Bo Nɔ Ni Mumɔ Lɛ Kɛɔ Asafoi Lɛ Toi
Akɛ saji ni yɔɔ baafai 10 kɛyashi 21 Iɛ ha yɛ Yehowa Odasefoia Ŋwɛi Jalɛsaneyeli Kpokpaa Wuji Anɔ Kpee Iɛ ashishi yɛ 1988 akɛ wiemɔ ni gbeleɔ nɔ ni tsara nɔ ni akɛha ni ji “Be Ni Ato Iɛ Eshɛ” Iɛ naa.
“Mɔ ni yɔɔ toi lɛ, ha ni enu nɔ ni mumɔ lɛ kɛɔ asafo lɛ.”—KPOJIEMƆ 3:22.
1. Mɛɛ Kpojiemɔ wolo lɛ mli wiemɔi ji sanekpakpa yɛ yinɔ ni bɛ miishɛɛ nɛɛ mli, ni mɛni ji “gbalɛ” kɛ “be ni ato” lɛ ni awieɔ he lɛ?
AFII fioo ni eho nɛ ni kwasafo nikasemɔ he nilelɔ ko ni yɔɔ U.S. Amerika lɛ wie akɛ gbɔmɛi ni yɔɔ nakai shikpɔŋ lɛ nɔ lɛ yɛ heyeli babaoo tsɔ, shi amɛbɛ miishɛɛ ni fa. Ekɛfata he akɛ, “gbɔmɛi lɛ naa akɛ miishɛɛ elaaje amɛ. Paradeiso ni amɛwo he shi amɛha amɛ diɛŋtsɛ amɛhe lɛ efee efolo.” Yɛ enɛ hewɔ lɛ, bɔfo Yohane wiemɔi ni yɔɔ Kpojiemɔ 1:3 (New World Translation) lɛ ji sanekpakpa, ejaakɛ etsɔɔ wɔ gbɛ ni wɔɔtsɔ nɔ ni wɔna miishɛɛ. Yohane ŋma akɛ: “Miishɛɛ ji mɔ ni kaneɔ lɛ kɛ mɛi ni nuɔ gbalɛ wiemɔi lɛ kɛ mɛi ni ŋɔɔ nibii ni aŋma yɛ mli lɛ amɛtoɔ lɛ; ejaakɛ be ni ato lɛ eshɛ eta.” “Gbalɛ” ni ewieɔ he yɛ biɛ lɛ ji nɔ ni aŋma afɔ shi yɛ Kpojiemɔ wolo lɛ mli lɛ. Ni “be ni ato” lɛ ji be ni esa akɛ Kpojiemɔ gbalɛ nɛɛ aba mli. Yohane wiemɔi lɛ tsɔɔ nibii ni mli kwɔlɔ babaoo kɛha wɔ ŋmɛnɛ.
2. Mɛni ji nɔ ni ekolɛ Yohane baasusu yɛ be mli ni klɛŋklɛŋ afii oha lɛ ba naagbee lɛ?
2 Nɔ ni fe afii 60 dani eŋma Kpojiemɔ wolo lɛ, Yohane yɛ Pentekoste ni ato Kristofoi ni afɔ amɛ mu lɛ asafo lɛ ama shi. Agbɛnɛ, yɛ afi 96 Ŋ.B. mli nɛɛ, nakai asafo lɛ eda kɛjɛ eshishijee bii ni amɛyibɔ ji 120 lɛ nɔ kɛyashɛ majimaji ateŋ gbɛjianɔtoo ko nɔ. Shi naagbai hu yɛ. Taakɛ bɔ ni Yesu, Paulo kɛ Petro fɛɛ bɔ kɔkɔ lɛ, hemɔkɛyeli kwamɔi kɛ kui aloo mligbalamɔi miije shishi aje kpo, ni eka shi faŋŋ akɛ Yohane baasusu nɔ ni yɔɔ kɛha wɔsɛɛ be lɛ he.—Mateo 13:24-30, 36-43; Bɔfoi lɛ Asaji 20:29, 30; 2 Petro 2:1-3.
3. Ninaai ni Yohane na ni eŋmala eshwie shi yɛ Kpojiemɔ lɛ maa mɛni nɔ aduatsɔ?
3 Kwɛmɔ miishɛɛ ni ebaana, yɛ be mli ni enine shɛ “Yesu Kristo kpojiemɔ ni Nyɔŋmɔ ŋɔ ha lɛ, ni ekɛtsɔɔ etsuji nii ni sa akɛ aba mli oya” lɛ nɔ lɛ. (Kpojiemɔ 1:1) Yohane tsɔ ninai ni yɔɔ naakpɛɛ mli ena akɛ Yehowa yiŋtoi baaba mli, ni akɛ abaawo Kristofoi anɔkwafoi lɛ atsuishiŋmɛɛ lɛ he nyɔmɔ babaoo. Agbɛnɛ enine shɛ shɛɛsaji anɔ kɛjɛ Yesu ŋɔɔ eha asafoi kpawo lɛ; ni enɛɛmɛi ji Yesu naagbee ŋaawoo ni ekɛha Kristofoi lɛ tɛɛ dani eba E-Maŋtsɛyeli anunyam mli.
Asafoi Kpawo Lɛ
4. (a) Mɛni ji gbɛnaa nii ni ka Kristofoi anɔkwafoi asafoi lɛ anɔ? (b) Anɔkwale ni eji akɛ ahalaa onukpai ni afɔ amɛ mu lɛ akɛ ŋulamii kpawo yɛ Kristo ninejurɔ dɛ lɛ tsɔɔ mɛni?
4 Akɛ kanetsei kpawo damɔ shi aha nɛkɛ Kristofoi ni afɔ amɛ mu nɛɛ asafoi kpawo lɛ, ni akɛ ŋulamii kpawo ni yɔɔ Kristo ninejurɔ dɛ lɛ damɔ shi aha onukpai ni afɔ amɛ mu ni yɔɔ mli lɛ. (Kpojiemɔ 1:12, 16) Yohane tsɔ nɔ ni ajie kpo atsɔɔ lɛ ni yɔɔ faŋŋ nɛɛ nɔ eyoo akɛ esa akɛ Kristofoi asafoi lɛ afee mɛi ni hiɛ kanei, tamɔ kanetsei ni miitso yɛ jeŋ ni ewo duŋ mli. (Mateo 5:14-16) Yesu ni hiɛ onukpai lɛ yɛ eninejurɔ dɛ lɛ tsɔɔ akɛ lɛ enyiɛɔ onukpai lɛ ahiɛ, ekudɔɔ amɛ ni eyeɔ amɛnɔ.
5. Akɛ shɛɛsaji kpawo ni Yohane nine shɛ nɔ yɛ egbii lɛ amli kɛha asafoi kpawo lɛ ha namɛi?
5 Yesu kɛɛ Yohane akɛ: “Nɔ ni onaa lɛ ŋmaa owo wolo mli, oŋɔmaje asafoi kpawo ni yɔɔ Asia lɛ, ni akɛya Efeso, kɛ Smirna, kɛ Pergamo, kɛ Tiatira, kɛ Sarde, kɛ Filadelfia, kɛ Laodekia.” (Kpojiemɔ 1:11) Nɛkɛ asafoi nɛɛ yɛ diɛŋtsɛ yɛ Yohane gbii lɛ amli, ni wɔbaanyɛ wɔna nɔmimaa akɛ beni Yohane gbe Kpojiemɔ wolo lɛ ŋmaa naa lɛ, asafo fɛɛ asafo nine baashɛ enɔ nɔ. Shi kadimɔ nɔ ni Hastings Dictionary of the Bible lɛ kɛɔ yɛ Kpojiemɔ he: “Wolo ko bɛ Kpaŋmɔ Hee lɛ mli ni aye he odase jogbaŋŋ yɛ afii ohai 2 lɛ mli akɛ eji anɔkwale tamɔ enɛ.” Enɛ tsɔɔ akɛ ale Kpojiemɔ wolo lɛ ni jeee Kristofoi ni yɔɔ asafoi kpawo lɛ amli lɛ pɛ kaneɔ, shi moŋ mɛi krokomɛi babaoo ni miisumɔ ni amɛkase gbalɛ wiemɔi lɛ. Yɛ anɔkwale mli lɛ, Yesu ŋaawoo lɛ yɛ kɛha Kristofoi ni afɔ amɛ mu lɛ fɛɛ.
6, 7. (a) Mɛɛ be mli Kpojiemɔ mli wiemɔi lɛ baa mli klɛŋklɛŋ kwraa, ni te wɔfeɔ tɛŋŋ wɔleɔ enɛ? (b) Ŋmɛnɛ, namɛi damɔ shi kɛha ŋulamii kpawo lɛ kɛ asafoi kpawo lɛ?
6 Shi nɛkɛ shɛɛsaji ni akɛha asafoi kpawo lɛ kɔɔ nibii babaoo ni yaa shɔŋŋ he. Yohane kɛɔ yɛ Kpojiemɔ 1:10 akɛ: “Miyɛ mumɔ mli yɛ Nuŋtsɔ lɛ gbi lɛ nɔ.” Nɛkɛ kuku nɛɛ ji samfele ko ni he hiaa ni gbeleɔ Kpojiemɔ he shishinumɔ lɛ naa. Etsɔɔ akɛ ekɔɔ “Nuŋtsɔ lɛ gbi” ni je shishi yɛ be mli ni Yesu bafee Maŋtsɛ yɛ 1914 lɛ he titri. Ni Yesu shɛɛsaji ni ekɛmaje asafoi kpawo lɛ maa shishinumɔ nɛɛ nɔ mi. Wɔnaa wiemɔi tamɔ nɔ ni akɛmaje Pergamo asafo nɛɛ yɛ mli: “Miiba onɔ oya.” (Kpojiemɔ 2:16; 3:3, 11, New World Translation) Yɛ afi 96 Ŋ.B. sɛɛ lɛ, Yesu ‘baaa’ yɛ gbɛ ni yɔɔ pɔtɛɛ ko nɔ aahu kɛyashi be mli ni awo lɛ Maŋtsɛ yɛ 1914. (Bɔfoi lɛ Asaji 1:9-11) Kɛkɛ ni yɛ Maleaki 3:1 mlibaa mli lɛ, ‘eba’ ekoŋŋ yɛ 1918, yɛ be mli ni eba Yehowa sɔlemɔwe lɛ koni klɛŋklɛŋ lɛ ebakojo Nyɔŋmɔ we lɛ. (1 Petro 4:17) ‘Ebaaba’ shikome ekoŋŋ, yɛ wɔsɛɛ be ni ebɛŋkɛ lɛ mli, yɛ be mli ni eeetɔ “owele yɛ mɛi ni leee Nyɔŋmɔ kɛ mɛi ni booo wɔ Nuŋtsɔ Yesu Kristo sanekpakpa lɛ toi lɛ anɔ lɛ.”—2 Tesalonikabii 1:7, 8; Mateo 24:42-44.
7 Akɛni enɛ yɔɔ wɔjwɛŋmɔ mli hewɔ lɛ, wɔnuɔ shishi akɛ asafoi kpawo lɛ feɔ Kristofoi ni afɔ amɛ mu lɛ asafoi fɛɛ ni yɔɔ shihilɛ mli yɛ 1914 sɛɛ lɛ he mfoniri, ni ŋulamii kpawo lɛ damɔ shi kɛha onukpai ni afɔ amɛ mu lɛ fɛɛ ni yɔɔ asafoi nɛɛ amli lɛ. Agbɛnɛ, kɛ akpa mli lɛ, onukpai ni ji “toi krokomɛi” lɛ amlibii lɛ hu yɛ Yesu ninejurɔ kudɔmɔ lɛ mli. (Yohane 10:16) Ni ŋaawoo ni akɛha asafoi kpawo lɛ kɔɔ Nyɔŋmɔ webii ni yɔɔ ŋmɛnɛ yɛ jeŋ fɛɛ lɛ asafoi lɛ fɛɛ he, ni mɛi ni ji Kristofoi ni yɔɔ shikpɔŋ nɔ hiɛnɔkamɔ lɛ hu fata he.
8. Mɛɛ shihilɛ Yesu na beni eba koni ebasara mɛi ni kɛɔ akɛ amɛji Kristofoi yɛ 1918 lɛ?
8 Beni Yesu ba ebasara mɛi ni kɛɔ akɛ amɛji Kristofoi yɛ afi 1918 mli lɛ, ena Kristofoi ni afɔ amɛ mu yɛ shikpɔŋ nɔ ni miibɔ mɔdɛŋ waa ni amɛye gbalɛ lɛ mli wiemɔi lɛ anɔ. Kɛjɛ 1870 afii lɛ amli ni amɛje shishi amɛbɔi gbɔmɛi lɛ kɔkɔbɔɔ yɛ bɔ ni afi 1914 lɛ he hiaa ha he. Amɛna nɔ waa yɛ Kristendom dɛŋ yɛ klɛŋklɛŋ jeŋ ta lɛ mli, ni yɛ afi 1918 mli lɛ, ebafee tamɔ nɔ ni amɛnitsumɔ lɛ eba naagbee kwraa yɛ be mli ni akɛ amale wiemɔi folɔ Buu-Mɔɔ Asafo lɛ onukpai lɛ anaa ni no ha awo amɛ tsuŋ yɛ gbɛ ni ejaaa nɔ lɛ. Shi amɛ niiashikpamɔi yɛ nakai be lɛ mli lɛ tamɔ gbalɛi ni yɔɔ Kpojiemɔ lɛ pɛpɛɛpɛ yɛ naakpɛɛ gbɛ nɔ. Ni amɛfaishitswaa akɛ amɛbaabo Yesu wiemɔi ni ekɛha asafoi kpawo lɛ toi lɛ ha ayoo amɛ ni ŋwanejee ko bɛ he akɛ amɛ pɛ ji Kristofoi ni hiɛ kanei ni miitso yɛ jeŋ ni ewo duŋ nɛɛ mli. Ŋmɛnɛ, shwɛɛnii nɛɛ ji Yohane kuu lɛ ni yɔɔ wala mli ni amɛnaa ni amɛkɛ amɛhe woɔ Kpojiemɔ lɛ fai babaoo amlibaa mli lɛ.
Ŋaawoo Kɛ Yijiemɔ
9, 10. Mɛɛ Yesu wiemɔi amlibaa kɛ miishɛɛ kpele ebaha ŋmɛnɛŋmɛnɛ beaŋ Kristofoi lɛ? Tsɔɔmɔ mli.
9 Yesu kɛɛ asafo ni yɔɔ Filadelfia lɛ yɛ Kpojiemɔ 3:8 akɛ: “Mile onitsumɔi lɛ; naa, mikɛ shinaa ni agbele ema ohiɛ, ni mɔ ko nyɛŋ aŋa; ejaakɛ hewalɛ fioo oyɔɔ, shi oye miwiemɔ lɛ nɔ ni okwako migbɛi lɛ.” Eka shi faŋŋ akɛ Kristofoi ni yɔɔ Filadelfia lɛ kɛ ekaa etsu nii, ni agbɛnɛ agbele hegbɛ shinaa ko aha amɛ.
10 Nɛkɛ sane nɛɛ mlibaa yɛ ŋmɛnɛŋmɛnɛ beaŋ lɛ ha Nyɔŋmɔ webii lɛ na miishɛɛ babaoo. Yɛ be mli ni aka amɛ babaoo yɛ 1918 sɛɛ lɛ, asaa ato amɛ ama shi ekoŋŋ yɛ mumɔŋ, ni yɛ 1919 lɛ, Yesu gbele hegbɛ shinaa ko naa eha amɛ. Amɛtsɔ nakai shinaa lɛ mli yɛ be mli ni amɛkpɛlɛ nitsumɔ ni akɛha amɛ akɛ amɛshiɛ Maŋtsɛyeli lɛ he sanekpakpa lɛ amɛha jeŋmaji lɛ fɛɛ nɔ lɛ. Akɛni Yehowa mumɔ lɛ yɔɔ amɛnɔ hewɔ lɛ, nɔ ko nɔ ko bɛ ni baatsi amɛnitsumɔ nɛɛ naa, ni nɛkɛ Kristofoi anɔkwafoi nɛɛ na hegbɛ kpele yɛ ba ni Yesu ba lɛ he okadi lɛ fa ko mlibaa mli. (Mateo 24:3, 14) Yɛ anɔkwale ni amɛyɛ yɛ amɛshiɛmɔ nitsumɔ lɛ mli hewɔ lɛ, atsɛ 144,000 lɛ ateŋ mɛi ni eshwɛ lɛ, ni afɔ amɛ mu, ni amɛbua “asafo babaoo” lɛ mli bii pii anaa. (Kpojiemɔ 7:1-3, 9) Mɛɛ miishɛɛ enɛ kɛbaha Nyɔŋmɔ webii lɛ nɛkɛ!
11. Te fee tɛŋŋ ni kui kɛ mligbalamɔi ka Yehowa gbɛjianɔtoo lɛ fitemɔ yɛ Yohane gbii lɛ mli, ni amɛfee nakai yɛ wɔ diɛŋtsɛ wɔgbii nɛɛ amli yɛ mɛɛ gbɛ nɔ?
11 Ani nɔ ko baanyɛ ashɔ amɛmiishɛɛ lɛ kɛjɛ amɛdɛŋ? Hɛɛ. Akɛ nɔkwɛmɔ nɔ lɛ, yɛ bɔ ni onukpai lɛ ni yɔɔ Pergamo lɛ eŋmɛ amɛtsui shi fɛfɛo lɛ fɛɛ sɛɛ lɛ, amɛnyɛɛɛ amɛjie Nikolaimɛi akuu lɛ atsɔɔmɔ lɛ kɛjɛ asafo lɛ mli. (Kpojiemɔ 2:15) Mligbalamɔi miiya nɔ. Nakai nɔŋŋ hu yɛ nɛkɛ naagbee gbii nɛɛ amli lɛ, aŋkroaŋkroi komɛi ekwa hemɔkɛyeli lɛ ni amɛbɔ mɔdɛŋ koni amɛfite Yehowa gbɛjianɔtoo lɛ. Akɛ kuu lɛ, onukpai lɛ fɛɛ ete shi ewo amɛ, shi moŋ nɔ ni yɔɔ mɔbɔ ji akɛ, alaka mɛi komɛi. Ekaba kɔkɔɔkɔ akɛ wɔɔkwa hemɔkɛyeli lɛ koni wɔmiishɛɛ lɛ aje wɔdɛŋ!
12. (a) Mɛni ji Bileam kɛ Isabel tsɔɔmɔi lɛ? (b) Ani Satan ebɔ mɔdɛŋ ni ekɛ Bileam loo Isabel tsɔɔmɔi aba Kristofoi asafo lɛ mli yɛ ŋmɛnɛŋmɛnɛ beaŋ.
12 Yesu bɔ Pergamo asafo lɛ kɔkɔ eshi mɛi ni “hiɛ Bileam . . . tsɔɔmɔ lɛ mli” lɛ. (Kpojiemɔ 2:14) Mɛɛ tsɔɔmɔ ji enɛ? Mɔ ko yɛ Pergamo asafo lɛ mli ni miifite Kristofoi ni yɔɔ jɛmɛ lɛ yɛ gbɛ ni Bileam fite Israelbii lɛ yɛ ŋa lɛ nɔ lɛ pɛpɛɛpɛ: eewo amɛ hewalɛ ni “amɛye wɔji afɔleshaa nii ni amɛbɔ ajwamaŋ.” (4 Mose 25:1-5; 31:8) Yesu bɔ kɔkɔ eshi asafo ni yɔɔ Tiatira lɛ yɛ “yoo Isabel” lɛ he. Nɛkɛ yoo nɛɛ hu miitsɔɔ Kristofoi lɛ ni “amɛbɔ ajwamaŋ ni amɛye wɔji afɔleshaa nii.” (Kpojiemɔ 2:20) Ani Satan ebɔ mɔdɛŋ ni ekɛ Bileam loo Isabel tsɔɔmɔ aba Kristofoi asafo lɛ mli ŋmɛnɛ? Hɛɛ efee nakai, kɛyashɛ he ni kɛ hooo lɛ ashwieɔ mɛi aaafee 40,000 daa afi kɛjɛɔ asafo lɛ mli, ni amɛteŋ mɛi titri ji mɛi ni bɔɔ ajwamaŋ. Mɛɛ oshara nɛ! Hii ni tamɔ Bileam kɛ yei ni tamɔ Isabel fɛɛ etse atua amɛshi onukpai lɛ ni amɛbɔ mɔdɛŋ akɛ amɛaafite asafo lɛ. Eba akɛ wɔkɛ wɔhewalɛ fɛɛ aaate shi wɔshi nifeemɔi ni he tseee nɛɛ!—1 Korintobii 6:18; 1 Yohane 5:21.
13. (a) Tsɔɔmɔ bɔ ni Yesu nyaŋeɔ kulɔkulɔfeemɔ ehaa lɛ mli. (b) Mɛni hewɔ Laodekiabii lɛ efee kulɔkulɔ lɛ, ni te wɔɔfee tɛŋŋ wɔkwa gbɔjɔmɔ ni tamɔ nɛkɛ ŋmɛnɛ lɛ?
13 Yesu kɛɛ asafo ni yɔɔ Laodikea lɛ yɛ Kpojiemɔ 3:15, 16 akɛ: “Mile onitsumɔi lɛ akɛ obɛ ŋanii ni obɛ klakla hu. Oo kulɛ ofee ŋanii loo ofee klakla! Shi nɛkɛ nɛɛ, akɛni kulɔkulɔ oyɔɔ ni obɛ ŋanii ni obɛ klakla hu hewɔ lɛ, mibafɛ̃o yɛ midaaŋ mashwie.” Kwɛ bɔ ni atsɔɔ bɔ ni Yesu nyaŋeɔ kulɔkulɔfeemɔ lɛ mli faŋŋ aha! Etee nɔ akɛ: “Ejaakɛ okɛɔ akɛ: Niiatsɛ ji mi, ni miyɛ nii ni nɔ ko nɔ ko ehiaaa mi.” Hɛɛ, heloo gbɛfaŋ nibii asɛɛdii elaka Kristofoi ni yɔɔ Laodikea lɛ. Amɛtsuii enyɔ amɛmli, ni nɔ ko jeee amɛhe sane ko. Shi Yesu kɛɛ amɛ akɛ: “Olé akɛ oyɛ amane mli, ni onii hu yɛ mɔbɔ, ni ohiafo kɛ shwilafo kɛ heyayaiatsɛ jio.” (Kpojiemɔ 3:17) Ani wɔmiisumɔ ni wɔfee mɛi ni yɔɔ “amane mli ni . . . nii hu . . . yɔɔ mɔbɔ, ni ohiafo kɛ shwilafo kɛ heyayaiatsɛmɛi ji wɔ” yɛ Yesu hiɛ? Dabida! No hewɔ lɛ nyɛhaa wɔ fɛɛ wɔtsɔa gbɛ fɛɛ gbɛ nɔ ni wɔwu wɔshi heloo gbɛfaŋ nibii asɛɛdii aloo kulɔkulɔfeemɔ.—1 Timoteo 6:9-12.
Ŋmɛɛ Otsui Shi Kɛyashi Naagbee
14. (a) Mɛɛ naagbai Smirna asafo lɛ kɛkpe? (b) Mɛni yɔɔ ŋmɛnɛŋmɛnɛ beaŋ ni tamɔ Smirna asafo lɛ niiashikpamɔi lɛ?
14 Asafo ni bɛ kulɔkulɔ ji nɔ ni yɔɔ Smirna lɛ. Yesu kɛɛ nɛkɛ Kristofoi nɛɛ akɛ: “Mile onitsumɔi lɛ kɛ omanehulu lɛ kɛ ohia lɛ—shi kɛlɛ niiatsɛ jio—ni mile mɛi ni kɛɔ akɛ Yudafoi ji amɛ, ni amɛjeee, shi amɛji Satan kpee he moŋ lɛ amusubɔɔ lɛ. Kaashe amanehulu ni obaana lɛ eko eko gbeyei. Naa, Abonsam baaŋɔ nyɛteŋ mɛi komɛi awo tsuŋ, koni aŋɔka nyɛ, ni nyɛaana amanehulu gbii nyɔŋma.” (Kpojiemɔ 2:8-10) Kwɛ bɔ ni enɛ tamɔ Kristofoi ni yɔɔ ŋmɛnɛ lɛ aniiashikpamɔ lɛ pɛpɛɛpɛ ha! Ŋmɛnɛŋmɛnɛ beaŋ Kristofoi, ni ji mɛi ni afɔ amɛ mu lɛ kɛ toi krokomɛi lɛ fɛɛ ena nɔ babaoo yɛ shitee-kɛ-woo ni baa amɛnɔ nɛɛ ni jɛ “Satan kpee he” ni ji Kristendom dɛŋ lɛ hewɔ. Kɛjɛ klɛŋklɛŋ jeŋ ta lɛ mli aahu kɛbashi bianɛ lɛ, ayi hii, yei kɛ gbekɛbii akpei abɔ, awo amɛ tsuŋ, afee amɛ niseniianii, amɔmɔ amɛ ekaa naa akɛ amɛ ewɔ aloo agbe amɛ yɛ kpɛlɛmɔ ni amɛkpɛlɛɛɛ akɛ amɛaaŋmɛɛ amɛ emuuyeli mli ni amɛhiɛ lɛ he ni amɛkɛsaa lɛ hewɔ.
15, 16. (a) Te Kristofoi ni afɔ amɛ mu lɛ aaafee tɛŋŋ amɛna miishɛɛ yɛ yiwaa ni baa amɛnɔ lɛ fɛɛ sɛɛ? (b) Mɛɛ nyɔmɔwoo krɛdɛɛi ni mɛɔ “toi krokomɛi lɛ” yeɔ buaa amɛ ni amɛ hu amɛnaa miishɛɛ?
15 Ani niiashikpamɔi ni tamɔ nɛkɛ kɛ miishɛɛ baa? Enɛ kɛ miishɛɛ baaa. Shi taakɛ bɔfoi lɛ ji lɛ, anɔkwale Kristofoi ni ŋmɛɔ amɛtsui shi yɛ kaai amli lɛ naa mligbɛ miishɛɛ ko akɛ [Yesu] “egbɛi lɛ ahewɔ lɛ, abu amɛ mɛi ni sa akɛ abɔɔ amɛ ahora.” (Bɔfoi lɛ Asaji 5:41) Ni amɛyaa nɔ amɛhiɔ shi akɛ mɛi ni yɔɔ miishɛɛ yɛ nɔ fɛɛ nɔ ni amɛhenyɛlɔi lɛ aaafee amɛ lɛ sɛɛ, ejaakɛ amɛle akɛ be ni ato ni abaawo amɛ emuuyeli mli hiɛmɔ lɛ he nyɔmɔ eshɛ, ni akɛ nyɔmɔwoo lɛ da diɛŋtsɛ. Yesu kɛɛ Kristofoi ni yɔɔ Smirna lɛ akɛ: “Feemɔ anɔkwafo kɛyashi gbele mli, ni mahao wala akekere lɛ.” (Kpojiemɔ 2:10) Ní ekɛɛ mɛi ni yɔɔ Sarde lɛ akɛ: “Kunimyelɔ lɛ, aaawo lɛ atadei yɛji, ni migbeŋ egbɛi yɛ wala wolo lɛ mli gbi ko gbi ko.”—Kpojiemɔ 3:5.
16 Eji anɔkwale akɛ, nɛkɛ shiwoi nɛɛ kɔɔ Kristofoi ni afɔ amɛ mu lɛ ahe pɔtɛɛ, ni ekaiɔ amɛ ŋwɛi wala ni gbele bɛ mli he nyɔmɔwoo ni mɛɔ amɛ lɛ. Shi nɛkɛ wiemɔi nɛɛ hu woɔ mɛi ni jɛ “toi krokomɛi” lɛ ateŋ lɛ hu hewalɛ. Yehowa yɛ nyɔmɔwoo ko ni esaa eto amɛ hu, shi ja amɛfee ekaa ni amɛŋmɛ amɛtsui shi da. Amɛyɛ anunyam gbɛkpamɔ ko ni ji naanɔ wala yɛ paradeiso shikpɔŋ nɔ yɛ Maŋtsɛyeli ni yɔɔ Kristo dɛŋ lɛ shishi ni amɛaahi. Jɛmɛ ji he ni amɛnine aaashɛ Paradeiso ni gbɔmɛi ni yɔɔ je nɛɛ mli lɛ nyɛŋ ana lɛ nɔ yɛ.
17. Mɛɛ wiemɔi Yesu kɛmu eshɛɛsaji lɛ eko fɛɛ eko naa, ni mɛni ewiemɔi lɛ tsɔɔ kɛhaa wɔ ŋmɛnɛ?
17 Yesu kɛ nɛkɛ wiemɔi nɛɛ mu sane fɛɛ sane ni ekɛha asafoi lɛ eko fɛɛ eko lɛ naa akɛ: “Mɔ ni yɔɔ toi lɛ, ha ní enu nɔ ni mumɔ lɛ kɛɔ asafoi lɛ.” (Kpojiemɔ 3:22) Hɛɛ, esa akɛ wɔnu ni wɔye Tookwɛlɔ Nukpa lɛ wiemɔi lɛ anɔ. Esa akɛ wɔkwa muji nitsumɔi, kɛ hemɔkɛyeli kwamɔ, ni wɔhiɛ ekaa ni wɔyɔɔ lɛ mli. Nyɔmɔwoo lɛ ni wɔnine aaashɛ nɔ lɛ damɔ enɛ nɔ. Ni kɛ wɔsusu saji krokomɛi ni yɔɔ Kpojiemɔ lɛ mli lɛ he lolo lɛ, ehaa wɔtswaa wɔfai shi akɛ nakai pɛpɛɛpɛ wɔbaafee.
Wolokpo Lɛ Naasɔomɔi Lɛ
18. (a) Mɛni Yesu nine shɛ nɔ yɛ ŋwɛi gwabɔɔ he lɛ? (b) Mɛni ji nɔ ni klɛŋklɛŋ okpɔŋɔi etɛ lɛ anɔtaramɔ ni yɔɔ Kpojiemɔ yitso 6 lɛ tsɔɔ kɛha adesai ni yɔɔ wala mli ŋmɛnɛ lɛ?
18 Akɛ nɔkwɛmɔ nɔ lɛ, Yohane na Yehowa ŋwɛi gwabɔɔ he ni yɔɔ naakpɛɛ lɛ yɛ yitsei 4 kɛ 5 lɛ mli. Nyɔŋmɔ Toobi, Yesu Kristo, yɛ jɛmɛ, ni enine shɛ wolokpo ko kɛ enaasɔomɔi kpawo nɔ. Yesu gbele naasɔomɔi kpawo lɛ mli ekpaa naa, ekome nyiɛ ekroko sɛɛ yɛ yitso ekpaa lɛ mli. Beni agbele klɛŋklɛŋ nɔ lɛ naa lɛ, ana mɔ ko ni ta okpɔŋɔ yɛŋ nɔ. Aha lɛ akekere, ni eje kpo “eye kunim koni egbe ekunimyeli lɛ naa.” (Kpojiemɔ 6:2, New World Translation) Yesu nɛ, Maŋtsɛ hee ní awo lɛ lɛ. Beni eje emaŋtsɛyeli kunimyeli lɛ shishi yɛ 1914 lɛ, kɛkɛ ni Nuŋtsɔ lɛ gbi je shishi. Beni atse naasɔomɔi etɛ ni nyiɛ sɛɛ lɛ anaa lɛ, ana okpɔŋɔi krokomɛi etɛ kɛ amɛnɔtaralɔi. Mɛnɛɛmɛi ahe yɛ gbeyei, ni amɛdamɔ shi kɛha adesa tawuu, hɔmɔ kɛ gbele kɛtsɔ helai kɛ nibii krokomɛi anɔ. Amɛmaa Yesu gbalɛ kpeteŋkpele lɛ nɔ mi akɛ beni eeepue yɛ ŋwɛi yɛ maŋtsɛyeli hewalɛ mli lɛ, nɔ ni baaba shikpɔŋ nɛɛ nɔ ji tai, hɔmɔ, tsɛŋemɔ helai, shikpɔŋhosomɔi kɛ osharai wuji krokomɛi. (Mateo 24:3,7, 8; Luka 21:10, 11) Yɛ anɔkwale mli lɛ, esa akɛ Kristofoi abo Yesu wiemɔi ni ekɛha asafoi ni ekɛha asafoi kpawo lɛ toi kɛji akɛ amɛaanyɛ amɛŋmɛ amɛtsui shi yɛ bei ni tamɔ nɛkɛ mli.
19. (a) Mɛɛ nyɔmɔwoo akɛhaa Kristofoi anɔkwafoi ni afɔ amɛ mu lɛ ni egboi momo lɛ yɛ ba ni Kristo eba nɛɛ mli? (b) Mɛɛ nibii ni yɔɔ gbeyei afee he mfoniri yɛ naasɔomɔ nɔ ni ji ekpaa lɛ naagbelemɔ mli, ni mɛɛ sanebimɔ enɛ kɛbaa?
19 Beni atse naasɔomɔ nɔ ni ji enumɔ lɛ naa lɛ, ajie nɔ ko ni tee nɔ yɛ mumɔi ashihilɛ he ni anaaa jɛmɛ lɛ kpo. Akɛ atade yɛŋ ha Kristofoi ni efɔ amɛ mu lɛ ni gboi yɛ amɛ hemɔkɛyeli hewɔ lɛ ateŋ mɔ fɛɛ mɔ. Eka shi faŋŋ akɛ akɛni ba ni Kristo eba lɛ eje kpo faŋŋ agbɛnɛ hewɔ lɛ, ŋwɛi shitee lɛ eje shishi. (1 Tesalonikabii 4:14-17; Kpojiemɔ 3:5) Kɛkɛ ni agbele naasɔomɔ nɔ ni ji ekpaa lɛ naa, ni shikpɔŋhosomɔ kpeteŋkpele ko hoso “shikpɔŋ lɛ” ni ji Satan shikpɔŋ nɔ gbɛjianɔtoo lɛ. (2 Korintobii 4:4) Akota “ŋwɛi” ni ji adesa nɔyeli ni yɔɔ Satan shishi lɛ tamɔ akotaa wolo momo ko, ni afee klalo akɛ abaashɛ afɔ. Adesai atuatselɔi ni gbeyei emɔmɔ amɛ lɛ bɔi bolɔmɔ yɛ nijiaŋwujee hewɔ amɛwo tesaai lɛ amɛkɛɛ: “Nyɛgbeea wɔ nɔ, ni nyɛteea wɔ kɛjɛa Mɔ ni ta maŋtsɛsɛi lɛ nɔ lɛ hiɛ, kɛ Toobi lɛ mlifu lɛ naa. Ejaakɛ emlifu gbi wulu lɛ eshɛ, ni namɔ aaanyɛ shi adamɔ?”—Kpojiemɔ 6:13, 14, 16, 17.
20. Namɔ baanyɛ adamɔ shi yɛ Yehowa kɛ Toobi lɛ mlifu gbi wulu lɛ mli?
20 Ni namɔ aaanyɛ shi adamɔ? Yesu eha nakai sanebimɔ lɛ hetoo momo. Mɛi ni “nuɔ nɔ ni mumɔ lɛ kɛɔ asafoi lɛ” ji mɛi ni baadamɔ shi yɛ nakai mlifu gbi kpeteŋkpele lɛ nɔ. Ni bɔni afee ni ema enɛ nɔ mi lɛ, Yohane tee nɔ etsɔɔ bɔ ni fee ni ele bɔ ni asɔo 144,000 lɛ amli naagbee mɛi lɛ anaa lɛ kɛ bɔ ni abua asafo babaoo ni jɛ jeŋmaji fɛɛ mli ni jeɔ “amanehulu kpeteŋkpele” lɛ mli lɛ anaa aha. (Kpojiemɔ 7:1-3, 14) Shi agbɛnɛ be eshe ni abaagbele wolokpo lɛ naasɔomɔ nɔ ni ji kpawo lɛ naa ni abaajie ninaai ni yɔɔ naakpɛɛ sɔrɔtoi akpo atsɔɔ Yohane, koni kɛtsɔ enɔ lɛ, wɔnine ashɛ nɔ ŋmɛnɛ. Nikasemɔ ni nyiɛ enɛ sɛɛ lɛ baasusu enɛɛmɛi ekomɛi ahe.
Ani Okaiɔ?
◻ Mɛɛ wekukpaa ka Yesu kɛ asafo lɛ mli onukpai lɛ ateŋ?
◻ Mɛɛ naagbai ka onukpai ni Pergamo kɛ Tiatira asafo Iɛ mli Iɛ ahiɛ, ni naagbai ni tamɔ nakai nɔŋŋ eba Kristofoi asafoi Iɛ anɔ ŋmɛnɛ yɛ mɛɛ gbɛ nɔ?
◻ Mɛɛ tɔmɔ ko ni hiɛdɔɔ yoo mli Laodekia asafo lɛ fee, ni te wɔɔfee tɛŋŋ wɔkwa tɔmɔ ni tamɔ nakai nɔŋŋ ŋmɛnɛ?
◻ Ehe ebahia ni Kristofoi aŋmɛ amɛtsui shi yɛ afii ohai 20 nɛɛ mli yɛ mɛɛ gbɛ nɔ, ni mɛɛ Yesu shiwoi eye ebua amɛ ni amɛnyɛ amɛfee nakai?
◻ Te wɔɔfee tɛŋŋ wɔkwa nijiaŋwujee kɛ hiɛnɔkamɔ ni bɛ ni jeŋmaji Iɛ kɛbaakpe yɛ Harmagedon lɛ?
[Mfonirii ni yɔɔ baafa 13]
Kristofoi anɔkwafoi ni na nɔ yɛ Nazi gboklɛfoi aŋsraiaŋ lɛ ateŋ mɛi komɛi
[He ni Sane lɛ Jɛ]
DÖW, Vienna, Austria