“Dioofeemɔ Be Yɛ, ni Wiemɔ Be Yɛ”

SHII enyiɛ oye awerɛho akɛ: “Eji mile kulɛ miwieee nakai”? Ni kɛlɛ, ekolɛ obaakai bei komɛi ni onyɛɛɛ owie yɛ faŋŋ mli. Beni osusuɔ nɔ ni ba lɛ he lɛ, ekolɛ obaasusu akɛ: ‘Mina ni kulɛ miwie nɔ ko.’

Biblia lɛ kɛɔ akɛ, “dioofeemɔ be yɛ, ni wiemɔ be yɛ.” (Jajelɔ 3:7) Belɛ, biɛ ji he ni naagba lɛ yɔɔ, akɛ aaale be ni akɛaawie kɛ be ni akɛaafee dioo. Bei pii lɛ wɔ adesa bɔɔ su ni yeee emuu lɛ tsirɛɔ wɔ ni wɔfee nii ni wɔwie wiemɔi yɛ be ni esaaa mli. (Romabii 7:19) Belɛ, te wɔɔfee tɛŋŋ wɔkudɔ wɔ lilɛi ni anyɛɛɛ enɔ aye lɛ?—Yakobo 3:2.

Gbɛi ni Aaatsɔ nɔ Ajɔɔ Lilɛi lɛ He

Bɔni afee ni eye ebua wɔ koni wɔle be ni wɔkɛaawie kɛ be ni wɔkɛaafee dioo lɛ, ehe ehiaaa ni wɔŋmala saji babaoo ni wɔkɛaatsu shihilɛ fɛɛ shihilɛ he nii lɛ wɔshwie shi. Shi moŋ ehe miihia ni sui ni fata Kristofoi asu kɛ baŋ he lɛ akudɔ wɔ. Mɛni ji nɛkɛ sui nɛɛ?

Yesu Kristo tsɔɔ mli akɛ, suɔmɔ ji su titri ni kanyaa ekaselɔi lɛ. Ekɛɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yohane 13:35) Kɛ wɔjie nyɛmimɛi asuɔmɔ nɛɛ babaoo kpo wɔtsɔɔ lɛ, no baaha wɔkudɔ wɔ lilɛi lɛ jogbaŋŋ.

Sui enyɔ ni kɔɔ enɛ he lɛ hu baaye abua babaoo diɛŋtsɛ. Enɛɛmɛi ateŋ ekome ji heshibaa. Eyeɔ ebuaa wɔ koni ‘wɔbu mɛi krokomɛi akɛ amɛnɔ kwɔlɔ fe wɔ.’ (Filipibii 2:3) Ekroko lɛ ji mlijɔlɛ, ni haa ‘wɔtoɔ wɔtsui shi wɔhaa efɔŋ.’ (2 Timoteo 2:24, 25) Wɔyɛ bɔ ni wɔɔfee ni wɔkɛ nɛkɛ sui nɛɛ atsu nii lɛ he nɔkwɛmɔ nɔ ni yeɔ emuu yɛ Yesu Kristo mli.

Akɛni ewa waa akɛ wɔɔkudɔ wɔ lilɛi, beni wɔbaje nɔnyɛɛ shishi hewɔ lɛ, nyɛhaa wɔsusua gbɛkɛ dani Yesu gbele ba lɛ he wɔkwɛ—be ni “ehao waa” lɛ. (Mateo 26:37, 38, NW) Ebɛ naakpɛɛ akɛ Yesu nu he nɛkɛ, akɛni adesai fɛɛ anaanɔ wɔsɛɛ be shihilɛ lɛ damɔ anɔkwa ni eeeya nɔ eye Nyɔŋmɔ lɛ nɔ lɛ hewɔ.—Romabii 5:19-21.

Eka shi faŋŋ akɛ be ni Yesu kɛ eŋwɛi Tsɛ lɛ aaawie nɛ. No hewɔ lɛ etee koni eyasɔle, ni ekɛɛ ekaselɔi etɛ akɛ amɛya nɔ amɛshi kpe. Yɛ be ko sɛɛ lɛ ebanina amɛ ni amɛmiiwɔ. Kɛkɛ ni ekɛɛ Petro akɛ: “Aso nyɛnyɛɛɛ nyɛkɛ mi ashi kpe ŋmɛlɛtswaa kome pɛ?” Nɔ ni fata kãmɔ ni suɔmɔ yɔɔ mli nɛɛ he ji wiemɔi ni tsɔɔ akɛ enuɔ amɛ gbɔjɔmɔ lɛ shishi. Ekɛɛ: “Mumɔ lɛ miikpɛ̃lɛ moŋ, shi heloo lɛ egbede.” Sɛɛ mli lɛ, Yesu banina kaselɔi lɛ ekoŋŋ akɛ amɛmiiwɔ. Ekɛ amɛ wie yɛ mlijɔlɛ mli ni “eyiŋ etee, ni eyasɔle nɔ ni ji shii etɛ.”—Mateo 26:36-44.

Beni Yesu banina akɛ kaselɔi lɛ miiwɔ nɔ ni ji shii etɛ nɔ lɛ, efeee enii keketee shi ekɛɛ: “Nyɛ lɛ nyɛhe ejɔ nyɛ ni nyɛwɔɔ nɛɛ? Naa, ŋmɛlɛtswaa lɛ eshɛ etã, ni aaaŋɔ gbɔmɔ bi lɛ awo eshafeelɔi adɛŋ.” (Mateo 26:45) Mɔ ko ni etsui eyi obɔ kɛ suɔmɔ, ni hiɛ anɔkwa mlijɔlɛ kɛ heshibaa su pɛ baanyɛ ekɛ lilɛi lɛ atsu nii yɛ nɛkɛ gbɛ nɔ yɛ jaramɔ be ni tamɔ nɛkɛ mli.—Mateo 11:29; Yohane 13:1.

No sɛɛ etsɛɛɛ ni amɔ Yesu koni ayaye esane. Nɔ ni wɔkaseɔ yɛ biɛ ji akɛ, bei komɛi lɛ ehi jogbaŋŋ akɛ wɔɔfee dioo, yɛ be mli ni wɔkɛ wɔhe woɔ Kristofoi ashiɛmɔ nitsumɔ lɛ mli po. Akɛni amɛto amɛyiŋ akɛ amɛkɛ apasa wiemɔ aaafolɔ Yesu naa hewɔ lɛ, osɔfonukpai lɛ bɛ anɔkwale lɛ ni amɛaakase lɛ he miishɛɛ ko kwraa. No hewɔ lɛ Yesu fee dioo yɛ shihilɛ ni tamɔ nɔ ni fɛ́ɔ nɛɛ mli.—Okɛto Mateo 7:6 he.

Shi, Yesu efeee dioo beni osɔfonukpa lɛ bi akɛ: “Mina Nyɔŋmɔ, hiɛkalɔ lɛ, akɛ, kɛji bo ji Kristo, Nyɔŋmɔ bi lɛ, kɛɛmɔ wɔ!” lɛ. (Mateo 26:63) Akɛni aka kita atsɔɔ Yesu hewɔ lɛ, be eshɛ ni esa akɛ ewie. No hewɔ lɛ, eha hetoo akɛ: “Okɛɛ. Shi miikɛɛ nyɛ akɛ: Kɛjɛ be nɛɛ nɔ kɛyaa lɛ, nyɛaana gbɔmɔ bi lɛ akɛ eta hewalɛ ninejurɔ nɔ, ni eeba yɛ ŋwɛi atatui lɛ amli.”—Mateo 26:64.

Yesu kudɔ elilɛi lɛ yɛ gbɛ ni yeɔ emuu nɔ, yɛ nakai gbi ni hiamɔ eba he nɛɛ mli lɛ. Yɛ egbɛfaŋ lɛ, suɔmɔ, mlijɔlɛ, kɛ heshibaa ji emligbɛ su lɛ fãi komɛi. Te wɔɔfee tɛŋŋ wɔkɛ sui nɛɛ atsu nii ni wɔkɛkudɔ wɔ lilɛi beni wɔbaje nɔnyɛɛ shishi lɛ?

Lilɛi lɛ Kudɔmɔ Beni Wɔmli Efũ

Kɛ wɔmli fu lɛ, bei pii lɛ wɔnyɛɛɛ wɔkudɔ wɔ lilɛi. Akɛ nɔkwɛmɔ nɔ lɛ, be ko lɛ Paulo kɛ Barnaba ná jwɛŋmɔi ni kɛ amɛhe kpaaa. “Barnaba hiɛ kã nɔ akɛ amɛaaŋɔ Yohane ni atsɛɔ lɛ Marko lɛ amɛfata amɛhe. Shi Paulo lɛ, esusu akɛ esaaa akɛ amɛaaŋɔ mɔ ni kpale yɛ amɛsɛɛ yɛ Pamfilia ni ekɛ amɛ eyaaa nitsumɔ lɛ amɛfata amɛhe. No hewɔ lɛ efee béi aahu po ni eha amɛgbala amɛmli.”—Bɔfoi lɛ Asaji 15:37-39.

Michael,a ni kɛ afii komɛi etsu nii yɛ tsumaa nitsumɔi amli lɛ wie akɛ: “Mɔ ko yɛ tsumaa nitsumɔ hé lɛ ni mile lɛ jogbaŋŋ ni mibuɔ lɛ. Shi etamɔ nɔ ni be fɛɛ be nɛɛ etaoɔ tɔmɔ yɛ minitsumɔ lɛ he. Enɛ dɔ mi ni ewo mimli la, shi mijieee mihenumɔi lɛ akpo. Gbi ko lɛ nibii amli bawo wu beni ewie nitsumɔ ko ni migbe naa nɔŋŋ lɛ he efɔŋ lɛ.

“Mijie henumɔi ni mitĩa naa miwo mimli lɛ fɛɛ kpo. Be mli ni mimli ewo la fe nine lɛ, mijwɛŋmɔ bɛ hewalɛ fɔŋ ni enɛ baana yɛ mɛi ni yɔɔ wɔmasɛi lɛ anɔ lɛ nɔ. Kɛjɛ no sɛɛ yɛ gbi lɛ nɔ lɛ, miyasumɔɔɔ ni mikɛ lɛ wieɔ loo ni minaa lɛ po. Kpaako miyoo akɛ mitsuuu naagba lɛ he nii jogbaŋŋ. Kulɛ ebaahi jogbaŋŋ moŋ akɛ mafee dioo ni mawie beni mimlifu lɛ eba shi.”

Miishɛɛ sane ji akɛ, Kristofoi asuɔmɔ tsirɛ mɛi enyɔ nɛɛ ni amɛsaa amɛ béi lɛ. Michael tsɔɔ mli akɛ: “Beni wɔgba sane yɛ faŋŋ mli sɛɛ lɛ, wɔnu wɔhe shishi jogbaŋŋ, ni amrɔ nɛɛ wɔ naanyobɔɔ lɛ mli ewa.”

Taakɛ Michael kase lɛ, kɛ wɔna akɛ wɔmli efu lɛ, bei komɛi lɛ nilee yɛ mli akɛ wɔɔfee dioo. Abɛi 17:27 kɛɛ: “Mɔ ni mumɔ he jɔ lɛ, lɛ ji mɔ ni kɔɔ sane sɛɛ.” Sanesɛɛkɔmɔ kɛ nyɛmimɛi asuɔmɔ baaye abua wɔ ni wɔkudɔ wɔ henumɔ ni baaha wɔwie nɔ ni ehiii lɛ. Kɛ atɔ̃ wɔnɔ lɛ, nyɛhaa wɔkɛ nakai mɔ lɛ pɛ awiea yɛ mlijɔlɛ kɛ heshibaa mumɔ mli, kɛ jwɛŋmɔ akɛ wɔɔha toiŋjɔlɛ aba ekoŋŋ. Ni kɛ akɛ mlifu ebolɔ momo hu? Belɛ suɔmɔ baatsirɛ wɔ ni wɔtsi wɔ henɔwomɔ naa ni wɔkɛ heshibaa atao akɛ wɔɔjaje shihilɛ lɛ. Be ni esa akɛ awie lɛ nɛ, koni atsɔɔ bɔ ni ashwa he aha, ni atsa henumɔ mli pilamɔi kɛtsɔ sanegbaa kpakpa nɔ.—Mateo 5:23, 24.

Be Mli ni Dioofeemɔ lɛ Jeee Tsabaa

Mlifu loo mlilawoo baanyɛ atsi wɔnaa koni wɔkɛ mɔ ni wo wɔ mlifu lɛ akpa wiemɔ. Enɛ baanyɛ aye awui waa. Maríab jaje faŋŋ akɛ: “Klɛŋklɛŋ afi lɛ mli yɛ wɔ gbalashihilɛ lɛ mli lɛ, bei komɛi yɛ ni mikɛ miwu lɛ ewieee gbii abɔ, yɛ be kɛ beaŋ. Bei pii lɛ, enɛ baaa yɛ naagbai wuji ahewɔ, shi moŋ, enɛ jɛɔ mlifu bibii ni mitĩa naa miwo mimli hewɔ. Mitee nɔ misusu mlilawooi nɛɛ ahe aahu kɛyashi beni amɛbatsɔmɔ gbɛtsii nii ni tamɔ gɔŋ. Kɛkɛ ni be ko bashɛ ni minyɛɛɛ naa madamɔ dɔŋŋ, kɛkɛ ni mifɔ̃ɔ miwu lɛ kɛ wiemɔ kɛyashi beni mitsui nyɔ mimli.”

María kɛfata he akɛ: “Biblia mli ŋmalɛ pɔtɛɛ ko—‘hulu akanyɔ shi yɛ nyɛmlila lɛ nɔ’—ye ebua mi koni mijaje mijwɛŋmɔ ekoŋŋ. Miwu kɛ mi fɛɛ bɔ mɔdɛŋ waa koni wɔha wɔ sanegbaa aya hiɛ bɔni afee ni naagbai akafee ewuji. Efeee nɔ ni yɔɔ mlɛo, shi beni wɔhi shi afii nyɔŋma sɛɛ lɛ, miyɛ miishɛɛ akɛ makɛɛ akɛ nɛkɛ dioofeemɔ bei ni mɔbɔnalɛ bɛ mli nɛɛ efɔɔɔ baa kwraa. Shi kɛlɛ, esa akɛ makpɛlɛ nɔ akɛ miibɔ mɔdɛŋ lolo ni makudɔ nɛkɛ henumɔ nɛɛ.”—Efesobii 4:26.

Taakɛ María kpá shi ena lɛ, kɛ béi te shi yɛ mɛi enyɔ ateŋ lɛ, sanegbaa ni eyaaa nɔ lɛ jeee tsabaa. Yɛ shihilɛi ni tamɔ nɛkɛ shishi lɛ, mlifu baanyɛ ada, ni ebaanyɛ efite wekukpaa lɛ. Yesu kɛɛ akɛ esa akɛ wɔfee ‘oya yɛ béi asaamɔ mli.’ (Mateo 5:25) “Wiemɔ ni awie yɛ be ni sa mli lɛ” baanyɛ aye abua wɔ ni ‘wɔtao hejɔlɛ.’—Abɛi 25:11; 1 Petro 3:11.

Ehe miihia hu ni wɔwie faŋŋ yɛ be mli ni yelikɛbuamɔ he hiaa wɔ. Kɛ wɔmiipiŋ yɛ mumɔŋ naagba ko hewɔ lɛ, ekolɛ wɔɔshashao shi akɛ wɔkɛ jatsu aaafɔ mɛi krokomɛi anɔ. Shi kɛ wɔfee dioo lɛ, naagba lɛ hu mli baanyɛ awo wu. Kristofoi onukpai ni ahala amɛ lɛ buɔ wɔhe, ni kɛ wɔbaaŋmɛ amɛ gbɛ lɛ, ŋwanejee ko bɛ he akɛ amɛbaasumɔ akɛ amɛaaye amɛbua. Be ni esa akɛ wɔwie lɛ nɛ.—Yakobo 5:13-16.

Nɔ ni fe fɛɛ lɛ, esa akɛ wɔjɛ wɔtsuiŋ wɔkɛ Yehowa awie daa yɛ sɔlemɔ mli, taakɛ Yesu fee lɛ. Yɛ anɔkwale mli lɛ, nyɛhaa ‘wɔfɔsea wɔtsui’ wɔshwiea wɔŋwɛi Tsɛ lɛ nɔ.—Lala 62:9; okɛto Hebribii 5:7 he.

‘Be ni Akɛaawie’ Nyɔŋmɔ Maŋtsɛyeli lɛ He

Kristofoi ashiɛmɔ nitsumɔ lɛ ji famɔ ni ajɛ ŋwɛi akɛha ni esa akɛ atsu he nii dani naagbee lɛ aba. No hewɔ lɛ, ehe miihia ni Yehowa sɔɔlɔi ajaje Maŋtsɛyeli lɛ he sanekpakpa lɛ fe bei fɛɛ ni eho. (Marko 13:10) Taakɛ bɔfoi lɛ ji lɛ, anɔkwa Kristofoi ‘nyɛŋ afɔ̃ɔ nibii ni amɛna ni amɛnu lɛ ahe wiemɔ’ kɛkɛ.—Bɔfoi lɛ Asaji 4:20.

Shi kɛlɛ, jeee mɔ fɛɛ mɔ sumɔɔ ni ebo sanekpakpa lɛ toi. Yɛ anɔkwale mli lɛ, beni Yesu tsuɔ ekaselɔi lɛ koni amɛyashiɛ lɛ, ewo amɛ ŋaa ni ‘amɛtao mɔ ni sa.’ Akɛni Yehowa enyɛɛɛ mɔ ko nɔ akɛ eja lɛ hewɔ lɛ, wɔkɛ kuɛŋtimɔ eyaŋ nɔ akɛ wɔkɛ mɔ ko ni yaa nɔ ekpoɔ Maŋtsɛyeli shɛɛ sane lɛ aaagba sane. (Mateo 10:11-14) Shi wɔyɛ miishɛɛ akɛ wɔkɛ mɛi ni ‘yɔɔ naanɔ wala he jwɛŋmɔ kpakpa’ lɛ aaagba Yehowa maŋtsɛyeli lɛ he sane.—Bɔfoi lɛ Asaji 13:48; Lala 145:10-13.

Suɔmɔ, mlijɔlɛ, kɛ heshibaa ji sui ni baanyɛ aye abua wɔ ni wɔkudɔ wɔ henumɔ ni yeee emuu lɛ ni wɔkɛaawie kɛkɛ ni wɔsusuuu he loo ni wɔɔku sɛɛ wɔbote dioofeemɔ ni naa wa mli lɛ. Be mli ni wɔyaa hiɛ yɛ sui nɛɛ amli lɛ, wɔbaafee mɛi ni awula amɛ jogbaŋŋ bɔ ni aaaha amɛle be ni sa kɛ be ni esaaa akɛ awieɔ.

[Shishigbɛ niŋmai]

[Mfoniri ni yɔɔ baafa 23]

Abaanyɛ asaa naagbai kɛtsɔ sanegbaa kpakpa nɔ