Yesu Kristo Ji Gbalɔ Tamɔ Mose Yɛ Mɛɛ Gbɛ Nɔ?
YEHOWA NYƆŊMƆ maleee. (Tito 1:2; Hebribii 6:18) No hewɔ lɛ anyɛɔ akɛ he fɔɔ e-Wiemɔ ni ji Biblia lɛ mli gbalɛi lɛ anɔ ni amɛji anɔkwale hu. Fɛɛ baaba mli anɔkwale kɛ̃.
Nɔ ni fata gbalɛi ni jɛ Nyɔŋmɔ mumɔ mli nɛɛ ahe ji ekome ni Hebri gbalɔ Mose ŋma fɔ shi yɛ Mesia lɛ he lɛ. Yɛ be mli ni etsɛɔ Yehowa wiemɔ lɛ sɛɛ lɛ, Mose kɛɛ: “Mibatee gbalɔ ko shi maha amɛ [Israelbii lɛ] kɛaajɛ amɛnyɛmimɛi lɛ ateŋ tamɔ bo [Mose]; ni mikɛ miwiemɔi lɛ aaawo enaa, ni eeewie nii fɛɛ ni mawo he kita lɛ etsɔɔ amɛ.”—5 Mose 18:17, 18.
Bɔfo Petro kɛ gbalɛ nɛɛ to Yesu Kristo he beni ewie akɛ: “Mose kɛɛ tsɛmɛi lɛ akɛ: ‘Nuŋtsɔ [Yehowa] nyɛ Nyɔŋmɔ lɛ aaatee gbalɔ ko ni tamɔ mi shi kɛaajɛ nyɛnyɛmimɛi lɛ ateŋ aha nyɛ; nyɛboa lɛ toi yɛ nibii fɛɛ ni eeewie etsɔɔ nyɛ lɛ mli.’” (Bɔfoi lɛ Asaji 3:22) Yɛ anɔkwale mli lɛ, Yesu diɛŋtsɛ ekɛɛ akɛ: “Eji nyɛhe Mose nyɛye kulɛ, mi hu nyɛaahe mi nyɛye; shi mihe sane eŋma lɛ.” (Yohane 5:46) Yesu tamɔ Mose yɛ mɛɛ gbɛi anɔ?
Amɛshishijee yɛ Nitsumɔi Amli Je Amɛhe
Mose kɛ Yesu fɛɛ je gbekɛbii hii ni akpata amɛhiɛ lɛ mli. Akɛ abifao Mose tee galai amli yɛ Nilo Faa lɛ toi ni ekɛje Israel gbekɛbii hii ni Mizraim Farao lɛ fa ni agbe amɛ lɛ mli. Akɛ gbekɛ bibioo lɛ, Yesu hu je gbekɛbii hii ni amɛye kɛyashi afii enyɔ ni akpata amɛhiɛ yɛ Betlehem kɛ ekpokpaai lɛ anɔ lɛ mli. Maŋtsɛ Herode Kpeteŋkpele lɛ, ni tamɔ Farao, ni eji Nyɔŋmɔ kɛ E-webii ahenyɛlɔ lɛ ji mɔ ni fa ni agbe gbekɛbii nɛɛ fɛɛ lɛ.—2 Mose 1:22–2:10; Mateo 2:13-18.
Mose kɛ Yesu fɛɛ jie mlijɔlɛ loo heshibaa mumɔ kpo. Eyɛ mli akɛ atsɔse lɛ yɛ Mizraim maŋtsɛ ni he wa waa shia akɛ ebinuu moŋ, shi Mose bafee gbɔmɔ ni “ehe jɔ fe gbɔmɛi fɛɛ ni yɔɔ shikpɔŋ nɛɛ nɔ.” (4 Mose 12:3) Kɛ akɛaato he lɛ, Yesu esɔmɔ akɛ lumɔ Mikael yɛ ŋwɛi, shi eba ehe shi kɛba shikpɔŋ nɔ. (Daniel 10:13; Filipibii 2:5-8) Ni kɛlɛ, Yesu musuŋ tsɔ lɛ yɛ gbɔmɛi ahe, ni enyɛ ekɛɛ: “Nyɛwoa mipa lɛ nyɛfoa nyɛnɔ, ni nyɛkasea mi, shi mihe jɔ ni mibaa mihe shi kɛjɛɔ mitsui mli, ni nyɛaana hejɔɔmɔ nyɛaaha nyɛsusumai lɛ.”—Mateo 11:29; 14:14.
Yɛ Yehowa sɔɔmɔ hewɔ lɛ, Mose kɛ Yesu fɛɛ shi gbɛhei ni nɔ kwɔlɔ kɛ nii babaoo. Bɔni afee ni esɔmɔ Yehowa kɛ E-webii lɛ, Mose ŋmɛɛ ninamɔ kɛ gbɛhe ni nɔ kwɔ he yɛ Mizraim. (Hebribii 11:24-26) Nakai nɔŋŋ hu Yesu shi gbɛhe ni duromɔ yɔɔ mli kɛ ŋwɛi jwetrii babaoo bɔni afee ni ebasɔmɔ Nyɔŋmɔ kɛ E-webii lɛ yɛ shikpɔŋ nɔ.—2 Korintobii 8:9.
Mose kɛ Yesu fɛɛ batsɔmɔ mɛi ni Nyɔŋmɔ efɔ amɛ mu. Gbalɔ Mose sɔmɔ akɛ mɔ ni Yehowa efɔ lɛ mu kɛha Israel maŋ lɛ. Ni taakɛ bɔfo Paulo kɛɛ lɛ, Mose “buɔ Kristo [mɔ ni afɔ lɛ mu lɛ] hewɔ ahorabɔɔ lɛ akɛ nii babaoo fe Mizraim jwetrii lɛ.” (Hebribii 11:26; 2 Mose 3:1–4:17) Mɛɛ be Yesu batsɔ Kristo loo Mɔ ni afɔ lɛ mu lɛ? Enɛ ba mli beni akɛ Nyɔŋmɔ mumɔ krɔŋkrɔŋ loo enifeemɔ hewalɛ lɛ fɔ lɛ mu beni abaptisi lɛ lɛ. Yesu ye odase etsɔɔ Samaria yoo ni ta Yakob nu bu lɛ he yɛ Sikar lɛ kɛ agbɛnɛ Israel osɔfonukpa lɛ yɛ be mli ni ayeɔ esane lɛ akɛ lɛ ji Mesia loo Kristo lɛ.—Marko 14:61, 62; Yohane 4:25, 26.
Mose kɛ Yesu fɛɛ hi ŋmaa gbii 40. Mose hi ŋmaa gbii 40 yɛ be mli ni eyɔɔ Sinai Gɔŋ lɛ nɔ yɛ enitsumɔ akɛ Nyɔŋmɔ naawielɔ lɛ shishijee mli. (2 Mose 34:28) Yesu hi ŋmaa gbii 40 yɛ ŋa lɛ nɔ ni eye Satan kaai lɛ anɔ kunim yɛ esɔɔmɔ lɛ shishijee mli akɛ Mesia ni awo shi yɛ ehe lɛ.—Mateo 4:1-11.
Hii Enyɔ lɛ Fɛɛ Wo Yehowa Hiɛ Nyam
Yehowa kɛ Mose kɛ Yesu fɛɛ tsu nii koni amɛwo E-gbɛi krɔŋkrɔŋ lɛ nɔ gojoo. Nyɔŋmɔ kɛɛ Mose akɛ eya Israelbii lɛ aŋɔɔ yɛ ‘Yehowa amɛtsɛmɛi a-Nyɔŋmɔ lɛ gbɛi amli.’ (2 Mose 3:13-16) Mose damɔ Nyɔŋmɔ ni ha Farao hi shi koni ajie Yehowa hewalɛ kpo atsɔɔ lɛ ni ajaje E-gbɛi yɛ shikpɔŋ muu lɛ fɛɛ nɔ lɛ najiaŋ. (2 Mose 9:16) Yesu hu ba yɛ Yehowa gbɛi amli. Akɛ nɔkwɛmɔ nɔ lɛ, Kristo kɛɛ: “Mi lɛ miba yɛ mi-Tsɛ gbɛi anɔ, shi nyɛhereee mi.” (Yohane 5:43) Yesu wo e-Tsɛ lɛ hiɛ nyam, ejie Yehowa gbɛi lɛ kpo etsɔɔ gbɔmɛi ni Nyɔŋmɔ kɛ amɛ ha lɛ lɛ, ni eha ale enɛ jogbaŋŋ yɛ shikpɔŋ lɛ nɔ.—Yohane 17:4, 6, 26.
Mose kɛ Yesu fɛɛ tsɔ ŋwɛi hewalɛ nɔ amɛfee naakpɛɛ nii ni wo Nyɔŋmɔ hiɛ nyam. Mose fee naakpɛɛ nii koni ekɛye odase akɛ Yehowa Nyɔŋmɔ kɛ nitsumɔ ewo edɛŋ. (2 Mose 4:1-31) Mose ni Nyɔŋmɔ kɛ lɛ tsu nii koni egba Ŋshɔ Tsuru lɛ mli enyɔ lɛ tee nɔ efee naakpɛɛ nii ni wo Yehowa hiɛ nyam yɛ enitsumɔ be lɛ fɛɛ mli. (2 Mose 5:1–12:36; 14:21-31; 16:11-18; 17:5-7; Lala 78:12-54) Nakai nɔŋŋ hu Yesu wo Nyɔŋmɔ hiɛ nyam kɛtsɔ naakpɛɛ nii pii ni efee lɛ anɔ. Bɔ ni efa babaoo ha hewɔ lɛ, Yesu nyɛ ekɛɛ akɛ: “Nyɛhea mi nyɛye akɛ miyɛ Tsɛ lɛ mli, ni Tsɛ lɛ hu yɛ mimli; shi kɛ jeee nakai lɛ, nyɛhea mi nyɛyea yɛ nakai nitsumɔi lɛ nɔŋŋ hewɔ.” (Yohane 14:11) Nɔ ni fata enaakpɛɛ nii lɛ ahe ji ahum ni eha efee diŋŋ, ni ha Galilea Ŋshɔ lɛ ŋmɛ dɛmm lɛ.—Marko 4:35-41; Luka 7:18-23.
Nibii Krokomɛi ni He Hiaa ni Je Amɛhe
Atsɔ Mose kɛ Yesu fɛɛ nɔ akɛ niyenii ha yɛ naakpɛɛ gbɛ nɔ. Mose ji Yehowa gbalɔ yɛ be mli ni atsɔ naakpɛɛ gbɛ nɔ akɛ niyenii ha Israelbii lɛ. (2 Mose 16:11-36) Nakai nɔŋŋ hu Biblia lɛ tsiɔ ta yɛ bei sɔrɔtoi enyɔ mli akɛ Yesu tsɔ naakpɛɛ gbɛ nɔ ekɛ niyenii lɛ gbɔmɛi asafoi babaoo.—Mateo 14:14-21; 15:32-38.
Mana ni jɛ ŋwɛi lɛ kɔɔ Mose kɛ Yesu fɛɛ sɔɔmɔ he. Mose nyiɛ Israelbii lɛ ahiɛ ni akɛ mana ni jɛ ŋwɛi lɛ ha amɛ lɛ. (2 Mose 16:11-27; 4 Mose 11:4-9; Lala 78:25) Yɛ gbɛ ni tamɔ nakai shi ehe hiaa waa fe nakai nɔ lɛ, Yesu kɛ lɛ diɛŋtsɛ eheloo ha akɛ mana ni jɛ ŋwɛi kɛha adesai toibolɔi awala.—Yohane 6:48-51.
Mose kɛ Yesu fɛɛ nyiɛ gbɔmɛi ahiɛ kɛjɛ nyɔŋyeli mli kɛtee heyeli mli. Nyɔŋmɔ kɛ Mose tsu nii koni enyiɛ Israelbii lɛ ahiɛ kɛjɛ Mizraim nyɔŋyeli mli kɛya heyeli mli akɛ E-webii. (2 Mose 12:37-42) Nakai nɔŋŋ hu, Yesu Kristo nyiɛ esɛɛnyiɛlɔi lɛ ahiɛ kɛmiiya heyeli mli. Kristo baanyiɛ adesai toibolɔi lɛ ahiɛ kɛjɛ nyɔji ni amɛtsɔmɔ amɛha Satan Abonsam gbɛjianɔtoo lɛ mli kɛya heyeli mli, kɛ agbɛnɛ kɛjɛ esha kɛ gbele mli.—1 Korintobii 15:24-26; Kolosebii 1:13; 1 Yohane 5:19.
Mose kɛ Yesu fɛɛ damɔ kpaŋmɔi amli. Mose ji Mla kpaŋmɔ lɛ ni ka Yehowa Nyɔŋmɔ kɛ Israelbii lɛ ateŋ lɛ teŋdamɔlɔ. (2 Mose 19:3-9) Yesu ji kpaŋmɔ hee ni ka Nyɔŋmɔ kɛ mumɔŋ Israel teŋ lɛ Mlidamɔlɔ.—Yeremia 31:31-34; Luka 22:20; Hebribii 8:6-13.
Akɛ kojomɔ wo Mose kɛ Yesu Kristo fɛɛ dɛŋ. Mose sɔmɔ akɛ kojolɔ kɛ mlahalɔ kɛha heloo naa Israel. (2 Mose 18:13; Maleaki 4:4) Yesu sɔmɔɔ akɛ Kojolɔ ni eha “Nyɔŋmɔ Israel lɛ” emlai kɛ ekitai. (Galatabii 6:16; Yohane 15:10) Kristo diɛŋtsɛ kɛɛ: “Ejaakɛ Tsɛ lɛ tete ekojooo mɔ ko, shi moŋ etuu kojomɔ lɛ fɛɛ ewo Bi lɛ dɛŋ; koni mɛi fɛɛ abu Bi lɛ, tamɔ bɔ ni amɛbuɔ Tsɛ lɛ. Mɔ ni ebuuu Bi lɛ, ebuuu Tsɛ lɛ ni tsu lɛ lɛ hu.”—Yohane 5:22, 23.
Akɛ Nyɔŋmɔ we lɛ nɔkwɛmɔ wo Mose kɛ Yesu fɛɛ dɛŋ. Mose ye anɔkwa akɛ Nyɔŋmɔ we lɛ nɔkwɛlɔ yɛ blema Israel. (4 Mose 12:7) Kɛ akɛto he lɛ, afee Yesu Yehowa mumɔŋ bii awe lɛ Yitso ni eye anɔkwa yɛ enɛ mli. Yɛ anɔkwale mli lɛ, Yesu ji “mɔ ni yeɔ Mɔ ni wo lɛ lɛ anɔkwa, tamɔ bɔ ni Mose hu ye ewe lɛ fɛɛ nɔ anɔkwa lɛ. Ejaakɛ tamɔ bɔ ni mɔ ni ma shia ko lɛ woo fa fe shia lɛ nɔ lɛ, nakai kɛ lɛ hu ehiɛ yɔɔ nyam fe Mose. . . . Ni Mose lɛ, eye anɔkwa yɛ eshia muu lɛ fɛɛ akɛ sɔɔlɔ, koni eye nii ni abaawie lɛ ahe odase; shi Kristo lɛ akɛ Bi yɛ lɛ diɛŋtsɛ ewe; lɛ ewe ji wɔ, kɛ wɔhiɛ nɔhiɛkamɔ ekaa kɛ shwaa lɛ mli kpɛŋŋ kɛyashi naagbee lɛ.”—Hebribii 3:2-6.
Mose tamɔ Yesu po yɛ gbele mli. Yɛ mɛɛ gbɛ nɔ? Yehowa jie Mose gbonyo lɛ koni gbɔmɛi akabule lɛ loo amɛja lɛ. (5 Mose 34:5, 6; Yuda 9) Nakai nɔŋŋ hu Nyɔŋmɔ jie Yesu gbonyo lɛ, koni ekana fitemɔ koni ekatsɔ tɛmɔtɛ kɛmiiha hemɔkɛyeli—Lala 16:10; Bɔfoi lɛ Asaji 2:29-31; 1 Korintobii 15:50.
Nyɛhiɛ Ahia Gbalɛ Nɔ
Enɛɛmɛi ji gbɛi komɛi anɔ ni Yesu Kristo fee gbalɔ ni tamɔ Mose lɛ yɛ. Kwɛ bɔ ni wiemɔi ni Nyɔŋmɔ kɛɛ Mose ni kɔɔ nakai gbalɔ lɛ baa lɛ he lɛ ba mli yɛ naakpɛɛ gbɛ nɔ ha!
Ŋwanejee ko bɛ he akɛ Yehowa tsu egbalɛ shiwoo akɛ ebaatee gbalɔ ko ni tamɔ Mose shi lɛ he nii. Wiemɔi ni yɔɔ 5 Mose 18:18 lɛ ba mli yɛ Yesu Kristo shihilɛ be kɛ eniiashikpamɔi amli. Ni emlibaa ni tamɔ nɛkɛ lɛ haa wɔnaa nɔ ni wɔɔdamɔ nɔ wɔna hekɛnɔfɔɔ yɛ Nyɔŋmɔ Wiemɔ lɛ mli gbalɛi krokomɛi amli. No hewɔ lɛ, nyɛhaa ni wɔhiɛ ahia gbalɛ nɔ yɛ be fɛɛ mli.