Adesai Amanehului—Mɛni Hewɔ Nyɔŋmɔ Ŋmɛɔ Gbɛ Lɛ?

BENI adesa yinɔsane jeɔ shishi lɛ, no mli lɛ awerɛho loo piŋmɔ yaafo nui ko kwraa bɛ. Adesa amanehulu ko kwraa bɛ. Aha adesa shishijee ni eye emuu. “Nyɔŋmɔ kwɛ nibii fɛɛ ni efee lɛ, ni naa, ehi naakpa.”—1 Mose 1:31.

Shi mɛi komɛi teɔ shi amɛwoɔ akɛ, ‘Sane ni awieɔ yɛ Adam kɛ Hawa shihilɛ yɛ Eden trom lɛ mli lɛ he lɛ ji adesã ko kɛkɛ.’ Mɔbɔ sane ji akɛ, Kristendom osɔfoi pii kɛɔ nɛkɛ. Shi kɛlɛ, mɔ ko ni nɔ kwɔ waa, ni ji Yesu Kristo diɛŋtsɛ ma nibii ni tee nɔ yɛ Eden lɛ nɔ mi akɛ nɔ ko ni ba yɛ yinɔsane mli. (Mateo 19:4-6) Kɛfata he lɛ, gbɛ pɛ ni aaatsɔ nɔ anu nɔ hewɔ ni Nyɔŋmɔ eŋmɛ adesai amanehului agbɛ lɛ shishi ji ni apɛi nibii ni ba yɛ adesa yinɔsane shishijee mli nɛɛ amli.

Aha klɛŋklɛŋ gbɔmɔ, Adam, nitsumɔ ni haa mɔ miishɛɛ, ni ji Eden trom lɛ kwɛmɔ kɛ ekwramɔ. Agbɛnɛ hu, Nyɔŋmɔ kɛ oti nɛɛ ma ehiɛ akɛ elɛɛ eshia ni ji Eden trom lɛ mli ni efee lɛ miishɛɛ abɔɔ ni kpeleɔ jeŋ muu fɛɛ. (1 Mose 1:28; 2:15) Nyɔŋmɔ ha Adam gbalashihilɛ mli hefatalɔ, koni eye ebua lɛ ni enyɛ etsu nɛkɛ nitsumɔ kpele nɛɛ, ni ekɛɛ amɛ akɛ amɛfɔ, ni amɛyi afa ni amɛye shikpɔŋ lɛ nɔ. Kɛlɛ, nɔ kroko hu he bahia koni eha Nyɔŋmɔ yiŋtoo kɛha shikpɔŋ lɛ kɛ adesai lɛ aye omanye. Akɛni afee lɛ yɛ Nyɔŋmɔ subaŋ nɔ hewɔ lɛ, gbɔmɔ yɛ heyeli ni ekɛhalaa nɔ ni esumɔɔ; no hewɔ lɛ, ehe bahia akɛ gbɔmɔ suɔmɔnaa nii akate shi kɛmiiwo Nyɔŋmɔ nɔ kɔkɔɔkɔ. Kɛ jeee nakai lɛ, basabasa-feemɔ baaba jeŋ muu fɛɛ mli, ni no lɛ, Nyɔŋmɔ yiŋtoo akɛ shikpɔŋ lɛ ayi obɔ kɛ adesai aweku ni yɔɔ toiŋjɔlɛ mli lɛ baŋ mli.

Heshibaa ni aaana aha Nyɔŋmɔ nɔyeli lɛ baaa kɛkɛ. Esa akɛ efee adesai aheyeli lɛ kpojiemɔ ni suɔmɔ yɔɔ mli. Akɛ nɔkwɛmɔ nɔ lɛ, wɔkaneɔ akɛ beni Yesu Kristo kɛ kaa ko ni mli wa waa kpe lɛ, esɔle akɛ: “Ataa, kɛji oosumɔ lɛ, jiemɔ kpulu nɛɛ kɛjɛ minɔ! Shi kɛlɛ, jeee bɔ ni mi misumɔɔ lɛ, shi moŋ bɔ ni bo osumɔɔ.”—Luka 22:42.

Nakai nɔŋŋ hu sɔ̃ ka Adam kɛ Hawa nɔ akɛ amɛma nɔ mi, kɛji amɛmiisumɔ ni amɛba amɛhe shi amɛha Nyɔŋmɔ nɔyeli. Yɛ yiŋtoo nɛɛ hewɔ lɛ, Yehowa Nyɔŋmɔ to gbɛjianɔ kɛha kaa ko ni yɔɔ mlɛo. Atsɛɔ tsei ni yɔɔ trom lɛ mli lɛ ateŋ ekome akɛ “ekpakpa kɛ efɔŋ lee tso lɛ.” Edamɔ shi kɛha hegbɛ ni Nyɔŋmɔ yɔɔ ni ekɛtsɔɔ nɔ ni ji jeŋba ni ja. Yɛ wiemɔ ni yɔɔ faŋŋ mli lɛ, Nyɔŋmɔ gu amɛ nɛkɛ tso pɔtɛɛ nɛɛ nɔ yibii yeli. Kɛ Adam kɛ Hawa gbo toi lɛ, nɔ ni baajɛ mli aba ji amɛgbele.—1 Mose 2:9, 16, 17.

Adesai Amanehului lɛ Shishijee

Gbi ko lɛ, Nyɔŋmɔ mumɔŋ bi ko hiɛ kã he ni ewie eshi gbɛ ni Nyɔŋmɔ tsɔɔ nɔ eyeɔ nɔ lɛ. Ekɛ onufu ko tsu nii akɛ enaawielɔ, ni ebi Hawa akɛ: “Lɛlɛŋ Nyɔŋmɔ kɛɛ akɛ nyɛkaye trom lɛ mli tsei ayibii lɛ fɛɛ eko lɛ?” (1 Mose 3:1) No hewɔ lɛ, etsɔ nɛkɛ gbɛ nɔ edũ yiŋkɔshikɔshi-feemɔ ewo Hawa jwɛŋmɔ mli akɛ ani gbɛ ni Nyɔŋmɔ tsɔɔ nɔ eyeɔ nɔ lɛ ja lo.a Yɛ naajiemɔ mli lɛ, Hawa ha lɛ hetoo ni ja, ni ekase kɛjɛ ewu lɛ ŋɔɔ lɛ. Shi, mumɔŋ bɔɔ nɔ lɛ wie wiemɔ ko ni teɔ shi ewoɔ Nyɔŋmɔ, ni emale yɛ nibii ni jɛɔ toigbele mli baa lɛ he, ni ekɛɛ: “Jeee gboimɔ nyɛaagboi; shi moŋ le Nyɔŋmɔ le akɛ gbi nɔ ni nyɛaaye eko lɛ, nyɛhiŋmɛii aaagbele, ni nyɛaatsɔmɔ tamɔ Nyɔŋmɔ, ni nyɛaale ekpakpa kɛ efɔŋ.”—1 Mose 3:4, 5.

Mɔbɔ sane ji akɛ, alaka Hawa ni esusu akɛ nɔ ni baajɛ toigbele mli aba lɛ, jeee adesa amanehulu, shi moŋ shihilɛ ni hi fe nɔ ni eyɔɔ mli lɛ. Babaoo ni ekwɛɔ tso lɛ yibii lɛ, babaoo ni efeɔ lɛ akɔnɔ ji no, kɛkɛ ni ebɔi yeli. Sɛɛ mli lɛ, ekɛ Adam wie ni etsɔ eyiŋ ni lɛ hu eye eko. Osharai asane ji akɛ, Adam hala akɛ ebaasumɔ ni eya nɔ esa eŋa hiɛ moŋ fe ni eeesa Nyɔŋmɔ hiɛ.—1 Mose 3:6; 1 Timoteo 2:13, 14.

Kɛtsɔ nɛkɛ atuatsemɔ ni ewo he hewalɛ nɛɛ nɔ lɛ, mumɔŋ bɔɔ nɔ lɛ tsɔ ehe mɔ ni teɔ shi ewoɔ Nyɔŋmɔ. Enɛ hewɔ lɛ, abatsɛ lɛ Satan, ni jɛ Hebri wiemɔ ni shishinumɔ ji “shitee-kɛ-wolɔ” mli. Ewie amale wiemɔi yɛ Nyɔŋmɔ he hu, ni ekɛfee ehe mɔ heguɔgbelɔ. No hewɔ lɛ, atsɛɔ lɛ Abonsam hu, kɛjɛ Hela wiemɔ ko ni shishinumɔ ji “naafolɔlɔ” lɛ mli.—Kpojiemɔ 12:9.

Nɛkɛ gbɛ nɔ tsɔ ni adesai amanehului je shishi. Nyɔŋmɔ bɔɔ nii etɛ kɛ amɛ nikeenii ni ji nifeemɔ mli heyeli lɛ etsu nii yɛ gbɛ fɔŋ nɔ, ni amɛhala hiɛjoomɔ gbɛ kɛte shi amɛwo amɛ-Bɔlɔ lɛ. Agbɛnɛ sanebimɔ lɛ bate shi akɛ, Mɛɛ gbɛ nɔ Nyɔŋmɔ baatsɔ atsu nɛkɛ atuatsemɔ nɛɛ he nii yɛ jalɛ gbɛ nɔ, koni no aha ebɔɔ nii ni eshwɛ ni yɔɔ nilee, ní bɔfoi anɔkwafoi ni yɔɔ ŋwɛi, kɛ Adam kɛ Hawa shwiei ni amɛbaana yɛ wɔsɛɛ be mli lɛ fata he lɛ ana hekɛnɔfɔɔ yɛ emli lolo?

Nyɔŋmɔ Hetoo ni Nilee Yɔɔ Mli

Ekolɛ mɛi komɛi baawie akɛ eji Nyɔŋmɔ kpata Satan, Adam, kɛ Hawa hiɛ amrɔ nɔŋŋ kulɛ, no baahi fe fɛɛ. Shi, kulɛ no haŋ ana saji ni atuatsemɔ lɛ tee lɛ shi lɛ anaa. Satan ewie eshi gbɛ ni Nyɔŋmɔ tsɔɔ nɔ eyeɔ nɔ lɛ, ni ewo ŋaa akɛ kɛji adesai tsi amɛhe kwraa kɛjɛ Nyɔŋmɔ nɔyeli shishi lɛ, amɛbaana he sɛɛ waa fe bɔ ni amɛyɔɔ lɛ. Agbɛnɛ hu, omanye ni eye, ni eha klɛŋklɛŋ adesai enyɔ lɛ te shi amɛwo Nyɔŋmɔ nɔyeli lɛ tee sanebimɔi krokomɛi ashi. Akɛni Adam kɛ Hawa fee esha hewɔ lɛ, ani enɛ tsɔɔ akɛ tɔmɔ ko yɛ bɔ ni Nyɔŋmɔ bɔ gbɔmɔ eha lɛ he? Ani Nyɔŋmɔ baanyɛ ana mɔ ko yɛ shikpɔŋ nɛɛ nɔ ni baaya nɔ aye lɛ anɔkwa? Ni Yehowa bii ni ji ŋwɛibɔfoi ni ye Satan atuatsemɔ lɛ he odase lɛ hu? Ani amɛbaafi bɔ ni E-nɔyeli lɛ ja ha lɛ sɛɛ? Eka shi faŋŋ akɛ, be babaoo he miihia koni akɛna nɛkɛ saji nɛɛ anaa. No hewɔ ni Nyɔŋmɔ eŋmɛ Satan gbɛ aahu ni eyɔɔ lolo kɛbashi wɔgbii nɛɛ amli tɔ̃ɔ lɛ.

Adam kɛ Hawa lɛ, Nyɔŋmɔ bu amɛ gbele fɔ, yɛ gbi ni amɛgbo enɔ toi lɛ nɔ nɔŋŋ. No hewɔ lɛ gbele shihilɛ lɛ je shishi. Amɛ shwiei, ni aŋɔ amɛ hɔ beni Adam kɛ Hawa efee esha lɛ sɛɛ lɛ, na esha kɛ gbele akɛ amɛfɔlɔi ni yeee emuu lɛ adɛŋ gboshinii.—Romabii 5:14.

Satan je shishi kɛ klɛŋklɛŋ adesai enyɔ lɛ yɛ emasɛi yɛ sane lɛ mli. Ekɛ be ni aŋmɛ lɛ gbɛ ni ena lɛ miitsu nii koni ekɛbɔ mɔdɛŋ ni ekɛha Adam shwiei fɛɛ aya nɔ ahi ekudɔmɔ shishi. Enyɛ elaka ŋwɛibɔfoi saŋŋ hu yɛ omanyeyeli mli, ni amɛbafata ehe yɛ etuatsemɔ lɛ mli. Shi kɛlɛ, Nyɔŋmɔ bii ŋwɛibɔfoi lɛ ateŋ mɛi babaoo diɛŋtsɛ kɛ anɔkwayeli efi bɔ ni Yehowa nɔyeli ji jalɛ nɔyeli ha lɛ sɛɛ.—1 Mose 6:1, 2; Yuda 6; Kpojiemɔ 12:3, 9.

Sane ni ka shi lɛ ji Nyɔŋmɔ nɔyeli kɛ Satan nɔyeli teŋ mpleshii, ni nakai sane lɛ mli wa waa lolo yɛ Hiob gbii lɛ amli. Nɛkɛ nuu anɔkwafo nɛɛ tsɔ ejeŋba nɔ ema nɔ mi akɛ esumɔɔ Nyɔŋmɔ jalɛ nɔyeli moŋ fe ni eeena Satan heyeli mumɔ lɛ eko, taakɛ gbɔmɛi ni sheɔ Nyɔŋmɔ gbeyei, tamɔ Habel, Henok, Noa, Abraham, Isak, Yakob, kɛ Yosef efee kɛtsɔ hiɛ momo lɛ. Hiob bafee mɔ ko ni sanegbaa ko ni tee nɔ yɛ ŋwɛi, yɛ Nyɔŋmɔ bɔfoi anɔkwafoi lɛ ahiɛ lɛ kɔɔ ehe tɛɛ. Nyɔŋmɔ kɛɛ Satan, yɛ E-jalɛ nɔyeli lɛ sɛɛfimɔ mli akɛ: “Ani oŋɔ otsui ofɔ̃ mitsulɔ Hiob hu nɔ? Ejaakɛ mɔ ko mɔ ko bɛ ni tamɔ lɛ yɛ shikpɔŋ lɛ nɔ, eji nuu ni kpa ko bɛ ehe ni ja, esheɔ Nyɔŋmɔ gbeyei, ni esɔleɔ ehe yɛ efɔŋ he.”—Hiob 1:6-8.

Akɛni ekpɛlɛɛɛ nɔ akɛ aye enɔ kunim hewɔ lɛ, Satan wie akɛ Hiob sɔmɔɔ Nyɔŋmɔ yɛ pɛsɛmkunya yiŋtoi pɛ ahewɔ, ejaakɛ Nyɔŋmɔ ejɔɔ Hiob ni eha ena heloonaa nii babaoo diɛŋtsɛ. No hewɔ lɛ, Satan wie eshi lɛ akɛ: “Shi agbɛnɛ kpã onine mli ni ota enii ni eyɔɔ lɛ fɛɛ he, akɛ ekwaŋ bo yɛ ohiɛ lo.” (Hiob 1:11) Satan tsa nɔ kɛtee hiɛ lolo, ni ewie eshi Nyɔŋmɔ bɔɔ nii ni yɔɔ lɛ fɛɛ emuuyeli mlihiɛmɔ. Ewie akɛ: “Nɔ fɛɛ nɔ ni mɔ ko yɔɔ lɛ eŋɔhaa yɛ ewala hewɔ.” (Hiob 2:4) Jeee Hiob pɛ nɛkɛ naafolɔmɔ wiemɔ ni ewie eshi nɛɛ kɔɔ ehe, shi moŋ Nyɔŋmɔ jalɔi anɔkwafoi fɛɛ ni yɔɔ ŋwɛi kɛ shikpɔŋ lɛ nɔ lɛ hu. Satan miitsɔɔ akɛ kɛji amɛwala yaje oshara mli lɛ, amɛbaaŋmɛɛ amɛkɛ Yehowa teŋ wekukpaa lɛ he.

Yehowa Nyɔŋmɔ yɛ hekɛnɔfɔɔ jogbaŋŋ yɛ Hiob emuuyeli mlihiɛmɔ mli. Beni eyeɔ enɛ he odase lɛ, eŋmɛ Satan gbɛ ni ekɛ adesa amanehului ba Hiob nɔ. Jeee akɛ Hiob jie lɛ diɛŋtsɛ egbɛi he guɔ ni agbe lɛ kɛtsɔ enɔkwayeli lɛ nɔ kɛkɛ, shi moŋ, nɔ ni he hiaa fe no ji akɛ, efi bɔ ni Yehowa maŋtsɛyeli lɛ ji jalɛ nɔ ha lɛ sɛɛ. Ama nɔ mi faŋŋ akɛ amalelɔ ji Abonsam.—Hiob 2:10; 42:7.

Shi kɛlɛ, mɔ ni fee anɔkwayeli he nɔkwɛmɔ nɔ kpakpa fe fɛɛ yɛ kaa shishi ji Yesu Kristo. Nyɔŋmɔ jie e-Bi ni ji ŋwɛibɔfo nɛɛ wala kɛjɛ ŋwɛi kɛbawo obalayoo foro ko fɔmɔ kotoku mli. Enɛ hewɔ lɛ, Yesu naaa esha kɛ emuu ni ayeee lɛ eko yɛ efɔmɔ mli. Shi moŋ, eda ni etsɔ gbɔmɔ ni eye emuu, tamɔ bɔ ni klɛŋklɛŋ gbɔmɔ lɛ ji dani elaaje emuuyeli lɛ pɛpɛɛpɛ. Satan kɛ Yesu fee oti krɛdɛɛ ni ma ehiɛ, ni ekɛ kaai babaoo ba enɔ, ni enaagbee kwraa fee hiɛshishwiemɔ gbele. Shi Satan nyɛɛɛ aku Yesu emuuyeli mlihiɛmɔ lɛ mli. Yesu fi bɔ ni e-Tsɛ lɛ nɔyeli ji jalɛ nɔyeli ha lɛ sɛɛ, aahu kɛmɔ shi. Ema nɔ mi hu akɛ gbɔmɔ Adam ni eye emuu lɛ bɛ naajiemɔ ko kwraa yɛ Satan atuatsemɔ ni eyafata he lɛ mli. Kulɛ Adam baanyɛ aye anɔkwa yɛ ekaa ni yɔɔ bibioo fe enɛ lɛ mli.

Mɛni hu Ama nɔ Mi?

Adesa amanehulu be aaafee afii 6,000 eho kɛjɛ Adam kɛ Hawa atuatsemɔ lɛ sɛɛ kɛbaa nɛɛ. Nyɔŋmɔ eŋmɛ gbɔmɛi adesai agbɛ yɛ nɛkɛ be nɛɛ mli fɛɛ, koni amɛkɛka nɔyelii sɔrɔtoi babaoo amɛkwɛ. Adesai amanehului ni yɔɔ gbeyei, ni eba amɛnɔ lɛ maa nɔ mi akɛ gbɔmɔ nyɛɛɛ aye lɛ diɛŋtsɛ ehe nɔ. Yɛ anɔkwale mli lɛ, amrɔ nɛɛ sakasaka shihilɛ ji nɔ ni yɔɔ shikpɔŋ nɛɛ nɔ hei babaoo. Heyeli kɛmiijɛ Nyɔŋmɔ shishi, ní Satan wo he hewalɛ lɛ, kɛ amanehulu kpele eba.

Ehe ehiaaa ni Yehowa ama nɔ ko nɔ mi aha lɛ diɛŋtsɛ ehe. Ele akɛ gbɛ ni etsɔɔ nɔ eyeɔ nɔ lɛ, jalɛ gbɛ ni, ni efeɔ enɛ yɛ ebɔɔ nii lɛ ahilɛ-kɛhamɔ ni fe fɛɛ hewɔ. Shi kɛlɛ, bɔni afee ni aha sanebimɔi ni Satan atuatsemɔ lɛ tee lɛ shi lɛ fɛɛ ahetoo ni haa mɔ tsui nyɔɔ emli lɛ, eŋmɛ gbɛ koni ebɔɔ nii ni yɔɔ nilee lɛ ana hegbɛ amɛkɛtsɔɔ akɛ amɛsumɔɔ ejalɛ nɔyeli lɛ.

Sɛɛnamɔi ni jɛɔ suɔmɔ ni wɔyɔɔ wɔhaa Nyɔŋmɔ kɛ anɔkwa ni wɔyeɔ lɛ lɛ mli baa lɛ da kwraa fe be kukuoo mli amanehulu ni wɔnaa yɛ Abonsam dɛŋ lɛ. Hiob sane lɛ feɔ enɛ he mfoniri. Yehowa Nyɔŋmɔ tsá Hiob kɛjɛ hela ni Abonsam kɛba enɔ lɛ mli. Kɛfata he hu lɛ, Nyɔŋmɔ “jɔɔ Hiob sɛɛkpee be lɛ fe etsutsu be lɛ.” Yɛ naagbee kwraa, beni aha lɛ wala sɛɛtsɛlɛ afii 140 afata he sɛɛ lɛ, “Hiob gbo, beni egbɔ ni eye gbii pii.”—Hiob 42:10-17.

Kristofonyo Biblia ŋmalɔ Yakobo tsɛɔ jwɛŋmɔ yisɛɛ kɛyaa enɛ nɔ, akɛ: “Nyɛnu Hiob tsuishiŋmɛɛ lɛ he ni nyɛna nɔ ni Yehowa ha ejɛ mli kɛba lɛ, akɛ Yehowa musuŋ tsɔɔ lɛ babaoo kɛ henumɔ, ni eyɛ mɔbɔnalɛ hu.”—Yakobo 5:11, New World Translation, shishigbɛ niŋmaa.

Amrɔ nɛɛ Satan kɛ eje lɛ be eshɛ agbɛnɛ. Etsɛŋ ni Nyɔŋmɔ baatsake amanehulu shihilɛ ni Satan atuatsemɔ lɛ kɛba adesai anɔ lɛ fɛɛ. Abaatee gbohii ashi po. (Yohane 11:25) Kɛkɛ lɛ, hii anɔkwafoi tamɔ Hiob baana hegbɛ akɛ amɛaana naanɔ wala yɛ paradeiso shikpɔŋ nɔ. Nɛkɛ wɔsɛɛ be jɔɔmɔi ni Nyɔŋmɔ baafɔse eshwie etsuji anɔ nɛɛ baabu lɛ bem babaoo kɛfata he, akɛ Maŋtsɛ jalɔ, mɔ ni “musuŋ tsɔɔ lɛ babaoo kɛ henumɔ, ni eyɛ mɔbɔnalɛ hu” lɛlɛŋ.

[Shishigbɛ niŋmai]

[Akrabatsa/Mfonirii ni yɔɔ baafa 8]

GBƆMƐI ANYƆŊMƆI YIWALƆI

BEI pii lɛ afeɔ blema nyɔŋmɔi lɛ ahe mfoniri akɛ mɛi ni la he kumai yeɔ amɛ ni amɛsumɔɔ amɛ diɛŋtsɛ amɛ akɔnɔ nii. Fɔlɔi shãa amɛbii hiɛkalɔi po yɛ la mli ni akɛkpaa amɛ fai. (5 Mose 12:31) Yɛ gbɛ kroko hu kwraa nɔ lɛ, jeŋ nilelɔi wɔŋjalɔi tsɔɔ akɛ Nyɔŋmɔ bɛ henumɔ ko ni tamɔ mlifu loo mɔbɔnalɛ.

Nɛkɛ jeŋ nilelɔi nɛɛ asusumɔi ni jɛ daimonioi amumɔ mli nɛɛ ná Nyɔŋmɔ webii, ni ji Yudafoi lɛ anɔ hewalɛ. Yudafonyo jeŋ nilelɔ Philo, ni hi shi yɛ Yesu beaŋ lɛ, wie akɛ Nyɔŋmɔ “jeee mɔ ko ni henumɔ ko kwraa naa enɔ hewalɛ.”

Yudafoi ajamɔ kuu ni yɔɔ kpɛŋŋ, ni ji Farisifoi lɛ po nyɛɛɛ ajo hewalɛ ni Hela jeŋ nilee naa yɛ mɛi anɔ lɛ naa foi. Amɛkpɛlɛ Plato tsɔɔmɔi ni ekɛba akɛ gbɔmɔ yɛ susuma ni gbooo, ni atsi naa awo adesa gbɔmɔtso mli lɛ nɔ. Kɛfata he lɛ, taakɛ klɛŋklɛŋ afii oha lɛ mli yinɔsaneŋmalɔ Josephus tsɔɔ lɛ, Farisifoi lɛ he amɛye akɛ gbɔmɛi fɔji asusumai “naa amanehulu ni ji toigbalamɔ kɛmiiya naanɔ.” Shi, Biblia lɛ kɛ nɔdaamɔ nɔ ko kwraa haaa kɛha susumɔ ni tamɔ nɛkɛ.—1 Mose 2:7; 3:19; Jajelɔ 9:5; Ezekiel 18:4.

Ni Yesu sɛɛnyiɛlɔi lɛ hu? Ani amɛŋmɛ gbɛ ní wɔŋjalɔi ajeŋ nilee ana amɛnɔ hewalɛ? Beni eyoo nɛkɛ oshara nɛɛ, bɔfo Paulo bɔ enanemɛi Kristofoi lɛ kɔkɔ akɛ: “Nyɛkwɛa nyɛhe ni ahia, koni mɔ ko kɛ jeŋ nilee kɛ yaka shishiumɔ akaŋɔ nyɛ nom, yɛ gbɔmɛi ablema saji kɛ jeŋ nɛŋ shishijee nibii ni jeee Kristo lɛ anaa.”—Kolosebii 2:8; kwɛmɔ 1 Timoteo 6:20 hu.

Awerɛho sane ji akɛ, mɛi ni ji Kristofoi nɔkwɛlɔi ni hi shi yɛ afii ohai enyɔ kɛ afii ohai etɛ lɛ mli lɛ ateŋ mɛi pii tswa nakai kɔkɔbɔɔ lɛ amɛfɔ ni amɛtsɔɔ akɛ Nyɔŋmɔ bɛ henumɔi. The Encyclopedia of Religion lɛ wieɔ akɛ: “Yɛ fɛɛ mli lɛ, anu Nyɔŋmɔ sui lɛ ashishi jogbaŋŋ tamɔ bɔ ni amaa nɔ mi yɛ Yudafoi kɛ nakai beaŋ jeŋ nilee susumɔi amli lɛ . . . Abuɔ susumɔ ni ayɔɔ akɛ Nyɔŋmɔ ni ji Tsɛ lɛ baanyɛ ana henumɔi tamɔ mɔbɔnalɛ lɛ . . . yɛ hei babaoo akɛ nɔ ni akpɛlɛɛɛ nɔ, kɛ hoo lɛ, kɛbashi afii ohai nyɔŋmai-enyɔ nɛɛ naagbee gbɛ.”

Enɛ hewɔ lɛ, Kristendom kpɛlɛ amale tsɔɔmɔ ni ji nyɔŋmɔ yitsoŋwalɔ ni gbalaa eshafeelɔi atoi, kɛtsɔɔ piŋmɔ mli amanehulu ni amɛnaa akɛ hiɛkalɔi kɛyaa naanɔ lɛ nɔ lɛ nɔ. Nɔ ni tamɔɔɔ enɛ lɛ, Yehowa Nyɔŋmɔ jajeɔ yɛ faŋŋ mli yɛ e-Wiemɔ ni ji Biblia lɛ mli akɛ “esha dɛŋ nyɔmɔwoo lɛ, gbele ni,” jeee naanɔ piŋmɔ akɛ hiɛkalɔ.—Romabii 6:23.

[He ni Sane lɛ Jɛ]

Ŋwɛigbɛ: Acropolis Museum, Greece

Mɛi ni kɛha ji The British Museum

[Mfoniri ni yɔɔ baafa 7]

Esa akɛ Nyɔŋmɔ yiŋ ni eto akɛ ebaatsake shikpɔŋ lɛ ni efee lɛ tamɔ Eden paradeiso lɛ aba mli!