Ha Ogbalashihilɛ lɛ Afee Ekomefeemɔ ni Hiɔ Shi Daa

“Nɔ ni Nyɔŋmɔ eŋɔ-tsa lɛ, akaha gbɔmɔ miigbala mli.”—MATEO 19:6.

 1. Mɛni ji nɔdaamɔ nɔ kɛha gbalashihilɛ ni yeɔ omanye yɛ anɔkwa Kristofoi ateŋ ŋmɛnɛ?

GBƆMƐI akpei abɔ yɛ Yehowa webii ateŋ ŋmɛnɛ ni naa gbalashihilɛi ni haa mɔ tsui nyɔɔ emli ni sɛɛ tsɛɔ mli ŋɔɔmɔ. Shi omanye babaoo ni aye nɛɛ baaa trukaa. Kristofoi agbalashihilɛi shwereɔ beni hefatalɔi enyɔ lɛ fɛɛ (1) kɛ bulɛ haa bɔ ni Nyɔŋmɔ kwɛɔ gbalashihilɛ ehaa, ni (2) amɛbɔɔ mɔdɛŋ amɛhiɔ shi yɛ e-Wiemɔ lɛ shishitoo mlai anaa lɛ. Ejaakɛ Nyɔŋmɔ diɛŋtsɛ ji mɔ ni to gbalashihilɛ gbɛjianɔtoo lɛ shishi. Lɛ ji Mɔ ni ‘weku fɛɛ weku ni yɔɔ shikpɔŋ nɔ lɛ na egbɛi kɛjɛ eŋɔɔ.’ (Efesobii 3:14, 15) Akɛni Yehowa le nɔ ni haa gbalashihilɛ yeɔ omanye hewɔ lɛ, egbɛtsɔɔmɔ sɛɛnyiɛmɔ he baa sɛɛnamɔ kɛhaa wɔ.—Yesaia 48:17.

 2. Mɛni jɛɔ Biblia mli shishitoo mlai ni akɛtsuuu nii yɛ gbalashihilɛ mli lɛ mli baa?

² Nɔ ni tamɔɔɔ nakai lɛ, nɔ ni baanyɛ ajɛ Biblia mli shishitoo mlai ni akɛtsuuu nii lɛ mli aba ji gbalashihilɛ mli naagbai. Mɛi ni yɔɔ enɛ he nilee lɛ ateŋ mɛi komɛi heɔ yeɔ akɛ, mɛi ni boteɔ gbalashihilɛ mli ŋmɛnɛ yɛ U.S. Amerika lɛ ateŋ etɛ fɛɛ etɛ mli enyɔ baatse gbala mli yɛ naagbee. Kristofoi po yeee amɛhe kɛjɛɛɛ ‘jaramɔ bei ni mli wa’ nɛɛ amli nɔnyɛɛi kɛ haomɔi lɛ amli. (2 Timoteo 3:1) Shika helɛtemɔ mli haomɔi kɛ nɔnyɛɛi ni yɔɔ nitsumɔ hei baanyɛ asa gbalashihilɛ fɛɛ gbalashihilɛ he yɛ gbɛ fɔŋ nɔ. Kristofoi lɛ ateŋ mɛi komɛi anijiaŋ eje wui waa yɛ amɛhefatalɔi lɛ ni kɛ Biblia mli shishitoo mlai tsuuu nii lɛ hewɔ. Ŋa Kristofonyo ko kɛɛ: “Misumɔɔ Yehowa, shi naagbai eyi migbalashihilɛ mli obɔ afii 20 sɔŋŋ nɛ. Miwu feɔ pɛsɛmkunya, ni esumɔɔɔ ni etsakeɔ. Minuɔ he akɛ adu mi yɛ tsɔne ko mli.” Kristofoi wumɛi kɛ ŋamɛi saŋŋ ejie henumɔi ni tamɔ nɛkɛ kpo. Mɛni fiteɔ nii lɛ? Ni mɛni baanyɛ atsĩ gbalashihilɛ naa koni ekakpalaŋ ni efee shikpilikpii ní mɔ ko he sane kɔɔɔ mɔ ko he, loo etsɔ béi diɛŋtsɛ?

Bɔ ni Gbalashihilɛ Ji Nii ni Hiɔ Shi Daa

 3, 4. (a) Mɛni ji Nyɔŋmɔ taomɔ nii kɛha gbalashihilɛ? (b) Mɛni hewɔ gbalashihilɛ ni hiɔ shi daa lɛ ji nɔ ko ni ja gbɛ ni sɛɛnamɔ yɔɔ mli lɛ?

³ Yɛ shihilɛi kpakpai fe fɛɛ ashishi po lɛ, gbalashihilɛ ji aŋkroaŋkroi ni yeee emuu ni efee ekome. (5 Mose 32:5) No hewɔ lɛ bɔfo Paulo kɛɛ akɛ, “heloo gbɛfaŋ amanehulu” mɛi ni boteɔ gbalashihilɛ mli lɛ “baana.” (1 Korintobii 7:28) Nɔ ni baanyɛ ajɛ shihilɛi komɛi ni mli bawaa lɛ amli aba ji mligbalamɔ loo gbala-mlitsemɔ po. (Mateo 19:9; 1 Korintobii 7:12-15) Shi, Kristofoi kɛ Paulo ŋaawoo nɛɛ tsuɔ nii yɛ saji lɛ pii amli: “Ŋa akatse ewu gbala . . . ni wu hu akaŋmɛɛ eŋa he.” (1 Korintobii 7:10, 11) Lɛlɛŋ, ato ni gbalashihilɛ afee ekomefeemɔ ni hiɔ shi daa diɛŋtsɛ, ejaakɛ Yesu Kristo jaje akɛ: “Nɔ ni Nyɔŋmɔ eŋɔ-tsa lɛ, akaha gbɔmɔ miigbala mli.”—Mateo 19:6.

⁴ Yehowa taomɔ nii baanyɛ afee nɔ ni yɔɔ keketee ni shishinumɔ bɛ mli kɛha mɔ ni nuɔ he akɛ adũ lɛ ni eka gbalashihilɛ ni suɔmɔ bɛ mli ni bei yɔɔ mli lɛ mli. Shi ejeee nakai. Bɔ ni gbalashihilɛ ekomefeemɔ lɛ ji nɔ ni hiɔ shi daa lɛ kanyaa gbalashihilɛ mli hefatalɔi ni sheɔ Nyɔŋmɔ gbeyei lɛ koni amɛkpe ni amɛtao amɛnaagbai lɛ anaa tsabaa moŋ, fe ni amɛkɛ oyaiyeli aaatsi amɛhe kɛaajɛ amɛ gbɛnaa nii ahe kɛ amɛna naagba ko he okadi klɛŋklɛŋ kwraa lɛ. Nuu ko ni ebote gbalashihilɛ mli fe afii 20 wie he yɛ nɛkɛ gbɛ nɔ: “Nyɛnyɛŋ nyɛkwa haomɔ bei. Nyɛnyɛŋ nyɛna nyɛhe miishɛɛ yɛ be fɛɛ mli. Ni no mli shĩ ni nyɛwo nyɛhe lɛ he bahiaa diɛŋtsɛ yɛ.” Shi, gbalashihilɛ mli hefatalɔi Kristofoi nuɔ he akɛ Yehowa Nyɔŋmɔ, gbalashihilɛ Shishijelɔ lɛ he gbɛnaa nii kã amɛnɔ.—Okɛto Jajelɔ 5:4 he.

Yitsoyeli kɛ Heshibaa

 5. Mɛni ji Paulo ŋaawoo kɛha wumɛi kɛ ŋamɛi lɛ ekomɛi?

⁵ No hewɔ lɛ, kɛ naagbai te shi lɛ, no jeee be ni akɛjoɔ naa foi, shi moŋ eji gbɛ kpakpa ni aaatsɔ nɔ akɛ Nyɔŋmɔ Wiemɔ lɛ atsu nii. Akɛ nɔkwɛmɔ nɔ lɛ, susumɔ Paulo wiemɔi ni anaa yɛ Efesobii 5:22-25, 28, 29 lɛ he okwɛ: “Nyɛ yeigbayei lɛ, nyɛbaa nyɛhe shi nyɛhaa nyɛ diɛŋtsɛ nyɛwumɛi lɛ, tamɔ bɔ ni nyɛfeɔ nyɛhaa Nuŋtsɔ lɛ, ejaakɛ wu lɛ ji ŋa lɛ yitso taakɛ bɔ ni Kristo hu ji asafo lɛ yitso, ni lɛ nɔŋŋ ji gbɔmɔtso lɛ yiwalaherelɔ lɛ. Shi taakɛ bɔ ni asafo lɛ baa ehe shi ehaa Kristo lɛ, nakai nɔŋŋ yei lɛ hu afee aha amɛ diɛŋtsɛ amɛwumɛi lɛ yɛ nɔ fɛɛ nɔ mli. Nyɛ wumɛi lɛ, nyɛsumɔa nyɛ diɛŋtsɛ nyɛŋamɛi, taakɛ bɔ ni Kristo hu sumɔ asafo lɛ ni eŋɔ lɛ diɛŋtsɛ ehe eha yɛ ehewɔ. Nakai sa akɛ wumɛi hu asumɔ amɛ diɛŋtsɛ amɛŋamɛi tamɔ amɛ diɛŋtsɛ amɛgbɔmɔtsei. Mɔ ni sumɔɔ eŋa lɛ, lɛ diɛŋtsɛ ehe esumɔɔ. Ejaakɛ mɔ ko enyɛko lɛ diɛŋtsɛ eheloo dã, shi moŋ elɛɔ lɛ ni ehiɛɔ lɛ dɔdɔɔdɔ, taakɛ bɔ ni [Kristo] hiɛɔ asafo lɛ.”

 6. Esa akɛ wumɛi Kristofoi afee mɛi ni esoro amɛ yɛ je lɛŋ hii ahe yɛ mɛɛ gbɛ nɔ?

⁶ Hii fɔɔ amɛhegbɛ akɛ wumɛi lɛ he nitsumɔ yɛ gbɛ fɔŋ nɔ ni amɛkɛyeɔ amɛŋamɛi anɔ. (1 Mose 3:16) Shi Paulo wo wumɛi Kristofoi hewalɛ ni esoro amɛ yɛ je lɛŋ hii ahe, ni amɛtamɔ Kristo, shi jeee yiwalɔi ni yeɔ amɛŋamɛi ashihilɛ mli nibii fɛɛ kwa nɔ. Eka shi faŋŋ akɛ, Yesu Kristo jeee mɔ ni fee keketee loo eyeɔ mɔ nɔ. Ekɛ esɛɛnyiɛlɔi lɛ ye yɛ woo kɛ bulɛ mli, ni ekɛɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ. Nyɛwoa mipa lɛ nyɛfɔa nyɛnɔ, ni nyɛkasea mi; shi mihe jɔ, ni mibaa mihe shi kɛjɛ mitsui mli.”—Mateo 11:28, 29.

 7. Te nuu aaafee tɛŋŋ ekɛ woo aha eŋa beni esa akɛ yoo lɛ atsu heloo gbɛfaŋ nitsumɔ ko lɛ?

⁷ Kristofonyo wu kɛ woo haa eŋa akɛ mɔ ni he waaa tuutu ko. (1 Petro 3:7) Akɛ nɔkwɛmɔ nɔ lɛ, ŋɔɔ lɛ akɛ esa akɛ yoo lɛ atsu heloo gbɛfaŋ nitsumɔ ko yɛ he ko. Esa akɛ wu lɛ asusu enɛ he jogbaŋŋ, ni eye ebua ni esusu ehe bɔ ni eeenyɛ. Yiŋtoo titri kome ni yei kɛha akɛ no tseɔ gbala mli ji bɔ ni amɛwumɛi kuɔ amɛhiɛ amɛshwieɔ amɛbii lɛ loo shĩa lɛ nɔ lɛ. No hewɔ lɛ, wu ni ji Kristofonyo lɛ bɔɔ mɔdɛŋ ni eye ebua yoo lɛ yɛ shia yɛ gbɛi ni hi jogbaŋŋ ni he baa sɛɛnamɔ kɛhaa weku muu lɛ fɛɛ nɔ.

 8. Mɛni yɔɔ heshibaa mli kɛha ŋamɛi Kristofoi?

⁸ Woo ni akɛaaha amɛ lɛ haa efeɔ mlɛo kɛhaa ŋamɛi Kristofoi akɛ amɛaaba amɛhe shi amɛha amɛwumɛi. Shi, enɛ etsɔɔɔ nyɔŋyeli kwraa. Nyɔŋmɔ fã akɛ ŋa lɛ afee “hefatalɔ ni sa” (“mɔ ko ni tamɔ lɛ,” NW shishigbɛ niŋmaa), ni tsɔɔ nɔ ko ni sa nuu lɛ, shi jeee nyɔŋ loo tsulɔ. (1 Mose 2:18) Awieɔ ŋa lɛ he yɛ Maleaki 2:14 akɛ nuu lɛ “hefatalɔ.” Enɛ hewɔ lɛ, ŋamɛi ná heyeli kɛ nifeemɔ mli hegbɛ babaoo mli ŋɔɔmɔ. Biblia lɛ wie “yoo kpakpa” lɛ he akɛ: “Ewu tsui kaa enɔ.” Lɛlɛŋ, akɛ saji tamɔ shĩa kwɛmɔ, niyenii ahemɔ, tsũi loo shihilɛ he he gbɛjianɔtoo, kɛ nitsumɔi bibii anɔkwɛmɔ wo edɛŋ.—Abɛi 31:10-31.

 9. (a) Biblia bei amli yei ni sheɔ Nyɔŋmɔ gbeyei lɛ jie anɔkwa heshibaa kpo yɛ mɛɛ gbɛ nɔ? (b) Mɛni baanyɛ aye abua Kristofonyo ŋa lɛ koni ehi shi akɛ heshibalɔ ŋmɛnɛ?

⁹ Ni kɛlɛ, ŋa ni sheɔ Nyɔŋmɔ gbeyei lɛ yɔse ewu yitsoyeli hegbɛ lɛ. Akɛ nɔkwɛmɔ nɔ lɛ, Sara “bo Abraham toi, ni etsɛ lɛ ‘nuŋtsɔ,’ ” jeee akɛ bulɛ nifeemɔ ko kɛkɛ, shi moŋ akɛ eheshibaa lɛ kpojiemɔ yɛ anɔkwayeli mli. (1 Petro 3:6; 1 Mose 18:12) Agbɛnɛ ejɛ esuɔmɔ mli eshi eshia ni hejɔlɛ yɔɔ mli yɛ Ur maŋtiase lɛ mli lɛ, ni ekɛ ewu yahi buui amli. (Hebribii 11:8, 9) Shi heshibaa etsɔɔɔ akɛ ŋa nyɛŋ atsu gbɛnaa nii ni hiɛdɔɔ yɔɔ mli he nii kɛ ehe miihia. Beni Mose yeee Nyɔŋmɔ mla ni kɔɔ ketiafoo he lɛ nɔ lɛ, eŋa, Zipora, tsi amanehulu ni kulɛ eeeba lɛ naa kɛtsɔ ehe nii ni etsu oya lɛ nɔ. (2 Mose 4:24-26) Babaoo yɛ ni kɔɔ he fe ni aaasa nuu ni yeee emuu ko hiɛ. Esa akɛ yei ‘aba amɛhe shi amɛha amɛwumɛi tamɔ bɔ ni amɛfeɔ amɛhaa Nuŋtsɔ lɛ.’ (Efesobii 5:22) Kɛ ŋa Kristofonyo lɛ jwɛŋɔ wekukpaa ni ka ekɛ Nyɔŋmɔ teŋ lɛ he lɛ, enɛ yeɔ ebuaa lɛ ni ekuɔ ehiɛ eshwieɔ ewu lɛ tɔmɔi kɛ fatɔɔi bibii lɛ anɔ, tamɔ bɔ ni ehe hiaa ni wu lɛ hu afee yɛ yoo lɛ he lɛ.

Sanegbaa—Nɔ ni Haa Gbalashihilɛ Hiɔ Shi

10. Te sanegbaa he hiaa yɛ gbalashihilɛ mli ha tɛŋŋ?

¹⁰ Beni abi gbala-mlitsemɔ he mlalelɔ ko nɔ titri ni haa gbalashihilɛ mli hefatalɔi gbalaa amɛteŋ lɛ, eha hetoo akɛ: “Nyɛ ni anyɛɛɛ akɛ he awie anɔkwale, ni ajie mli gbɛ susumɔi akpo, ni akɛ he aye akɛ naanyo kpakpa ni fe fɛɛ lɛ.” Hɛɛ, sanegbaa ji gbalashihilɛ kpakpa lɛ wala. Taakɛ Biblia lɛ kɛɔ lɛ, “kɛ ajinatoo bɛ lɛ, yiŋtoi feɔ yaka.” (Abɛi 15:22) Ehe miihia ni wumɛi kɛ ŋamɛi afee ‘nanemɛi ni toɔ ajina,’ ni naa teemɔŋ tsakpaa ni miishɛɛ yɔɔ mli mli ŋɔɔmɔ. (Abɛi 2:17) Ni kɛlɛ, kɛ ashɛ sanegbaa nɔ lɛ, gbalashihilɛ mli hefatalɔi pii naa akɛ ewa kɛha amɛ, ni enɛ haa mlifu hiɔ shi aahu kɛyashiɔ be mli ni efɛ́ɔ akɛ béi ni efiteɔ nii. Aloo ekolɛ gbalashihilɛ mli hefatalɔi kɛ hiŋmɛigbelemɔ mli nifeemɔ ko haa amɛhiɛ ni amɛteeɔ yɛ sɛɛ, ni amɛtsiɔ amɛhe kɛjɛɔ amɛhe yɛ henumɔŋ kɛya sɛɛ fɛlɛŋŋ.

11. Mɛɛ gbɛ nɔ aaatsɔ aha sanegbaa ni yaa nɔ yɛ wu kɛ ŋa teŋ lɛ aya hiɛ?

¹¹ Naagba lɛ fa ko ji akɛ, etamɔ nɔ ni hii kɛ yei yɛ sanegbaa gbɛi sɔrɔtoi. Yei pii naa miishɛɛ kɛ amɛmiiwie henumɔi ahe, yɛ be mli ni hii sumɔɔ ni amɛwie saji diɛŋtsɛ ni yɔɔ lɛ ahe. Yei sumɔɔ ni amɛjie mlitsɔlɛ kpo ni amɛkɛ henumɔŋ sɛɛfimɔ aha, yɛ be mli ni hii taoɔ ni amɛkɛ nɔ ni eba lɛ naa tsabaa aha. Ni kɛlɛ, hegbɛ yɛ kɛha sanegbaa babaoo kɛ mɛi enyɔ lɛ fɛɛ etswa amɛfai shi akɛ ‘amɛhe aaafee oya kɛ ninumɔ, amɛhumɔ shi kɛ wiemɔ, ni amɛhumi shi kɛ mlifu lɛ.’ (Yakobo 1:19) Kwɛmɔ mɔ lɛ hiɛ ni obo lɛ toi diɛŋtsɛ. Gbalamɔ lɛ ni ewie kɛtsɔ sanebimɔi ni sa nɔ. (Okɛto 1 Samuel 1:8; Abɛi 20:5 he.) Ni ooobɔ mɔdɛŋ ni okɛ naagba ko ni ohefatalɔi lɛ ejie lɛ kpo lɛ he tsabaa aha nɔŋŋ yɛ oyaiyeli mli lɛ, bo toi jogbaŋŋ beni nyɛtsuɔ nii ní nyɛkɛsaa saji lɛ. Ni nyɛyi enyɔ lɛ fɛɛ nyɛsɔlea kutuu, ni nyɛkɛtao ŋwɛi gbɛtsɔɔmɔ.—Lala 65:3; Romabii 12:12.

12. Mɛɛ gbɛ nɔ hefatalɔi Kristofoi aaatsɔ ana be amɛha amɛhe?

¹² Bei komɛi lɛ, shihilɛ mli nɔnyɛɛi kɛ naagbai feɔ tamɔ nɔ ni ehaaa gbalashihilɛ mli hefatalɔi lɛ ana be loo hewalɛ amɛha sanegbaa po ni sɛɛnamɔ yɔɔ he. Ni kɛlɛ, kɛ Kristofoi aaaha amɛ gbalashihilɛ lɛ afee nɔ ni woo yɔɔ mli ni amɛbaa yi kɛjɛ ebulemɔ he lɛ, esa akɛ amɛbɛŋkɛ amɛhe kpaakpa. Esa akɛ amɛbu amɛ ekomefeemɔ lɛ akɛ nɔ ko ni jara wa, ni sɛɛnamɔ yɔɔ he, ni esa akɛ amɛhe be kɛha enɛ, kɛ agbɛnɛ kɛha amɛhe. (Okɛ Kolosebii 4:5 ato he.) Yɛ saji lɛ ekomɛi amli lɛ, tsabaa ni aaana kɛha be ni anaa ahaa sanegbaa kpakpa lɛ baanyɛ afee nɔ ni waaa kwraa tamɔ TV ni agbeɔ nɛkɛ. Ní aaafee ekome kɛnu tii loo kɔfe daa lɛ baanyɛ aye abua gbalashihilɛ mli hefatalɔi lɛ ni amɛkɛ amɛhe agba sane loo amɛle amɛhe yɛ henumɔŋ. Amɛbaanyɛ amɛkɛ amɛhe ‘agba’ weku lɛ mli saji sɔrɔtoi ahe ‘sane kutuu.’ (Abɛi 13:10) Ni kwɛ nilee ni yɔɔ su ni aaana akɛ aaawie saji bibii ni gbaa mɔ naa loo ekɛ shishinumɔ baaa lɛ ahe dani amɛtsɔmɔ saji wuji ni kɛ mlifu baa!—Okɛto Mateo 5:23, 24; Efesobii 4:26 he.

13. (a) Mɛɛ nɔkwɛmɔ nɔ Yesu fee yɛ faŋŋ wiemɔ kɛ anɔkwayeli mli? (b) Mɛni ji gbɛi komɛi ni gbalashihilɛ mli hefatalɔi aaatsɔ nɔ atsi abɛŋkɛ amɛhe?

¹³ Nuu ko jaje akɛ: “Ewa kɛha mi yɛ bei babaoo mli, akɛ matsɔɔ mijwɛŋmɔ loo bɔ ni misusuɔ diɛŋtsɛ, ni makɛɛ [miŋa] bɔ ni minuɔ nii ahe mihaa diɛŋtsɛ.” Shi bɔ ni oji loo bɔ ni onuɔ nii ahe ohaa diɛŋtsɛ lɛ kpojiemɔ ji nɔ titri ni haa aleɔ he yɛ teemɔŋ. Kadimɔ bɔ ni Yesu fee nɔ fɛɛ nɔ faŋŋ yɛ anɔkwayeli mli eha mɛi ni baafee eyemforo kuu lɛ mlibii lɛ. Ekɛɛ: “Mitsɛɛɛ nyɛ nyɔji dɔŋŋ, ejaakɛ nyɔŋ leee nɔ ni enuŋtsɔ feɔ; shi moŋ shieŋtsɛmɛi mitsɛ nyɛ, ejaakɛ nii fɛɛ ni minu yɛ mi-Tsɛ naa lɛ, mitsi ta mikɛɛ nyɛ.” (Yohane 15:15) No hewɔ lɛ susumɔ ohefatalɔ lɛ he akɛ onaanyo. Ha ohefatalɔ lɛ anu ohenumɔi ashishi. Bɔɔ mɔdɛŋ ni oha “osuɔmɔ wiemɔi” lɛ mli aka shi faŋŋ ni efee anɔkwale. (Salomo Lalai Amli Lala 1:2, NW) Sane ni agbaa kpoo-kpoo lɛ baanyɛ afee nɔ ni eŋɔɔɔ tsɔ yɛ bei komɛi amli, shi kɛ gbalashihilɛ mli hefatalɔi lɛ fɛɛ bɔ he mɔdɛŋ waa lɛ, amɛbaanyɛ amɛfee babaoo yɛ amɛ gbalashihilɛ lɛ ni amɛaaha efee ekomefeemɔ ni hiɔ shi daa lɛ mli.

Gbee ni Akpaaa lɛ He Nii ni Atsuɔ

14, 15. Mɛɛ gbɛ nɔ aaatsɔ akwa béi?

¹⁴ Gbeekpamɔ diɛŋtsɛ ni bɛ baanyɛ ate shi yɛ be kɛ bei amli. Shi ehe ehiaaa ni oshia lɛ atsɔ ‘shĩa ni bei eyi mli obɔ.’ (Abɛi 17:1) Akwɛ jogbaŋŋ ni akagba saji ni henumɔ yɔɔ mli tsɔ ni gbekɛbii lɛ baanyɛ anu, ni asusu hefatalɔ lɛ henumɔi ahe. Beni Rahel ye ŋkɔmɔ yɛ kene ni eji lɛ he, ni ebi ni Yakob aha lɛ bii lɛ, Yakob kɛ mlifu ha lɛ hetoo akɛ: “Ani miji Nyɔŋmɔ ni etsi omusuŋ bii anaa lɛ?” (1 Mose 30:1, 2) Kɛ shia lɛ mli naagbai te shi lɛ, nyɛtutuaa naagba lɛ loo nyɛtsua he nii, shi jeee gbɔmɔ lɛ tutuamɔ. Kɛ nyɛmiisusu saji ahe yɛ teemɔŋ lɛ, nyɛkawiea “bambam,” loo ni nyɛfolɔ nyɛ saji amli yakatswaa.—Abɛi 12:18.

¹⁵ Eji anɔkwale akɛ ekolɛ obaanu he akɛ osane ja waa, shi abaanyɛ awie enɛɛmɛi ahe ni “mlijoomɔ kɛ mlila kɛ mlifu kɛ bolɔmɔ kɛ musubɔɔ” bɛ mli. (Efesobii 4:31) Wu ko kɛɛ akɛ, “nyɛkɛ gbee ni nyɛkɛwieɔ daa lɛ agbaa nyɛ naagbai lɛ ahe sane. Kɛ nyɛteŋ mɔ ko wo egbee nɔ lɛ, kpa saji ahesusumɔ lɛ. Wo ohe nɔ fioo ni oku osɛɛ oba ekoŋŋ. Jee saji ahesusumɔ lɛ shishi ekoŋŋ.” Abɛi 17:14 kɛ ŋaawoo kpakpa nɛɛ haa: “Ni naataamɔ lɛ mli wako nɛɛ, ŋmɛɛmɔ he.” Nyɛbɔa mɔdɛŋ nyɛsusua saji lɛ ahe ekoŋŋ beni nyɛyi enyɔ lɛ fɛɛ tsui eba shi lɛ.

Nyɛhia Shi akɛ Mɛi ni Yeɔ Amɛhe Anɔkwale

16. Mɛni hewɔ gbalafitemɔ ji hiɛdɔɔ sane lɛ?

¹⁶ Hebribii 13:4 kɛɔ akɛ: “Awo gbala hiɛ nyam yɛ nyɛ fɛɛ nyɛteŋ, ni akabule gbala saa hu; shi ajwamaŋbɔlɔi kɛ gbalaŋkulɔi lɛ, Nyɔŋmɔ baakojo amɛ.” Gbala mlikuu ji esha ni afeɔ ashiɔ Nyɔŋmɔ. Ni eyeɔ gbalashihilɛ lɛ awui hu. (1 Mose 39:9) Gbalashihilɛ he ŋaawolɔ ko ŋma akɛ: “Kɛ ana ayoo gbala mlikuu lɛ pɛ lɛ, elooɔ weku muu lɛ fɛɛ tamɔ lasuogbele kpeteŋkpele ko, ekumɔɔ shiai, ni ejwaraa hekɛnɔfɔɔ kɛ bulɛ ni ayɔɔ kɛha he, ni eyeɔ gbekɛbii lɛ awui.” Hɔŋɔɔ loo bɔlɛnamɔ mli helai hu baanyɛ ajɛ mli aba.

17. Mɛɛ gbɛ nɔ aaatsɔ akwa loo akpoo subaŋi ni gbalaa mɔ kɛyaa gbalafitemɔ he lɛ?

¹⁷ Mɛi komɛi woɔ gbalafitemɔ he hewalɛ kɛtsɔɔ amɛhe ni amɛkɛhaa je lɛ susumɔ ni ekpɔtɔ yɛ bɔlɛnamɔ he ni amɛjieɔ lɛ kpo yɛ woji amli, tɛlivishin nɔ, kɛ sinii amli lɛ nɔ. (Galatabii 6:8) Shi saji amlipɛilɔi kɛɔ akɛ, gbalafitemɔ baa, jeee ni aashwe ni akɛ he awo bɔlɛnamɔ mli kɛkɛ, shi moŋ nɔ ko ni ana ni ehe ehia ni akɛtsɔɔ akɛ mɔ lɛ he yɛ fɛo lolo aloo suɔmɔ ni ayɔɔ akɛ aaanu he akɛ asumɔɔ lɛ babaoo. (Okɛto Abɛi 7:18 he.) Bɔ fɛɛ bɔ ni yiŋtoo lɛ ji lɛ, esa akɛ Kristofonyo lɛ akpoo bɔlɛnamɔ mli yaka yiŋsusumɔi. Okɛ ohefatalɔ lɛ agba ohenumɔi ahe sane yɛ anɔkwayeli mli. Kɛ ehe miihia lɛ, taomɔ yelikɛbuamɔ kɛjɛ asafoŋ onukpai lɛ adɛŋ. Nakai feemɔ baanyɛ atsi shigbeemɔ kɛmiibote esha mli lɛ naa. Agbɛnɛ hu, ehe miihia ni Kristofoi akwɛ jogbaŋŋ yɛ be mli ni amɛkɛ nuu loo yoo ko bɔɔ yɛ gbɛ ko nɔ lɛ. Ebaafee nɔ ni teɔ shi woɔ ŋmalɛ mli shishitoo taomɔ nii akɛ ooofee mɔ ni okɛ mɔ ko ebote gbalashihilɛ mli ni yɛ nakai beaŋ nɔŋŋ lɛ okɛ akɔnɔ hiŋmɛi miikwɛ mɔ kroko. (Hiob 31:1; Mateo 5:28) Esa akɛ Kristofoi akwɛ jogbaŋŋ titri yɛ nanemɛi nitsulɔi ni akɛ he aaakpɛtɛ amɛhe yɛ henumɔŋ lɛ mli. Ha tsakpaa ni tamɔ nɛkɛ afee nɔ ni hi kɛkɛ, shi jeee nɔ ni hiɛdɔɔ yɔɔ mli.

18. Yɛ bei pii amli lɛ mɛni bafeɔ bɔlɛnamɔ mli naagbai ni yɔɔ gbalashihlɛ mli lɛ shishifã, ni mɛɛ gbɛ nɔ aaatsɔ asaa enɛɛmɛi?

¹⁸ Enɛ mli yibaamɔ ni da kwraa ji miishɛɛ wekukpaa ni ka shi faŋŋ ni aaaba mɔ lɛ kɛ ehefatalɔ lɛ teŋ. Saji amlipɛilɔi pii kɛɔ akɛ bɔlɛnamɔ mli naagbai efɔɔɔ gbɔmɔtsoŋ nɔ̃ feemɔ tsɔ shi moŋ amɛji nɔ ni jɛɔ sanegbaa kpakpa ni bɛ lɛ mli baa. Naagbai ni tamɔ nɛkɛ efɔɔɔ kaa beni gbalashihilɛ mli hefatalɔi lɛ kɛ amɛhe gbaa sane yɛ faŋŋ mli ni amɛkɛ gbalashihilɛ mli gbɛnaa nii lɛ haa akɛ suɔmɔ kpojiemɔ shi jeee akɛ nitsumɔ ko lɛ.a Teemɔŋ tsakpaa baanyɛ awaje gbalashihilɛ ekomefeemɔ lɛ yɛ shihilɛi kpakpa ni tamɔ nɛkɛ shishi.—1 Korintobii 7:2-5; 10:24.

19. Mɛni ji “emuuyeli kpãa lɛ,” ni mɛɛ hewalɛ ebaanyɛ ena yɛ gbalashihilɛ nɔ?

¹⁹ Suɔmɔ ji “emuuyeli kpaa” ni yɔɔ Kristofoi asafo lɛ mli lɛ. Kɛ ana suɔmɔ lɛ, gbalashihilɛ mli hefatalɔi ni sheɔ Nyɔŋmɔ gbeyei lɛ baanyɛ ‘amɛna amɛha amɛhe ni amɛkɛfa amɛhe yaka.’ (Kolosebii 3:13, 14) Suɔmɔ ni damɔ mla nɔ lɛ taoɔ mɛi krokomɛi ahilɛ-kɛhamɔ. (1 Korintobii 13:4-8) Taomɔ suɔmɔ ni tamɔ nɛkɛ. Ebaaye ebua bo ni owaje ogbalashihilɛ wekukpaa lɛ. Okɛ Biblia shishitoo mlai atsu nii yɛ ogbalashihilɛ mli. Kɛ ofee nakai lɛ, ogbalashihilɛ lɛ baafee ekomefeemɔ ni hiɔ shi daa ni ekɛ yijiemɔ kɛ woo baaba abaha Yehowa Nyɔŋmɔ.

[Shishigbɛ niŋmai]

Te Obaaha Hetoo Oha Tɛŋŋ?

◻ Mɛni hewɔ esa akɛ gbalashihilɛ afee tsakpaa ni hiɔ shi daa lɛ?

◻ Te Biblia lɛ buɔ yitsoyeli kɛ heshibaa ehaa tɛŋŋ?

◻ Mɛɛ gbɛ nɔ gbalashihilɛ mli hefatalɔi aaatsɔ ni amɛha sanegbaa ni yaa nɔ yɛ amɛteŋ lɛ aya hiɛ?

◻ Te gbalashihilɛ mli hefatalɔi aaafee tɛŋŋ atsu gbeekpamɔ ni bɛ amɛteŋ lɛ he nii yɛ Kristofoi agbɛ nɔ?

◻ Mɛni baaye abua ni ewaje gbalashihilɛ tsakpaa lɛ?

[Mfoniri ni yɔɔ baafa 12]

Kɛ esa akɛ eŋa lɛ atsu heloo gbɛfaŋ nitsumɔ lɛ, no lɛ Kristofonyo wu lɛ eŋmɛŋ gbɛ ni eŋa lɛ atere gbɛnaa nii fe bɔ ni eeenyɛ