Ani Oyɛ Nihamɔ Mumɔ?

ANI oyoo akɛ nɔ ni fe mumɔ kome yɔɔ ni kanyaa mɛi koni amɛke nii? Nikeenii baanyɛ afee suɔmɔ, ejurɔfeemɔ, kɛ hiɛsɔɔ kpojiemɔ. Ni kɛlɛ ani okadi akɛ nikeenii hu baanyɛ aba kɛjɛ bɔ ni mɔ ko sumɔɔ ni ena hiɛ lɛ mli? Aloo, abaanyɛ akɛha kɛkɛ kɛjɛ henumɔ ni tsɔɔ akɛ gbɛnaa nii ka mɔ lɛ nɔ lɛ mli, loo ekolɛ nihalɔ lɛ miitao nɔ ko yɛ no sɛɛ.

Abaanyɛ akɛ nikeenii lɛ awo adeka bibioo ko ni akɛ kpãa fɛfɛo ko efi mli lɛ mli. Shi ani ejeee anɔkwale akɛ nikeenii kpakpa hu baanyɛ afee fɔfɔii ni afi, niyenii plɛte kome, loo mlihilɛ nifeemɔ ko? Yɛ anɔkwale mli lɛ, yɛ bei pii amli lɛ, nikeenii ni hiɛ sɔɔ waa lɛ kɔɔ mɔ ko ni ekɛ ehe aaaha he.

Ani Ootao Ona Mɔ Ko Hiɛ Duromɔ?

Ejeee nɔ ni ekaaa akɛ mɔ ko kɛ nikeenii aaaha mɔ ni etaoɔ ena ehiɛ duromɔ lɛ. Yɛ shikpɔji komɛi anɔ lɛ, obalanyo ni taoɔ ni enine ashɛ obalayoo ko tsui nɔ koni etsɔ eŋa wɔsɛɛ lɛ baanyɛ ekɛ fɔfɔii abaha lɛ. Yoo nilelɔ lɛ naa nɔ ni yɔɔ nikee lɛ sɛɛ. Esusuɔ kɛji mumɔ ni yɔɔ obalanyo lɛ nikeenii lɛ sɛɛ lɛ ji suɔmɔ diɛŋtsɛ ni baaha efee wu kpakpa hu lɛ he. Kɛ nikeenii ni tamɔ nɛkɛ jieɔ Nyɔŋmɔ gbeyeishemɔ mumɔ kpo lɛ, ekɛ miishɛɛ baaba abaha nihalɔ lɛ kɛ mɔ ni nine shɛɔ nɔ lɛ fɛɛ.

Biblia lɛ wieɔ be ko ni Abigail, Nabal ŋa lɛ he fee oya ni esaa nikeenii kpakpa ko eha David, ni eyoo akɛ, lɛ ji mɔ ni Nyɔŋmɔ ehala lɛ ni efee Israel wɔsɛɛ be mli maŋtsɛ lɛ he. Lɛ hu etao duromɔ. Ewu ekpoo David ni ekɛ jɛmɔ ebolɔ ewo David hii lɛ. David nyiɛ tabilɔi aaafee hii 400 hiɛ kɛmiiba koni ebakpata Nabal kɛ eshiabii lɛ ahiɛ. Abigail kɛ ehe wo mli, ni ekɛ oyaiyeli tsu koni akɛ niyenii babaoo ayake David kɛha ehii lɛ. Lɛ diɛŋtsɛ enyiɛ nikeenii lɛ asɛɛ kɛyashɛ jɛmɛ, ni yɛ be mli ni ekɛ heshibaa ekpa nɔ ni ewu lɛ fee he fai lɛ, ejie ehe kpo akɛ mɔ ni yɔɔ sɛɛyoomɔ babaoo beni ekɛ David susuɔ saji ahe lɛ.

Woo yɛ eyiŋtoo lɛ mli, ni nɔ ni jɛ mli ba lɛ hi. David kpɛlɛ enikeenii lɛ nɔ, ni ekɛɛ lɛ akɛ: “Yaa owe yɛ hejɔlɛ mli; naa, mibo ogbee toi, ni mikwɛ ohiɛ!” Yɛ sɛɛ mli beni Nabal egbo lɛ, David bi ni ekɛ Abigail abote gbalashihilɛ mli, ni ekɛ miishɛɛ kpɛlɛ nɔ.—1 Samuel 25:13-42.

Shi yɛ shihilɛi komɛi amli lɛ, duromɔ ni mɔ ko taoɔ lɛ baanyɛ akɔ hiɛaŋkwɛmɔ, jalɛsane ni ayeee po he. Kɛ eba lɛ nɛkɛ lɛ, nikeenii lɛ ji nyɔɔŋnihamɔ. Nihalɔ lɛ susuɔ akɛ ebaana he sɛɛ, shi elaajeɔ ejwɛŋmɔŋ toiŋjɔlɛ. Oshara yɛ be fɛɛ be akɛ mɛi krokomɛi aaana ale, ni akɛ abaabi lɛ enɛ he sane. Kɛji akɛ nine shɛ duromɔ ni ataoɔ lɛ nɔ po lɛ, mɔ ni tao lɛ baana agbɛnɛ akɛ ena gbɛ́i akɛ mɔ ni abaanyɛ abi sane yɛ eyiŋtoi ahe. Beni ejieɔ nilee ni Nyɔŋmɔ gbeyeishemɔ yɔɔ mli kpo lɛ, Biblia lɛ bɔ kɔkɔ eshi nikeenii ni tamɔ nɛkɛ.—5 Mose 16:19; Jajelɔ 7:7.

Ani Nikeenii lɛ Baa Kɛjɛɔ Tsui ni Sumɔɔ Mli?

Ŋwanejee ko bɛ he—nii ni okeɔ mɔ ni osumɔɔ lɛ, akɛni oosumɔ ni ofee nakai lɛ kɛ miishɛɛ babaoo baa fe ni oooha, akɛni mɛi krokomɛi haa onuɔ he akɛ esa akɛ ofee nakai hewɔ.

Yɛ yelikɛbuamɔ nibii ni abuaa naa ahaa nanemɛi Kristofoi ni heloo gbɛfaŋ nibii ehia amɛ lɛlɛŋ lɛ ahe lɛ, bɔfo Paulo kɛ nikee ni Nyɔŋmɔ gbeyeishemɔ yɔɔ mli lɛ he shishitoo mlai ni nɔ bɛ mamɔ shi. Eŋma akɛ: “Ejaakɛ kɛ tsui yɛ he lɛ, esa hiɛ hu bɔ ni mɔ oyɔɔ, jeee bɔ ni obɛ.” Ekɛfata he akɛ: “Mɔ fɛɛ mɔ aha bɔ ni ekpɛ mli momo yɛ etsui mli, ni ekajɛ ŋkɔmɔyeli aloo fimɔ mli: ejaakɛ tsuijurɔ naa halɔ Nyɔŋmɔ sumɔɔ.” (2 Korintobii 8:12; 9:7) No hewɔ lɛ, titri damɔ onɔ. Ni ooomɔ nyɔmɔ yɛ nikeenii ni okɛaaha kɛkɛ he lɛ, ani ohiɔ shi yɛ onyɛmɔ naa? Ni ooonu he akɛ aanyɛ onɔ ni oha, titri lɛ yɛ kwasafoŋ loo jarayeli mli nɔnyɛɛ hewɔ lɛ, ani ofeɔ nɔ ni okpɛ mli momo yɛ otsui mli? Paulo ŋma yɛ mra be mli Kristofoi ni kɛ shishitoo mlai ni Nyɔŋmɔ gbeyeishemɔ yɔɔ mli nɛɛ tsu nii lɛ ahe akɛ: “Ni amɛkɛ tutɔmɔ babaoo kpa wɔ fai akɛ, wɔkɛ nɛkɛ duromɔ nɛɛ kɛ naanyobɔɔ ni yɔɔ sɔɔmɔ lɛ mli lɛ ayaha krɔŋkrɔŋ bii lɛ.”—2 Korintobii 8:4.

Nɔ ni tamɔɔɔ nakai lɛ, November/December 1994 Royal Bank Letter ni aŋma lɛ wie otsii ni tsɔɔ Blonya hiɛ lɛ ahe akɛ: “Abaanyɛ ana gbijurɔyeli lɛ akɛ miishɛɛ nifeemɔ ni jeee anɔkwale, ni jarayeli mli sɛɛnamɔi ekanya, koni etsirɛ nihelɔi ni amɛhe nibii ni kulɛ amɛheŋ.” Kɛ afiliɔ nibii ni aheɔ lɛ, belɛ miishɛɛ fɛɛ miishɛɛ ni baa kɛjɛɔ nikeenii lɛ hamɔ mli lɛ nɔ baanyɛ aha oya, beni be eshɛ ni esa akɛ awo nyɔmɔ ni ahiɛ lɛ.

Nɔ ni He Hiaa Bo Titri—Be Lɛ? Aloo Suɔmɔ Kpojiemɔ?

Ani onaa akɛ okɛ nikeenii haa yɛ bei ni tamɔ nɔ ni ebiɔ enɛɛmɛi pɛ mli? Kɛji nakai ni lɛ, ekolɛ oolaaje miishɛɛ babaoo ni baa kɛjɛɔ suɔmɔ mli ni ajɛɔ akeɔ nii lɛ.

Mɛi pii yɛ ni, nɔ ni jɛɔ nii ni akeɔ yɛ gbii pɔtɛɛ komɛi amli lɛ mli baa lɛ eŋɔɔɔ amɛ naa. Nyɛ̃ ko ni ji niŋmalɔ hu lɛ kpɛlɛ nɔ akɛ hiɛjoomɔ jie ehe kpo yɛ ebii lɛ amli beni gbii ni akpaa nikeenii agbɛ bɛŋkɛɔ lɛ. Ekpɛlɛ nɔ akɛ afite miishɛɛ ni lɛ diɛŋtsɛ enaa yɛ nikeenii ni yɔɔ fɛo ni akɛhaa lɛ mli lɛ, ejaakɛ ehiɛ yakã nɔ kroko nɔ. Amaniɛbɔɔi pii kɛɔ akɛ gbijuji ni ajieɔ hiɛtserɛ ni akɛ nikeenii haa yɛ mli lɛ hu ji bei ni henumɔŋ nɔnyɛɛi kɛ tsofai fɔji kɛ nitsumɔ babaoo yaa nɔ yɛ mli.

Akɛni ena akɛ nikeenii anɔ mi ni amaa yɛ gbijurɔyeli be mli lɛ saa gbekɛbii ahe yɛ gbɛ fɔŋ nɔ hewɔ lɛ, jwɛŋmɔ he nilelɔ ni atsi eta yɛ The New York Times lɛ mli lɛ jie yi akɛ: “Susumɔ nikeenii komɛi ni okɛaaha yɛ gbii krokomɛi anɔ lɛ he akɛ gbɛ ni otsɔɔ nɔ obaa nɔnyɛɛ shi.” Ani osusuɔ akɛ nɔ kpakpa baajɛ mli aba?

Tammy, ni eye afii 12, ni yɔɔ shia ni ayeee Blonya kɛ fɔmɔ gbii yɛ mli lɛ ŋma akɛ: “Eyɛ miishɛɛ babaoo akɛ onine aaashɛ nikeenii anɔ beni okpaaa gbɛ kwraa.” Ekɛɛ akɛ, yɛ nɔ najiaŋ ni aaake nii shikome loo shii enyɔ yɛ afi mli lɛ, efɔlɔi keɔ lɛ kɛ enyɛmi nuu lɛ nii yɛ afi muu lɛ fɛɛ mli. Shi nɔ ko yɛ ni he hiaa lɛ waa fe nakai nikeenii lɛ. Taakɛ ewie he lɛ, “miyɛ weku shihilɛ ni miishɛɛ yɔɔ mli waa.”

Wolo, Secrets of Strong Families lɛ jaje yɛ faŋŋ mli akɛ: “Wɔteŋ mɛi pii fiteɔ be kɛ shika shii abɔ yɛ afi mli ni wɔmiihala nikeenii ni yeɔ emuu wɔha gbɔmɛi ni wɔsumɔɔ amɛ lɛ afɔmɔ gbii, kaimɔi, loo gbijuji. Nikeenii ni hi fe fɛɛ lɛ biii ni ajie shika kɛjɛ bank. Ni ehe ehiaaa ni oha he. Kɛ oheɔ oyeɔ, taakɛ mɛi pii feɔ, akɛ owala ji nii ni jara wa fe fɛɛ ni oyɔɔ lɛ, no lɛ owala lɛ fa ko ni okɛaaha lɛ ji nikeenii ni jara wa fe fɛɛ ni oyɔɔ ni okɛaaha. Wɔkɛ nakai nikeenii ni jara wa lɛ haa yɛ wɔbe falɛ ni wɔkɛhaa mɛi ni wɔsumɔɔ amɛ lɛ mli.”

Obaanyɛ oha nakai nikeenii lɛ ashɛ mɛi ni yɔɔ oweku lɛ sɛɛ lɛ anɔ. Suɔmɔ mli ni ajɛɔ akɛ mɛi krokomɛi ahiamɔ nii haa amɛ lɛ kɛ tsui ni nyɔɔ mɔ mli krɛdɛɛ ko baa. Yesu Kristo wo wɔ hewalɛ ni wɔjie suɔmɔ mli ni ajɛɔ asusuɔ ohiafoi, obubuafoi, kɛ shwilafoi ahe yɛ gbɛ ni tamɔ nɛkɛ nɔ lɛ kpo, ni ekɛfata he akɛ: “Ni aaajɔɔo, akɛni amɛ lɛ amɛbɛ nɔ ko ni amɛkɛaatoò najiaŋ lɛ.”—Luka 14:12-14.

Rockland Journal-News (U.S.A.) lɛ bɔ nihamɔ ni tamɔ nɛkɛ he nɔkwɛmɔ nɔ he amaniɛ nyɛsɛɛ nɛɛ. Beni yoo shwilafo ko ni eda lɛ shia kumɔ lɛ, nanemɛi ma shia hee amɛha lɛ. Nitsumɔ hei pii tsu too, ni nitsumɔ he ko ni damɔɔ nɔyeli najiaŋ kɛ shika ha. Shi adafitswaa wolo lɛ kɛɛ: “Nɔ ni he hiaa fe fɛɛ ji gbɔmɛi 150 loo nɔ̃, ni amɛteŋ mɛi pii kɛ Haverstraw Yehowa Odasefoi asafo lɛ bɔɔ, ni kɛ be ha koni amɛma shia lɛ.”

Nɔ ni aŋma lɛ tee nɔ akɛ: “Abua tsumaa nibii anaa ashwie shi yɛ tsumaa he lɛ, kɛ okpɔlɔi ni niyenii eyi nɔ obɔ. Nitsulɔi lɛ ma shia ni wekui enyɔ baanyɛ ahi mli yɛ gbii enyɔ mli, ni ekwɔlɛ shɛɔ nsɔɔdoi etɛ. . . . Ale Yehowa Odasefoi yɛ amɛ nyɛmɔ ni amɛkɛmaa tsui oyayaayai hewɔ. . . . Shi oyaiyeli ni tamɔ nɛkɛ yɛ sɔrɔto yɛ bɔ ni amɛ nitsumɔ lɛ hiɔ shi daa lɛ he: ní amɛkɛ nii ni sɛɛ tsɛɔ aaaha yɛ suɔmɔ nitsumɔ mli. Awura Blakely nyɛŋ ana eshia hee lɛ moŋ, shi eniji baanyɛ ata he, ni etsui le henumɔ ni mli kwɔ ni nifeemɔ ni pɛsɛmkunya bɛ mli nɛɛ ekanya.”

Ejurɔfeemɔ Mumɔ Afi Muu Fɛɛ

Mɛi ni feɔ ejurɔ yɛ mumɔŋ lɛlɛŋ lɛ emɛɛɛ gbii krɛdɛɛi komɛi. Amɛtswako amɛshihilɛ amɛbɔleko amɛ pɛ amɛhe kɛkɛ. Kɛ amɛnine shɛ nɔ ko kpakpa nɔ lɛ, amɛnyaa mɛi krokomɛi ni amɛkɛ amɛ aaaja lɛ he. Enɛ etsɔɔɔ akɛ amɛji mɛi ni keɔ nii kɛkɛ. Etsɔɔɔ akɛ amɛkeɔ nii aahu akɛ amɛwekui naaa nɔ ko. Etsɔɔɔ akɛ amɛkeɔ nii ni amɛsusuuu bɔ ni esaa mɔ ni amɛkeɔ lɛ nii lɛ he ehaa lɛ he. Ni kɛlɛ, amɛji gbɔmɛi ni ‘hãa nii,’ taakɛ Yesu tsɔɔ ekaselɔi lɛ akɛ amɛfee lɛ.—Luka 6:38.

Amɛle shihilɛ ni nanemɛi kɛ akutsoŋbii ni edara, amɛhe yeɔ, loo ni hewalɛwoo he miihia amɛ lɛ yɔɔ mli. Amɛ “nikeenii” baanyɛ afee nii ni amɛaahe yɛ shwapo mli amɛha amɛ loo shia lɛ mli nitsumɔ ni amɛaaye amɛbua yɛ mli. Ebaanyɛ efee lai gbamɔ loo snoo ni amɛaaloo yɛ amɛshia. Ebaanyɛ efee niyenii ni ahoo plɛte obɔ loo ŋmɛlɛtswaa kome ni akɛaasara ni akane nii kutuu. Ekolɛ amɛbɛ deka, shi jeee ni amɛbɛ deka kwraa bɔ ni amɛaaye amɛbua. Amɛkase kɛjɛ niiashikpamɔ mli akɛ yɛ anɔkwale mli lɛ, “nɔ̃ hamɔ mli yɛ jɔɔmɔ fe hemɔ.”—Bɔfoi lɛ Asaji 20:35.

Shi, Nihalɔ ni fe fɛɛ ji wɔ Bɔlɔ lɛ, Yehowa Nyɔŋmɔ. “Edɛŋ wala kɛ mumɔ kɛ nii fɛɛ jɛɔ haa gbɔmɛi fɛɛ.” (Bɔfoi lɛ Asaji 17:25) Ekɛ eyiŋtoo akɛ ekɛ efɔŋ feemɔ, hela, kɛ gbele baaba naagbee, ni efee shikpɔŋ nɛɛ paradeiso lɛ he shishinumɔ hu eha wɔ yɛ Biblia lɛ mli. (Lala 37:10, 11; Kpojiemɔ 21:4, 5) Kɛ mɛi ni yɔɔ ejurɔfeemɔ mumɔ lɛ nu enɛ he lɛ, amɛhaaa nakai sanekpakpa lɛ afee amɛ pɛ amɛ nɔ̃. Amɛ miishɛɛ kpelei lɛ ateŋ ekome ji ni amɛgba mɛi krokomɛi. Amɛ nɔ̃ lɛ ji nihamɔ mumɔ ni Nyɔŋmɔ gbeyeishemɔ yɔɔ mli lɛlɛŋ. Ani no ji mumɔ ni otaoɔ oná lɛ?

[Mfonirii ni yɔɔ baafa 7]

Nikeenii ni jara wa fe fɛɛ lɛ ateŋ ekomɛi kɔɔɔ shika he