Ani Ahere Oyiwala?

JOHNNY eye afii nyɔŋma beni nuu ko ha ewa edamɔ shi yɛ he ni akɛ nibii eba akɛmiitsɔɔ yɛ lɛ, ni ebi lɛ akɛ: “Obalanyo, ani okpɛlɛɔ Yesu Kristo nɔ akɛ o-Nuntsɔ kɛ Yiwalaherelɔ?” Sanebimɔ nɛɛ fee tamɔ nɔ ni eha Johnny hiɛ fee lɛ yaa fioo, ejaakɛ eheɔ Yesu nɔ eyeɔ kɛjɛ jeeŋmɔ. No hewɔ lɛ eha hetoo akɛ, “Hɛɛ, mikpɛlɛɔ enɔ.” Kɛkɛ ni nuu lɛ bo waa koni mɛi fɛɛ anu akɛ: “Ajie Nuntsɔ lɛ yi! Ahere susuma kroko hu yiwala aha Kristo!”

Ani yiwalaheremɔ yɛ mlɛo diɛŋtsɛ nɛkɛ? Ani ‘ahere Johnny yiwala’ kɛjɛ be mli ni ewie nakai wiemɔi lɛ, ní nɔ ni ebaafee yɛ eshihilɛ be ni eshwɛ lɛ mli kɔɔɔ he eko? Gbɔmɛi anɔkwafoi pii baaha hetoo akɛ hɛɛ. Jamɔ mli dɛhiɛmɔ woji komɛi kɛɔ akɛ oŋma gbi ni “ahere oyiwala” lɛ ofɔ̃ shi koni onyɛ okai.

Osɔfo ko ŋma akɛ “kɛ mɔ ko na Kristo mli hemɔkɛyeli bibioo kɛkɛ po lɛ . . . no tsɔɔ nɔ ni baaba enɔ kɛmiiya naanɔ.” Ewie akɛ Biblia lɛ kɛɔ akɛ yiwalaheremɔ damɔ “hemɔkɛyeli nifeemɔ” kome ni afeɔ yɛ be kome mli lɛ nɔ, “shi edamɔɔɔ hemɔkɛyeli ni tsaa nɔ nɔ.” Jamɔ he niŋmalɔ kroko hu ŋma akɛ: “Hemɔkɛyeli nifeemɔ kome nɛɛ ji nitsumɔ ni agbe naa. Atsu he nii aha bo momo . . . ‘Ta ni owuuɔ lɛ eba naagbee.’ ‘Ajie ohe eshai lɛ kɛjɛ ohe.’ ” Shi mɛi ni heɔ yeɔ waa akɛ enɛ ji anɔkwale lɛ po baanyɛ ana naagba yɛ biɛ. Eyɛ faŋŋ akɛ mɛi babaoo ni akɛɛ amɛ akɛ ‘ahere amɛyiwala’ lɛ ehiii shi tamɔ bɔ ni Biblia lɛ kɛɔ akɛ esa akɛ amɛhi shi lɛ. Naajiemɔ ni afɔɔ numɔ ji akɛ benɛ ekolɛ ‘amɛkpɛlɛko Kristo nɔ’ diɛŋtsɛ.

No hewɔ lɛ, mɛni kpɛlɛmɔ ní “aaakpɛlɛ” Yesu “nɔ” lɛ tsɔɔ diɛŋtsɛ? Ani eji hemɔkɛyeli nifeemɔ yɛ be kome mli kɛkɛ, aloo eji shihilɛ gbɛ ni tsaa nɔ daa? Ani esa akɛ wɔhemɔkɛyeli lɛ mli awa bɔ ni ebaanyɛ ekanya wɔ kɛha nitsumɔ? Ani wɔbaanyɛ wɔkpɛlɛ Yesu afɔleshaa lɛ mli sɛɛnamɔi anɔ lɛlɛŋ ní gbɛnaa nii ni ji esɛɛnyiɛmɔ fataaa he?

Mɛi pii miitao jɔɔmɔi lɛ, shi jeee gbɛnaa nii ni jɛɔ Yesu sɛɛnyiɛmɔ kɛ etoiboo mli kɛbaa lɛ. Yɛ anɔkwale mli lɛ, bei pii lɛ, wiemɔ “toiboo” lɛ haoɔ amɛ. Kɛlɛ, Yesu wie akɛ: “Ba obanyiɛ misɛɛ.” (Luka 18:18-23) Ni Biblia lɛ kɛɔ akɛ: “Mɛi ni booo wɔ-Nuntsɔ Yesu Kristo sanekpakpa lɛ toi lɛ . . . aaana nyɔmɔwoo ni ji naanɔ hiɛkpatamɔ.”—2 Tesalonikabii 1:8, 9; Mateo 10:38; 16:24.

Biblia lɛ wieɔ nibii babaoo ni teeɔ sanebimɔi ni yɔɔ hiɛdɔɔ shi, yɛ nibii ni atsɔɔ mɛi yɛ yiwalaheremɔ he lɛ he. Kɛji obaasumɔ ni otao nɔ ni Biblia lɛ kɛɔ diɛŋtsɛ yɛ sane nɛɛ he lɛ, no lɛ obaana baafai ni nyiɛ sɛɛ lɛ ahe miishɛɛ waa diɛŋtsɛ. Gbelemɔ o-Biblia lɛ, ni okane ŋmalɛi ni atsɛ shi aŋmalako lɛ, ni okwɛ nɔ ni Yesu kɛ ebɔfoi lɛ tsɔɔ yɛ nɛkɛ sane ni he hiaa nɛɛ he.