Ahala Wɔ Ato ni Wɔfee Yijielɔi ni Yɔɔ Miishɛɛ yɛ Jeŋ Fɛɛ
“Haleluya! Nyɛ Yehowa tsuji, nyɛjiea eyi, nyɛjiea Yehowa gbɛi lɛ yi!”—LALA 113:1.
1, 2. (a) Yɛ Lala 113:1-3 lɛ kɛ gbeekpamɔ naa lɛ, namɔ sa wɔ yijiemɔ ni miishɛɛ yɔɔ mli? (b) Mɛɛ sanebimɔ eja gbɛ akɛ abi?
YEHOWA NYƆŊMƆ ji ŋwɛi kɛ shikpɔŋ Bɔlɔ Kpeteŋkpele lɛ, wɔ Jeŋ Muu Fɛɛ Maŋtsɛ kɛmiiya naanɔi anaanɔ. Esa wɔ yijiemɔ ni miishɛɛ yɔɔ mli kɛmɔ shi. No hewɔ ni Lala 113:1-3 fãa wɔ akɛ: “Haleluya! Nyɛ Yehowa tsuji, nyɛjiea eyi, nyɛjiea Yehowa gbɛi lɛ yi! Yijiemɔ ahã Yehowa gbɛi lɛ kɛjɛ be nɛɛ mli aahu kɛyashi naanɔ! Esa akɛ ajie Yehowa gbɛi lɛ yi kɛjɛ hulu shiteehe kɛyashi eshinyɔɔhe!”
2 Ákɛ Nyɔŋmɔ Odasefoi lɛ, wɔnaa miishɛɛ akɛ wɔɔfee enɛ. Kwɛ miishɛɛ ni eji akɛ etsɛŋ ni Yehowa Nyɔŋmɔ baahã nɛkɛ yijiemɔ lala ni yɔɔ miishɛɛ ni wɔlaa ŋmɛnɛ nɛɛ akpele shikpɔŋ muu lɛ fɛɛ nɔ! (Lala 22:28) Ani aanu ogbee yɛ nɛkɛ jeŋ muu fɛɛ lalɔi akuu kpeteŋkpele nɛɛ ateŋ? Kɛ́ nakai lɛ, kwɛ miishɛɛ ni eeeha oná akɛ ahala bo kɛjɛ jeŋ ni mli egbala, ni miishɛɛ bɛ mli nɛɛ mli!
3. (a) Mɛni haa Yehowa webii feɔ mɛi ni esoro amɛ kwraa lɛ? (b) Ahala wɔ ato yɛ mɛɛ gbɛi anɔ?
3 Eka shi faŋŋ akɛ Yehowa yi ni wɔjieɔ yɛ ekomefeemɔ mli lɛ haa wɔfeɔ mɛi ni esoro wɔ kwraa. Wɔwieɔ ni wɔtsɔɔ nii yɛ gbeekpamɔ mli, ni wɔkɛ gbɛ̀i kome lɛ nɔŋŋ tsuɔ nii ni wɔkɛjajeɔ ‘Yehowa mlihilɛ kpeteŋkpele lɛ’ wɔtsɔɔ. (Lala 145:7) Hɛɛ, ákɛ Yehowa webii ni ejɔɔ amɛhe nɔ lɛ, ahala wɔ ato kɛha wɔ Nyɔŋmɔ, Yehowa sɔɔmɔ. Nyɔŋmɔ kɛɛ ewebii Israel ni hi shi yɛ blema, ni jɔɔ amɛhe nɔ amɛha lɛ lɛ akɛ, amɛtsi amɛhe kɛjɛ jeŋmaji ni ebɔle amɛ lɛ ahe koni nakai jeŋmaji lɛ anifeemɔi lɛ akawo amɛhe muji. (2 Mose 34:12-16) Eha ewebii lɛ mlai koni eye ebua amɛ ni amɛfee enɛ. Nakai nɔŋŋ hu ŋmɛnɛ, Yehowa kɛ e-Wiemɔ Krɔŋkrɔŋ, ni ji Biblia lɛ eha wɔ. Egbɛtsɔɔmɔ tsɔɔ wɔ bɔ ni wɔɔfee wɔtsi wɔhe kɛjɛ je nɛɛ he. (2 Korintobii 6:17; 2 Timoteo 3:16, 17) Ahalako wɔ atoko kɛtsɔ wɔhe ni wɔɔtsi kɛyahi hii kɛ yei mɔ kome-shihilɔi ashiai amli lɛ nɔ, taakɛ Babilon Kpeteŋkpele lɛ mli hii kɛ yei mɔ kome-shihilɔi lɛ ji lɛ. Wɔji Yehowa yijielɔi yɛ faŋŋ mli, yɛ Yesu Kristo nɔkwɛmɔ nɔ lɛ sɛɛnyiɛmɔ mli.
Kasemɔ Yehowa Yijielɔ Kpele Fe Fɛɛ Lɛ
4. Yesu fee nɔkwɛmɔ nɔ efɔ̃ shi yɛ Yehowa yijiemɔ mli yɛ mɛɛ gbɛ nɔ?
4 Yesu gbaaa afã kɛjɛɛɛ eyiŋtoo akɛ eeejie Yehowa yi lɛ he kɔkɔɔkɔ. Ni enɛ hã esoro lɛ kwraa yɛ je lɛ he. Ejie Nyɔŋmɔ gbɛi krɔŋkrɔŋ lɛ yi, yɛ kpeehei lɛ kɛ sɔlemɔtsu ni yɔɔ Yerusalem lɛ mli. He fɛɛ he ni gbɔmɛi bua amɛhe naa yɛ lɛ, gɔŋ nɔ jio, ŋshɔnaa jio, Yesu shiɛ Yehowa anɔkwalei lɛ etsɔɔ amɛ yɛ faŋŋ mli. Ejaje akɛ: “Miijie oyi, Ataa, ŋwɛi kɛ shikpɔŋ nuntsɔ.” (Mateo 11:25) Beni akojoɔ lɛ yɛ Pontio Pilato hiɛ po lɛ, Yesu ye odase akɛ: “Mi lɛ, enɛ hewɔ afɔ mi ni enɛ hewɔ nɔŋŋ miba je lɛ mli, koni mibaye anɔkwale lɛ he odase.” (Yohane 18:37) Yesu na bɔ ni enitsumɔ lɛ he hiaa waa hã. Yesu ye Yehowa he odase ni ejie eyi yɛ faŋŋ mli, yɛ he fɛɛ he ni eyɔɔ.
5. Lala 22:23 lɛ kɔɔ namɔ he, ni mɛni esa akɛ efee wɔsubaŋ?
5 Wɔnaa gbalɛ mli wiemɔ ni kɔɔ Yehowa Yijielɔ ni Fe Fɛɛ lɛ he nɛɛ, yɛ Lala 22:23 lɛ akɛ: “Majaje ogbɛi lɛ matsɔɔ minyɛmimɛi lɛ; asafo teŋ makafoo yɛ.” Ni yɛ Hebribii 2:11, 12 lɛ, bɔfo Paulo kɛ ŋmalɛi kukuji nɛɛ to Nuntsɔ Yesu kɛ mɛi ni Yehowa Nyɔŋmɔ efee amɛ krɔŋkrɔŋ kɛha ŋwɛi anunyam lɛ ahe. Taakɛ eji lɛ, efeee amɛ hiɛgbele akɛ amɛaajie Yehowa gbɛi lɛ yi yɛ asafo lɛ teŋ. Ani wɔhiɛɔ nɛkɛ jwɛŋmɔ nɛɛ kɛji wɔmiiya wɔ asafoŋ kpeei? Bɔ ni wɔkɛ wɔhe woɔ kpeei amli yɛ ekaa kɛ miishɛɛ mli, kɛtsɔ wɔjwɛŋmɔ kɛ wɔwiemɔ hu nɔ lɛ, jieɔ Yehowa yi. Shi ani miishɛɛ ni wɔkɛjieɔ eyi lɛ waa jɛmɛ kɛkɛ?
6. Mɛɛ nitsumɔ Yesu kɛwo ekaselɔi lɛ adɛŋ, ni mɛi ni sumɔɔ la lɛ jieɔ Nyɔŋmɔ yi yɛ mɛɛ gbɛ nɔ?
6 Taakɛ Mateo 5:14-16 tsɔɔ lɛ, Nuntsɔ Yesu kɛ nitsumɔ wo esɛɛnyiɛlɔi lɛ adɛŋ hu akɛ amɛha amɛla atso koni mɛi krokomɛi hu ajie Yehowa yi. Ekɛɛ: “Nyɛ ji je lɛŋ la lɛ. . . . Nyɛhaa nyɛla atsoa yɛ gbɔmɛi ahiɛ, koni amɛna nyɛ nifeemɔ nii kpakpai lɛ, ni amɛwo nyɛtsɛ ni yɔɔ ŋwɛi lɛ hiɛ nyam.” Mɛi ni sumɔɔ la lɛ woɔ Nyɔŋmɔ hiɛ nyam. Ani amɛfeɔ enɛ kɛtsɔɔ nibii kpakpai, kɛ nibii ni amɛwieɔ kɛ nibii ni amɛfeɔ kɛjieɔ adesa mlihilɛ kpo lɛ nɔ? Dabi, shi moŋ amɛfeɔ nakai kɛtsɔɔ ekome ni amɛfeɔ kɛwoɔ Yehowa hiɛ nyam lɛ nɔ. Hɛɛ, mɛi ni sumɔɔ la lɛ jɔɔ amɛhe nɔ amɛhaa Nyɔŋmɔ ni amɛtsɔmɔɔ eyijielɔi ni yɔɔ miishɛɛ. Ani okɔ gbɛ ni miishɛɛ yɔɔ mli nɛɛ?
Miishɛɛ ni Jɛɔ Yehowa Yijiemɔ Mli Baa
7. Mɛni hewɔ Yehowa yijielɔi yɔɔ miishɛɛ waa nakai lɛ, ni mɛɛ miishɛɛ amɛná yɛ Pentekoste gbi lɛ nɔ yɛ afi 33 Ŋ.B.?
7 Mɛni hewɔ Yehowa yijielɔi yɔɔ miishɛɛ waa nakai lɛ? Ejaakɛ miishɛɛ ji Nyɔŋmɔ mumɔ krɔŋkrɔŋ lɛ yibii. Yɛ Galatabii 5:22 lɛ, enyiɛɔ suɔmɔ sɛɛ nɔŋŋ. Yesu kaselɔi ni hi shi yɛ klɛŋklɛŋ afii oha lɛ mli lɛ jie Yehowa mumɔ lɛ yibii nɛɛ kpo. Ejaakɛ, yɛ Pentekoste gbi lɛ nɔ, yɛ afi 33 Ŋ.B., beni Nyɔŋmɔ fɔse emumɔ krɔŋkrɔŋ lɛ eshwie Yesu kaselɔi aaafee mɛi 120 lɛ anɔ lɛ, amɛ fɛɛ amɛbɔi Yehowa yijiemɔ yɛ lilɛii sɔrɔtoi amli. Yudafoi ni sumɔɔ Nyɔŋmɔ jamɔ, ni amɛjɛ jeŋmaji pii amli kɛba Yerusalem lɛ, ‘ahe jɔ̃ amɛhe ni amɛnaa kpɛ amɛhe.’ Amɛkɛ gbee ni wa wie akɛ: “Wɔmiinu akɛ amɛmiijaje Nyɔŋmɔ nii wuji lɛ yɛ wɔmaji anɔ wiemɔi lɛ amli”! (Bɔfoi lɛ Asaji 2:1-11) Mɛni jɛ Yehowa yi ni ajie yɛ wiemɔi sɔrɔtoi amli, yɛ naakpɛɛ gbɛ nɔ nɛɛ mli ba? Yudafoi kɛ mɛi ni etsake kɛba Yuda jamɔ mli lɛ aaafee 3,000 kpɛlɛ Maŋtsɛyeli lɛ he sanekpakpa ni kɔɔ Mesia lɛ he lɛ nɔ. Abaptisi amɛ, ni amɛná mumɔ krɔŋkrɔŋ lɛ, ni amɛkɛ amɛgbeei fata he kɛ hiɛdɔɔ akɛ Yehowa yijielɔi ni yɔɔ miishɛɛ. (Bɔfoi lɛ Asaji 2:37-42) Kwɛ jɔɔmɔ ni eji!
8. Yɛ Pentekoste sɛɛ lɛ, mɛni Kristofoi lɛ fee ni amɛkɛhã amɛ miishɛɛ lɛ tee hiɛ?
8 Amaniɛbɔɔ lɛ yaa nɔ akɛ: “Daa gbi lɛ amɛkɛ jwɛŋmɔ kome yaa sɔlemɔwe lɛ, ni amɛkumɔkumɔɔ aboloo yɛ shiai, ni amɛkɛ miishɛɛ kɛ tsui krɔŋŋ yeɔ nii, ni amɛjieɔ Nyɔŋmɔ yi, ni amɛhiɛ ba nyam yɛ maŋ muu lɛ fɛɛ hiɛ. Ni Nuntsɔ [Yehowa, NW] ŋɔɔ mɛi ni ahere amɛyiwala lɛ efataa asafo lɛ he gbi fɛɛ gbi.” (Bɔfoi lɛ Asaji 2:46, 47) Ani kpee ni amɛkpeɔ kutuu kɛ niyenii ni amɛyeɔ lɛ pɛ ji nɔ ni hã amɛná miishɛɛ kpele lɛ? Dabi, amɛ miishɛɛ titri lɛ jɛ Yehowa Nyɔŋmɔ yi ni amɛjieɔ gbi fɛɛ gbi lɛ mli. Ni amɛ miishɛɛ lɛ tee hiɛ waa beni amɛna mɛi akpei abɔ ni here amɛ yiwalaheremɔ shɛɛ sane lɛ nɔ lɛ. Nakai nɔŋŋ eji yɛ wɔ hu wɔgbɛfaŋ ŋmɛnɛ.
Yijielɔi ni Yɔɔ Miishɛɛ yɛ Jeŋmaji Fɛɛ Mli
9. (a) Mɛɛ be Nyɔŋmɔ je shishi ehã gbɔmɛi ni jɛ jeŋmaji fɛɛ mli lɛ hegbɛ akɛ amɛnu sanekpakpa lɛ, ni yɛ mɛɛ gbɛ nɔ? (b) Mɛni hewɔ afɔse mumɔ krɔŋkrɔŋ ashwie Kornelio kɛ ehefatalɔi lɛ anɔ dani abaptisi amɛ lɛ?
9 Yehowa sumɔɔɔ ni atsĩ ewebii ala-hiɛmɔ nitsumɔ lɛ naa awo maŋ kome pɛ mli. No hewɔ lɛ, kɛjɛ afi 36 Ŋ.B. kɛbaa lɛ, eha gbɔmɛi ni jɛ jeŋmaji fɛɛ mli lɛ hegbɛ akɛ amɛnu esanekpakpa lɛ. Yɛ Nyɔŋmɔ gbɛtsɔɔmɔ naa lɛ, Petro tee Jeŋmajiaŋnyo asraafonyo nukpa ko shia yɛ Kaisarea. Eyanina Kornelio yɛ jɛmɛ ni ekɛ enanemɛi ni bɛŋkɛ lɛ kpaakpa fe fɛɛ lɛ kɛ ewekumɛi ebua amɛhe naa. Beni amɛboɔ Petro wiemɔi lɛ atoi jogbaŋŋ lɛ, amɛná Yesu mli hemɔkɛyeli yɛ amɛtsuii amli. Te wɔfeɔ tɛŋŋ wɔleɔ? Ejaakɛ Nyɔŋmɔ mumɔ krɔŋkrɔŋ lɛ ba nakai Jeŋmajiaŋbii heyelilɔi lɛ anɔ. Bɔ ni efɔɔ kaa ji akɛ, akɛ Nyɔŋmɔ mumɔ lɛ nikeenii lɛ hãa yɛ baptisimɔ sɛɛ pɛ, shi yɛ nakai be lɛ mli lɛ, Yehowa tsɔɔ enɔkpɛlɛmɔ ni yɔɔ gbɔmɛi ni amɛjeee Yudafoi nɛɛ anɔ dani amii amɛ nu. Eji Yehowa efeee nakai kulɛ, Petro nyɛŋ aná nɔmimaa akɛ agbɛnɛ Nyɔŋmɔ miikpɛlɛ Jeŋmajiaŋbii lɛ anɔ akɛ E-tsuji, ni ákɛ amɛsa kɛha nu mli baptisimɔ.—Bɔfoi lɛ Asaji 10:34, 35, 47, 48.
10. Ajɛ blema tɔ̃ɔ agba afɔ̃ shi akɛ gbɔmɛi ni jɛ jeŋmaji fɛɛ mli baajie Yehowa yi, yɛ mɛɛ gbɛ nɔ?
10 Yehowa jɛ blema tɔ̃ɔ egba efɔ̃ shi akɛ gbɔmɛi ni jɛ jeŋmaji fɛɛ mli baajie eyi. Ebaaná yijielɔi ni yɔɔ miishɛɛ yɛ shikpɔŋ fɛɛ shikpɔŋ nɔ. Bɔfo Paulo tsɛ́ gbalɛi ayisɛɛ kɛjɛ Hebri Ŋmalɛi lɛ amli kɛha enɛ nɔmimaa. Ekɛɛ Kristofoi asafo ni yɔɔ Roma, ni emli bii lɛ jɛ maji sɔrɔtoi amli lɛ akɛ: “Nyɛhereherea nyɛhe, taakɛ bɔ ni Kristo ehere nyɛ kɛba Nyɔŋmɔ anunyam lɛ mli lɛ. Shi miikɛɛ akɛ Yesu Kristo tsɔ sɔɔlɔ eha ketiafoo lɛ yɛ Nyɔŋmɔ anɔkwale lɛ hewɔ, koni akɛma shiwooi ni awo tsɛmɛi lɛ anɔ mi; shi jeŋmaji lɛ aaawo Nyɔŋmɔ hiɛ nyam yɛ mɔbɔnalɛ hewɔ, taakɛ bɔ ni aŋma [yɛ Lala 18:50] lɛ akɛ: ‘Enɛ hewɔ lɛ majie oyi yɛ jeŋmaji ateŋ, ni matsĩ ogbɛi atã mala.’ Ni esaa ekɛɛ [yɛ 5 Mose 32:43 lɛ akɛ]: ‘Nyɛ jeŋmaji, nyɛkɛ emaŋ lɛ mli afilia nyɛ!’ Ni asaŋ [yɛ Lala 117:1 hu akɛ]: ‘Nyɛjiea Nuntsɔ [Yehowa, NW] yi, nyɛ jeŋmaji fɛɛ, ni nyɛkafoa lɛ, nyɛ maji fɛɛ.’ ”—Romabii 15:7-11; wɔma efã ko nɔ mi.
11. Nyɔŋmɔ eye ebua gbɔmɛi ni jɛ jeŋmaji fɛɛ mli ni amɛbale enɔkwalei lɛ yɛ mɛɛ gbɛ nɔ, ni mɛni ejɛ mli kɛba?
11 Gbɔmɛi nyɛŋ amɛfee ekome ni amɛkɛjie Yehowa yi, ja amɛkɛ amɛhiɛ efɔ̃ Yesu Kristo, mɔ ni Nyɔŋmɔ ehala lɛ akɛ eye gbɔmɛi ni jɛ jeŋmaji fɛɛ amli lɛ anɔ maŋtsɛ lɛ nɔ. Nyɔŋmɔ eto majimaji ateŋ nitsɔɔmɔ gbɛjianɔtoo ko shishi, koni eye ebua amɛ ni amɛnu E-nɔkwalei ni kɛ mɔ yaa naanɔ wala mli lɛ ashishi. Ekɛ gbɛtsɔɔmɔ miiha kɛmiitsɔ etsulɔ anɔkwafo kuu lɛ nɔ. (Mateo 24:45-47) Mɛni ejɛ mli kɛba? Yijielɔi ni yɔɔ miishɛɛ, ni amɛyi fa fe akpekpei enumɔ agbee miilá kɛmiijie Yehowa yi yɛ shikpɔji ni fa fe 230 nɔ. Ni akpekpei abɔ krokomɛi hu yɛ he miishɛɛ akɛ amɛ hu amɛaafee nakai. Kwɛmɔ mɛi abɔ ni ba Kaimɔ lɛ yɛ 1996 mli: 12,921,933. Eyɛ naakpɛɛ waa!
Agba yɛ Yijielɔi ni Yɔɔ Miishɛɛ Asafo Babaoo ko He Afɔ̃ Shi
12. Mɛɛ ninaa ko ni kanyaa mɔ bɔfo Yohane na, ni mɛni yɔɔ diɛŋtsɛ ni tsɔɔ nɔ ni Yohane na nɛɛ?
12 Bɔfo Yohane na “asafo babaoo” ko ni jɛ jeŋmaji fɛɛ mli yɛ ninaa mli. (Kpojiemɔ 7:9) Mɛni ji yijiemɔ lalai ni asafo babaoo nɛɛ fataa Nyɔŋmɔ shwɛɛnii ni afɔ amɛ mu lɛ ahe kɛlaa lɛ saneyitso? Yohane kɛɔ wɔ akɛ: “Yiwalaheremɔ lɛ ji wɔ-Nyɔŋmɔ ni ta maŋtsɛsɛi lɛ nɔ lɛ, kɛ toobi lɛ nɔ̃!” (Kpojiemɔ 7:10) Akɛ ekãa miijaje enɛ yɛ je lɛŋ he fɛɛ he. Yɛ be mli ni wɔfɔ̃ɔ tɛŋ blɛoi, kɛ́ wɔɔkɛɛ lɛ, wɔfeɔ ekome kɛjieɔ Nyɔŋmɔ yi akɛ Jeŋ Muu Fɛɛ Maŋtsɛ, ni wɔkɛ miishɛɛ jajeɔ yɛ ŋwɛi kɛ shikpɔŋ fɛɛ hiɛ akɛ wɔyiwalaheremɔ ‘jɛ’ lɛ kɛ e-Bi, Toobi lɛ, Yesu Kristo. Oo, kwɛ bɔ ni bɔfo Yohane mli fili lɛ hã beni ena asafo babaoo lɛ he ninaa ni kanyaa mɔ nɛɛ! Ni kwɛ wɔmli ni filiɔ wɔ ŋmɛnɛ akɛ wɔmiina, ni wɔji nɔ ni Yohane na diɛŋtsɛ lɛ fã ŋmɛnɛ!
13. Mɛni haa esoroɔ Yehowa webii yɛ je lɛ he lɛ?
13 Ákɛ Yehowa tsuji lɛ, wɔkɛ egbɛi efɔ̃ wɔnɔ kɛ miishɛɛ. (Yesaia 43:10, 12) Yehowa Odasefoi ni wɔji lɛ hãa esoroɔ wɔ kwraa yɛ je nɛɛ he. Kwɛ miishɛɛ ni eji akɛ Nyɔŋmɔ gbɛi ni hãa esoroɔ lɛ kwraa lɛ aaakã wɔnɔ, ni wɔkɛ enitsumɔ ni jɛ ŋwɛi lɛ tsumɔ afee wɔyiŋtoo yɛ shihilɛ mli! Yehowa yiŋtoo ni yɔɔ nyam, ákɛ ebaatse egbɛi krɔŋkrɔŋ lɛ he, ni ebu jeŋ muu fɛɛ maŋtsɛ ni eji lɛ hu bem kɛtsɔ Maŋtsɛyeli lɛ nɔ lɛ eha shishinumɔ eba wɔshihilɛi amli. Ni eye ebua wɔ ni wɔna gbɛhe yɛ eŋwɛi yiŋtoo ni kɔɔ egbɛi lɛ kɛ Maŋtsɛyeli lɛ he lɛ mli. Efee enɛ yɛ gbɛi etɛ nɔ.
Akɛ Anɔkwale lɛ Ewo Wɔdɛŋ
14, 15. (a) Mɛni ji gbɛ kome ni Nyɔŋmɔ etsɔ nɔ eye ebua wɔ ni wɔná gbɛhe yɛ eŋwɛi yiŋtoo ni kɔɔ egbɛi lɛ kɛ Maŋtsɛyeli lɛ he lɛ mli? (b) Esoro Maŋtsɛyeli ni ato amã shi yɛ 1914 Ŋ.B. lɛ yɛ nɔ ni abutu lɛ yɛ afi 607 D.Ŋ.B. lɛ he yɛ mɛɛ gbɛ nɔ?
14 Klɛŋklɛŋ lɛ, Yehowa kɛ anɔkwale lɛ ewo etsuji adɛŋ. Sane ni yɔɔ miishɛɛ fe fɛɛ ni ajie lɛ kpo ji akɛ e-Maŋtsɛyeli lɛ bɔi nɔyeli yɛ 1914. (Kpojiemɔ 12:10) Esoro nɛkɛ ŋwɛi nɔyeli nɛɛ yɛ maŋtsɛyeli ni tamɔ no, ni hi Yerusalem, hé ni akɛ maŋtsɛmɛi ni jɛ David weku lɛ mli lɛ tá maŋtsɛsɛi nɔ yɛ lɛ he. Abutu nakai maŋtsɛyeli lɛ kwraa, ni kɛjɛ afi 607 D.Ŋ.B. kɛyaa lɛ, ahã Yerusalem yaje Jeŋmajiaŋbii ajeŋ hewalɛi anɔyeli shishi kwraa. Maŋtsɛyeli hee ni Yehowa to emã shi yɛ 1914 lɛ ji ŋwɛi hewalɛ ni boteŋ mɔ ko mɔ ko nɔyeli shishi, fe Yehowa pɛ, ni akpataŋ ehiɛ hu. (Daniel 2:44) Kɛfata he lɛ, esoro enɔyeli kwraa. Yɛ mɛɛ gbɛ nɔ? Kpojiemɔ 11:15 lɛ haa hetoo akɛ: “Anu gbeei wuji yɛ ŋwɛi miikɛɛ akɛ: ‘Je nɛŋ maŋtsɛyeli lɛ etsɔ wɔ-Nuntsɔ lɛ kɛ e-Kristo (mɔ ni efɔ lɛ mu) lɛ nɔ, ni eeeye maŋtsɛ kɛaatee naanɔi anaanɔ.’ ”—Wɔma efã ko nɔ mi.
15 ‘Wɔ Nuntsɔ lɛ kɛ e-Kristo lɛ maŋtsɛyeli lɛ’ tsuɔ nɔyeli hewalɛ he nii yɛ adesai aje lɛ fɛɛ nɔ. Nɛkɛ Yehowa maŋtsɛyeli ni ajie lɛ kpo yɛ gbɛ ni yɔɔ ehee nɔ, ní e-Bi ni ji Mesia lɛ kɛ Yesu nyɛmimɛi 144,000, ni amrɔ nɛɛ atée amɛteŋ mɛi babaoo shi kɛtee ŋwɛi anunyam mli lɛ fata he nɛɛ, jeee woloŋlee he sane ni yɔɔ miishɛɛ kɛkɛ—nɔ ko ni aaka hiɛ aawie he, ni ekolɛ skul nikaselɔi baasumɔ ni amɛgba he sane. Dabi, nɛkɛ ŋwɛi Maŋtsɛyeli nɛɛ ji nɔyeli diɛŋtsɛ. Ni wɔ gbɛkpamɔ ni yɔɔ miishɛɛ akɛ wɔɔhi shi kɛya naanɔ yɛ emuuyeli mli, ni enɔyeli lɛ baahã wɔná lɛ haa wɔ yiŋtoo babaoo ni wɔɔdamɔ nɔ wɔya nɔ wɔna miishɛɛ. Yehowa Wiemɔ lɛ mli anɔkwalei nɛɛ ni akɛwo wɔdɛŋ lɛ tsirɛɔ wɔ be fɛɛ be ní wɔwie he ekpakpa. (Lala 56:11) Ani ofeɔ enɛ daa kɛtsɔɔ mɔ fɛɛ mɔ ni okɛɔ lɛ akɛ Nyɔŋmɔ Mesia Maŋtsɛyeli lɛ miiye nɔ amrɔ nɛɛ yɛ ŋwɛi lɛ nɔ?
Mumɔ Krɔŋkrɔŋ lɛ kɛ Jeŋ Muu Fɛɛ Nyɛmifeemɔ lɛ Yeɔ Ebuaa Wɔ
16, 17. Mɛni ji gbɛi ni ji enyɔ kɛ etɛ ni Nyɔŋmɔ etsɔ nɔ eye ebua wɔ ni wɔná gbɛhe yɛ eŋwɛi yiŋtoo lɛ mli?
16 Gbɛ ni ji enyɔ ni Nyɔŋmɔ etsɔ nɔ eye ebua wɔ ni wɔná gbɛhe yɛ eŋwɛi yiŋtoo mli ji kɛtsɔ emumɔ krɔŋkrɔŋ ni ekɛhãa wɔ, ní yeɔ ebuaa wɔ ni wɔwoɔ eyibii kpakpai lɛ yɛ wɔshihilɛi amli ni wɔnaa enɔkpɛlɛmɔ lɛ nɔ. (Galatabii 5:22, 23) Kɛfata he lɛ, Paulo ŋma wolo eyahã Kristofoi ni afɔ amɛ mu lɛ akɛ: “Wɔná . . . Mumɔ ni jɛ Nyɔŋmɔ mli lɛ, koni wɔle nii ni Nyɔŋmɔ eŋɔduro wɔ lɛ.” (1 Korintobii 2:12) Yɛ Yehowa mumɔ lɛ ni wɔhereɔ nɔ lɛ hewɔ lɛ, amrɔ nɛɛ wɔteŋ mɔ fɛɛ mɔ baanyɛ ale ni wɔnu nibii kpakpai ni ejɛ mlihilɛ mli ekɛha wɔ lɛ ashishi—eshiwooi, mlai, shishitoo mlai, kɛ nibii ni tamɔ nakai.—Okɛto Mateo 13:11 he.
17 Yɛ gbɛ ni ji etɛ ni Nyɔŋmɔ tsɔɔ nɔ eyeɔ ebuaa wɔ lɛ gbɛfaŋ lɛ, wɔyɛ wɔ jeŋ muu fɛɛ nyɛmifeemɔ lɛ kɛ Yehowa asafo gbɛjianɔtoo kɛha jamɔ ni wɔnaa he miishɛɛ waa lɛ. Bɔfo Petro wie he beni ewo wɔ ŋaa akɛ ‘wɔná suɔmɔ wɔha nyɛmimɛi asafo muu lɛ fɛɛ lɛ.’ (1 Petro 2:17) Wɔ majimaji ateŋ nyɛmimɛi hii kɛ yei aweku ni yɔɔ suɔmɔ lɛ yeɔ ebuaa wɔ koni wɔsɔmɔ Yehowa kɛ tsui mli miishɛɛ kpele, taakɛ Lala 100:2 fãa wɔ lɛ, akɛ: “Nyɛsɔmɔa Yehowa kɛ miishɛɛ, nyɛbaa ehiɛ kɛ nyamɔ lala!” Kuku 4 lɛ kɛɔ kɛfataa he akɛ: “Nyɛbotea egbói lɛ amli kɛ shidaa, nyɛbaa ekpoi lɛ anɔ kɛ yijiemɔ; nyɛdaa lɛ shi, nyɛjiea egbɛi lɛ yi!” No hewɔ lɛ, kɛji wɔmiishiɛ yɛ faŋŋ mli jio, wɔmiiya wɔ kpeei jio, wɔbaanyɛ wɔna miishɛɛ. Kwɛ toiŋjɔlɛ kɛ shweshweeshwe shihilɛ ni wɔná yɛ Yehowa mumɔŋ sɔlemɔtsu lɛ kpoi ni yɔɔ fɛo lɛ anɔ!
Okɛ Miishɛɛ Ajie Yehowa Yi!
18. Mɛni hewɔ wɔbaanyɛ wɔná miishɛɛ yɛ Yehowa yijiemɔ mli, yɛ yiwaa loo naagbai krokomɛi ni baa wɔnɔ lɛ fɛɛ sɛɛ lɛ?
18 Yɛ jaramɔ shihilɛi, yiwaa, loo naagbai krokomɛi ni baaba wɔnɔ lɛ fɛɛ sɛɛ lɛ, nyɛhaa wɔnaa miishɛɛ akɛ wɔyɛ Yehowa shia kɛha jamɔ lɛ mli. (Yesaia 2:2, 3) Kaimɔ akɛ nakai miishɛɛ lɛ ji tsui lɛ mli su ko. Wɔ nyɛmimɛi hii kɛ yei Kristofoi ni hi shi yɛ blema lɛ ji Yehowa yijielɔi ni yɔɔ miishɛɛ, yɛ jaramɔ shihilɛi babaoo ni amɛkɛkpe, kɛ nibii ni amɛlaaje lɛ fɛɛ sɛɛ. (Hebribii 10:34) Wɔ nanemɛi heyelilɔi ni yɔɔ ŋmɛnɛ lɛ tamɔ amɛ pɛpɛɛpɛ.—Mateo 5:10-12.
19. (a) Mɛɛ famɔi ni akɛha shii abɔ kanyaa wɔ ni wɔjie Yehowa yi? (b) Wɔ naanɔ wala namɔ damɔ mɛni nɔ, ni mɛni ji wɔfaishitswaa?
19 Wɔ fɛɛ ni wɔsɔmɔɔ Yehowa lɛ náa he miishɛɛ akɛ wɔɔbo famɔi ni Biblia lɛ kɛhaa akɛ wɔjie eyi lɛ toi. Kpojiemɔ wolo lɛ kɛ wiemɔ ni ji “Haleluya!” lɛ folɔɔ Nyɔŋmɔ yijiemɔ wiemɔi amli shii abɔ. (Kpojiemɔ 19:1-6) Akɛɔ wɔ shii 13 sɔŋŋ, yɛ Lala 150 lɛ kukuji ekpaa lɛ amli akɛ wɔjie Yehowa yi. Enɛ ji jeŋ muu fɛɛ ninefɔ̃ɔ ni akpãa mli ahaa bɔɔ nii fɛɛ, koni amɛbafata he ni wɔkɛ miishɛɛ ala kɛjie Yehowa yi. Wɔ naanɔ wala namɔ damɔ nɛkɛ Haleluya lala nɔheremɔ kpele nɛɛ ni wɔɔfata he lɛ nɔ! Hɛɛ, mɛi ni kɛ yijiemɔ ni sɛɛ efooo haa Yehowa lɛ pɛ ji mɛi ni baahi shi kɛya naanɔ. No hewɔ lɛ, wɔtswa wɔfai shi akɛ wɔbaakpɛtɛ ejeŋ muu fɛɛ anɔkwale asafo lɛ he gbagbalii beni naagbee lɛ bɛŋkɛɔ lɛ. Ni no lɛ, wɔhiɛ baanyɛ akã nɔ akɛ wɔɔna akɛ Lala 150 lɛ naagbee wiemɔi lɛ eba mli kɛmɔ shi, akɛ: “Nɔ fɛɛ nɔ ni muɔ lɛ ajie Yehowa yi! Haleluya!”
Te Obaaha Hetoo Tɛŋŋ?
◻ Mɛni haa Yehowa webii feɔ gbɔmɛi ni esoro amɛ kwraa lɛ?
◻ Mɛni hewɔ Yehowa tsuji yɔɔ miishɛɛ waa nakai lɛ?
◻ Mɛni haa esoroɔ wɔ kwraa yɛ je lɛ he?
◻ Mɛɛ gbɛi etɛ nɔ Nyɔŋmɔ etsɔ eye ebua wɔ ni wɔná gbɛhe yɛ eŋwɛi yiŋtoo mli?
[Mfoniri ni yɔɔ baafa 17]
Yesu ye Yehowa he odase ni ejie eyi yɛ faŋŋ mli, yɛ he fɛɛ he ni eyɔɔ