Wɔmiiye Awerɛho Moŋ, Shi Wɔ Jeee Mɛi ni Bɛ Hiɛnɔkamɔ

“Wɔmiisumɔ akɛ nyɛle mɛi ni ewɔ lɛ ahe sane, koni nyɛkaye ŋkɔmɔ tamɔ mɛi ni eshwɛ lɛ, mɛi ni bɛ hiɛnɔkamɔ ko lɛ.”—1 TESALONIKABII 4:13.

 1. Mɛni adesai kɛkpeɔ be fɛɛ be?

ANI olaaje osuɔlɔ ko yɛ gbele mli pɛŋ? Afii abɔ ni wɔye kɔɔɔ he eko, wɔteŋ mɛi pii eye awerɛho yɛ wɔwekunyo loo naanyo ko gbele he dã. Ekolɛ wɔnii loo wɔnaa, aloo fɔlɔ, gbalashihilɛ mli hefatalɔ, loo wɔbi. Gbɔlɛ, hela, kɛ osharai kɛ gbele baa be fɛɛ be. Awuiyeli, yiwalɛ, kɛ ta hu haa amanehulu ni wɔnaa kɛ awerɛho ni wɔyeɔ lɛ faa babaoo. Kɛ aja mli lɛ, mɛi fe akpekpei 50 gboiɔ daa afi yɛ je lɛŋ fɛɛ. Kɛ aja mli lɛ, mɛi ni gboi daa gbi yɛ 1993 mli ji mɛi 140,250. Mɛi abɔ ni gbele ŋɔɔ kɛyaa lɛ saa nanemɛi kɛ wekumɛi ahe, ni awerɛho ni ayeɔ lɛ mli wa waa.

 2. Mɛni jeee adebɔɔ naa nii yɛ gbekɛbii agbele he?

² Ani wɔmusuŋ eshaŋ wɔ haŋ fɔlɔi komɛi ni jɛ California, U.S.A., ni kɛ dɔlɛ babaoo laaje amɛbiyoo ni hiɛ musu yɛ tsɔne mli oshara ko ni ba trukaa mli lɛ? Nii ni ba trukaa ni amɛkpaaa gbɛ nɛɛ ha amɛlaaje amɛbiyoo koome pɛ ni amɛyɔɔ lɛ kɛ abifao ni baafee amɛ klɛŋklɛŋ nabi lɛ. Yoo ni na amanehulu nɛɛ wu laaje eŋa kɛ ekromɔ bi nuu loo yoo ni abaafɔ lɛ lɛ. Ákɛ fɔlɔi aaana ni amɛbi aaagbo ashi amɛ, kɛ eji abifao loo eda saŋŋ lɛ, jeee nɔ ni fɔɔ kaa. Ejeee adebɔɔ naa nii akɛ bii aaagboi dani amɛfɔlɔi agboi. Wɔteŋ mɔ fɛɛ mɔ sumɔɔ wala. No hewɔ lɛ, gbele ji henyɛlɔ lɛlɛŋ.—1 Korintobii 15:26.

Gbele Bote Adesai Aweku lɛ Mli

 3. Te ekolɛ Habel gbele sa Adam kɛ Hawa he eha tɛŋŋ?

³ Esha kɛ gbele eye nɔ akɛ maŋtsɛmɛi aaafee afii akpei ekpaa yɛ adesai ayinɔsane mli, kɛjɛ wɔ klɛŋklɛŋ fɔlɔi adesai, Adam kɛ Hawa atuatsemɔ lɛ nɔ kɛbaa. (Romabii 5:14; 6:12, 23) Biblia lɛ ekɛɛɛ wɔ bɔ ni amɛfee yɛ amɛbinuu Habel ni enyɛmi Kain gbe lɛ lɛ he. Yɛ yiŋtoi ni fe ekome hewɔ lɛ, eka shi faŋŋ akɛ efee niiashikpamɔ ko ni sa amɛhe waa. Biɛ ji he ni amɛna gbɔmɔ adesa gbele yɛ klɛŋklɛŋ kwraa, ni ji amɛ diɛŋtsɛ amɛ binuu gbele. Amɛna nibii ni jɛ amɛ atuatsemɔ lɛ kɛ amɛheyeli ni amɛtee nɔ amɛkɛtsu nii yɛ gbɛ fɔŋ nɔ lɛ mli kɛba. Yɛ kɔkɔbɔi ni jɛ Nyɔŋmɔ ŋɔɔ lɛ fɛɛ sɛɛ lɛ, Kain hala akɛ eeefee mɔ klɛŋklɛŋ ni gbe lɛ diɛŋtsɛ enyɛmi. Wɔle akɛ Habel gbele baasa Hawa he waa ejaakɛ beni efɔ Set lɛ, ewie akɛ: “Nyɔŋmɔ eŋɔ seshi kroko eto mi Habel najiaŋ, ejaakɛ Kain egbe lɛ.”—1 Mose 4:3-8, 25.

 4. Mɛni hewɔ blema adesã ni kɔɔ susuma ni gbooo he lɛ nyɛɛɛ afee miishɛjemɔ nɔ yɛ Habel gbele sɛɛ lɛ?

⁴ Agbɛnɛ hu wɔ klɛŋklɛŋ fɔlɔi adesai lɛ kɛ Nyɔŋmɔ fɔbuu kojomɔ ni ejaje eshwie amɛnɔ lɛ kpe hiɛ-kɛ-hiɛ—ákɛ kɛ amɛtse atua ni amɛgbo toi lɛ, ‘gboimɔ amɛaagboi.’ Yɛ Satan amale lɛ fɛɛ sɛɛ lɛ, eyɛ faŋŋ akɛ no mli lɛ blema adesã ni kɔɔ susuma ni gbooo he lɛ bako, no hewɔ lɛ amɛnyɛɛɛ amɛna amale hiɛnɔkamɔ ko kɛjɛ mli. Nyɔŋmɔ ekɛɛ Adam akɛ: “Oooku osɛɛ kɛaatee shikpɔŋ su mli, ejaakɛ emli ajieo kɛjɛ. Ejaakɛ su jio, ni su mli oooku osɛɛ kɛaatee.” Etsiii wɔsɛɛ shihilɛ ko tã akɛ susuma ni gbooo yɛ ŋwɛi, hɛl, Limbo, hetsuumɔ he, aloo yɛ he kroko. (1 Mose 2:17; 3:4, 5, 19) Akɛ wala susumai ni efee esha lɛ, yɛ naagbee lɛ Adam kɛ Hawa baagboi ni amɛhiŋ shi dɔŋŋ. Akɛ mumɔ tsirɛ Maŋtsɛ Salomo ni eŋma akɛ: “Hiɛkalɔi le akɛ amɛbaagboi; shi gbohii lɛ, amɛleee nɔ ko nɔ ko, ni amɛbɛ nyɔmɔwoo ko dɔŋŋ, ejaakɛ hiɛ eje amɛkaimɔ nɔ. Amɛsuɔmɔ jio, amɛnyɛɛ jio, amɛwuŋayeli jio, fɛɛ eho etee jeeŋmɔ beebe, ni amɛbɛ gbɛfaŋnɔ ko dɔŋŋ kɛmiiya naanɔ yɛ nii fɛɛ ni afeɔ yɛ hulu shishi nɛɛ mli.”—Jajelɔ 9:5, 6.

 5. Mɛni ji anɔkwa hiɛnɔkamɔ kɛha gbohii lɛ?

⁵ Kwɛ bɔ ni nakai wiemɔi lɛ ji anɔkwale ha! Lɛlɛŋ, namɔ nyɛɔ ekaiɔ blematsɛmɛi ni ehi shi afii ohai enyɔ loo afii ohai etɛ ni eho nɛ? Bei pii lɛ, aleee he ni amɛ gbonyo bui po yɔɔ, aloo ajie yɛ jwɛŋmɔŋ jeeŋmɔ. Ani no tsɔɔ akɛ hiɛnɔkamɔ ko bɛ kɛha wɔsuɔlɔi ni egboi lɛ? Dabi, etsɔɔɔ nakai. Marta kɛɛ Yesu yɛ enyɛminuu Lazaro ni egbo lɛ he akɛ: “Mile akɛ ebaate shi yɛ gbohiiashitee lɛ mli yɛ naagbee gbi lɛ nɔ.” (Yohane 11:24) Hebribii lɛ le akɛ Nyɔŋmɔ batee gbohii lɛ ashi yɛ wɔsɛɛ be ko mli. Shi kɛlɛ, no etsiii amɛnaa yɛ amɛsuɔlɔ ko gbele he awerɛho ni amɛaaye lɛ he.—Hiob 14:13.

Anɔkwafoi ni Ye Awerɛho

 6, 7. Te Abraham kɛ Yakob fee amɛnii yɛ gbele he amɛha tɛŋŋ?

⁶ Aaafee afii akpei ejwɛ nɛ, beni Abraham ŋa Sara gbo lɛ, “Abraham baye Sara he ŋkɔmɔ ni ebafo lɛ.” Nakai Nyɔŋmɔ tsulɔ anɔkwafo lɛ jie ehenumɔi ni mli kwɔ kpo yɛ eŋa anɔkwafo ni esumɔɔ lɛ lɛ gbele he. Eyɛ mli akɛ eji nuu ni jieɔ ekaa kpo waa moŋ, shi efeee lɛ hiɛgbele akɛ eeejie ewerɛhoyeli lɛ kpo yɛ yaafo nui amli.—1 Mose 14:11-16; 23:1, 2.

⁷ Nakai nɔŋŋ ebalɛ yɛ Yakob hu gbɛfaŋ. Beni alaka lɛ ni ehe eye akɛ kooloo awuiyelɔ ko egbe ebinuu Yosef lɛ, te efee enii yɛ he eha tɛŋŋ? Wɔkaneɔ yɛ 1 Mose 37:34, 35 akɛ: “Ni Yakob gbala ehe atade lɛ, ni ekɔ kpekpe emia ehɛ, ni eye ebi lɛ he ŋkɔmɔ gbii pii. Ni ebihii lɛ kɛ ebiyei lɛ fɛɛ te shi, koni amɛbashɛje emii, shi ekpɛlɛɛɛ miishɛjemɔ, ni ekɛɛ: ‘Ŋkɔmɔyeli mikɛaakpeleke shi kɛyanina mibi lɛ yɛ gbohiiaje.’ Ni etsɛ fó lɛ.” Hɛɛ, eji adesa henumɔ kɛ adebɔɔ su fɛɛ akɛ aaaye awerɛho yɛ mɔ ko ni asumɔɔ lɛ lɛ gbele hewɔ.

 8. Mɛɛ gbɛ nɔ bei pii lɛ, Hebribii lɛ jieɔ amɛ awerɛhoyeli kpo yɛ?

⁸ Ekolɛ mɛi komɛi baasusu akɛ yɛ ŋmɛnɛŋmɛnɛ beaŋ shihilɛ loo kusumii anaa lɛ, awo bɔ ni Yakob fee yɛ he lɛ he kɛteke nɔ tsɔ. Shi eji mɔ ko ni hi shi yɛ be kɛ kusum sɔrɔto ko mli. Bɔ ni ejie ewerɛhoyeli lɛ kpo—ni ji kpekpe ni ebu lɛ—ji klɛŋklɛŋ ni atsi nifeemɔ nɛɛ tã yɛ Biblia lɛ mli. Shi kɛlɛ, taakɛ atsɔɔ mli yɛ Hebri Ŋmalɛi lɛ amli lɛ, ajieɔ ŋkɔmɔyeli kpo kɛtsɔɔ yaafo, yaafo lalai afolɔmɔ, kɛ lamulu mli tamɔ nɔ. Eka shi faŋŋ akɛ atsiii Hebribii lɛ anaa yɛ awerɛhoyeli ni amɛaajie lɛ kpo yɛ gbɛ kpakpa nɔ lɛ gbɛfaŋ.a—Ezekiel 27:30-32; Amos 8:10.

Awerɛhoyeli yɛ Yesu Beaŋ

 9, 10. (a) Te Yesu fee enii yɛ Lazaro gbele lɛ he eha tɛŋŋ? (b) Bɔ ni Yesu fee enii lɛ kɛɔ wɔ mɛni yɛ ehe?

⁹ Mɛni wɔbaanyɛ wɔkɛɛ yɛ Yesu mra be mli kaselɔi lɛ ahe? Akɛ nɔkwɛmɔ nɔ lɛ, beni Lazaro gbo lɛ, enyɛmimɛi yei Marta kɛ Maria kɛ yaafo nui ye egbele lɛ he awerɛho. Ni te Yesu, ni ji nuu ni eye emuu lɛ fee enii eha tɛŋŋ beni eyashɛ jɛmɛ lɛ? Yohane sane ni eŋma yɛ he lɛ kɛɔ akɛ: “Agbɛnɛ, beni Maria ba he ni Yesu yɔɔ lɛ ni ena lɛ lɛ, eho egbee enaji anaa, ni ekɛɛ lɛ akɛ: ‘Nuntsɔ, eji oyɛ biɛ kulɛ, minyɛmi lɛ naaa agbo.’ Agbɛnɛ, beni Yesu na lɛ akɛ eefó, ni Yudafoi lɛ hu ni kɛ lɛ ba lɛ, akɛ amɛ hu amɛmiifó lɛ, ehũŋ yɛ emumɔ mli ni ekpokpo; ni ekɛɛ: ‘Nɛgbɛ nyɛto lɛ yɛ?’ Amɛkɛɛ lɛ akɛ: ‘Nuŋtsɔ, ba ni obakwɛ.’ Ni Yesu fó.”—Yohane 11:32-35.

¹⁰ “Ni Yesu fó.” Nɛkɛ wiemɔi fioo pɛ nɛɛ jieɔ nibii babaoo kpo yɛ Yesu su, kɛ emlihilɛ kɛ henumɔ ni eyɔɔ lɛ he. Eyɛ mli akɛ Yesu le gbohiiashitee he hiɛnɔkamɔ lɛ jogbaŋŋ kɛmɔ shi moŋ, shi “Yesu fó.” (Yohane 11:35, King James Version) Sane lɛ yaa nɔ ewieɔ akɛ mɛi fɛɛ ni na nɔ ni tee nɔ lɛ wie akɛ: “Kwɛ bɔ ni edɔɔ [Lazaro] he!” Eka shi faŋŋ akɛ, kɛ Yesu ni eye emuu lɛ fo yɛ enaanyo gbele hewɔ lɛ, no lɛ ejeee hiɛgbele kɛji nuu loo yoo ko miiye awerɛho ni eefo ŋmɛnɛ.—Yohane 11:36.

Mɛɛ Hiɛnɔkamɔ Yɔɔ Kɛha Gbohii Lɛ?

11. (a) Mɛni wɔbaanyɛ wɔkase kɛjɛ Biblia mli nɔkwɛmɔ nii ni kɔɔ awerɛhoyeli he lɛ mli? (b) Mɛni hewɔ ni wɔyeee ŋkɔmɔ tamɔ mɛi ni bɛ hiɛnɔkamɔ lɛ?

¹¹ Mɛni wɔbaanyɛ wɔkase kɛjɛ Biblia mli nɔkwɛmɔ nii nɛɛ amli? Ákɛ eji adesa kɛ adebɔɔ su fɛɛ akɛ aaaye awerɛho, ni esaaa akɛ efeɔ wɔ hiɛgbele akɛ wɔɔha mɛi ana akɛ wɔmiiye awerɛho. Kɛji gbohiiashitee hiɛnɔkamɔ lɛ ewaje wɔ waa po lɛ, suɔlɔ gbele ji nɔ ko ni wɔlaajeɔ ni wɔnuɔ he waa diɛŋtsɛ. Afii abɔ, ekolɛ afii nyɔŋmai abɔ ni nyɛkɛfee ekome kɛhi shi aahu lɛ baa naagbee trukaa yɛ amanehulu mli. Eji anɔkwale akɛ, wɔyeee awerɛho tamɔ bɔ ni mɛi ni bɛ hiɛnɔkamɔ, aloo mɛi ni yɔɔ hiɛnɔkamɔi ni ejaaa lɛ yeɔ awerɛho lɛ. (1 Tesalonikabii 4:13) Agbɛnɛ hu, blema adesãi ni atãa akɛ gbɔmɔ yɛ susuma ni gbooo, aloo eyaa nɔ eyahiɔ shi yɛ he kroko kɛtsɔ blamɔ kɛ efɔmɔ ekoŋŋ nɔ lɛ lakaaa wɔ. Wɔle akɛ Yehowa ewo shi yɛ ‘ŋwɛi hee kɛ shikpɔŋ hee ni jalɛ hiɔ mli’ he. (2 Petro 3:13) Ni Nyɔŋmɔ “aaatsumɔ [wɔ]hiɛaŋ yaafo nui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:4.

12. Te Paulo wie gbohiiashitee lɛ mli hemɔkɛyeli ni eyɔɔ lɛ he eha tɛŋŋ?

¹² Mɛɛ hiɛnɔkamɔ yɔɔ kɛha mɛi ni egboi lɛ?b Akɛ mumɔ tsirɛ Kristofonyo niŋmalɔ Paulo koni eshɛje wɔmii ni eha wɔ hiɛnɔkamɔ hu, beni eŋma akɛ: “Naagbee henyɛlɔ ni abaafo esɛɛ ji gbele.” (1 Korintobii 15:26) The New English Bible lɛ kɛɔ akɛ: “Naagbee henyɛlɔ ni abaagu kwraa ji gbele.” Mɛni hewɔ Paulo nyɛ ena nɔmimaa waa yɛ enɛ he lɛ? Ejaakɛ mɔ ni tsake lɛ kɛba jamɔ lɛ mli ni etsɔɔ lɛ nii hu ji mɔ ni atee lɛ shi kɛjɛ gbohii ateŋ lɛ, Yesu Kristo. (Bɔfoi lɛ Asaji 9:3-19) No hewɔ hu ni Paulo nyɛ ewie akɛ: “Ejaakɛ bɔ ni gbele tsɔ gbɔmɔ [Adam] nɔ kɛba lɛ, nakai nɔŋŋ shitee hu tsɔ gbɔmɔ [Yesu] nɔ kɛba. Ejaakɛ taakɛ bɔ ni Adam mli, ni mɛi fɛɛ gboiɔ yɛ lɛ, nakai nɔŋŋ kɛ̃ Kristo mli ni amɛ fɛɛ amɛyi aaana wala yɛ.”—1 Korintobii 15:21, 22.

13. Mɛni mɛi ni ye Lazaro shitee lɛ he odase lɛ fee yɛ he?

¹³ Yesu nitsɔɔmɔ lɛ haa wɔ miishɛjemɔ kpele kɛ hiɛnɔkamɔ hu kɛha wɔsɛɛ. Akɛ nɔkwɛmɔ nɔ lɛ, mɛni efee yɛ Lazaro sane lɛ mli? Etee gbonyobu lɛ he, he ni afũ Lazaro gbonyo lɛ yɛ, ní ena gbii ejwɛ sɔŋŋ lɛ. Ni esɔle, “ni beni ewie nɛkɛ lɛ, ebo kɛ gbee waa akɛ: ‘Lazaro ee, jee kpo!’ Ni gbonyo lɛ je kpo, ni fũu mamai lɛ fimɔ enaji kɛ eniji, duku fĩ ehiɛ. Ni Yesu kɛɛ amɛ akɛ: ‘Nyɛfɛnea lɛ, ní nyɛhaa eyaa.’ ” Ani obaanyɛ ofee naakpɛɛ kɛ miishɛɛ su fɛɛ ni abaana yɛ Marta kɛ Maria hiɛ lɛ he mfoniri okwɛ? Kwɛ bɔ ni akutsoŋbii lɛ anaa baakpɛ amɛhe aha beni amɛna naakpɛɛ nii nɛɛ! Ebɛ naakpɛɛ akɛ mɛi ni na enɛ lɛ ateŋ mɛi pii he Yesu nɔ amɛye. Shi, ejamɔ mli henyɛlɔi lɛ “kpɛ amɛyiŋ akɛ amɛbaagbe lɛ.”—Yohane 11:41-53.

14. Lazaro shitee lɛ feɔ mɛni he okadi bibioo kɛkɛ?

¹⁴ Yesu tsu nakai gbohiiashitee ni hiɛ kpaŋ nɔ lɛ he nii ni mɛi pii kɛ amɛhiŋmɛii na. Eji wɔsɛɛ gbohiiashitee ni etsɔ hiɛ egba efɔ shi momo yɛ be ko ni tsɔ hiɛ lɛ mli lɛ he okadi bibioo kɛkɛ, beni ewie akɛ: “Enɛ akafee nyɛ naakpɛɛ, ejaakɛ ŋmɛlɛtswaa lɛ miiba, nɔ mli ni mɛi fɛɛ ni yɔɔ gbohii abui lɛ amli lɛ aaanu [Nyɔŋmɔ Bi lɛ] gbee, ni amɛaaje kpo, mɛi ni efee ekpakpa lɛ aaate shi kɛaatee wala mli, ni mɛi ni etsu nishaianii lɛ aaate shi kɛaatee kojomɔ lɛ mli.”—Yohane 5:28, 29.

15. Mɛɛ odaseyeli Paulo kɛ Anania na yɛ Yesu gbohiiashitee lɛ he?

¹⁵ Taakɛ wɔtsi ta momo lɛ, bɔfo Paulo heɔ gbohiiashitee lɛ eyeɔ. Mɛni nɔ edamɔɔ? Tsutsu ko lɛ ale lɛ akɛ Saul, mɔ ni waa Kristofoi ayi. Egbɛi kɛ bɔ ni ale lɛ aha lɛ haa gbeyei gbɛɔ shwaa heyelilɔi lɛ ateŋ. Ejaakɛ, ani jeee lɛ eha hegbɛ ni akɛtswia Kristofonyo la odasefonyo Stefano tɛi ni agbe lɛ lɛ? (Bɔfoi lɛ Asaji 8:1; 9:1, 2, 26) Ni kɛlɛ, beni enyiɛ gbɛ nɔ kɛyaa Damasko lɛ, Kristo ni atee lɛ shi lɛ ha Saul hiɛ ba ehe nɔ ekoŋŋ, ni eha eshwila yɛ be kukuoo ko mli. Saul nu ni gbee ko miikɛɛ lɛ akɛ: “‘Saul, Saul, mɛɛba owaa mi yi?’ Ni ekɛɛ: ‘Bo namɔŋ, Nuntsɔ?’ Ni Nuntsɔ lɛ kɛɛ: ‘Mi ji Yesu, mɔ ni owaa lɛ yi lɛ.’ ” Kɛkɛ ni nakai Kristo ni atee lɛ shi lɛ nɔŋŋ kɛ famɔ ha Anania, ni yɔɔ Damasko lɛ, ni eya shia he ni Saul sɔleɔ yɛ lɛ ni eyagbele ehiŋmɛii eha lɛ. Enɛ hewɔ lɛ, Saul kɛ Anania fɛɛ yɛ yiŋtoo kpakpa ni amɛaadamɔ nɔ amɛhe gbohiiashitee lɛ amɛye, kɛjɛ amɛ diɛŋtsɛ amɛ niiashikpamɔ mli.—Bɔfoi lɛ Asaji 9:4, 5, 10-12.

16, 17. (a) Te wɔfeɔ tɛŋŋ wɔleɔ akɛ Paulo heee Hela nilee ni ji adesa susuma ni gbooo ni akɛɛ eyɔɔ mɔ mli lɛ eyeee? (b) Mɛɛ hiɛnɔkamɔ ni ma shi shiŋŋ Biblia lɛ kɛhaa? (Hebribii 6:17-20)

¹⁶ Kadimɔ bɔ ni Saul, ni ji bɔfo Paulo, jie enaa eha, beni akɛ lɛ ba Amralo Felike hiɛ akɛ Kristofonyo ni aawa lɛ yi lɛ. Wɔkaneɔ yɛ Bɔfoi lɛ Asaji 24:15 akɛ: “Miyɛ Nyɔŋmɔ nɔ hiɛnɔkamɔ, akɛ . . . jalɔi kɛ mɛi ni ejaaa fɛɛ baate shi.” Eka shi faŋŋ akɛ, Paulo heee Hela wɔŋjalɔi atsɔɔmɔ ni ji adesa susuma ni akɛɛ eyɔɔ emli, ni egbooo, ni ehiɔ shi yɛ egbele sɛɛ, yɛ adesãi amli shihilɛ he ko lɛ eyeee. Ehe gbohiiashitee lɛ eye, ni etsɔɔ mɛi krokomɛi nakai hemɔkɛyeli lɛ. Kɛha mɛi komɛi lɛ, no baatsɔɔ nikeenii ko ni ji wala ni gbele bɛ mli akɛ mumɔŋ bɔɔ nii yɛ ŋwɛi kɛ Kristo, kɛ agbɛnɛ, yɛ mɛi pii agbɛfaŋ lɛ, sɛɛkuu kɛmiiba wala mli ekoŋŋ yɛ shikpɔŋ ni eye emuu nɔ.—Luka 23:43; 1 Korintobii 15:20-22, 53, 54; Kpojiemɔ 7:4, 9, 17; 14:1, 3.

¹⁷ Enɛ hewɔ lɛ, Biblia lɛ kɛ shiwoo ni mli ka shi faŋŋ kɛ hiɛnɔkamɔ ni ma shi shiŋŋ haa wɔ akɛ kɛtsɔ gbohiiashitee lɛ nɔ lɛ, mɛi pii baana amɛsuɔlɔi ekoŋŋ yɛ shikpɔŋ nɛɛ nɔ, shi yɛ shihilɛi ni yɔɔ sɔrɔto kwraa mli.—2 Petro 3:13; Kpojiemɔ 21:1-4.

Yelikɛbuamɔ Diɛŋtsɛ Kɛha Mɛi ni Yeɔ Awerɛho Lɛ

18. (a) Mɛɛ dɛŋdade ko ni yeɔ ebuaa ajie lɛ kpo yɛ “Nyɔŋmɔ Gbeyeishemɔ” Kpeei lɛ ashishi? (Kwɛmɔ akrabatsa lɛ.) (b) Mɛɛ sanebimɔi ehe hiaa ni aha hetoo agbɛnɛ?

¹⁸ Shi, amrɔ nɛɛ, nibii ni wɔkaiɔ kɛ awerɛho ni wɔyeɔ lɛ kɛ wɔ yɛ lolo. Mɛni wɔbaanyɛ wɔfee ni wɔkɛkpee nɛkɛ awerɛhoyeli be ni mli wa waa ni wɔkɛkpeɔ nɛɛ naa? Mɛni mɛi krokomɛi hu baanyɛ afee ni amɛkɛye amɛbua mɛi ni yeɔ awerɛho lɛ? Ni kɛfata he lɛ, mɛni wɔbaanyɛ wɔfee ni wɔkɛye wɔbua mɛi ni ji anɔkwafoi ni wɔkɛkpeɔ yɛ wɔ shiɛmɔ nitsumɔ lɛ mli, ni amɛbɛ hiɛnɔkamɔ diɛŋtsɛ ko kwraa, ni amɛ hu amɛyeɔ ŋkɔmɔ yɛ amɛsuɔlɔi ni egboi lɛ ahewɔ lɛ? Ni mɛɛ miishɛjemɔ kroko wɔbaanyɛ wɔna kɛjɛ Biblia lɛ mli ni kɔɔ wɔsuɔlɔi ni eyawɔ yɛ gbele mli lɛ ahe? Nikasemɔ ni nyiɛ sɛɛ lɛ kɛ ŋaawoi komɛi baaha yɛ enɛ he.

[Shishigbɛ niŋmai]

Ani Obaanyɛ Oha Hetoo?

◻ Mɛni hewɔ abaanyɛ awie akɛ gbele ji henyɛlɔ lɛ?

◻ Te Nyɔŋmɔ tsuji ni hi shi yɛ Biblia beaŋ lɛ jieɔ amɛ awerɛhoyeli kpo amɛhaa tɛŋŋ?

◻ Mɛɛ hiɛnɔkamɔ yɔɔ kɛha suɔlɔi ni egboi lɛ?

◻ Mɛɛ nɔdaamɔ nɔ Paulo ná kɛha gbohiiashitee lɛ mli hemɔkɛyeli?

[Akrabatsa ni yɔɔ baafa 8, 9]

Yelikɛbuamɔ Diɛŋtsɛ Kɛha Mɛi ni Yeɔ Awerɛho Lɛ

Yɛ “Nyɔŋmɔ Gbeyeishemɔ” Kpeei ni afee yɛ 1994-95 lɛ ashishi lɛ, Buu Mɔɔ Asafo lɛ tswa adafi akɛ ajie wolo bibioo hee ko kpo, ni eyitso ji Beni Mɔ Ko ni Osumɔɔ Lɛ Egbo. Afee nɛkɛ wolo ni woɔ mɔ hewalɛ nɛɛ koni ekɛ miishɛjemɔ aha gbɔmɛi ni jɛ jeŋmaji kɛ wiemɔi sɔrɔtoi fɛɛ mli. Taakɛ ekolɛ ona momo lɛ, ekɛ Biblia lɛ mlitsɔɔmɔ ni yɔɔ kuku, ni kɔɔ gbele kɛ shihilɛ ni gbohii lɛ yɔɔ mli lɛ he haa. Nɔ ni he hiaa fe no ji akɛ, emaa Nyɔŋmɔ shiwoo kɛtsɔ Kristo Yesu nɔ, kɛha gbohiiashitee kɛmiiba wala mli ekoŋŋ yɛ paradeiso shikpɔŋ ni atsuu nɔ lɛ nɔ mi. Eshɛjeɔ mɛi ni yeɔ awerɛho lɛ amii lɛlɛŋ. No hewɔ lɛ, ebaafee dɛŋdade ko ni yeɔ ebuaa waa yɛ Kristofoi asɔɔmɔ nitsumɔ lɛ mli, ni esa akɛ etee miishɛɛ shi, ni eha Biblia mli nikasemɔi babaoo ajɛ mli kɛba. Atsɔ ŋaa gbɛ nɔ akɛ sanebimɔi kɛha nikasemɔ lɛ ewo akrabatsai amli yɛ fã fɛɛ fã naagbee, koni anyɛ akɛ anɔkwafo ni yeɔ awerɛho lɛ asusu otii ni nyɛgba he sane lɛ ahe yɛ gbɛ ni yɔɔ mlɛo kwraa nɔ.

[Mfoniri ni yɔɔ baafa 8]

Beni Lazaro gbo lɛ, Yesu fó

[Mfoniri ni yɔɔ baafa 9]

Yesu tee Lazaro shi kɛjɛ gbohii ateŋ

[He ni Mfoniri ni yɔɔ baafa 7 lɛ Jɛ]

First Mourning, ni W. Bouguereau tɛŋ, kɛjɛ Photo-Drama of Creation shishijee mfoniri mli, 1914