Yehowa—Wɔ Tsɛ ni Yɔɔ Musuŋtsɔlɛ kɛ Mɔbɔnalɛ
“Yehowa musuŋ tsɔɔ lɛ babaoo kɛ henumɔ, ni eyɛ mɔbɔnalɛ hu.” —YAKOBO 5:11, New World Translation, shishigbɛ niŋmaa.
1. Mɛni hewɔ heshibalɔi bɛŋkɛɔ Yehowa Nyɔŋmɔ lɛ?
JEŊ muu nɛɛ fɛɛ da aahu akɛ ŋulamii ahe nilelɔi nyɛɛɛ amɛtsɔɔ ŋulamii kushai lɛ ayifalɛ. Wɔ ŋulamii kusha, ni ji Milky Way lɛ, da ni emli lɛɛ aahu akɛ gbɔmɔ adesa nyɛɛɛ akane emli ŋulamii lɛ fɛɛ. Ŋulamii komɛi, tamɔ Antares nɛkɛ, dara ni amɛkpɛɔ kwraa fe wɔ hulu nɛɛ shii akpei abɔ. Kwɛ bɔ ni ŋulamii fɛɛ ni yɔɔ jeŋ muu nɛɛ fɛɛ mli lɛ a-Bɔlɔ Kpeteŋkpele lɛ he baawa aha! Lɛlɛŋ, eji “Mɔ ni jieɔ amɛsafo lɛ kpo yɛ yibɔ naa, ni etsɛɔ amɛ fɛɛ kɛ amɛgbɛi.” (Yesaia 40:26) Ni kɛlɛ, nɛkɛ Nyɔŋmɔ ni he yɔɔ gbeyei kɛ naakpɛɛ nɛɛ “musuŋ tsɔɔ lɛ babaoo kɛ henumɔ, ni eyɛ mɔbɔnalɛ hu.” Kwɛ bɔ ni nɛkɛ nilee nɛɛ haa Yehowa tsuji heshibalɔi lɛ naa miishɛɛ amɛhaa, titri lɛ mɛi ni naa amanehulu yɛ yiwaa, helai, jwɛŋmɔŋ haomɔi, kɛ jaramɔ shihilɛi krokomɛi amli lɛ!
2. Bei pii lɛ, te je nɛŋ bii buɔ musuŋtsɔlɛ henumɔi amɛhaa tɛŋŋ?
2 Mɛi pii susuɔ mlijɔlɛ henumɔi, tamɔ Kristo “musuŋtsɔlɛ kɛ mɔbɔnalɛ” lɛ he akɛ gbɔjɔmɔi. (Filipibii 2:1) Akɛni sutsakemɔ jeŋ nilee naa amɛnɔ hewalɛ hewɔ lɛ, amɛwoɔ mɛi ahewalɛ ni amɛkɛ amɛhe aye klɛŋklɛŋ gbɛhe, kɛji nakai feemɔ tsɔɔ mɛi krokomɛi ahenumɔi anɔnaamɔ po. Mɛi ni akaseɔ amɛ nifeemɔi, yɛ hiɛtserɛjiemɔ kɛ kpɔiaŋgbɔlemɔ mli lɛ ateŋ mɛi saŋŋ etsɔmɔ kakalɔi ni yaafo nui ejɛɛɛ amɛhiŋmɛiiaŋ kɔkɔɔkɔ aloo amɛjieee mɔbɔnalɛ henumɔ ko kwraa kpo. Maŋkwramɔŋ nɔyelɔi komɛi feɔ amɛ nii yɛ nakai gbɛ nɔ. Stoanyo jeŋ nilelɔ Seneca, mɔ ni tsɔɔ maŋtsɛ wulu Nero yiwalɔ lɛ nii lɛ, ma nɔ mi akɛ “musuŋtsɔlɛ lɛ, gbɔjɔmɔ ni.” M’Clintock kɛ Strong Cyclopædia lɛ kɛɔ akɛ: “Hewalɛi ni Stoabii atsɔɔmɔi ena lɛ . . . miiya nɔ eetsu nii lolo yɛ gbɔmɛi ajwɛŋmɔi anɔ, yɛ amrɔ nɛɛ bei nɛɛ amli po.”
3. Te Yehowa wie lɛ diɛŋtsɛ ehe eha Mose tɛŋŋ?
3 Nɔ ni tamɔɔɔ enɛ lɛ, adesai a-Bɔlɔ lɛ su haa mɔ tsui nyaa kɛ miishɛɛ. Etsɔɔ Mose bɔ ni lɛ diɛŋtsɛ eji, kɛ nɛkɛ wiemɔ nɛɛ, akɛ: “Yehowa, Yehowa, Nyɔŋmɔ musuŋtsɔlɔ kɛ durolɔ ni toɔ tsui, ni mɔbɔnalɛ kɛ anɔkwale fa pii, . . . ni ŋɔɔ tɔmɔ kɛ efɔŋ kɛ esha efaa, ni ehaaa mɔ ko mɔ ko aŋɔ ehe aye kwraa.” (2 Mose 34:6, 7) Lɛlɛŋ, Yehowa ma ejalɛ saneyeli lɛ nɔ mi ni ekɛgbe bɔ ni ewie lɛ diɛŋtsɛ ehe eha nɛɛ naa. Ejieŋ eshafeelɔi ni jeɔ gbɛ amɛfeɔ nakai lɛ kɛjɛŋ toigbalamɔ ni sa amɛ lɛ mli. Ni kɛlɛ, ewie lɛ diɛŋtsɛ ehe klɛŋklɛŋ kwraa akɛ Nyɔŋmɔ mɔbɔnalɔ, ni shishinumɔ diɛŋtsɛ ji “eyi obɔ kɛ mɔbɔnalɛ.”
4. Mɛni ji Hebri wiemɔ ní bei pii lɛ atsɔɔ shishi akɛ “mɔbɔnalɛ” lɛ shishinumɔ ni haa mɔ naa miishɛɛ?
4 Bei komɛi lɛ, asusuɔ wiemɔ “mɔbɔnalɛ” lɛ he kɛ kojomɔ saneyeli shishinumɔ ni ejaaa, ákɛ toigbalamɔ ni atsĩɔ naa pɛ. Shi, kɛ wɔkɛ Biblia shishitsɔɔmɔi komɛi to amɛhe lɛ, ehaa Hebri gbɛi su-tsɔɔlɔ ni ana kɛjɛ feemɔ-wiemɔ ra·chamʹ mli lɛ shishinumɔ ko ni yɔɔ miishɛɛ waa jeɔ kpo. Taakɛ woloŋlelɔi komɛi tsɔɔ lɛ, eshishinumɔ diɛŋtsɛ ji “ní afee bɔdɔɔ.” Synonyms of the Old Testament wolo lɛ tsɔɔ mli akɛ: “Racham tsɔɔ musuŋtsɔlɛ henumɔ ko ni mli wa waa, tamɔ nɔ ni wɔnuɔ he yɛ wɔmli kɛ wɔna mɔ ko ni wɔsumɔɔ lɛ waa, ni egbɔjɔ loo eena amanehulu, loo wɔyelikɛbuamɔ he miihia lɛ lɛ.” Abaanyɛ ana nɛkɛ su ni asumɔɔ waa nɛɛ mlitsɔɔmɔi krokomɛi ni haa mɔ tsui nyaa kɛ miishɛɛ lɛ, yɛ Insight on the Scriptures, Volume 2, baafai 375-9.
5. Ajie mɔbɔnalɛ kpo yɛ Mose mla lɛ mli yɛ mɛɛ gbɛ nɔ?
5 Anaa Nyɔŋmɔ musuŋtsɔlɛ lɛ faŋŋ yɛ Mla ni ekɛha Israel maŋ lɛ mli. Esa akɛ akɛ mɛi ni yɔɔ jaramɔ shihilɛi komɛi amli, tamɔ okulafoi, awusai, kɛ ohiafoi lɛ, aye yɛ musuŋtsɔlɛ mli. (2 Mose 22:22-27; 3 Mose 19:9, 10; 5 Mose 15:7-11) Esa akɛ mɛi fɛɛ, ni nyɔji kɛ kooloi po fata he, ana daa otsi Hejɔɔmɔ Gbi lɛ he sɛɛ. (2 Mose 20:10) Kɛfata he lɛ, Nyɔŋmɔ kadiɔ aŋkroaŋkroi ni kɛ ohiafoi yeɔ yɛ mlihilɛ mli lɛ. Abɛi 19:17 kɛɔ akɛ: “Mɔ ni naa ohiafo mɔbɔ lɛ, ekɛmiifa Yehowa; ni nɔ ni eŋɔha lɛ lɛ, eeeto lɛ najiaŋ ekoŋŋ.”
He ni Nyɔŋmɔ Musuŋtsɔlɛ lɛ Yashɛɔ
6. Mɛni hewɔ Yehowa tsu gbalɔi kɛ tsuji kɛtee ewebii aŋɔɔ lɛ?
6 Nyɔŋmɔ gbɛi kã Israelbii lɛ anɔ, ni amɛjaa yɛ sɔlemɔ we ni yɔɔ Yerusalem, ni ji ‘shiã kɛha Yehowa gbɛi lɛ.’ (2 Kronika 2:3; 6:33) Shi, yɛ be ko sɛɛ lɛ, amɛbakpɛlɛ jeŋba shara, wɔŋjamɔ, kɛ gbɔmɔgbee nɔ, ni amɛkɛ heguɔgbee kpele ba Yehowa gbɛi lɛ nɔ. Yɛ emusuŋtsɔlɛ su lɛ kɛ gbeekpamɔ naa lɛ, Nyɔŋmɔ kɛ tsuishitoo ka akɛ ebaasaa nɛkɛ shihilɛ fɔŋ nɛɛ ni ekɛ amanehulu ko baaa maŋ muu lɛ fɛɛ nɔ. “[E]tsuɔ ebɔfoi kɛbaa amɛŋɔɔ, eteɔ shi leebi maaŋkpa etsuɔ amɛ, ejaakɛ emusuŋ tsɔɔ lɛ yɛ emaŋ lɛ kɛ eshihilɛ he lɛ hewɔ. Shi amɛ lɛ, Nyɔŋmɔ bɔfoi lɛ ahe fɛo moŋ amɛyeɔ, ni amɛgbeɔ ewiemɔi lɛ ahe guɔ ni amɛliɔ egbalɔi lɛ aahu kɛyashi beyinɔ ni Yehowa mlifu te shi wo emaŋ lɛ ni tsabaa ko bɛ dɔŋŋ.”—2 Kronika 36:15, 16.
7. Beni Yehowa musuŋtsɔlɛ lɛ yashɛ ehusui ahe lɛ, mɛni ba Yuda maŋtsɛyeli lɛ nɔ?
7 Eyɛ mli akɛ Yehowa musuŋ tsɔɔ lɛ ni emli fuuu mra moŋ, shi kɛ ehe miihia lɛ, ejieɔ jalɛ mlifu kpo. Yɛ nakai beaŋ tɔ̃ɔ lɛ, no mli lɛ Nyɔŋmɔ musuŋtsɔlɛ lɛ etee nɔ aahu kɛshɛ he ni fe fɛɛ ni eeenyɛ eshɛ. Wɔkaneɔ yɛ nibii ni jɛ mli ba lɛ ahe akɛ: “No hewɔ lɛ [Yehowa] yakpala Kaldeabii lɛ amaŋtsɛ lɛ kɛba amɛnɔ, ni ekɛ klante gbegbee amɛbalahii lɛ yɛ amɛ he krɔŋkrɔŋ lɛ shia lɛ, ni emusuŋ etsɔɔɔ lɛ yɛ obalanyo loo obalayoo, nuumo loo wajiatsɛ ko he; etuu amɛ fɛɛ tswɛm ewo edɛŋ.” (2 Kronika 36:17) Enɛ hewɔ lɛ, akpata Yerusalem kɛ esɔlemɔ tsu lɛ hiɛ, ni aŋɔ maŋ lɛ nom kɛtee Babilon.
Musuŋtsɔlɛ yɛ E-Gbɛi lɛ Hewɔ
8, 9. (a) Mɛni hewɔ Yehowa jaje akɛ ebaajie musuŋtsɔlɛ kpo kɛha egbɛi lɛ? (b) Mɛɛ gbɛ nɔ atsɔ aha Yehowa henyɛlɔi lɛ fee dioo?
8 Jeŋmaji ni ebɔlɛ amɛ kɛkpe lɛ nyá yɛ amanehulu nɛɛ he. Amɛkɛ hefɛoyeli wie akɛ: “Yehowa maŋ lɛ nɛ, ni kɛlɛ aha amɛje eshikpɔŋ lɛ nɔ!” Akɛni enu nɛkɛ heguɔgbee nɛɛ he waa hewɔ lɛ, Yehowa jaje akɛ: “Migbɛi krɔŋkrɔŋ lɛ . . . sane dɔ mi. . . . Ni mafee migbɛi kpeteŋkpele lɛ . . . krɔŋkrɔŋ, ni jeŋmaji lɛ aaaná amɛle akɛ mi ji Yehowa lɛ.”—Ezekiel 36:20-23.
9 Beni emaŋ lɛ ehi nomŋɔɔ mli afii 70 sɛɛ lɛ, Yehowa, Nyɔŋmɔ musuŋtsɔlɔ lɛ, jie amɛ ni eŋmɛ amɛ gbɛ koni amɛku amɛsɛɛ, ní amɛyasaa amɛma sɔlemɔ tsu lɛ ekoŋŋ yɛ Yerusalem. Enɛ ha jeŋmaji ni ebɔle amɛ, ni naa kpɛ amɛhe beni amɛna nɔ ni tee nɔ lɛ, fee dioo. (Ezekiel 36:35, 36) Shi, dɔlɛ sane ji akɛ, Israel maŋ lɛ saa ebote nifeemɔi fɔji amli ekoŋŋ. Yudanyo anɔkwafo ko, ni ji, Nehemia, ye ebua koni amɛsaa shihilɛ lɛ. Ewie musuŋtsɔlɛ gbɛ ni Nyɔŋmɔ tsɔ nɔ ekɛ maŋ lɛ ye lɛ he, yɛ maŋ sɔlemɔ ko ni esɔle lɛ mli, ni ekɛɛ:
10. Te Nehemia ma Yehowa musuŋtsɔlɛ lɛ nɔ mi eha tɛŋŋ?
10 “Amɛ haomɔ be lɛ mli lɛ amɛbolɔ amɛtsɛo, ni ojɛ ŋwɛi obo amɛ toi, ni omɔbɔnalɛ babaoo lɛ naa lɛ, oha amɛ yiwalaherelɔi, ní amɛhere amɛ yiwala kɛjɛ amɛhaolɔi lɛ adɛŋ. Shi kɛ amɛná hejɔlɛ pɛ lɛ, amɛyafeɔ efɔŋ yɛ ohiɛ ekoŋŋ, ni oŋmɛɛɔ amɛhe owoɔ amɛhenyɛlɔi lɛ adɛŋ, ni amɛyeɔ amɛnɔ. Shi kɛlɛ kɛ amɛku amɛsɛɛ ni amɛbolɔ amɛtsɛo lɛ, ojɛɔ ŋwɛi oboɔ amɛ toi ni omɔbɔnalɛ babaoo lɛ naa lɛ, ojieɔ amɛ shii abɔ. . . . Oto otsui shi oha amɛ afii pii.”—Nehemia 9:26-30; kwɛmɔ Yesaia 63:9, 10 hu.
11. Mɛɛ sɔrɔtofeemɔ yɔɔ Yehowa kɛ adesai anyɔŋmɔi lɛ ateŋ?
11 Yɛ naagbee kwraa, beni amɛkɛ yiwalɛ ekpoo Nyɔŋmɔ suɔmɔ Bi lɛ sɛɛ lɛ, Yudafoi amaŋ lɛ laaje hegbɛ wulu ni eyɔɔ lɛ kwraa kɛmiiya naanɔ. Anɔkwayeli mli ni Nyɔŋmɔ ejɛ ekɛ ehe ekpɛtɛ amɛhe lɛ ehi shi aahu fe afii 1,500. Efeɔ anɔkwale ni eji akɛ Yehowa ji Nyɔŋmɔ mɔbɔnalɔ lɛlɛŋ lɛ he odaseyeli ni yɔɔ kɛmiiya naanɔ. Kwɛ sɔrɔto-feemɔ ni anaa faŋŋ yɛ ekɛ nyɔŋmɔi yiwalɔi kɛ nyɔŋmɔi ni nuuu nii ahe, ni adesai eshafeelɔi fee lɛ ateŋ!—Kwɛmɔ baafa 8.
Musuŋtsɔlɛ Kpojiemɔ Kpele fe Fɛɛ
12. Mɛni ji Nyɔŋmɔ musuŋtsɔlɛ lɛ kpojiemɔ kpele fe fɛɛ?
12 Nyɔŋmɔ musuŋtsɔlɛ lɛ kpojiemɔ kpele fe fɛɛ ji esuɔmɔ Bi ni etsu lɛ kɛba shikpɔŋ nɛɛ nɔ lɛ. Lɛlɛŋ, Yesu emuuyeli mlihiɛmɔ shihilɛ lɛ kɛ miishɛɛ kpele baha Yehowa, ni eha ena hetoo ni eye emuu eha Abonsam amale naafolɔmɔi lɛ. (Abɛi 27:11) Shi, yɛ nakai beaŋ nɔŋŋ hu lɛ, ŋwanejee ko bɛ he akɛ na ni ena esuɔmɔ Bi lɛ akɛ eena amanehulu ni egbo yiwalɛ kɛ hiɛshishwiemɔ gbele lɛ ha Yehowa nu dɔlɛ babaoo he fe bɔ ni fɔlɔ ko ni ji adesa kɛkpe pɛŋ yɛ shihilɛ mli. Eji afɔleshaa ni suɔmɔ babaoo yɔɔ mli, ni gbeleɔ gbɛ kɛhaa adesai ayiwalaheremɔ. (Yohane 3:16) Taakɛ Zakaria, Yohane Baptisilɔ lɛ tsɛ gba efɔ̃ shi lɛ, ewo “wɔ-Nyɔŋmɔ lɛ mɔbɔnalɛ ni haa emusuŋ tsɔɔ lɛ lɛ” hiɛ nyam.—Luka 1:77, 78.
13. Mɛɛ gbɛ ni he hiaa nɔ Yesu ejie e-Tsɛ lɛ su kpo yɛ?
13 Nyɔŋmɔ Bi lɛ tsumɔ kɛ shikpɔŋ nɛɛ nɔ baa lɛ hu ha adesai ná Yehowa su lɛ he shishinumɔ ni mli kã shi faŋŋ. Yɛ mɛɛ gbɛ nɔ? Kɛ shishinumɔ akɛ, Yesu jie e-Tsɛ lɛ su kpo yɛ gbɛ ni eye emuu nɔ, titri lɛ yɛ mɔbɔnalɛ kɛ musuŋtsɔlɛ gbɛ ni etsɔ nɔ ekɛ ohiafoi ye lɛ nɔ! (Yohane 1:14; 14:9) Yɛ enɛ gbɛfaŋ lɛ, Sanekpakpa ŋmalɔi etɛ, Mateo, Marko, kɛ Luka kɛ Hela feemɔ-wiemɔ, splag·khniʹzo·mai, ni jɛ Hela wiemɔ kɛha “musuŋ nii” mli lɛ tsu nii. Biblia he nilelɔ William Barclay tsɔɔ mli akɛ: “Anaa kɛjɛɔ he ni ana wiemɔ lɛ kɛjɛ lɛ akɛ etsɔɔɔ mɔbɔnalɛ loo musuŋtsɔlɛ folo ko kɛkɛ, shi moŋ henumɔ ko ni tsirɛɔ mɔ kɛyaa bɔ ni esu diɛŋtsɛ ji lɛ mli tɔ̃ɔ. No ji wiemɔ ni mli wa fe fɛɛ yɛ Hela wiemɔ mli kɛha musuŋtsɔlɛ henumɔ namɔ.” Atsɔɔ shishi yɛ gbɛi sɔrɔtoi anɔ akɛ “mimusuŋ miitsɔ mi” loo “emusuŋ tsɔ lɛ.”—Marko 6:34; 8:2.
Beni Yesu Musuŋ Tsɔ Lɛ Lɛ
14, 15. Beni eyɔɔ Galilea maŋ ko mli lɛ, mɛɛ gbɛ nɔ mɔbɔnalɛ tsirɛ Yesu yɛ, ni enɛ feɔ mɛni he mfoniri?
14 He ni sane lɛ ba yɛ ji Galilea maŋ ko mli. Nuu ko “ni ehe eyi obɔ kɛ kpiti” banina Yesu, shi ebɔɔɔ kɔkɔ ni akpaa gbɛ akɛ ebɔ mɛi lɛ. (Luka 5:12) Ani Yesu kɛ bolɔmɔ kã ehiɛ yɛ bolɔmɔ ni ebolɔɔɔ akɛ, “Mihe tseee, mihe tseee,” taakɛ Nyɔŋmɔ Mla lɛ biɔ lɛ hewɔ? (3 Mose 13:45) Dabi. Shi moŋ, Yesu bo nuu lɛ faikpamɔ ni tsɔɔ bɔ ni ehao lɛ toi, akɛ: “Kɛji oosumɔ lɛ, ooonyɛ ohã mihe atse.” Yesu “musuŋ tsɔ lɛ yɛ ehewɔ,” ni ekpa enine mli ni eta kpitiyelɔ lɛ he, ni ekɛɛ: “Miisumɔ. Ohe atse!” Kɛkɛ ni nuu lɛ na hewalɛ amrɔ nɔŋŋ. Enɛ hewɔ lɛ, jeee enaakpɛɛ hewalɛ ni Nyɔŋmɔ eha lɛ lɛ pɛ kɛkɛ Yesu tsɔ nɛkɛ gbɛ nɔ efee lɛ faŋŋ, shi moŋ mɔbɔnalɛ henumɔi ni kanyaa lɛ ni ekɛ nakai hewalɛi lɛ tsuɔ nii lɛ hu.—Marko 1:40-42.
15 Ani esa akɛ ayana Yesu dani ejie musuŋtsɔlɛ henumɔi akpo? Dabi. Sɛɛ mli be ko mli lɛ, ekɛ yarafeelɔi akuu ko kpe ni amɛmiije kpo kɛmiijɛ Nain maŋ lɛ mli. Ŋwanejee ko bɛ he akɛ, Yesu ena yarafeemɔi babaoo kɛtsɔ hiɛ, shi enɛ yɛ awerɛho waa titri. Yoo okulafo ko binuu koome pɛ ni eyɔɔ ji mɔ ni egbo lɛ. Yesu “musuŋ tsɔ lɛ,” ni etee yoo lɛ ŋɔɔ ni ekɛɛ lɛ akɛ: “Kaafo!” Kɛkɛ ni efee naakpɛɛ nii ni ekaaa, ni ji ebinuu lɛ ni etee lɛ shi kɛba wala mli ekoŋŋ lɛ.—Luka 7:11-15.
16. Mɛni hewɔ Yesu musuŋ tsɔ lɛ yɛ gbɔmɛi babaoo ni nyiɛ esɛɛ lɛ ahe lɛ?
16 Nikasemɔ ni sa kadimɔ waa ni wɔnaa kɛjɛɔ nibii ni ba ni awie he kɛtsɔ hiɛ lɛ amli ji akɛ, kɛ Yesu “musuŋ tsɔ lɛ” lɛ, etsuɔ he nii diɛŋtsɛ ni ekɛyeɔ ebuaa. Yɛ sɛɛ mli be ko hu mli lɛ, Yesu kwɛ asafoi babaoo ni nyiɛɔ esɛɛ be fɛɛ be lɛ kɛkpe. Mateo bɔɔ amaniɛ akɛ “emusuŋ tsɔ lɛ yɛ amɛhewɔ, akɛni etɔ amɛ ni amɛfee yuuyaa tamɔ tooi ni bɛ kwɛlɔ lɛ.” (Mateo 9:36) Nɔ ko bibioo pɛ Farisifoi lɛ feɔ yɛ gbɔmɛi foji lɛ amumɔŋ hɔmɔ lɛ he nitsumɔ mli. Nɔ ni amɛfeɔ moŋ ji akɛ, amɛkɛ mlai ni he ehiaaa shwieɔ heshibalɔi lɛ anɔ tamɔ jatsũ. (Mateo 12:1, 2; 15:1-9; 23:4, 23) Amɛjie bɔ ni amɛnaa mɛi foji lɛ amɛhaa lɛ kpo beni amɛwie mɛi ni boɔ Yesu toi lɛ ahe akɛ: “Asafo ni leee mla nɛɛ, alomɔ amɛ” lɛ.—Yohane 7:49.
17. Mɛɛ gbɛ nɔ Yesu musuŋtsɔlɛ kɛha gbɔmɛi lɛ tsirɛ lɛ yɛ, ni mɛɛ gbɛtsɔɔmɔ ni yaa shɔŋŋ ekɛha yɛ jɛmɛ?
17 Nɔ ni tamɔɔɔ nakai lɛ, Yesu nuɔ gbɔmɛi asafoi babaoo lɛ amumɔŋ shihilɛ gbonyo lɛ he waa. Shi mɛi ni yɔɔ wiemɔ lɛ he miishɛɛ lɛ ayi fa kwraa fe bɔ ni ebaanyɛ etsu amɛ fɛɛ amɛhe nii aŋkroaŋkro. No hewɔ lɛ ekɛɛ ekaselɔi lɛ ni amɛsɔle kɛha nitsulɔi babaoo. (Mateo 9:35-38) Yɛ sɔlemɔi ni tamɔ nakai lɛ kɛ gbeekpamɔ naa lɛ, Yesu tsu ebɔfoi lɛ kɛ nɛkɛ shɛɛ sane nɛɛ akɛ: “Ŋwɛi maŋtsɛyeli lɛ eshɛ shi eta.” Famɔi ni ekɛha yɛ nakai beaŋ lɛ ebafee gbɛtsɔɔmɔ ni he yɔɔ sɛɛnamɔ waa kɛha Kristofoi, kɛjɛ nakai beaŋ aahu kɛbashi ŋmɛnɛ. Ŋwanejee ko bɛ he akɛ, Yesu musuŋtsɔlɛ henumɔi lɛ tsirɛɔ lɛ ni etsuɔ adesai amumɔŋ hɔmɔ lɛ he nii.—Mateo 10:5-7.
18. Kɛ gbɔmɛi lɛ ba Yesu ŋɔɔ yɛ eteemɔ he lɛ, te efeɔ enii yɛ he ehaa tɛŋŋ, ni mɛni wɔkaseɔ kɛjɛɔ enɛ mli?
18 Yɛ be kroko hu mli lɛ, Yesu nu asafo babaoo lɛ amumɔŋ hiamɔ nii ahe waa. No mli lɛ, ekɛ ebɔfoi lɛ ejɛ shiɛmɔ gbɛfaa ko amɛba, ni etɔ amɛ waa, ni amɛyatao he ko ni amɛbaajɔɔ amɛhe yɛ. Shi etsɛɛɛ kɛkɛ ni gbɔmɛi lɛ na amɛ. Yɛ nɔ najiaŋ ni Yesu mli aaafu yɛ nɛkɛ amɛteemɔ he nɛɛ baa trukaa lɛ he lɛ, Marko ŋma efɔ shi akɛ “emusuŋ tsɔ lɛ.” Ni mɛni ji yiŋtoo hewɔ ni Yesu nu he waa nakai lɛ? “Amɛtamɔ tooi ni bɛ kwɛlɔ.” Shikome ekoŋŋ lɛ, Yesu tsu ehenumɔi nɛɛ ahe nii, ni ebɔi gbɔmɛi asafo babaoo nɛɛ nitsɔɔmɔ yɛ “Nyɔŋmɔ maŋtsɛyeli lɛ he.” Hɛɛ, amɛmumɔŋ hɔmɔ shihilɛ lɛ tsirɛ lɛ waa, aahu akɛ enɛ ha ekɛ hejɔɔmɔ ni he hiaa lɛ sha afɔle ni ekɛtsɔɔ amɛ nii.—Marko 6:34; Luka 9:11.
19. Yesu henumɔ ni ena eha gbɔmɛi lɛ tee shɔŋŋ fe amɛmumɔŋ hiamɔ nii kɛkɛ yɛ mɛɛ gbɛ nɔ?
19 Eyɛ mli akɛ esusuɔ gbɔmɛi lɛ amumɔŋ hiamɔ nii ahe klɛŋklɛŋ moŋ, shi Yesu ekuuu ehiɛ efɔ̃ɔɔ amɛ heloonaa hiamɔ nii titri lɛ anɔ. Nakai be lɛ mli nɔŋŋ lɛ, “etsá mɛi ni tsamɔ ehia amɛ lɛ.” (Luka 9:11) Yɛ sɛɛ mli be kroko hu mli lɛ, gbɔmɛi asafo babaoo lɛ kɛ lɛ hi shi be kakadaŋŋ, ni amɛkɛ shia jekɛ. Beni enu amɛ heloonaa hiamɔ lɛ he lɛ, Yesu kɛɛ ekaselɔi lɛ akɛ: “Mimusuŋ miitsɔ mi yɛ asafoi lɛ ahewɔ, akɛ ŋmɛnɛ ji gbii etɛ ni amɛkɛ mi ehi shi, ni amɛbɛ nɔ ko ni amɛyeɔ; ni misumɔɔɔ akɛ miwoɔ amɛ gbɛ kɛ hɔmɔ, ni ekolɛ amɛyatɔɔ biti yɛ gbɛ lɛ nɔ.” (Mateo 15:32) Kɛkɛ ni Yesu fee nɔ ko koni ekɛtsĩ amanehulu ni baanyɛ aba amɛnɔ lɛ naa. Etsɔ naakpɛɛ gbɛ nɔ eha hii, yei, kɛ gbekɛbii akpei abɔ lɛ na nii amɛye kɛjɛ niyenii ni ana kɛjɛ abolooi kpawo kɛ looi bibii fioo ko ni yɔɔ lɛ mli.
20. Mɛni wɔkaseɔ kɛjɛɔ Yesu musuŋtsɔlɛ lɛ he naagbee sane ni aŋma afɔ shi lɛ mli?
20 Yesu musuŋtsɔlɛ lɛ he naagbee sane ni aŋma afɔ shi lɛ ba yɛ enaagbee gbɛfaa kɛmiiya Yerusalem lɛ mli. Gbɔmɛi babaoo fata ehe kɛmiifa gbɛ kɛyaye Hehoo lɛ. Beni amɛnyiɛ gbɛ nɔ, yɛ Yeriko masɛi lɛ, shwilafoi nibalɔi enyɔ bolɔ amɛkɛɛ: “Naa wɔ mɔbɔ, Nuntsɔ.” Gbɔmɛi babaoo lɛ ka akɛ amɛaaha amɛfee dioo, shi Yesu tsɛ amɛ ni ebi amɛ nɔ ni amɛtaoɔ ni efee. Ni amɛkpa lɛ fai akɛ: “Nuntsɔ, akɛ agbele wɔhiŋmɛii lɛ!” “[E]musuŋ tsɔ lɛ,” ni etara amɛhiŋmɛii ahe, ni amɛna nii. (Mateo 20:29-34) Mɛɛ nikasemɔ ni he hiaa wɔkaseɔ kɛjɛɔ enɛ mli nɛkɛ! Eshwɛ fioo ni Yesu baaje eshikpɔŋ nɔ nitsumɔ lɛ mli naagbee otsi lɛ shishi. Eyɛ nitsumɔ babaoo ni ebaatsu dani egbo yiwalɛ gbele yɛ Satan najiaŋdamɔlɔi adɛŋ. Ni kɛlɛ, ehaaa nɛkɛ jaramɔ be ni ka ehiɛ nɛɛ he nɔnyɛɛ lɛ atsĩ enaa ni ekajie musuŋtsɔlɛ henumɔi akpo, ní ekɛ adesai ataomɔ nii ni he ehiaaa tsɔ̃ aye najiaŋ.
Abɛbuai ni Maa Musuŋtsɔlɛ nɔ Mi
21. Nuntsɔ lɛ tsulɔ lɛ nyɔmɔ ni da ni efo mli lɛ feɔ mɛni he mfoniri?
21 Akɛ Hela feemɔ-wiemɔ splag·khniʹzo·mai, ni akɛtsu nii yɛ Yesu shihilɛ he saji nɛɛ amli lɛ tsu nii yɛ Yesu abɛbuai lɛ amli etɛ mli. Yɛ sane lɛ ekome mli lɛ, tsulɔ ko kpa fai ni aha lɛ be ni ekɛwo nyɔmɔ ni da ni ehiɛ lɛ. Enuntsɔ lɛ “musuŋ tsɔ lɛ,” ni efo nyɔmɔ ni ehiɛ lɛ mli kwraa. Enɛ feɔ he mfoniri akɛ Yehowa Nyɔŋmɔ ejie musuŋtsɔlɛ kpele kpo, yɛ Kristofoi aŋkroaŋkroi fɛɛ ni naa Yesu kpɔmɔ afɔleshaa lɛ mli hemɔkɛyeli lɛ ahe, yɛ amɛhe eshai ahe nyɔmɔ kpele ni efo mli lɛ hewɔ.—Mateo 18:27; 20:28.
22. Bi nyenyeŋtswi lɛ abɛbua lɛ feɔ mɛni he mfoniri?
22 Agbɛnɛ bi nyenyeŋtswi lɛ he sane lɛ hu yɛ. Kaimɔ nɔ ni ba beni nɛkɛ binuu ni kɔ gbɛ fɔŋ nɛɛ ku esɛɛ kɛba shia lɛ. “Beni enyiɛ shɔŋŋ kɛbaa beebe lɛ, etsɛ na lɛ, ni emusuŋ tsɔ lɛ, ni esha foi eho eyagbee ekuɛ nɔ, ni eshɔshɔɔ enaa.” (Luka 15:20) Enɛ tsɔɔ akɛ kɛ Kristofonyo ko ni ekɔ gbɛ fɔŋ lɛ jie anɔkwa tsuitsakemɔ kpo lɛ, Yehowa musuŋ baatsɔ lɛ, ni ekɛ mɔbɔnalɛ baakpɛlɛ mɔ lɛ nɔ ekoŋŋ. Enɛ hewɔ lɛ, Yesu tsɔ nɛkɛ abɛbuai enyɔ nɛɛ anɔ etsɔɔ akɛ wɔ-Tsɛ, Yehowa, “musuŋ tsɔɔ lɛ babaoo kɛ henumɔ, ni eyɛ mɔbɔnalɛ hu.”—Yakobo 5:11, NW, shishigbɛ niŋmaa.
23. Mɛni wɔkaseɔ kɛjɛɔ Yesu abɛbua ni kɔɔ Samarianyo kpakpa lɛ he lɛ mli?
23 Gbɛ ni ji etɛ ni akɛ splag·khniʹzo·mai tsu nii yɛ nɔ lɛ kɔɔ Samarianyo mɔbɔnalɔ ni “musuŋ tsɔ lɛ” yɛ amanehulu ni Yudanyo ko ni atswa lɛ ojo ni ashi lɛ ni egbo fã kɛ fã lɛ naa lɛ he. (Luka 10:33) Etsu henumɔi nɛɛ ahe nii, ni Samarianyo nɛɛ fee nɔ fɛɛ nɔ ni eeenyɛ ni ekɛye ebua gbɔ lɛ. Enɛ feɔ lɛ faŋŋ akɛ Yehowa kɛ Yesu miikpa anɔkwa Kristofoi agbɛ ni amɛnyiɛ amɛ nɔkwɛmɔ nɔ lɛ sɛɛ, ni amɛjie mlihilɛ kɛ musuŋtsɔlɛ kpo. Abaasusu gbɛi ni wɔɔtsɔ nɔ wɔfee enɛ lɛ ekomɛi ahe yɛ nikasemɔ ni nyiɛ sɛɛ lɛ mli.
Sanebimɔi ni Akɛtiɔ Mli
◻ Ni aaajie mɔbɔnalɛ kpo lɛ tsɔɔ mɛni?
◻ Yehowa jie musuŋtsɔlɛ kpo kɛha egbɛi lɛ yɛ mɛɛ gbɛ nɔ?
◻ Mɛni ji musuŋtsɔlɛ kpojiemɔ kpele fe fɛɛ?
◻ Yesu jieɔ e-Tsɛ lɛ su kpo yɛ mɛɛ gbɛ ni sa kadimɔ jogbaŋŋ nɔ?
◻ Mɛni wɔkaseɔ kɛjɛɔ Yesu musuŋtsɔlɛ nifeemɔi lɛ, kɛ agbɛnɛ kɛjɛɔ ebɛbuai lɛ hu mli?
[Akrabatsa ni yɔɔ baafa 12, 13]
Wiemɔ ni Mli Ka Shi Faŋŋ Kɛha “Suɔmɔ Mlihilɛ Kwɛmɔ”
GBALƆ Yeremia bolɔ akɛ: “Mimusuŋ! oo, mimusuŋ!” Ani eetsɔɔ musuŋ hela ni ena, yɛ niyenii ko ni ehiii ni eyaye hewɔ? Dabi. Yeremia kɛ Hebri mfoniri-feemɔŋ wiemɔ miitsu nii ni ekɛtsɔɔ bɔ ni enuɔ amanehulu ni baa Yuda maŋtsɛyeli lɛ nɔ lɛ he waa ehaa.—Yeremia 4:19.
Akɛni Yehowa Nyɔŋmɔ yɛ henumɔi ni mli kwɔ waa hewɔ lɛ, akɛ Hebri wiemɔ kɛha “musuŋ [nii],” loo “musuŋ kotoku” (me·ʽimʹ), tsu nii yɛ biɛ ni akɛtsɔɔ emusuŋtsɔlɛ henumɔi. Akɛ nɔkwɛmɔ nɔ lɛ, afii nyɔŋmai abɔ ni tsɔ hiɛ dani Yeremia gbii lɛ shɛ lɛ, Ashur maŋtsɛ lɛ baŋɔ Israel akutsei nyɔŋma maŋtsɛyeli lɛ nom kɛtee. Yehowa ŋmɛ enɛ gbɛ akɛ anɔkwale ni amɛyeee lɛ lɛ he toigbalamɔ. Shi ani Nyɔŋmɔ hiɛ kpa amɛ nɔ yɛ nomŋɔɔ mli? Dabi. Etee nɔ ekɛ ehe kpɛtɛ amɛhe lolo akɛ etsuji ni ekɛ amɛ efee kpaŋmɔ lɛ fã. Beni ekɛ akutso ni ale fe fɛɛ ni ji Efraim gbɛi tsɛɔ amɛ lɛ, Yehowa bi akɛ: “Aso mibinuu jurɔ ji Efraim, aloo bi ni mimii shɛɔ ehe ni? Ejaakɛ shii abɔ fɛɛ ni miwieɔ mishiɔ lɛ lɛ, mikaiɔ lɛ kɛ̃; no hewɔ lɛ mimli nɔ́moɔ mi yɛ ehewɔ, mimusuŋ tsɔɔ mi yɛ ehe kɛ̃!”—Yeremia 31:20.
Yɛ wiemɔ ni ewie akɛ “mimli nɔ́moɔ mi” lɛ naa lɛ, Yehowa kɛ mfoniri-feemɔŋ wiemɔ miitsu nii ni ekɛmiitsɔɔ suɔmɔ henumɔi ni mli kwɔ waa ni eyɔɔ kɛha ewebii ni aŋɔ amɛ nom lɛ. Beni ewieɔ nɛkɛ ŋmalɛ kuku nɛɛ he lɛ, afii ohai 19 lɛ mli Biblia he nilelɔ E. Henderson ŋma akɛ: “Nɔ ko bɛ ni baanyɛ afe fɔlɔ henumɔ ni suɔmɔ yɔɔ mli ni ajieɔ lɛ kpo atsɔɔ bi nyenyeŋtswi ni kuɔ esɛɛ ebaa, ni Yehowa feɔ he mfoniri yɛ biɛ lɛ. . . . Eyɛ mli akɛ ewie nɛkɛ eshi [Efraimbii wɔŋjalɔi lɛ] ni egbala amɛtoi moŋ . . . , shi ehiɛ kpaaa amɛnɔ kɔkɔɔkɔ, shi moŋ, nɔ ni tamɔɔɔ nakai lɛ, ena miishɛɛ yɛ gbɛ ni ekpaa akɛ naagbee lɛ amɛbaatsake lɛ mli.”
Akɛ Hela wiemɔ kɛha “musuŋ kotoku,” loo “musuŋ nii” lɛ tsuɔ nii yɛ gbɛ ni tamɔ nakai nɔŋŋ nɔ yɛ Kristofoi a-Hela Ŋmalɛi lɛ amli. Kɛ akɛtsuuu nii tɛɛ, taakɛ eyɔɔ Bɔfoi lɛ Asaji 1:18 lɛ, no lɛ etsɔɔ miishɛɛ henumɔi ni ji suɔmɔ loo musuŋtsɔlɛ. (Filemon 12) Bei komɛi lɛ akɛ wiemɔ lɛ tsaa Hela wiemɔ ni shishinumɔ ji “ekpakpa” loo “jogbaŋŋ.” Bɔfo Paulo kɛ Petro kɛ wiemɔi nɛɛ ni akɛtsa lɛ tsu nii beni amɛwoɔ Kristofoi hewalɛ ni amɛna “suɔmɔ musuŋtsɔlɛ,” ni shishinumɔ diɛŋtsɛ ji “amɛna mɔbɔnalɛ su jogbaŋŋ” lɛ. (Efesobii 4:32; 1 Petro 3:8, NW) Abaanyɛ akɛ Hela wiemɔ kɛha “musuŋ kotoku” lɛ atsa Hela wiemɔ pol·yʹ nɔ. Wiemɔi enyɔ ni akɛtsa nɛɛ shishinumɔ diɛŋtsɛ ji “ni ana musuŋ kotoku pii.” Akɛ nɛkɛ Hela wiemɔ ni akɛfɔɔɔ nitsumɔ nɛɛ tsu nii shikome pɛ yɛ Biblia lɛ mli, ni ekɔɔ Yehowa Nyɔŋmɔ he. New World Translation lɛ tsɔɔ shishi akɛ: “Yehowa mli tsɔɔ lɛ waa yɛ suɔmɔ mli.”—Yakobo 5:11.
Kwɛ bɔ ni sa akɛ wɔda shi wɔha akɛ mɔ ni he wa fe fɛɛ yɛ jeŋ muu fɛɛ, Yehowa Nyɔŋmɔ, tamɔɔɔ nyɔŋmɔi yiwalɔi ni gbɔmɛi ni bɛ musuŋtsɔlɛ lɛ fee lɛ kwraa! Yɛ amɛ-Nyɔŋmɔ ni yɔɔ “suɔmɔ musuŋtsɔlɛ” lɛ kasemɔ mli lɛ, enɛ tsirɛɔ anɔkwa Kristofoi ni amɛfeɔ amɛnii yɛ nakai gbɛ nɔ, yɛ bɔ ni amɛkɛ amɛhe yeɔ haa lɛ mli.—Efesobii 5:1.
[Mfoniri ni yɔɔ baafa 10]
Beni Nyɔŋmɔ musuŋtsɔlɛ lɛ yashɛ enaagbee lɛ, Yehowa ŋmɛ Babilonbii lɛ gbɛ ni amɛbaye etsuji ni ekɔ gbɛ fɔŋ lɛ anɔ kunim
[Mfoniri ni yɔɔ baafa 11]
Eka shi faŋŋ akɛ esuɔmɔ Bi lɛ gbele ni ena lɛ ha Yehowa Nyɔŋmɔ nu dɔlɛ babaoo he fe bɔ ni eba mɔ ko nɔ dã
[Mfoniri ni yɔɔ baafa 15]
Yesu jie e-Tsɛ lɛ musuŋtsɔlɛ su lɛ kpo yɛ gbɛ ni eye emuu nɔ