Afee Ekome Yɛ Suɔmɔ Aflaŋaa Shishi

“Shi titri Iɛ, nyɛsuɔmɔ ni nyɛkɛsumɔsumɔɔ nyɛhe lɛ mli awa.”​—1 PETRO 4:⁠8.

 1. Mɛɛ suɔmɔ nɛkɛ wɔnaa yɛ Yehowa webii ateŋ ŋmɛnɛ, ni mɛni ji nɔ ni Kristofoi ni afɔ amɛ mu jajeɔ kɛjɛ 1922?

ANI wɔnaa suɔmɔ ni tamɔ nakai yɛ Nyɔŋmɔ webii lɛ ateŋ ŋmɛnɛ? Eka shi faŋŋ akɛ wɔnaa! Enɛ ji suɔmɔ ni ebɔle yɔsemɔ kɛ sɛɛfimɔ ni wɔkɛhaa jeŋ muu fɛɛ maŋtsɛ ni Yehowa ji lɛ, taakɛ David po fi sɛɛ lɛ. Titri lɛ kɛjɛ afi 1922 mli ni Yesu Kristo, “David Bi lɛ” nyɛmimɛi ni afɔ amɛ mu lɛ etee nɔ amɛjaje yɛ shikpɔŋ lɛ fɛɛ nɔ akɛ Nyɔŋmɔ Maŋtsɛyeli lɛ eshɛ shi eta, ni akɛ hiɛkpatamɔ ni Kojolɔ, Yesu Kristo, ni Nyɔŋmɔ ehala lɛ lɛ kɛbaaba mɛi ni fiɔ Satan nɔyeli sɛɛ lɛ miimɛ amɛ.​—Mateo 21:​15, 42-44; Kpojiemɔ 19:​11, 19-21.

 2. Mɛni hewɔ abaanyɛ atsɛ David akɛ ‘Yehowa tsui naa gbɔmɔ’ lɛ?

² David ji ‘Yehowa tsui naa gbɔmɔ.’ Enɛ jeɔ kpo yɛ suɔmɔ ni eyɔɔ kɛha Yehowa kɛ E-jalɛnifeemɔ lɛ mli​—sui ni maŋtsɛ Saul gbeyeishelɔ lɛ po kpɛlɛ nɔ akɛ eyɔɔ David mli lɛ​—hɛɛ, yɛ sui ni haaa eshe nɔ ko gbeyei, bɔ ni etuu etsui fɛɛ eha Yehowa, ehiɛnyiɛmɔ, kɛ eheshibaa kɛha teokrase gbɛjianɔtoo po lɛ mli.​—1 Samuel 13:​14; 16:​7, 11-13; 17:​33-36; 24:​9, 10, 17.

 3. Mɛni ji Yonatan su yɛ David he, ni mɛni hewɔ?

³ Beni eye Goliat nɔ kunim sɛɛ lɛ, David yabɔ Saul amaniɛ. Nɛkɛ be nɛɛ mli ni mɔ kroko ni sumɔɔ jalɛnifeemɔ je kpo. Lɛ ji Yonatan, Maŋtsɛ Saul bi nukpa lɛ. “Ni eba mli akɛ, beni [David] ekɛ Saul ewie egbe naa lɛ, Yonatan tsui mɔ David, ni Yonatan sumɔ lɛ tamɔ lɛ diɛŋtsɛ ehe.” (1 Samuel 18:⁠1) Ni eeefee heloo naa hewalɛ kɛ hesaa yɛ akromia tɛ ni afɔɔ mli lɛ, ekaa ni David yɔɔ akɛ eeejie ahorabɔɔ ni akɛba Nyɔŋmɔ gbɛi lɛ he, yɛ ehe ni ekɛha kwraa, kɛ ehe ni ekɛfɔɔ Yehowa nɔ kwraa lɛ ji nɔ ni mɔɔ Yonatan tsui kɛ yijiemɔ.​—Okɛto Lala 8:​2, 10; 9:​2, 3 he.

 4. Mɛni Yonatan fee ni ekɛkpɛlɛ nɔ akɛ David ji mɔ ni afɔ lɛ mu akɛ efee maŋtsɛ?

⁴ Eyɛ mli akɛ Yonatan ye David onukpa aaafee afii 30 moŋ, shi ekɛ nɛkɛ obalanyo tabilɔ nɛɛ bote naanɔ naanyobɔɔ kpaa ko mli yɛ ekomefeemɔ mli. “Ni Yonatan kɛ David kpaŋ, ejaakɛ eesumɔ lɛ tamɔ lɛ diɛŋtsɛ ehe nɔŋŋ. Ni Yonatan jie ebo ni yɔɔ ehe lɛ, ni eŋɔha David, kɛ etadei lɛ aahu kɛmɔ eklante lɛ kɛ egai lɛ kɛ emlifii nɔ lɛ fɛɛ.” (1 Samuel 18:​3, 4) Kwɛ nɔ ni Yonatan yɔse ni no ha ejie lɛ kpo yɛ gbɛ ni ekaaa nɔ! Ekolɛ Yonatan baafee Saul gboshiniyelɔ. Ni kɛlɛ ejie suɔmɔ ni damɔ mla nɔ kɛha David ni eba ehe shi eha lɛ akɛ mɔ ni afɔlɛ mu akɛ eye maŋtsɛ, mɔ ni fe fɛɛ ni baafa Yehowa gbɛi kɛ emaŋtsɛyeli he.​—2 Samuel 7:​18-24; 1 Kronika 29:​10-13.

 5. Mɛni Yonatan yɔse yɛ nɔ ni kɔɔ teokrase tawuu he?

⁵ Yonatan diɛŋtsɛ ji jalɛnifeemɔ he tawulɔ. Ejaje akɛ “nɔ ko nɔ ko etsiii Yehowa naa akɛ ekɛ mɛi pii loo mɛi fioo aaahere yiwala!” Mɛni hewɔ? Ejaakɛ Yonatan eyɔse akɛ ehe miihia yɛ be fɛɛ mli akɛ aaatao ŋwɛi gbɛtsɔɔmɔ kɛha kunimyeli yɛ teokrase tawuu mli. Beni Yonatan fee nɔ ko ni jeee gbɛ eje ni no ha Saul bu lɛ gbele fɔ lɛ, ekɛ heshibaa kpɛlɛ nakai kojomɔ lɛ nɔ. Yɛ miishɛɛ mli lɛ, gbɔmɛi lɛ here eyiwala.​—1 Samuel 14:​6, 9, 10, 24, 27, 43-45.

Anɔkwa Suɔmɔ ni Ajieɔ lɛ Kpo

 6. Te fee tɛŋŋ ni Yonatan anɔkwa suɔmɔ lɛ baye bua David?

⁶ Saul ye gbɛi ni David ena akɛ tabilɔ lɛ he awuŋa ni etao akɛ eeegbe lɛ, shi Yonatan anɔkwa suɔmɔ lɛ here eyiwala! Nɔ ni aŋma lɛ kaneɔ akɛ: “Shi Saul bi Yonatan tsui yɛ David he naakpa; Yonatan yatswa David adafi akɛ: Mitsɛ Saul miitaoo egbe; no hewɔ lɛ agbɛnɛ wɔ leebi lɛ kwɛ ohe nɔ, ni oyahi nififiaŋ he ko, ni otee ohe.” Yonatan kpa Saul fai yɛ nakai gbi lɛ nɔ, ni yɛ enɛ hewɔ lɛ aŋmɛɛ David he. Shi kunimii ni David ye lolo beni “ekɛ Filistibii lɛ yawuu, ni egbe amɛ butuu, ni amɛjo foi yɛ ehiɛ” lɛ kanya nyɛɛ ni Saul yɔɔ kɛha lɛ lɛ. Agbɛnɛ etswa efai shi akɛ ebaagbe David, no hewɔ lɛ David jo foi.​—1 Samuel 19:​1-10.

 7. Beni Yonatan kɛ foijelɔ David kpe lɛ, mɛni amɛkɛɛkɛɛ amɛhe ni amɛkɛma kpaŋmɔ ko nɔ mi?

⁷ Yɛ be ni sa mli lɛ, David foijelɔ lɛ kɛ Yonatan kpe ekoŋŋ, ni Yonatan kɛɛ: “Nɔ fɛɛ nɔ ni osusuma taoɔ lɛ, kɛɛmɔ, ni mafee mahao.” Mɛi enyɔ lɛ ma kpaŋmɔ ni amɛfee lɛ nɔ mi yɛ Yehowa hiɛ, ni David wo shi akɛ ejieŋ emɔbɔnalɛ lɛ kɛjɛŋ Yonatan we lɛ he​—shiwoo ni ekɛ anɔkwayeli ye nɔ. “Ni Yonatan hu saa ka David kita ekoŋŋ yɛ suɔmɔ ni ekɛsumɔɔ lɛ lɛ hewɔ; ejaakɛ esumɔɔ lɛ taakɛ bɔ ni esumɔɔ lɛ diɛŋtsɛ ehe.”​—1 Samuel 20:​4-17; 2 Samuel 21:​7, New World Translation.

 8. Mɛni hewɔ David kɛ Yonatan kpe yɛ teemɔŋ yɛ ŋa lɛ nɔ lɛ, ni mɛni ba yɛ nakai be lɛ mli?

⁸ Maŋtsɛ Saul bakpliŋ etsui yɛ efaishi ni etswa akɛ ebaagbe David lɛ mli. Mɛni hewɔ, Saul fɔ̃ akpɔlɔ po ni ekɛmiitsu ebi Yonatan beni ewie eha David lɛ! No hewɔ lɛ Yonatan kɛ David kpe yɛ teemɔŋ yɛ ŋa nɔ. “David . . . kɛ ehiɛ babu shi ni ekoto shi shii etɛ; ni amɛshɔshɔɔ amɛhe naa, ni amɛfofoo amɛshwie amɛhe nɔ aahu, shi David nɔ teke nɔ. Ni Yonatan kɛɛ David akɛ: “Yaa yɛ hejɔlɛ mli! Gbii abɔ kɛ̃ ni wɔyi enyɔ lɛ fɛɛ wɔkamɔ kita yɛ Yehowa gbɛi anɔ akɛ: Yehowa afee mikɛo kɛ miseshi kɛ bo hu oseshi teŋ odase kɛya naanɔ lɛ!” No hewɔ lɛ amɛgbala mli, ni David batsɔ foijelɔ yɛ Zif ŋa lɛ nɔ.​—1 Samuel 20:​41, 42.

9, 10. (a) Te Yonatan wo David hewalɛ ekoŋŋ eha tɛŋŋ yɛ nɔ ni bafee tamɔ naagbee kpee ni ka mɛi enyɔ lɛ ateŋ lɛ mli? (b) Beni Filistibii lɛ gbe Yonatan kɛ Saul lɛ, mɛɛ yaafo lala David fo, ni te ekɛba naagbee eha tɛŋŋ?

⁹ Yonatan kɛ suɔmɔ tee nɔ ewo David hewalɛ. Taakɛ nɔ ni aŋma lɛ kɛɔ lɛ: “Ni Saul bi Yonatan te shi ni eyiŋ etee David ŋɔɔ yɛ koo lɛ mli, ni eyawo lɛ hewalɛ yɛ Nyɔŋmɔ mli. Ní ekɛɛ lɛ akɛ: Kaashe gbeyei, ejaakɛ mitsɛ Saul nine shɛŋ onɔ, shi bo oooye Israel nɔ maŋtsɛ, ni matsɔ osɛɛ mɔ; ni mitsɛ Saul diɛŋtsɛ le nakai. Ní amɛyi enyɔ lɛ fɛɛ amɛkpaŋ yɛ Yehowa hiɛ.”​—1 Samuel 23:​15-18.

¹⁰ Eka shi faŋŋ akɛ, enɛ ji naagbee kpee yɛ David kɛ enaanyo anɔkwafo Yonatan teŋ. Yɛ sɛɛ mli lɛ, agbe Yonatan kɛ Saul fɛɛ yɛ ta ni amɛkɛ Filistibii lɛ wuɔ lɛ mli, ni David fee yaafo lala ko, ni ji “Gaitsɛmɔ Lala.” Etsɔɔ bulɛ ni eyɔɔ kɛha Saul akɛ mɔ ni Yehowa efɔ lɛ mu lɛ yɛ mli, shi ekɛ lala lɛ ba naagbee kɛ nɛkɛ wiemɔi nɛɛ: “Agbe Yonatan yɛ ogɔŋkpɔi lɛ anɔ! Osane miidɔ mi, minyɛmi Yonatan! Osane eŋɔɔ minaa kɛho; osuɔmɔ ni okɛsumɔɔ mi lɛ yɛ naakpɛɛ, efe yei asuɔmɔ po! Te aye tɛŋŋ ni kakalɔi lɛ enyɔnyɔi, ni tawuu nii lɛ hu ahiɛ ekpata nɛɛ!” (2 Samuel 1:​18, 21, 25-27) Kɛkɛ ni afɔ David mu nɔ ni ji shii enyɔ, akɛ Yuda nɔ maŋtsɛ.

Ŋmɛnɛŋmɛnɛ Beaŋ He Nɔi

11, 12. (a) Mɛɛ suɔmɔ nɛkɛ David kɛ Yonatan jie lɛ kpo? (b) Suɔmɔ ni mli wa ni ka David kɛ Yonatan teŋ lɛ feɔ mɛni he mfoniri?

¹¹ Akɛni “ŋmalɛ fɛɛ ŋmalɛ ni jɛ Nyɔŋmɔ mumɔ lɛŋ lɛ ehi ha nitsɔɔmɔ” hewɔ lɛ, mɛni wɔkaseɔ kɛjɛɔ David kɛ Yonatan he sane lɛ mli? (2 Timoteo 3:16) Wɔkadiɔ akɛ suɔmɔ ko yɛ ni “yɛ naakpɛɛ, [ni] efe yei suɔmɔ po!” Eji anɔkwale akɛ, “yei asuɔmɔ” baanyɛ afee nɔ ni ŋɔɔ ni baa mli yɛ be mli ni akɛ woo haa Yehowa mlai ni kɔɔ gbalashihilɛ he lɛ. (Mateo 19:​6, 9; Hebribii 13:⁠4) Shi David kɛ Yonatan jie suɔmɔ ko ni yɔɔ fɛo fe nakai kpo, nɔ ni kɛ famɔ nɛɛ kpaa gbee: “Bo toi, Israel! Yehowa, wɔ-Nyɔŋmɔ lɛ, Yehowa kome ni. Ni suɔmɔ Yehowa, o-Nyɔŋmɔ lɛ kɛ otsui fɛɛ kɛ osusuma fɛɛ kɛ ohewalɛ fɛɛ!”​—5 Mose 6:​4, 5.

¹² David kɛ Yonatan fee ekome yɛ nakai suɔmɔ lɛ kpojiemɔ mli yɛ be mli ni amɛwuu koni amɛkɛfa Yehowa gbɛi lɛ he kɛjɛ ahorabɔɔ ni E-henyɛlɔi kɛba nɔ lɛ. Yɛ nakai feemɔ mli lɛ, amɛna ‘suɔmɔ ni mli wa amɛha amɛhe.’ (1 Petro 4:⁠8) Naanyobɔɔ ni amɛna mli ŋɔɔmɔ yɛ enɛ mli lɛ teke famɔ ni akɛha yɛ 3 Mose 19:18 lɛ po: “Shi suɔmɔ onaanyo, taakɛ bɔni osumɔɔ bo diɛŋtsɛ ohe lɛ.” Lɛlɛŋ, efee suɔmɔ ni Yesu tsɔɔ yɛ “kita hee . . . akɛ nyɛsumɔ nyɛhe; taakɛ bɔ ni misumɔ nyɛ lɛ, nakai nyɛ hu nyɛsumɔ nyɛhe” lɛ he mfoniri. Yesu suɔmɔ lɛ ji nɔ ni akɛ he shaa afɔle, ni jeee yɛ ehe kwraa ni ekɛfɔ shi eha Yehowa suɔmɔnaa nifeemɔ lɛ mli kɛkɛ, shi moŋ yɛ suɔmɔ ni eyɔɔ akɛ “eeeŋɔ ewala eŋmɛ shi eha eshieŋtsɛmɛi” lɛ mli.​—Yohane 13:​34; 15:​13, New World Translation

“Asafoku” Kome ni Amɛfee Ekome

13. Mɛɛ Maŋtsɛyeli jajelɔi akuu ko pue titri lɛ kɛjɛ 1935, ni mɛɛ ekomefeemɔ ka Kristofoi ni afɔ amɛ mu lɛ kɛ amɛteŋ?

¹³ Kristofoi ni afɔ amɛ mu lɛ ni ji “asafoku bibioo” lɛ mli bii lɛ ji mɛi ni ekpee ta lɛ naa titri yɛ ŋmɛnɛŋmɛnɛ beaŋ Goliat lɛ ni amɛkɛ lɛ shiɔ mple lɛ mli. Shi kɛjɛ 1935 kɛbaa nɛɛ, Maŋtsɛyeli jajelɔi ni jɛ “kuu” kroko ni da mli kɛ amɛhe ebabɔ amɛhe. Nɛkɛ “toi krokomɛi” nɛɛ kɛ “toi” ni afɔ amɛ mu lɛ ateŋ mɛi ni eshwɛ lɛ ebafee ekome akɛ “kuu kome” yɛ “kwɛlɔ kome” ni ji “David Bi” lɛ shishi yɛ ekomefeemɔ suɔmɔ kpaa​—ni tamɔ nɔ ni ka Yonatan kɛ David teŋ lɛ mli.​—Luka 12:​32; Yohane 10:​16; Ezekiel 37:⁠24.

14. Mɛni tamɔ mɔdɛŋ ni Saul bɔ koni egbe David, kɛ suɔmɔ mli ni Yonatan jɛ ni ejie ehe kpo akɛ ekɛ David yɔɔ lɛ?

¹⁴ Beni nɛkɛ Yonatan kuu nɛɛ je shishi akɛ amɛyi aaafa ni amɛaatsɔ asafo babaoo lɛ mli ni jeŋ II fɛ, ni yɛ enɛ hewɔ lɛ aka mɛi ni afɔ amɛ mu lɛ kɛ amɛnanemɛi lɛ fɛɛ akwɛ waa. Nɛkɛ afii nɛɛ ji yiwaa ni naa wa afii,ni yɛ be babaoo mli lɛ osɔfoi lɛ ji mɛi ni tsirɛɔ mɛi ayisɛɛ yɛ efeemɔ mli. Enɛ tamɔ mɔdɛŋ ni Saul bɔ koni egbe David ni afɔle mu lɛ, ni yɛ sɛɛ mli lɛ, Yonatan hu yɛ be mli ni ejɛ esuɔmɔ mli ejie ehe kpo akɛ ekɛ David yɔɔ lɛ. Mɛɛ suɔmɔ ni mli wa po David kɛ Yonatan kui lɛ jie lɛ kpo amɛtsɔɔ amɛhe nɛkɛ yɛ nakai be lɛ mli! Yesu abɛbua ni yɔɔ Mateo 25:​35-40 lɛ naa emlibaa yɛ heloo naa diɛŋtsɛ.a

15. (a) Mɛɛ gbɛ ni Odasefoi lɛ etsɔ nɔ yɔɔ sɔrɔto yɛ ŋmɛnɛŋmɛnɛ beaŋ Saul kuu lɛ nɔ he? (b) Mɛni yɔɔ wɔgbii nɛɛ amli ni tamɔ ‘mumɔ fɔŋ ni jɛ Yehowa ŋɔɔ ni hao Maŋtsɛ Saul lɛ?

¹⁵ Kwɛ bɔ ni esoro emuuyeli mli hiɛmɔ ni Yehowa Odasefoi yɔɔ lɛ kwraa yɛ gbɛ ni ŋmɛnɛŋmɛnɛ beaŋ Saul kuu lɛ nyiɛ nɔ lɛ he! Odasefoi lɛ ni “jɛɛɛ je nɛŋ” lɛ ebo Yesu famɔ akɛ “nyɛsumɔa nyɛhe” lɛ toi yɛ jeŋ muu fɛɛ. (Yohane 15:​17-19) Shi yɛ gbɛ kroko nɔ lɛ, yɛ jeŋ tai enyɔ lɛ mli lɛ, Kristendom osɔfoi ni yɔɔ afai enyɔ lɛ fɛɛ sɔle amɛha amɛ “nyɔŋmɔ” lɛ kɛha kunimyeli, yɛ be mli ni asraafoi akpekpei abɔ ni jɛ jamɔ kome mli ni jɛ maji sɔrɔtoi anɔ gbeɔ amɛhe lɛ. ‘Mumɔ fɔŋ ko ni Yehowa’ haa ebahaoɔ Saul lɛ baanyɛ atamɔ nɔ ni jɛ ŋwɛibɔfo lɛ ni fɔse haomɔi ni yɔɔ Kpojiemɔ yitso 8 lɛ eshwie shi lɛ mli ba lɛ. Eka shi faŋŋ akɛ Kristendom osɔfoi lɛ bɛ Yehowa mumɔ krɔŋkrɔŋ lɛ.​—1 Samuel 16:​14; 18:​10-12; 19:​10; 20:​82-84.

16. (a) Osɔfoi lɛ kɛ jeŋ tai enyɔ lɛ tsu nii ni amɛkɛwa Yehowa webii ayi yɛ mɛɛ gbɛ nɔ? (b) Mɛni hewɔ abaanyɛ akɛɛ akɛ ŋmɛnɛŋmɛnɛ beaŋ Saul etee nɔ egbɔbi Nyɔŋmɔ webii lɛ yɛ nyɛsɛɛ afii nɛɛ amli lɛ?

¹⁶ Yɛ afi 1918 mli lɛ, osɔfoi lɛ kɛ ta ni yaa nɔ lɛ he haomɔ lɛ tsu nii ni amɛkɛtsirɛ maŋkwramɔŋ hewalɛi ni yɔɔ U.S. Amerika lɛ ayisɛɛ koni amɛte shi amɛwo Buu Mɔɔ Asafo lɛ mli onukpai lɛ ni yɛ naagbee lɛ amɛwo amɛ tsuŋ. (Yɛ sɛɛ mli lɛ aŋmɛɛ nɛkɛ Biblia kaselɔi nɛɛ ahe kwraa akɛ amɛyeee fɔ.) Yɛ jeŋ ta ni ji enyɔ lɛ mli lɛ, agu Yehowa Odasefoi yɛ Germany, Italy kɛ Japan ni agbɛnɛ afee nakai yɛ Ŋleshi Nɔyeli He maji lɛ babaoo amli, ni yɛ be babaoo mli lɛ fɛɛ jɛ jamɔ mli nɔnyɛɛ hewɔ. Akɛ nɔkwɛmɔ nɔ lɛ, kadimɔ wolo ni Sydney Osɔfonukpa (sɛɛ mli osɔfonukpa fe fɛɛ) lɛ ŋma dani agu Yehowa Odasefoi yɛ Australia lɛ eko ni yɔɔ yiteŋgbɛ nɛɛ. Beni ate shi awo gu ni agu amɛ lɛ, Australia Saneyeli he Wulu lɛ mli kojolɔ Justice Starke ni kwɛ sane lɛ mli lɛ tsɔɔ mli akɛ sane lɛ ji “yiwalɛ nifeemɔ, nii ni afɔɔɔ feemɔ, kɛ nɔnyɛɛ.” Ajie gu ni agu amɛ lɛ he mla lɛ yɛ June 14, 1943, ni aha nɔyeli lɛ ha amɛ najiaŋtoo shika. Yɛ nyɛsɛɛ afii nɛɛ nɔŋŋ mli hu lɛ, jamɔ mli nɔnyɛɛ ni akɛba nɔyelii komɛi anɔ yɛ Afrika kɛ Asia lɛ eha awa Yehowa Odasefoi ayi waa ni mɔbɔnalɛ bɛ mli. No hewɔ lɛ ŋmɛnɛŋmɛnɛ beaŋ Saul​—Kristendom osɔfoi lɛ etee nɔ amɛgbɔbi Nyɔŋmɔ webii lɛ.

17. (a) Yehowa Odasefoi enyɛ edamɔ maŋkwramɔ kɛ jamɔ mli nɔnyɛɛ ni yaa nɔ lɛ anaa yɛ mɛɛ gbɛ nɔ? (b) Odasefoi lɛ ni amɛfee ekome yɛ jeŋ muu fɛɛ lɛ feɔ mɛni he nɔkwɛmɔ nɔ?

¹⁷ Te Yehowa Odasefoi edamɔ nɔnyɛɛ ni yaa nɔ ni maŋkwramɔ kɛ jamɔ nɔnyɛɛ kɛbaa amɛnɔ yɛ 1980 afii lɛ amli lɛ naa amɛha tɛŋŋ? Tamɔ bɔ pɛ ni David kɛ Goliat kpe lɛ, ni David kɛ Yonatan kɛ Maŋtsɛ Saul hu kpe lɛ! Amɛsheee gbeyei ni amɛtswa amɛfai shi akɛ amɛbaahiɛ amɛ emuuyeli mli yɛ jeŋ muu fɛɛ maŋtsɛyeli he sane lɛ he, ejaakɛ amɛle akɛ Nyɔŋmɔ Maŋtsɛyeli lɛ baaye kunim. (Daniel 2:44) Kɛ yiwaa ba amɛnɔ lɛ, amɛfeɔ ekome, ni amɛwoɔ amɛhe hewalɛ yɛ majimaji ateŋ suɔmɔ kpaa mli yɛ gbɛ ni je lɛ enako eko ni tamɔ nakai da lɛ nɔ. Akɛ mɛi ni kɛ amɛhe wooo maŋ saji amli yɛ tawuu be mli lɛ, amɛfɔseee amɛnanemɛi heyelilɔi ni yɔɔ maji krokomɛi amli lɛ ala amɛshwieee shi. (Mika 4:​3, 5) No hewɔ lɛ amɛjieɔ amɛhe kpo akɛ amɛ amɛji kuu ni Yesu wie amɛhe yɛ be mli ni ewieɔ akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ” lɛ. (Yohane 13:35) Akɛ nyɛmimɛi ni amɛfee ekome yɛ jeŋ muu fɛɛ lɛ, Yehowa Odasefoi kɛ ‘suɔmɔ ni ji ekomefeemɔ kpaa ni yeɔ emuu lɛ eha amɛhe,’ ekomefeemɔ kpaa ni tekeɔ wekui, majianɔwiemɔi, kɛ maji ahusui fɛɛ.​—Kolosebii 3:⁠14.

‘Suɔmɔ ni Mli Wa’ ni Aaajie lɛ Kpo

18. (a) Mɛni yɔɔ ŋmɛnɛ ni tamɔ Yonatan suɔmɔ kɛha David lɛ, ni mɛni yeɔ enɛ he odase? (b) Mɛni ejɛ David kuu lɛ ni amɛŋmɛɛɛ saji ahe ni amɛkɛsaa lɛ mli eba yɛ jeŋ fɛɛ?

¹⁸ Kaimɔ akɛ “Yonatan tsui mɔ David, ni Yonatan sumɔ lɛ tamɔ lɛ diɛŋtsɛ ehe.” Mɛɛ ehe nɔkwɛmɔ nɔ ni yɔɔ naakpɛɛ wɔyɔɔ yɛ nɛkɛ “naagbee gbii” nɛɛ amli nɛkɛ! (2 Timoteo 3:​1, 14) Yɛ hoofeemɔ ni jwɛŋmɔ bɛ mli ni yaa nɔ yɛ awuiyeli yinɔ nɛɛ mli lɛ fɛɛ sɛɛ lɛ, kuu kome pɛ yɔɔ, Yehowa Odasefoi, ni amɛtee nɔ amɛhiɛ jeŋ muu fɛɛ suɔmɔ mli yɛ ekomefeemɔ mli. Akɛ Kristofoi ni kɛ amɛhe wooo maŋ saji amli lɛ, amɛkɛ woo eha amɛ-Bɔlɔ lɛ akɛ adesai fɛɛ a-Jeŋ Muu Fɛɛ Nuŋtsɔ. (Lala 100:⁠3) Oh, ŋmɛnɛŋmɛnɛ beaŋ Gatbii​—“Goliat” maŋkwramɔŋ nanemɛi lɛ​—baanyɛ aya nɔ aye mumɔŋ Israel he fɛo. (2 Samuel 21: 21, 22) Ni ŋmɛnɛŋmɛnɛ beaŋ Saul​—Kristendom osɔfoi lɛ​—baanyɛ aya nɔ amɛhao David kɛ Yonatan kui lɛ. (1 Samuel 20: 32, 33) Shi “Yehowa nɔ ji ta lɛ.” Akɛ Jeŋ Muu Fɛɛ Nuŋtsɔ lɛ, ebaaye kunim yɛ naagbee eha etsuji anɔkwafoi lɛ. Akɛni amɛnaa sane ni David kuu lɛ eŋmɛɛɛ he lɛ hewɔ lɛ, akpekpei abɔ​—ni ji Yonatan kuu lɛ ni jɛ shikpɔji fɛɛ nɔ​—ni tsutsu yiwalɔi po fata he, kɛ amɛhe ebɔ amɛhe yɛ Kristo ‘suɔmɔ aflaŋaa’ lɛ shishi.b​—1 Samuel 17:​47; Salomo Lalai 2:⁠4.

19, 20. (a) Mɛni ji Odasefoi lɛ anitsumɔi titrii ni jeɔ kpo yɛ tao ni yɔɔ baafa 4-7 mli lɛ ekomɛi? (b) Te Odasefoi lɛ ayifalɛ etee nɔ eha tɛŋŋ yɛ afii nyɔŋma ni ji 1979-88 mli? (d) Mɛni hewɔ abaanyɛ akɛɛ akɛ Odasefoi lɛ ji gbɔmɛi ni amɛfee ekome lɛlɛŋ yɛ jeŋ fɛɛ lɛ, no hewɔ lɛ mɛɛ sanebimɔ teɔ shi?

¹⁹ Obaanyɛ oti Odasefoi akpekpei abɔ nɛɛ anitsumɔ ni mli lɛɛɔ lɛ mli okwɛ yɛ tao ni yɔɔ wolo tɛtrɛɛ nɛɛ baafai 4-7 lɛ mli. Yɛ afii nyɔŋma ni ji 1979-88 ni eho nɛɛ mli lɛ, Nyɔŋmɔ Maŋtsɛyeli ni ato ama shi lɛ he sanekpakpa shiɛlɔi lɛ ayifalɛ etee hiɛ kɛjɛ 2,186,075 kɛyashɛ 3,592,654 ni ji oha mlijaa 64.3 nɔyaa. Amɛji gbɔmɛi ni amɛfee ekome lɛlɛŋ ni amɛnaa hemɔkɛyeli kome, sɔɔmɔ kome kɛha Nyɔŋmɔ, kɛ hetuu-kɛ-hamɔ kome ni akɛhaa Biblia mli shishitoo mlai ni kɔɔ jeŋba he lɛ mli gbɛfaŋnɔ yɛ jeŋ fɛɛ. Nɛkɛ majimaji ateŋ kuu ni efee ekome nɛɛ Yesu wiemɔi nɛɛ kɔɔ amɛhe ŋmɛnɛ: “Kɛji nyɛye mikitai lɛ anɔ lɛ, nyɛaahi misuɔmɔ lɛ mli; taakɛ bɔ ni mi hu miye mi-Tsɛ kitai lɛ anɔ ni mihiɔ esuɔmɔ lɛ mli lɛ.”​—Yohane 15:​10; okɛto 1 Korintobii 1:10 he.

²⁰ Eyɛ mli akɛ amɛshiɛɔ yɛ wiemɔi fe 200 mli moŋ, shi nɛkɛ Yehowa Odasefoi nɛɛ wieɔ anɔkwale “wiemɔ krɔŋŋ” lɛ yɛ be mli ni amɛsɔmɔɔ Nyɔŋmɔ kɛ “kɔŋ kome” lɛ. Yɛ nɛkɛ gbɛ nɔ lɛ, amɛkaseɔ David kɛ Yonatan suɔmɔ nɔkwɛmɔ nɔ lɛ. (Zefania 3:​9, New World Translation; 1 Samuel 20:​17; Abɛi 18:24) Kɛji akɛ okɛ Nyɔŋmɔ webii lɛ efeko ekome lɛ, ani osumɔŋ akɛ ooofee ŋmɛnɛŋmɛnɛ beaŋ Yonatan kuu lɛ fa? Obaanyɛ ni okɛ enɛ afee oti ni ma ohiɛ, ni Yehowa Odasefoi baajie suɔmɔ ni mli wa kpo atsɔɔo koni amɛkɛye amɛbua bo koni onine ashɛ nɔ.

[Shishigbɛ niŋmai]

Sanebimɔi ni Akɛtiɔ Mli

◻ Yonatan jie anɔkwa suɔmɔ kpo etsɔɔ David yɛ mɛɛ gbɛ nɔ?

◻ Suɔmɔ ni ka David kɛ Yonatan teŋ Iɛ feɔ mɛɛ suɔmɔ nɛkɛ he mfoniri?

◻ Kristendom osɔfoi Iɛ efee amɛnii tamɔ Maŋtsɛ Saul yɛ be mli ni egbɔbi David Iɛ yɛ mɛɛ gbɛ nɔ?

◻ Mɛni yɔɔ ŋmɛnɛ ni tamɔ suɔmɔ ni Yonatan yɔɔ kɛha David lɛ?

◻ Ekome ni Odasefoi Iɛ efee yɛ jeŋ fɛɛ Iɛ feɔ mɛni he nɔkwɛmɔ nɔ?

[Akrabatsa ni yɔɔ baafa 27]

St. Mary’s Cathedral

Sydney

August 20, 1940.

The Rt. Hon. W. M. Hughes, M.H.R.,K.C.,

Attorney General,

CANBERRA.

Dear Mr. Hughes:

Miida bo shi yɛ wolo ni oŋma yɛ gbi ni ji 9 lɛ nɔ, ni kɔɔ mɛi ni Mr. Jennings, M. P. Ehala eha bo lɛ ahe lɛ he.

Eka shi faŋŋ akɛ mɛi eyoo akɛ esa akɛ okwɛ ohe nɔ jogbaŋŋ yɛ nɛkɛ sane ni he hiaa ni no hewɔ ni ahala mɛi nɛɛ aha bo lɛ he.

Shi kɛlɛ, kɛ́ nɔ hewɔ ni ojwɛŋmɔ feɔ bo kɔshikɔshi lɛ kɔɔ gbɔmɛi nɛɛ atsɔɔmɔi ni amɛkɛɔ akɛ eji Kristofoi atsɔɔmɔi lɛ ahe lɛ, no lɛ mikɛ bulɛ babaoo miiwo ŋaa akɛ okojomɔ yɛ amɛnifeemɔ nɛɛ he lɛ akadamɔ nɔ ni amɛkɛɔ lɛ nɔ,shi moŋ anɔkwalei anɔ. Mikɛ amɛwoji lɛ ekomɛi kɛ amɛ diɛŋtsɛ amɛdaŋŋ wiemɔi kɛ amɛnifeemɔi ni New South Wales Polisifoi eye he odase lɛ miimaje bo akɛ odaseyeli. Anyɛŋ asusu nɔ ko ni teɔ shi woɔ Kristojamɔ tamɔ enɛɛmɛi ahe.

Polisifonyo Onukpa ni yɔɔ N. S. W. lɛ ejaje yɛ faŋŋ mli akɛ eeshwe ni Ŋleshi Nɔyeli Hewalɛi lɛ agu Asafo ni wɔwieɔ he nɛɛ akɛ mɛi ni maŋ mla fiii amɛsɛɛ koni enɛ aha Polisifoi lɛ ana hewalɛ ni amɛkɛtsi amɛnaa yɛ faŋŋ mli yɛ nɛkɛ sane nɛɛ mli.

With every good wish, I remain,

Yours faithfully,

ARCHBISHOP OF SYDNEY