“Mɛni Baafee Beni Oba Lɛ He Okadi?”
“Mɛɛ be mli nibii nɛɛ baaba, ni mɛni baafee beni oba lɛ kɛ nibii agbɛjianɔtoo nɛɛ naagbee lɛ he okadi?”—MATEO 24:3, New World Translation.
1, 2. Mɛni tsɔɔ akɛ gbɔmɛi yɛ wɔsɛɛ be he miishɛɛ?
MƐI pii yɛ wɔsɛɛ be he miishɛɛ. Ani bo hu nakai? Professor Alvin Toffler ŋma yɛ “gbɛjianɔtoi ni amɛtuu amɛhe amɛha wɔsɛɛ be he nikasemɔ trukaa ni faa babaoo” lɛ ahe yɛ ewolo, Future Shock, lɛ mli. Ekɛfata he akɛ: ‘Wɔna kui loo gbɛjianɔtoi ni kɛ ŋaawoo kɛ gbɛtsɔɔmɔ haa yɛ wɔsɛɛ be he; woji ni kɔɔ wɔsɛɛ be he ni jeɔ kpo yɛ England, France, Italy, Germany kɛ U. S. Amerika; university nikasemɔi ni gbɛɔ shwaa ni kɔɔ wɔsɛɛ be he saji ni agbaa afɔɔ shi.’ Toffler mu sane lɛ naa akɛ: “Shi, mɔ ko mɔ ko bɛ ni baanyɛ ‘ale’ wɔsɛɛ be kɛmɔ shi.”
2 Wolo, Signs of Things to Come lɛ kɛɔ akɛ: “Dɛ̃-kwɛmɔ, kuloi loo ashwishwɛi amlikwɛmɔ, ŋulamiiaŋkwɛmɔ, shwɛmɔ woji akanemɔ, kɛ I Ching lɛ fɛɛ ji nifeemɔ gbɛi ni yɔɔ hwanyaŋŋ koni wɔná bɔ ni wɔ wɔsɛɛ be baaji lɛ he jwɛŋmɔ ko.” Shi, ni wɔɔtsɔ wɔhe kɛaaya gbɔmɛi anifeemɔ gbɛi ahe lɛ, ebaahi moŋ akɛ wɔɔkwɛ jɛɛhe ni yiŋkɔshikɔshi-feemɔ ko bɛ he lɛ—Yehowa.
3. Mɛni hewɔ eja ákɛ akɛ hiɛ aaafɔ Nyɔŋmɔ nɔ kɛha wɔsɛɛ be he nilee lɛ?
3 Anɔkwa Nyɔŋmɔ lɛ jaje akɛ: “Lɛlɛŋ, bɔ ni misusu lɛ, nakai ebaaba mli, ni bɔ ni mito miyiŋ lɛ, nakai ebaama shi.” (Yesaia 14:24, 27; 42:9) Hɛɛ, Yehowa enyɛ ewo adesai aŋaa yɛ nɔ ni baaba he, ni efɔɔ nakai feemɔ kɛtsɔɔ enaawielɔi ni ji adesai anɔ. Gbalɔi nɛɛ ateŋ mɔ kome ŋma akɛ: “Yehowa efeŋ nɔ ko, akɛ ja ejie eteemɔŋ sane lɛ kpo etsɔɔ etsuji, gbalɔi lɛ, da.”—Amos 3:7, 8, (NW); 2 Petro 1:20, 21.
4, 5. (a) Mɛni hewɔ Yesu baanyɛ aye abua yɛ wɔsɛɛ be he lɛ? (b) Mɛɛ saji ni kɔɔ nibii pii ahe ebɔfoi lɛ bi?
4 Yesu Kristo ji klɛŋklɛŋ Nyɔŋmɔ gbalɔ ni fe fɛɛ. (Hebribii 1:1, 2) Nyɛhaa wɔgbalaa wɔjwɛŋmɔ kɛyaa Yesu gbalɛi titrii ni gbaa nibii ni yaa nɔ kɛbɔleɔ wɔhe bianɛ lɛ ateŋ ekome nɔ. Gbalɛ nɛɛ hu haa wɔleɔ nibii ni etsɛŋ ni baaba yɛ be mli ni ŋmɛnɛ yiwalɛ gbɛjianɔtoo nɛɛ baa enaagbee ni Nyɔŋmɔ kɛ shikpɔŋ nɔ paradeiso toɔ najiaŋ lɛ.
5 Yesu ye lɛ diɛŋtsɛ ehe odase akɛ gbalɔ ji lɛ. (Marko 6:4; Luka 13:33; 24:19; Yohane 4:19; 6:14; 8:17) No hewɔ lɛ, anuɔ nɔ hewɔ ni ebɔfoi lɛ baanyɛ abi lɛ wɔsɛɛ be he sane yɛ be mli ni eta Mu Gɔŋ lɛ ni haa anaa Yerusalem lɛ nɔ lɛ, akɛ: “Mɛɛ be mli nibii nɛɛ baaba, ni mɛni baafee beni oba lɛ kɛ nibii agbɛjianɔtoo nɛɛ naagbee lɛ he okadi?”—Mateo 24:3; Marko 13:4, NW.
6. Mɛni ji tsakpaa ni ka Mateo 24, Marko 13, kɛ Luka 21 teŋ; ni mɛɛ sanebimɔ esa akɛ wɔnya he waa?
6 Obaana amɛ sanebimɔ lɛ kɛ Yesu hetoo lɛ yɛ Mateo yitso 24, Marko yitso 13, kɛ Luka yitso 21.a Saji lɛ je amɛhe yɛ gbɛi pii anɔ, shi esoro eko fɛɛ eko. Akɛ nɔkwɛmɔ nɔ lɛ, Luka pɛ ji mɔ ni tsi ‘gbele helai ni baaba hei sɔrɔtoi’ lɛ ta. (Luka 21:10, 11; Mateo 24:7; Marko 13:8) Yɛ sane naatsɔɔmɔ ni ja naa lɛ, esa akɛ wɔbi akɛ, Ani Yesu miigba saji ni baaba yɛ etoibolɔi lɛ awala be mli pɛ, aloo ekɛ wɔbe nɛɛ kɛ nɔ ni yɔɔ wɔsɛɛ be kɛha wɔ lɛ fata he?
Bɔfoi lɛ Miisumɔ ni Amɛle
7. Mɛni bɔfoi lɛ je gbɛ amɛbi he sane, shi te Yesu hetoo lɛ mli lɛɛ ha tɛŋŋ?
7 Beni eshwɛ gbii fioo ni aaagbe lɛ lɛ, Yesu jaje akɛ Nyɔŋmɔ ekpoo Yerusalem, Yudafoi amaŋtiase lɛ. Abaakpata maŋtiase lɛ kɛ esɔlemɔtsu fɛfɛo lɛ hiɛ. Kɛkɛ ni bɔfoi lɛ ateŋ mɛi komɛi bi beni ‘Yesu eba lɛ kɛ nibii agbɛjianɔtoo lɛ naagbee he okadi.’ (Mateo 23:37–24:3) Ŋwanejee ko bɛ he akɛ nɔ ni yɔɔ amɛjwɛŋmɔ mli titri ji Yudafoi agbɛjianɔtoo lɛ kɛ Yerusalem, ejaakɛ amɛnuuu bɔ ni nii ni ka amɛhiɛ lɛ dalɛ ji lɛ shishi. Shi beni ehaa amɛ hetoo lɛ Yesu kwɛ nii kɛteke nɔ ni ba aahu kɛyashi afi 70 Ŋ.B. ni nakai be lɛ hu fata he, beni Romabii lɛ kpata Yerusalem hiɛ lɛ.—Luka 19:11; Bɔfoi lɛ Asaji 1:6, 7.
8. Mɛni ji nibii ni baaba ni Yesu gba efɔ shi lɛ ekomɛi?
8 Taakɛ obaanyɛ okane yɛ Sanekpakpai etɛ lɛ amli saji amli lɛ, Yesu wie maŋ ni aaate shi awo maŋ kɛ maŋtsɛyeli ni aaate shi awo maŋtsɛyeli, hɔmɔ, shikpɔŋhosomɔi, nibii ni yɔɔ gbeyei, kɛ ŋwɛi okadii ahe. Yɛ afii ni baka be ni Yesu kɛ nakai okadi lɛ ha (33 Ŋ.B.) kɛ Yerusalem amaŋfɔ feemɔ (66-70 Ŋ.B.) teŋ lɛ, amale gbalɔi kɛ amale Kristoi baate shi. Yudafoi lɛ baawa Kristofoi ni shiɛɔ Yesu shɛɛ sane lɛ ayi.
9. Mɛɛ gbɛ nɔ Yesu gbalɛ lɛ ba mli yɛ Ŋ.B. klɛŋklɛŋ afii oha lɛ mli yɛ?
9 Okadi lɛ mli nibii nɛɛ ba mli diɛŋtsɛ, taakɛ yinɔsaneŋmalɔ Flavius Josephus maa nɔ mi lɛ. Eŋma akɛ, dani Romabii lɛ aaabatutua maŋ lɛ, apasa Mesiai kanya atuatsemɔ. Shikpɔŋhosomɔi wuji ba Yudea kɛ hei krokomɛi. Tawuui fɛlɛ yɛ Roma Maŋtsɛyeli lɛ mli hei sɔrɔtoi. Ani hɔmɔ ni naa wa ba? Hɛɛ, nakai ni. (Okɛto Bɔfoi lɛ Asaji 11:27-30 he.) Ni Maŋtsɛyeli shiɛmɔ nitsumɔ lɛ hu? Beni shɛɔ afi 60 loo 61 Ŋ.B., beni aŋma Kolosebii awolo lɛ, no mli lɛ anu Nyɔŋmɔ Maŋtsɛyeli lɛ he ‘hiɛnɔkamɔ sanekpakpa’ lɛ he kɛyashɛ shɔŋŋ yɛ Afrika, Asia, kɛ Europa.b—Kolosebii 1:23.
“NO DANI” Naagbee Lɛ
10. Mɛni hewɔ esa akɛ wɔkadi Hela wiemɔ toʹte, lɛ, ni mɛni etsɔɔ?
10 Yesu kɛ saji ni baaba lɛ ha tamɔ nɔ ni ato bɔ ni esa akɛ amɛba mli amɛha lɛ anaa. Ekɛɛ: “Aaashiɛ maŋtsɛyeli lɛ he sanekpakpa nɛɛ . . . ni no dani naagbee lɛ baaba.” Ŋleshi Bibliai fɔɔ wiemɔ “no dani” kɛ nitsumɔ kɛ shishinumɔ kuku ni ji “no hewɔ lɛ” loo “kɛkɛ lɛ.” (Marko 4:15, 17; 13:23, NW) Shi, “no dani” ni yɔɔ Mateo 24:14, (NW) lɛ damɔ Hela feemɔ-wiemɔ mligbalamɔ ni ji toʹtec nɔ. Hela wiemɔ he nilelɔi tsɔɔ mli akɛ toʹte ji “feemɔ-wiemɔ mligbalamɔ ni tsɔɔ be” ni akɛtsu nii koni “akɛkpa nɔ ni nyiɛɔ sɛɛ yɛ be naa lɛ hiɛ” loo “ni akɛjie sane ni nyiɛ sɛɛ baa lɛ kpo.” No hewɔ lɛ Yesu gba akɛ Maŋtsɛyeli shiɛmɔ baaya nɔ, ni no dani (‘yɛ no sɛɛ lɛ’ loo ‘kɛkɛ lɛ’) “naagbee lɛ” baaba. Mɛɛ naagbee?
11. Yesu gbala jwɛŋmɔ kɛtee nibii ni kɔɔ Yerusalem hiɛkpatamɔ lɛ he lɛ nɔ pɔtɛɛ yɛ mɛɛ gbɛ nɔ?
11 Abaanyɛ ana Yesu gbalɛ lɛ mlibaa kome yɛ nibii ni ba ni yafee Yudafoi agbɛjianɔtoo lɛ naagbee lɛ mli. Tai, shikpɔŋhosomɔi, hɔmɔ, kɛ nibii krokomɛi ni Yesu gba lɛ ba mli yɛ afii nyɔŋmai etɛ mli. Kɛlɛ, kɛ wɔje shishi kɛjɛ Mateo 24:15, Marko 13:14, and Luka 21:20 lɛ, wɔkaneɔ nibii ni baaba ni kɔɔ hiɛkpatamɔ ni ebɛŋkɛ kpaakpa he, beni naagbee lɛ ebɛŋkɛ kpaakpa lɛ.—Kadimɔ liamɔ ni atsurɔ yɛ tao lɛ nɔ lɛ.
12. Mateo 24:15 mlibaa kɔɔ Roma asraafoi lɛ ahe yɛ mɛɛ gbɛ nɔ?
12 Yɛ be mli ni etsuɔ Yudafoi atuatsemɔ ko yɛ afi 66 Ŋ.B. lɛ he nii lɛ, Romabii ni yɔɔ Cestius Gallus shishi lɛ yatutua Yerusalem, ni amɛbɔle maŋtiase ni Yudafoi lɛ buɔ lɛ krɔŋkrɔŋ lɛ he. (Mateo 5:35) Yɛ tutuamɔi ni Yudafoi lɛ kɛyanina amɛ lɛ fɛɛ sɛɛ lɛ, Romabii lɛ kɛ hewalɛ bote maŋtiase lɛ mli. Kɛkɛ ni amɛje ‘shidaamɔ shishi yɛ he krɔŋkrɔŋ lɛ,’ ni enɛ ha Yesu gbalɛ ni yɔɔ Mateo 24:15 kɛ Marko 13:14 ba mli anɔkwale. Kɛkɛ ni naakpɛɛ nii ko ba. Eyɛ mli akɛ Romabii lɛ ebɔle maŋtiase lɛ he kɛkpe moŋ, shi amɛgbala amɛhe shi trukaa. Amrɔ nɔŋŋ ni Kristofoi lɛ yɔse Yesu gbalɛ lɛ mlibaa, ni Romabii lɛ ni ku amɛsɛɛ lɛ ha amɛna hegbɛ amɛjo foi kɛjɛ Yudea kɛtee gɔji lɛ anɔ kɛfo Yordan. Yinɔsane kɛɔ akɛ amɛfee nakai.
13. Mɛni hewɔ Kristofoi lɛ nyɛ amɛbo Yesu kɔkɔbɔɔ akɛ amɛjo foi lɛ toi lɛ?
13 Shi kɛji akɛ Romabii lɛ gbala amɛhe shi kɛjɛ Yerusalem he lɛ, mɛni hewɔ ehe hiaa ni mɔ ko ajo foi? Yesu wiemɔi lɛ tsɔɔ akɛ nɔ ni ba lɛ yeɔ odase akɛ ‘Yerusalem amaŋfɔ feemɔ lɛ eshɛ.’ (Luka 21:20) Hɛɛ, amaŋfɔ feemɔ. Egba ‘amanehulu ni eko ni tamɔ nakai bako da, ni eko baŋ ni tamɔ nakai hu dɔŋŋ’ lɛ he sane efɔ shi. Aaafee afii etɛ kɛ fa sɛɛ, yɛ afi 70 Ŋ.B. lɛ, “amanehulu babaoo” ko ni jɛ Romabii asraafoi ni yɔɔ Tatsɛ Tito shishi lɛ adɛŋ ba Yerusalem nɔ. (Mateo 24:21; Marko 13:19) Shi mɛni hewɔ esa akɛ Yesu atsɔɔ enɛ mli akɛ amanehulu babaoo ni anako nɔ da ni eko baŋ ni tamɔ nakai dɔŋŋ lɛ?
14. Mɛni hewɔ wɔbaanyɛ wɔkɛɛ akɛ nɔ ni ba Yerusalem nɔ yɛ afi 70 Ŋ.B. lɛ ji “amanehulu babaoo” ni eko bako ni tamɔ no, ni no sɛɛ hu eko baŋ dɔŋŋ lɛ?
14 Babilonbii lɛ kpata Yerusalem hiɛ yɛ afi 607 B.C.E., ni tawuu ni yɔɔ gbeyei etee nɔ yɛ maŋtiase lɛ mli yɛ wɔ afii oha nɛɛ mli. Kɛlɛ, nɔ ni ba yɛ afi 70 Ŋ.B. lɛ ji amanehulu babaoo ko ni yɔɔ sɔrɔto. Tito asraafoi lɛ ye Yudafoi lɛ anɔ kunim yɛ tawuu ni tee nɔ yɛ nyɔji enumɔ loo nɔ̃ lɛ mli. Mɛi ni amɛgbe amɛ lɛ shɛɔ aaafee 1,100,000 ni amɛloo nɔ ni miihe ashɛ 100,000 kɛtee nomŋɔɔ mli. Agbɛnɛ hu Romabii lɛ kumɔ Yerusalem. Enɛ ye odase akɛ Yudafoi agbɛjianɔtoo ni ji tsutsu jamɔ ni akpɛlɛ nɔ̃, ni yaa nɔ yɛ sɔlemɔwe lɛ eba naagbee kwraa. (Hebribii 1:2) Hɛɛ, abaanyɛ awie nibii ni ba yɛ afi 70 Ŋ.B. lɛ ahe akɛ ‘amanehulu ni anako nɔ da [yɛ nakai maŋtiase lɛ, maŋ lɛ, kɛ gbɛjianɔtoo] lɛ nɔ, kɛjɛ jeŋ shishijee mli, dabi, ni asaŋ anaŋ eko gbi ko gbi ko dɔŋŋ.’—Mateo 24:21.d
Taakɛ Agba Afɔ Shi lɛ, Babaoo Baanyiɛ Sɛɛ Aba
15. (a) Mɛni nibii Yesu gba akɛ ebaaba yɛ Yerusalem amanehulu lɛ sɛɛ? (b) Yɛ Mateo 24:23-28 hewɔ lɛ, te esa akɛ wɔmu sane naa yɛ Yesu gbalɛ lɛ mlibaa he wɔha tɛŋŋ?
15 Shi Yesu haaa egbalɛ lɛ akɔ klɛŋklɛŋ afii oha lɛ amanehulu lɛ pɛ he. Biblia lɛ tsɔɔ akɛ babaoo baanyiɛ nakai amanehulu lɛ sɛɛ, taakɛ bɔ ni wiemɔ toʹte, loo “no mli lɛ,” ni akɛtsu nii yɛ Mateo 24:23 kɛ Marko 13:21 lɛ tsɔɔ lɛ. Mɛni baaba yɛ be ni nyiɛ afi 70 Ŋ.B. sɛɛ lɛ mli? Yɛ amanehulu ni ba Yudafoi agbɛjianɔtoo lɛ nɔ lɛ sɛɛ lɛ, amale Kristoi kɛ amale gbalɔi pii baate shi. (Okɛ Marko 13:6 ato 13:21-23 he.) Yinɔsane maa nɔ mi akɛ gbɔmɛi ni tamɔ nɛkɛ ete shi yɛ afii ohai abɔ lɛ amli yɛ Yerusalem hiɛkpatamɔ yɛ afi 70 Ŋ.B. lɛ sɛɛ, eyɛ mli akɛ amɛlakako gbɔmɛi ni yɔɔ mumɔŋ ninamɔ ni yɔɔ faŋŋ, ni kpaa “ba ni” Kristo “eba” lɛ gbɛ lɛ. (Mateo 24:27, 28) Ni kɛlɛ, nibii ni ba yɛ afi 70 Ŋ.B. amanehulu babaoo lɛ sɛɛ lɛ tsɔɔ nɔ kome akɛ Yesu miikwɛ nii kɛmiiteke nakai amanehulu lɛ, ni ji eshishijee mlibaa kɛkɛ lɛ.
16. Luka 21:24 kɛ mɛni fataa Yesu gbalɛ lɛ he, ni mɛni enɛ tsɔɔ?
16 Kɛ wɔkɛ Mateo 24:15-28 kɛ Marko 13:14-23 to Luka 21:20-24 he lɛ, wɔnaa nɔ ni ji enyɔ ni tsɔɔ akɛ Yesu gbalɛ lɛ tekeɔ Yerusalem hiɛkpatamɔ lɛ. Kaimɔ akɛ Luka pɛ tsi gbele helai ata. Ni nakai nɔŋŋ lɛ pɛ ji mɔ ni kɛ Yesu wiemɔi nɛɛ gbe fã nɛɛ naa: “Ni jeŋmaji lɛ aaanaanaa Yerusalem nɔ kɛyashi be mli ni jeŋmaji abe ni ato (NW) [“Jeŋmaji abe”] lɛ aaashɛ.”e (Luka 21:24) Babilonbii lɛ jie Yudafoi anaagbee maŋtsɛ lɛ kɛjɛ sɛi lɛ nɔ yɛ afi 607 D.Ŋ.B., ni yɛ no sɛɛ lɛ, anaanaa Yerusalem, ni damɔ shi kɛha Nyɔŋmɔ maŋtsɛyeli lɛ nɔ. (2 Maŋtsɛmɛi 25:1-26; 1 Kronika 29:23; Ezekiel 21:25-27) Yesu tsɔɔ yɛ Luka 21:24 akɛ shihilɛ lɛ baaya nɔ kɛyabote wɔsɛɛ be mli kɛyashi be aaaba ni Nyɔŋmɔ aaato Maŋtsɛyeli ama shi ekoŋŋ.
17. Mɛni ni gbeɔ yi feɔ etɛ tsɔɔ akɛ Yesu gbalɛ lɛ baashɛ wɔsɛɛ be mli shɔŋŋ?
17 Naa nɔ ni ji etɛ ni tsɔɔ akɛ Yesu miitsɔɔ emlibaa hu yɛ wɔsɛɛ be shɔŋŋ: Taakɛ Ŋmalɛi lɛ tsɔɔ lɛ, Mesia lɛ baagbo ni abaatee lɛ shi, yɛ no sɛɛ lɛ ebaata Nyɔŋmɔ ninejurɔ nɔ kɛyashi be mli ni Tsɛ lɛ aaatsu lɛ koni eyaye lumɔ. (Lala 110:1, 2) Yesu wie e-Tsɛ lɛ ninejurɔ nɔ ni eeeta lɛ he. (Marko 14:62) Ni bɔfo Paulo ma nɔ mi akɛ Yesu ni atee lɛ shi lɛ yɛ Yehowa ninejurɔ nɔ eemɛ be mli ni eeetsɔ Maŋtsɛ kɛ Nyɔŋmɔ Oweletɔlɔ loo Blafo.—Romabii 8:34; Kolosebii 3:1; Hebribii 10:12, 13.
18, 19. Te Kpojiemɔ 6:2-8 kɔɔ gbalɛ ni tamɔ nakai ni yɔɔ Sanekpakpai lɛ amli lɛ ahe ehaa tɛŋŋ?
18 Kɛha nɔ ni ji ejwɛ ni gbeɔ yiŋkɔshikɔshi-feemɔi fɛɛ naa akɛ Yesu gbalɛ ni kɔɔ nibii agbɛjianɔtoo lɛ naagbee he lɛ baa mli kɛtekeɔ klɛŋklɛŋ afii oha lɛ, wɔbaanyɛ wɔgbele Kpojiemɔ yitso 6. Yɛ be mli ni bɔfo Yohane ŋmaa afii nyɔŋmai abɔ yɛ afi 70 Ŋ.B. sɛɛ lɛ, etsɔɔ okpɔŋɔ nɔtaralɔi anifeemɔi ni gbalaa mɔ jwɛŋmɔ lɛ mli. (Kpojiemɔ 6:2-8) Nɛkɛ gbalɛ mfoniri ni boteɔ “Nuŋtsɔ lɛ gbi lɛ”—beni eba lɛ—mli lɛ haa ayɔseɔ wɔ afii ohai 20 nɛɛ akɛ be ni tawuu babaoo baaba (kuku 4), hɔmɔ babaoo baaba (kukuji 5 kɛ 6), kɛ “gbele hela” (kuku 8). Eka shi faŋŋ akɛ enɛ tamɔ nɔ ni Yesu wie yɛ Sanekpakpai lɛ amli lɛ pɛpɛɛpɛ ni eyeɔ odase akɛ egbalɛ lɛ yɛ emlibaa ni da yɛ “Nuŋtsɔ lɛ gbi lɛ” ni wɔyɔɔ mli nɛɛ mli.—Kpojiemɔ 1:10.
19 Gbɔmɛi ni le nibii ni yaa nɔ lɛ kpɛlɛɔ nɔ akɛ okadi ni nibii pii yɔɔ mli ni agba afɔ shi yɛ Mateo 24:7-14 kɛ Kpojiemɔ 6:2-8 lɛ eje kpo kɛjɛ be mli ni klɛŋklɛŋ jeŋ ta lɛ fɛ yɛ 1914. Yehowa Odasefoi etswa adafi yɛ je lɛŋ fɛɛ akɛ Yesu gbalɛ lɛ miina emlibaa ni ji enyɔ ni da bianɛ, taakɛ tai ni yɔɔ gbeyei, shikpɔŋhosomɔi ni fiteɔ nii babaoo, hɔmɔ ni kɛ gbelei baa, kɛ helai ni egbɛ eshwa yeɔ he odase lɛ. U.S.News & World Report (July 27, 1992) wie yɛ naagbee nɔ nɛɛ he akɛ: “AIDS hela ni tsɛŋeɔ mɔ lɛ . . . miiloo helatsɛmɛi akpekpei abɔ kɛmiiya amɛgbele mli ni etsɛŋ ni ebaatsɔ tsɛŋemɔ hela ni jara wa ni fiteɔ nii fe fɛɛ yɛ yinɔsane mli. Tsɛŋemɔ hela ko ni atsɛɔ lɛ Black Death ni haa hewolo lɛ hiɛ feɔ turuntarai yɛ gbele mli lɛ gbe gbɔmɛi aaafee akpekpei 25 ni miina nɔ̃ yɛ afii ohai 14 lɛ mli. Shi beni aaashɛ afi 2000 lɛ, gbɔmɛi ni amɛyifalɛ aaafee kɛjɛ akpekpei 30 kɛmiiya akpekpei 110 baafee mɛi ni HIV, ni ji muawai ni kɛ AIDs baa lɛ etsɛŋe amɛ, no mli lɛ etee hiɛ kɛjɛ ŋmɛnɛ nɔ ni ji akpekpei 12 lɛ he. Akɛni tsamɔ bako lolo hewɔ lɛ, gbele kã gbɔmɛi nɛɛ fɛɛ ahiɛ.”
20. Mateo 24:4-22 shishijee mlibaa lɛ baakɔ mɛɛ nibii ahe, shi mɛɛ emlibaa krokomɛi hu yɔɔ faŋŋ?
20 Belɛ te wɔbaamu bɔ ni Yesu ha bɔfoi lɛ asanebimɔ lɛ hetoo eha lɛ naa wɔha tɛŋŋ? Egbalɛ lɛ gba nibii ni baaba mli anɔkwale kɛyashi Yerusalem hiɛkpatamɔ lɛ mli, ni etsi nibii komɛi ni baanyiɛ afi 70 Ŋ.B. lɛ sɛɛ aba lɛ ata. Shi enɛɛmɛi ateŋ babaoo baana amɛmlibaa ni ji enyɔ kɛ nɔ ni da yɛ wɔsɛɛ be mli, ni nɔ ni baajɛ mli aba ji amanehulu kpeteŋkpele ni kɛ ŋmɛnɛŋmɛnɛ yiwalɛ nibii agbɛjianɔtoo nɛɛ baaba naagbee. Enɛ tsɔɔ akɛ Yesu gbalɛ ni yɔɔ Mateo 24:4-22, kɛ nɔ ni tamɔ nakai ni yɔɔ Marko kɛ Luka lɛ ba mli kɛjɛ afi 33 Ŋ.B. kɛtsɔ amanehulu ni ba yɛ afi 70 Ŋ.B. lɛ mli lɛ nɔ. Ni kɛlɛ, nakai kukuji lɛ nɔŋŋ baana amɛmlibaa ni ji enyɔ, ni nɔ ni baafata he aba ji amanehulu ni da yɛ wɔsɛɛ be mli. Emlibaa ni da nɛɛ enina wɔ; wɔnyɛɔ wɔnaa daa gbi.f
Mɛni Baajɛ Mli Aba?
21, 22. Nɛgbɛ wɔnaa gbalɛ mli saji ni tsɔɔ akɛ nibii krokomɛi baaya nɔ aba lɛ yɛ?
21 Yesu kɛ egbalɛ lɛ baaa naagbee kɛ amale gbalɔi ni baafee okadii ni amɛkɛlaka mɛi yɛ be kakadaŋŋ ni baatsɔ hiɛ dani ‘jeŋmaji abei lɛ aba mli’ lɛ mli lɛ pɛ. (Luka 21:24; Mateo 24:23-26; Marko 13:21-23) Etee nɔ egba amɛ nibii krokomɛi ni haa ŋmiŋmi mɔɔ mɔ ni baaba, nibii ni anaa yɛ shikpɔŋ muu lɛ fɛɛ nɔ. Abaana enɛɛmɛi yɛ be mli ni gbɔmɔ Bi lɛ baa kɛ hewalɛ kɛ anunyam lɛ. Marko 13:24-27 tsɔɔ bɔ ni egbalɛ ni yaa nɔ lɛ baaba mli aha lɛ mli:
22 “Shi no gbii lɛ amli yɛ nɛkɛ amanehulu nɛɛ sɛɛ lɛ, hulu hiɛ aaawo duŋ, ni nyɔŋtsere hu kpɛŋ, ni ŋwɛi ŋulamii lɛ aaatserɛ atswia shi, ni aaahoso hewalɛi ni yɔɔ ŋwɛi lɛ. Kɛkɛ lɛ aaana gbɔmɔ Bi lɛ akɛ eeba yɛ atatui lɛ amli kɛ hewalɛ kɛ anunyam babaoo. Kɛkɛ ni eeetsu ebɔfoi lɛ, ni amɛaabua ehalamɔ bii lɛ anaa kɛaajɛ kɔɔyɔi ejwɛ lɛ nɔ, kɛjɛ shikpɔŋ naagbee he kɛyashi ŋwɛi naagbee he.”
23. Mɛni hewɔ wɔbaanyɛ wɔkpa Mateo 24:29-31 mlibaa gbɛ yɛ Ŋ.B. klɛŋklɛŋ afii oha lɛ sɛɛ kwraa lɛ?
23 Gbɔmɔ Bi lɛ, ni ji Yesu Kristo ni atee lɛ shi lɛ baaa yɛ nakai naakpɛɛ gbɛ ni yɔɔ hoo lɛ nɔ yɛ Yudafoi anibii agbɛjianɔtoo lɛ naagbee kɛ hiɛkpatamɔ yɛ afi 70 Ŋ.B. lɛ sɛɛ. Eka shi faŋŋ akɛ shikpɔŋ lɛ nɔ akutsei fɛɛ yooo lɛ, taakɛ Mateo 24:30 tsɔɔ lɛ, ni asaŋ ŋwɛibɔfoi buaaa Kristofoi ni afɔ amɛ mu lɛ fɛɛ naa kɛjɛɛɛ shikpɔŋ lɛ fɛɛ nɔ yɛ nakai beaŋ. No hewɔ lɛ mɛɛ be mli Yesu gbalɛ babaoo lɛ fa ni fata he nɛɛ baaba mli? Ani eeba mli yɛ nɔ ni yaa nɔ ni ebɔle wɔhe bianɛ lɛ mli, aloo ekɛ ŋwɛi sɛɛyoomɔ haa wɔ koni wɔnu nibii ni wɔbaakpa gbɛ ni baaba mli yɛ wɔsɛɛ be mli lɛ shishi? Wɔbaasumɔ ni wɔle kɛ̃, ejaakɛ Luka ŋma Yesu kɔkɔbɔɔ nɛɛ: “Shi beni nibii nɛɛ aaatsɔ naa shi lɛ, no lɛ nyɛkwɛa ŋwɛi ni nyɛholea nyɛyitsei anɔ, ejaakɛ nyɛkpɔmɔ lɛ miibɛŋkɛ.”—Luka 21:28.
[Shishigbɛ niŋmai]
a Abaana yitsei nɛɛ fai komɛi yɛ tao ni yɔɔ baafai 14 kɛ 15 lɛ anɔ; liamɔi ni afo lɛ kadiɔ fai ni tamɔ nomɛi lɛ.
b Kɛha nibii ni ba nɛɛ ahe yinɔsane mli odaseyeli lɛ, kwɛmɔ Buu-Mɔɔ, February 1, 1971, baafai 19-23.
c Toʹte pueɔ fe shii 80 yɛ Mateo (shii 9 yɛ yitso 24) kɛ shii 15 yɛ Luka wolo lɛ mli. Marko kɛ toʹte tsu nii shii ekpaa pɛ, shi emli ejwɛ kɔɔ “okadi lɛ” he.
d Ŋleshi woloŋmalɔ Matthew Henry wie akɛ: “Yerusalem hiɛkpatamɔ ni Kaldeabii kɛba lɛ yɛ gbeyei naakpa, shi enɛ fe no. Ewo . . . Yudafoi ahiɛkpatamɔ yɛ jeŋ fɛɛ he gbeyei.
e Mɛi pii naa tsakemɔ yɛ Luka sane lɛ mli yɛ Luka 21:24 sɛɛ. Dr. Leon Morris wie akɛ: “Yesu tee nɔ ewie Jeŋmaji abei. . . . he. Yɛ woloŋlelɔi pii ajwɛŋmɔ naa lɛ agbala jwɛŋmɔ kɛtee gbɔmɔ Bi lɛ baa lɛ nɔ.” Professor R. Ginns ŋma akɛ: “The Coming of the Son of Man—(Mt 24:29-31; Mk 13:24-27). ‘Jeŋmaji abei’ lɛ atatsii kɛ hiɛkpamɔ wiemɔ haa nɛkɛ saneyitso nɛɛ; bɔ ni [Luka] naa enɛ ehaa lɛ tekeɔ Yerusalem amaŋfɔ feemɔ lɛ kɛyaa wɔsɛɛ be mli.”
f Professor Walter L. Liefeld ŋma akɛ: “Abaanyɛ amu sane naa akɛ Yesu gbalɛ lɛ baa mli yɛ gbɛi enyɔ nɔ: (1) nibii ni ba yɛ A.D. 70 ni kɔɔ sɔlemɔtsu he lɛ kɛ (2) nɔ ni yɔɔ wɔsɛɛ be mli shɔŋŋ ni akɛ kpojiemɔ wiemɔi tsɔɔ mli lɛ.” Nɔ ni John R. Dummelow ŋma lɛ kɛɔ akɛ: “Naagbai ni hiɛdɔɔ yɔɔ mli yɛ nɛkɛ wiemɔi nɛɛ amli lɛ laajeɔ kwraa kɛ ayoo akɛ wɔ-Nuŋtsɔ lɛ ewieee nɔ kome he yɛ mli shi nibii enyɔ, ni akɛ klɛŋklɛŋ nɔ lɛ tamɔ nɔ ni ji enyɔ lɛ. . . . [Luka] 21:24 titri, ni wieɔ ‘Jeŋmaji abei lɛ’ he lɛ, . . . kɛ be ko ni aleee esɛɛjɛkɛmɔ bafɔ Yerusalem hiɛkpatamɔ lɛ kɛ je lɛ naagbee lɛ teŋ.”
Ani Okaiɔ?
◻ Yesu hetoo ni ekɛha sanebimɔ ni yɔɔ Mateo 24:3 lɛ ba mli kɛyashi afi 70 Ŋ.B. yɛ mɛɛ gbɛ nɔ?
◻ Yɛ mɛɛ gbɛ nɔ wiemɔ toʹte kɛ nitsumɔ yeɔ ebuaa wɔ koni wɔnu Yesu gbalɛ lɛ shishi?
◻ Yɛ mɛɛ gbɛ nɔ “amanehulu babaoo” ko ba yɛ klɛŋklɛŋ afii oha lɛ mli yɛ gbɛ ni eko ni tamɔ nakai bako da nɔ?
◻ Mɛɛ Yesu gbalɛ lɛ mli nibii sɔrɔtoi enyɔ ni kɔɔ wɔhe ŋmɛnɛ Luka wieɔ he?
◻ Mɛni tsɔɔ gbalɛ ni yɔɔ Mateo 24:4-22 lɛ mlibaa ni ji enyɔ ni da?
[Akrabatsa ni yɔɔ baafa 14, 15]
4“Yesu kɛɛ amɛ akɛ: ‘Nyɛkwɛa ni ahia koni mɔ ko akalaka nyɛ; 5 ejaakɛ mɛi pii kɛ migbɛi aaaba ni amɛbaakɛɛ akɛ, “Miji Kristo lɛ,” ni amɛbaalaka mɛi pii. 6 Nyɛbaanu tai kɛ tai ahe amaniɛbɔɔi ahe; nyɛkwɛa ni nyɛtsuii akafaa. Shi esa akɛ nibii nɛɛ aba, shi naagbee lɛ shɛko.
7 “‘Ejaakɛ maŋ aaate shi awo maŋ ni maŋtsɛyeli aaate shi awo maŋtsɛyeli, ni hɔmɔ kɛ shikpɔŋhosomɔi aaaba hei sɔrɔtoi. 8 Nɛkɛ nibii nɛɛ fɛɛ ji kɔɔmɔi lɛ abɔimɔ.
9 “ ‘No be lɛ mli lɛ, gbɔmɛi aaajie nyɛ amɛwo amanehulu mli ni amɛaagbe nyɛ, ni jeŋmaji fɛɛ aaanyɛ nyɛ yɛ migbɛi lɛ hewɔ. 10 No be lɛ mli hu lɛ, mɛi pii anane aaatɔtɔ, ni amɛaatsɔɔtsɔɔ amɛnanemɛi asɛɛgbɛ, ni amɛaanyɛnyɛɛ amɛhe. 11 Ni amale gbalɔi pii baate shi ni amɛaalaka mɛi pii; 12 ni akɛni mlakwamɔ aaafa hewɔ lɛ mɛi pii asuɔmɔ lɛ he aaajɔ. 13 Shi mɔ ni hiɛɔ mli kɛyaa naagbee lɛ ji mɔ ni aaahere eyiwala. 14 Ni aaashiɛ maŋtsɛyeli lɛ he sanekpakpa lɛ yɛ shikpɔŋ ni ayɔɔ nɔ lɛ nɔ he fɛɛ he ni akɛye jeŋmaji lɛ fɛɛ odase; ni no dani naagbee lɛ aaaba.
------------------------------------------------------------------
15 “ ‘No hewɔ lɛ, kɛ nyɛna amaŋfɔ feemɔ nihii nii, ni atsɔ gbalɔ Daniel nɔ awie he lɛ, akɛ ema he krɔŋkrɔŋ lɛ, (ha mɔ ni kaneɔ lɛ ayoo sɛɛ,) 16 no lɛ ha mɛi ni yɔɔ Yudea lɛ aje shishi ajo foi kɛya gɔji lɛ anɔ. 17 Nuu ni yɔɔ tsu yiteŋ lɛ akakpeleke shi eyakɔlɔ nibii kɛmiijɛ eshia; 18 ni nuu ni yɔɔ ŋmɔshi lɛ akaku esɛɛ kɛmiba shia ebakɔ ekponɔgbɛ atade. 19 Kpoo ha yei ni hiɛ musu kɛ mɛi ni haa fufɔ yɛ no gbii lɛ amli! 20 Nyɛyaa nɔ nyɛsɔlea koni nyɛ foijee lɛ akaba yɛ fɛ̃i be lɛ mli, aloo yɛ hejɔɔmɔ gbi lɛ nɔ; 21 ejaakɛ no mli lɛ amanehulu kpeteŋkpele baaba ni eko bako ni tamɔ nakai da kɛjɛ je lɛ shishijee mli kɛbashi ŋmɛnɛ, dabi, ni eko baŋ nakai dɔŋŋ. 22 Yɛ anɔkwale mli lɛ, kɛ afooo nakai gbii lɛ anɔ kuku lɛ, ahereŋ heloo ko yiwala; shi yɛ mɛi ni ahala lɛ ahewɔ lɛ abaafo nakai gbii lɛ anɔ kuku.
------------------------------------------------------------------
23 “ ‘No mli lɛ, kɛji mɔ ko kɛɛ nyɛ akɛ, “Naa! Kristo lɛ yɛ biɛ,” loo, “Jɛmɛ!” lɛ, nyɛkahea nyɛyea. 24 Ejaakɛ amale Kristoi kɛ amale gbalɔi baate shi ni amɛaafee okadii kɛ naakpɛɛ nibii wuji amɛtsɔɔ koni amɛkɛshishiu, kɛ aaahi lɛ, mɛi ni ahala amɛ lɛ tete. 25 Naa! Mibɔ nyɛ kɔkɔ mito. 26 No hewɔ lɛ, kɛ gbɔmɛi kɛɛ nyɛ akɛ, “Naa! Eyɛ ŋa lɛ nɔ” lɛ, nyɛkayaa jɛmɛ; “Naa! Eyɛ piai lɛ amli” lɛ, nyɛkahea nyɛyea. 27 Ejaakɛ bɔ ni sarawa jɛɔ bokagbɛ ni ekpɛɔ kɛyaa anaigbɛ lɛ, nakai nɔŋŋ ba ni gbɔmɔ Bi lɛ eba lɛ baatamɔ. 28 He fɛɛ he ni gbonyo kã lɛ, jɛmɛ okropɔŋi baabua amɛhe naa yɛ.
------------------------------------------------------------------
------------------------------------------------------------------
29 “ ‘Yɛ no gbii lɛ amli amanehulu lɛ asɛɛ nɔŋŋ lɛ, hulu aaawo duŋ, ni nyɔŋtsere kpɛŋ, ni ŋulamii lɛ aaatserɛ kɛaajɛ ŋwɛi atswia shi, ni aaahoso ŋwɛi hewalɛi lɛ. 30 Kɛkɛ lɛ gbɔmɔ Bi lɛ okadi lɛ baapue yɛ ŋwɛi, ni no lɛ, shikpɔŋ lɛ nɔ akutsei fɛɛ aaawo yara, ni amɛaana gbɔmɔ Bi lɛ akɛ eeba yɛ ŋwɛi atatui lɛ anɔ kɛ hewalɛ kɛ anunyam babaoo. 31 Ni eeetsu ebɔfoi lɛ kɛ tɛtrɛmantrɛ gbɛɛmɔ ni naa wa, ni amɛaabua emɛi ni ehala lɛ anaa kutuu kɛaajɛ kɔɔyɔi ejwɛ lɛ anɔ, kɛaajɛ ŋwɛi naagbee he kome kɛyashi ŋwɛi naagbee he kroko.’ ”
5 “No hewɔ lɛ Yesu bɔi amɛ kɛɛmɔ akɛ: ‘Nyɛkwɛa ni ahia koni mɔ ko akalaka nyɛ. 6 Mɛi pii aaadamɔ migbɛi anɔ aba, akɛ, “Mi ni,” ni amɛaalaka mɛi pii. 7 Agbɛnɛ, kɛ nyɛnu tai kɛ tai ahe amaniɛbɔɔi ahe lɛ, nyɛtsui akafaa; esa akɛ nibii nɛɛ aba, shi naagbee lɛ shɛko.
8 “ ‘Ejaakɛ maŋ aaate shi awo ni maŋtsɛyeli aaate shi awo maŋtsɛyeli, ni shikpɔŋhosomɔi aaaba yɛ hei sɔrɔtoi, ni hɔmɔ baaba. Enɛɛmɛi ji kɔɔmɔi lɛ ashishijee.
9 “‘Shi nyɛ lɛ, nyɛkwɛa nyɛhe nɔ jogbaŋŋ; gbɔmɛi kɛ nyɛ baaya saneyeli hei, ni aaayi nyɛ yɛ kpee hei ni akɛ nyɛ aaadamɔ amraloi kɛ maŋtsɛmɛi ahiɛ yɛ mihewɔ, koni akɛye amɛ odase. 10 Agbɛnɛ hu, ja ashiɛ sanekpakpa lɛ atsɔɔ jeŋmaji fɛɛ da. 11 Shi kɛ amɛmiikpala nyɛ kɛmiiya koni amɛkɛ nyɛ ayaha lɛ, nyɛkahaoɔ nyɛhe nyɛtoa nɔ ni nyɛaawie he; shi nɔ fɛɛ nɔ ni akɛaaha nyɛ yɛ nakai ŋmɛlɛtswaa lɛ nɔ lɛ, nyɛwiea no, ejaakɛ jeee nyɛ nyɛwieɔ lɛ, shi mumɔ krɔŋkrɔŋ lɛ ni. 12 Agbɛnɛ hu, nyɛmi aaajie nyɛmi aha gbele, ni tsɛ aaajie bi aha, ni bii aaate shi awo amɛfɔlɔi ni amɛaaha agbe amɛ; 13 ni migbɛi hewɔ lɛ gbɔmɛi fɛɛ aaanyɛ nyɛ. Shi mɔ ni hiɛɔ mli kɛyaa naagbee lɛ ji mɔ ni aaahere eyiwala.
------------------------------------------------------------------
14 “ ‘Shi kɛ nyɛna amaŋfɔ-feemɔ nihii nii lɛ akɛ edamɔ he ni esaaa lɛ (ha mɔ ni kaneɔ lɛ ayoo sɛɛ), kɛkɛ lɛ ha mɛi ni yɔɔ Yudea lɛ ajo foi aya gɔji lɛ anɔ. 15 Kaaha mɔ ni yɔɔ tsu yiteŋ lɛ miikpele shi, asaŋ ekabote shia lɛ mli eyakɔ nɔ ko; 16 ni kaaha mɔ ni yɔɔ ŋmɔ shi lɛ miiku esɛɛ kɛmiiba nibii ni eshi yɛ sɛɛ lɛ ahe ebakɔ kponɔgbɛ atade. 17 Kpoo ha mɛi ni hiɛ musu kɛ mɛi ni haa fufɔ yɛ nakai gbii lɛ amli lɛ! 18 Nyɛyaa nɔ nyɛsɔlea koni ekɛba yɛ fɛi be lɛ mli; 19 ejaakɛ nakai gbii lɛ baafee amanehulu gbii ni eko bako ni tamɔ nakai da kɛjɛ nibii ni Nyɔŋmɔ bɔ lɛ shishijee mli kɛbashi nakai be lɛ mli, ni eko baŋ ni tamɔ nakai dɔŋŋ. 20 Yɛ anɔkwale mli lɛ, kɛ Yehowa efooo gbii lɛ anɔ kuku lɛ, ahereŋ heloo ko heloo ko yiwala. Shi yɛ mɛi ni ehala lɛ ahewɔ lɛ efo no gbii lɛ anɔ kuku.
------------------------------------------------------------------
21 “ ‘Ni no mli lɛ, kɛji mɔ ko kɛɛ nyɛ akɛ, “Nyɛkwɛa! Naa Kristo lɛ,” “Nyɛkwɛa! Lɛ eyɔɔ jɛmɛ lɛ,” nyɛkahea nyɛyea. 22 Ejaakɛ amale Kristoi kɛ amale gbalɔi baate shi ni amɛaafee okadii kɛ naakpɛɛ nii, koni kɛ aaahi lɛ, ni amɛkɛlaka mɛi ni ahala amɛ lɛ. 23 Shi nyɛ lɛ, nyɛkwɛa jogbaŋŋ; mitsɔ hiɛ mikɛɛ nyɛ nibii nɛɛ fɛɛ mito.
------------------------------------------------------------------
------------------------------------------------------------------
24 “ ‘Shi yɛ no gbii lɛ amli, yɛ nakai amanehulu lɛ sɛɛ lɛ, hulu hiɛ aaawo duŋ, ni nyɔŋtsere hu kpɛŋ ela lɛ, 25 ni ŋulamii lɛ baajɛ ŋwɛi atserɛ atswia shi, ni abaahoso hewalɛi ni yɔɔ ŋwɛi lɛ. 26 Ni no lɛ amɛbaana gbɔmɔ Bi lɛ akɛ eeba yɛ atatui lɛ amli kɛ hewalɛ kɛ anunyam babaoo. 27 Ni no lɛ eeetsu ebɔfoi lɛ ni amɛaabua emɛi ni ehala lɛ anaa kutuu kɛaajɛ kɔɔyɔi ejwɛ lɛ anɔ, kɛjɛ shikpɔŋ lɛ naagbee he kɛyashi ŋwɛi naagbee he.’ ”
8 “Ni ekɛɛ: ‘Nyɛkwɛa jogbaŋŋ koni akalaka nyɛ; ejaakɛ mɛi pii aaaba yɛ migbɛi anɔ, ni amɛaakɛɛ akɛ, “Mi ni,” ni asaŋ, “be lɛ eshɛ eta.” Nyɛkanyiɛa amɛsɛɛ. 9 Agbɛnɛ hu, kɛ nyɛnu tai kɛ basabasa-feemɔi ahe lɛ, nyɛtsui akafaa. Ejaakɛ esa akɛ nɛkɛ nibii nɛɛ aba mli da, shi naagbee lɛ baŋ amrɔ nɔŋŋ.’
10 “Kɛkɛ ni etee nɔ ekɛɛ amɛ akɛ: ‘Maŋ aaate shi awo maŋ, ni maŋtsɛyeli aaate shi awo maŋtsɛyeli; 11 ni shikpɔŋhosomɔi wuji aaaba, ni gbele helai kɛ hɔmɔ baaba hei sɔrɔtoi; ni nibii ni yɔɔ gbeyei kɛ okadii wuji baajɛ ŋwɛi aba.
12 “ ‘Shi dani enɛɛmɛi fɛɛ aaaba lɛ gbɔmɛi aaamɔmɔ nyɛ ni amɛaawa nyɛ yi, ni amɛaaŋɔ nyɛ amɛha kpee hei lɛ kɛ gboklɛfoi atsuiaŋ, ni amɛaakpala nyɛ kɛaatee maŋtsɛmɛi kɛ amralofoi ahiɛ yɛ migbɛi lɛ ahewɔ. 13 Ni no aaatsɔ odase aha nyɛ. 14 No hewɔ lɛ nyɛlea nyɛtoa yɛ nyɛtsuiŋ koni nyɛkatsɔ hiɛ nyɛtĩ nɔ ni nyɛkɛaafa nyɛhe lɛ mli, 15 ejaakɛ maha nyɛ naabu kɛ nilee, ni mɛi ni teɔ shi woɔ nyɛ lɛ fɛɛ nyɛŋ naa adamɔ ni amɛnyɛŋ naa amɛku. 16 Agbɛnɛ hu, fɔlɔi, kɛ nyɛmimɛi kɛ wekumɛi kɛ nanemɛi tete aaaŋɔ nyɛ aha, ni amɛaaha agbe nyɛteŋ mɛi komɛi; 17 ni nyɛbaafee mɛi ni gbɔmɛi fɛɛ nyɛɔ amɛ yɛ migbɛi hewɔ. 18 Ni kɛlɛ nyɛyiteŋ tsɔi kome nɛkɛ elaajeŋ. 19 Tsuishiŋmɛɛ nɔ nyɛaatsɔ nyɛhere nyɛsusumai ayiwala.
------------------------------------------------------------------
20 “ ‘Agbɛnɛ hu, kɛ nyɛna akɛ asraafoi egba ebɔle Yerusalem he lɛ, no lɛ nyɛnaa nyɛlea akɛ emaŋfɔ-feemɔ ebɛŋkɛ. 21 No lɛ ha mɛi ni yɔɔ Yudea lɛ aje shishi ajo foi aya gɔji lɛ anɔ, ni mɛi ni yɔɔ ma lɛŋ lɛ aje kpo, ni mɛi ni yɔɔ akrowai lɛ akaba mli; 22 ejaakɛ oweletɔɔ gbii lɛ nɛ, koni nibii ni aŋma lɛ aba mli. 23 Kpoo ha yei ni hiɛ musu kɛ mɛi ni haa fufɔ yɛ no gbii lɛ amli lɛ! Ejaakɛ fimɔ kpele baaba shikpɔŋ lɛ nɔ ni mlifu hu baaba gbɔmɛi lɛ anɔ; 24 ni amɛaagboi yɛ klante naa ni aaaŋɔ amɛ nom kɛaatee jeŋmaji fɛɛ mli;
------------------------------------------------------------------
ni jeŋmaji lɛ aaanaanaa Yerusalem nɔ, kɛyashi beyinɔ ni jeŋmaji abei ni ato lɛ aaashɛ.
------------------------------------------------------------------
------------------------------------------------------------------
25 “ ‘Agbɛnɛ hu, okadii aaaba hulu kɛ nyɔŋtsere kɛ ŋulamii amli, ni jeŋmaji lɛ ahe baahia amɛ yɛ shikpɔŋ lɛ nɔ, ni amɛleee he ni amɛaatsɔ amɛje mli yɛ ŋshɔ kɛ ŋshɔkei agbɛɛmɔ hewɔ, 26 ni nɔ̃ aaanyɔnyɔɔ gbɔmɛi anɔ yɛ gbeyei kɛ nibii ni baa shikpɔŋ ni ayɔɔ nɔ lɛ nɔ lɛ agbeyeishemɔ hewɔ; ejaakɛ abaahoso ŋwɛi hewalɛi lɛ. 27 Kɛkɛ lɛ amɛbaana gbɔmɔ Bi lɛ akɛ eeba yɛ atataui amli kɛ hewalɛ kɛ anunyam babaoo. 28 Shi beni nɛkɛ nibii nɛɛ eje shishi lɛ, nyɛdamɔa shi ni nyɛholea nyɛyitsei anɔ, ejaakɛ nyɛkpɔmɔ lɛ miibɛŋkɛ.’ ”
[Mfoniri ni yɔɔ baafa 10]
Amanehulu ni ba yɛ afi 70 Ŋ.B. lɛ ji nɔ ni da fe fɛɛ ni Yerusalem kɛ Yudafoi anibii agbɛjianɔtoo lɛ ena pɛŋ