Obaanyɛ Ona Jwetri Ni Anyɛŋ Ahe!

ŊLESHINYO niiatsɛ lɛ bi akɛ: “Ani oonyɛ oona nɔ ko?” Kɛkɛ ni Mizraim he nikaselɔ lɛ ha hetoo akɛ: “Hɛɛ, naakpɛɛ nibii.” Afi lɛ ji 1922, ni Howard Carter kɛ ehiŋmɛi etsɔ fɔlɔ ko mli kɛmiikwɛ Farao Tutankhamen gbonyobu ni yɔɔ Mizraim Maŋtsɛmɛi Ajɔɔ lɛ mli lɛ mli. Miishɛɛ sɔŋŋ ji nɔ ni jeɔ kpo yɛ Carter wiemɔi lɛ amli:

“Beni mihiŋmɛii mɔ la lɛ jogbaŋŋ lɛ, fiofio kɛkɛ ni nibii ni yɔɔ tsu lɛ mli lɛ je kpo, kooloi ni he yɔɔ naakpɛɛ, amagai, kɛ shika​—he fɛɛ he lɛ shika ni miikpɛlɛ. Yɛ be fioo mli lɛ​—ebafee tamɔ naanɔ kɛha mɛi krokomɛi ni damɔ shi yɛ mimasɛi lɛ​—naakpɛɛ sɔŋŋ ni efee mi lɛ ha mitɔ mu . . . Wɔlako nɔ ko ni tamɔ nɛkɛ da, tsu muu​—ni tamɔ he ni abua blema nibii anaa ato yɛ.” Carter nu “gbɛkpamɔ ni tsuishitoo bɛ mli . . . ni ba jwetri taolɔ lɛ nɔ lɛ he.”

Nakai nibii ni ayana lɛ kɛ jwetrii babaoo ni aŋɔtee fe afii 3,000 ni eho nɛ lɛ ba la hiɛ. Shi Nyɔŋmɔ miitao ni wɔkɛ wɔhe awo jwetri taomɔ ko ni hiɛ yɔɔ nyam fe nakai mli. Eji nɔ ko ni ataoɔ ni nyɔmɔwoo babaoo yɔɔ mli fe Ojarawa tɛi, shika loo jwiɛtɛi taomɔ. Nɛkɛ jwetri taomɔ nɛɛ ji ŋwɛi nilee, ni nibii ni jara wa fe fɛɛ ni yɔɔ he lɛ ateŋ ekome ji naanɔ wala.​—Yohane 17:⁠3.

Mɔdɛŋbɔɔ he Miihia

Ebiɔ mɔdɛŋbɔɔ babaoo dani atsa shi yɛ he ni akɛtaoɔ blema nibii yɛ. Ebɛ mlɛo akɛ aaatsa tɛi amli aloo akpeleke shi kɛbote nui ashishi ni aatao jwetri ni aŋɔtee, afu loo eshiu. Shi jwetri taolɔi mɔdɛŋbɔlɔi kɛ miishɛɛ bɔɔ enɛ feemɔ he mɔdɛŋ. Yɛ be babaoo mli lɛ amɛŋmɛɔ amɛtsui shi yɛ tɔlɛ babaoo mli ni amɛyeɔ gbɛtsii nii ni tamɔ nɔ ni anyɛŋ ayɛ nɔ kunim lɛ anɔ. Ojogbaŋŋ, ani ŋwɛi nilee taomɔ lɛ esaaa mɔdɛŋbɔɔ ni da fe nakai?

Wɔbaanyɛ wɔna jwetrii ni jara wa fe bɔ ni aaanyɛ ahe kɛ wɔmia wɔhiɛ wɔkɛ mɔdɛŋbɔɔ kase Biblia lɛ kɛ anɔkwale Kristofoi awoji ni ato he gbɛjianɔ koni eye ebua wɔ ni wɔna nilee ni tamɔ jwetrii ni yɔɔ mli lɛ. Mɔdɛŋbɔɔ ni yaa nɔ be fɛɛ be he miihia. Wɔnyɛŋ wɔtsɔmɔ niiatsɛmɛi kɛji akɛ wɔje shishi wɔtsa shi ni wɔmiitao jwetrii shi yɛ sɛɛ mli lɛ wɔŋmɛɛ he be mli ni wɔŋmala shikpɔŋ lɛ hiɛ fioo ko kɛkɛ lɛ. Nakai nɔŋŋ eeeji anɔkwale kɛji akɛ wɔje shishi akɛ wɔɔtsa shi ni wɔmiitao mumɔŋ jwetrii ni yɛ no sɛɛ etsɛɛɛ kɛkɛ lɛ wɔŋmɛɛ he ejaakɛ eyɛ tɔlɛ tsɔ akɛ wɔɔya nɔ lɛ. “Ŋwɛi nilee” yɛ kɛha mɛi ni bɔɔ mɔdɛŋ akɛ amɛnine aaashɛ nɔ lɛ. (Yakobo 3:17) Ani esaaa akɛ obɔɔ mɔdɛŋ nakai koni onine ashɛ ŋwɛi nilee ni ji jwetri ni jara wa fe bɔ ni aaanyɛ akɛ shika ahe lɛ nɔ?

[He ni Mfoniri ni yɔɔ baafa 2 lɛ Jɛ]

Cover and page 3 photo: K. Scholz/H. Armstrong Roberts