Onukpai—Nyɛbaa Nii Ni Atu Awo Nyɛdɛŋ Lɛ He
“Nyɛlea nyɛhe nɔ kwɛmɔ kɛ tooi kuu lɛ fɛɛ ni mumɔ krɔŋkrɔŋ lɛ ewo nyɛ amɛ nɔkwɛlɔi lɛ, koni nyɛlɛ Nyɔŋmɔ asafo lɛ ni ekɛ lɛ diɛŋtsɛ ebi lɛ la he lɛ.”—BƆFOI LƐ ASAJI 20:28.
1. Mɛni fata nii ni atu awo Kristofonyo lɛ dɛŋ lɛ he?
YEHOWA NYƆŊMƆ kɛ nɔ ko ni atuɔ awoɔ mɔ dɛŋ ni yɔɔ naakpɛɛ eha mɛi ni yɔɔ eshikpɔŋ nɔ asafo lɛ mli lɛ. Shi mɛni ji nii ni atuɔ awoɔ mɔ dɛŋ nɛɛ? Eji nɔ ko ni jara wa ni akɛwo mɔ ko dɛŋ koni ebu he akɔntaa. Nɔ ni fata Kristofoi anii ni akɛwoɔ mɔ dɛŋ nɛɛ he ji “tsamɔ wiemɔ,” anɔkwale lɛ ni atsɔɔ Ŋmalɛi lɛ anɔ akɛhaa ni “tsulɔ anɔkwafo kɛ nilelɔ” lɛ jaa kɛhaa akɛ “ŋmaa yɛ be ni sa nɔ lɛ.” (2 Timoteo 1:13, 14; Mateo 24:45-47) Nɔ ni fata nii ni atu awo mɔ dɛŋ nɛɛ he ji sɔɔmɔ nitsumɔ lɛ ni fata anɔkwale lɛ he lɛ, ni esa akɛ ashiɛ yɛ asafo lɛ mli kɛ esɛɛ fɛɛ lɛ. (2 Timoteo 4:1-5) , Esa akɛ maŋtsɛyeli jajelɔi, ni onukpai ni akɛ mumɔ ehala amɛ lɛ fata he lɛ abu nii ni atuɔ awoɔ mɔ dɛŋ nɛɛ akɛ eji nii ni jara wa fe fɛɛ.
2. Mɛni akɛfata nii ni atu awo onukpai adɛŋ lɛ he, ni mɛni Petro kɛɛ yɛ he?
2 Kristofoi onukpai yɛ nɔ kroko ni fata he ni atu awo amɛdɛŋ—gbɛnaa nii akɛ amɛkwɛ Nyɔŋmɔ too kuu lɛ nɔ. Bɔfo Petro ŋma yɛ enɛ he akɛ: “No hewɔ lɛ onukpai ni yɔɔ nyɛteŋ lɛ, mi ni ji nyɛnaanyo onukpa kɛ Kristo amanehului lɛ ahe odasefonyo ni baana anunyam ni abaajie kpo lɛ hu eko lɛ,miiwie miitsɔɔ amɛ akɛ: Nyɛlɛa Nyɔŋmɔ asafo kuu ni yɔɔ nyɛteŋ lɛ, nyɛkwɛa nɔ, jeee nɔnyɛɛ naa, shi moŋ yɛ suɔmɔ naa; asaŋ jeee sɛɛnamɔ ni yɔɔ hiɛgbele hewɔ shi moŋ tsuijurɔ naa; asaŋ jeee akɛ mɛi ni yeɔ asafoi lɛ anɔ nuŋtsɔmɛi asane, shi moŋ mɛi ni toɔ okadii amɛhaa asafo kuu lɛ, ni beni tookwɛlɔ nukpa lɛ aaajie ehe kpo lɛ, nyɛnine ashɛ anunyam akekere ni ŋalaaa lɛ nɔ.”—1 Petro 5:1-4.
3. Esa akɛ onukpai ni ji Kristofoi lɛ afee jɛɛhei kɛha mɛni?
3 Esa akɛ Kristofoi onukpai lɛ atamɔ “abobaa he yɛ kɔɔyɔɔ naa kɛ teemɔ he yɛ nugbɔnɛmɔ naa, tamɔ faai yɛ ŋa kpataa nɔ loo tɛsaa kpele ni haa hɔɔŋ yɛ shikpɔŋ gbiŋ nɔ.” (Yesaia 32:1, 2) Enɛ tsɔɔ akɛ esa akɛ onukpai lɛ afee abobaa he, toiŋjɔlɛ, kɛ shiŋŋfeemɔ jɛɛhe aha Nyɔŋmɔ tsuji asafo kuu ni tamɔ gwantɛŋi lɛ. “Aabi nɔ ni teke nɔ shi” yɛ onukpai loo tookwɛlɔi bibii lɛ adɛŋ ejaakɛ “atu pii awo [amɛ] dɛŋ.” (Luka 12:48) Ni amɛyɛ nɔ ko ni atu awo amɛdɛŋ lɛlɛŋ ni jara wa waa ni esa akɛ amɛbu he.
Mɛni Hewɔ Atu Awo Odɛŋ?
4. Mɛni hewɔ onukpai babaoo he hiaa lɛ?
4 Yehowa Odasefoi asafoi fe 57,000 ni yɔɔ jeŋ fɛɛ lɛ biɔ ni ana hii akpei nyɔŋma nyɔŋmai abɔ ni he esa yɛ mumɔŋ koni amɛkwɛ Nyɔŋmɔ asafo kuu lɛ nɔ. Onukpai pii yɔɔ maŋ muu fɛɛ maŋ muu mli ni enɛ ji nɔ ko ni wɔbaanyɛ wɔnya he. Yɛ jeŋ fɛɛ lɛ kɛ aja mli lɛ Maŋtsɛyeli jajelɔi 60 yɔɔ asafo fɛɛ asafo mli. No hewɔ lɛ nitsumɔ babaoo yɛ kɛha onukpai lɛ.—1 Korintobii 15:58.
5. Mɛni nɔ adamɔɔ akɛ hegbɛ ni akɛsɔmɔɔ akɛ onukpa lɛ haa mɔ ko?
5 Kɛ oji onukpa lɛ, mɛni hewɔ ni akɛ hegbɛ ni jɔɔmɔ yɔɔ mli nɛɛ ha bo lɛ? No ji akɛ ofee nibii komɛi, ni oyɛ mumɔŋ hesaai. Akɛ nɔkwɛmɔ nɔ lɛ, eka shi faŋŋ akɛ okɛ hiɛdɔɔ ekase Nyɔŋmɔ Wiemɔ lɛ. (Yoshua 1:7, 8) Okɛ ohe woɔ sɔɔmɔ nitsumɔ lɛ mli ekaa naa, ni agbɛnɛ oyeɔ obuaa mɛi krokomɛi ni amɛbatsɔmɔ Maŋtsɛyeli jajelɔi. Akɛni ‘aka bo akwɛ klɛŋklɛŋ’ hewɔ lɛ, osɔmɔ yɛ anɔkwayeli mli akɛ asafoŋ sɔɔlɔ. ‘Ootao’ nɔ ko, ni ohe asa, ni otsɔ onukpa, oyoo”akɛ ni ooofee nɔkwɛlɔ lɛ ji “nitsumɔ kpakpa.” (1 Timoteo 3:1, 10) Taakɛ Timoteo ji lɛ, “nyɛmimɛi lɛ . . . taa [ohe] . . . sanekpakpa.” (Bɔfoi lɛ Asaji 16:2) Beni ajie oyi akɛ onukpa lɛ, ekolɛ no miilɛ oobɛŋkɛ afii 30 aloo oda fe nakai ni ona niiashikpamɔ yɛ shihilɛ mli. Asafo lɛ jie bulɛ kpo amɛtsɔɔ bo akɛ nyɛmi nuu hi eda yɛ mumɔŋ, mɔ ni anyɛɔ abɛŋkɛɔ lɛ, mɔ ni nyɛɔ ekɛ Ŋmalɛ naa ŋaawoo kpakpa ni mɔɔ shi haa ni enyɛɔ ekɛ teemɔŋ sane toɔ.—Abɛi 25: 9, 10.
Bɔ Ni Ooofee Ni Obu Nɔ Ni Atu Awo Odɛŋ Lɛ He
6, 7. Mɛɛ ŋaawoo 1 Timoteo 4:13-15 kɛhaa koni eye ebua mɔ ko ni ebu nɔ ni atu owo edɛŋ akɛ onukpa lɛ he?
6 Hɛɛ, kɛ oji onukpa lɛ, belɛ yiŋtoo kpakpai ahewɔ ni akɛ Kristofoi anɔkwɛmɔ nitsumɔ lɛ wo odɛŋ lɛ. Ni kwɛ bɔ ni onu nɛkɛ hegbɛ nɛɛ he oha! Shi te ooofee tɛŋŋ ni obu nɔ ni atu awo odɛŋ nɛɛ he lɛ?
7 Akɛ onukpa lɛ, gbɛ kome ni oootsɔ nɔ obu nɔ ni atu awo odɛŋ nɛɛ he ji ni okɛ anɔkwayeli kɛ hiɛdɔɔ atsu onitsumɔi ahe nii. Wɔ fɛɛ wɔyɛ nitsumɔi ni ji gbɛnaa nii sɔrɔtoi yɛ Yehowa gbɛjianɔtoo loo asafo lɛ mli. No hewɔ lɛ, hii ogbɛhe lɛ, ni omii ashɛ ohe akɛ ‘ooobu ohe akɛ mɔ bibioo.’ (Luka 9:46, 48; okɛto Kojolɔi 7:21 he.) Omii ashɛ ogbɛnaa nii lɛ ahe, ni ‘kaagbɔjɔ onijiaŋ’ kɔkɔɔkɔ. (Abɛi 10:4) Kaadamɔ shi kɛkɛ, shi yaa ohiɛ yɛ sɔɔmɔ nitsumɔ lɛ eko fɛɛ eko mli kɛ Yehowa yelikɛbuamɔ. Yɛ anɔkwale mli lɛ, nyiɛmɔ ŋaawoo ni Paulo kɛba Timoteo nɛɛ sɛɛ wolo kanemɔ kɛ ŋaawoo kɛ nitsɔɔmɔ he kɛyashi beyinɔ ni maba. Kaaŋmɛɛ omli duromɔ keenɔ ni akɛ gbalɛ kɛ onukpai lɛ aniji ni akɛshwie onɔ lɛ ŋɔhao lɛ he. Bɔɔ nii nɛɛ ahe mɔdɛŋ, okɛ ohe awo mli kwraa, koni mɛi fɛɛ ana eshweremɔ faŋŋ.”—1 Timoteo 4:13-15.
8. Mɛni baaye abua onukpa koni ekɛ ŋaawoo kpakpa ni wajeɔ mɔ yɛ mumɔŋ aha yɛ kpeei ashishi?
8 Bɔɔ mɔdɛŋ ni ona be he gbɛjianɔtoo kpakpa oha oteemɔŋ nikasemɔ. Akɛ onukpa lɛ, aakpa gbɛ akɛ okɛ Ŋmalɛ naa ŋaawoo kpakpa baaha. Bɔni afee ni aha ohe asa kɛha nɛkɛ gbɛnaa nii lɛ, ani okane Biblia muu lɛ fɛɛ ni ojwɛŋ nɔ lo? Ekolɛ shii abɔ? (Abɛi 15:28) Agbɛnɛ gbɛnaa nii ni otsuɔ he nii yɛ kpoku lɛ nɔ lɛ hu? Saamɔ ohe jogbaŋŋ, taomɔ Yehowa dɛŋ yelikɛbuamɔ yɛ sɔlemɔ mli bɔni afee ni onyɛ okɛ nɔ ko ni woɔ mɔ hewalɛ yɛ mumɔŋ aha mɛi ni eba wɔkpeei ashishi lɛ. Onukpai titri ji mɛi ni esa akɛ ‘amɛwie wiemɔi ni tswaa mɔ maa shi, koni eha toibolɔi lɛ anane amɔ shi.’—Efesobii 4:29; Romabii 1:11.
9. Taakɛ 2 Timoteo 4:2 tsɔɔ lɛ, mɛni esa akɛ onukpa afee?
9 Akɛ onukpa lɛ, bo Paulo ŋaawoo nɛɛ toi: “Shiɛmɔ wiemɔ lɛ, ka he, deka yɛ jio, deka bɛ jio, ka hiɛ, wo ŋaa, bɔɔ kɔkɔ yɛ tsuishitoo kɛ nitsɔɔmɔ fɛɛ mli.” (2 Timoteo 4:2) Paulo miisusu hemɔkɛyeli kwamɔ he waa ejaakɛ mɛi komɛi yɛ asafo lɛ mli ni ‘kɛ wiemɔi wuɔ ta,’ amɛkɛ amɛbe woɔ ‘yakayaka sanebimɔi amli,’ ni ‘amɛbooo anɔkwale lɛ toi.’ (2 Timoteo 2:14-18, 23-25; 3:8-13; 4:3, 4) Kɛji akɛ asafo lɛ kɛ be ni ehiii loo amɛkɛ be ni hi miikpe hu lɛ, esa akɛ Timoteo ‘ashiɛ wiemɔ lɛ.’ Enɛ baawo nanemɛi heyelilɔi lɛ hewalɛ ni amɛte shi amɛwo hemɔkɛyeli kwamɔ. Nakai ŋmɛnɛ, esa akɛ onukpai lɛ ashiɛ Wiemɔ lɛ ni gbuɔ shi lɛ aloo Nyɔŋmɔ shɛɛ sane lɛ, ni shɛɔ tsui mli ni woɔ hewalɛ koni akɛ he akpɛtɛ tɛi ni Yehowa efolɔ eshwie shi lɛ ahe lɛ.—Hebribii 4:12.
10. Mɛni hewɔ esa akɛ onukpa lɛ kɛ eweku lɛ mlibii kɛ mɛi krokomɛi atsu nii daa yɛ sɔɔmɔ nitsumɔ lɛ mli lɛ?
10 Bɔni afee ni onukpa ko kɛ hewalɛ awie lɛ, esa akɛ ehi shi yɛ Nyɔŋmɔ Wiemɔ lɛ gbeekpamɔ naa. Shi enyɛŋ efee mɔ ni buɔ nɔ ni akɛwo edɛŋ lɛ he yɛ gbɛ ni mɔɔ shi nɔ kɛji akɛ ‘eshiɛɔ wiemɔ’ lɛ kɛjɛɔ asafo kpoku lɛ nɔ pɛ. Yɛ wiemɔ ni Paulo wo Timoteo hewalɛ akɛ: “Tsu sanekpakpa jajelɔ nitsumɔ lɛ. Bɔni afee ni ‘ogbe osɔɔmɔ lɛ naa kwraa’ akɛ onukpa lɛ, esa akɛ eshiɛ Nyɔŋmɔ Wiemɔ lɛ “yɛ faŋŋ kɛ shia kɛ shia.” (2 Timoteo 4:5; Bɔfoi lɛ Asaji 20:20, 21) No hewɔ lɛ, okɛ oweku lɛ mlibii atsu nii yɛ shiɛmɔ nitsumɔ lɛ mli. Enɛ baaha mumɔŋ tsakpaa kɛ ekomefeemɔ ni ka bo kɛ oŋa lɛ teŋ lɛ aya hiɛ ni ehe baaba sɛɛnamɔ babaoo aha obii lɛ. Okɛ asafo lɛ mli bii krokomɛi lɛ hu aye be ko yɛ shiɛmɔ nitsumɔ lɛ mli. Enɛ woɔ mumɔŋ ekomefeemɔ lɛ mli hewalɛ ni ehaa nyɛmimɛi asuɔmɔ yaa hiɛ. (Yohane 13:34, 35) Shi, esa akɛ onukpa lɛ abɔ mɔdɛŋ ni eŋmɛ pɛpɛɛpɛ yɛ be ni he hiaa ni ejaa mli ekɛhaa eweku lɛ kɛ asafo lɛ mli. Sɛɛyoomɔ ni ekɛaatsu nii lɛ haŋ etu be babaoo tsɔ eha ekome, koni eku ehiɛ eshwie ekroko nɔ yɛ gbɛ ni ejaaa nɔ.
11. Mɛni hewɔ esa akɛ onukpa atsu nii waa koni eha ehesaa akɛ tsɔɔlɔ lɛ aya hiɛ lɛ?
11 Bɔni afee ni obu nɔ ni atu awo odɛŋ akɛ onukpa lɛ he lɛ, bɔɔ mɔdɛŋ ni otsu nii waa ni oha ohesaa akɛ tsɔɔlɔ lɛ aya hiɛ. Paulo kɛɛ: “Kɛ tsɔɔlɔ ji mɔ lɛ, ha ehiɛ nitsɔɔmɔ lɛ mli,” aloo “mɔ ni wieɔ tsɔɔ mɛi lɛ, ehiɛ wiemɔ-kɛ-tsɔɔmɔ lɛ mli.” (Romabii 12:7, 8) Akɛni tsɔɔlɔ damɔɔ mɛi krokomɛi ahiɛ akɛ mɔ ni wieɔ etsɔɔ mɛi hewɔ lɛ, amɛyɛ hegbɛ akɛ amɛkpaa babaoo kɛjɛɔ edɛŋ. Kɛji akɛ onukpa ko tɔ tɔmɔ ni hiɛdɔɔ yɔɔ mli yɛ etsɔɔmɔ mli ni enɛ kɛ naagbai ba enanemɛi heyelilɔi lɛ anɔ lɛ, ebaa Nyɔŋmɔ kojomɔ shishi. Hɛɛ, tsɔɔlɔi “baana kojomɔ kpele.” (Yakobo 3:1, 2; Mateo 12:36, 37) No hewɔ lɛ ehe miihia ni onukpai lɛ afee mɛi ni kɛ hiɛdɔɔ kaseɔ Nyɔŋmɔ Wiemɔ lɛ ni esa akɛ amɛkɛtsu nii yɛ amɛshihilɛ mli. Kɛkɛ lɛ amɛ Ŋmalɛ naa tsɔɔmɔ ni amɛkɛtsuɔ nii yɛ amɛshihilɛ mli lɛ baafee nɔ ni nanemɛi heyelilɔi ahiɛ baasɔ babaoo. Ebaabu asafo lɛ hu he kɛjɛ sui gbohii ni hemɔkɛyeli kwamɔ fata he lɛ ahe.
Kwa Shigbeemɔi
12. Mɛɛ ŋaawoo ni akɛha yɛ nɛkɛ wolo nɛɛ mli lɛ be ko mli baaye abua onukpa lɛ koni ekwa elilɛi ni ekɛaatsu nii yɛ gbɛ fɔŋ nɔ?
12 Buu nɔ ni atu awo odɛŋ akɛ onukpa lɛ hu he kɛtsɔ shigbeemɔi ni oookwa lɛ nɔ. Enɛɛmɛi ekome ji lilɛi lɛ ni okɛaatsu nii yɛ gbɛ fɔŋ nɔ akɛ tsɔɔlɔ, Yehowa gbɛjianɔtoo lɛ ema bɔ ni ehe hiaa akɛ aaakwɛ he nɔ jogbaŋŋ yɛ enɛ he lɛ nɔ mi kɛjɛ blema. Akɛ nɔkwɛmɔ nɔ lɛ, wolo ni wɔhiɛ nɛɛ nɔ ni akala ni ji May 15, 1897 nɔ lɛ wie Yakobo 3:1-13 he ni ewie enɛ krɛdɛɛ yɛ onukpai lɛ ahe akɛ: “Kɛ amɛhiɛ lilɛi ni nɔ tse lɛ, ebaanyɛ efee gbɛ ni aaatsɔ nɔ akɛ jɔɔmɔi babaoo aha, ni egbala mɛi pii kɛba Nuŋtsɔ lɛ masɛi, kɛba anɔkwale lɛ kɛ akɛ tɔmɔ ji nɔ ni eyi lilɛi nɔ obɔ lɛ, lilɛi lɛ baanyɛ ayɛ awui babaoo ni anyɛŋ akpa —ebaaye hemɔkɛyeli lɛ, jeŋba, kɛ nitsumɔi kpakpai awui. Eji anɔkwale diɛŋtsɛ akɛ, mɔ fɛɛ mɔ ni kɛ ehe haa nikee nii ni ji tsɔɔmɔ lɛ kɛ ehe haa koni akɛ gbɛnaa nii ni fa afɔ enɔ yɛ Nyɔŋmɔ kɛ gbɔmɛi ahiɛ. . . . Mɔ fɛɛ mɔ ni baafee nu bu ni Nyɔŋmɔ Wiemɔ lɛ baajɛ emli aho, ni etere jɔɔmɔ kɛ hejɔɔmɔ kɛ hewalɛ ayaha mɛi lɛ akwɛ jogbaŋŋ koni nui ni joɔ, apasa tsɔɔmɔi ni kɛ loomɔ, awuiyeli baaba —ni baagbe Nyɔŋmɔ he guɔ ni efutu e-Wiemɔ lɛ mli lɛ—akana gbɛ ko yɛ amɛmli ni amɛaatsɔ nɔ. Yɛ be mli ni ahalaa onukpai kɛhaa kpeei lɛ, esaaa akɛ akuɔ hiɛ ashwieɔ ‘lilɛi’ ni haa mɔ he saa ni atsɔɔ mli yɛ biɛ lɛ nɔ. Akahala lilɛi ni tamɔ la, shi moŋ, mɛi ni he jɔ, hiɛshikalɔi, ni ‘woɔ amɛlilɛi manyoflɛ,’ ni bɔɔ mɔdɛŋ jogbaŋŋ koni ‘amɛwie Nyɔŋmɔ gbalɛ wiemɔ’ lɛ pɛ.” Kwɛ bɔ ni ehe hiaa ha akɛ onukpa kɛ elilɛi aaatsu nii yɛ gbɛ ni ja nɔ!
13. Ehe miihia ni onukpai lɛ akwɛ jogbaŋŋ yɛ hiɛtserɛjiemɔ he yɛ mɛɛ gbɛ nɔ?
13 Hiɛtserɛjiemɔ babaoo hu ji shigbeemɔ kroko ni esa akɛ akwa. Esa akɛ aha hiɛtserɛjiemɔ aha mɔ mii ashɛ ehe ni eha mɔ ana hewalɛ, shi jeee ni eha etɔ mɔ ni egbala Kristofonyo lɛ jwɛŋmɔ. Kɛfata hɛ lɛ, esa akɛ nɔkwɛlɔ lɛ afee “hiɛshikalɔ.” (1 Timoteo 3:2) Kɛ okɛ hiɛshikamɔ tsu nɔ fɛɛ nɔ ni ofeɔ ni kɔɔ hiɛtserɛjiemɔ he lɛ henii lɛ, enɛ baabu bo kɛ oweku lɛ he ni ebaafee nɔkwɛmɔ kpakpa kɛha asafo lɛ. Ofeŋ nɔkwɛmɔ nɔ kpakpa kwraa kɛji akɛ yɛ bei babaoo mli lɛ oje kpo yɛ otsii lɛ anaagbee kɛ yiŋtoo akɛ ooya ni oyajie ohiɛtserɛ yɛ be mli ni onanemɛi heyelilɔi lɛ kɛ hiɛdɔɔ kɛ amɛhe ewo sɔɔmɔ nitsumɔ lɛ mli. Esa akɛ ashiɛ sanekpakpa lɛ, ni esa akɛ onukpai lɛ anyiɛ nitsumɔ nɛɛ hiɛ akɛ Maŋtsɛyeli jajelɔi ni yɔɔ ekaa.—Marko 13:10; Tito 2:14.
14. (a) Mɛɛ Ŋmalɛ mli nɔkwɛmɔ nii maa bɔ ni ehe hiaa akɛ onukpai aaatsi amɛhe kɛaajɛ bɔlɛnamɔ mli jeŋba shara he lɛ nɔ mi? (b) Esaaa akɛ onukpai lɛ kuɔ amɛhiɛ amɛshwieɔ mɛɛ kɔkɔbɔɔ ni ama nɔ mi shii abɔ yɛ mumɔŋ nyɛmimɛi yei lɛ ayelikɛbuamɔ he lɛ nɔ?
14 Bɔlɛnamɔ mli jeŋba shara hu ji shigbeemɔ kroko ni esa akɛ akwa. Je lɛ jeŋba shara ni ekpɔtɔ lɛ baanyɛ ana onukpa po nɔ hewalɛ kɛji akɛ eteee shi ewooo kaai ni Satan bɔɔ mɔdɛŋ ekɛtsuɔ nii koni ekɛfite emuuyeli mli ni Nyɔŋmɔ webii lɛ hiɛ lɛ. (Okɛto Mateo 4:1-11; 6:9, 13 he.) Kaimɔ akɛ, beni gbalɔ Bileam bɔ mɔdɛŋ koni elomɔ Israelbii lɛ shi eyeee omanye lɛ, esusu yɛ eyiŋ akɛ Yehowa diɛŋtsɛ aaalomɔ amɛ kɛji akɛ abaanyɛ alaka amɛ ni amɛkɛ amɛhe awo bɔlɛnamɔ he jamɔ mli. No hewɔ lɛ Bileam tsɔɔ Moab maŋtsɛ Balak akɛ “etsɔ Israelbii lɛ atsɔne ni amɛyɛ wɔji afɔleshaa nii ni amɛbɔ ajwamaŋ.” Ani amɛjo nakai shigbeemɔ lɛ naa foi? Dabi, ejaakɛ Israelbii 24,000 gboi yɛ haomɔ ni jɛ Yehowa ŋɔɔ lɛ hewɔ ejaakɛ amɛkɛ Moab yei bɔ ajwamaŋ ni amɛkula shi amɛha amɛnyɔŋmɔi lɛ.” (Kpojiemɔ 2:14; 4 Mose 25:1-9) Kaimɔ hu akɛ, David po, ‘ni eji Nyɔŋmɔ tsuinaa gbɔmɔ lɛ,’ tɛ ni egbee shi kɛbote bɔlɛnamɔ mli jeŋba shara mli. (1 Samuel 13:14; 2 Samuel 11:2-4) Akɛ onukpa lɛ, belɛ, bo “tsulɔ anɔkwafo” lɛ ŋaawoo ni ekɛhaa shii abɔ lɛ toi koni okaye obua omumɔŋ nyɛmiyoo ko yɛ teemɔŋ shi moŋ oha onukpa kroko afata ohe yɛ be mli ni otsuɔ gbɛnaa nii ni tamɔ nɛkɛ he nii lɛ.—Luka 12:42.
15. Te onukpa lɛ weku aaafee tɛŋŋ ayɛ ebua lɛ ni ekwa shigbeemɔ ni ji shika suɔmɔ?
15 Shika suɔmɔ hu ji shigbeemɔ kroko ni esa akɛ onukpa akwa. Ha omii ashɛ nibii ni oyɔɔ lɛ he, ejaakɛ ole akɛ Yehowa baakwɛ ni eto gbɛjianɔ. (Mateo 6:25-33; Hebribii 13:5) Tsɔsemɔ oweku lɛ ni amɛlɛte nibii ahe, ejaakɛ nibii ni afiteɔ lɛ yaka lɛ juɔ be kɛ he naa nibii ni abaanyɛ akɛtsu nii ni akɛye abua weku lɛ, kɛ agbɛnɛ he ni akɛwoɔ sɔɔmɔ nitsumɔ lɛ mli, hewalɛ ni awoɔ asafo lɛ, kɛ Maŋtsɛyeli lɛ,he nibii ni ahaa eyaa hiɛ. Onukpa lɛ naa eweku lɛ ni kɛ lɛ feɔ ekome yɛ enɛ mli lɛ he sɛɛ ni edaa shi diɛŋtsɛ akɛ amɛnyɛɛɛ enɔ koni etao nibii ni he ehiaaa diɛŋtsɛ lɛ eha amɛ. Yɛ anɔkwale mli lɛ, “nii fioo ni Yehowa gbeyeishemɔ fata he lɛ, ehi fe jwetri babaoo ni haomɔ yɔɔ mli.”—Abɛi 15:16.
“Nyɛlea Nyɛhe Nɔ Kwɛmɔ”
16. Mɛɛ ŋaawoo Paulo kɛha Efeso asafo lɛ nɔkwɛlɔi lɛ?
16 Kɛji akɛ onukpai baanyɛ abu nɔ ni atu awo amɛdɛŋ lɛ he lɛ, belɛ esa akɛ amɛkɛ Paulo ŋaawoo ni ekɛha nɔkwɛlɔi ni yɔɔ Efeso lɛ atsu nii. Ekɛɛ amɛ akɛ: “No hewɔ lɛ nyɛlea nyɛhe nɔ kwɛmɔ kɛ tooi kuu lɛ fɛɛ ni mumɔ krɔŋkrɔŋ lɛ ewo nyɛ amɛnɔkwɛlɔi lɛ, koni nyɛlɛ Nyɔŋmɔ asafo lɛ ni ekɛ lɛ diɛŋtsɛ ela he lɛ. Ejaakɛ mile akɛ, kɛ mikpa mihe lɛ, klaji fulɔi baabote nyɛteŋ, ni amɛbaaŋ tooi kuu lɛ yi; nyɛ diɛŋtsɛ nyɛteŋ hu lɛ, hii ni wieɔ nii ni ejaaa aaate shi, ni amɛaakpala kaselɔi lɛ amɛshwie amɛsɛɛ. No hewɔ lɛ nyɛsaraa, ni nyɛkaia akɛ afii etɛ sɔŋŋ mikɛ yaafo nui efɔɔɔ nyɛteŋ mɔ fɛɛ mɔ kɔkɔbɔɔ nyɔɔŋ kɛ shwane.”—Bɔfoi lɛ Asaji 20:28-31.
17, 18. Mɛɛ ŋaawoo ni aŋmala yɛ nɛkɛ wolo tɛtrɛɛ nɛɛ mli aaafee afii 80 ni ebo nɛɛ kɔɔ onukpai ni ji Kristofoi lɛ ahe lolo?
17 Nɔ ni fe afii 80 ni eho nɛ, ni The Watch Tower (Buu-Mɔɔ) (March 1, 1909) nɔ lɛ tsɛ Paulo ŋaawoo ni wɔwie he nɛɛ sɛɛ ni ekɛto nanemɛi onukpai lɛ ahe ni ekɛɛ: “Ehe miihia ni onukpai ni yɔɔ he fɛɛ he lɛ abo enɛ toi jogbaŋŋ; ejaakɛ yɛ kaa fɛɛ kaa mli lɛ, mɛi ni aduro amɛ waa ni ale amɛ waa lɛ ji mɛi ni naagbai nɛɛ kɛ kaai baa amɛnɔ. No hewɔ lɛ (Yakobo) wo ŋaa akɛ, ‘Nyɛteŋ mɛi pii akatsɔmɔ tsɔɔlɔi, nyɛmimɛi, akɛni nyɛle akɛ gbɔmɔ ni tamɔ nɛkɛ nine baashɛ kaa ni naa wa nɔ.’ Wɔ hu wɔmiiwo Onukpai lɛ fɛɛ ni tsui mli tse, ni amɛfeee pɛsɛmkunya lɛ ŋaa akɛ, amɛkana nɔ ko nɔ ko he suɔmɔ fɛ adesai fɛɛ ahilɛ-kɛ-hamɔ, koni yibii kpakpai mumɔ krɔŋkrɔŋ lɛ duromɔ ayimɔ amɛ obɔbɔ yɛ bei fɛɛ mli, koni amɛkwɛ asafo kuu lɛ nɔ.Nyɛkaia akɛ, tooi kuu lɛ ji Nuŋtsɔ lɛ nɔ ni akɛ gbɛnaa nii ka nyɛhiɛ yɛ Nuŋtsɔ lɛ hiɛ, kɛ agbɛnɛ amɛhe. Nyɛkaia akɛ, esa akɛ nyɛbu amɛsusumai (nibii ni he hiaa amɛ) lɛ ahe akɛ mɛi ni nyɛbaabu he akɔntaa nyɛha Tookwɛlɔ Nukpa lɛ. Nyɛkaia akɛ, suɔmɔ ji nɔ titri ni esa akɛ nyɛ fɛɛ nyɛna; yɛ be mli ni nyɛkuuu nyɛhiɛ nyɛshwieee tsɔɔmɔi lɛ anɔ lɛ, nyɛdia Nuŋtsɔ lɛ Mumɔ ni nyɛaana yɛ egbɔmɔtso lɛ mlibii sɔrɔtoi lɛ fɛɛ atɛŋ lɛ sɛɛ, koni amɛtsɔmɔ mɛi ni baana krɔŋkrɔŋbii ni yɔɔ la lɛ mli lɛ agboshinii lɛ yelɔi, ni taakɛ Ŋwɛi suɔmɔnaa nii ji lɛ, amɛkana amanehulu ni amɛtɛrɛ yɛ nɛkɛ gbi fɔŋ nɛɛ nɔ, shi moŋ, yɛ be mli ni amɛfee nɔ fɛɛ nɔ lɛ, ni amɛdamɔ shi kwraa yɛ Kristo, e-Gbɔmɔtso lɛ, e-Mlibii lɛ, e-Nanemɛi Afɔleshalɔi lɛ, e-Nanemɛi Niyelɔi lɛ mli akɛ mɛi ni eye emuu.”
18 Aakudɔ nɛkɛ wiemɔi nɛɛ aaha onukpai ni akɛ mumɔ efɔ amɛ mu lɛ kɛ nanemɛi heyelilɔi ni fata amɛhe lɛ taakɛ shishinumɔ kɛ shihilɛ ni Yehowa gbɛjianɔtoo lɛ yɔɔ mli yɛ nakai mra gbii lɛ ji lɛ naa. Ní kɛlɛ, kwɛ bɔ ni nakai ŋaawoo lɛ kɔɔ wɔhe ŋmɛnɛ jogbaŋŋ ha! Kɛji akɛ amɛhiɛnɔkamɔi lɛ ji ŋwɛi nɔ loo shikpɔŋ nɛɛ nɔ nɔ lɛ, esa akɛ onukpai ni ji Kristofoi lɛ akwɛ amɛ diɛŋtsɛ amɛhe nɔ jogbaŋŋ, amɛbu nɔ ni atu awo amɛdɛŋ lɛ he jogbaŋŋ, ni amɛjɛ amɛsuɔmɔ mli amɛkwɛ asafo kuu lɛ nibii ni he hiaa amɛ lɛ anɔ.
Nyamɔ Jɛɔ Nɔ Ni Atu Awo Odɛŋ Lɛ Nɔkwɛmɔ Mli Baa
19, 20. Mɛni hewɔ abaanyɛ akɛɛ akɛ nyamɔ loo miishɛɛ baa kɛ onukpai bu nɔ ni atu awo amɛdɛŋ lɛ he lɛ?
19 Miishɛɛ—yɛ anɔkwale mli lɛ, tsuiŋ nyamɔ—jɛɔ nɔ ni atu awo odɛŋ akɛ Kristofonyo onukpa lɛ nɔkwɛmɔ mli baa. Miishɛɛ baa kɛjɛɔ gbɛnaa nii ni hiɛdɔɔ yɔɔ mli ni atsu he nii jogbaŋŋ lɛ mli. No hewɔ lɛ, kwɛmɔ ohe nɔ jogbaŋŋ, ni okɛ sɔlemɔ atsu nii, ni oha ohiɛ adɔ. Buu nɔ ni atu awo odɛŋ akɛ onukpa lɛ he ni okwɛ be mli ni ooonyɛ okɛɛ, taakɛ nuu ni hiɛ woloŋmalɔ tɔ lɛ kɛɛ: “Mifee taakɛ bɔ ni ofa mi lɛ.”—Ezekiel 9:3, 4, 11.
20 Hɛɛ, tsu nii yɛ anɔkwayeli mli akɛ onukpa bɔni afee ni awie yɛ ohe taakɛ awie yɛ Noa he lɛ: “Nakai pɛpɛɛpɛ efee.” (1 Mose 6:22) Hiɛdɔɔ sɔɔmɔ ni tamɔ nɛkɛ he baa sɛɛnamɔ kɛhaa asafo lɛ yɛ gbɛi sɔrɔtoi babaoo nɔ. Nɔ ni fe fɛɛ lɛ, asafoi ni he wa ni yɔɔ ekaa ni onukpai anɔkwafoi ni buɔ nɔ ni atu awo amɛdɛŋ lɛ he lɛ sɔmɔɔ amɛ lɛ woɔ Yehowa hiɛ nyam. Shi babaoo he miihia, kɛji akɛ yɛ naagbee lɛ, aaanyɛ akɛɛ bo akɛ: “Aekoo tsulɔ kpakpa!” (Luka 19:17) Akɛ onukpa lɛ, esa akɛ okɛ Nyɔŋmɔ asafo kuu lɛ aye yɛ mlijɔlɛ naa.
Mɛni Obaakɛɛ?
◻ Mɛni nibii krokomɛi atu awo Kristofoi ni ji onukpai Iɛ adɛŋ?
◻ Mɛni nibii kpakpai onukpa baanyɛ afee koni ekɛbu nɔ ni atu awo edɛŋ lɛ he?
◻ Bɔni afee ni ebu nɔ ni atu awo edɛŋ Iɛ he lɛ mɛɛ shigbeemɔi esa akɛ onukpa akwa?
◻ Mɛni hewɔ nyamɔ loo miishɛɛ baa kɛji akɛ onukpai bu nɔ ni atu awo amɛdɛŋ Iɛ he Iɛ?