛkɛ naagbee tooi atsui enyɔ nɛɛ mli tooi Iɛ yɛ hiɛnɔkamɔi sɔrɔtoi enyɔ. “Asafo kuu bibioo” lɛ ni feɔ kuu kome lɛ kɛ Kristo baaye maŋtsɛ yɛ ŋwɛi, ni “tooi krokomɛi” lɛ ni yɔɔ kuu kroko mli lɛ hu baahi Paradeiso yɛ shikpɔŋ nɔ. Ni kɛlɛ, yɛ kui enyɔ mli ni amɛyɔɔ lɛ fɛɛ sɛɛ lɛ, tooi Iɛ kɛ amɛhe yeee awuŋa, ni amɛnuuu he akɛ agbala amɛmli, ejaakɛ taakɛ Yesu kɛɔ lɛ, amɛbafeɔ “kuu kome” yɛ “kwɛlɔ kome” shishi.

Tookwɛlɔ Kpakpa, Yesu Kristo, jɛɔ esuɔmɔ mli ekɛ ewala fɔɔ shi ehaa tooi atsui enyɔ lɛ fɛɛ. Ekɛɛ akɛ: “Miyɛ hewalɛ akɛ mikɛŋmɛɔ shi, ni miyɛ hewalɛ akɛ miŋɔɔ ekoŋŋ; bɔ ni mi-Tsɛ kɛɛ mi nɛ.” Beni Yesu kɛɛ nɛkɛ pɛ kɛkɛ ni mligbalamɔ ba Yudafoi Iɛ ateŋ.

Gbɔmɛi lɛ ateŋ mɛi pii kɛɛ: “Daimonio yɛ emli ni eye sɛkɛ; mɛɛ hewɔ nyɛboɔ lɛ toi?” Shi mɛi krokomɛi, ha hetoo akɛ: “Mɔ ni daimonio yɔɔ emli wiemɔi nɛ?” Kɛkɛ ni, eka shi faŋŋ akɛ yɛ be mli ni amɛwieɔ nuu ko ni afɔ lɛ shwilafo ni etsa lɛ yɛ nyɔji fioo ko ni eho Iɛ mli lɛ he lɛ, amɛkɛfata he akɛ: “Ani daimonio aaanyɛ shwilafo hiŋmɛii agbele?” Yohane 10:​1-22; 9:​1-7; Luka 12:​32; Kpojiemɔ 14:​1, 3; 21:​3, 4; Lala 37:⁠29.

◆ Mɛni ji Henɔjɔɔmɔ Gbijurɔ lɛ, ni mɛɛ be mli ayeɔ enɛ?

◆ Mɛni ji klɛŋklɛŋ tooi atsu Iɛ, ni namɔ ji eshinaakwɛlɔ?

◆ Mɛɛ gbɛ nɔ shinaakwɛlɔ lɛ gbeleɔ haa Tookwɛlɔ lɛ yɛ, ni yɛ no sɛɛ lɛ akɛ tooi lɛ yaa mɛni mli?

◆ Namɛi feɔ Tookwɛlɔ Kpakpa Iɛ tooi atsũi Iɛ mli tooi lɛ, ni kui enyiɛ amɛbatsɔmɔɔ?