Mɛi Krokomɛi ni Aaaye Abua Amɛ Koni Amɛja Nyɔŋmɔ

“Shi kɛji . . . mɔ ko ni heee yeee aloo eleee mli eko ba jɛi lɛ, . . . aaajie etsuiŋ teemɔ nii akpo faŋŋ, ni no aaaha ekɛ ehiɛ abu shi eja Nyɔŋmɔ.”​—1 KORINTOBII 14:​24, 25.

1-3. Te fee tɛŋŋ ni aye abua mɛi pii yɛ Korinto koni amɛna Nyɔŋmɔ nɔkpɛlɛmɔ?

YƐ BƆFO Paulo maŋsɛɛ sanekpakpashiɛmɔ gbɛfaa ni ji enyɔ lɛ mli lɛ, eyahi Korinto maŋ lɛ mli afi kɛ fa. Jɛmɛ ji be ni “wiemɔ lɛ ta Paulo mli ni eye odase veveeve etsɔɔ” yɛ. Mɛni jɛ mli ba? “Korintobii lɛ ateŋ mɛi pii hu ni nu lɛ, amɛhe amɛye, ni abaptisi amɛ.” (Bɔfoi lɛ Asaji 18:​5-11) Amɛbatsɔmɔ “mɛi ni atsuu amɛhe . . . mɛi krɔŋkrɔŋi ni atsɛ amɛ.”​—1 Korintobii 1:⁠2.

² Yɛ sɛɛ mli lɛ Apolo basara Korinto. Dani enɛ aaaba lɛ no mli lɛ, Priskila kɛ Akwila eye ebua lɛ” ni amɛtsɔɔ lɛ Nyɔŋmɔ gbɛ lɛ fitsofitso,” kɛ baptisimɔ he sane lɛ hu. Kɛkɛ ni ebatsɔ Kristofonyo ni Nyɔŋmɔ ena ehe tsui, aloo enɔkpɛlɛmɔ. (Bɔfoi lɛ Asaji 18:24–19:⁠7) Apolo hu ye ebua Kristofoi lɛ ni tsutsu lɛ ‘akpala amɛ kɛtee amagai mumui ahe lɛ.’ (1 Korintobii 12:⁠2) Ekashi faŋŋ akɛ akɛ Biblia mli tsɔsemɔ ba nɛkɛ gbɔmɛi nɛɛ yɛ amɛshiai amli; amɛbaanyɛ amɛkase nii hu kɛtsɔ Kristofoi akpeei ashishi ni amɛaaya lɛ nɔ.​—Bɔfoi lɛ Asaji 20:​20; 1 Korintobii 14:​22-24.

³ Nɔ ni jɛ nitsɔɔmɔ ni tamɔ nɛkɛ mli ba ji akɛ agbala mɛi ni tsutsu lɛ ‘amɛheee amɛyeee loo amɛleee mli eko’ lɛ kɛba anɔkwa jamɔ he. Kwɛ bɔ ni enɛ aaafee miishɛɛ sane aha akɛ aaana bii kɛ yei ni miishwere kɛmiiya amɛhiɛ kɛmiibɛŋkɛ baptisimɔ kɛ Nyɔŋmɔ nɔkpɛlɛmɔ be! Eka he eji nii ni haa mɔ tsui nyɔɔ emli loo ehaa mɔ naa miishɛɛ.

‘Mɛi ni Heee Yeee loo Amɛleee Mli Eko’ ni Aaaye Abua Amɛ

 4. Mɛɛ gbɛi anɔ ŋmɛnɛ atsɔɔ ayeɔ abuaa mɛi pii taakɛ afee yɛ Korinto lɛ?

⁴ Ŋmɛnɛ, Yehowa Odasefoi hu miibo Yesu famɔ akɛ “nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ” lɛ toi. (Mateo 28:​19, 20) Yɛ be mli ni amɛtɛo anɔkwale dumɔ wui lɛ yɛ tsui kpakpai amli lɛ, amɛkuɔ sɛɛ amɛyashwaa nɔ nu. (1 Korintobii 3:​5-9; Mateo 13:​19, 23) Odasefoi lɛ kɛ mɛi feɔ shia Biblia mli nikasemɔi yaka daa otsi koni amɛnyɛ amɛha gbɔmɛi lɛ asanebimɔi ahetoo ni amɛnyɛ amɛkase Biblia mli anɔkwalei lɛ. Afɔɔ nine atsɛɔ nɛkɛ gbɔmɛi aŋkroaŋkroi nɛɛ hu ni amɛba Yehowa Odasefoi asafoŋ kpeei ashishi, taakɛ bɔ ni klɛŋklɛŋ afii oha lɛ mli “mɛi ni heee yeee” lɛ hu ba yɛ Korinto lɛ. Shi te esa akɛ Yehowa Odasefoi asusu gbɔmɛi ni kaseɔ Biblia lɛ ni amɛbaa kpeei lɛ ahe tɛŋŋ?

 5. Mɛɛ Ŋmalɛ naa nɔdaamɔ nɔ yɔɔ kɛha henɔkwɛmɔ jogbaŋŋ yɛ be mli ni akɛ aŋkroaŋkroi komɛi yeɔ lɛ?

⁵ Eŋɔɔ wɔnaa akɛ wɔmiina ni amɛmiibɛŋkɛ Nyɔŋmɔ. Ni kɛlɛ, wɔhaa ehiɔ wɔjwɛŋmɔ mli akɛ amɛjeee heyelilɔi ni abaptisi amɛ. Agbɛnɛ ha nibii enyɔ ni wɔkase ni damɔ klɛŋklɛŋ nikasemɔ lɛ nɔ lɛ ahi ojwɛŋmɔ mli. (1) Israelbii lɛ kwɛɔ jogbaŋŋ yɛ gbɔi ni amɛbahi amɛteŋ, ni yɔɔ Nyɔŋmɔ webii ateŋ ni amɛboɔ mlai komɛi atoi, shi kɛlɛ amɛjeee mɛi ni atsake amɛ kɛba Yuda jamɔ mli ni afolɔ amɛ ketia, ni amɛji nyɛmimɛi yɛ jamɔ mli lɛ ahe. (2) Korinto Kristofoi lɛ ni kɛ nɛkɛ ‘mɛi ni heee yeee loo mɛi ni leee mli eko’ nɛɛ yeɔ lɛ haa amɛhiɛ hiɔ amɛhe nɔ yɛ Paulo wiemɔi nɛɛ ahewɔ: “Nyɛkɛ mɛi ni heee yeee lɛ akagbalaa kɔŋtso kome ni yeee egbɔ! Ejaakɛ mɛɛ bɔɔ jalɛ kɛ mlakwamɔ yɔɔ?”​—2 Korintobii 6:⁠14.

 6. Mɛɛ gbɛ nɔ aaatsɔ “aka” “mɛi ni heee yeee” lɛ kɛtsɔ kpeei anɔ, ni te nɛkɛ kamɔ nɛɛ yɔɔ tɛŋŋ?

⁶ No hewɔ lɛ yɛ be mli ni wɔhereɔ ‘mɛi ni heee yeee kɛ mɛi ni leee mli eko lɛ,’ wɔle akɛ amɛshɛɛɛ tɛi ni Nyɔŋmɔ efolɔ eshwie shi lɛ ahe. Taakɛ Biblia lɛ tsɔɔ yɛ 1 Korintobii 14: 24, 25 lɛ, ehe baahia ni ‘akojo nɛkɛ gbɔmɛi nɛɛ jogbaŋŋ,’ aloo po nɔ ni amɛkaseɔ lɛ ‘baaka amɛ.’ Kamɔ ni tamɔ nɛkɛ lɛ jeee saneyeli ajinafoi akamɔ ko; atsɛɛɛ amɛ kɛbaaa saneyeli ajinafoi ni yɔɔ asafo lɛ mli lɛ ahiɛ akɛni amɛjeee asafo lɛ mli bii ni abaptisi amɛ lɛ. Shi moŋ, yɛ nɔ ni amɛkaseɔ lɛ hewɔ lɛ, nɛkɛ mɛi heei nɛɛ heɔ yeɔ akɛ Nyɔŋmɔ buɔ pɛsɛmkunya kɛ jeŋba sharai gbɛi fɛɛ fɔ.

 7. Mɛɛ nɔyaa lolo nikaselɔi pii baasumɔ ni amɛna, ni mɛni hewɔ?

⁷ Be baashɛ ni mɛi ni abaptisiko amɛ lɛ ateŋ mɛi pii basumɔ ni amɛya amɛhiɛ fe kpeei kɛkɛ ni amɛaaka he amɛya akɛ mɛi ni yɔɔ nikasemɔ he miishɛɛ kɛkɛ. Nɛkɛ Yesu wiemɔ nɛɛ tsɔɔ nɔ hewɔ: “Kaselɔ efeee etsɔɔlɔ; shi mɔ fɛɛ mɔ ni ehi kɛwula shi lɛ, eeetamɔ etsɔɔlɔ.” (Luka 6:40) Biblia kaselɔ lɛ baana akɛ etsɔɔlɔ lɛ buɔ shiɛmɔ nitsumɔ lɛ akɛ nɔ ko ni he hiaa ni enaa miishɛɛ kɛjɛɔ mli. (Mateo 24:14) No hewɔ lɛ, beni ehemɔkɛyeli daa lɛ, mɔ ni kaseɔ Biblia mli anɔkwalei lɛ ni ebaa kpeei lɛ kɛ nɛkɛ wiemɔi nɛɛ baato etsui mli: “Kwɛ bɔ ni sanekpakpajajelɔ ni shiɛɔ hejɔlɛ lɛ, sanekpakpajajelɔ ni shiɛɔ yiwalaheremɔ lɛ naji yɔɔ fɛo.” (Yesaia 52:7; Romabii 10:​13-15) Eyɛ mli akɛ abaptisiko lɛ moŋ, shi ebaasumɔ ni etsɔ Maŋtsɛyeli shiɛlɔ ni kɛ ehe ekpɛtɛ Yehowa Odasefoi asafo lɛ he.

 8, 9. (a) Mɛni esa akɛ afee kɛ Biblia kaselɔ ko miisumɔ ni ena shiɛmɔ nitsumɔ lɛ mli gbɛfaŋnɔ? (b) Kɛ onukpai enyɔ kɛ mɔ ni taoɔ atsɔ shiɛlɔ lɛ kɛ etsɔɔlɔ lɛ kpe lɛ, mɛni amɛbaafee? (d) Mɛɛ gbɛnaa nii shiɛlɔ hee lɛ kɔɔ efɔɔ enɔ lɛ?

⁸ Kɛji akɛ Odasefonyo ni kwɛɔ Biblia kasemɔ lɛ nɔ lɛ na akɛ nikaselɔ lɛ miisumɔ ni ena shiɛmɔ nitsumɔ lɛ mli gbɛfaŋnɔ lɛ, ebaanyɛ ni ekɛ onukpai asɛinɔtalɔ loo nɔkwɛlɔ lɛ asusu sane lɛ he ni ebaato gbɛjianɔ ni onukpai enyɔ kɛ Biblia kaselɔ lɛ kɛ etsɔɔlɔ lɛ akpe. Onukpai lɛ naa miishɛɛ kɛ mɔ hee ko miisumɔ ni esɔmɔ Nyɔŋmɔ. Amɛkpaŋ lɛ gbɛ akɛ ebaana nilee ni fa tamɔ bɔ ni mɛi ni abaptisi amɛ lɛ yɔɔ kɛ nilee ni etee hiɛ ni no hewɔ lɛ akpaa babaoo gbɛ kɛjɛɔ amɛdɛŋ lɛ. Ni kɛlɛ, onukpai lɛ baasumɔ ni amɛna akɛ dani mɔ hee nɛɛ kɛ asafo lɛ aaana shiɛmɔ nitsumɔ lɛ mli gbɛfaŋnɔ lɛ, ena Biblia mli tsɔɔmɔi ahe nilee ko, ni eha eshihilɛ gbɛ kɛ Nyɔŋmɔ taomɔ nii ekpa gbee. No hewɔ lɛ yiŋtoo kpakpa hewɔ ni onukpai enyɔ kɛ mɔ ni taoɔ etsɔ shiɛlɔ lɛ kɛ Odasefonyo ni kɛ mɔ lɛ kaseɔ nii lɛ kpeɔ lɛ.a

⁹ Onukpai enyɔ lɛ baakɛɛ nikaselɔ lɛ akɛ kɛji akɛ ehe esa kɛha shiɛmɔ ni ekɛ ehe woɔ mli lɛ, ebaanyɛ ni ebu esɔɔmɔ nitsumɔ lɛ he akɔntaa ni abaagbele asafoŋ shiɛlɔ kadimɔ wolo aloo Congregation’s Publisher Record yɛ egbɛi amli aha lɛ. Enɛ baaye ehe ni ekɛbɔ Yehowa Odasefoi ateokrase gbɛjianɔtoo lɛ kɛ ehe shi ni ebaa ehaa enɛ lɛ he odase. (Enɛ baafee anɔkwale hu yɛ mɛi fɛɛ ni kɛ amɛsɔɔmɔ nitsumɔ he akɔntaabuu baalɛ ahe.) Esa akɛ amɛkɛ lɛ sanegbaa lɛ hu akɔ Biblia mli ŋaawoo, tamɔ nɔ ni atsɔɔ mli yɛ Organized to Accomplish Our Ministry lɛ baafai 98 kɛ 99 lɛ heb No hewɔ lɛ, enɛ baafee be ni sa jogbaŋŋ ni nikaselɔ lɛ aaana wolo nɛɛ eko akɛ lɛ diɛŋtsɛ enɔ.

10. (a) Te shiɛlɔ ni abaptisiko lɛ lɛ aaafee tɛŋŋ aya ehiɛ loo ena nɔyaa, ni mɛɛ oti ma ehiɛ? (b) Mɛni hewɔ afeɔ tsakemɔi yɛ wiemɔ “hefatalɔ ni akpɛlɛ enɔ” lɛ mli lɛ? (Kwɛmɔ shishigbɛ niŋmaa lɛ.)

¹⁰ Mɔ ni he ebasa akɛ sanekpakpa lɛ he shiɛlɔ ni abaptisiko lɛ lɛ etsɔ gbɛ ni baaha ebatsɔ ‘tsuijurɔnaa gbɔmɔ’ lɛ nɔ.c (Luka 2:14) Eyɛ mli akɛ ejɔko ehe nɔ ni abaptisiko lɛ moŋ, shi agbɛnɛ ebaanyɛ ebu eshiɛmɔ nitsumɔ lɛ he akɔntaa efata akpekpei abɔ ni yɔɔ ekaa yɛ shikpɔŋ muu lɛ fɛɛ nɔ ni “jajeɔ Nyɔŋmɔ wiemɔ” lɛ amɛtsɔɔ lɛ ahe. (Bɔfoi lɛ Asaji 13:5; 17:3; 26:​22, 23) Abaanyɛ atswa adafi atsɔɔ asafo lɛ akɛ eji shiɛlɔ hee ni abaptisiko lɛ. Esa akɛ eya nɔ ekase Biblia lɛ, ekɛ ehe awo kpeeibaa mli, ekɛ nɔ ni ekaseɔ lɛ atsu nii yɛ eshihilɛ mli, ni egba mɛi krokomɛi. Etsɛŋ ni ebaasumɔ ni abaptisi lɛ akɛ Kristofonyo, koni ebatsɔ mɔ ni Nyɔŋmɔ ekpɛlɛ enɔ, ni ‘akadi lɛ’ aha yiwalaheremɔ.​—Ezekiel 9:​4-6.

Yelikɛbuamɔ Kɛha Mɔ ni Tɔɔ Lɛ

11. Mɛɛ gbɛ nɔ asafo lɛ tsɔɔ ekɛ efɔŋ feelɔi ni abaptisi amɛ lɛ yeɔ haa yɛ?

¹¹ Wɔtsɔ hiɛ wɔsusu gbɛjianɔ ni asafo lɛ eto koni akɛye abua Kristofonyo ni abaptisi lɛ ni feɔ esha ni hiɛdɔɔ yɔɔ mli lɛ yɛ nikasemɔ ni tsɔ hiɛ lɛ mli. (Hebribii 12:​9-13) Ni wɔna kɛjɛ Biblia lɛ mli akɛ kɛji efɔŋfeelɔ ni abaptisi lɛ lɛ tsakeee etsui lɛ, ehe baahia ni asafo lɛ ashwie lɛ ni yɛ no sɛɛ lɛ, akɛ lɛ naŋ naanyobɔɔ ko. (1 Korintobii 5:​11-13; 2 Yohane 9-11; 2 Tesalonikabii 2:​11, 12) Shi mɛni esa akɛ afee, kɛji akɛ shiɛlɔ ko ni abaptisiko lɛ fee efɔŋ ni hiɛdɔɔ yɔɔ mli aloo efee esha?

12. (a) Mɛni hewɔ yelikɛbuamɔ ni mɔbɔnalɛ yɔɔ mli hu yɛ kɛha shiɛlɔi ni abaptisiko amɛ ni feɔ esha lɛ? (b) Te shishitoo mla ni yɔɔ Luka 12:48 lɛ kɔɔ sɔ loo gbɛnaa nii ni bakaa mɔ ko nɔ yɛ nɔ fɔŋ feemɔ he lɛ he ehaa tɛŋŋ?

¹² Yuda wo hewalɛ akɛ ana Kristofoi ni afɔ amɛ mu lɛ ni amɛyiŋ feɔ amɛ kɔshikɔshi aloo amɛgbee heloo lɛ eshafeemɔ mli lɛ mɔbɔ, kɛ amɛtsake amɛtsui. (Yuda 22, 23; kwɛmɔ 2 Korintobii 7:10 hu.) Belɛ ani efeŋ nɔ ni sa jogbaŋŋ akɛ aaana mɔ ni abaptisiko lɛ ni etɔ ni jieɔ tsuitsakemɔ kpo lɛ mɔbɔ? (Bɔfoi lɛ Asaji 3:19) Esa nakai, ejaakɛ emumɔŋ shifimɔ lɛ bɛ shiŋŋ, ni ebɛ niiashikpamɔ babaoo yɛ Kristofoi ashihilɛ mli. Ekolɛ ekaseko bɔ ni Nyɔŋmɔ susuɔ saji komɛi ahe ehaa lɛ. Ekɛ onukpai lɛ tsɔko Biblia mli nikasemɔ ni tsɔɔ baptisimɔ hiɛ lɛ amli, ni ekɛ ehe hako nifeemɔ ni he hiaa ni ji nu mli baptisimɔ. Agbɛnɛ, Yesu kɛɛ akɛ “mɔ fɛɛ mɔ ni aŋɔ pii aha lɛ, pii aaatao yɛ edɛŋ.” (Luka 12:48) No hewɔ lɛ, aatao babaoo yɛ mɛi ni abaptisi amɛ lɛ ni yɛ nilee kɛ jɔɔmɔi ni etee hiɛ hewɔ lɛ, gbɛnaa nii krɛdɛɛ ko ka amɛnɔ lɛ adɛŋ.​—Yakobo 4:​17; Luka 15:​1-7; 1 Korintobii 13:⁠11.

13. Kɛ shiɛlɔ ni abaptisiko lɛ lɛ tɔ lɛ, mɛni onukpai lɛ baafee ni amɛkɛye amɛbua?

¹³ Akɛ nɔ ni kɛ Paulo ŋaawoo lɛ kpaa gbee lɛ, nyɛmimɛi ni amɛhe esa yɛ mumɔŋ lɛ miisumɔ ni amɛyɛ amɛbua shiɛlɔ fɛɛ shiɛlɔ ni abaptisiko lɛ ni tsɔɔ gbɛ fɔŋ nɔ dani eyɔseɔ enɛ lɛ. (Okɛto Galatabii 6:1 he.) Onukpai lɛ baanyɛ abi amɛteŋ mɛi enyɔ (ekolɛ mɛi ni tsɔ hiɛ amɛkɛ lɛ kpe lɛ) koni amɛbɔ mɔdɛŋ ni amɛyɛ amɛbua lɛ kɛ eesumɔ ni afee nakai. Amɛbaafee nakai, ni jeee akɛ amɛmiisumɔ ni amɛka ehiɛ waa, shi moŋ yɛ mɔbɔnalɛ gbɛ nɔ kɛ mlijɔlɛ mumɔ mli. (Lala 130:⁠3) Yɛ bei babaoo mli lɛ, Ŋmalɛ mli ŋaawoo kɛ gbɛtsɔɔmɔ ni anyɛɔ atsuɔ he nii baafee nɔ ni fa ni baaha etsɛ tsuitsakemɔ ewo emli ni ekɛ lɛ ayi gbɛ ni ja lɛ nɔ.

14, 15. (a) Mɛni abaanyɛ afee kɛ efɔŋ feelɔ lɛ etsake etsui lɛlɛŋ? (b) Mɛɛ sane mlitsɔɔmɔ kuku abaanyɛ akɛha yɛ bei komɛi amli?

¹⁴ Onukpai enyɔ lɛ kɛ gbɛtsɔɔmɔi ni sa kɛha efɔŋfeelɔ ni abaptisiko lɛ lɛ shihilɛ lɛ baaha. Yɛ ekomɛi amli lɛ, amɛbaato gbɛjianɔ akɛ, ahaŋ mɔ ni etɔ lɛ hegbɛ koni ekɛ ehe awo Teokrase Sɔɔmɔ Skul lɛ mli aloo ni aaaha eha saji ahetoo yɛ kpeei ashishi. Aloo amɛbaafa lɛ akɛ ekɛ ehe akawo shiɛmɔ nitsumɔ lɛ ni asafo lɛ naa mli gbɛfaŋnɔ lɛ mli kɛyashi be mli ni eeeya ehiɛ yɛ mumɔŋ da. Kɛkɛ lɛ yɛ be ko mli lɛ amɛbaanyɛ amɛkɛɛ lɛ akɛ ebaanyɛ ni ekɛ ehe awo shiɛmɔ nitsumɔ lɛ mli ekoŋŋ. Kɛji akɛ nɔ fɔŋ feemɔ lɛ jeee nɔ ni mɛi pii ele ni asaŋ ejeee oshara kɛha asafo kuu lɛ hetsemɔ lɛ, ehe ehiaaa ni agbala asafo lɛ jwɛŋmɔ kɛba nɔ kɛtsɔ adafitswaa nɔ.

¹⁵ Shi kɛji akɛ onukpai enyɔ lɛ na akɛ gbɔmɔ lɛ etsake etsui diɛŋtsɛ, shi ale nɔ fɔŋ feemɔ lɛ yɛ hei babaoo lɛ hu? Aloo kɛji akɛ yɛ sɛɛ mli lɛ abale nɔ fɔŋ feemɔ lɛ ni enɛ gbɛ eshwa hu? Yɛ fɛɛ mli lɛ, amɛbaabo Asafoŋ Sɔɔmɔ Ajinafoi lɛ amaniɛ, ni amɛbaato adafitswaa kuku ko he gbɛjianɔ, tamɔ nɛkɛ: “Atsu sane ko ni kɔɔ . . . lɛ he nii, ni [kɛ nuu loo yoo] ebaanyɛ eya nɔ esɔmɔ akɛ shiɛlɔ ni abaptisiko lɛ yɛ asafo lɛ mli.” Taakɛ eji yɛ saji nɛɛ fɛɛ mli lɛ, onukpai akuu lɛ baanyɛ atsɔɔ kɛji akɛ yɛ be kroko ni sa mli lɛ aaaha Ŋmalɛ naa wiemɔ ko kɛ ŋaawoo ni kɔɔ nakai nɔ fɔŋ feemɔ ni tee nɔ lɛ he.

16, 17. (a) Mɛɛ shihilɛi enyɔ yɔɔ ni abaanyɛ adamɔ nɔ ni akɛ adafitswaa kroko aha? (b) Te esa akɛ atswa nɛkɛ adafi nɛɛ aha tɛŋŋ?

¹⁶ Yɛ bei komɛi amli lɛ, shiɛlɔ ni abaptisiko lɛ ni efee efɔŋ lɛ ekpɛlɛŋ suɔmɔ yelikɛbuamɔ lɛ nɔ. Aloo shiɛlɔ ni abaptisiko lɛ lɛ baanyɛ akpɛ eyiŋ akɛ esumɔɔɔ ni eya nɔ eshwere kɛya baptisimɔ mli, ni ebaanyɛ ebɔ onukpai lɛ amaniɛ akɛ esumɔɔɔ ni efee shiɛlɔ ni ale lɛ dɔŋŋ. Mɛni abaafee? Ashwieee mɛi ni tamɔ nɛkɛ akɛni amɛjeee mɛi ni Nyɔŋmɔ ekpɛlɛ amɛnɔ lɛ hewɔ. Shwiemɔ ni ashwieɔ efɔŋ feelɔi ni tsakeee amɛtsui lɛ he gbɛjianɔtoo lɛ kɔɔ mɛi ni ‘atsɛɔ amɛ nyɛmimɛi,’ mɛi ni abaptisi amɛ lɛ ahe. (1 Korintobii 5:11) Shi ani enɛ tsɔɔ akɛ, belɛ aku hiɛ ashwie nɔ fɔŋ feemɔ lɛ nɔ? Dabi.

¹⁷ Gbɛnaa nii ka onukpai lɛ anɔ akɛ ‘amɛkwɛ Nyɔŋmɔ asafo kuu ni akɛwo amɛdɛŋ lɛ nɔ.’ (1 Petro 5:⁠2) Kɛji akɛ onukpai enyɔ lɛ ni kɛ yelikɛbuamɔ haa lɛ kpɛ mli akɛ nɔ fɔŋ feelɔ ni abaptisiko lɛ lɛ tsakeee etsui ni esaaa akɛ efeɔ shiɛlɔ lɛ, amɛbaabɔ mɔ lɛ amaniɛ.d Aloo kɛji akɛ mɔ ni abaptisiko lɛ lɛ kɛɛ onukpai lɛ akɛ esumɔɔɔ ni aleɔ lɛ akɛ shiɛlɔ dɔŋŋ lɛ, amɛbaakpɛlɛ eyiŋkpɛɛ lɛ nɔ. Yɛ eko fɛɛ eko mli lɛ, ehe baahia ni Asafoŋ Sɔɔmɔ Ajinafoi lɛ ato adafitswaa kuku ko he gbɛjianɔ yɛ be ni sa mli, akɛ “(ashimashi) jeee sanekpakpa lɛ he shiɛlɔ dɔŋŋ.”

18. (a) Yɛ adafitswaa ni tamɔ nɛkɛ sɛɛ lɛ, mɛni Kristofoi baaha ahi amɛ diɛŋtsɛ amɛjwɛŋmɔ mli yɛ be mli ni amɛkpɛɔ amɛyiŋ yɛ bɔ ni esa akɛ amɛfee amɛnii amɛha lɛ he lɛ? (b) Ani ehe miihia akɛ akwa mɛi ni abaptisiko amɛ ni amɛyɛ nɔ fɔŋ feemɔ mli fɔ yɛ tsutsu be ko lɛ ni akɛ amɛ akabɔ kwraa?

¹⁸ Belɛ te Odasefoi lɛ baabu gbɔmɔ ni tamɔ nɛkɛ aha tɛŋŋ yɛ adafitswaa nɛɛ sɛɛ? Ojogbaŋŋ, shishijee mli lɛ, kulɛ eji ‘mɔ ni heee yeee’ ni baa asafoŋ kpeei. No mli lɛ eesumɔ ni efee ni ehe asa akɛ sanekpakpa lɛ shiɛlɔ. Agbɛnɛ ebɛ lɛ nakai dɔŋŋ, no hewɔ lɛ ebatsɔ je lɛŋ nyo. Biblia lɛ biii ni Odasefoi akpoo wiemɔ ni akɛlɛ aaawie, ejaakɛ ashwieko lɛ.e Ni kɛlɛ, Kristofoi lɛ baakwɛ jogbaŋŋ yɛ nɛkɛ gbɔmɔ ni yɔɔ je lɛ mli ni jaaa Yehowa nɛɛ he, taakɛ bɔ ni Israelbii lɛ fee yɛ gbɔi ni afoko amɛ ketia ni hi amɛteŋ lɛ ahe lɛ. Nɛkɛ henɔkwɛmɔ jogbaŋŋ nɛɛ yeɔ buaa ni abuɔ asafo lɛ he kɛjɛɔ “masha bibioo” loo nibii ni baanyɛ afite asafo lɛ he. (1 Korintobii 5:⁠6) Kɛji akɛ yɛ sɛɛ mli be ko lɛ etsɔɔ yɛ anɔkwale mli akɛ eesumɔ ni ena Biblia mli nikasemɔ, ni etamɔ nɔ ni esa yɛ onukpai lɛ ahiɛ lɛ, ekolɛ ebaanyɛ eye ebua lɛ ni ehiɛ asɔ hegbɛ ni mɔ yɔɔ akɛ ekɛ Yehowa webii aaaja lɛ ekoŋŋ lɛ.​—Lala 100.

19. Mɛɛ gbɛ nɔ onukpai lɛ baatsɔ ni amɛkɛ yelikɛbuamɔ aha lolo yɛ teemɔŋ yɛ saji lɛ ekomɛi amli?

¹⁹ Kɛji akɛ onukpai lɛ na akɛ mɔ ko ni tamɔ nɛkɛ he yɛ gbeyei kɛha asafo kuu lɛ, amɛbaanyɛ amɛbɔ mɛi ni oshara eba amɛhe lɛ kɔkɔ yɛ teemɔŋ. Akɛ nɔkwɛmɔ nɔ lɛ, tsutsu shiɛlɔ lɛ baanyɛ afee obalaŋta ni etsɔ daatɔlɔ loo ahoshwibɔlɔ. Yɛ adafi ni atswa akɛ ejeee shiɛlɔ ni abaptisiko lɛ dɔŋŋ lɛ fɛɛ sɛɛ lɛ, ebaabɔ mɔdɛŋ ni ekɛ obalaŋtai ni yɔɔ asafo lɛ mli lɛ abɔ. Yɛ shihilɛ ni tamɔ nɛkɛ mli lɛ, belɛ onukpai lɛ kɛ obalaŋtai ni eeenyɛ eba akɛ aaalaka amɛ nɛɛ afɔlɔi baawie, kɛ agbɛnɛ ekolɛ nakai obalaŋtai lɛ hu. (Hebribii 12: 15, 16; Bɔfɔi lɛ Asaji 20:​28-30) He ni mɔ lɛ baanyɛ afee naagbalɔ loo mɔ ni taoɔ aye awui, tsɛbelɛ enɛ efɔɔɔ kaa lɛ, abaanyɛ akɛɛ Iɛ akɛ ataooo lɛ yɛ kpeei ashishi dɔŋŋ ni akɛ mɔdɛŋ ni eeebɔ akɛ eeefee nakai lɛ baafee tɔmɔ ni mla eŋmɛɛɛ gbɛ yɛ egbɛfaŋ.

Yelikɛbuamɔ ni Akɛaaha Gbekɛbii ni Amɛja Nyɔŋmɔ

20. Mɛɛ yelikɛbuamɔ fɔlɔi Kristofoi kɛhaa amɛbii, ni mɛni jɛɔ mli baa?

²⁰ Biblia lɛ kɛ gbɛnaa nii fɔɔ fɔlɔi anɔ akɛ esa akɛ amɛtsɔse amɛbii yɛ Nyɔŋmɔ anɔkwale lɛ mli. (5 Mose 6:​4-9; 31:​12, 13) No hewɔ lɛ, Yehowa Odasefoi ejɛ jeeŋmɔ beebe amɛwo Kristofoi awekui ahewalɛ ni amɛna daa otsi Biblia kasemɔ he gbɛjianɔtoo. Esa akɛ fɔlɔi ni ji Kristofoi lɛ awo amɛbii bibii lɛ ahewalɛ ni amɛya amɛhiɛ kɛyashɛ henɔjɔɔmɔ kɛ baptisimɔ he koni amɛtsɔ nɔ amɛna Nyɔŋmɔ nɔkpɛlɛmɔ. (Abɛi 4:​1-7) Wɔnaa nɔ ni ejɛ enɛ mli eba ni yɔɔ miishɛɛ lɛ yɛ asafoi lɛ amli​—obalaŋtai akpei ohai abɔ ni feɔ nɔkwɛmɔ nɔ kpakpa ni sumɔɔ Yehowa ni miisumɔ ni amɛja lɛ kɛya naanɔ.

21-23. (a) Titri lɛ, te atsuɔ gbekɛ ni efee efɔŋ lɛ tɔmɔ lɛ he nii ahaa tɛŋŋ? (b) Mɛni asafoŋ onukpai tsuɔ yɛ shihilɛi ni tamɔ nɛkɛ mli?

²¹ Gbɛnaa nii titri hu ka fɔlɔi ni ji Kristofoi anɔ akɛ amɛtsɔse amɛbii ni amɛka amɛ, ni amɛkɛ naatsii fɛɛ naatsii loo toigbalamɔ ni suɔmɔ yɔɔ mli ni amɛnaa akɛ ehe miihia lɛ aha amɛ. (Efesobii 6:4; Hebribii 12:​8, 9; Abɛi 3:​11, 12; 22:15) Shi kɛji akɛ gbekɛ ni kɛ ehe bɔɔ asafo lɛ he akɛ shiɛlɔ ni abaptisiko lɛ lɛ kɛ ehe wo nɔ fɔŋ feemɔ ni hiɛdɔɔ yɔɔ mli lɛ mli lɛ, ebafeɔ nɔ ni esa akɛ onukpai lɛ ni ‘buɔ asafo kuu lɛ susumai ahe’ lɛ asusu he jogbaŋŋ​—Hebribii 13:⁠17.

²² Klɛŋklɛŋ lɛ, esa akɛ atsu nɔ fɔŋ feemɔ nɛɛ he nii taakɛ bɔ ni atsɔ hiɛ atsɔɔ yɛ nikasemɔ nɛɛ mli lɛ. Abaanyɛ ahala onukpai enyɔ ni amɛkwɛ sane lɛ mli. Akɛ nɔkwɛmɔ nɔ lɛ, amɛbaanyɛ ni klɛŋklɛŋ lɛ amɛkɛ fɔlɔi (loo fɔlɔ) lɛ asusu nɔ ni eba lɛ he, kɛ agbɛnɛ bɔ ni gbekɛ lɛ subaŋ ji, kɛ tsɔsemɔ gbɛi ni jajeɔ mɔ ni atsɔ nɔ lɛ he. (Okɛto 5 Mose 21:​18-21 he.) Kɛji akɛ fɔlɔi ni ji Kristofoi lɛ miitsu shihilɛ lɛ he nii jogbaŋŋ lɛ, onukpai lɛ baanyɛ ni yɛ be kɛ bei amli lɛ amɛkwɛ nɔ ni yaa nɔ koni amɛkɛ ŋaawoo ni yeɔ buaa, gbɛtsɔɔmɔi kɛ hewalɛwoo ni suɔmɔ yɔɔ mli aha.

²³ Shi yɛ bei komɛi amli lɛ, sane ni akɛ fɔlɔi lɛ gbaa lɛ tsɔɔ akɛ ebaahi jogbaŋŋ akɛ onukpai lɛ kɛ gbekɛ ni egba afa lɛ kɛ efɔlɔi aaakpe. Akɛni amɛle obalaŋtai afatɔɔi kɛ amɛsui hewɔ lɛ, nɔkwɛlɔi lɛ baabɔ mɔdɛŋ ni amɛkɛ mlijɔlɛ awie atsɔɔ obalaŋta ni ji shiɛlɔ ni abaptisiko lɛ lɛ. (2 Timoteo 2:​22-26) Yɛ saji lɛ ekomɛi amli po lɛ, ebaafee faŋŋ akɛ ejeee mɔ ni sa akɛ efeɔ shiɛlɔ dɔŋŋ ni akɛ esa akɛ akɛ adafitswaa ni sa aha.

24. (a) Kɛji akɛ gbekɛ ko kɛ ehe ewo nɔ fɔŋ feemɔ ko ni hiɛdɔɔ yɔɔ mli lɛ mli po lɛ, mɛni esa akɛ fɔlɔi afee, ni mɛɛ gbɛ nɔ amɛbaatsɔ ni amɛtsu enɛ he nii yɛ? (b) Enɛ baakɔ gbekɛ ni ashwie lɛ lɛ he yɛ mɛɛ gbɛ nɔ?

²⁴ Yɛ no sɛɛ lɛ, mɛni fɔlɔi lɛ baanyɛ afee yɛ amɛbi bibioo ni tɔɔ nɛɛ he? Gbekɛ lɛ he sɔ ka amɛnɔ lolo, eyɛ mli akɛ ejeee mɔ ni sa akɛ shiɛlɔ ni abaptisiko lɛ aloo po kɛ ashwie lɛ yɛ ebaptisimɔ lɛ sɛɛ efɔŋ ni eyafee hewɔ. Taakɛ bɔ ni amɛbaaya nɔ ni amɛha lɛ niyenii, hehaa nɔ kɛ wɔɔhe lɛ, nakai nɔŋŋ ehe hiaa ni amɛtsɔɔ lɛ nii ni amɛkɛ Nyɔŋmɔ Wiemɔ lɛ atsɔse lɛ. (Abɛi 6:​20-22; 29:17) No hewɔ lɛ, fɔlɔi ni yɔɔ suɔmɔ baato gbɛjianɔ ni amɛkɛ lɛ akase Biblia lɛ, kɛji akɛ ashwie lɛ po.f Ekolɛ ebaana tsɔsemɔ ni jajeɔ mɔ ni baa kɛjɛɔ nii ni amɛkɛ lɛ pɛ kaseɔ lɛ mli baa lɛ he sɛɛ. Aloo amɛbaanyɛ amɛto amɛyiŋ akɛ amɛbaaha efata weku nikasemɔ gbɛjianɔtoo lɛ he. Eyɛ mli akɛ egba afa moŋ, shi amɛbaasumɔ ni amɛna ni eku sɛɛ eba Yehowa ŋɔɔ ekoŋŋ, taakɛ bi nyenyeŋtswi lɛ ni yɔɔ Yesu abɛbua lɛ mli lɛ fee lɛ.​—Luka 15:​11-24.

25. Mɛni hewɔ agbalaa jwɛŋmɔ kɛ yelikɛbuamɔ ni suɔmɔ yɔɔ mli kɛbaa “mɛi ni heee yeee” ni yɔɔ ŋmɛnɛ lɛ anɔ lɛ?

²⁵ Oti ni yɔɔ wɔshiɛmɔ kɛ nitsɔɔmɔ lɛ mli ji ni wɔye wɔbua mɛi krokomɛi ni amɛbatsɔmɔ anɔkwa Nyɔŋmɔ lɛ jalɔi ni yɔɔ miishɛɛ. Nɔ ko tsirɛ ‘mɛi ni heee yeee kɛ mɛi ni leee mli eko’ ni yɔɔ Korinto lɛ ni no ha ‘amɛkɛ amɛhiɛ bumɔ shi ni amɛja Nyɔŋmɔ, ni amɛjaje akɛ: “Nyɔŋmɔ yɛ nyɛteŋ lɛlɛŋ.’” (1 Korintobii 14:25) Mɛɛ miishɛɛ eji ŋmɛnɛ akɛ wɔɔna ni mɛi babaoo miiba akɛ amɛbaaja Nyɔŋmɔ! Enɛ ji ŋwɛibɔfo lɛ sanejajemɔ: “Anunyam aha Nyɔŋmɔ yɛ ŋwɛi flooflo, ni hejɔlɛ aba shikpɔŋ lɛ nɔ, [ni ana gbɔmɛi ni Nyɔŋmɔ ekpɛlɛ amɛnɔ] lɛ ahe tsuijurɔ” lɛ mlibaa ni yɔɔ nyam.​—Luka 2:⁠14.

[Shishigbɛ niŋmai]

Ani Okaiɔ?

◻ Te Kristofoi buɔ “mɛi ni heee yeee” ni baa kpeei lɛ tɛŋŋ?

◻ Kɛ Biblia kaselɔ ko miisumɔ ni ekɛ ehe awo shiɛmɔ nitsumɔ Iɛ mli Iɛ, mɛni ji gbɛ ni onukpai Iɛ tsɔɔ nɔ ni mɛɛ gbɛnaa nii nikaselɔ Iɛ kpɛlɛɔ nɔ?

◻ Mɛni afeɔ kɛ shiɛlɔ ko ni abaptisiko lɛ fee esha ni hiɛdɔɔ yɔɔ mli?

◻ Te fɔlɔi Iɛ kɛ onukpai Iɛ aaafee tɛŋŋ ni amɛye amɛbua gbekɛbii ni yɔɔ shia kɛji akɛ nɛkɛ gbekɛbii nɛɛ fee asha ni hiɛdɔɔ yɔɔ mli po Iɛ?

[Mfoniri ni yɔɔ baafa 16]

Ni mɔ ko aaatsɔ shiɛlɔ, ni kɛlɛ abaptisiko lɛ lɛ ji nifeemɔ ni he hiaa kɛ gbɛnaa nii yɛ Nyɔŋmɔ nɔkpɛlɛmɔ ni anaa lɛ mli