“Nyɔŋmɔ Wiemɔ Lɛ Hiɛ Ka Ni Eyɛ Hewalɛ”
1, 2. (a) Mɛni haa tsakemɔi baa mɛi ni batsɔmɔɔ Kristofoi lɛ ashihilɛi amli? (b) Yɛ mɛɛ gbɛ nɔ Biblia lɛ baanyɛ ana mɔ ko nɔ hewalɛ kɛya shɔŋŋ?
ŊMƐNƐŊMƐNƐ Beaŋ klɛŋklɛŋ afii oha lɛ teŋgbɛ ni bɔfo Paulo ŋma wolo eyaha Kristofoi asafo ni yɔɔ Roma lɛ. Ema nɔ mi yɛ mli akɛ ehe miihia ni anɔkwa Kristofoi afee tsakemɔi. Ekɛɛ: “Nyɛjeŋba akatamɔ jeŋbii ajeŋba, shi moŋ nyɛkɛ nyɛjwɛŋmɔ ni etsɔ ehee lɛ atsakea nyɛhe, koni nyɛyoo nii ni ji Nyɔŋmɔ suɔmɔnaa nii kpakpai ni sa ehiɛ jogbaŋŋ ni hi kɛwula shi lɛ.” (Romabii 12:2) Mɛni ji nɔ ni tsakeɔ Yesu sɛɛnyiɛlɔi, ni tsakeɔ gbɛ ni amɛtsɔɔ nɔ amɛjwɛŋɔ kwraa lɛ? Kɛjɛ shishijee lɛ, no ji Nyɔŋmɔ Wiemɔ lɛ, Biblia lɛ mli hewalɛ lɛ.
2 Paulo tsɔɔ bɔ ni Biblia lɛ baanyɛ ana wɔnɔ hewalɛ waa aha beni eŋma akɛ: “Nyɔŋmɔ wiemɔ lɛ hiɛ ka ni eyɛ hewalɛ ni enaa ba fe klante kɛ enaa ŋta fɛɛ, ni egbuɔ kɛboteɔ mli kɛyashi beyinɔ ni egbalaa susuma kɛ mumɔ lɛ kɛ talɔi lɛ wuiaŋ fɔi lɛ amli, ni eji tsuiaŋ susumɔi kɛ jwɛŋmɔi lɛ akojolɔ.” (Hebribii 4:12) Yɛ anɔkwale mli lɛ, Biblia lɛ hewalɛ ni ekaaa ni ekɛaatsu tsakemɔi ni tamɔ nɛkɛ yɛ gbɔmɛi amli lɛ ji odaseyeli ni tsɔɔ mɔ yiŋ akɛ eji nɔ ko ni fe adesa wiemɔ ko kɛkɛ.
3, 4. Kristofoi asubaŋi tsakeɔ kɛyashɛɔ nɛgbɛ?
3 Hela wiemɔ ni atsɔɔ shishi akɛ “atsakea” ni yɔɔ Romabii 12:2 lɛ jɛ me·ta·mor·phoʹo. Etsɔɔ tsakemɔ kwraa, tamɔ gɔgɔmi ni miitsake atsɔ abɛi. Eji nɔ ni yaa nɔ kwraa kɛgbeɔ naa ni haa Biblia lɛ wieɔ he akɛ gbɔmɔ lɛ su kɛ baŋ tsakemɔ. Wɔkaneɔ yɛ Biblia lɛ kuku kroko mli akɛ: “Nyɛjiea gbɔmɔ momo lɛ kɛ enitsumɔi lɛ nyɛshwiea, ni nyɛwoa gbɔmɔ hee ni tsɔɔ ehee ekoŋŋ kɛyaa nilee mli yɛ mɔ ni bɔ lɛ lɛ subaŋ lɛ naa.”—Kolosebii 3:9, 10, New World Translation.
4 Yɛ be mli ni eŋmaa wolo eyaha asafo ni yɔɔ Korinto lɛ, Paulo tsɔɔ bɔ ni subaŋ tsakemɔ lɛ tee nɔ eha yɛ klɛŋklɛŋ afi oha lɛ mli lɛ mli. Ekɛɛ: “Ajwamaŋbɔlɔi loo wɔjalɔi loo gbalaŋkulɔi loo mɛi ni kɛ amɛ diɛŋtsɛ amɛheloo feɔ yakayaka nii loo hii ni kɛ hii feɔ yakayaka nii loo julɔi loo hiɛjoolɔi loo daatɔlɔi loo mɛi ajɛlɔi loo amimyelɔi anine shɛŋ Nyɔŋmɔ maŋtsɛyeli lɛ nɔ kwraa. Ni nɛkɛ nyɛteŋ mɛi komɛi yɔɔ sa; shi agbɛnɛ aju nyɛhe.” (1 Korintobii 6:9-11) Hɛɛ, mɛi ni bɛ jeŋba kɛ mɛi ni beɔ, julɔi kɛ daatɔlɔi fɛɛ lɛ, atsake amɛ afee amɛ Kristofoi kpakpai.
Subaŋ Tsakemɔi Ŋmɛnɛ
5, 6. Yɛ mɛɛ gbɛ nɔ Biblia mli hewalɛ lɛ tsake obalanyo ko su kɛ baŋ kwraa ha?
5 Anaa subaŋ tsakemɔi ni tamɔ nakai ŋmɛnɛ. Akɛ nɔkwɛmɔ nɔ lɛ, gbekɛ nuu ko ni yɔɔ South Amerika lɛ tsɛ kɛ enyɛ fɛɛ gboi beni eye afi nɛɛhu. Eda ni ebɛ fɔlɔi ni baakudɔ lɛ ni ebana subaŋ gbonyo diɛŋtsɛ. Ewie akɛ: “Beni miyeɔ afii 18 lɛ, no mli lɛ tsofai fɔji kɛ nitsumɔ eka minɔ ni miye be ko yɛ gboklɛfoi atsuŋ yɛ juu ni miju koni mikɛtsa subaŋ nɛɛ nɔ lɛ hewɔ.” Shi enyɛkwɛ ji Yehowa Odasefoi lɛ ateŋ mɔ kome, ni yɛ naagbee lɛ nyɛmiyoo nɛɛ eye ebua lɛ.
6 Obalanyo nɛɛ tsɔɔ mli akɛ: “Minyɛkwɛ nɛɛ je shishi ekɛ mi kase Biblia lɛ, ni yɛ nyɔji kpawo sɛɛ lɛ, minyɛ mitsi mihe kɛjɛ nɛkɛ tsofai fɔji kɛ nitsumɔ su nɛɛ he kwraa.” Agbɛnɛ etsi ehe kɛjɛ etsutsu nanemɛi lɛ ahe ni ena nanemɛi heei yɛ Yehowa Odasefoi lɛ ateŋ. Etee nɔ akɛ: “Nɛkɛ nanemɛi heei nɛɛ kɛ Biblia lɛ ni mikaseɔ daa lɛ ye bua mi ni mitee hiɛ ni yɛ naagbee lɛ mijɔɔ miwala nɔ akɛ masɔmɔ Nyɔŋmɔ.” Hɛɛ, tsutsu gbɔmɔ ni tsofai fɔji kɛ nitsumɔ eka ehe ni eji julɔ hu nɛɛ etsɔ Kristofonyo ni yɔɔ ekaa ni jeŋba he tse. Te fee tɛŋŋ ni nɛkɛ jeŋba tsakemɔ kpele nɛɛ ba hu? Kɛtsɔ hewalɛ ni yɔɔ Biblia lɛ mli lɛ nɔ.
7, 8. Tsɔɔmɔ bɔ ni atsɔ Biblia lɛ nɔ aye abua mɔ ko ni bɛ subaŋ kwraa lɛ mli.
7 Nɔkwɛmɔ nɔ kroko baa kɛjɛɔ Europa Wuoyigbɛ. Obalanyo ko da yɛ jɛmɛ ni ejeŋba ehiii kwraa, ni emlifu hu ehiii. Be fɛɛ be nɛɛ eenɔ. Yɛ weku bei ko mli lɛ, eyi etsɛ po, ni efɔ etsɛ lɛ etswa shikpɔŋ! Shi yɛ naagbee lɛ, ekɛ Yehowa Odasefoi kase Biblia lɛ ni ekadi Nyɔŋmɔ famɔ ni yɔɔ Romabii awolo lɛ mli lɛ: “Nyɛkaŋɔa efɔŋ nyɛtoa mɔ ko mɔ ko efɔŋ najiaŋ; . . . kɛ aaaho lɛ nyɛ gbɛfaŋ lɛ, nyɛkɛ gbɔmɛi fɛɛ ahia shi yɛ hejɔlɛ mli. Suɔlɔi nyɛkatɔa nyɛ diɛŋtsɛ nyɛhe owele, shi moŋ nyɛŋmɛa mlifu lɛ gbɛ.”—Romabii 12:17-19.
8 Nakai wiemɔi lɛ ye bua lɛ ni eyoo bɔ ni egbɔjɔmɔ lɛ ehiii kwraa ha. Biblia mli nilee ni etee nɔ ena lɛ tsuu ehenilee he, ni enɛ ye bua lɛ ni eba emli ni fuɔ oyayaayai lɛ shi. Be ko beni etee hiɛ saŋŋ yɛ nikasemɔ mli lɛ, mɔ ko bɔi lɛ jɛmɔ. Obalanyo nɛɛ nu he akɛ mlifu miite shi yɛ emli. Kɛkɛ ni enu nɔ kroko hu he: hiɛgbele henumɔ; ni enɛ tsi lɛ gbɛ koni ekadi emlifu lɛ sɛɛ. Ena henɔyeli, mumɔ lɛ yibii ni he hiaa lɛ. (Galatabii 5:22, 23) Esu kɛ baŋ etsake kwraa agbɛnɛ, shidaa aha Nyɔŋmɔ Wiemɔ lɛ mli hewalɛ lɛ.
9. Taakɛ Paulo tsɔɔ lɛ, mɛni nɔ atsɔɔ atsakeɔ wɔsubaŋ lɛ?
9 Shi te feɔ tɛŋŋ ni Biblia lɛ naa mɛi anɔ hewalɛ nɛkɛ? Paulo wie yɛ Kolosebii 3:10 akɛ wɔ su kɛ baŋ lɛ tsakeɔ kɛtsɔɔ anɔkwale nilee nɔ, ni anaa nɛkɛ nilee nɛɛ yɛ Biblia lɛ mli. Shi mɛɛ gbɛ nɔ nilee tsɔɔ etsakeɔ gbɔmɛi yɛ?
Nɔ ni Anɔkwa Nilee Tsuɔ
10, 11. (a) Kɛ wɔkase Biblia lɛ, mɛni wɔleɔ yɛ subaŋi ni asumɔɔ kɛ subaŋi ni asumɔɔɔ lɛ ahe? (b) Mɛni he hiaa kɛfata nilee he koni etsake wɔ su kɛ baŋ?
10 Klɛŋklɛŋ lɛ, Biblia lɛ haa aleɔ subaŋi ni ehiii ni esa akɛ ashɛrɛ ashwie lɛ. Nɔ ni fata enɛɛmɛi ahe ji “hewoo hiŋmɛii, apasa lilɛi, kɛ niji ni shwieɔ la ni eye bem shi, tsui ni shweɔ eyiŋ jwɛŋmɔi fɔji, naji ni he yɔɔ oya kɛ foijee kɛ efɔŋ mli yaa, amale odaseyelɔ ni foɔ sane taa, kɛ mɔ ni woɔ nyɛmimɛi ateŋ bei.” (Abɛi 6:16-19) Nɔ ni ji enyɔ lɛ, Biblia lɛ tsɔɔ sui kpakpai ni asumɔɔ ni esa akɛ wɔna, ni nɔ ni fata enɛɛmɛi ahe ji “suɔmɔ, mishɛɛ, toiŋjɔlɛ, tsuishitoo, mlihilɛ, ekpakpafeemɔ, hemɔkɛyeli, mlijɔlɛ, henɔyeli.”—Galatabii 5:22, 23.
11 Anɔkwa nilee ni tamɔ nɛkɛ yeɔ buaa gbɔmɔ anɔkwafo lɛ koni epɛi lɛ diɛŋtsɛ emli ekwɛ ni ena sui ni esa akɛ ena kɛ nɔ ni esa akɛ etsu he nii ni ejie kɛjɛ ehe. (Yakobo 1:25) Ni kɛlɛ, shishijee pɛ nɛ. Kɛfata nilee he lɛ, kanyamɔ he hiaa, nɔ ko ni baatsirɛ lɛ koni esumɔ akɛ eeetsake. Anɔkwa nilee ni jɛ Biblia lɛ mli lɛ hu he hiaa yɛ biɛ.
Kanyamɔ ni Haa Afeɔ Mɔ Kpakpai
12. Nyɔŋmɔ su kɛ baŋ lɛ he nilee yeɔ ebuaa wɔ koni wɔtsake yɛ mɛɛ gbɛ nɔ?
12 Paulo kɛɛ akɛ nɔ ni kudɔɔ jeŋba hee ni asumɔɔ lɛ damɔ “Mɔ ni bɔ lɛ lɛ subaŋ lɛ naa.” (Kolosebii 3:10) No hewɔ lɛ esa akɛ Kristofonyo su kɛ baŋ lɛ atamɔ Nyɔŋmɔ diɛŋtsɛ su kɛ baŋ. (Efesobii 5:1) Atsɔɔ Biblia lɛ nɔ ajieɔ Nyɔŋmɔ su kɛ baŋ kpo atsɔɔ wɔ. Wɔnaa bɔ ni ekɛ adesai yeɔ haa ni wɔyɔseɔ esui kpakpai lɛ, tamɔ esuɔmɔ, mlihilɛ, ejurɔfeemɔ, mɔbɔnalɛ, kɛ jalɛ nifeemɔ. Nilee ni tamɔ nɛkɛ tsirɛɔ mɔ ni yɔɔ tsuijurɔ lɛ koni esumɔ Nyɔŋmɔ ni esumɔ akɛ eeefee gbɔmɔ ni Nyɔŋmɔ baakpɛlɛ enɔ. (Mateo 22:37) Akɛ bii ni asumɔɔ lɛ, wɔmiisumɔ ni wɔsa wɔ ŋwɛi Tsɛ lɛ hiɛ, no hewɔ lɛ wɔbɔɔ mɔdɛŋ ni wɔkase lɛ babaoo bɔ ni wɔɔnyɛ yɛ wɔshihilɛ ni egbɔjɔ ni yeee emuu nɛɛ mli.—Efesobii 5:1.
13. Mɛɛ nilee tsɔɔ wɔ nii koni ‘wɔsumɔ jalɛ ni wɔnyɛ nɔ fɔŋ feemɔ’?
13 Nɔ ni woɔ wɔkanyamɔ lɛ mli hewalɛ ji nilee ni Biblia lɛ kɛhaa yɛ nɔ ni jɛɔ subaŋ kpakpa kɛ subaŋ fɔŋ mli baa lɛ hewɔ. (Lala 14:1-5; 15:1-5; 18:20, 24) Wɔkaseɔ akɛ ajɔɔ David yɛ e-Nyɔŋmɔ jamɔ hetuu-kɛhamɔ kɛ jalɛ nifeemɔ he suɔmɔ hewɔ shi ena amanehulu yɛ be mli ni elaaje henɔyeli lɛ. Wɔnaa nibii ni yɔɔ awerɛho ni jɛ mli ba beni Salomo sui kpakpai lɛ fite yɛ egbɔlɛ be mli lɛ. Akɛ jɔɔmɔi ni ba Israel maŋ lɛ nɔ kɛtsɔ Yosia kɛ Hezekia jalɛ nifeemɔ nɔ lɛ toɔ amanehulu ni ba ni jɛ Ahab gbɔjɔmɔ kɛ Manase hemɔkɛyeli kwamɔ kɛ atuatsemɔ mli ba lɛ he. (Galatabii 6:7) No hewɔ lɛ wɔkaseɔ bɔ ni wɔɔfee ni ‘wɔsumɔ jalɛ nifeemɔ ni wɔnyɛ nɔ fɔŋ feemɔ.’—Hebribii 1:9; Lala 45:8; 97:10.
14. Mɛni ji Yehowa yiŋtoo kɛha je lɛ kɛ aŋkroaŋkroi ni yɔɔ mli lɛ?
14 Nyɔŋmɔ yiŋtoi ahe anɔkwa nilee hu woɔ nɛkɛ kanyamɔ nɛɛ mli hewalɛ babaoo lolo. Nɛkɛ nilee nɛɛ yeɔ ebuaa ni etsakeɔ ‘hewalɛ ni kanyaa wɔjwɛŋmɔi lɛ,’ mumɔ ni kanyaa wɔsusumɔi kɛ wɔnifeemɔi lɛ. (Efesobii 4:23, 24) Kɛ wɔkase Biblia lɛ, wɔleɔ akɛ Yehowa eŋmɛŋ gbɛ ni efɔŋfeemɔ aya nɔ daa. Etsɛŋ, ebaakpata nɛkɛ jeŋ fɔŋ nɛɛ hiɛ ni ekɛ ‘ŋwɛi hee kɛ shikpɔŋ hee ni jalɛ hiɔ mli’ aba. (2 Petro 3:8-10, 13) Namɛi baahi jeŋ hee ni tamɔ nɛkɛ mli? “Mɛi ni ja lɛ aaahi shikpɔŋ lɛ nɔ, ni mɛi ni eye emuu lɛ aaashwɛ yɛ nɔ; shi aaafolɔ mɛi fɔji lɛ kɛaajɛ shikpɔŋ lɛ nɔ, ni aaafamɔ kutumpɔfoi lɛ kɛaajɛ nɔ.”—Abɛi 2:21, 22.
15. Kɛ wɔheɔ nɔ ni Biblia lɛ kɛɔ yɛ Yehowa yiŋtoi ahe lɛ wɔyeɔ lɛlɛŋ lɛ, enɛ baana wɔnɔ hewalɛ akɛ gbɔmɛi yɛ mɛɛ gbɛ nɔ?
15 Kɛ wɔheɔ nɛkɛ shiwoo nɛɛ wɔyeɔ lɛlɛŋ lɛ, ebaasa gbɛ ni wɔtsɔɔ nɔ wɔsusuɔ saji ahe lɛ fɛɛ he. Yɛ be mli ni bɔfo Petro egba yɛ efɔŋfeemɔ hiɛkpatamɔ lɛ he lɛ sɛɛ lɛ, ekɛɛ: “Agbɛnɛ akɛni nɛkɛ nibii nɛɛ fɛɛ baafite hewɔ lɛ, mɛɛ gbɔmɛi sa akɛ nyɛtsɔmɔ yɛ jeŋbai krɔŋkrɔŋi kɛ Nyɔŋmɔ jamɔi amli? Mɛi ni kwɛɔ gbɛ ni amɛshweɔ [Yehowa] Nyɔŋmɔ gbi lɛ baa lɛ.” (2 Petro 3:11, 12) Esa akɛ bɔ ni wɔshweɔ waa akɛ wɔɔfata mɛi ni ja ni baashwɛ yɛ shikpɔŋ lɛ nɔ lɛ ahe yɛ be mli ni akpata efɔŋfeelɔi lɛ ahiɛ lɛ akanya wɔ ni ekudɔ wɔsubaŋ.
16. Mɛɛ gbɔmɛi ni hiɛ mɛɛ subaŋi nɛkɛ ataoŋ yɛ jeŋ hee lɛ mli, ni esa akɛ nilee ni tamɔ nɛkɛ ana wɔnɔ hewalɛ yɛ mɛɛ gbɛ nɔ?
16 Kpojiemɔ wolo lɛ woɔ mɛi ni ja lɛ ashi akɛ yɛ be mli ni je nɛɛ eba naagbee lɛ, “[Nyɔŋmɔ] aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” Shi ebɔɔ wɔ kɔkɔ hu akɛ: “Shi mɛi ni tsui faa kɛ mɛi ni heee yeee kɛ mɛi ni feɔ nihiinii kɛ awuiyelɔi kɛ ajwamaŋbɔlɔi kɛ sulɔi kɛ wɔŋjalɔi kɛ amalelɔi fɛɛ lɛ,” abaakpoo amɛ. (Kpojiemɔ 21:4, 8) Kwɛ bɔ ni eji nilee gbɛ akɛ wɔɔkpoo sui gbohii ni esaaa ni Nyɔŋmɔ ekpɛlɛŋ nɔ yɛ ejeŋ hee lɛ mli lɛ!
Yelikɛbuamɔ ni jɛ Sɛɛ
17. Mɛɛ yelikɛbuamɔ nɛkɛ Biblia lɛ woɔ wɔ ŋaa ni wɔtao?
17 Ni kɛlɛ, adesai ahe waaa, ni yɛ bei babaoo mli lɛ nɔ ko he hiaa amɛ kɛfata saji kɛ kanyamɔ he kɛji akɛ amɛaanyɛ amɛfee tsakemɔi. Yelikɛbuamɔ ni jɛ mɔ ko dɛŋ he miihia, ni Biblia lɛ tsɔɔ wɔ he ni wɔbaanyɛ wɔna yelikɛbuamɔ nɛɛ kɛjɛ. Akɛ nɔkwɛmɔ nɔ lɛ, ekɛɔ akɛ: “Mɔ ni kɛ nilelɔi nyiɛɔ lɛ, eeetsɔ nilelɔ; shi mɔ ni kɛ kwashiai bɔɔ lɛ, eeena amane.” (Abɛi 13:20) Nakai nɔŋŋ hu kɛji akɛ wɔkɛ mɛi ni jieɔ sui ni wɔtaoɔ ni wɔna lɛ bɔɔ lɛ, aaaye abua wɔ babaoo ni wɔtamɔ amɛ.—1 Mose 6:9; Abɛi 2:20; 1 Korintobii 15:33.
18, 19. Mɛni ehe hiaa ni wɔfee koni wɔkɛ wɔjwɛŋmɔi kɛ tsuii aha Nyɔŋmɔ mumɔ lɛ?
18 Kɛfata he lɛ, Yehowa diɛŋtsɛ kɛ yelikɛbuamɔ tsɔɔ emumɔ krɔŋkrɔŋ lɛ nɔ ehaa—mumɔ kometoo lɛ nɔŋŋ ni ekɛtsu nii ni ekɛfee naakpɛɛ nii yɛ blema bei amli lɛ. Yɛ anɔkwale mli lɛ atsɛɔ sui kpakpai ni asumɔɔ tamɔ “suɔmɔ, miishɛɛ, toiŋjɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, henɔyeli” akɛ “mumɔ lɛ yibii.” (Galatabii 5:22, 23) Te wɔfeɔ tɛŋŋ wɔnine shɛɔ mumɔ krɔŋkrɔŋ lɛ yelikɛbuamɔ nɔ? Akɛni mumɔ krɔŋkrɔŋ lɛ ji nɔ ni tsirɛ Biblia lɛ ŋmaa hewɔ lɛ, kɛ wɔkane loo wɔwie he wɔtsɔɔ mɛi krokomɛi lɛ, wɔkɛ wɔjwɛŋmɔ kɛ wɔtsui miiha mumɔ lɛ hewalɛ ni kanyaa mɔ lɛ. (2 Timoteo 3:16) Yɛ anɔkwale mli lɛ, Yesu wo shi akɛ kɛji wɔwie wɔhiɛnɔkamɔ lɛ he wɔtsɔɔ mɛi krokomɛi lɛ, nakai mumɔ lɛ baatsu nii yɛ wɔnɔ diɛŋtsɛ.—Mateo 10:18-20.
19 Kɛfata he lɛ, Biblia lɛ kɛ famɔ haa akɛ: “Nyɛhiɛa sɔlemɔ mli daa.” (Romabii 12:12) Wɔtsɔɔ sɔlemɔ nɔ wɔwieɔ wɔtsɔɔ Yehowa, wɔjieɔ eyi, wɔdaa lɛ shi, ni wɔbiɔ eyelikɛbuamɔ. Kɛ wɔbi eyelikɛbuamɔ koni eye ebua wɔ ni wɔye sui gbohii anɔ kunim tamɔ mlifu, hewoo, tsuishitoo ni bɛ loo henɔwomɔ lɛ, Nyɔŋmɔ mumɔ lɛ baafi mɔdɛŋ fɛɛ ni wɔɔbɔ ni ekɛ nakai sɔlemɔ lɛ akpa gbee lɛ sɛɛ.—Yohane 14:13, 14; Yakobo 1:5; 1 Yohane 5:14.
20. Mɛni hewɔ esa akɛ Kristofoi aya nɔ atsu nii ni amɛwo gbɔmɔ hee lɛ?
20 Beni Paulo ŋma akɛ: “Nyɛkɛ jwɛŋmɔ ni etsɔ ehee atsakea nyɛhe” lɛ, no mli lɛ eeŋma eyaha Kristofoi ni afɔ amɛ mu ni abaptisi amɛ lɛ asafo lɛ. (Romabii 1:7; 12:2) Ni yɛ shishijee Hela wiemɔ mli lɛ, ekɛ feemɔ-wiemɔ ni tsɔɔ nifeemɔ ni yaa nɔ tsu nii. Enɛ tsɔɔ akɛ tsakemɔ ni baa wɔnɔ kɛtsɔɔ Biblia mli anɔkwa nilee nɔ lɛ ji nɔ ni yaa nɔ eshwereɔ kɛyaa nɔ. Wɔ hu ni wɔyɔɔ ŋmɛnɛ—taakɛ Kristofoi lɛ ji yɛ Paulo gbii lɛ amli lɛ—efee mɛi ni hewalɛ fɔŋ ni fiteɔ mɔ ni yɔɔ je lɛ mli lɛ ebɔle wɔhe. Ni wɔ hu—taakɛ amɛji lɛ—wɔyeee emuu, ni wɔnyɛɔ wɔfeɔ nibii gbohii. (1 Mose 8:21) No hewɔ lɛ, esa akɛ wɔya nɔ ni wɔye pɛsɛmkunya su kɛ baŋ momo lɛ nɔ kunim ni wɔwo ehee lɛ, taakɛ bɔ ni amɛ hu amɛfee lɛ. Mra be mli Kristofoi lɛ ye omanye yɛ enɛ mli aahu akɛ amɛjie amɛhe kpo akɛ mɛi ni esoro amɛ kwraa yɛ jeŋ ni ebɔle amɛhe lɛ he. Kristofoi ni yɔɔ ŋmɛnɛ lɛ hu feɔ nakai nɔŋŋ.
Gbɔmɛi ni “Yehowa Etsɔɔ Amɛ Nii”
21. Mɛni ji gbalɛi ni baa mli yɛ Nyɔŋmɔ webii anɔ yɛ nɛkɛ naagbee gbii nɛɛ amli lɛ ekomɛi?
21 Yɛ anɔkwale mli lɛ, jeee gbɔmɛi aŋkroaŋkroi pɛ Nyɔŋmɔ mumɔ lɛ tsuɔ nii yɛ amɛnɔ ŋmɛnɛ, shi moŋ yɛ Kristofoi agbɛjianɔtoo muu lɛ fɛɛ, ni amɛyibɔ shɛɔ akpekpei abɔ lɛ anɔ. Yesaia gbalɛ wiemɔi nɛɛ baa mli yɛ nɛkɛ gbɛjianɔtoo nɛɛ nɔ: “Ni majimaji pii aaatee ayakɛɛ akɛ: Nyɛbaa ni wɔyakwɔa Yehowa gɔŋ lɛ, kɛyaa Yakob Nyɔŋmɔ lɛ we lɛ, koni etsɔɔ wɔ egbɛi lɛ koni wɔnyiɛ etempɔŋi lɛ anɔ!” (Yesaia 2:3) Yesaia gbalɛ kroko hu eba mli yɛ amɛ nɔ: “Ni obii lɛ fɛɛ aaafee mɛi ni Yehowa etsɔɔ amɛ nii, ni obii lɛ atoiŋjɔlɛ aaafa babaoo.” (Yesaia 54:13, New World Translation) Namɛi ji mɛi ni naa toiŋjɔlɛ akɛni Yehowa etsɔɔ amɛ nii hewɔ lɛ?
22. (a) Namɛi ŋmɛnɛ Yehowa tsɔɔ amɛ nii lɛ? (b) kɛ nɔkwɛmɔ nii aha ni tsɔɔ akɛ mɛi ni yɔɔ sɛɛ lɛ yɔseɔ akɛ Yehowa Odasefoi yɛ sɔrɔto.
22 Ojogbaŋŋ, kadimɔ wolo ko ni aŋma ayaha New Haven Register lɛ ni ji North Amerika adafitswaa wolo ko lɛ fa nɛɛ: “Kɛji akɛ amɛ sanekpakpa shiɛmɔ lɛ ewo omlila taakɛ bɔ ni ewo mi hu mimlila lɛ hu ji, kɛlɛ esa akɛ ohiɛ asɔ amɛ henɔjɔɔmɔ, nɔ fɛɛ nɔ ni amɛkɛwoɔ nifeemɔ mli, jeŋba sui kpakpai ni amɛjieɔ lɛ kpo akɛ gbɔmɛi kɛ amɛshihilɛ kpakpa lɛ.” Namɛi niŋmalɔ lɛ wieɔ amɛhe lɛ? Kuu kometoo lɛ nɔŋŋ ni Buenos Aires, Argentina Herald lɛ wie amɛhe lɛ, beni ekɛɛ: “Yehowa Odasefoi ejie amɛhe kpo kɛtsɔ afii lɛ amli akɛ amɛji gbɔmɛi ni tsuɔ nii waa, gbɔmɛi ni baa amɛhe shi, gbɔmɛi ni baa amɛnibii ayi kɛ maŋbii ni sheɔ Nyɔŋmɔ gbeyei.” Nakai nɔŋŋ hu Italia adafitswaa wolo ko ni ji La Stampa lɛ kɛɛ: “Amɛjooo tooyeli naa foi aloo ni amɛaatao ni amɛjo mlai ni amɛsumɔɔɔ lɛ anaa foi kɛha amɛ diɛŋtsɛ amɛsɛɛnamɔ. Jeŋba sui kpakpai ni ji suɔmɔ kɛha naanyo, hegbɛ ni amɛkpooɔ, awuiyeli ni amɛkɛ amɛhe wooo mli kɛ anɔkwa ni amɛyeɔ . . . lɛ baa amɛ ‘daa gbi’ shishilɛ mli.”
23. Mɛni hewɔ akɛ gbɛjianɔtoo lɛ, esoro Yehowa Odasefoi kwraa lɛ?
23 Mɛni hewɔ Yehowa Odasefoi akɛ kuu lɛ—taakɛ mra be mli Kristofoi lɛ ji lɛ—damɔɔ shi akɛ gbɔmɛi ni esoro amɛ kwraa lɛ? Yɛ gbɛi pii anɔ lɛ, amɛtamɔ mɛi krokomɛi fɛɛ. Afɔ amɛ akɛ mɛi ni yeee emuu tamɔ adesai, ni shika he lɛtemɔ he naagbai kɛ hiamɔ nii lɛ nɔŋŋ amɛ hu amɛkɛkpeɔ. Shi, akɛ jeŋ muu fɛɛ asafo lɛ, amɛŋmɛɔ gbɛ koni Nyɔŋmɔ Wiemɔ lɛ ana hewalɛ yɛ amɛshihilɛ nɔ. No hewɔ lɛ anɔkwa Kristofoi amajimaji ateŋ nyɛmifeemɔ lɛ ji odaseyeli ni mli wa ni tsɔɔ akɛ Biblia lɛ ji Nyɔŋmɔ Wiemɔ ni jɛ mumɔŋ.—Lala 133:1.
Biblia lɛ jɛ Nyɔŋmɔ Mumɔ Mli
24. Mɛni ji wɔsɔlemɔ kɛha mɛi pii?
24 Wɔsusu odaseyeli nibii enyɔ he yɛ nikasemɔi enyɔ nɛɛ amli koni wɔkɛtsɔɔ akɛ Biblia lɛ ji Nyɔŋmɔ Wiemɔ shi jeee gbɔmɔ nɔ. Kɛji akɛ amɛsusuɔ Biblia lɛ mli nilee loo ehewalɛ ni ekɛtsakeɔ gbɔmɛi ni eko kɛ lɛ yeee egbɔ lɛ he—aloo nibii sɔrɔtoi babaoo ni haa efeɔ nɔ ni ekaaa lɛ he hu lɛ—gbɔmɛi anɔkwafoi lɛ nyɛŋ afee nɔ ko akɛ ja amɛyoo akɛ eji nɔ ni jɛ Nyɔŋmɔ mumɔ mli. Akɛ Kristofoi lɛ, wɔsɔlemɔ ji ni gbɔmɛi pii abayoo anɔkwale nɛɛ. Kɛkɛ lɛ amɛ hu amɛbaaha lalatsɛ lɛ miishɛɛ wiemɔi nɛɛ ajije: “Naa, misumɔɔ okpɔi lɛ; Yehowa ha miyi ana wala yɛ omlihilɛ lɛ naa. Owiemɔ tso muu lɛ fɛɛ lɛ, anɔkwale ni, ni ojalɛ kojomɔ lɛ fɛɛ hiɔ shi kɛyaa naanɔ.”—Lala 119:159,160.
Ani Okaiɔ?
◻ Mɛɛ hewalɛ Biblia lɛ naa yɛ anɔkwa Kristofoi anɔ?
◻ Anɔkwa nilee yeɔ ebuaa yɛ wɔtsakemɔ mli yɛ mɛɛ gbɛ nɔ?
◻ Biblia lɛ yeɔ ebuaa wɔ ni ekanyaa wɔ koni wɔna sui kpakpai ni wɔye nɔ ni ji efɔŋ lɛ nɔ kunim yɛ mɛɛ gbɛ nɔ?
◻ Mɛɛ yelikɛbuamɔ yɔɔ ni baanyɛ awa wɔ ni wɔna Nyɔŋmɔ gbeyeishemɔ sui kpakpai?
◻ Mɛɛ odaseyeli yɔɔ ni anaa yɛ Yehowa webii ateŋ ni tsɔɔ akɛ Biblia lɛ jɛ Nyɔŋmɔ mumuŋ?
[Mfoniri ni yɔɔ baafa 10]
Esa akɛ nɔ ni yɔɔ awerɛho ni jɛ anɔkwa ni Salomo yeee yɛ egbɔlɛ be mli lɛ mli ba lɛ akanya wɔ ni wɔsumɔ jalɛ nifeemɔ ni wɔnyɛ nɔ fɔŋ feemɔ
[Mfoniri ni yɔɔ baafa 12]
Kɛ wɔbi Yehowa ni oye ebua wɔ lɛ, emumɔ lɛ baafi mɔdɛŋ fɛɛ ni wɔbɔɔ koni wɔkɛye sui gbohii Iɛ anɔ kunim lɛ sɛɛ
[Baafa 14]April Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)