Ani Ookase Wɔ Nyɔŋmɔ ni Kwɛɛɛ Hiɛaŋ Lɛ?

HIƐAŊ NI AKWƐƐƐ—nɛgbɛ abaanyɛ ana yɛ? Mɔ ko yɛ ni kwɛɛɛ hiɛaŋ kwraa, ni eye ehe kɛjɛ mɛi ahe jwɛŋmɔ fɔŋ ni anaa, hiɛaŋkwɛmɔ, kɛ nii amli ni ajieɔ lɛ he. Lɛ ji Yehowa Nyɔŋmɔ, adesai a-Bɔlɔ lɛ. Shi kɛlɛ, afii ohai 19 lɛ mli Ŋleshi niŋmalɔ Charles Lamb ŋma yɛ faŋŋ mli yɛ adesai ahe akɛ: “Miiwie yɛ faŋŋ mli akɛ, mɛi ahe jwɛŋmɔ fɔŋ ni anaa—ni feɔ nibii ni asumɔɔ kɛ nɔ ni asumɔɔɔ eyi mimli obɔ.”

Kɛ eba lɛ akɛ aawie hiɛaŋ ni akwɛɛɛ he lɛ, enɛ faaa yɛ adesai ateŋ sharamɔ mli kwraa. Israel Maŋtsɛ Salomo ni le nii lɛ yɔse yɛ afii ohai babaoo ni eho lɛ amli akɛ, “gbɔmɔ yeɔ gbɔmɔ nɔ ni ekɛyeɔ lɛ awui.” (Jajelɔ 8:9, NW) Hewolonɔ su mli hetsɛ̃, maŋ béi, kɛ weku mli béi miiya nɔ waa diɛŋtsɛ. No hewɔ lɛ, ani abaanyɛ ahe aye akɛ, adesai diɛŋtsɛ baanyɛ ana shihilɛ ni hiɛaŋkwɛmɔ bɛ mli?

Mɔdɛŋbɔɔ babaoo he miihia koni wɔkɛkudɔ wɔ subaŋi ní wɔjie mɛi ahe jwɛŋmɔi fɔji fɛɛ ni yɔɔ wɔmligbɛ tɔ̃ɔ lɛ kɛjɛ wɔmli. (Efesobii 4:22-24) Ekolɛ wɔyɛ subaŋi komɛi ni wɔná kɛjɛ wɔ kwasafoŋ shihilɛ mli kɛ skul tsɔsemɔ ni wɔná ní ehe shi yɛ wɔ weku, hewolonɔ su kɛ maŋ ni wɔjɛ mli lɛ mli vii ni wɔleee. Bei pii lɛ, nɛkɛ sui ni tamɔ nɔ ni yeee awui nɛɛ boteɔ mɔ mli vii ni ehaa subaŋi ni haa mɔ kwɛɔ hiɛaŋ lɛ teɔ shi. Scotlandnyo mlalelɔ kɛ niŋmalɔ Lord Francis Jeffrey kpɛlɛ nɔ po akɛ: “Nɔ ko kwraa bɛ ni gbɔmɔ hiɛ kpaa nɔ yɛ be kakadaŋŋ mli ni eleee, tamɔ mɛi ahe jwɛŋmɔ fɔŋ ni eyɔɔ ni ehe shi waa lɛ.”

Lenaa ji mɔ ko ni kpɛlɛɔ nɔ akɛ, mɔdɛŋbɔɔ babaoo he miihia ni akɛwuu ashi su ni anaa akɛ akwɛ hiɛaŋ lɛ. Ekɛɛ, mɛi ahe jwɛŋmɔ fɔŋ ni mɔ ko yɔɔ ni eeetsi naa lɛ “biɔ mɔdɛŋbɔɔ babaoo, ejaakɛ tsɔsemɔ naa mɔ nɔ hewalɛ waa.” Lena kpɛlɛ nɔ hu akɛ, kaimɔi ni akɛaaha be fɛɛ be he miihia.

Hiɛaŋ ni Yehowa Kwɛɛɛ lɛ He Sane ni Aŋma Afɔ Shi

Yehowa ji hiɛaŋ ni akwɛɛɛ lɛ he nɔkwɛmɔ nɔ ni yeɔ emuu. Wɔkaneɔ bɔ ni ejie hiɛaŋ ni ekwɛɛɛ kpo lɛ yɛ bɔ ni ekɛ adesai ye eha lɛ mli yɛ Biblia mli shishijee baafai lɛ amli. Wɔbaanyɛ wɔkase babaoo kɛjɛ nɔkwɛmɔ nii kɛ kaimɔi ni nɔ bɛ nɛɛ amli.

Yehowa jie hiɛaŋ ni ekwɛɛɛ kpo yɛ bɔ ni etsu shihilɛ ni ha Yudanyo bɔfo Petro jaje sanekpakpa lɛ etsɔɔ Kornelio kɛ Jeŋmajiaŋbii krokomɛi yɛ 36 Ŋ.B. lɛ he nii eha lɛ. Petro wie yɛ nakai be lɛ mli akɛ: “Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.”—Bɔfoi lɛ Asaji 10:34, 35.

Yehowa etee nɔ ejie hiɛaŋ ni ekwɛɛɛ kpo yɛ bɔ ni ekɛ adesa weku lɛ yeɔ ehaa lɛ fɛɛ mli. Kristo Yesu wie e-Tsɛ he akɛ: “Ehaa ehulu teɔ shi yɛ mɛi fɔji kɛ mɛi kpakpai anɔ, ni ehaa nugbɔ nɛɔ yɛ jalɔi kɛ mɛi ni bɛ jalɛ lɛ anɔ.” (Mateo 5:45) Beni Petro yaa nɔ ejieɔ Yehowa yi akɛ Nyɔŋmɔ ni kwɛɛɛ hiɛaŋ lɛ, eye odase akɛ: “Etsui shi etoɔ ehaa wɔ, ejaakɛ esumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.”—2 Petro 3:9.

Yɛ Noa gbii amli, beni “gbɔmɛi anɔ fɔŋ feemɔ fa yɛ shikpɔŋ lɛ nɔ, ni amɛtsuiŋ susumɔi ajwɛŋmɔ fɛɛ lɛ efɔŋ kɛkɛ ji daa nɛɛ” lɛ, Yehowa wo nakai adesai aje lɛ hiɛkpatamɔ he akpɔ. (1 Mose 6:5-7, 11, 12) Shi kɛlɛ, Noa kpɛ lɛlɛ ko yɛ Nyɔŋmɔ fãmɔ naa yɛ faŋŋ mli, yɛ mɛi ni yɔɔ ebeaŋ lɛ ahiɛ. Beni lɛ kɛ ebihii lɛ kpɛɔ lɛlɛ lɛ, no mli lɛ, Noa ji “jalɛ shiɛlɔ” hu. (2 Petro 2:5) Yɛ nakai yinɔ bii lɛ atsuiŋ susumɔ fɔŋ ni ele lɛ fɛɛ sɛɛ lɛ, Yehowa kɛ shɛɛ sane ni yɔɔ faŋŋ ha amɛ ni hiɛaŋkwɛmɔ ko bɛ mli. Ejɛ mɔbɔnalɛ mli ekanya amɛ jwɛŋmɔ kɛ tsuii kɛtsɔ Noa ni eha ekpɛ lɛlɛ ni eshiɛ lɛ nɔ. Amɛyɛ hegbɛ fɛɛ hegbɛ ni amɛkɛaahere nɔ, shi yɛ no najiaŋ lɛ, “amɛhiɛ bɛ amɛhe nɔ kɛyashi nu-afua lɛ baloo amɛ fɛɛ kɛtee.”—Mateo 24:39.

Mɛɛ hiɛaŋ ni Yehowa kwɛɛɛ lɛ he nɔkwɛmɔ nɔ ni nɔ bɛ nɛ! Yɛ naagbee gbii ni jaraa nɛɛ amli lɛ, etsirɛɔ Nyɔŋmɔ tsuji koni amɛkɛ hiɛaŋ ni akwɛɛɛ ni tamɔ enɛ nɔŋŋ ajaje Maŋtsɛyeli lɛ he sanekpakpa lɛ. Kɛfata he lɛ, amɛtsiii amɛhe kɛjɛɛɛ Yehowa oweletɔɔ gbi lɛ he sane lɛ jajemɔ he. Amɛkɛ Yehowa shɛɛ sane lɛ haa maŋbii yɛ faŋŋ mli ni hiɛaŋkwɛmɔ ko kwraa bɛ mli, koni mɔ fɛɛ mɔ anu.—Yesaia 61:1, 2.

Shiwoi ni Yehowa kɛha blematsɛmɛi Abraham, Isak, kɛ Yakob lɛ ha efee faŋŋ akɛ Nyɔŋmɔ ni kwɛɛɛ hiɛaŋ ji lɛ. Mɔ ni ahala lɛ ni ‘abaatsɔ’ enɔ “ajɔɔ shikpɔŋ lɛ nɔ jeŋmaji lɛ fɛɛ” lɛ baajɛ amɛ wekukpaa lɛ diɛŋtsɛ mli aba. (1 Mose 22:18; 26:4; 28:14) Kristo Yesu bafee Mɔ ni ahala lɛ lɛ. Yehowa tsɔ Yesu gbele kɛ eshitee lɛ nɔ egbele yiwalaheremɔ gbɛ kɛha adesai fɛɛ ni feɔ toiboo. Hɛɛ, nine baanyɛ ashɛ Kristo kpɔmɔ afɔleshãa lɛ mli sɛɛnamɔi lɛ anɔ ni hiɛaŋkwɛmɔ bɛ mli.

Yɛ Mose gbii lɛ amli lɛ, hiɛaŋ ni Yehowa kwɛɛɛ lɛ jie ehe kpo yɛ gbɛ ni yɔɔ miishɛɛ fe fɛɛ nɔ yɛ sane ni kɔɔ Zelofehad biyei lɛ ahe lɛ mli. Nɛkɛ yei enumɔ nɛɛ kɛ naagba ko ni naa wa ni kɔɔ amɛtsɛ gboshinii he lɛ kpe yɛ Shiwoo Shikpɔŋ lɛ nɔ. Enɛ ba lɛ nakai, ejaakɛ no mli lɛ, eji kusum nifeemɔ yɛ Israel akɛ akɛ shikpɔŋ ni ji gboshinii lɛ aha bihii. Shi kɛlɛ, Zelofehad gbo ni ebɛ binuu ni baaye gboshinii. No hewɔ lɛ, Zelofehad biyei enumɔ lɛ kɛ amɛ nibimɔ lɛ bafɔ Mose hiɛ ni atsu he nii ni hiɛaŋkwɛmɔ ko bɛ mli, amɛkɛɛ: “Mɛɛba aaajie wɔtsɛ gbɛi yɛ eweku lɛ mli, yɛ binuu ni ebɛ lɛ hewɔ? Nyɛhaa wɔ wɔgbɛnaa yɛ wɔtsɛ nyɛmimɛi lɛ ateŋ!” Yehowa bo amɛfaikpamɔi atoi ni efã Mose akɛ: “Kɛji nuu ko gbo ni ebɛ binuu lɛ, no lɛ nyɛhaa egboshinii lɛ atsɔ̃a ebiyoo nɔ̃.”—4 Mose 27:1-11.

Mɛɛ hiɛaŋ ni akwɛɛɛ ni suɔmɔ yɔɔ mli he nɔkwɛmɔ nɔ nɛ! Bɔni afee ni akwɛ koni akɛ akutso ko mli gboshinii akaha akutso kroko beni biyei lɛ ebote gbalashihilɛ mli lɛ, abi ni amɛkɛ “amɛtsɛmɛi akutso lɛ mli wekumɛi lɛ eko” pɛ abote gbalashihilɛ mli.—4 Mose 36:5-12.

Anaa hiɛaŋ ni Yehowa kwɛɛɛ lɛ mli nilee kroko yɛ kojolɔ kɛ gbalɔ Samuel gbii lɛ amli. Yehowa fã koni eyafɔ maŋtsɛ hee ko mu yɛ Yuda akutso lɛ mli yɛ Ishai Betlehemnyo lɛ weku lɛ mli. Shi Ishai yɛ bihii kpaanyɔ. Namɔ abaafɔ lɛ mu akɛ maŋtsɛ? Samuel nya bɔ ni Eliab gbɔmɔtso kɛ ekwɔlɛ yɔɔ lɛ he waa. Shi kɛlɛ, kponɔgbɛ nii naaa Yehowa nɔ hewalɛ. Ekɛɛ Samuel akɛ: “Kaakwɛ ehiɛŋtso loo ekwɔlɛ nyenyereŋŋ lɛ; . . . Ejaakɛ Yehowa kwɛɛɛ nii tamɔ gbɔmɔ; ejaakɛ gbɔmɔ lɛ ekwɛɔ kponɔgbɛ nii, shi Yehowa lɛ tsui ekwɛɔ!” Ahala David, Ishai binuu fioo kwraa lɛ.—1 Samuel 16:1, 6-13.

Nii ni Akaseɔ Kɛjɛɔ Hiɛaŋ ni Yehowa Kwɛɛɛ lɛ Mli

Kristofoi onukpai baafee jogbaŋŋ akɛ amɛaakase Yehowa kɛtsɔ naanyo heyelilɔ ko mumɔŋ sui kpakpai ni amɛaakwɛ lɛ nɔ. Ewaaa akɛ aaakojo aŋkro ko yɛ tɛi ni wɔ diɛŋtsɛ wɔfolɔ wɔshwie shi lɛ anaa, ni wɔŋmɛ gbɛ ni wɔ diɛŋtsɛ wɔ henumɔi aha wɔsusumɔ nɔ. Taakɛ onukpa ko tsɔɔ mli lɛ, “Mibɔɔ mɔdɛŋ ni mikɛ mɛi krokomɛi aye yɛ gbɛ ni aaasa Yehowa hiɛ lɛ nɔ, jeee nɔ ni damɔ susumɔi ni mitsɔ hiɛ mina momo nɔ.” Kwɛ bɔ ni sɛɛnamɔ yɔɔ he ha, akɛ Yehowa tsuji fɛɛ kɛ e-Wiemɔ lɛ aaatsu nii akɛ amɛ shishitoo mla!

Biblia mli nɔkwɛmɔ nii ni atsɔ hiɛ atsɔɔ nɛɛ yeɔ ebuaa wɔ koni wɔwuu wɔshi hewolonɔ su loo maŋ ni mɔ ko jɛ mli lɛ he henumɔ fɔŋ ni yɔɔ wɔmli lolo lɛ. Kɛ wɔkase hiɛaŋ ni Yehowa kwɛɛɛ lɛ, wɔbuɔ Kristofoi asafo lɛ he kɛjɛɔ jwɛŋmɔ fɔŋ ni anaa, nii amlijiemɔ, kɛ hiɛaŋkwɛmɔ he.

Bɔfo Petro kase akɛ “Nyɔŋmɔ jeee mɛi ahiɛaŋkwɛlɔ.” (Bɔfoi lɛ Asaji 10:34) Hiɛaŋkwɛmɔ ji hiɛaŋ ni akwɛɛɛ lɛ henyɛlɔ, ni ekuɔ suɔmɔ kɛ ekomefeemɔ he shishitoo mlai lɛ amli. Yesu fɔ nine etsɛ ohiafoi, mɛi ni egbɔjɔ, kɛ heshibalɔi, ni eha amɛjatsui lɛ fee nɔ ni etsiii. (Mateo 11:28-30) Esoro lɛ kwraa yɛ Yudafoi ajamɔ mli hiɛnyiɛlɔi ni ye gbɔmɛi lɛ anɔ nuntsɔmɛi asane, ni kɛ mlai ni tsii tamɔ jatsu tere amɛ lɛ ahe. (Luka 11:45, 46) Eka shi faŋŋ akɛ, enɛ feemɔ, kɛ niiatsɛmɛi kɛ gbɔmɛi wuji ni akwɛɔ amɛhiɛaŋ lɛ, kɛ Kristo tsɔɔmɔi kpaaa gbee.—Yakobo 2:1-4, 9.

Ŋmɛnɛ, Kristofoi onukpai baa amɛhe shi amɛhaa Kristo yitsoyeli lɛ, ni amɛkwɛɛɛ Yehowa webii ni ejɔɔ amɛhe nɔ lɛ fɛɛ ahiɛaŋ. Yɛ be mli ni ‘amɛkwɛɔ Nyɔŋmɔ tooku ni akɛwo amɛdɛŋ lɛ anɔ lɛ,’ amɛtsiɔ amɛhe kɛjɛɔ hiɛaŋ ni akwɛɔ yɛ shika ni mɔ ko yɔɔ, nibii ni haa esoroɔ mɔ ko, loo wekukpaai ahe. (1 Petro 5:2) Kristofoi onukpai haa hiɛaŋ ni akwɛɛɛ he mumɔ hiɔ asafo lɛ mli, kɛ́ amɛkase Nyɔŋmɔ ni kwɛɛɛ hiɛaŋ lɛ, ni amɛbo kɔkɔ ni ebɔɔ eshiɔ hiɛaŋkwɛmɔ nifeemɔi lɛ toi lɛ.

Yehowa Odasefoi a-Kristofoi asafo lɛ ji majimaji ateŋ nyɛmifeemɔ kuu. Eji odaseyeli ni yɔɔ ni tsɔɔ akɛ, nine baanyɛ ashɛ adesai ashihilɛ ni mɛi ahe jwɛŋmɔ fɔŋ ni anaa kɛ hiɛaŋkwɛmɔ bɛ mli lɛ nɔ lɛlɛŋ, yɛ Yesu Kristo gbɛtsɔɔmɔ shishi. Odasefoi lɛ ‘ewo gbɔmɔ hee ni abɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ.’ (Efesobii 4:24) Hɛɛ, amɛmiikase nii kɛmiijɛ Nyɔŋmɔ, Yehowa, ni kwɛɛɛ hiɛaŋ lɛ nɔkwɛmɔ nɔ ni yeɔ emuu lɛ mli, ni amɛyɛ naanɔ wala yɛ jeŋ hee ni hiɛaŋkwɛmɔ ko kwraa bɛ mli lɛ he hiɛnɔkamɔ.—2 Petro 3:13.

[Shishigbɛ niŋmaa]

[Mfoniri ni yɔɔ baafa 26]

Bɔfo Petro kase akɛ Nyɔŋmɔ jeee mɛi ahiɛaŋkwɛlɔ