Mumɔ Krɔŋkrɔŋ Lɛ Yɔsemɔ
ANI ole akɛ mumɔ krɔŋkrɔŋ lɛ saa wɔteŋ mɔ fɛɛ mɔ shihilɛ he? Ni ani oyɔseɔ akɛ ebaanyɛ eha oshihilɛ aya hiɛ babaoo? Enɛ baaha onaa akpɛ ohe. Yɛ anɔkwale mli lɛ, ekolɛ obaabi akɛ: ‘Namɔ loo mɛni ji mumɔ krɔŋkrɔŋ lɛ?’
Kɛ oji Kristendom sɔlemɔi lɛ ekome mlinyo lɛ, belɛ ekolɛ onu ni osɔfo ko miisɔle abifao ko “yɛ Tsɛ lɛ kɛ Bi lɛ kɛ Mumɔ Krɔŋkrɔŋ Iɛ gbɛi amli.” (Mateo 28:19) Kɛ abi ni amɛtsɔɔ nɔ ni mumɔ krɔŋkrɔŋ lɛ ji lɛ, osɔfoi pii kɛ oyaiyeli haa hetoo akɛ: ‘Mumɔ krɔŋkrɔŋ lɛ ji mɔ ni gbeɔ yi feɔ etɛ yɛ Triniti lɛ mli, ekɛ Tsɛ Nyɔŋmɔ lɛ kɛ Nuŋtsɔ Yesu Kristo yeɔ egbɔ yɛ nibii fɛɛ mli.’
Shi kɛlɛ, ahiɛɛɛ shishinumɔ nɛɛ yɛ wɔ Ŋmɛnɛŋmɛnɛ Beaŋ klɛŋklɛŋ afii ohai fioo lɛ amli. Akɛ nɔkwɛmɔ nɔ lɛ: Yɛ Yesu Kristo bɔfoi lɛ agbele sɛɛ aaafee afii ohai etɛ lɛ, Gregory ni jɛ Nazianzus lɛ ŋma akɛ: “Mɛi komɛi susuɔ akɛ [mumɔ krɔŋkrɔŋ lɛ] ji hewalɛ (energeia) ko, mɛi komɛi hu kɛɛ bɔɔ nɔ ko, mɛi komɛi kɛɛ Nyɔŋmɔ ni, mɛi komɛi nyɛɛɛ atsɔɔ enɛɛmɛi ateŋ nɔ ni eji.”
Ŋmɛnɛ, Kristendom sɔlemɔi pii kpɛlɛɔ Triniti jwɛŋmɔ ni ahiɛ yɛ mumɔ krɔŋkrɔŋ lɛ he lɛ nɔ. Shi ani Biblia lɛ fiɔ enɛ sɛɛ? Aloo eji mɔ ko susumɔ ni damɔ blemasane nɔ? Yɛ anɔkwale mli lɛ, Biblia lɛ ewieee mumɔ krɔŋkrɔŋ lɛ he yɛ gbɛ ni etsɔɔ nɔ ewieɔ Nyɔŋmɔ loo Yesu he lɛ nɔ. Akɛ nɔkwɛmɔ nɔ lɛ, mumɔ krɔŋkrɔŋ lɛ bɛ lɛ diɛŋtsɛ egbɛi yɛ Biblia lɛ mli.
Ani eji sane mlitsɔɔmɔ ko ni he ehiaaa? Dabi, gbɛii ahe hiaa yɛ Biblia lɛ mli. Nyɔŋmɔ ma bɔ ni lɛ diɛŋtsɛ egbɛi lɛ he hiaa ha lɛ nɔ mi beni ekɛɛ: “Miji Yehowa, migbɛi ji no, ni mikɛ minunyam lɛ haŋ mɔ kroko, ni mikɛ miyijiemɔ lɛ hu haŋ amagai.” (Yesaia 42:8) Ama bɔ ni Yesu Kristo gbɛi lɛ he hiaa lɛ nɔ mi dani afɔ lɛ, yɛ be mli ni bɔfo ko kɛɛ Maria akɛ: “Ni ooowo lɛ gbɛi akɛ Yesu” lɛ. (Luka 1:31) Kɛji akɛ Tsɛ lɛ kɛ Bi lɛ gbɛi lɛ ahe miihia nakai lɛ, mɛni hewɔ mumɔ krɔŋkrɔŋ lɛ bɛ lɛ diɛŋtsɛ egbɛi? Yɛ anɔkwale mli lɛ, esa akɛ nɛkɛ sane mlitsɔɔmɔ nɛɛ pɛ aha mɔ ko asusu kɛji akɛ mumɔ lɛ kɛ Tsɛ lɛ kɛ Bi lɛ yeɔ egbɔ lɛlɛŋ lɛ he.
Ŋmalɛi lɛ kɛ Mumɔ Krɔŋkrɔŋ Lɛ
Awieɔ “mumɔ krɔŋkrɔŋ” lɛ kɛ “mi [Nyɔŋmɔ] mumɔ” he yɛ Hebri Ŋmalɛi lɛ loo “Kpaŋmɔ Momo” lɛ mli. (Lala 51:13; Yoel 3:1, 2) Wɔkaneɔ akɛ mumɔ krɔŋkrɔŋ lɛ baanyɛ aba mɔ mli, aba mɔ nɔ, ayi mɔ nɔ. (2 Mose 31:3; Kojolɔi 3:10; 6:34) Abaanyɛ ajie Nyɔŋmɔ mumɔ krɔŋkrɔŋ lɛ eko kɛjɛ mɔ ko nɔ ni akɛha mɔ kroko. (4 Mose 11:17, 25) Mumɔ krɔŋkrɔŋ lɛ baanyɛ atsu nii yɛ mɔ ko nɔ, ni ebaanyɛ eha efee hewalɛ nibii ni fe adesa nɔ.—Kojolɔi 14:6; 1 Samuel 10:6.
Mɛɛ sane naa ni shishinumɔ yɔɔ mli abaanyɛ amu kɛjɛ wiemɔi nɛɛ amli? Yɛ anɔkwale mli lɛ, jeee akɛ mumɔ krɔŋkrɔŋ lɛ ji mɔ ko. Te aaafee tɛŋŋ ajie mɔ ko fa kɛjɛ mɔ ko nɔ ni akɛyaha mɔ kroko hu? Agbɛnɛ odaseyeli ko bɛ ni tsɔɔ akɛ beni Yesu yɔɔ shikpɔŋ nɔ lɛ, Yudafoi anɔkwafoi lɛ bu mumɔ krɔŋkrɔŋ lɛ akɛ mɔ ni kɛ Tsɛ lɛ yeɔ egbɔ. Eka shi faŋŋ akɛ amɛjaaa mumɔ krɔŋkrɔŋ lɛ. Shi moŋ, Yehowa pɛ ji mɔ ni amɛjaa, Mɔ ni Yesu diɛŋtsɛ tsɛ lɛ “mi-Tsɛ” kɛ “mi-Nyɔŋmɔ” lɛ.—Yohane 20:17.
Taakɛ nɔ ni akɛɛ atsɛɔ lɛ Kpaŋmɔ Momo lɛ ji lɛ, Biblia lɛ fa ni atsɛɔ lɛ Kristofoi a-Hela Ŋmalɛi, loo “Kpaŋmɔ Hee” lɛ, kɛɔ akɛ mumɔ krɔŋkrɔŋ lɛ baanyɛ ‘ayi mɔ mli’ loo ‘ahi mɔ nɔ.’ (Bɔfoi lɛ Asaji 2:4; Luka 2:25-27) Akɛ mumɔ krɔŋkrɔŋ ‘ha,’ ‘afɔse ashwie,’ ni ‘aja aha.’ (Luka 11:13; Bɔfoi lɛ Asaji 10:45; Hebribii 2:4) Kaselɔi lɛ anine shɛ Nyɔŋmɔ mumɔ lɛ “eko” nɔ yɛ Pentekoste, afi 33 Ŋ.B. (Bɔfoi lɛ Asaji 2:17) Ŋmalɛi lɛ hu wieɔ mumɔ krɔŋkrɔŋ ni akɛaabaptisi ni akɛfɔ mɔ mu lɛ he.—Mateo 3:11; Bɔfoi lɛ Asaji 1:5; 10:38.
Biblia mli wiemɔi ni tamɔ nɛkɛ yeɔ odase akɛ mumɔ krɔŋkrɔŋ lɛ jeee gbɔmɔ loo mɔ ko. Amaa sane naamuu nɛɛ nɔ mi yɛ be mli ni wɔnaa akɛ atsiɔ mumɔ krɔŋkrɔŋ lɛ ta afataa nibii ni jeee gbɔmɛi lɛ ahe lɛ. Akɛ nɔkwɛmɔ nɔ lɛ, Biblia lɛ kɛɔ yɛ Stefano he akɛ “hemɔkɛyeli kɛ mumɔ krɔŋkrɔŋ eyi lɛ obɔ.” (Bɔfoi lɛ Asaji 6:5) Ni bɔfo Paulo jie lɛ diɛŋtsɛ eyi akɛ Nyɔŋmɔ sɔɔlɔ “yɛ hetsemɔ mli, yɛ nilee mli, yɛ tsuishiŋmɛɛ mli, yɛ mlihilɛ mli, yɛ mumɔ krɔŋkrɔŋ mli, yɛ suɔmɔ ni osato bɛ mli lɛ mli.”—2 Korintobii 6:4-6, New World Translation.
Eji anɔkwale akɛ yɛ bei komɛi amli lɛ Biblia lɛ wieɔ mumɔ krɔŋkrɔŋ lɛ he tamɔ gbɔmɔ loo mɔ ko. Akɛ nɔkwɛmɔ nɔ lɛ, Yesaia wie akɛ atuatselɔi komɛi ‘fee Nyɔŋmɔ mumɔ krɔŋkrɔŋ lɛ nidɔɔnii.’ (Yesaia 63:10) Paulo kɛɛ akɛ abaanyɛ aha ‘eye awerɛho.’ (Efesobii 4:30) Ni ŋmalɛi pii kɛɔ akɛ mumɔ krɔŋkrɔŋ lɛ tsɔɔ nii, ekudɔɔ mɔ, ewieɔ, ni eyeɔ odase. (Yohane 14:26; 16:13, 14; 1 Yohane 5:7, 8) Shi Biblia lɛ hu wieɔ nibii ni wala bɛ mli lɛ ahe tamɔ gbɔmɛi loo mɛi komɛi, tamɔ nilee, gbele, kɛ esha. (Abɛi 1:20; Romabii 5:17, 21) Enɛ ji gbɛ ni yɔɔ faŋŋ diɛŋtsɛ ni Ŋmalɛi lɛ kɛtsɔɔ saji amli yɛ bei komɛi amli.
Ŋmɛnɛ hu, wɔwieɔ Biblia lɛ he yɛ nakai gbɛ nɔ nɔŋŋ beni wɔkɛɔ akɛ ewieɔ nɔ ko loo etsɔɔ tsɔɔmɔ ko lɛ. Kɛ wɔkɛ wiemɔi ni tamɔ nɛkɛ miitsu nii lɛ, wɔtsɔɔɔ akɛ mɔ pɔtɛɛ ko loo gbɔmɔ ji Biblia lɛ, aloo jeee nakai? Nakai nɔŋŋ hu Biblia lɛ etsɔɔɔ akɛ mumɔ krɔŋkrɔŋ lɛ ji mɔ loo gbɔmɔ kɛ ekɛmiito nɔ ko he yɛ wiemɔi amli lɛ.
Belɛ mɛni ji mumɔ krɔŋkrɔŋ lɛ? Ejeee mɔ loo gbɔmɔ ko. Shi moŋ eji Nyɔŋmɔ diɛŋtsɛ nitsumɔ hewalɛ, ni ekɛtsuɔ nii koni ekɛha esuɔmɔnaa nii aba mli. (1 Mose 1:2) Shi mumɔ krɔŋkrɔŋ lɛ saa wɔshihilɛi ahe yɛ mɛɛ gbɛ nɔ? Ni te wɔ diɛŋtsɛ lɛ enitsumɔ he aaaba sɛɛnamɔ babaoo aha wɔ tɛŋŋ?