Etsɛŋ—Jeŋ ni Tawuu Bɛ Mli Baaba!

DECEMBER 24, 1914, mli ni obalanyo Ŋleshi asraafonyo ko ni atsɛɔ lɛ Jim Prince nyiɛ kɛtsɔ shikpɔŋ ni jeee mɔ ko nɔ̃ ni akɛfee husu lɛ nɔ koni ekɛ German asraafonyo ko ayawie. German asraafonyo lɛ kɛɛ lɛ akɛ, “Saxonnyo ji mi. Ni bo hu Anglo- Saxonnyo ji bo. Mɛni hewɔ wɔkɛ wɔhe wuɔ ta?” Yɛ afii pii asɛɛ lɛ, Prince jaje akɛ: “Minako nakai sanebimɔ lɛ hetoo lolo.”

Yɛ 1914 otsi ko ni ekaaa mli lɛ, Ŋleshi kɛ German asraafoi kɛ amɛhe bɔ naanyo, amɛtswa bɔɔl, ni amɛke amɛhe Blonya nibii po. Nakai toiŋjɔlɛ be lɛ jeee nɔ ni amɛ nɔyelii lɛ fã. Tatsɛmɛi lɛ sumɔɔɔ ni amɛ asraafoi lɛ ayoo akɛ nakai “henyɛlɔ” lɛ jeee kooloo ni hiɛ yɔɔ la lɛ ni tawuu mli lakamɔi wiemɔi tsɔɔ akɛ nakai eji lɛ. Ŋleshi asraafonyo Albert Moren kai yɛ sɛɛ mli akɛ: “Eji tawuu-kpamɔ lɛ tee nɔ otsi kome ekoŋŋ kulɛ, ebaawa akɛ aaanyɛ aje tawuu lɛ shishi ekoŋŋ.”

Nakai tawuu-kpamɔ ni ba trukaa lɛ tsɔɔ akɛ asraafoi pii ni atsɔse amɛ lɛ shweɔ toiŋjɔlɛ moŋ fe tawuu. Asraafoi pii ni ena nibii ni yɔɔ gbeyei ni tawuu kɛbaa lɛ baakpɛlɛ Spanish abɛbua nɛɛ nɔ: “Ha mɔ ni leee bɔ ni tawuu ji lɛ aya ta.” Ŋwanejee ko bɛ he akɛ nibii amlipɛimɔ ko ni afee yɛ jeŋ fɛɛ yɛ gbɔmɛi sɔrɔtoi ateŋ lɛ baajie lɛ kpo akɛ gbɔmɛi ateŋ mɛi ni fa babaoo sumɔɔ toiŋjɔlɛ fe tawuu. Shi te aaafee tɛŋŋ ni toiŋjɔlɛ ni ashweɔ yɛ je muu fɛɛ nɛɛ anyɛ aba ni etsɔ je ni tawuu bɛ mli hu?

Dani aaagu tawuu lɛ, esa akɛ subaŋi atsake. UN Educational, Scientific, and Cultural Organization lɛ mla gbɛjianɔtoo lɛ jajeɔ akɛ: “Akɛni tawuu jeɔ shishi yɛ gbɔmɛi ajwɛŋmɔ mli hewɔ lɛ, gbɔmɛi ajwɛŋmɔi amli ji he ni esa akɛ ato toiŋjɔlɛ hefamɔ he gbɛjianɔtoo lɛ shishi kɛjɛ.” Ni kɛlɛ, yɛ ŋmɛnɛŋmɛnɛ gbii nɛɛ amli adesai ashihilɛ, ni he ni aheee mɔ ayeee kɛ hetsɛ efa babaoo yɛ mli nɛɛ, miifee nɔ ni awuiyeli miifa babaoo yɛ mli, shi jeee toiŋjɔlɛ.

Ni kɛlɛ, Nyɔŋmɔ diɛŋtsɛ wo shi akɛ, gbi ko baaba ni toiŋjɔlɛ baahe shi yɛ gbɔmɛi ni sumɔɔ jalɛ lɛ ajwɛŋmɔi amli. Ewie kɛtsɔ egbalɔ Yesaia nɔ akɛ: “Ni [Nyɔŋmɔ] eeekojo jeŋmaji lɛ ateŋ, ni eeeka maji babaoo; ni amɛkɛ amɛklantei aaasɔ kɔii, ni amɛkɛ amɛkpɔlɔi hu aaasɔ adedai. Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ!”—Yesaia 2:4.

Toiŋjɔlɛ ni Aaaha Efa yɛ Jwɛŋmɔ lɛ Mli

Ani tsakemɔ yɛ jwɛŋmɔ loo susumɔ mli ni sa kadimɔ waa nɛɛ baanyɛ aba? Ani gbɔmɛi baakase bɔ ni amɛaafee amɛbaa toiŋjɔlɛ yi moŋ fe ni amɛaawo tawuu hiɛ nyam? Susumɔ Wolfgang Kusserow nɔkwɛmɔ nɔ nɛɛ he. Nazibii lɛ fo German obalanyo ni eye afii 20 lɛ yitso yɛ 1942, ejaakɛ ‘ekaseŋ tawuu.’ Mɛni hewɔ ehala akɛ eeegbo? Etsɛ jwɛŋmɔ kɛtee Ŋmalɛ mli shishitoo mlai komɛi anɔ yɛ ewiemɔ ni eŋma efɔ shi lɛ mli akɛ, “Suɔmɔ onaanyo tamɔ bɔ ni osumɔɔ bo diɛŋtsɛ ohe” kɛ “Mɛi fɛɛ ni kɔlɔɔ klante lɛ, klante nɔŋŋ akɛaakpata amɛhiɛ.” (Mateo 22:39; 26:52) Kɛkɛ ni ebi sane nɛɛ tɛ̃ɛ akɛ: “Ani wɔ Bɔlɔ lɛ ha aŋmala enɛɛmɛi fɛɛ ashwie shi aha tsei shi jeee gbɔmɛi?”

Nyɔŋmɔ Wiemɔ ni yɔɔ Biblia lɛ mli lɛ “yɛ hewalɛ” ni no tsirɛ obalanyo Yehowa Odasefonyo nɛɛ koni etiu toiŋjɔlɛ sɛɛ, ni nɔ ni baajɛ mli aba kɔɔɔ he eko. (Hebribii 4:12; 1 Petro 3:11) Shi jeee Wolfgang Kusserow pɛ ji mɔ ni tiu toiŋjɔlɛ sɛɛ yɛ nɛkɛ gbɛ nɔ. Yɛ wolo ni ji The Nazi Persecution of the Churches 1933-45, lɛ mli lɛ, J. S. Conway tsɛ wiemɔi kɛjɛ Nazi nɔyeli lɛ woji atoo hei amli ni yeɔ odase akɛ, akɛ kuu lɛ, Yehowa Odasefoi kpoo akɛ amɛaaya ta. Taakɛ Conway tsɔɔ mli lɛ, shidaamɔ ni yɔɔ ekãa ni amɛkɔ nɛkɛ lɛ tsɔɔ akɛ amɛkɛ amɛwaonaa gbɛi ewo amɛ diɛŋtsɛ amɛgbele woji ashishi.

Yehowa Odasefoi ni yɔɔ ŋmɛnɛ lɛ yaa nɔ amɛtiuɔ toiŋjɔlɛ, ni amɛwiemɔ loo maŋ nɔ ni amɛjɛ kɔɔɔ he eko. Mɛni hewɔ? Ejaakɛ amɛkase kɛjɛ Biblia lɛ mli akɛ esa akɛ Nyɔŋmɔ anɔkwa tsuji lɛ kɛ amɛklantei asɔ kɔii. Alejandro, Argentina obalanyo ko ni fa gbɛ kɛyahi Israel yɛ 1987 mli lɛ baanyɛ aye nɛkɛ anɔkwa sane nɛɛ he odase lɛ diɛŋtsɛ.

Alejandro kɛ afii etɛ hi kibbutz yɛ be mli ni ekaseɔ nii yɛ univɛsiti ko ni agbɛnɛ etsuɔ nii yɛ hotɛl kɛ niyeli hei sɔrɔtoi lɛ. Nɛkɛ be nɛɛ mli eje Biblia lɛ kanemɔ shishi ni eetao yiŋtoo kwraa ni yɔɔ shihilɛ mli. Nɔ ni fe fɛɛ lɛ, eeshwe ni ena jeŋ ko ni gbɔmɛi baanyɛ ana toiŋjɔlɛ kɛ jalɛ saneyeli mli ŋɔɔmɔ. Alejandro—Yudanyo lɛ—kɛ Yudafoi kɛ Arabiabii tsu nii kutuu shi esumɔɔɔ ni ekɛ ehe bɔɔ kuu ko he.

Afi 1990 mli ni enaanyo ko ni kɛ Yehowa Odasefoi kaseɔ nii fɔ Alejandro nine gbi ko kɛtee gbi kome kpee yɛ Haifa. Beni enaa kpɛ ehe yɛ bɔ ni Yudafoi kɛ Arabiabii 600 kɛ amɛhe bɔɔ naanyo ni amɛfutuɔ yɛ miishɛɛ mli yɛ kpee lɛ shishi lɛ, ekɛɛ lɛ diɛŋtsɛ ehe akɛ, ‘Nɛkɛ ji gbɛ ni ja ni esa akɛ gbɔmɛi atsɔ nɔ ahi shi.’ Nyɔji ekpaa pɛ mli ni ebatsɔ Odasefonyo, ni amrɔ nɛɛ etuu ebe ni fa ewo Biblia mli shɛɛ sane ni kɔɔ toiŋjɔlɛ he lɛ shiɛmɔ mli.

Bɔ ni Nyɔŋmɔ kɛ Toiŋjɔlɛ Baaba Aha

Bɔ ni nɛkɛ nɔkwɛmɔ nii nɛɛ naa mɔ nɔ hewalɛ ehaa lɛ fɛɛ sɛɛ lɛ, nibii ni yɔɔ sɔrɔto shi jeee bɔ ni nibii yaa nɔ yɛ je lɛŋ ŋmɛnɛ lɛ nɛ. Eyɛ mli akɛ ŋmɛnɛŋmɛnɛ gbɛjianɔtoo nɛɛ kɛ amɛnaabu folo wieɔ toiŋjɔlɛ he moŋ, shi eshwãa tawuu dumɔwui moŋ nɔ nu. Ani obaasumɔ ni ohi shi yɛ gbɛjegbɛ ko ni shiai ni yɔɔ he lɛ amlibii fiteɔ shika ni amɛnaa lɛ mli oha mlijaa 7 kɛyashi 16 yɛ tũi kɛ nibii ni akɛbuɔ shiai ahe lɛ nɔ? Enɛ ji nɔ ni jeŋmaji lɛ feɔ yɛ nyɛsɛɛ afii nɛɛ amli yɛ tawuu he nibii amli. Belɛ ebɛ naakpɛɛ mɔ akɛ Yesaia gbalɛ lɛ jieɔ lɛ kpo akɛ, adesai fɛɛ kɛ amɛklantei esɔŋ kɔii ja Nyɔŋmɔ ‘ejaje saji yɛ maji pii ateŋ’ da. Mɛɛ gbɛ nɔ eeetsɔ efee enɛ yɛ?

Nɔ titri ni eeetsɔ nɔ ejaje saji ji Yehowa Nyɔŋmɔ Maŋtsɛyeli lɛ. Gbalɔ Daniel gba efɔ shi akɛ ‘Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ.’ Ni ekɛfata he kɛkɔ Maŋtsɛyeli nɛɛ he akɛ, “eeejwara [je lɛŋ maŋtsɛyelii] nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ, eeedamɔ shi kɛaate naanɔ.” (Daniel 2:44) Nɛkɛ wiemɔi nɛɛ jieɔ lɛ kpo akɛ Nyɔŋmɔ Maŋtsɛyeli lɛ baaye shikpɔŋ muu lɛ fɛɛ nɔ. Maŋtsɛyeli lɛ baatsɔ maji ateŋ husui ajiemɔ nɔ eha akaŋshii sɛɛ afo. Agbɛnɛ hu, akɛni eshishibii lɛ baafee “gbɔmɛi ni Yehowa etsɔɔ amɛ nii” hewɔ lɛ, amɛ toiŋjɔlɛ “aaafa babaoo.” (Yesaia 54:13, New World Translation.) Belɛ ebɛ naakpɛɛ mɔ akɛ Yesu kɛɛ wɔ akɛ wɔsɔle wɔha Nyɔŋmɔ akɛ: “Ha omaŋtsɛyeli lɛ aba”!—Mateo 6:10, NW.

Jamɔ Mli Gbɛtsii Nii lɛ Ajiemɔ

Nyɔŋmɔ baajie jamɔ mli nibii ni tsiɔ toiŋjɔlɛ gbɛ lɛ hu kɛya. Jamɔ ji nɔ ni ha tawuu ni sɛɛ kɛ fe fɛɛ yɛ yinɔsane mli—Crusades, loo “Ta Krɔŋkrɔŋi,” ni Paapa Urban II je shishi yɛ 1095 Ŋ.B.a lɛ ba. Osɔfoi titri ehe gbɛi yɛ tawuu ni awoɔ he hewalɛ ni amɛhaa gbɔmɛi pii fiɔ sɛɛ lɛ mli yɛ wɔ afii oha lɛ mli, kɛ nɔ ni ji je lɛŋ nɔ po sɛɛ lɛ mli.

Yɛ be mli ni ewieɔ nɔ ni sɔlemɔi ni kɛ Kristo gbɛi tsɛɔ amɛhe lɛ tsu yɛ Jeŋ Ta I be lɛ mli lɛ he lɛ, yinɔsaneŋmalɔ Paul Johnson ŋma akɛ: “Osɔfoi nyɛɛɛ, ni yɛ bei pii amli lɛ amɛsumɔɔɔ ni amɛkɛ Kristofoi ahemɔkɛyeli yeɔ maŋhedɔɔ hiɛ. Amɛteŋ mɛi pii kɔ gbɛ ni waaa lɛ, ni amɛkɛɛ Kristojamɔ tamɔ maŋhedɔɔ nɔŋŋ. Awo asraafoi Kristofoi ni jɛ jamɔi sɔrɔtoi fɛɛ mli lɛ hewalɛ ni amɛgbegbee amɛhe yɛ amɛ Yiwalaherelɔ lɛ gbɛi amli.”

Jamɔ efee babaoo yɛ tawuu he hewalɛ ni awoɔ lɛ mli fe ni eeewo toiŋjɔlɛ he hewalɛ. Yɛ anɔkwale mli lɛ, Biblia lɛ feɔ jamɔ he mfoniri akɛ “yoo ajwamaŋ” ni kɛ ehe haa akɛ jeŋ nɔyelɔi akɔnɔ nii. (Kpojiemɔ 17:1, 2) Nyɔŋmɔ jajeɔ akɛ lɛ titri ji mɔ ni mɛi ni agbe amɛ yɛ shikpɔŋ lɛ nɔ lɛ fɛɛ ala he sɔ ka enɔ. (Kpojiemɔ 18:24) No hewɔ lɛ, Yehowa baajie nɛkɛ toiŋjɔlɛ gbɛtsii nii nɛɛ kɛya shikome nyɔŋlo.—Kpojiemɔ 18:4, 5, 8.

Kɛ nibii ni gbalaa mɛi amli tamɔ maŋkwramɔ kɛ apasa jamɔ bɛ dɔŋŋ po lɛ, toiŋjɔlɛ efeŋ shweshweeshwe kɛ ajieee mɔ ni tsirɛɔ tawuu yisɛɛ fe fɛɛ—Satan Abonsam, kɛyaaa lɛ. No ji naagbee nii ni Nyɔŋmɔ Maŋtsɛyeli lɛ baatsu yɛ egbɛjianɔtoo ni baaha ekɛ toiŋjɔlɛ diɛŋtsɛ aba shikpɔŋ lɛ nɔ fɛɛ lɛ mli. Biblia mli wolo ni ji Kpojiemɔ lɛ tsɔɔ mli akɛ “abaamɔ” Satan ni “abaafi lɛ” ni “abaashɛ lɛ afɔ bu kwɔŋkwɔŋ lɛ mli” koni “ekashishiu jeŋmaji lɛ dɔŋŋ.” Yɛ no sɛɛ lɛ abaakpata ehiɛ kwraa.—Kpojiemɔ 20:2, 3, 10, NW.

Biblia mli shiwoo ni kɔɔ tawuu naagbee he lɛ jeee lamɔ ko kɛkɛ. Ato Yehowa Nyɔŋmɔ gbɛjianɔtoo kɛha toiŋjɔlɛ lɛ he gbɛjianɔ ama shi momo. Ato E-Maŋtsɛyeli lɛ ama shi yɛ ŋwɛi ni efee klalo akɛ eeetsu nibii krokomɛi lolo koni akɛma je muu fɛɛ toiŋjɔlɛ nɔ mi. Dani enɛ aaaba lɛ, Yehowa Odasefoi akpekpei abɔ, ni fiɔ nɛkɛ ŋwɛi nɔyeli nɛɛ sɛɛ lɛ ekase bɔ ni ahiɔ shi yɛ toiŋjɔlɛ mli.

Belɛ eyɛ faŋŋ akɛ, wɔyɛ yiŋtoi kpakpai ni wɔɔdamɔ nɔ wɔhe wɔye akɛ tawuu jeee nii ni esa akɛ eba kɛ̃ ni anyɛŋ akpa. Nɔ ni hi titri hu lɛ, wɔbaanyɛ wɔkpa gbi ni ebɛŋkɛ ni Yehowa baaha tawuu akpa kwraa kɛya naanɔ lɛ gbɛ. (Lala 46:10) Etsɛŋ ni ebaakwɛ koni ana je ni tawuu bɛ mli.

[Shishigbɛ niŋmai]

[Mfoniri ni yɔɔ baafa 7]

Obaanyɛ ohi shi yɛ jeŋ hee ni tawuu bɛ mli lɛ mli