Nyɔŋmɔ Tsuji—Gbɔmɛi ni Ato Amɛhe Gbɛjianɔ ni Yɔɔ Miishɛɛ
“Miishɛɛ ji maŋ ni e-Nyɔŋmɔ ji Yehowa lɛ!”—LALA 144:15, New World Translation.
1, 2. (a) Mɛni hewɔ Yehowa yɔɔ hegbɛ akɛ efolɔɔ tɛi eshwieɔ shi ehaa etsuji lɛ? (b) Mɛni ji Yehowa sui lɛ ateŋ enyɔ komɛi ni wɔbaasumɔ waa akɛ wɔɔkase?
YEHOWA ji Jeŋ Muu Fɛɛ Maŋtsɛ, Nyɔŋmɔ ofe lɛ, Bɔlɔ lɛ. (1 Mose 1:1; Lala 100:3) Enɛ hewɔ lɛ, eyɛ hegbɛ akɛ efolɔɔ jeŋba he tɛi eshwieɔ shi ehaa etsuji, ejaakɛ ele nɔ ni hi fe fɛɛ kɛha amɛ. (Lala 143:8) Ni lɛ ji amɛ Nɔkwɛmɔ Nɔ ni Fe Fɛɛ ni ehe hiaa ni amɛkase esui lɛ. Bɔfo ko ŋma akɛ: “Nyɛfea Nyɔŋmɔ kaselɔi, tamɔ bii ni asumɔɔ.”—Efesobii 5:1.
2 Nyɔŋmɔ su ko ni ehe hiaa ni wɔkase kɔɔ gbɛjianɔtoo he. ‘Ejeee sakasaka-feemɔ Nyɔŋmɔ.’ (1 Korintobii 14:33) Kɛ wɔje gbɛ wɔkwɛ nibii ni Nyɔŋmɔ ebɔ lɛ jogbaŋŋ lɛ, enyɛɔ wɔnɔ ni wɔmuɔ sane naa akɛ lɛ ji Mɔ ni toɔ gbɛjianɔ fe fɛɛ yɛ jeŋ muu fɛɛ. Shi, Nyɔŋmɔ su kroko ni etaoɔ ni etsuji akase ji miishɛɛ, ejaakɛ lɛ ji “miishɛɛ Nyɔŋmɔ lɛ.” (1 Timoteo 1:11, NW) Enɛ hewɔ lɛ, enyɛmɔ ni ekɛtoɔ gbɛjianɔ lɛ kɛ miishɛɛ ŋmɛɔ pɛpɛɛpɛ. Ekɛ ekome tsuuu nii fe nine ni no aha ekroko lɛ atɔ fã.
3. Te ŋulamii ni jeɔ yɛ ŋwɛi lɛ feɔ Nyɔŋmɔ nyɛmɔ ni ekɛtoɔ gɛjianɔ lɛ he mfoniri ehaa tɛŋŋ?
3 Nibii fɛɛ ni Yehowa efee, kɛjɛ agbo fe fɛɛ nɔ aahu kɛbashi bibioo fe fɛɛ nɔ lɛ, yeɔ odase akɛ eji Nyɔŋmɔ ni toɔ gbɛjianɔ. Akɛ nɔkwɛmɔ nɔ lɛ, susumɔ jeŋ muu fɛɛ ni wɔnaa nɛɛ he okwɛ. Ŋulamii akpekpei akpekpei abɔ yɛ mli. Shi amɛgbɛko amɛshwako hwanyaŋŋ kɛkɛ. Ŋulamii ashibɔlemɔ he mlai ahe nilelɔ George Greenstein wie akɛ “mla ko yɛ bɔ ni ato ŋulamii ahe gbɛjianɔ aha lɛ mli.” Ato amɛhe gbɛjianɔ awo kui ni atsɛɔ amɛ kushai amli, ni ekomɛi hiɛ ŋulamii akpekpei akpei ohai abɔ. Ni abuɔ akɔntaa akɛ ayɛ nɛkɛ ŋulamii kushai nɛɛ akpekpei akpei abɔ! Ato ŋulamii kushai nɛɛ hu ahe gbɛjianɔ, ni abua amɛnaa kutuu (kɛjɛ fioo ko, kɛyashi akpei abɔ), afee amɛ ekome awo ŋulamii kushai akui amli. Ni asusuɔ lolo akɛ ato ŋulamii kushai akui nɛɛ ahe gbɛjianɔ awo kui wuji ni atsɛɔ amɛ akɛ ŋulamii kushai akui wuji amli.—Lala 19:2; Yesaia 40:25, 26.
4, 5. Okɛ gbɛjianɔtoo ni yɔɔ wala bɔɔ nii amli yɛ shikpɔŋ nɔ lɛ he nɔkwɛmɔ nii aha.
4 Anaa bɔ ni ato Nyɔŋmɔ adebɔɔ nii ahe gbɛjianɔ jogbaŋŋ kɛmɔ shi lɛ yɛ he fɛɛ he, jeee yɛ ŋwɛi ni wɔnaa nɛɛ pɛ mli, shi moŋ yɛ shikpɔŋ, kɛ emli wala bɔɔ nii akpekpei akpei abɔ lɛ nɔ hu. Paul Davies, ni ji adebɔɔ mlai ahe tsɔɔlɔ nukpa lɛ, ŋma yɛ enɛɛmɛi fɛɛ he akɛ mɛi ni kwɛɔ nibii nɛɛ “anaa kpɛɔ amɛhe” yɛ “agbojee kɛ gbɛjianɔtoo ni eye emuu kɛmɔ shi ni anaa yɛ je lɛŋ diɛŋtsɛ lɛ he.”—Lala 104:24.
5 Susumɔ “gbɛjianɔtoo ni eye emuu kɛmɔ shi” ni anaa yɛ bɔɔ nii ni wala yɔɔ amɛmli lɛ ahe nɔkwɛmɔ nii fioo nɛɛ ahe okwɛ. Aŋsɔ he datrɛfonyo Joseph Evans wie adesa aŋsɔ lɛ kɛ esɛɛtso lɛ he akɛ: “Bɔ ni anaa ehe gbɛjianɔtoo ni hi jogbaŋŋ kɛmɔ shi lɛ haa mɔ he jɔ̃ɔ ehe waa.” Ni muawai bibii ahe nilelɔ H. J. Shaughnessy wie yɛ wala yibii bibii ni anyɛɛɛ akɛ hiŋmɛii ana lɛ ahe akɛ: “Bɔ ni ato bɔɔ nii bibii kwraa ni akɛ hiŋmɛii enaaa lɛ aje lɛ he gbɛjianɔ aha, ni yɔɔ haŋtsii kɛ fɛo hu lɛ yɛ naakpɛɛ aahu akɛ efeɔ tamɔ nɔ ni eji gbɛjianɔtoo ko ni ajɛ ŋwɛi diɛŋtsɛ akɛha lɛ fã.” Ni wala bɔɔ nii amli molɛkiul he nikaselɔ Michael Denton wie yɛ fɔmɔ su mli hewalɛ (DNA) ni yɔɔ wala yibii amli lɛ he akɛ: “Etsuɔ nii jogbaŋŋ kɛmɔɔ shi akɛ abaanyɛ akɛ saji fɛɛ ni yɔɔ mli . . . ni he hiaa ni akɛtsɔɔ bɔ ni sa akɛ afee bɔɔ nii sɔrɔtoi ni ehi shi pɛŋ yɛ shibɔlemɔ ŋulami lɛ nɔ lɛ henɔi sɔrɔtoi lɛ aha lɛ . . . awo tii awale mli, ni gbɛ baahi awale lɛ mli lolo ni abaanyɛ akɛ nibii ni aŋmala yɛ woji fɛɛ ni aŋmala dã lɛ amli lɛ afata he.”—Kwɛmɔ Lala 139:16.
6, 7. Mɛɛ gbɛjianɔtoo anaa yɛ mumɔŋ bɔɔ nii ateŋ, ni mɛɛ gbɛ nɔ amɛtsɔɔ amɛjieɔ hiɛsɔɔ kpo amɛhaa amɛ-Feelɔ lɛ?
6 Jeee akɛ Yehowa toɔ ebɔɔ nii ni anaa lɛ ahe gbɛjianɔ kɛkɛ, shi moŋ etoɔ emumɔŋ bɔɔ nii ni yɔɔ ŋwɛi lɛ hu ahe gbɛjianɔ. Daniel 7:10 tswaa wɔ adafi akɛ ŋwɛibɔfoi ni yifalɛ shɛɔ ‘akpei nyɔŋma-nyɔŋma toi akpei nyɔŋma damɔɔ shi yɛ Yehowa hiɛ.’ Mumɔŋ bɔɔ nii akpekpei oha ni he wa waa ni miisɔmɔ lɛ, ni aha mɔ fɛɛ mɔ nitsumɔ ni sa lɛ! Eyɛ naakpɛɛ waa akɛ aaasusu hesaa ni ebiɔ ni ana ni akɛto nɛkɛ mɛi babaoo nɛɛ ahe gbɛjianɔ lɛ he. Biblia lɛ wie yɛ gbɛ ni ja jogbaŋŋ nɔ akɛ: “Nyɛjiea Yehowa yi, nyɛ ebɔfoi lɛ, nyɛ hewalɔi ekaalɔi ni yeɔ ewiemɔ nɔ, ni nyɛboɔ ewiemɔ lɛ gbee toi lɛ! Nyɛjiea Yehowa yi, nyɛ [eŋwɛibɔfoi a]tai lɛ fɛɛ, nyɛ esɔɔlɔi ni feɔ esuɔmɔnaa nii lɛ!”—Lala 103:20, 21; Kpojiemɔ 5:11.
7 Kwɛ bɔ ni ato Bɔlɔ lɛ nitsumɔi ahe gbɛjianɔ yɛ naakpɛɛ gbɛ nɔ, ni ehi jogbaŋŋ kɛmɔ shi hu! Ebɛ naakpɛɛ akɛ mumɔŋ bɔɔ nii hewalɔi ni yɔɔ ŋwɛi shihilɛ he lɛ jaje yɛ naakpɛɛ gbɛ nɔ, yɛ heshibaa mli hu akɛ: “Nuŋtsɔ [Yehowa], bo ji mɔ ni sa akɛ oŋɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔ naa amɛyɔɔ ni abɔ amɛ.”—Kpojiemɔ 4:11.
8. Mɛɛ nɔkwɛmɔ nii tsɔɔ akɛ Yehowa toɔ etsuji ni yɔɔ shikpɔŋ nɔ lɛ ahe gbɛjianɔ?
8 Yehowa toɔ etsuji ni yɔɔ shikpɔŋ nɔ lɛ hu ahe gbɛjianɔ. Beni ekɛ Noa gbii lɛ amli Nu Afua lɛ ba yɛ afi 2370 D.Ŋ.B. lɛ, Noa kɛ mɛi krokomɛi kpawo na yibaamɔ kɛfo Nu Afua lɛ akɛ weku ni ato amɛhe gbɛjianɔ. Yɛ Kpojee ni ba yɛ afi 1513 D.Ŋ.B. lɛ hu mli lɛ, Yehowa ha ewebii akpekpei abɔ je kpo kɛjɛ Mizraim nyɔŋyeli mli ni eha amɛ mla gbɛjianɔtoo ko ni atsɔɔ mli fitsofitso, koni ekɛto amɛ daa gbi shihilɛ mli nifeemɔi kɛ jamɔ he gbɛjianɔ. Ni sɛɛ mli, yɛ Shiwoo Shikpɔŋ lɛ hu nɔ lɛ, ato amɛteŋ mɛi akpei nyɔŋmai abɔ he gbɛjianɔ kɛha sɔɔmɔ krɛdɛɛ yɛ sɔlemɔ we lɛ. (1 Kronika 23:4, 5) Yɛ klɛŋklɛŋ afii oha lɛ mli lɛ, ato Kristofoi asafoi ahe gbɛjianɔ yɛ ŋwɛi gbɛtsɔɔmɔ naa: “Ni lɛ nɔŋŋ eha mɛi komɛi tsɔmɔ bɔfoi, ni mɛi komɛi gbalɔi, mɛi komɛi hu sanekpakpa jajelɔi, ni mɛi komɛi hu nɔkwɛlɔi kɛ tsɔɔlɔi, koni aŋɔsaa hetselɔi lɛ aha sɔɔmɔ nitsumɔ lɛ.”—Efesobii 4:11, 12.
Ato Ŋmɛnɛŋmɛnɛ Beaŋ Tsuji Hu Ahe Gbɛjianɔ
9, 10. Te Yehowa eto ewebii ahe gbɛjianɔ yɛ wɔbe nɛɛ mli eha tɛŋŋ?
9 Nakai nɔŋŋ Yehowa eto etsuji ni yɔɔ ŋmɛnɛŋmɛnɛ beaŋ lɛ hu ahe gbɛjianɔ koni amɛnyɛ amɛtsu enitsumɔ ni ekɛha yɛ wɔgbii nɛɛ amli—ni ji e-Maŋtsɛyeli lɛ he sanekpakpa lɛ shiɛmɔ lɛ jogbaŋŋ kɛmɔ shi dani ekɛ amrɔ nɛɛ nibii agbɛjianɔtoo fɔŋ nɛɛ aba naagbee. (Mateo 24:14) Susumɔ nɔ ni fata nɛkɛ jeŋ muu fɛɛ nitsumɔ nɛɛ he, kɛ bɔ ni ehe gbɛjianɔtoo kpakpa he hiaa ha lɛ he okwɛ. Aatsɔse hii, yei, kɛ gbekɛbii akpekpei abɔ koni amɛtsɔɔ mɛi krokomɛi Biblia mli anɔkwalei lɛ. Ni akalaa Bibliai kɛ Biblia kasemɔ he woji babaoo diɛŋtsɛ, koni akɛye abua nɛkɛ tsɔsemɔ nɛɛ. Hɛɛ, amrɔ nɛɛ kɛ aja mli lɛ, Buu-Mɔɔ lɛ eko fɛɛ eko ni akalaa lɛ yibɔ fe akpekpei 16 yɛ wiemɔi sɔrɔtoi 118 mli, kɛ Awake! lɛ hu aaashɛ akpekpei 13 yɛ wiemɔi 73 mli. Shwɛɔ fioo, kulɛ akalaa sɔrɔtoi lɛ fɛɛ yɛ be kometoo mli, ni tsɔɔ akɛ Yehowa tsuji fɛɛ anine shɛɔ sane kometoo lɛ nɔ yɛ be kome mli.
10 Kɛfata he lɛ, ato Yehowa Odasefoi asafoi fe 73,000 ni yɔɔ je lɛŋ fɛɛ lɛ ahe gbɛjianɔ ni amɛkpeɔ daa kɛhaa Biblia mli tsɔsemɔ. (Hebribii 10:24, 25) Amɛyɛ henaabuamɔi wuji hu akpei abɔ—kpokpaa nɔ kpeei kɛ kpokpai wuji anɔ kpeei—daa afi. Ayɛ jeŋ muu fɛɛ tsumaa nitsumɔ kpele hu kɛha Maŋtsɛyeli Asai heei amaamɔ loo ememeji asaamɔ, Kpeei Asai, Betel shiai, kɛ nitsumɔ hei kɛha woji ni akɛkaseɔ Biblia lɛ akalamɔ. Ayɛ skul sɔrɔtoi abɔ kɛha Biblia tsɔɔlɔi atsɔsemɔ ni yaa hiɛ, tamɔ Buu-Mɔɔ Biblia Gilead Skul ni afee kɛha maŋsɛɛ sanekpakpa shiɛlɔi lɛ nɛkɛ, kɛ Gbɛgbalɔi Asɔɔmɔ Skul, ni afeɔ yɛ shikpɔji sɔrɔtoi anɔ yɛ je lɛŋ fɛɛ lɛ.
11. Mɛɛ wɔsɛɛ be mli sɛɛnamɔ baajɛ gbɛjianɔtoo kpakpa ni wɔkaseɔ bianɛ lɛ mli aba?
11 Kwɛ bɔ ni Yehowa eto ewebii ahe gbɛjianɔ jogbaŋŋ yɛ shikpɔŋ lɛ nɔ eha koni ‘amɛgbe amɛsɔɔmɔ lɛ naa kwraa,’ kɛ esɔɔlɔi ŋwɛibɔfoi lɛ ayelikɛbuamɔ! (2 Timoteo 4:5; Hebribii 1:13, 14; Kpojiemɔ 14:6) Nyɔŋmɔ miitsu nɔ kroko hu kɛtsɔ gbɛtsɔɔmɔ ni ekɛhaa etsuji amrɔ nɛɛ yɛ gbɛjianɔtoo kpakpa gbɛi anɔ lɛ nɔ. Aasaa etsuji lɛ jogbaŋŋ kɛmiimɔ shi koni be mli ni amɛaafo nɛkɛ nibii agbɛjianɔtoo nɛɛ naagbee lɛ, no mli lɛ ato amɛhe gbɛjianɔ momo ni amɛbaaje shihilɛ hee shishi yɛ jeŋ hee lɛ mli. Kɛkɛ lɛ, amɛbaaje shishi amɛfee jeŋ muu fɛɛ Paradeiso lɛ, yɛ gbɛjianɔtoo naa yɛ Yehowa gbɛtsɔɔmɔ shishi. Amɛbaafee klalo jogbaŋŋ hu akɛ amɛaatsɔɔ gbɔmɛi akpekpei akpei abɔ ni abaatee amɛ shi kɛjɛ gbohiiaje lɛ Nyɔŋmɔ taomɔ nii kɛha wala lɛ mli fitsofitso.—Yesaia 11:9; 54:13; Bɔfoi lɛ Asaji 24:15; Kpojiemɔ 20:12, 13.
Ato Amɛhe Gbɛjianɔ ni Kɛlɛ Amɛyɛ Miishɛɛ
12, 13. Mɛni hewɔ wɔbaanyɛ wɔkɛɛ akɛ Yehowa sumɔɔ ni ewebii ana miishɛɛ lɛ?
12 Eyɛ mli akɛ Yehowa ji nitsulɔ ni he yɔɔ naakpɛɛ, kɛ gbɛjianɔtolɔ ni he esa jogbaŋŋ moŋ, shi ejeee mɔ ni nuuu nii ahe ehaaa mɔ, mɔ ni yɔɔ kpɛŋŋ, aloo keketee. Shi moŋ, eji mɔ ko ni naa mɔ he miishɛɛ, Mɔ ni yɔɔ miishɛɛ ni esusuɔ wɔ miishɛɛnamɔ he. Klɛŋklɛŋ Petro 5:7 jajeɔ akɛ: “Ejwɛŋɔ nyɛnɔ.” Wɔbaanyɛ wɔna bɔ ni esusuɔ wɔhe kɛ bɔ ni esumɔɔ ni etsuji ana miishɛɛ lɛ yɛ nɔ ni efee eha adesai lɛ mli. Akɛ nɔkwɛmɔ nɔ lɛ, beni Nyɔŋmɔ bɔ nuu kɛ yoo ni amɛye emuu lɛ, ekɛ amɛ wo miishɛɛ paradeiso ko mli. (1 Mose 1:26-31; 2:8, 9) Eha amɛ nɔ fɛɛ nɔ ni he hiaa amɛ ni baaha amɛna miishɛɛ ni fe fɛɛ. Shi amɛlaaje enɛɛmɛi fɛɛ kɛtsɔ atuatsemɔ nɔ. Nɔ ni jɛ amɛ esha lɛ mli ba ji akɛ, wɔna emuu ni ayeee kɛ gbele yɛ wɔfɔmɔ mli.—Romabii 3:23; 5:12.
13 Eyɛ mli akɛ wɔyeee emuu bianɛ moŋ, shi akɛ adesai lɛ, wɔbaanyɛ wɔna miishɛɛ lolo yɛ nɔ ni Nyɔŋmɔ efee lɛ mli. Nibii pii yɛ ni haa mɔ miishɛɛ—gɔji fɛfɛji ni kwɔlɔ; kpaakpoi, faai, ŋshɔi wuji kɛ ŋshɔ naa hei fɛfɛji; fɔfɔii ni hiɛ sui kɛ ŋmai sɔrɔtoi fɛfɛji kɛ kwɛ̃ɛnii sɔrɔtoi abɔ ni aleee amɛfalɛ; niyenii babaoo ni ŋɔɔ; hulu shinyɔɔ ni yɔɔ fɛo waa ni ekwɛmɔ etɔɔɔ wɔ kɔkɔɔkɔ; ŋwɛi ni ŋulamii eje fɛfɛo, ni wɔnáa amɛkwɛmɔ kɛ amɛhe susumɔ he miishɛɛ gbɛkɛnaashi; kooloi sɔrɔtoi abɔ, kɛ amɛbii bibii ni shwɛɔ kɛ miishɛɛ; lalai ni kanyaa mɔ; nitsumɔ ni haa mɔ miishɛɛ ni sɛɛnamɔ hu yɔɔ he; nanemɛi kpakpai. Eyɛ faŋŋ akɛ Mɔ ni to nibii ni tamɔ nɛkɛ he gbɛjianɔ lɛ ji mɔ ko ni yɔɔ miishɛɛ, ni sumɔɔ ni eha mɛi krokomɛi hu ana miishɛɛ.
14. Mɛɛ pɛpɛɛpɛ-ŋmɛɛ Yehowa biɔ yɛ wɔdɛŋ yɛ ekasemɔ mli?
14 Enɛ hewɔ lɛ, jeee gbɛjianɔtoo ni mɔɔ shi jogbaŋŋ pɛ kɛkɛ Yehowa taoɔ. Eetao ni etsuji ana miishɛɛ hu, tamɔ bɔ ni lɛ hu eyɔɔ miishɛɛ lɛ. Etaooo ni amɛkɛ shɛii-feemɔ ato nibii ahe gbɛjianɔ aahu akɛ nakai feemɔ aaafite amɛ miishɛɛnamɔ kwraa. Esa akɛ Nyɔŋmɔ tsuji aha gbɛjianɔtoo mli ŋaa gbɛi kɛ miishɛɛnamɔ aŋmɛ pɛpɛɛpɛ, taakɛ efeɔ lɛ, ejaakɛ he ni emumɔ krɔŋkrɔŋ ni yɔɔ hewalɛ lɛ yɔɔ lɛ, jɛmɛ miishɛɛ hu yɔɔ. Lɛlɛŋ, Galatabii 5:22 tsɔɔ akɛ Nyɔŋmɔ mumɔ krɔŋkrɔŋ lɛ yibii ni ji enyɔ ni tsuɔ nii yɛ ewebii anɔ ji “miishɛɛ.”
Suɔmɔ Kanyaa Miishɛɛnamɔ
15. Mɛni hewɔ suɔmɔ he hiaa waa kɛha wɔ miishɛɛnamɔ lɛ?
15 Eyɛ miishɛɛ waa akɛ aaakadi akɛ Biblia lɛ kɛɔ akɛ: “Nyɔŋmɔ lɛ, suɔmɔ ji lɛ.” (1 Yohane 4:8, 16) Ekɛɛɛ akɛ: “Nyɔŋmɔ lɛ, gbɛjianɔtoo ji lɛ.” Suɔmɔ ji Nyɔŋmɔ su titri fe fɛɛ, ni esa akɛ etsuji akase. No hewɔ ni Nyɔŋmɔ mumɔ lɛ yibii ni ato naa yɛ Galatabii 5:22 lɛ ateŋ klɛŋklɛŋ nɔ ji “suɔmɔ,” no sɛɛ lɛ, “miishɛɛ” lɛ. Suɔmɔ kɛ miishɛɛ baa. Kɛ wɔkase Yehowa suɔmɔ lɛ yɛ bɔ ni wɔkɛ mɛi krokomɛi yeɔ haa lɛ mli lɛ, miishɛɛ nyiɛɔ sɛɛ, ejaakɛ mɛi ni yɔɔ suɔmɔ lɛ yɛ miishɛɛ hu.
16. Te Yesu fee bɔ ni suɔmɔ he hiaa ha lɛ he mfoniri eha tɛŋŋ?
16 Ahaa bɔ ni ehe hiaa ni wɔkase Nyɔŋmɔ suɔmɔ lɛ jeɔ kpo jogbaŋŋ yɛ Yesu tsɔɔmɔi lɛ amli. Ewie akɛ: “Bɔ ni mi-Tsɛ tsɔɔ mi lɛ, nakai miwieɔ.” (Yohane 8:28) Mɛni titri atsɔɔ Yesu, ni lɛ hu etsɔɔ mɛi krokomɛi lɛ? No ji akɛ, kitai wuji enyɔ ni fe fɛɛ ji akɛ, asumɔ Nyɔŋmɔ ni asumɔ naanyo hu. (Mateo 22:36-39) Yesu fee nɛkɛ suɔmɔ nɛɛ he nɔkwɛmɔ nɔ. Ewie akɛ: “Miisumɔ Tsɛ lɛ,” ni ema nɔ mi kɛtsɔ Nyɔŋmɔ suɔmɔnaa nii ni efee kɛyashi gbele mli tɔ̃ɔ lɛ nɔ. Ni etsɔɔ suɔmɔ hu ni eyɔɔ kɛha gbɔmɛi kɛtsɔ gbele ni egbo eha amɛ lɛ nɔ. Bɔfo Paulo kɛɛ Kristofoi ni hi Efeso lɛ akɛ: ‘Kristo sumɔ nyɛ ni eŋɔ lɛ diɛŋtsɛ ehe eha yɛ nyɛhewɔ.’ (Yohane 14:31; Efesobii 5:2) Enɛ hewɔ lɛ, Yesu kɛɛ esɛɛnyiɛlɔi lɛ akɛ: “Enɛ ji mikita, akɛ nyɛsumɔ nyɛhe tamɔ bɔ ni misumɔ nyɛ lɛ.”—Yohane 15:12, 13.
17. Mɛɛ gbɛ nɔ Paulo tsɔɔ yɛ akɛ suɔmɔ ni ajieɔ kpo atsɔɔ mɛi krokomɛi lɛ he miihia?
17 Paulo tsɔɔ bɔ ni nɛkɛ Nyɔŋmɔ suɔmɔ nɛɛ he hiaa ha, ni ekɛɛ: “Kɛji mikɛ gbɔmɛi kɛ ŋwɛibɔfoi alilɛii wieɔ, shi mibɛ suɔmɔ lɛ, kulɛ mitsɔ tamɔ ayawa ni jijeɔ loo ŋmɛlɛ ni gbɛɛɔ. Ni kɛji miyɛ gbalɛ, ni minaa teemɔŋ nii fɛɛ naa, ni mile nii fɛɛ, ni kɛji miyɛ hemɔkɛyeli fɛɛ hu, bɔ ni manyɛ gɔji matsirɛ, shi mibɛ suɔmɔ lɛ, jikulɛ mijeee nɔ ko. Ni kɛji miŋɔ minii fɛɛ mikuma mɛi, ni kɛji miŋɔ migbɔmɔtso miha ni ashã mi, shi mibɛ suɔmɔ lɛ, jikulɛ minaaa sɛɛ ko. . . . Shi agbɛnɛ hemɔkɛyeli, hiɛnɔkamɔ, suɔmɔ, nɛkɛ nii etɛ nɛɛ hiɔ shi; shi suɔmɔ ji amɛteŋ nɔ ni fe fɛɛ.”—1 Korintobii 13:1-3, 13.
18. Mɛni wɔbaanyɛ wɔkpa gbɛ kɛjɛ Yehowa ŋɔɔ, ni haa wɔmiishɛɛ lɛ faa babaoo?
18 Kɛ wɔkase Yehowa suɔmɔ lɛ, wɔbaanyɛ wɔna hekɛnɔfɔɔ yɛ suɔmɔ ni eyɔɔ kɛha wɔ lɛ mli, kɛji wɔtɔ̃ po, ejaakɛ eji “Nyɔŋmɔ musuŋtsɔlɔ kɛ durolɔ ni toɔ tsui, ni mɔbɔnalɛ kɛ anɔkwale fa.” (2 Mose 34:6) Kɛ wɔkɛ anɔkwayeli tsake wɔtsui beni wɔtɔ̃ lɛ, Nyɔŋmɔ ebuuu enɛɛmɛi ahe akɔntaa dɔŋŋ, shi ejɛɔ suɔmɔ mli ekɛkeɔ wɔ. (Lala 103:1-3) Hɛɛ, “Nuŋtsɔ [Yehowa] mli tsɔɔ lɛ babaoo, ni emli jɔ hu.” (Yakobo 5:11) Enɛ ni wɔle lɛ hu fataa he ni ehaa wɔnaa miishɛɛ.
Miishɛɛ ni Yawaa He ko Bianɛ
19, 20. (a) Mɛni hewɔ wɔnyɛŋ wɔna miishɛɛ ni eye muu bianɛ lɛ? (b) Biblia lɛ tsɔɔ akɛ wɔbaanyɛ wɔna miishɛɛ ni yashɛɔ he ko yɛ amrɔ be nɛɛ mli yɛ mɛɛ gbɛ nɔ?
19 Shi, ani abaanyɛ ana miishɛɛ ŋmɛnɛ, akɛni wɔyɔɔ jeŋ ni yɔɔ Satan shishi, ni eyi obɔ kɛ awuiyeli, yiwalɛ, kɛ jeŋba shara nɛɛ naagbee gbii nɛɛ amli, nɔ̃ mli ni wɔkɛ helai kɛ gbele kpeɔ yɛ nɛɛ mli? Yɛ anɔkwale mli lɛ, wɔnyɛŋ wɔkpa gbɛ akɛ wɔɔna miishɛɛ falɛ tamɔ nɔ ni baahi shi yɛ Nyɔŋmɔ jeŋ hee lɛ mli lɛ nɔŋŋ, tamɔ bɔ ni e-Wiemɔ lɛ gbaa efɔɔ shi lɛ, akɛ: “Naa, miibɔ ŋwɛi hee kɛ shikpɔŋ hee, ni akaiŋ tsutsu nii lɛ dɔŋŋ, ni asaŋ ebaŋ jwɛŋmɔ mli dɔŋŋ; shi moŋ nyɛnyaa ni nyɛmli afilia nyɛ kɛyaa naanɔ yɛ nii ni mibɔɔ lɛ hewɔ.”—Yesaia 65:17, 18.
20 Nɔ ni Nyɔŋmɔ tsuji baanyɛ ana bianɛ ji miishɛɛ ni yawaa he ko, ejaakɛ amɛle esuɔmɔnaa nii ni amɛyɛ ejɔɔmɔi ni yɔɔ nyam ni etsɛŋ ni ebaaba yɛ eparadeiso jeŋ hee lɛ mli lɛ he anɔkwa nilee. (Yohane 17:3; Kpojiemɔ 21:4) No hewɔ ni Biblia lɛ baanyɛ awie akɛ: “O Yehowa Zebaot, miishɛɛ ji gbɔmɔ ni ŋɔɔ ehiɛ efɔɔ onɔ lɛ,” “miishɛɛ ji mɔ fɛɛ mɔ ni sheɔ Yehowa gbeyei, ni enyiɛɔ egbɛi lɛ anɔ lɛ,” “miishɛɛ ji mɛi ni he jɔ lɛ, shi amɛaaye shikpɔŋ lɛ nɔ.” (Lala 84:12; 128:1; Mateo 5:5, NW) Enɛ hewɔ lɛ, yɛ amrɔ nɛɛ jaramɔ shihilɛi ni esa akɛ wɔkpee naa lɛ fɛɛ sɛɛ lɛ, wɔbaanyɛ wɔna miishɛɛ falɛ ko kɛ̃. Kɛji nibii fɔji ba wɔnɔ po lɛ, wɔyeee awerɛho tamɔ bɔ ni mɛi ni leee Yehowa, ni amɛbɛ naanɔ wala he hiɛnɔkamɔ lɛ feɔ lɛ.—1 Tesalonikabii 4:13.
21. Yehowa tsuji ahe ni amɛkɛhaa lɛ fataa he ni ehaa amɛmiishɛɛ lɛ faa babaoo yɛ mɛɛ gbɛ nɔ?
21 Yehowa tsuji naa miishɛɛ hu ejaakɛ amɛkɛ amɛbe, hewalɛ, kɛ nibii ni amɛyɔɔ lɛ tsuɔ nii ni amɛkɛtsɔɔ mɛi krokomɛi Biblia mli anɔkwalei lɛ, titri lɛ gbɔmɛi ni ‘dɔmɔɔ ŋtsɔi ni amɛyeɔ ŋkɔmɔ yɛ nihiinii fɛɛ’ ni afeɔ yɛ Satan je lɛŋ lɛ ahewɔ lɛ. (Ezekiel 9:4) Biblia lɛ kɛɔ akɛ: “Miishɛɛ ji mɔ fɛɛ mɔ ni susuɔ ohiafo he; amanehulu gbi nɔ lɛ, Yehowa baajie lɛ kɛjɛ mli. Yehowa diɛŋtsɛ aaabaa eyi ni eeeha eyi ana wala. Abaatsɛ lɛ mɔ ni yɔɔ miishɛɛ yɛ shikpɔŋ lɛ nɔ.” (Lala 41:1, 2, NW) Taakɛ Yesu kɛɛ lɛ, “nɔ hamɔ mli yɛ miishɛɛ fe hemɔ.”—Bɔfoi lɛ Asaji 20:35, NW.
22. (a) Yɛ miishɛɛnamɔ gbɛfaŋ lɛ, okɛ Yehowa tsuji ato mɛi ni sɔmɔɔɔ lɛ lɛ ahe ni akwɛ. (b) Mɛɛ yiŋtoo krɛdɛɛ hewɔ esa akɛ wɔkpa gbɛ akɛ wɔɔna miishɛɛ lɛ?
22 No hewɔ lɛ eyɛ mli akɛ Nyɔŋmɔ tsuji nyɛŋ akpa miishɛɛ ni fe fɛɛ gbɛ yɛ amrɔ be nɛɛ mli moŋ, shi amɛnine baanyɛ ashɛ miishɛɛnamɔ ni mɛi ni sɔmɔɔɔ Nyɔŋmɔ lɛ naaa mli ŋɔɔmɔ lɛ nɔ. Yehowa jaje akɛ: “Naa, mitsuji lɛ aaala kɛ tsuijurɔ, shi nyɛ lɛ nyɛaabolɔ kɛ tsuiŋdɔlɛ, ni nyɛkɛ mumɔ ni ekumɔ aaafo yoo!” (Yesaia 65:14) Agbɛnɛ hu, mɛi ni sɔmɔɔ Nyɔŋmɔ lɛ yɛ yiŋtoo krɛdɛɛ ko kɛha miishɛɛnamɔ bianɛ—amɛyɛ emumɔ krɔŋkrɔŋ lɛ ni “Nyɔŋmɔ ŋɔhaa mɛi ni boɔ lɛ toi [akɛ nɔyelɔ] lɛ.” (Bɔfoi lɛ Asaji 5:32) Ni kaimɔ akɛ, he ni Nyɔŋmɔ mumɔ yɔɔ lɛ, jɛmɛ miishɛɛ hu yɔɔ.—Galatabii 5:22.
23. Mɛni abaasusu he yɛ wɔ nikasemɔ ni nyiɛ sɛɛ lɛ mli?
23 “Onukpai” ni nyiɛɔ hiɛ yɛ asafoi lɛ amli lɛ tsuɔ gbɛfaŋnɔ ni he hiaa waa he nii, yɛ Nyɔŋmɔ tsuji ahe gbɛjianɔtoo lɛ mli ŋmɛnɛ, ni amɛyeɔ amɛbuaa yɛ Yehowa webii amiishɛɛnamɔ mli. (Tito 1:5) Te esa akɛ nɛkɛ gbɔmɛi nɛɛ asusu amɛgbɛnaa nii kɛ wekukpaa ni ka amɛkɛ amɛmumɔŋ nyɛmimɛi hii kɛ yei lɛ ateŋ lɛ he amɛha tɛŋŋ? Wɔ nikasemɔ ni nyiɛ sɛɛ lɛ baasusu enɛ he.
Te Obaaha Hetoo Oha Tɛŋŋ?
◻ Adebɔɔ yeɔ odase akɛ Yehowa eto enibii ahe gbɛjianɔ yɛ mɛɛ gbɛ nɔ?
◻ Mɛɛ gbɛ nɔ Yehowa eto etsuji ahe gbɛjianɔ yɛ tsutsu kɛ ŋmɛnɛŋmɛnɛ beaŋ fɛɛ yɛ?
◻ Mɛɛ pɛpɛɛpɛ-ŋmɛɛ Yehowa taoɔ yɛ wɔdɛŋ?
◻ Te suɔmɔ he hiaa kɛha wɔ miishɛɛnamɔ tɛŋŋ?
◻ Mɛɛ miishɛɛnamɔ wɔbaanyɛ wɔkpa gbɛ yɛ wɔbe nɛɛ mli?
[He ni Mfoniri ni yɔɔ baafa 10 lɛ Jɛ]
Ŋwɛigbɛ: Mɛi ni kɛha ji ROE/Anglo-Australian Observatory, David Malin sha mfoniri lɛ