“Nyɛshea Nyɔŋmɔ Gbeyei Ni Nyɛkɛ Anunyam Ahaa Lɛ”

“Nyɛshea Nyɔŋmɔ gbeyei ni nyɛkɛ anunyam ahaa lɛ.”​—KPOJIEMƆ 14:7

 1. Namɔ esa akɛ wɔshe lɛ gbeyei, ni mɛni esaaa akɛ wɔsheɔ no gbeyei?

NAMƆ GBEYEI ESA AKƐ WƆSHE? Yɛ anɔkwale mli lɛ jeee drako tsuru lɛ, Satan kɛ edaimonioi asafoi lɛ! Kristo Yesu shɛrɛ amɛ eshwie kɛjɛ ŋwɛi yɛ Maŋtsɛyeli lɛ fɔmɔ yɛ 1914 lɛ sɛɛ. Shi Apokalips loo Kpojiemɔ mli ninai lɛ tee nɔ etsi gbɛjianɔtoo ni Satan kɛtsuɔ nii yɛ shikpɔŋ nɛɛ nɔ lɛ tã yɛ naagbee mɔdɛŋ ni ebɔɔ koni ekɛfite Nyɔŋmɔ yiŋtoi lɛ. Mɛi ni je kpo waa yɛ nɛkɛ mfoniri ni afee nɛɛ mli ji kooloi wuji enyɔ ni hiɛ yɔɔ la kɛ ajwamaŋ ko ni etɔ daa​—Babilon Kpeteŋkpele lɛ. Ani esa akɛ wɔshe mɛnɛɛmɛi agbeyei? Dabida kwraa! Shi moŋ, esa akɛ wɔshe Yehowa kɛ e-Kristo lɛ, ni e-Maŋtsɛyeli lɛ kɛ Satan jeŋ ni ekpɔtɔ lɛ eba enaagbee kojomɔ mli lɛ gbeyei​—Abɛi 1:7; Mateo 10:​28; Kpojiemɔ 12:​9-12.

Musubɔɔ Kooloi

 2. Mɛɛ kooloo ana yɛ ninaa ni ji kpaanyɔ lɛ mli, ni edamɔ shi kɛha mɛni?

² Yɛ be mli ni Kpojiemɔ wolo lɛ mli ninaa ni ji kpaanyɔ lɛ mli gbeleɔ lɛ, kooloo ko ni hiɛ yɔɔ la te shi kɛjɛ adesai ŋshɔ ni hiɛ efee hamahama lɛ mli. Eyɛ yitsei kpawo kɛ akoloŋtoi nyɔŋma kɛ maŋtsɛfaii nyɔŋma ni damɔ shi kɛha maŋtsɛmɛi ahegbɛ ni Satan kɛha lɛ. Ebɔ Yehowa musu, ni ekpata Etsuji lɛ ahiɛ taakɛ mlaŋtswi, oshishibirishii loo jata baafee; shi ehewalɛ lɛ sɛɛ etsɛɛɛ, ni ena kɛjɛ drako, Satan abonsam, ni etamɔ lɛ lɛ dɛŋ. No mli lɛ gbalɔ Daniel etsɔ hiɛ etsɔɔ shikpɔŋ nɔ maŋkwramɔ nɔyelii lɛ akɛ amɛtamɔ kooloi, ni nɔyelii lɛ diɛŋtsɛ halaa kooloi ni hiɛ wa akɛ amɛmaŋ lɛ okadi yɛ be babaoo mli, tamɔ Ŋleshi jata lɛ kɛ Amerika okropɔŋ lɛ nɛkɛ. (Daniel 8:5​—8, 20-22) Shi agbɛnɛ, wɔmiina kooloo ko ni gbɔmɛi pii feɔ, ni kɔɔ maŋkwramɔŋ hewalɛi fɛɛ ni ehi shi yɛ Biblia yinɔsane mli ni amɛwa Nyɔŋmɔ tsuji anɔkwafoi ni yɔɔ shikpɔŋ nɔ lɛ ayi yɛ be babaoo mli lɛ he. “Yitsei” ni ekaaa yɛ enɛ mli lɛ ji Mizraim, Ashur, Babilon, Medo-Pershia, Hela, Roma, kɛ naagbee lɛ Anglo-Amerika Jeŋ Hewalɛ ni Bɔ He Enyɔ Lɛ.​—Kpojiemɔ 13:​1, 2; 12:​3, 7-9.

 3. (a) Te fee tɛŋŋ ni kooloo lɛ yitsei lɛ ekome na “gbele pilamɔ” lɛ? (b) Kooloo ni hiɛ akoloŋtoi enyɔ lɛ tsɔ hiɛ kɛfee klɛŋklɛŋ kooloo lɛ he amaga yɛ mɛɛ gbɛ nɔ? (d) Mɛni ji klɛŋklɛŋ kooloo lɛ gbɛi kɛ nɔ ni gbɛi lɛ tsɔɔ?

³ Yɛ 1914-1918 jeŋ ta lɛ mli lɛ, Ŋleshi Ablotsiri ni ji jeŋ hewalɛ ni gbeɔ yi feɔ kpawo lɛ na “gbele pilamɔ” ko ni kulɛ eeenyɛ egbe lɛ. Shi U.S.Amerika baye bua lɛ. Kɛjɛ nakai be lɛ nɔ kɛbaa nɛɛ, Amerika kɛ Britania ni ji Ŋleshi Ablotsiri ekpa gbee ni amɛfee ekome akɛ jeŋ hewalɛ ni bɔ he enyɔ, ni Yohane tsɔɔ bɔni eji akɛ kooloo ni hiɛ akoloŋtoi enyɔ efa kpo kɛjɛ “shikpɔŋ” ni ji adesai ateŋ. Nɛkɛ kooloo ni hiɛ akoloŋtoi enyɔ nɛɛ nyiɛ hiɛ ni eha afee klɛŋklɛŋ kooloo lɛ he amaga ni emu wala mumɔ ewo emli, ni tsɔɔ bɔ ni Anglo-Amerika Jeŋ Hewalɛ lɛ bafee mɛi titri ni ha ato Jeŋmaji Akpaŋmɔ lɛ kɛ esɛɛyelɔ ni ji Jeŋmaji Ekomefeemɔ lɛ ama shi lɛ. Nakai kooloo lɛ yɛ yibɔ okadi ko ni ji 666. Ekpaa ji yibɔ okadi ko ni yeee emuu​—eshɛɛɛ Biblia mli kpawo ni yeɔ emuu lɛ he​—no hewɔ lɛ ekpaa ni ebɔ he etɛ lɛ tsɔɔ emuu ni adesai nɔyelɔi ni yɔɔ ŋmɛnɛ lɛ yeee kwraa lɛ. Eyɛ mli akɛ Yehowa Odasefoi kɛ bulɛ haa nɔyeli ni amɛboɔ shikpɔŋ ni amɛyɔɔ nɔ lɛ amlai toi yɛ gbɛ ni ekaaa nɔ moŋ, shi amɛkɛ ekaa kpooɔ akɛ amɛaaja “kooloo lɛ” loo emaga lɛ.​—Kpojiemɔ 13:​3-18; Romabii 13:​1-7.

She Nyɔŋmɔ Gbeyei​—Mɛni Hewɔ?

 4. (a) Namɛi ana ni amɛdamɔ ŋwɛi Zion Gɔŋ lɛ nɔ lɛ, ni onukpai 24 lɛ ni yɔɔ Nyɔŋmɔ maŋtsɛsɛi lɛ hiɛ lɛ feɔ namɛi ahe mfoniri? (b) Mɛɛ sɔrɔtofeemɔ yɔɔ “lala hee” ni mɛi ni afɔ amɛ mu lɛ la kɛ “lala hee” ni asafo babaoo lɛ la lɛ teŋ?

⁴ Amrɔ nɛɛ lɛ, nɔ ni wɔna yɛ kooloi lɛ ahe lɛ fa! Nɔ ni tamɔɔɔ enɛ, nɔ ni yɔɔ miishɛɛ hu ji akɛ, ninaa ni ji nɛɛhu nɔ lɛ gbalaa jwɛŋmɔ kɛyaa Toobi lɛ nɔ. Edamɔ Zion Gɔŋ lɛ nɔ, kɛ 144,000 lɛ ni ehe amɛ akɛ klɛŋklɛŋ yibii yɛ adesai ateŋ lɛ. Eyɛ mli akɛ mɛnɛɛmɛi ateŋ mɛi komɛi miisɔmɔ yɛ shikpɔŋ lɛ nɔ lolo moŋ, shi yɛ mumɔŋ shishinumɔ naa lɛ 144,000 lɛ fɛɛ “ebɛŋkɛ Zion Gɔŋ” lɛ ni ji . . . ŋwɛi Yerusalem lɛ he. (Hebribii 12:22) Anaa onukpai 24 lɛ hu yɛ gbɛ ni sa nɔ akɛ amɛdamɔ Nyɔŋmɔ Maŋtsɛsɛi lɛ hiɛ, ejaakɛ amɛfeɔ nakai kuu ni afɔ amɛ mu lɛ nɔŋŋ he mfoniri yɛ shishinumɔ kroko naa​—akɛ atee amɛ shi momo ni ahala amɛ akɛ maŋtsɛmɛi kɛ osɔfoi. 144,000 lɛ miila “lala hee.” Fɛɛ jɛ amɛ niiashikpamɔ ni ekaaa ni ji he ni ahe amɛ kɛjɛ shikpɔŋ lɛ nɔ ni amɛbatsɔmɔ Maŋtsɛyeli lɛ niyelɔi lɛ. Asafo babaoo lɛ hu “laa lala hee amɛhaa Yehowa.” Shi enɛ yɛ sɔrɔto ejaakɛ amɛlaa kɛ gbɛkpamɔ akɛ amɛbaana naanɔ wala yɛ Maŋtsɛyeli lɛ nɔyeli he ni ji shikpɔŋ nɛɛ nɔ lɛ nɔ.​—Kpojiemɔ 7:9; 14:​1-5; Lala 96:​1-10; Mateo 25:​31-34. .

 5. (a) Mɛɛ sane ŋwɛi bɔfo ni flikiɔ yɛ ŋwɛi teŋ lɛ jajeɔ, ni mɛni hewɔ eji naanɔ nɔ lɛ? (b) Mɛɛ famɔ bɔfo lɛ kɛ gbee wulu jaje, ni mɛni hewɔ esa jogbaŋŋ nakai lɛ?

⁵ Ninaa lɛ mli lɛɛ agbɛnɛ. Yohane na bɔfo kroko ni miifiliki yɛ ŋwɛi teŋ. Ni mɛɛ sanekpakpa ehiɛ ni eyaajaje nɛkɛ! Eji naanɔ sanekpakpa, ejaakɛ eji naanɔ wala kɛha mɛi fɛɛ ni jɛ jeŋmaji kɛ akutsei kɛ wiemɔi kɛ gbɔmɛi sɔrɔtoi ni boɔ Nyɔŋmɔ toi yɛ nɛkɛ kojomɔ ŋmɛlɛtswaa mli lɛ. Nɔ ni kɛ kooloo ni he yɔɔ gbeyei ni Yohane na ni atsɔɔ mli lɛ nɔ lɛ kpaaa gbee lɛ, mɛni hewɔ esaaa akɛ ajaa Nyɔŋmɔ ni he yɔɔ naakpɛɛ nɛɛ, hɛɛ ni ajieɔ eyi? Lɛ ji Mɔ ni bɔ ŋwɛi kɛ shikpɔŋ. Lɛ ji nibii fɛɛ ni yɔɔ, nibii ni yɔɔ wala mli kɛ nibii ni bɛ wala lɛ Ajɛɛhe. Belɛ yiŋtoo ni mli wa ko hewɔ ni bɔfo lɛ fa kɛ gbee ni naa wa lɛ akɛ “NYƐSHEA NYƆŊMƆ GBEYEI NI NYƐKƐ ANUNYAM AHAA LƐ”! lɛ. Anu ŋwɛi bɔfo lɛ gbee yɛ shikpɔŋ muu lɛ fɛɛ nɔ, ni Yehowa Odasefoi haa eninefɔɔ nɛɛ jijeɔ kɛyaa adesai fɛɛ aŋɔɔ yɛ wiemɔi aaafee 200 mli.​—Kpojiemɔ 14:6, 7; Yesaia 45:​11, 12, 18.

Babilon Kpeteŋkpele lɛ Shigbeemɔ

 6. Mɛɛ sane kroko ni hɛleɔ mɔ shi ŋwɛi bɔfo kroko jaje?

⁶ Bɔfo kroko pue. Sane ni ejaje lɛ yɛ naakpɛɛ lɛlɛŋ: “Ejwa, Babilon maŋ kpeteŋkpele lɛ ejwa, ejaakɛ eha jeŋmaji lɛ fɛɛ enu ejwamaŋbɔɔ lɛ he mlifu daa lɛ eko.” (Kpojiemɔ 14:⁠8) Namɔ ji Babilon Kpeteŋkpele lɛ, akɛ enyɛɔ elakaa jeŋ maji ni ehaa amɛtɔrɔɔ daa po lɛ?

 7. Mɛni ji Babilon Kpeteŋkpele lɛ, ni mɛɛ gbɛ nɔ etsɔ eba?

⁷ Blema Babilon ji apasa jamɔ, ni gbɛ shwa kɛtee shikpɔŋ muu lɛ fɛɛ nɔ ni ebatsɔ daimonioi ajeŋ maŋtsɛyeli ni awo lɛ gbɛi yɛ gbɛ ni ja nɔ akɛ “Babilon Kpeteŋkpele” lɛ shishitoo. Yɛ be ni sa mli lɛ, Roma bahe gbɛi waa yɛ nakai jamɔ maŋtsɛyeli lɛ mli, ejaakɛ Roma shishi Kristojamɔ ni kwa hemɔkɛyeli lɛ fa kpo kɛjɛ. Roma etee nɔ efee Babilon jamɔi shihilɛ hei yɛ je lɛŋ. Enɛ bafee faŋŋ yɛ 1986 yɛ be mli ni je lɛŋ jamɔŋ hiɛnyiɛlɔi lɛ here tsɛmɔ ko ni Roma Paapa lɛ kɛha akɛ abua he naa ni akɛ lɛ akpe yɛ Assisi ni bɛŋkɛ Roma lɛ nɔ ni amɛsɔle amɛha Majimaji Ateŋ Toiŋjɔlɛ Afi ni Jeŋmaji Ekomefeemɔ lɛ ejaje lɛ nɔ lɛ.

 8. (a) Te fee tɛŋŋ ni Babilon Kpeteŋkpele lɛ gbee shi, ni kɛjɛ mɛɛ be abayoo enɛ? (b) Mɛni tsɔɔ akɛ ahaaa jamɔ mli hiɛnyiɛlɔi lɛ asɔlemɔ kɛha toiŋjɔlɛ lɛ ahetoo?

⁸ Shi, Babilon Kpeteŋkpele lɛ egbee shi, ni eshigbemmɔ lɛ da naakpa! Kɛjɛ 1919 kɛbaa nɛɛ enɛ efee faŋŋ yɛ gbɔmɛi babaoo ni tsiɔ amɛhe kɛjɛɔ apasa jamɔ sɛɛ ni amɛfiɔ yɛ jeŋ fɛɛ mli lɛ he. Komunisim ni heee Nyɔŋmɔ eyeee lɛ ena hewalɛ yɛ shikpɔŋ lɛ fa anɔ. Ŋmɛnɛ aatsɔɔ obalaŋtai sutsakemɔ, ni teɔ shi woɔ Nyɔŋmɔ Wiemɔ lɛ. Ni yɛ Europa ni Protestantbii fa yɛ jɛmɛ lɛ po lɛ, gbɔmɛi pii eyaaa sɔlemɔ dɔŋŋ, ni paapa ko ni faa gbɛ waa miibɔ mɔdɛŋ waa ni ebua e-Katolik maŋtsɛyeli lɛ naa efee lɛ ekome. Sɔlemɔ ni afeɔ babaoo ahaa je lɛŋ jamɔi sɔrɔtoi lɛ anyɔŋmɔi sɔrɔtoi babaoo lɛ yaa ni hetoo baaa. Ruth L. Sivard bɔ amaniɛ akɛ: “Awuu tai nyɔŋmai enyɔ kɛ enyɔ yɛ 1987 mli, tai ni fa fe fɛɛ ni ale kɛha afi kome yɛ yinɔsane mli. Kɛ hooo lɛ, gbɔmɛi ni agbe yɛ nɛkɛ tai nɛɛ amli kɛbashi bianɛ ji 2,200,000​—ni amɛmiifa kɛmiiya hiɛ waa.a Kwɛ bɔ ni sɛɛnamɔ ko kwraa jɛɛɛ Asisi sɔlemɔ kpee ni afee lɛ mli baaa! Shi kɛlɛ, Paapa lɛ kadi ni eye 1987 nifeemɔ nɛɛ gbijurɔ kɛtsɔ shika ko ni emfoniri yɔɔ afa kome ni sɔlemɔ gwabɔɔ lɛ hu yɔɔ afa kroko nɔ ni ejie lɛ kpo lɛ nɔ. Amɛyaa nɔ amɛkɛɔ akɛ: “Omanye, omanye. Shi omanye ko bɛ.”​—Yeremia 6:⁠14.

Akpa Babilon Ajwamaŋbɔɔ lɛ he Mama

 9. Babilon Kpeteŋkpele lɛ osɔfoi lɛ ehe gbɛi gbonyo yɛ mɛɛ jeŋba shara mli nifeemɔi ahewɔ?

⁹ Kpojiemɔ 14:8 tsɔɔ akɛ Babilon Kpeteŋkpele lɛ ji ajwamaŋbɔlɔ. Ayoo esɔfoi lɛ yɛ amɛjeŋba shara gbɛi lɛ ahewɔ. T.V. nɔ sanekpakpashiɛlɔi eshɛ amɛtoi lɛ ahe tsɔi kɛshɛ dɔlai akpekpei ohai abɔ mli, yɛ be mli ni yɛ nakai beaŋ nɔŋŋ lɛ, amɛkɛ amɛhe woɔ jeŋba shara ni ehiii kwraa mli. Aabi sane yɛ Katolik osɔfoi lɛ hu ahe waa, taakɛ amaniɛbɔɔ ni jɛ The Beacon Journal ni aŋma yɛ Philadelphia, Pennsylvania, January 3, 1988 mli lɛ tsɔɔ lɛ. “Gbekɛbii ohai abɔ ni Katolik osɔfoi feɔ amɛ niseniianii yɛ U.S. Amerika yɛ afi enumɔ ni eho nɛɛ amli lɛ ena henumɔŋ hela, ni nɛkɛ ji bɔ ni amɛfɔlɔi, jwɛŋmɔ nikasemɔ he nilelɔi, polisi onukpai kɛ mlalelɔi ni kɔɔ sane lɛ he lɛ kɛɔ.” Bɔlɛnamɔ mli jeŋba shara efite Babilon Kpeteŋkpele lɛ ateŋ mɛi pii agbɛi.

10. (a) Babilon Kpeteŋkpele lɛ “ajwamaŋbɔɔ” ni yɔɔ Kpojiemɔ 18:3 lɛ tsɔɔ mɛni? (b) Taakɛ akadi yɛ Kpojiemɔ 18:24 lɛ, mɛni hewɔ la yi sɔyeli ni tsii ka Babilon Kpeteŋkpele lɛ mli osɔfoi lɛ anɔ lɛ?

¹⁰ Shi “ejwamaŋbɔɔ lɛ he mlifu daa lɛ” kɔɔ bɔ ni apasa jamɔ elaka nɔyelɔi lɛ, ni amɛfi amɛ maŋkwramɔŋ tafaai kɛ tawuu sɛɛ ni amɛnyɛ gbɔmɛi lɛ anɔ koni amɛja maŋ lɛ gbɛjianɔtoo ko ni nakai koolo lɛ to lɛ he titri. Maŋkwralɔi lɛ naa yɛ be babaoo mli akɛ jamɔ ji amɛhefatalɔ ni sɛɛnamɔ yɔɔ ehe ejaakɛ amɛtsɔɔ enɔ ni amɛnine shɛɔ nɔ ni amɛtaoɔ lɛ nɔ, taakɛ anaa yɛ kpaŋmɔ ni Hitler kɛ Vatikan fee yɛ 1933 lɛ mli lɛ kɛ Spanish Maŋ Ta ni tee nɔ yɛ 1935​—36 lɛ. Yɛ Jeŋ Ta II be lɛ mli lɛ, Katolik, Protestant kɛ Buddha osɔfoi kɛ jamɔi krokomɛi ni yɔɔ afai enyɔ lɛ fɛɛ fee tamɔ maŋ hedɔɔ ni ta lɛ kɛba lɛ etɔrɔ amɛ daa. Amɛye la yi sɔ babaoo, yɛ asraafoi kɛ maŋbii akpekpei toi nyɔŋma nyɔŋmai abɔ ni egboi kɛjɛ 1914 ta lɛ sɛɛ kɛbaa nɛɛ hewɔ. Osɔfoi lɛ ni fi Fascist Italia kɛ Nazi Germany sɛɛ lɛ hu eye la yi sɔ yɛ Yehowa Odasefoi lɛ kɛ mɛi krokomɛi lɛ ni amɛgbe amɛ loo amɛgboi yɛ gboklɛfoi aŋsraŋ lɛ hewɔ​—Yeremia 2:​34; Kpojiemɔ 18:​3, 24.

11. (a) Mɛni ji nɔ ni Kristofoi ni afɔ amɛ mu lɛ kɛ asafo babaoo lɛ kpoo akɛ amɛaaja? (b) Mɛɛ gbɛkpamɔ ni yɔɔ nyam ko kɛ hewalɛ ni adamɔɔ nɔ asheɔ Nyɔŋmɔ gbeyei ni akɛ anunyam haa lɛ lɛ haa?

¹¹ Yɛ afii 74 ni eho nɛɛ amli lɛ, Kristofoi anɔkwafoi ni afɔ amɛ mu lɛ kɛ asafo babaoo lɛ ni amɛyi faa lɛ etee nɔ AMƐSHE NYƆŊMƆ GBEYEI NI AMƐKƐ ANUNYAM EHA LƐ. Wɔdamɔ shi shiŋŋ akɛ wɔjaŋ maŋ gbɛjianɔtoo ko ni kooloo lɛ kɛbaama shi. Wɔ kpoo akɛ wɔɔwo kooloo lɛ amaga lɛ hiɛ nyam​—Jeŋmaji Akpaŋmɔ lɛ kɛ Jeŋmaji Ekomefeemɔ lɛ​—ejaakɛ wɔyɔseɔ akɛ “Nuŋtsɔ [Yehowa] kɛ E-Kristo lɛ maŋtsɛyeli” lɛ pɛ baanyɛ ni ekɛ toijɔlɛ kɛ shweshweeshwe shihilɛ aba. Wɔtee nɔ wɔtswa wɔfai shi akɛ wɔbaaye “Nyɔŋmɔ kitai lɛ kɛ Yesu hemɔkɛyeli” lɛ nɔ. Nakai tsuishiŋmɛɛ lɛ mli yɛ nyɔmɔwoo! Kristofoi ni afɔ amɛ mu ni “gboi yɛ Nuŋtsɔ lɛ mli lɛ” ji mɛi ni abu amɛ akɛ amɛyɔɔ miishɛɛ, ejaakɛ “nibii ni amɛfeɔ lɛ nyiɛɔ amɛsɛɛ.” Yɛ asafo babaoo lɛ ateŋ mɔ ko ni baagbo yɛ yiwai ashishi, yɛ hela hewɔ aloo yɛ osharai ahewɔ lɛ, naanyobɔɔ ni ebaka amɛ kɛ Nyɔŋmɔ teŋ lɛ maa nɔ mi kɛhaa amɛ akɛ amɛbaana mra shitee yɛ “shikpɔŋ hee” ni atsɔ adesai anɔ ato lɛ mli. Nɛkɛ gbɛkpamɔi wuji ni yɔɔ nɛɛ kɛ yiŋtoo ni mli wa haa wɔ lɛlɛŋ koni WƆSHE NYƆŊMƆ GBEYEI Nl WƆWO EHIƐ NYAM.​—Kpojiemɔ 11:​15, 17; 12:​10; 14:​9-13; 21:⁠1.

12. Mɛɛ nikpamɔi sɔrɔtoi enyɔ yaa nɔ, ni yɛ mɛɛ be mli?

¹² Yɛ be mli ni kojomɔi lɛ yaa nɔ lɛ, ŋwɛibɔfoi lɛ tsɛ kɛha ŋmaakpamɔi sɔrɔtoi enyɔ. Klɛŋklɛŋ Nikpalɔ lɛ ji Yesu yɛ faŋŋ mli, ni eta maŋtsɛsɛi nɔ yɛ Maŋtsɛyeli anunyam mli kɛjɛ 1914 lɛ, ejaakɛ eta atatui yɛŋ nɔ, ni akekere fi eyitso ni “etamɔ gbɔmɔ bi.” Agbɛnɛ, ni wɔyɔɔ Nuŋtsɔ lɛ gbi lɛ mli nɛɛ, eekpa ŋmaa yɛ shikpɔŋ lɛ nɔ, klɛŋklɛŋ lɛ Kristofoi ni afɔ amɛ mu lɛ ateŋ mɛi ni eshwɛ lɛ, kɛkɛ lɛ asafo babaoo ni feɔ gbɔmɛi akpekpei abɔ lɛ. (Okɛto Mateo 25:​31-34; Yohane 15:​1, 5, 16 he.) Nɔ ni tamɔɔɔ enɛ lɛ, nikpamɔ ni ji enyɔ lɛ ji “shikpɔŋ lɛ nɔ wein yibii shabii lɛ,” ni ashɛrɛɔ awoɔ “Nyɔŋmɔ weinŋaanɔ kpeteŋkpele lɛ mli” lɛ. Enɛ ji kojomɔ ni atsuɔ he nii yɛ Har-Magedon, be ni afamɔɔ adesa efɔŋfeelɔi aweku lɛ kɛ yibii ni ji ebɔɔ lɛ ni anaanaa nɔ kwraa lɛ. Eba akɛ awo Yehowa hiɛ nyam yɛ shikpɔŋ lɛ nɔ weinyibii ni ebɔɔ yɔɔ mli ni ajieɔ kɛyaa nɛɛ hewɔ!​—Kpojiemɔ 14:​14-20, 16:​14, 16.

“Yehowa . . . Oja ni Oji Anɔkwafo”

13. (a) Yɛ ninaa ni ji nyɔŋma lɛ mli lɛ, mɛɛ lala mɛi ni afɔ amɛ mu ni atee amɛ shi lɛ laa, ni mɛɛ wiemɔi yɔɔ mli? (b) Yɛ mɛɛ gbɛ nɔ atsɔɔ Nyɔŋmɔ jalɛ kojomɔi lɛ amli faŋŋ yɛ nɛkɛ ninaa nɛɛ mli?

¹³ Wɔnaa nibii ni tee nɔ yɛ ŋwɛi yɛ Nyɔŋmɔ maŋtsɛsɛi lɛ hiɛ yɛ Kpojiemɔ lɛ mli ninaa ni ji nyɔŋma lɛ mli. Mɛɛ mlifilimɔ akɛbaa ehiɛ nɛkɛ! Mɛi ni afɔ amɛ mu ni atee amɛ shi lɛ​—ni ye kunim akɛni AMƐSHEƆ NYƆŊMƆ GBEYEI Nl AMƐKƐ ANUNYAM HAA LƐ​—hewɔ lɛ miila ‘Mose kɛ Toobi lɛ lala lɛ’: “Onitsumɔi lɛ dara ni amɛyɛ naakpɛɛ, Nuŋtsɔ [Yehowa] Nyɔŋmɔ Ofe. Ogbɛi lɛ ja ni anɔkwa ji amɛ, Bo jeŋmaji lɛ amaŋtsɛ. Namɔ po sheŋo gbeyei, Nuŋtsɔ [Yehowa], ni ewoŋ Ogbɛi lɛ hiɛ nyam? Ejaakɛ bo Okometoo ji Mɔ krɔŋkrɔŋ; ejaakɛ jeŋmaji lɛ fɛɛ aaaba ni amɛbaja yɛ ohiɛ, ejaakɛ ajie ojalɛ nii lɛ ashi faŋŋ.” Nyɔŋmɔ kojomɔi ja ni amɛji anɔkwale lɛlɛŋ taakɛ atsɔɔ mli yɛ faŋŋ mli yɛ nɛkɛ ninaa nɛɛ mli fɛɛ lɛ! Ŋwɛi bɔfoi lɛ fɔseɔ Nyɔŋmɔ mlifu tɔi kpawo lɛ amɛshwie shi, ni nɔ ni jɛɔ mli baa ji jeŋmaji lɛ fɛɛ anaa ni abuaa kɛyaa Har-Magedon kɛ kaimɔ akɛ “akai Babilon Kpeteŋkpele lɛ yɛ Nyɔŋmɔ hiɛ”! Belɛ tsɛmɔ akɛ NYƐSHEA NYƆŊMƆ GBEYEI NI NYƐKƐ ANUNYAM AHAA LƐ lɛ eba yɛ ebe naa pɛpɛɛpɛ.​—Kpojiemɔ 15:​1–16:⁠21.

14. Yɛ ninai 11 kɛ 12 lɛ amli lɛ, mɛɛ gbɛfaŋnɔ kpele Babilon Kpeteŋkpele lɛ na yɛ mli, ni mɛni hewɔ be eshɛ ni esa akɛ aje emli lɛ?

¹⁴ Atsiɔ Babilon Kpeteŋkpele lɛ ta shii abɔ yɛ Kpojiemɔ. Wɔnaa lɛ ekoŋŋ akɛ mɔ titri yɛ ninai 11 kɛ 12 lɛ mli. “Eta nui pii anɔ,” eyeɔ gbɔmɛi lɛ anɔ loo ekudɔɔ amɛ ni ekɛ epasa tsɔɔmɔi ni ebɔɔ yɔɔ mli lɛ haa amɛtɔrɔɔ daa. Lɛ diɛŋtsɛ lɛ “krɔŋkrɔŋbii lɛ ala” ni ji mɛi ni etsɔ yiwaa mli egbe amɛ lɛ etɔ lɛ daa, ni eye la yi sɔ “yɛ mɛi fɛɛ ni agbe amɛ yɛ shikpɔŋ lɛ nɔ” yɛ eta ni ewuɔ lɛ hewɔ lɛ. Ejarayeli kɛ nitsumɔi wuji kɛ bɔni eshɔ shika kɛjɛ gbɔmɛi lɛ ahe lɛ eha ena nii babaoo yɛ gbɛ ni ehiii nɔ. Nɔ ni ahiɔ fe fɛɛ ji naanyo ni ekɛ maŋkwramɔ bɔɔ, kɛyashɛɔ he ni ehuruɔ etaa toiŋjɔlɛ kɛ shweshweeshwe shihilɛ kooloo lɛ​—Jeŋmaji Ekomefeemɔ lɛ nɔ ekɛheɔ gbɛi lɛ. Shi be eshɛ ni kooloo nɛɛ tawuu mli akoloŋtoi lɛ diɛŋtsɛ baatserɛ emli ni ekpata ehiɛ. Be eshɛ ni esa akɛ mɛi fɛɛ ni SHEƆ NYƆŊMƆ GBEYEI Nl AMƐKƐ ANUNYAM HAA LƐ lɛ akwa lɛ, “ejaakɛ ehe eshai lɛ eshɛ ŋwɛi tɔɔ ni Nyɔŋmɔ ekai enifɔɔjianii lɛ.”​—Kpojiemɔ 17:​1–18:⁠24.

15. Ajwamaŋ kpeteŋkpele lɛ hiɛ kpatamɔ kɛ mɛɛ yijiemɔ lalai baa ni mɛɛ miishɛɛ sane kroko nyiɛɔ sɛɛ?

¹⁵ Babilon Kpeteŋkpele lɛ hiɛkpatamɔ lɛ baa akɛ jalɛ kojomɔ ni jɛ Yehowa ŋɔɔ yɛ enɛ hewɔ. Yɛ hiɛsɔɔ mli lɛ, ‘Haleluyai’ sɔrɔtoi jijeɔ kɛjɛɔ ŋwɛi kɛ agbɛnɛ kɛjɛ shikpɔŋ lɛ nɔ, ni akɛ yiwalaheremɔ, anunyam kɛ hewalɛ haa Yehowa. Nɛkɛ lalai anɔheremɔ ni ji “Nyɛjiea Yah yi, nyɛ gbɔmɛi!” lɛ tsɔɔ miishɛɛ kpeteŋkpele yɛ nakai ajwamaŋ kpeteŋkpele lɛ naanɔ hiɛkpatamɔ lɛ hewɔ. Kwɛ bɔ ni esoro ehiɛkpatamɔ nɛɛ yɛ miishɛɛ babaoo ni ba yɛ ŋwɛi​—Toobi Kristo Yesu kɛ eyɛmforo ni ji 144,000 anɔkwafoi ni amɛye kunim lɛ kpeemɔ lɛ! Awo yijiemɔ lala ni jije waa nɔ aha “Yehowa wɔ​—Nyɔŋmɔ, Ofe lɛ,” hɛɛ, “nyɛhaa wɔmii ashɛa ni wɔmli afilia wɔ ni wɔwoa ehiɛ nyam! Ejaakɛ Toobi lɛ yookpeemɔ lɛ eshɛ, ni eŋa lɛ esaa ehe eto.”​—Kpojiemɔ 19:​1-10.

16. Taakɛ ninaa 13 tsɔɔ lɛ, mɛɛ sane abaaha eba naagbee kwraa, ni yɛ mɛɛ gbɛ nɔ?

¹⁶ Shi dani yookpeemɔ ni baa yɛ ŋwɛi nɛɛ aaaba lɛ, ninaa 13 lɛ tsɔɔ bɔni ahaa sane ni kɔɔ jeŋ muu fɛɛ maŋtsɛ ni Yehowa ji lɛ he lɛ baa naagbee. E-maŋtsɛmɛi a-Maŋtsɛ, kɛ nuŋtsɔmɛi a-Nuŋtsɔ, Yesu ni ŋwɛi bɔfoi atai fata ehe lɛ, “jalɛ naa ekojoɔ ni ewuɔ ta” yɛ, ni enaanaa Nyɔŋmɔ Ofe lɛ mlifu ni naa wa lɛ weinŋaanɔ lɛ nɔ. Akumɔ Satan ni ji shikpɔŋ nɔ gbɛjianɔtoo lɛ fai ni eshwɛ lɛ fɛɛ dukuduku ashwieɔ shi ni ashimɔɔ amɛ tamɔ mulu! (Kpojiemɔ 19:​11-21) Yɛ be mli ni wɔnaa nakai kunimyeli ni baa oyayaayai kɛtsɔɔ Kpojiemɔ lɛ mli ninai lɛ anɔ lɛ, lɛlɛŋ, wɔyɛ nɔ ni wɔɔdamɔ nɔ WƆSHE NYƆŊMƆ GBEYEI NI WƆKƐ ANUNYAM AHA LƐ!

Nyɔŋmɔ Hiɛ Nyam ni Aaawo Kɛaaya Naanɔ

17. Mɛni ji nɔ ni ninai 14 kɛ 15 jieɔ lɛ kpo yɛ miishɛɛ ni baajɛ mli aba aha mɛi fɛɛ ni sheɔ Nyɔŋmɔ gbeyei ni amɛkɛ anunyam haa lɛ lɛ he?

¹⁷ Kpojiemɔ ninai 14 kɛ 15 lɛ jieɔ miishɛɛ sane ni jɛɔ mli baa haa mɛi fɛɛ ni sheɔ NYƆŊMƆ GBEYEI Nl AMƐKƐ ANUNYAM HAA Lɛ lɛ kpo. Akɛni akɛ Satan kɛ edaimonioi lɛ ewo bu kwɔŋkwɔŋ lɛ mli afii akpe hewɔ lɛ, Toobi lɛ kɛ eyɛmforo lɛ yookpeemɔ yɛ ŋwɛi lɛ baa nɔ, ni nɛkɛ maŋtsɛmɛi kɛ osɔfoi 144,001 nɛɛ yeɔ nɔ afi akpe yɛ be mli ni amɛholeɔ adesai anɔ kɛbaa emuuyeli mli lɛ. Yɛ naagbee kaa lɛ sɛɛ lɛ, mɛi ni yaa nɔ AMƐSHEƆ NYƆŊMƆ GBEYEI Nl AMƐKƐ ANUNYAM HAA LƐ lɛ baaye kunim ni abaakpɛlɛ amɛnɔ kɛha naanɔ wala. Mɛi ni baafata mɛnɛɛmɛi ahe ji akpekpei toi akpei abɔ ni aaatee amɛ shi kɛjɛ gbohii ateŋ lɛ, “mɛi bibii kɛ mɛi wuji,” ni jieɔ amɛhe kpo akɛ amɛsa akɛ aŋmaa amɛgbɛi yɛ wala wolo lɛ mli lɛ. “Ŋwɛi hee kɛ shikpɔŋ hee” lɛ kɛ jɔɔmɔi ni anyɛŋ akane baaba abaha adesai, jɔɔmɔi ni amanɔ mi, ejaakɛ taakɛ “nibii fɛɛ ehee” Feelɔ lɛ, Yehowa jajeɔ akɛ: “Ŋmaa, ejaakɛ nɛkɛ wiemɔi nɛɛ anɔkwa wiemɔi ni ma shi shiŋŋ ni.”​—Kpojiemɔ 20:21:⁠8.

18. Taakɛ ninaa 16 tsɔɔ lɛ, mɛni ji Kpojiemɔ wolo lɛ naagbee?

¹⁸ Ninaa 16 lɛ kɛ Kpojiemɔ lɛ baa naagbee. Mɛni ji no? Eji ninaa ni kɔɔ maŋ ko he. Nɛkɛ maŋ nɛɛ, Yerusalem Hee lɛ yɛ sɔrɔto yɛ maŋ fɛɛ maŋ ni gbɔmɔ etswa yɛ shikpɔŋ nɛɛ nɔ lɛ he​—eyɛ sɔrɔto kwraa yɛ Babilon kpeteŋkpele lɛ, maŋ ni ehemɔkɛyeli kwamɔ, jeŋba shara, kɛ maŋkwramɔŋ ajwamaŋbɔɔ egbe Nyɔŋmɔ gbɛi lɛ he guɔ lɛ he. Maŋ krɔŋkrɔŋ lɛ yɛ krɔŋŋ, ehe tse, ejara wa. No ji Toobi lɛ ayɛmforo lɛ, eyelikɛbualɔ yɛ naanɔ wala ni ekɛhaa adesai yɛ je lɛ mli lɛ. (Yohane 3:16) Belɛ ŋwanejee ko bɛ he akɛ no hewɔ ni sane ni ajajeɔ lɛ jijeɔ waa yɛ faŋŋ mli hu akɛ aje maŋ gbonyo, Babilon kpeteŋkpele lɛ mli lɛ!​—Kpojiemɔ 18:4; 21:​9–22:⁠5.

19. (a) Mɛɛ nine atsɔɔ ayemforo kuu lɛ nɔ afɔɔ, ni heshibalɔi miihere nɔ yɛ mɛɛ gbɛ nɔ? (b) Mɛni baajɛ famɔ “nyɛshea Nyɔŋmɔ gbeyei ni nyɛkɛ anunyam ahaa lɛ” lɛ ni wɔɔkpɛlɛ nɔ diɛŋtsɛ lɛ mli aba?

¹⁹ Yehowa mumɔ ni he wa lɛ tsɔɔ ayɛmforo kuu lɛ nɔ ekɛ ninefɔɔ ni naa wa nɛɛ haa akɛ “Ba!” Hɛɛ, nyɛ heshibalɔi fɛɛ ni sumɔɔ naanɔ wala yɛ jeŋ muu fɛɛ paradeiso lɛ, nyɛbaa “wala nu” lɛ he, nyɛkpɛlɛa gbɛjianɔ ni Yehowa eto kɛtsɔ Kristo kɛ eyɛmforo lɛ nɔ kɛha naanɔ wala namɔ lɛ fɛɛ nɔ! Mɛɛ gbɛkpamɔ ni yɔɔ naakpɛɛ nɛ​—adesa wala yɛ emuuyeli mli yɛ paradeiso shikpɔŋ nɔ! Ebaafee nyɔmɔwoo eha mɛi babaoo ni kɛ nɔmimaa baahere famɔ: “NYƐSHEA NYƆŊMƆ GBEYEI NI NYƐKƐ ANUNYAM AHAA LƐ” lɛ nɔ lɛ!​—Kpojiemɔ 22:​6-21.b

[Shishigbɛ niŋmai]

TE OBAAHA HETOO OHA TƐŊŊ?

□ Mɛɛ fɔmɔ ni akɛha yɛ be naa pɛpɛɛpɛ yɔɔ kɛha wɔ yɛ kooloi enyɔ lɛ ahe ninaa lɛ mli?

□ Te esa akɛ wɔhere ŋwɛi bɔfo lɛ ni flikiɔ yɛ ŋwɛi teŋ lɛ sane jajemɔ lɛ nɔ wɔha tɛŋŋ?

□ Babilon Kpeteŋkpele lɛ kɛ ehe ewo ajwamaŋbɔɔ mli yɛ mɛɛ gbɛ nɔ, ni te mɛi ni sheɔ □ Nyɔŋmɔ gbeyei lɛ buɔ enɛ tɛŋŋ?

□ Aakpa ŋmaa yɛ shikpɔŋ lɛ nɔ yɛ Nuŋtsɔ lɛ gbi lɛ mli yɛ mɛɛ gbɛ nɔ?

□ Mɛɛ miishɛɛ nibii kɛ Kpojiemɔ lɛ ba naagbee, ni Nyɔŋmɔ webii baanyɛ ana mli gbɛfaŋnɔ yɛ mɛɛ gbɛ nɔ?

[Mfoniri ni yɔɔ baafa 29]

Akɛ nɛkɛ akɔɔble kadimɔ nii nɛɛ ba yɛ October 1987 ni ekɛkai Sɔlemɔ Kɛha Toiŋjɔlɛ Yɛ Assisi lɛ. Nɔ ni yɔɔ okadi nii nɛɛ afa gbɛ ji “Holy Father” (Tsɛ Krɔŋkrɔŋ) ni nɔ ni aŋma abɔle enɛ he ji: ‘John Paul II Pontifex Maximus” kɛ gbi ni afee enɛ lɛ. Nɔ ni yɔɔ efa kroko lɛ ji “Saint Francis” tsɛmɔ kɛha “Toiŋjɔlɛ, Nyɔŋmɔ Nikeenii” yɛ Assisi tsɛmɔ kɛha Toiŋjɔlɛ Kpee lɛ Shishi