Ani Mɔ ko Ena Ohe Jwɛŋmɔ Fɔŋ Dã?

MƐƐ nɔ kome anaa yɛ adesai awekui ateŋ yiwalɛ nifeemɔi, hewolonɔ sui amligbalamɔ, mɛi ahiɛaŋkwɛmɔ, gbɔmɛi amligbalamɔ, kɛ gbɔmɛi akuu muu fɛɛ ni akpataa amɛhiɛ lɛ he? Fɛɛ jɛɔ adesa henumɔ ko ni egbɛ eshwã waa hewɔ—mɔ he jwɛŋmɔ fɔŋ namɔ!

Mɛni ji jwɛŋmɔ fɔŋ namɔ? Ensaiklopedia ko tsɔɔ shishi akɛ “jwɛŋmɔ ni anaa yɛ nɔ ko he, ni anaaa be loo akwɛɛɛ ni asusu nibii ahe jogbaŋŋ bɔ ni sa.” Akɛ adesai ni yeee emuu lɛ, wɔfɔɔ mɛi ahe jwɛŋmɔ fɔŋ namɔ yɛ gbɛi komɛi anɔ. Ekolɛ obaanyɛ osusu bei komɛi ni omu sane naa yɛ gbɛ ko nɔ, yɛ be mli ni oleee nibii fɛɛ ni kɔɔ he. Biblia lɛ kɛ jwɛŋmɔ fɔŋ henumɔi ni anaa nɛɛ toɔ bɔ ni Yehowa Nyɔŋmɔ kojoɔ ehaa lɛ he ni anaa sɔrɔto ni yɔɔ mli. Ekɛɔ akɛ: “Yehowa kwɛɛɛ nii tamɔ gbɔmɔ; ejaakɛ gbɔmɔ lɛ ekwɛɔ kponɔ gbɛ nii, shi Yehowa lɛ tsui ekwɛɔ.”—1 Samuel 16:7.

Jwɛŋmɔ Fɔŋ Namɔ Baanyɛ Aye Awui

Ŋwanejee ko bɛ he akɛ, mɔ ko kɛ̃ ejwɛŋ wɔteŋ mɔ fɛɛ mɔ he yɛ gbɛ ni ejaaa nɔ dã. (Okɛto Jajelɔ 7:21, 22 he.) Yɛ shishinumɔ ni mli lɛɛ naa lɛ, ana wɔteŋ mɔ fɛɛ mɔ he jwɛŋmɔ fɔŋ dã. Shi, kɛ ajie kɛjɛ jwɛŋmɔ mli oya nɔŋŋ lɛ, ekolɛ jwɛŋmɔ fɔŋ ni ana nɛɛ baaye awui bibioo pɛ, loo eyeŋ awui po. Susumɔi nɛɛ ni ahaa ehiɔ jwɛŋmɔ mli lɛ ji nɔ ni baanyɛ aye awui lɛ. Ebaanyɛ elaka wɔ ni wɔhe amale wɔye. Akɛ nɔkwɛmɔ nɔ lɛ, jwɛŋmɔ fɔŋ ni amɛyɔɔ hewɔ lɛ, mɛi komɛi heɔ yeɔ lɛlɛŋ akɛ mɔ ko baanyɛ afee hiɛjoolɔ, anihaolɔ, kwashia, loo henɔwolɔ, yɛ jamɔ, loo weku, loo maŋ nɔ ni ejɛ lɛ hewɔ.

Bei pii lɛ, nɛkɛ susumɔi ni ejaaa nɛɛ kɛ nibii ni ehiii, niseniianifeemɔ, loo yiwalɛ baa mɛi krokomɛi anɔ. Gbɔmɛi akpekpei abɔ elaaje amɛwala yɛ gbɔmɔgbee, adesai akuu muu fɛɛ ahiɛkpatamɔ, wekui ateŋ gbɔmɔgbee, kɛ mɛi ahe jwɛŋmɔi fɔji krokomɛi ni tamɔ nɛkɛ, ni tekeɔ nɔ lɛ amli.

Nɔyelii ewuu eshi mɛi ahe jwɛŋmɔ fɔŋ ni anaa lɛ, yɛ je lɛŋ he fɛɛ he kɛtsɔ mla naa sɛɛfimɔ kɛ nɔmimaa ni amɛkɛha hegbɛ ni gbɔmɛi yɔɔ kɛha heyeli, shweshweeshwe feemɔ, kɛ egbɔyeli namɔ lɛ nɔ. Kɛji okane omaŋ lɛ mla gbɛjianɔtoo loo emla wolo titri fe fɛɛ ni yɔɔ lɛ, ŋwanejee ko bɛ he akɛ obaana wiemɔ ko loo mla tsakemɔ ko ni akɛfata he koni ebu hegbɛi ni maŋbii fɛɛ yɔɔ lɛ ahe, ní amɛ hewolonɔ su, amɛbɔɔ su, loo amɛjamɔ kɔɔɔ he eko. Ni kɛlɛ, mɛi ahe jwɛŋmɔ fɔŋ namɔ kɛ mɛi ahiɛaŋkwɛmɔ egbɛ eshwã je lɛŋ he fɛɛ he.

Ani mɔ ko ena ohe jwɛŋmɔ fɔŋ dã? Ani atsɛ bo akɛ hiɛjoolɔ, anihaolɔ, kwashia, aloo henɔwolɔ, yɛ ohewolonɔ su, afii abɔ ni oye, obɔɔ su, maŋ nɔ ni ojɛ, aloo ojamɔ mli hemɔkɛyelii ahewɔ? Ani aatsi hegbɛi ni oyɔɔ kɛha skulyaa, nitsumɔ, shiã, kɛ shihilɛi mli hiamɔ nii kpakpai ni ooona lɛ naa yɛ ohe jwɛŋmɔ fɔŋ ni ayɔɔ lɛ hewɔ? Kɛ nakai lɛ, mɛɛ gbɛ nɔ oootsɔ okpee naa?

[Mfoniri ni yɔɔ baafa 3]

Mɛi ahe jwɛŋmɔ fɔŋ namɔ kɛ hewolonɔ su mli hetsɛ̃ baa

[He ni Sane lɛ Jɛ]

Nina Berman/Sipa Press