Tsuishiŋmɛɛ—Ehe Hiaa Kristofoi
“Nyɛkɛ tsuishiŋmɛɛ . . . afataa nyɛ hemɔkɛyeli he.”—2 PETRO 1:5, 6, New World Translation.
1, 2. Mɛni hewɔ esa akɛ wɔ fɛɛ wɔŋmɛ wɔtsui shi kɛyashi naagbee lɛ?
NƆKWƐLƆ gbɛfalɔ lɛ kɛ eŋa miisara naanyo Kristofonyo ko ni eye kɛjɛ afii 90 kɛyaa. Ekɛ afii nyɔŋmai abɔ ehi be-fɛɛ sɔɔmɔ lɛ mli. Yɛ be mli ni amɛgbaa sane lɛ, nyɛminuu ní eda lɛ kai hegbɛi ni ena mli ŋɔɔmɔ yɛ afii ni eho lɛ amli lɛ ekomɛi. Eye awerɛho yɛ be mli ni yaafonui hoɔ yɛ ehiɛ lɛ akɛ, “Shi amrɔ nɛɛ minyɛɛɛ mafee babaoo yɛ nɔ ko nɔ ko mli.” Nɔkwɛlɔ gbɛfalɔ lɛ gbele e-Biblia lɛ ni ekane Mateo 24:13, he ni aŋma Yesu Kristo wiemɔi nɛɛ yɛ lɛ: “Mɔ ni hiɛɔ mli kɛyawulaa shi lɛ, lɛ aaahere eyiwala.” Kɛkɛ ni nɔkwɛlɔ lɛ kwɛ suɔmɔ nyɛmi nɛɛ hiɛ ni ekɛɛ: “Naagbee nitsumɔ ni ka wɔ fɛɛ wɔnɔ, ni abɔ ni wɔnyɛɔ wɔfeɔ loo bibioo ni wɔnyɛɔ wɔfeɔ lɛ kɔɔɔ he eko ji, ni wɔhiɛ mli kɛyashi naagbee.”
2 Hɛɛ, akɛ Kristofoi lɛ, esa akɛ wɔ fɛɛ wɔhiɛ mli loo wɔŋmɛ wɔtsui shi kɛyashi nibii agbɛjianɔtoo nɛɛ naagbee loo kɛyashi wɔwala shihilɛ be lɛ naagbee. Gbɛ kroko ko bɛ ni aaatsɔ nɔ ni nine ashɛ Yehowa nɔkpɛlɛmɔ kɛha yiwalaheremɔ lɛ nɔ. Wɔkɛ wɔhe ewo wala he foidamɔ mli, ni esa akɛ wɔkɛ “tsuishitoo ada foi” lɛ kɛyashi naagbee. (Hebribii 12:1) Bɔfo Petro ma bɔ ni su nɛɛ he hiaa ha lɛ nɔ mi beni ewo enanemɛi Kristofoi lɛ hewalɛ akɛ: “Nyɛkɛ tsuishiŋmɛɛ . . . afataa nyɛ hemɔkɛyeli he” lɛ. (2 Petro 1:5, 6, NW) Shi mɛni diɛŋtsɛ ji tsuishiŋmɛɛ?
Tsuishiŋmɛɛ—Nɔ Ni Etsɔɔ
3, 4. Akɛ aŋmɛ tsui shi lɛ tsɔɔ mɛni?
3 Akɛ aŋmɛ tsui shi lɛ tsɔɔ mɛni? Hela feemɔ wiemɔ “aŋmɛ tsui shi,” (hy·po·meʹno) lɛ shishi diɛŋtsɛ ji “ahi shi loo ahi shishi.” Epueɔ shii 17 yɛ Biblia lɛ mli. Taakɛ wiemɔi komekomei anaabualɔi W. Bauer, F. W. Gingrich, kɛ F. Danker tsɔɔ lɛ, eshishi ji “hii shi fe ni ooojo foi . . . , daamɔ onajiaŋ, anyɛɛɛ aye onɔ.” Hela gbɛi kɛha “tsuishiŋmɛɛ” (hy·po·mo·neʹ) pueɔ fe shii 30. A New Testament Wordbook, ni William Barclay ŋma lɛ wieɔ enɛ he akɛ: “Tsuishiŋmɛɛ ji mumɔ loo su ni nyɛɔ edamɔɔ nibii anaa, jeee nɔ ko nɔkpɛlɛmɔ kɛkɛ ni awieee he, shi kɛ hiɛnɔkamɔ ni ekãa yɔɔ mli waa . . . Eji su ni hi ni haa gbɔmɔ damɔɔ enaji anaa ni eekpee kɔɔyɔɔ naa. Eji subaŋ kpakpa ni baanyɛ atsake kaa ni wa fe fɛɛ lɛ ni etsɔ anunyam nɔ̃ ejaakɛ nɔ ni enaa yɛ piŋmɔ lɛ sɛɛ ji oti ni akɛma shi lɛ.”
4 Belɛ tsuishiŋmɛɛ haa wɔnyɛɔ wɔdamɔɔ wɔ gbɛhe ni wɔnijiaŋ ejeee wui yɛ gbɛtsii nii loo piŋmɔi ahewɔ. (Romabii 5:3-5) Ekwɛɔ nii kɛtekeɔ amrɔ piŋmɔ nɛɛ kɛyashɛɔ oti ni akɛma shi lɛ he—naanɔ wala nyɔmɔwoo loo nikeenii lɛ, kɛ yɛ ŋwɛi loo shikpɔŋ nɔ.—Yakobo 1:12.
Tsuishiŋmɛɛ—Mɛni Hewɔ?
5. (a) Mɛni hewɔ ‘tsuishiŋmɛɛ he ehia’ Kristofoi fɛɛ lɛ? (b) Mɛɛ kui enyɔ mli abaanyɛ aja wɔkaai lɛ amli awo?
5 Akɛ Kristofoi lɛ, “tsuishitoo [tsuishiŋmɛɛ] ehia” wɔ fɛɛ. (Hebribii 10:36) Mɛni hewɔ? Titri lɛ, ‘wɔgbeeɔ kaai sɔrɔtoi pii amli.’ Hela ŋmalɛ ni yɔɔ Yakobo 1:2 nɛɛ tsɔɔ nɔ ko ni wɔkɛkpeɔ ni wɔkpaaa gbɛ loo wɔsumɔɔɔ, tamɔ beni mɔ ko kɛ ojotswalɔ ko ekpe nɛkɛ. (Okɛ Luka 10:30 ato he.) Wɔkɛ kaai ni abaanyɛ ajara mli awo kui enyɔ mli kpeɔ: nɔ ni ji gbɔmɛi ahe nɔ ni jɛ esha ni wɔna akɛ gboshinii lɛ hewɔ, kɛ nɔ ni baa yɛ wɔ nyɔŋmɔjamɔ hetuu-kɛhamɔ hewɔ. (1 Korintobii 10:13; 2 Timoteo 3:12) Mɛni ji kaai nɛɛ ekomɛi?
6. Te fee tɛŋŋ ni Odasefonyo ko nyɛ eŋmɛ etsui shi beni hela ko ni waa mɔ he waa haa epiŋɔ lɛ?
6 Hela ni mli wa. Taakɛ Timoteo ji lɛ, esa akɛ Kristofoi komɛi aŋmɛ amɛtsui shi yɛ “helai ni yeɔ [amɛ] kpitiokpitio lɛ ahewɔ.” (1 Timoteo 5:23) Titri lɛ kɛ wɔkɛ hela ni ehiii tsamɔ, ni waa mɔ he waa miikpe lɛ ehe hiaa ni wɔŋmɛ wɔtsui shi, ní wɔdamɔ wɔnaji anɔ, kɛ Nyɔŋmɔ yelikɛbuamɔ ni wɔkalaaje wɔ Kristofoi ahiɛnɔkamɔ lɛ. Susumɔ Odasefonyo ko ni kpaako eye afii 50 kɛyaa ní kɛ heloo mli fala ni gbooo wuu ta kakadaŋŋ ni naa wa lɛ nɔkwɛmɔ nɔ lɛ he. Edamɔ shi shiŋŋ kɛtsɔ opireshɛn sɔrɔtoi enyɔ yɛ efaishitswaa akɛ eheŋ la ni aaagbala awo emli lɛ mli. (Bɔfoi lɛ Asaji 15: 28, 29) Shi fala nɛɛ pue ekoŋŋ yɛ emligbɛ ni etee nɔ elɛɛ kɛbɛŋkɛ emliteŋ wu he. Gbɔmɔtsoŋ piŋmɔ ni etsɔ mli lɛ naa wa aahu akɛ tsofa ko kwraa bɛ ni baanyɛ aba piŋmɔ loo bɔ ni ewaa ehe ehaa lɛ shi. Ni kɛlɛ, ekwɛ nii kɛteke amrɔ piŋmɔ lɛ kɛtee wala nyɔmɔwoo yɛ jeŋ hee lɛ mli lɛ he. Etee nɔ egba ehiɛnɔkamɔ ni kpɛ́ɔ tamɔ la lɛ he sane etsɔɔ datrɛfoi, helatsɛmɛi akwɛlɔi, kɛ mɛi ni basaraa mɛi lɛ. Eŋmɛ etsui shi aahu kɛtee naagbee—ewala naagbee. Ekolɛ ogbɔmɔtsoŋ naagbai lɛ jeee nɔ ni woɔ owala he gbeyei loo nɔ ní waa mɔ he waa tamɔ nɔ ni nyɛmi nuu ní asumɔɔ lɛ lɛ tsɔ mli lɛ, ni kɛlɛ ebaanyɛ ni ekɛ tsuishiŋmɛɛ he kaa kpele aba.
7. Mɛɛ piŋmɔ nɛkɛ yɔɔ tsuishiŋmɛɛ mli kɛha wɔmumɔŋ nyɛmimɛi hii kɛ yei lɛ ateŋ mɛi komɛi?
7 Henumɔŋ piŋmɔ. Yehowa webii lɛ ateŋ mɛi komɛi kɛ “tsuiŋdɔlɛ” ni nɔ ni jɛɔ mli baa ji “gbilinií” ni afeɔ kpeɔ yɛ be kɛ bei amli. (Abɛi 15:13) Nɔnyɛɛ ni naa wa babaoo yɛ “jaramɔ bei ni naa wa” nɛɛ mli. (2 Timoteo 3:1, NW) Science News ni aŋma yɛ December 5, 1992 lɛ, bɔ amaniɛ akɛ: “Nɔnyɛɛ ni naa wa waa ni yɛ bei babaoo mli lɛ ekumɔɔ mɔ kwraa lɛ efa yɛ yinɔ fɛɛ yinɔ ni afɔɔ amɛ kɛjɛ 1915 kɛbaa nɛɛ amli.” Nɔ ni kɛ nɛkɛ nɔnyɛɛ nɛɛ baa lɛ yɛ sɔrɔtoi-sɔrɔtoi, ejɛɔ nibii ni kɔɔ gbɔmɛi ahe nifeemɔi anɔ kɛyaa niiashikpamɔi ni eŋɔɔɔ ni dɔɔ mɔ waa lɛ anɔ. Kɛha Kristofoi komɛi lɛ, tsuishiŋmɛɛ ebafee nɔ ni ji daa gbi mpleshii koni amɛdamɔ amɛnaji anɔ yɛ henumɔŋ piŋmɔi anaa. Ni kɛlɛ, amɛŋmɛɛɛ he, amɛnijiaŋ ejeee wui. Amɛhiɔ shi akɛ anɔkwafoi amɛhaa Yehowa yɛ yaafonui lɛ fɛɛ sɛɛ.—Okɛto Lala 126:5, 6 he.
8. Mɛɛ shika loo ohia mli kaa wɔkɛbaakpe?
8 Nɔ ni baanyɛ afata kaai sɔrɔtoi ni wɔkɛkpeɔ lɛ ahe ji ohia mli piŋmɔ ni naa wa. Beni nyɛmi nuu ko ni yɔɔ New Jersey, U.S.Amerika lɛ na ehe trukaa akɛ ebɛ nitsumɔ lɛ, esusu eweku lɛ kwɛmɔ kɛ eshia ni esumɔŋ akɛ eeeje edɛŋ lɛ he kɛ shishinumɔ. Shi enɛ gbalaaa ejwɛŋmɔ kɛjɛɛɛ Maŋtsɛyeli hiɛnɔkamɔ lɛ nɔ. Beni etaoɔ nitsumɔ kroko lɛ, ekɛ hegbɛ lɛ tsu nii ni ekɛsɔmɔ akɛ gbɛgbalɔi awalɔ. Yɛ naagbee aahu lɛ ena nitsumɔ.—Mateo 6:25-34.
9. (a) Suɔlɔ ko gbele baabi ni wɔŋmɛ wɔtsui shi yɛ mɛɛ gbɛ nɔ? (b) Mɛɛ ŋmalɛi tsɔɔ akɛ ejeee tɔmɔ akɛ awerɛho aaaha mɔ ko afo?
9 Kɛ olaaje osuɔlɔ ko yɛ gbele mli pɛŋ lɛ, tsuishiŋmɛɛ ni sɛɛ tsɛɔ waa he hiaa bo, yɛ be mli ni mɛi ni ebɔle ohe lɛ eshi bo kɛtee amɛnitsumɔi anɔ lɛ. Ekolɛ obaana akɛ ebafeɔ nɔ ni wa waa kɛhaa bo daa afi kɛ be ni osuɔlɔ nɛɛ gbele ba lɛ shɛ lɛ. Ni oooŋmɛ otsui shi yɛ nɔ ni olaaje nɛɛ naa lɛ etsɔɔɔ akɛ esaaa akɛ okɛ awerɛho fóɔ. Eji gbɔmɔ bɔɔ su akɛ eeewo yara yɛ mɔ ni esumɔɔ lɛ lɛ gbele he, ni enɛ etsɔɔɔ yɛ gbɛ ko nɔ akɛ belɛ abɛ hemɔkɛyeli yɛ gbohiiashitee he hiɛnɔkamɔ lɛ mli. (1 Mose 23:2; okɛto Hebribii 11:9 he.) Yesu “fo” beni Lazaro gbo lɛ, eyɛ mli akɛ ekɛ hekɛnɔfɔɔ ekɛɛ Marta akɛ: “Onyɛmi nuu lɛ baate shi.” Ni Lazaro te shi lɛlɛŋ!—Yohane 11:23, 32-35, 41-44.
10. Mɛni hewɔ tsuishiŋmɛɛ sɔrɔto ko he hiaa Yehowa webii lɛ.
10 Kɛfata kaai ni ji gbɔmɛi fɛɛ he nɔ ni aaaŋmɛ tsui shi yɛ mli lɛ he lɛ, ehe miihia ni Yehowa webii aŋmɛ amɛtsui shi yɛ gbɛ ni yɔɔ sɔrɔto kwraa nɔ. Yesu bɔ kɔkɔ akɛ: “Ni migbɛi lɛ hewɔ lɛ jeŋmaji fɛɛ aaanyɛ nyɛ.” (Mateo 24:9) Ekɛɛ hu akɛ: “Kɛ amɛwa mi yi lɛ, amɛaawa nyɛ hu yi.” (Yohane 15:20) Mɛni hewɔ nyɛ̃ɛ kɛ yiwaa babaoo nɛkɛ? Ejaakɛ Satan miibɔ mɔdɛŋ ni efite emuuyeli mli ni wɔhiɛ kɛha Yehowa lɛ, ni he fɛɛ he ni wɔyɔɔ yɛ shikpɔŋ nɛɛ nɔ akɛ Nyɔŋmɔ tsuji kɔɔɔ he eko. (1 Petro 5:8; okɛto Kpojiemɔ 12:17 he.) Yɛ enɛ hewɔ lɛ Satan haa yiwaa ni naa wa baa, ní enɛ kaa wɔtsuishiŋmɛɛ lɛ babaoo.
11, 12. (a) Mɛɛ tsuishiŋmɛɛ he kaa Yehowa Odasefoi kɛ amɛbii kɛkpe yɛ 1930 afii lɛ kɛ 1940 afii lɛ shishijee mli? (b) Mɛni hewɔ Yehowa Odasefoi ŋaaa maŋ okadi lɛ?
11 Akɛ nɔkwɛmɔ nɔ lɛ, Yehowa Odasefoi kɛ amɛbii ni yɔɔ United States, Amerika kɛ Canada lɛ bafee mɛi ni awaa amɛ yi yɛ 1930 afii lɛ kɛ 1940 afii lɛ shishijee mli ejaakɛ amɛŋaaa maŋ okadi nibii lɛ yɛ henilee hewɔ. Odasefoi lɛ kɛ bulɛ haa maŋ ni amɛyɔɔ mli lɛ okadi nibii lɛ, shi amɛboɔ shishitoo mla ni akɛma shi yɛ Nyɔŋmɔ Mla ni anaa yɛ 2 Mose 20:4, 5 (NW) lɛ toi: “Kaafee amaga ko loo nɔ ko ni tamɔ nii ni yɔɔ ŋwɛi, loo nii yɔɔ shikpɔŋ lɛ nɔ, loo nii ni yɔɔ nu mli yɛ shikpɔŋ lɛ shishi lɛ oha ohe. Kaaja amɛ ni kaasɔmɔ amɛ hu; ejaakɛ mi, Yehowa o-Nyɔŋmɔ lɛ, miji Nyɔŋmɔ awuŋayelɔ ni biɔ he ni atuɔ ahaa ekometoo.” Beni ashwie Odasefoi abii ni yaa skul lɛ ateŋ mɛi komɛi akɛni amɛmiisumɔ ni amɛkɛ amɛjamɔ aha Yehowa Nyɔŋmɔ pɛ hewɔ lɛ, Odasefoi lɛ to Maŋtsɛyeli Skul sɔrɔtoi ahe gbɛjianɔ koni akɛtsɔɔ amɛ nii. Nikaselɔi nɛɛ ku amɛsɛɛ kɛtee amɛ tsutsu skul sɔrɔtoi lɛ amli beni U.S. Amerika Kojomɔ He Wulu lɛ kpɛlɛ amɛshidaamɔ yɛ jamɔ mli lɛ nɔ, taakɛ maji ni ena nɔyaa lɛ feɔ ŋmɛnɛ lɛ. Yɛ fɛɛ sɛɛ lɛ, nɛkɛ gbekɛbii nɛɛ atsuishiŋmɛɛ kɛ ekãa lɛ feɔ nɔkwɛmɔ nɔ kpakpa ko ni nɔ bɛ, titri lɛ, kɛha obalaŋtai Kristofoi ni ekolɛ amɛkɛ hefɛoyeli baakpe akɛni amɛbɔɔ mɔdɛŋ ni amɛhi shi yɛ tɛi ni Biblia lɛ kɛmamɔ shi lɛ anaa hewɔ lɛ.—1 Yohane 5:21.
12 Kaai sɔrɔtoi ni wɔkɛkpeɔ—nɔ ni ji adesai ahe nɔ kɛ nɔ ni wɔkɛkpeɔ yɛ wɔ Kristofoi ahemɔkɛyeli hewɔ lɛ—tsɔɔ nɔ hewɔ ní tsuishiŋmɛɛ he hiaa wɔ lɛ. Shi te wɔɔfee tɛŋŋ wɔŋmɛ wɔtsui shi hu?
Ŋmɛɛ Otsui Shi Kɛyashi Naagbee—Yɛ Mɛɛ Gbɛ Nɔ?
13. Mɛɛ gbɛ nɔ Yehowa tsɔɔ ekɛ tsuishiŋmɛɛ haa?
13 Nyɔŋmɔ webii yɛ hegbɛ ko diɛŋtsɛ fe mɛi ni jaaa Yehowa lɛ. Kɛ wɔmiitao yelikɛbuamɔ lɛ, wɔbaanyɛ wɔbo wɔtsɛ “tsuishiŋmɛɛ kɛ miishɛjemɔ Nyɔŋmɔ lɛ.” (Romabii 15:5) Shi, mɛɛ gbɛ nɔ Yehowa tsɔɔ ekɛ tsuishiŋmɛɛ haa yɛ? Gbɛ kome ni etsɔɔ nɔ efeɔ nakai ji kɛtsɔ tsuishiŋmɛɛ he nɔkwɛmɔ nii ni aŋmala yɛ e-Wiemɔ ni ji Biblia lɛ mli lɛ nɔ. (Romabii 15:4) Yɛ be mli ni wɔsusuɔ enɛɛmɛi ahe waa lɛ, belɛ jeee akɛ aawo wɔ hewalɛ ni wɔŋmɛ wɔtsui shi kɛkɛ, shi moŋ ni wɔkase bɔ ni wɔɔfee wɔŋmɛ wɔtsui shi lɛ he nii babaoo. Susumɔ nɔkwɛmɔ nii enyɔ ni ekaaa lɛ he—Hiob tsuishiŋmɛɛ kɛ ekãa lɛ kɛ Yesu Kristo tsuishiŋmɛɛ ni tɔmɔ ko kwraa bɛ he lɛ.—Hebribii 12:1-3; Yakobo 5:11
14, 15. (a) Mɛɛ kaai nɛkɛ Hiob ŋmɛ etsui shi yɛ mli lɛ? (b) Te fee tɛŋŋ ni Hiob nyɛ eŋmɛ etsui shi yɛ kaai ni ekɛkpe lɛ amli?
14 Mɛɛ shihilɛi ka Hiob tsuishiŋmɛɛ lɛ? Epiŋ akɛ ohiafo beni elaaje enɔ fɛɛ nɔ lɛ. (Hiob 1:14-17; okɛto Hiob 1:3 he.) Hiob nu piŋmɔ he beni ebii nyɔŋma lɛ fɛɛ gboi trukaa lɛ. (Hiob 1:18-21) Etsɔ helai ni piŋmɔi babaoo yɔɔ mli lɛ mli. (Hiob 2:7, 8; 7:4, 5) Lɛ diɛŋtsɛ eŋa nyɛ enɔ koni etsi ehe kɛjɛ Nyɔŋmɔ he. (Hiob 2:9) Enanemɛi ni bɛŋkɛ lɛ kpaakpa lɛ wie wiemɔi ni yeɔ lɛ awui, ni mlihilɛ bɛ mli, ni jeee anɔkwale amɛshi lɛ. (Okɛto Hiob 16:1-3 kɛ Hiob 42:7 he.) Shi Hiob damɔ enaji anɔ, ehiɛ emuuyeli mli yɛ enɛɛmɛi fɛɛ mli. (Hiob 27:5) Nibii ni eŋmɛ etsui shi yɛ mli lɛ tamɔ kaai ni Yehowa webii kɛkpeɔ ŋmɛnɛ lɛ pɛpɛɛpɛ
15 Te fee tɛŋŋ ni Hiob nyɛ edamɔ nakai kaai lɛ fɛɛ naa lɛ? Nɔ titri ko ni waje Hiob ji hiɛnɔkamɔ. Ejaje akɛ: “Shi tso tete hiɛnɔkamɔ yɛ ha lɛ akɛ kɛji afo lɛ lɛ, eeehere ekoŋŋ, ni eniji fɔbii lɛ asɛɛ efoŋ.” (Hiob 14:7) Mɛɛ hiɛnɔkamɔ Hiob yɔɔ? Taakɛ wɔnaa yɛ kukuji fioo ko sɛɛ lɛ, etsɔɔ mli akɛ: “kɛji gbɔmɔ gbo lɛ, ani ehiɛ aaaka ekoŋŋ? . . . Kulɛ oootsɛ, ni mahereo nɔ; ni oootao onine naa nitsumɔ lɛ sɛɛ gbɛ.” (Hiob 14:14, 15) Hɛɛ, Hiob na nɔ ko yɛ epiŋmɔ ni etsɔɔ mli lɛ sɛɛ. Ele akɛ ekaai lɛ eyaŋ nɔ daa. Kɛ hoo lɛ ebaaŋmɛ etsui shi kɛkɛ kɛyashi gbele mli. Hiɛnɔkamɔ ni ekpaa gbɛ ji akɛ, Yehowa, ni sumɔɔ ni etee gbohii lɛ ashi lɛ, kɛ lɛ baaba wala mli.—Bɔfoi lɛ Asaji 24:15.
16. (a) Mɛni wɔkaseɔ yɛ tsuishiŋmɛɛ he kɛjɛɔ Hiob nɔkwɛmɔ nɔ lɛ mli? (b) Mɛɛ gbɛ nɔ esa akɛ Maŋtsɛyeli hiɛnɔkamɔ lɛ afee nɔ ni yɔɔ pɔtɛɛ kɛha wɔ, ni mɛni hewɔ?
16 Mɛni wɔkaseɔ kɛjɛɔ Hiob tsuishiŋmɛɛ lɛ mli? Kɛ wɔɔŋmɛ wɔtsui shi kɛyashi naagbee lɛ, no lɛ esaaa akɛ wɔhiɛ jeɔ wɔ hiɛnɔkamɔ lɛ nɔ kɔkɔɔkɔ. Kaimɔ hu akɛ, bɔ ni Maŋtsɛyeli hiɛnɔkamɔ lɛ ji anɔkwale ha lɛ tsɔɔ akɛ kɛ akɛto he lɛ, amanehulu ni wɔnaa amrɔ nɛɛ “hiɔ shi be fioo kɛkɛ.” (2 Korintobii 4:16-18) Wɔ hiɛnɔkamɔ ni jara wa waa lɛ damɔ Yehowa shiwoo ni kɔɔ wɔsɛɛ be ko ni ebɛŋkɛ ni emli ni “[eee]tsumɔ [wɔ] hiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ” lɛ nɔ shiŋŋ. (Kpojiemɔ 21:3, 4) Esa akɛ nakai hiɛnɔkamɔ lɛ, “ni wooo mɔ hiɛgbele” lɛ abu wɔsusumɔi ahe. (Romabii 5:4, 5; 1 Tesalonikabii 5:8) Esa akɛ efee nɔ ni yɔɔ diɛŋtsɛ kɛha wɔ—aahu akɛ wɔnyɛɔ wɔtsɔɔ hemɔkɛyeli hiŋmɛi mli wɔnaa wɔhe yɛ jeŋ hee lɛ mli—ni wɔkɛ helai kɛ nɔnyɛɛ epeleee dɔŋŋ shi moŋ wɔteɔ shi daa gbi yɛ gbɔmɔtsoŋ hewalɛnamɔ kpakpa mli kɛ jwɛŋmɔ ni mli tse keŋkeŋ; ni wɔgbaaa wɔhe naa yɛ shika loo ohia mli nɔnyɛɛ ni hiɛdɔɔ yɔɔ mli lɛ he shi moŋ wɔhiɔ shi shweshweeshwe; wɔyeee awerɛho yɛ wɔsuɔlɔi ni egboi lɛ ahe dɔŋŋ shi moŋ nɔ ni wɔnaa ji shi ni ateeɔ amɛ kɛbaa wala mli. (Hebribii 11:1) Kɛ hiɛnɔkamɔ ni tamɔ nɛkɛ bɛ lɛ, wɔ amrɔ kaai lɛ baaye wɔnɔ kwraa ni ebaaha wɔŋmɛɛ he. Shi yɛ wɔ hiɛnɔkamɔ lɛ hewɔ lɛ, mɛɛ kanyamɔ kɛ hewalɛwoo kpele wɔyɔɔ nɛkɛ ni baaha wɔya nɔ wɔwuu ta lɛ, ni wɔya nɔ wɔŋmɛ wɔtsui shi kɛyashi naagbee!
17. (a) Mɛɛ kaai Yesu ŋmɛ etsui shi yɛ mli lɛ? (b) Ekolɛ abaanyɛ ana piŋmɔ ni naa wa waa ni Yesu ŋmɛ etsui shi yɛ mli lɛ kɛjɛ mɛɛ anɔkwasane ko mli? (Kwɛmɔ shishigbɛ niŋmaa lɛ.)
17 Biblia lɛ woɔ wɔ hewalɛ ni “wɔkwɛ” Yesu ‘ni wɔsusu ehe jogbaŋŋ.’ Mɛɛ kaai eŋmɛ etsui shi yɛ mli lɛ? Ekomɛi jɛ esha kɛ emuu ni mɛi krokomɛi yeee lɛ hewɔ. Jeee akɛ Yesu ŋmɛ etsui shi eha “naashai ni eshafeelɔi ŋmɛ lɛ nɛɛ” kɛkɛ, shi naagbai ni te shi yɛ ekaselɔi lɛ ateŋ lɛ hu he, ni béi ni yaa nɔ yɛ amɛteŋ shii abɔ yɛ mɔ ni da fe fɛɛ yɛ amɛteŋ lɛ he lɛ hu fata he. Nɔ ni fe nakai lɛ, ekɛ hemɔkɛyeli he kaa ni eko bɛ ni kɛ lɛ yeɔ egbɔ kpe. “Emia ehiɛ [eŋmɛ etsui shi] yɛ sɛŋmɔtso lɛ he amanehulu lɛ mli.” (Hebribii 12:1-3; Luka 9:46; 22:24) Ewa po akɛ aaasusu jwɛŋmɔŋ kɛ gbɔmɔtsoŋ piŋmɔ ni kɔɔ esɛŋmɔ lɛ kɛ ehiɛgbelewoo akɛ mɔ ni agbe lɛ akɛ musubɔlɔa lɛ he lɛ he.
18. Taakɛ bɔfo Paulo tsɔɔ lɛ, mɛɛ nibii enyɔ waje Yesu lɛ?
18 Mɛni ha Yesu nyɛ eŋmɛ etsui shi kɛyashi naagbee lɛ? Bɔfo Paulo tsiɔ nibii enyɔ ni waje Yesu lɛ ta: “sɔlemɔi kɛ faikpamɔi” kɛ agbɛnɛ “nyamɔ ni ka ehiɛ lɛ hewɔ.” Yesu ni ji Nyɔŋmɔ Bi ni yeɔ emuu lɛ hiɛ gbooo akɛ eeebi yelikɛbuamɔ. Ekɛ “bolɔmɔ ni naa wa kɛ yaafonui” sɔle. (Hebribii 5:7; 12:2) Beni ekaa ni da fe fɛɛ lɛ bɛŋkɛɔ lɛ mli titri ni ena akɛ ehe miihia ni esɔle ebi hewalɛwoo shii abɔ kɛ hiɛdɔɔ. (Luka 22:39-44) Yɛ Yesu sɔlemɔi lɛ ahetoo-hamɔ mli lɛ, Yehowa ejieee kaa lɛ, shi moŋ ewo Yesu hewalɛ koni enyɛ edamɔ naa loo eŋmɛ etsui shi yɛ mli. Yesu ŋmɛ etsui shi hu ejaakɛ ekwɛ nii kɛteke esɛŋmɔtso lɛ kɛtee enyɔmɔwɔo lɛ nɔ—miishɛɛ ni ebaana akɛ eye ebua Yehowa gbɛi lɛ hetsemɔ kɛ adesai aweku lɛ kpɔmɔ kɛmiijɛ gbele mli.—Mateo 6:9; 20:28.
19, 20. Yesu nɔkwɛmɔ nɔ lɛ yeɔ ebuaa wɔ ni wɔnaa nɔ ni kɔɔ tsuishiŋmɛɛ he lɛ he jwɛŋmɔ kpakpa yɛ mɛɛ gbɛ nɔ?
19 Wɔjɛɔ Yesu nɔkwɛmɔ nɔ lɛ mli wɔkaseɔ nibii pii ni yeɔ ebuaa wɔ ni wɔnaa nɔ ni tsuishiŋmɛɛ ji lɛ he jwɛŋmɔ kpakpa. Tsuishiŋmɛɛ gbɛ lɛ bɛ mlɛo. Kɛ wɔmiina akɛ ewa kɛha wɔ akɛ wɔɔŋmɛ wɔtsui shi yɛ kaa ko mli lɛ, miishɛɛ yɛ le ni wɔɔle akɛ eba lɛ nakai nɔŋŋ yɛ Yesu po he lɛ mli. Kɛ wɔɔnyɛ wɔŋmɛ wɔtsui shi kɛyashi naagbee lɛ, belɛ ebaabi ni wɔsɔle shii abɔ kɛha hewalɛwoo. Kɛ aaka wɔ lɛ wɔbaanu he yɛ bei komɛi amli akɛ wɔsaaa mɛi ni sɔleɔ. Shi Yehowa fɔɔ nine etsɛɔ wɔ koni wɔfɔse wɔtsuii wɔshwie ehiɛ ‘ejaakɛ ejwɛŋɔ wɔhe.’ (1 Petro 5:7) Ni yɛ nɔ ni Yehowa ewo shi yɛ he yɛ e-Wiemɔ lɛ mli hewɔ lɛ, eŋɔ gbɛnaa nii efɔ ehe nɔ akɛ ekɛ “hewalɛ ní fa kɛteke nɔ” baaha mɛi ni tsɛɔ lɛ yɛ hemɔkɛyeli mli lɛ.—2 Korintobii 4:7-9.
20 Yɛ bei komɛi amli lɛ ebaabi ni wɔŋmɛ wɔtsui shi yɛ yaafonui amli. Sɛŋmɔtso nɔ piŋmɔ lɛ diɛŋtsɛ jeee nɔ ni baaha Yesu mli afili lɛ. Shi moŋ, miishɛɛ lɛ yɛ nyɔmɔwoo ni akɛma ehiɛ lɛ mli. Yɛ wɔgbɛfaŋ lɛ, ejeee nɔ ni wɔbaakpa gbɛ akɛ wɔmli baafili wɔ ni wɔna miishɛɛ yɛ be fɛɛ mli kɛ aaaka wɔ. (Okɛto Hebribii 12:11 he.) Shi kɛ wɔkɛ wɔhiŋmɛi ma nyɔmɔwoo lɛ nɔ lɛ, wɔbaanyɛ ni ‘wɔbu lɛ miishɛɛ sɔŋŋ’ yɛ be mli ni wɔkɛ shihilɛi ni kaa mɔ waa po miikpe lɛ. (Yakobo 1:2-4; Bɔfoi lɛ Asaji 5:41) Nɔ ni he hiaa ji ni wɔdamɔ shi shiŋŋ—kɛ yɛ yaafonui amli po. Fɛɛ sɛɛ po lɛ, Yesu ekɛɛɛ akɛ, ‘mɔ ni yaafonui faaa lɛ yiwala abaahere,’ shi moŋ, “Mɔ ni hiɛɔ mli kɛyawulaa shi lɛ, lɛ aaahere eyiwala.”—Mateo 24:13.
21. (a) Awoɔ wɔ hewalɛ ni wɔkɛ mɛni afata wɔ tsuishiŋmɛɛ he yɛ 2 Petro 1:5, 6? (b) Mɛɛ sanebimɔi abaasusu he yɛ nikasemɔ ni baanyiɛ enɛ sɛɛ lɛ mli?
21 No hewɔ lɛ tsuishiŋmɛɛ he miihia kɛha yiwalaheremɔ. Shi awoɔ wɔ hewalɛ ni wɔkɛ nyɔŋmɔjamɔ hetuu-kɛhamɔ afata wɔ tsuishiŋmɛɛ lɛ he yɛ 2 Petro 1:5, 6. Mɛni ji nyɔŋmɔjamɔ hetuu-kɛhamɔ? Te ekɔɔ tsuishiŋmɛɛ he ehaa tɛŋŋ, ni te ooofee tɛŋŋ ona enɛ? Abaasusu sanebimɔi nɛɛ ahe yɛ nikasemɔ ni nyiɛ enɛ sɛɛ lɛ mli.
[Shishigbɛ niŋmai]
a Ekolɛ abaanyɛ ana piŋmɔ ni naa wa waa ni Yesu ŋmɛ etsui shi yɛ mli lɛ yɛ anɔkwale ni eji akɛ egbɔmɔtso he nii ni yeɔ emuu lɛ gboi yɛ be mli ni akɛ lɛ tsotsoro sɛŋmɔtso lɛ nɔ lɛ sɛɛ ŋmɛlɛtswaa fioo ko pɛ, yɛ be mli ni ehe bahia ni akumɔ efɔŋ feelɔi ni asɛŋ amɛ yɛ emasɛi lɛ anaji koni amɛgboi oya lɛ mli. (Yohane 19:31-33) Amɛtsɔko jwɛŋmɔŋ kɛ gbɔmɔtsoŋ piŋmɔ ni akɛba Yesu nɔ lɛ eko mli yɛ jenamɔ muu ni ewɔɔɔ ni tsɔ esɛŋmɔ lɛ hiɛ, ekolɛ kɛyashi be mli ni enyɛɛɛ etere lɛ diɛŋtsɛ esɛŋmɔtso lɛ dɔŋŋ lɛ mli.—Marko 15:15, 21.
Te Obaaha Hetoo Oha Tɛŋŋ?
◻ Akɛ aŋmɛ tsui shi lɛ tsɔɔ mɛni?
◻ Mɛni hewɔ tsuishiŋmɛɛ sɔrɔto ko he hiaa Yehowa webii lɛ?
◻ Mɛni ha Hiob nyɛ eŋmɛ etsui shi?
◻ Yesu nɔkwɛmɔ nɔ lɛ yeɔ ebua wɔ ni wɔnaa tsuishiŋmɛɛ he jwɛŋmɔ kpakpa yɛ mɛɛ gbɛ nɔ?
[Mfoniri ni yɔɔ baafa 10]
Ato Maŋtsɛyeli Skul sɔrɔtoi tamɔ enɛ he gbɛjianɔ koni akɛtsɔɔ Kristofoi abii ni ashwie amɛ kɛjɛ skul akɛni amɛkɛ amɛjamɔ miiha Yehowa pɛ lɛ anii
[Mfoniri ni yɔɔ baafa 12]
Akɛni etswa efaishi akɛ ekɛ woo loo bulɛ baaha e-Tsɛ hewɔ Iɛ, Yesu sɔle ebi hewalɛwoo koni enyɛ eŋmɛ etsui shi.