Naa Anɔkwayelɔ Lɛ!

“Namɔ po sheŋo gbeyei, Yehowa, ni ewoŋ ogbɛi lɛ hiɛ nyam, ejaakɛ bo, okome too ji anɔkwafo?”—KPOJIEMƆ 15:4, NW.

 1. Mɛɛ odase J. F. Rutherford ye yɛ C. T. Russell ni tsɔ ehiɛ lɛ anɔkwayeli he?

JOSEPH F. RUTHERFORD, ni baye C. T. Russell sɛɛ akɛ Buu Mɔɔ Asafo lɛ sɛinɔtalɔ yɛ 1917 lɛ, je ewiemɔi ashishi yɛ be mli ni afuɔ Russell lɛ, akɛ: “Charles Taze Russell ye Nyɔŋmɔ anɔkwa, eye Kristo Yesu anɔkwa, eye Mesia maŋtsɛyeli gbɛ lɛ anɔkwa. Eji anɔkwafo yɛ emligbɛ tɔ̃ɔ—hɛɛ, eye anɔkwa kɛtee gbele mli po.” Yɛ anɔkwale mli lɛ, eji hiɛsɔɔ wiemɔ kpakpa ni aaawie yɛ Yehowa Nyɔŋmɔ tsulɔ anɔkwafo he. Hiɛsɔɔ wiemɔ ni da ko bɛ ni wɔɔwie yɛ mɔ aŋkro ko he fe ni wɔɔkɛɛ akɛ eye anɔkwayeli kaa lɛ mli omanye, ákɛ eji anɔkwafo—anɔkwafo kɛjɛ emligbɛ tɔ̃ɔ.

2, 3. (a) Mɛni hewɔ anɔkwayeli kɛ kaa baa lɛ? (b) Namɛi hu ete shi ewo anɔkwa Kristofoi yɛ mɔdɛŋ ni amɛbɔɔ koni amɛye anɔkwa lɛ mli?

² Anɔkwayeli kɛ kaa baa. Mɛni hewɔ? Ejaakɛ anɔkwayeli teɔ shi eshiɔ hesuɔmɔ. Mɛi titri ni yɔɔ mɛi ni yeee Nyɔŋmɔ anɔkwa lɛ ateŋ ji Kristendom osɔfoi lɛ. Agbɛnɛ hu, be ko bako ni anɔkwa ni ayeee egbɛ eshwa yɛ gbalashihilɛ wekukpaa lɛ mli tamɔ ŋmɛnɛ. Asɛɛɛ gbalafitemɔ he. Anɔkwa ni ayeee hu egbɛ eshwa jarayeli je lɛ mli babaoo. Akɛɔ wɔ yɛ enɛ he akɛ: “Nitsumɔ nɔkwɛlɔi kɛ mɛi ni he esa yɛ nitsumɔi ni amɛkase lɛ amli lɛ . . . heɔ yeɔ akɛ buului ni heɔ nɔ fɛɛ nɔ amɛyeɔ kɛ mɛi ni amɛshishiumɔ waaa lɛ pɛ yeɔ anɔkwa amɛhaa amɛ nitsumɔi ŋmɛnɛ.” Abuuu mɛi ni “yeɔ anɔkwa tsɔ̃” lɛ kwraa. Onukpa ni kwɛɔ nitsumɔ he ko ni woɔ nitsumɔi krokomɛi aŋaa yɛ nitsumɔ mli lɛ kɛɛ akɛ: “Esa akɛ anɔkwa ni oyeɔ lɛ afee nɔ ni oyeɔ okome ohe.” Ni ooowie anɔkwa ni oyeɔ ohe lɛ he lɛ tsɔɔ fitemɔ ni ofiteɔ wiemɔ lɛ shishinumɔ. Ekaiɔ wɔ nɔ ni ajaje yɛ Mika 7:2 (NW) lɛ: “Anɔkwafo hiɛ ekpata kɛjɛ shikpɔŋ lɛ nɔ.”

³ Kɛ wɔɔwie he yɛ gbɛ ni da nɔ lɛ, Satan kɛ edaimonioi lɛ ete shi ewo wɔ waa, amɛtswa amɛfai shi akɛ amɛbaaha wɔfee mɛi ni yeee Nyɔŋmɔ anɔkwa. No hewɔ ni akɛɔ Kristofoi yɛ Efesobii 6:12 akɛ: “Jeee heloo kɛ la wɔkɛna nɔmɔ lɛ, shi moŋ wɔkɛ onukpayelii kɛ hegbɛi kɛ je nɛŋ lumɛi ni yɔɔ benɛ-be duŋ lɛ mli lɛ, kɛ mumɔi fɔji asafo ni yɔɔ ŋwɛiniiaŋ lɛ.” Hɛɛ, ehe miihia ni wɔbo kɔkɔbɔɔ nɛɛ toi: “Nyɛhiɛ akãa shi, nyɛsaraa; ejaakɛ nyɛ henyɛlɔ Abonsam lɛ nyiɛ tamɔ jata ni huuɔ eetao mɔ ni eeemi.”—1 Petro 5:8.

 4. Mɛɛ sui haa anɔkwa ni aaaye lɛ feɔ nɔ ni wa waa lɛ?

⁴ Nɔ ni haa anɔkwayeli feɔ nɔ ni wa hu ji pɛsɛmkunya sui ni wɔna kɛjɛ wɔ fɔlɔi aŋɔɔ, taakɛ atsi ta yɛ 1 Mose 8:21 lɛ: “Gbɔmɔ tsuiŋ jwɛŋmɔ lɛ efɔŋ eji”—kɛ pɛsɛmkunyatsɛ—“kɛjɛ egbekɛbiiashi.” Wɔ fɛɛ wɔyɛ naagba ni bɔfo Paulo jaje akɛ eyɔɔ lɛ nɔŋŋ eko: “Ekpakpa ni misumɔɔ lɛ mifeee; shi efɔŋ ni misumɔɔɔ lɛ, no moŋ mifeɔ.”—Romabii 7:19.

Anɔkwayeli Ji Nɔ ko Krɛdɛɛ Ko

5, 6. Mɛni abaanyɛ awie yɛ nɔ ni anɔkwayeli ji he, ni te atsɔɔ mli aha tɛŋŋ?

⁵ “Anɔkwayeli” ji wiemɔ krɛdɛɛ ko. No hewɔ lɛ, Insight on the Scriptures lɛ kɛɔ akɛ: “Etamɔ nɔ ni Ŋleshi wiemɔi komɛi bɛ ni tsɔɔ Hebri kɛ Hela wiemɔi lɛ ashishi jogbaŋŋ pɛpɛɛpɛ kɛmɔ shi, shi ‘anɔkwayeli,’ ni susumɔ ni ji hetuu-kɛhamɔ kɛ anɔkwale ni ayeɔ fata he lɛ, kɛ́ akɛtsu nii yɛ Nyɔŋmɔ kɛ esɔɔmɔ he lɛ, ehaa ebɛŋkɛɔ eshishinumɔ lɛ he.”a Buu-Mɔɔ lɛ wie be ko yɛ “anɔkwayeli” he akɛ: “Anɔkwa ni ayeɔ, nitsumɔ, suɔmɔ, gbɛnaa nii, heshibaa. Mɛni mli wiemɔi nɛɛ fɛɛ je amɛhe yɛ? Amɛji anɔkwayeli sui sɔrɔtoi.” Hɛɛ, subaŋi kpakpai pii yɛ ni ji anɔkwayeli sui sɔrɔtoi. Bɔ ni akɛ anɔkwayeli kɛ jalɛ tsaa shii abɔ yɛ Ŋmalɛi lɛ amli lɛ sa kadimɔ jogbaŋŋ diɛŋtsɛ.

⁶ Nɔ ni yeɔ ebuaa hu ji saji amlitsɔɔmɔi ni nyiɛ sɛɛ nɛɛ: ‘Anɔkwayeli hu baanyɛ atsɔɔ anɔkwa ni ayaa nɔ ayeɔ kɛ heshibaa, ni efi shi shiŋŋ ni anyɛɛɛ ahoso lɛ loo aka lɛ.’ ‘Anɔkwayeli tsɔɔ anɔkwa ni mɔ ko yaa nɔ eyeɔ yɛ eshiwoo nɔ, loo ehe shi ni eyaa nɔ ebaa ehaa gbɛjianɔtoo loo shishitoo mlai ni mɔ lɛ nuɔ he akɛ amɛhe gbɛnaa nii ka enɔ; jeee akɛ wiemɔ lɛ tsɔɔ he ni akɛkpɛtɛɔ nɔ ko he kɛkɛ, shi moŋ, shi ni adamɔɔ koni akanyɛ alaka mɔ loo atsɔ eyiŋ kɛjɛ nɔ ni akɛ he ekpɛtɛ he lɛ he.’ No hewɔ lɛ, esa akɛ atsɛ mɛi ni yaa nɔ amɛyeɔ anɔkwa yɛ kaai, shitee-kɛ-woo, kɛ yiwaa fɛɛ sɛɛ lɛ akɛ “anɔkwafoi.”

 7. Mɛɛ sɔrɔto feemɔ abaanyɛ akɛba anɔkwayeli kɛ anɔkwa ni mɔ ko yeɔ lɛ teŋ?

⁷ Shi yɛ enɛ gbɛfaŋ lɛ, ebaahi jogbaŋŋ akɛ aaafee sɔrɔto feemɔ ni abaanyɛ akɛba anɔkwayeli kɛ anɔkwa ni ayeɔ teŋ lɛ he nɔkwɛmɔ nɔ. Nu-hiŋmɛi ko yɛ United States anaigbɛ ni fɛ̃ɔ nu la aaafee ŋmɛlɛtswaa kome fɛɛ ŋmɛlɛtswaa kome. Bɔ ni ebaa be fɛɛ be hewɔ lɛ atsɛɔ lɛ Blema Anɔkwafo. Biblia lɛ wieɔ nibii ni wala bɛ mli tamɔ nyɔŋtsere he akɛ eyeɔ anɔkwa, ejaakɛ anyɛɔ akɛ he fɔɔ nɔ. Lala 89:37 (NW) wieɔ nyɔŋtsere lɛ he akɛ “odasefonyo anɔkwafo ni yɔɔ atatuiaŋ.” Akɛɔ akɛ Nyɔŋmɔ wiemɔi lɛ anɔkwaleŋ. Kpojiemɔ 21:5 (NW) kɛɔ akɛ: “Ni Mɔ ni ta maŋtsɛsɛi lɛ nɔ lɛ kɛɛ: ‘Naa! Miifee nii fɛɛ ehee.’ Ni ekɛɛ mi akɛ: ‘Ŋmaa, ejaakɛ nɛkɛ wiemɔi nɛɛ, anɔkwa wiemɔi ni ma shi shiŋŋ ni,’ ” Nɔkwɛmɔ nii nɛɛ fɛɛ tsɔɔ anɔkwayeli, kɛ he ni anyɛɔ akɛfɔɔ nɔ, shi amɛnyɛɛɛ amɛkɛ amɛhe akpɛtɛ nɔ ko he, ni amɛbɛ jeŋba sui kpakpai, tamɔ anɔkwayeli.

Yehowa, Anɔkwafo Fe Fɛɛ

 8. Mɛɛ Ŋmalɛ mli odaseyeli haa aleɔ anɔkwayeli he nɔkwɛmɔ nɔ ni hi fe fɛɛ?

⁸ Ákɛ Yehowa Nyɔŋmɔ ji anɔkwayeli he nɔkwɛmɔ nɔ ni hi fe fɛɛ lɛ, yiŋkɔshikɔshi feemɔ ko bɛ enɛ he. Yehowa etee nɔ eye adesa weku lɛ anɔkwa, ni ekɛ e-Bi lɛ po ha koni adesai anine ashɛ naanɔ wala nɔ. (Yohane 3:16) Wɔkaneɔ yɛ Yeremia 3:12 akɛ: “Kuu osɛɛ sɛɛsɛɛyalɔ Israel! Yehowa kɛɛ; mituŋ mihiɛ miwoŋ nyɛ dɔŋŋ.” Nɔ ni yeɔ Yehowa anɔkwayeli he odase lolo ji wiemɔi ni aŋmala yɛ Kpojiemɔ 16:5 (NW) lɛ: “Bo, Mɔ ni yɔɔ kɛ mɔ ni yɛ, Bo anɔkwafo, oja.” Agbɛnɛ hu akɛɔ wɔ yɛ Lala 145:17 (NW) akɛ: “Yehowa ja yɛ egbɛi fɛɛ mli kɛ anɔkwafo yɛ enitsumɔi fɛɛ mli.” Yɛ anɔkwale mli lɛ, Yehowa yɛ sɔrɔto kwraa yɛ enɔkwayeli mli akɛ Kpojiemɔ 15:4 (NW) wieɔ akɛ: “Namɔ po sheŋo gbeyei, Yehowa, ni ewoŋ ogbɛi lɛ hiɛ nyam, ejaakɛ bo okome too ji anɔkwafo?” Yehowa Nyɔŋmɔ ji anɔkwafo kɛyashɛ he ni kwɔ fe fɛɛ.

9, 10. Mɛɛ anɔkwayeli he saji ni kɔɔ Yehowa he aŋmala ashwie shi yɛ be mli ni ekɛ Israel maŋ lɛ yeɔ lɛ?

⁹ Israel maŋ lɛ yinɔsane mli titri odaseyelii babaoo ni kɔɔ anɔkwa ni Yehowa ye ewebii ahe lɛ yɔɔ. Yɛ Kojolɔi lɛ agbii lɛ amli lɛ, Israel gbee shi kɛjɛ anɔkwa jamɔ he shii abɔ, shi edɔɔ Yehowa shii abɔ ni ehereɔ amɛyiwala. (Kojolɔi 2:15-22) Yɛ afii ohai enumɔ ni Israel kɛna maŋtsɛmɛi lɛ fɛɛ mli lɛ, Yehowa jie enɔkwayeli kpo etsɔɔ nakai maŋ lɛ.

¹⁰ Yehowa anɔkwayeli ha eto etsui shi eha ewebii lɛ, taakɛ anaa yɛ 2 Kronika 36:15, 16 lɛ: “Shi Yehowa, amɛtsɛmɛi a-Nyɔŋmɔ lɛ, tsuɔ ebɔfoi kɛbaa amɛŋɔɔ, eteɔ shi leebi maaŋkpa etsuɔ amɛ, ejaakɛ emusuŋ tsɔɔ lɛ yɛ emaŋ lɛ kɛ eshihilɛ he lɛ hewɔ. Shi amɛ lɛ, Nyɔŋmɔ bɔfoi lɛ ahe fɛo moŋ amɛyeɔ, ni amɛgbeɔ ewiemɔi lɛ ahe guɔ, ni amɛliɔ egbalɔi lɛ aahu kɛyashiɔ beyinɔ ni Yehowa mlifu te shi wo emaŋ lɛ ni tsabaa ko bɛ dɔŋŋ.”

11. Mɛɛ nɔmimaa loo miishɛjemɔ Yehowa anɔkwayeli kɛhaa wɔ?

¹¹ Akɛni Yehowa yeɔ anɔkwa fe fɛɛ hewɔ lɛ, bɔfo Paulo baanyɛ aŋma, taakɛ eyɔɔ Romabii 8:38, 39 lɛ akɛ: “Ejaakɛ miyɛ hewalɛ yɛ nɔ, akɛ gbele jio, wala jio, ŋwɛibɔfoi jio, nɔyelɔi jio, hewalɛi jio, nii ni yɔɔ nɛɛ jio, nii ni baaba lɛ jio, ŋwɛi jio, shishi jio, aloo nii ni abɔ lɛ amli nɔ kroko jio, amɛnyɛŋ amɛgbala wɔkɛ Nyɔŋmɔ suɔmɔ ni yɔɔ Kristo Yesu, wɔ Nuntsɔ lɛ mli lɛ mli.” Hɛɛ, Yehowa maa nɔ mi kɛhaa wɔ akɛ: “Mishiŋo, ni misaa mikwaŋo gbi ko gbi ko.” (Hebribii 13:5) Eji anɔkwale akɛ, eshɛjeɔ mɔ mii akɛ aaale akɛ Yehowa Nyɔŋmɔ ji anɔkwafo yɛ be fɛɛ mli!

Yesu Kristo, Binuu Anɔkwafo Lɛ

12, 13. Mɛɛ odaseyeli wɔyɔɔ ni kɔɔ Nyɔŋmɔ Bi lɛ anɔkwayeli he?

¹² Mɔ ni kase Yehowa yɛ emuuyeli mli yɛ anɔkwayeli he kaa lɛ naa ni edamɔ ji Yesu Kristo. Ojogbaŋŋ bɔfo Petro baanyɛ atsɛ wiemɔ kɛjɛ Lala 16:10 ni ekɛto Yesu Kristo he yɛ Bɔfoi lɛ Asaji 2:27 (NW) akɛ: “Ejaakɛ oshiŋ misusuma yɛ Hades [gbohiiaje], ni ohaŋ onɔkwafo lɛ ana fitemɔ.” Atsɛɔ Yesu Kristo yɛ gbɛ ni sa nɔ akɛ “anɔkwafo.” Eyɛɔ e-Tsɛ lɛ kɛ Nyɔŋmɔ shiwoo Maŋtsɛyeli lɛ anɔkwa yɛ gbɛ fɛɛ gbɛ nɔ. Kɛjɛ shishijee lɛ Satan bɔ mɔdɛŋ ni efite Yesu emuuyeli mli ni ehiɛ lɛ kɛtsɔ kaai kɛ nitsumɔ, kɛ hesuɔmɔ ni eeena eha ehe lɛ nɔ. Akɛni eyeee omanye yɛ enɛ mli hewɔ lɛ, Abonsam kɛ ehe wo yiwaa mli, ni naagbee lɛ eha agbe Yesu yɛ sɛŋmɔtso nɔ. Yesu tsiii ehe kɛjɛɛɛ anɔkwa ni eyeɔ eŋwɛi Tsɛ lɛ, Yehowa Nyɔŋmɔ he kɔkɔɔkɔ.—Mateo 4:1-11.

¹³ Yesu Kristo eye esɛɛnyiɛlɔi lɛ anɔkwa yɛ shiwoo ni aŋma afɔ shi yɛ Mateo 28:20 lɛ nɔyeli mli: “Ni naa, mi lɛ mikɛ nyɛ yɛ daa kɛyashi jeŋ naagbee lɛ.” Yɛ nakai shiwoo lɛ mlibaa mli lɛ, étee nɔ eye anɔkwa yɛ yitsoyeli he nitsumɔ yɛ esafo lɛ nɔ kɛjɛ Pentekoste afi 33 Ŋ.B. lɛ mli kɛbashi ŋmɛnɛŋmɛnɛ be nɛɛ mli.

Adesai ni Yeee Emuu ni Ye Anɔkwa

14. Mɛɛ anɔkwayeli he nɔkwɛmɔ nɔ Hiob fee?

¹⁴ Agbɛnɛ, adesai ni yeee emuu lɛ hu? Ani amɛbaanyɛ amɛye Nyɔŋmɔ anɔkwa? Wɔyɛ Hiob sane ni ekaaa lɛ. Satan ha sane oti ni ka shi lɛ fee faŋŋ yɛ esane lɛ mli. Ani Hiob yeɔ Yehowa Nyɔŋmɔ anɔkwa, aloo eesɔmɔ lɛ yɛ nii ni ebaaná hewɔ? Satan pupuu ehe akɛ ebaanyɛ eha Hiob atsi ehe kɛjɛ Yehowa he kɛtsɔ haomɔ ni ekɛaaba Hiob nɔ lɛ nɔ. Beni Hiob elaaje enibii fɛɛ, ebii fɛɛ, kɛ egbɔmɔtsoŋ hewalɛ po lɛ, eŋa wo lɛ hewalɛ akɛ: “Kwa Nyɔŋmɔ ni ogbo!” Shi Hiob ji anɔkwafo, ejaakɛ ekɛɛ yoo lɛ akɛ: “Owieɔ tamɔ yei buului lɛ eko wieɔ. Ei, nɔ kpakpa lɛ wɔhe yɛ Nyɔŋmɔ dɛŋ, shi nɔ fɔŋ lɛ, no lɛ wɔkahe lo? Enɛ fɛɛ mli lɛ, Hiob kɛ enaabu efeee esha ko.” (Hiob 2:9, 10) Yɛ anɔkwale mli lɛ, Hiob kɛɛ mɛi ni kwaa amɛshɛjeɔ emii lɛ akɛ: “Kɛ [Nyɔŋmɔ] gbe mi po lɛ, kɛlɛ mikɛ mihiɛ baafɔ enɔ.” (Hiob 13:15, New International Version) Ŋwanejee ko bɛ he akɛ Hiob nine shɛ Yehowa nɔkpɛlɛmɔ nɔ! No hewɔ lɛ, Yehowa kɛɛ Elifaz, Temannyo lɛ akɛ: “Mimli ewo okɛ onanemɛi enyɔ lɛ fɛɛ la, ejaakɛ nyɛwieee mihe bɔ ni ja tamɔ mitsulɔ Hiob.”—Hiob 42:7, 10-16; Yakobo 5:11.

15. Mɛɛ Ŋmalɛ mli odaseyeli wɔyɔɔ ni kɔɔ Yehowa Nyɔŋmɔ tsuji pii anɔkwayeli he?

¹⁵ Abaanyɛ awie hii kɛ yei ni yɔɔ hemɔkɛyeli ni atsɔɔ bɔ ni amɛji yɛ Hebribii yitso 11 lɛ fɛɛ ahe akɛ anɔkwafoi. Jeee akɛ amɛtee nɔ amɛye anɔkwale kɛkɛ, shi amɛji anɔkwafoi hu yɛ nɔnyɛɛi anaa. No hewɔ lɛ wɔkaneɔ “mɛi ni tsɔ hemɔkɛyeli nɔ . . . amɛtsimɔ jatai anaa, amɛgbe la hewalɛ, amɛje klantei amli . . . Mɛi komɛi hu aye amɛhe fɛo ni ayi amɛ kpelebii, ni awo amɛ gbokɛlɛi ni awo amɛ tsuŋ; atswia amɛ tɛi, akɛ akpalala gbala amɛmli, aka amɛ, akɛ klante gbe amɛ; aha amɛwo too gwantɛŋi kɛ too abotiai awoji kɛnyiɛ, ohia hia amɛ, awa amɛyi, afee amɛ niseniianii” lɛ ahe sane.—Hebribii 11:33-37.

16. Mɛɛ anɔkwayeli he nɔkwɛmɔ nɔ bɔfo Paulo kɛha?

¹⁶ Kristofoi a-Hela Ŋmalɛi lɛ hu kɛ bɔfo Paulo nɔkwɛmɔ nɔ ni sa kadimɔ lɛ haa. Ebaanyɛ ewie jogbaŋŋ etsɔɔ Tesalonika Kristofoi lɛ yɛ esɔɔmɔ lɛ he akɛ: “Nyɛ diɛŋtsɛ nyɛji odasefoi, nakai nɔŋŋ Nyɔŋmɔ ji, bɔ ni wɔye anɔkwa kɛ jalɛ, kɛ bɔ ni wɔfee wɔhe mɛi ni shwamɔ ko bɛ amɛhe beni wɔyɔɔ nyɛ mɛi ni nyɛheɔ nyɛyeɔ lɛ ateŋ lɛ.” (1 Tesalonikabii 2:10, NW) Wɔyɛ Paulo anɔkwayeli he odase kroko yɛ ewiemɔi ni aŋma afɔ shi yɛ 2 Korintobii 6:4, 5 lɛ, ni wɔkaneɔ yɛ jɛmɛ akɛ: “Shi moŋ, nɔ fɛɛ nɔ mli lɛ, wɔkɛ wɔhe tsɔɔ akɛ Nyɔŋmɔ sɔɔlɔi, yɛ tsuishiŋmɛɛ babaoo mli, yɛ amanehului amli, yɛ fimɔi amli, yɛ haomɔi amli, yɛ yii amli, yɛ gbokɛlɛfoi atsui amli, yɛ hoofeemɔi amli, yɛ deŋmegbomɔi amli, yɛ kpeshii amli, yɛ buadayelii amli.” Enɛɛmɛi fɛɛ yeɔ bɔ ni bɔfo Paulo yɔɔ bulɛ kɛha ehe lɛ he odase ejaakɛ eye anɔkwa.

Anɔkwafoi ni Yɔɔ Ŋmɛnɛŋmɛnɛ Beaŋ

17. Mɛɛ J. F. Rutherford wiemɔi tsɔɔ akɛ etswa efai shi akɛ ebaaye anɔkwa?

¹⁷ Kɛ wɔba ŋmɛnɛŋmɛnɛ beaŋ lɛ, wɔyɛ nɔkwɛmɔ nɔ kpakpa ni awie he momo yɛ wɔ hiɛkpamɔ wiemɔ lɛ mli lɛ. Kadimɔ nɔ ni aŋma yɛ Worldwide Security Under the “Prince of Peace” wolo lɛ baafa 146, yɛ yitso bibioo “Anɔkwayeli Yɛ Tsuŋwoo Be Mli” shishi lɛ. Akɛɛ yɛ jɛmɛ akɛ: “Beni ejieɔ anɔkwa ni eyeɔ Yehowa gbɛjianɔtoo lɛ kpo yɛ etsuŋwoo be lɛ mli lɛ, Buu Mɔɔ Asafo lɛ sɛinɔtalɔ, Joseph F. Rutherford ŋma nɔ ni nyiɛ sɛɛ nɛɛ yɛ December 25, 1918: ‘Akɛni mikpoo akɛ mikɛ Babilon aaasaa, shi mikɛ anɔkwayeli bɔ mɔdɛŋ ni masɔmɔ mi-Nuntsɔ lɛ hewɔ lɛ, miyɛ tsuŋwoo he, ni miida shi yɛ he. . . . Masumɔ kwraa ni mana E-nɔkpɛlɛmɔ kɛ ŋmɔlɔ ni mahi tsuŋwoo he, fe ni maŋmɛɛ he ni mikɛsaa loo ni maŋmɛɛ mihe maha Kooloo lɛ, ni maye mihe ni jeŋ muu fɛɛ ajie miyi lɛ.’ ”b

18, 19. Mɛɛ ŋmɛnɛŋmɛnɛ beaŋ anɔkwayeli he nɔkwɛmɔ nii ni nɔ bɛ wɔyɔɔ?

¹⁸ Wɔyɛ Kristofoi krokomɛi babaoo ni ŋmɛ amɛtsui shi yɛ yiwaa mli, ni fee nɔkwɛmɔ nɔ ni nɔ bɛ yɛ anɔkwayeli mli. Mɛi ni fata nɛkɛ aŋkroaŋkroi ni yeɔ anɔkwa nɛɛ ahe ji German Yehowa Odasefoi, yɛ Nazi yiwalɛ nɔyeli be lɛ mli, ní afee amɛhe mfoniri yɛ video, Purple Triangles lɛ mli ni ajara babaoo yɛ Ŋleshi wiemɔ mli lɛ. Nɔ ni sa kadimɔ hu ji Afrika Yehowa Odasefoi babaoo ni yeɔ anɔkwa, tamɔ mɛi ni yɔɔ Malawi lɛ nɛkɛ. Jɛmɛ ni gbokɛlɛfoi anɔkwɛlɔ ko ye anɔkwa ni Odasefoi lɛ yeɔ lɛ he odase yɛ, akɛ: “Amɛŋmɛŋ sane he ni amɛkɛsaa kɔkɔɔkɔ. Amɛyi faa po kɛkɛ.”

¹⁹ Mɔ ko nyɛŋ akane nyɛsɛɛ Yearbooks of Jehovah’s Witnesses nɛɛ ekomɛi ni anɔkwayeli ni anɔkwa Kristofoi jie lɛ kpo, tamɔ mɛi ni yɔɔ Greece, Mozambique, kɛ Poland lɛ esaŋ ehiɛ. Amɛteŋ mɛi pii na amanehulu yɛ piŋmɔi ni naa wa waa mli; ni agbe mɛi krokomɛi. 1992 Yearbook lɛ baafa 177 jieɔ Ethiopia Kristofoi hii nɛɛhu ni damɔ anɔkwayeli he kaa lɛ naa kɛyashi agbe amɛ lɛ mfoniri kpo. Akɛ Yehowa Odasefoi lɛ, ani efeee wɔ miishɛɛ akɛ wɔɔna nɔkwɛmɔ nii kpakpai babaoo nɛkɛ ni baakanya wɔ ni wɔdamɔ anɔkwayeli he kaa lɛ naa?

20. Kɛ wɔhi shi akɛ anɔkwafoi lɛ, mɛni nyiɛɔ sɛɛ kɛbaa?

²⁰ Kɛ wɔkɛ anɔkwayeli te shi wo kaai kɛ nɔnyɛɛi lɛ, wɔtswaa bulɛ ni wɔyɔɔ kɛha wɔhe lɛ wɔmaa shi. No hewɔ lɛ, namɔ gbɛfaŋ wɔsumɔɔ ni ana wɔ yɛ, yɛ anɔkwayeli he sane lɛ gbɛfaŋ? Kɛ wɔdamɔ anɔkwayeli he kaa lɛ naa lɛ, wɔyadamɔɔ Yehowa Nyɔŋmɔ afa yɛ sane lɛ mli, ni wɔhaa anaa Satan Abonsam akɛ amalelɔ ni ehiii fe fɛɛ taakɛ eji lɛ! Ehaa wɔnaa wɔ-Feelɔ lɛ, Yehowa Nyɔŋmɔ nɔkpɛlɛmɔ, kɛ naanɔ wala yɛ miishɛɛ mli lɛ he nyɔmɔwoo. (Lala 37:29; 144:15b) Abaasusu nɔ ni ebiɔ ni anyɛ adamɔ anɔkwayeli he kaa lɛ naa lɛ he yɛ enɛ sɛɛ.

[Shishigbɛ niŋmai]

Te Obaaha Hetoo Oha Tɛŋŋ?

◻ Mɛni hewɔ anɔkwafo ni mɔ ko ji lɛ kɛ kaa baa lɛ?

◻ Mɛni hewɔ abaanyɛ akɛɛ akɛ “anɔkwayeli” ji wiemɔ krɛdɛɛ ko lɛ?

◻ Mɛɛ Ŋmalɛ mli nɔkwɛmɔ nii wɔyɔɔ ni kɔɔ adesai ni yeee emuu ni ye anɔkwa lɛ he?

◻ Mɛɛ ŋmɛnɛŋmɛnɛ beaŋ anɔkwayeli ni nɔ bɛ he nɔkwɛmɔ nii wɔyɔɔ?

[Mfoniri ni yɔɔ baafa 11]

Charles Taze Russell

[Mfoniri ni yɔɔ baafa 12]

Yesu ji Yehowa “anɔkwafo” lɛlɛŋ

[Mfoniri ni yɔɔ baafa 13]

Hiob yeee emuu moŋ, shi eye Nyɔŋmɔ anɔkwa

[Mfoniri ni yɔɔ baafa 14]

Paulo kɛ anɔkwayeli he nɔkwɛmɔ nɔ kpakpa ha