Ani Obaafee Anɔkwafo Tamɔ Elia?
“Naa, matsu gbalɔ Elia kɛaaba nyɛŋɔɔ, dani Yehowa gbi wulu kpele ni he yɔɔ gbeyei lɛ aaashɛ.”—MALEAKI 3:23.
1. Mɛɛ amanehulu ba beni Israel ehi Shiwoo Shikpɔŋ lɛ nɔ afii 500 lɛ?
“SHIKPƆŊ ni fufɔ kɛ wo hoɔ yɛ nɔ.” (2 Mose 3:7, 8) No ji nɔ ni Yehowa Nyɔŋmɔ kɛha Israelbii lɛ beni eha amɛye amɛhe kɛjɛ Mizraim nyɔŋyeli shishi yɛ afii ohai 16 D.Ŋ.B. lɛ. Shi kwɛmɔ! Afii ohai enumɔ eho, ni amrɔ nɛɛ Israel akutsei nyɔŋma lɛ ebote hɔmɔ be ni naa wa waa mli. Ewa akɛ aaana jwɛifɔ ko. Kooloi miigboi, ni afii etɛ-kɛ-fã nɛ ni nugbɔ enɛko. (1 Maŋtsɛmɛi 18:5; Luka 4:25) Mɛni kɛ nɛkɛ amanehulu nɛɛ ba?
2. Mɛni kɛ Israel maŋ amanehulu lɛ ba?
2 Hemɔkɛyeli kwamɔ kɛ amanehulu nɛɛ ba. Nɔ ni teɔ shi woɔ Nyɔŋmɔ Mla lɛ, Maŋtsɛ Ahab eku Nyɔŋmɔ mla mli ni ekɛ maŋtsɛ biyoo Izebel, Kanaanyo lɛ ebote gbalashihilɛ mli, ni eŋmɛ lɛ gbɛ koni ekɛ Baal jamɔ aba Israel. Nɔ ni ehiii kwraa lɛ, ema sɔlemɔtsu eha apasa nyɔŋmɔ nɛɛ yɛ Samaria, ni ji maŋtiase lɛ mli. Ejaakɛ alaka Israelbii lɛ koni amɛhe amɛye akɛ Baal jamɔ baaha amɛná ŋmɔshi nibii babaoo! Shi, taakɛ Yehowa ebɔ kɔkɔ lɛ, oshara eba akɛ ‘amɛhiɛ baakpata kɛjɛ amɛ shikpɔŋ kpakpa lɛ nɔ.’—5 Mose 7:3, 4; 11:16, 17; 1 Maŋtsɛmɛi 16:30-33.
Nyɔŋmɔyeli he Kaa ni Yɔɔ Naakpɛɛ
3. Yɛ mɛɛ gbɛ nɔ gbalɔ Elia gbala jwɛŋmɔ kɛtee Israel naagba lɛ diɛŋtsɛ nɔ?
3 Beni hɔmɔ lɛ je shishi lɛ, Nyɔŋmɔ gbalɔ anɔkwafo Elia kɛɛ Maŋtsɛ Ahab akɛ: “Gbii abɔ ni Yehowa, Israel Nyɔŋmɔ lɛ, mɔ hiɛ ni midamɔɔ lɛ hiɛ kã nɛɛ, kɛji bɔ́ loo nugbɔ aaanɛ yɛ afii nɛɛ amli fii, ja mi miwie!” (1 Maŋtsɛmɛi 17:1) Beni anɔkwale ni yɔɔ gbeyei ni kɔɔ sanejajemɔ nɛɛ he lɛ ba mli lɛ, maŋtsɛ lɛ shwa Elia akɛ lɛ ekɛ haomɔ lɛ ba Israel nɔ. Shi Elia ha hetoo akɛ shwamɔ lɛ kã Ahab kɛ ewe lɛ nɔ, yɛ amɛhemɔkɛyeli kwamɔ ákɛ Baal jálɔi lɛ hewɔ. Bɔni afee ni ana sane lɛ naa lɛ, Yehowa gbalɔ lɛ wo Maŋtsɛ Ahab hewalɛ akɛ ebua Israel fɛɛ naa kɛya Karmel Gɔŋ lɛ nɔ, kɛ Baal gbalɔi 450 lɛ kɛ Asera gbalɔi 400 lɛ. Ahab kɛ ewebii lɛ bua amɛhe naa yɛ jɛmɛ, ekolɛ kɛ hiɛnɔkamɔ akɛ be nɛɛ kɛ nuhɔmɔ lɛ baaba naagbee. Shi Elia gbala jwɛŋmɔ kɛtee sane ni hiɛdɔɔ yɔɔ mli babaoo lɛ nɔ. Ebi akɛ: “Mɛɛ beyinɔ nɔŋŋ nyɛdidãa yɛ saji enyɔ teŋ kɛyashi? Kɛji Yehowa ji Nyɔŋmɔ lɛ, nyɛnyiɛa esɛɛ; shi kɛji Baal ni lɛ, no lɛ nyɛnyiɛa esɛɛ!” Israelbii lɛ leee nɔ ni amɛaakɛɛ.—1 Maŋtsɛmɛi 18:18-21.
4. Bɔni afee ni ana Nyɔŋmɔyeli he sane lɛ naa lɛ, mɛni Elia susu akɛ afee?
4 Israelbii lɛ kɛ afii pii ebɔ mɔdɛŋ akɛ amɛkɛ Yehowa jamɔ aaafutu Baal jamɔ. Bɔni afee ni ana Nyɔŋmɔyeli he sane lɛ naa lɛ, Elia kɛ akaŋshii he sane ko fɔ shi agbɛnɛ. Ebaasaa tsina nuu kome kɛha afɔleshãa, ni Baal gbalɔi lɛ baasaa ekroko. Kɛkɛ ni Elia kɛɛ: “Ni nyɛtsɛa nyɛ-nyɔŋmɔ lɛ gbɛi, ni mi hu matsɛ Yehowa gbɛi: ni aaaba mli akɛ Nyɔŋmɔ, mɔ ni kɛ la aaahere nɔ lɛ, lɛ ji Nyɔŋmɔ!” (1 Maŋtsɛmɛi 18:23, 24) Susumɔ la ni jɛ ŋwɛi akɛ nɔ ni akɛmiiha sɔlemɔ hetoo lɛ he okwɛ!
5. Akpa sɛɛnamɔ ni bɛ Baal jamɔ he lɛ he mama yɛ mɛɛ gbɛ nɔ?
5 Elia fɔ̃ nine etsɛ Baal gbalɔi lɛ ni amɛje shishi. Amɛsaa tsina nuu kɛha afɔleshãa ni amɛkɛ lɛ fɔ̃ afɔleshãa latɛ lɛ nɔ. Kɛkɛ ni amɛtumɔ kɛbɔle afɔleshãa latɛ lɛ he kɛ sɔlemɔ akɛ: “Baal, heremɔ wɔ nɔ!” Enɛ tee nɔ “kɛjɛ leebileebi aahu kɛyashi shwane.” Elia ye amɛhe fɛo akɛ: “Nyɛbolɔa waa.” Ekolɛ benɛ Baal bɛ dekã yɛ sane ko ni he hiaa hewɔ, aloo “ekolɛ benɛ eewɔ, koni ehiɛ atsɛ̃!” Etsɛɛɛ ni Baal gbalɔi lɛ bɔi amɛnifeemɔ tamɔ sɛkɛyelɔi. Kwɛmɔ! Amɛkɛ kakalai miifolɔfolɔɔ amɛhe, ni lá miiho kɛmiijɛ amɛpilamɔi lɛ amli. Ni kwɛ hoofeemɔ ni yɔɔ jɛmɛ beni gbɔmɛi 450 lɛ fɛɛ wo amɛgbeei anɔ amɛbolɔ waa lɛ! Shi hetoo ko baaa.—1 Maŋtsɛmɛi 18:26-29.
6. Mɛɛ hesaamɔ Elia fee koni akɛka mɔ ni ji Nyɔŋmɔ lɛ akwɛ?
6 Kɛkɛ ni ebashɛ Elia nɔ. Esaa ema Yehowa afɔleshãa latɛ lɛ, ni etsa bu kɛbɔle he, kɛkɛ ni eto afɔleshãa nibii lɛ ahe gbɛjianɔ. Kɛkɛ ni eha ayɛ nu ashwie lai lɛ kɛ afɔleshãa nii lɛ nɔ. Afɔse nu gbɛ́i obɔ̃bɔ̃i 12 ashwie afɔleshãa latɛ lɛ nɔ kɛyashi be mli ni bu ni atsa lɛ diɛŋtsɛ yi obɔ̃. Susumɔ tsuiyeli ni baaba beni Elia sɔleɔ lɛ he okwɛ: “Yehowa, Abraham kɛ Isak kɛ Israel Nyɔŋmɔ! ŋmɛnɛ ha ni ana ale akɛ bo ji Nyɔŋmɔ ni yɔɔ Israel, ni akɛ mi ji otsulɔ, ni owiemɔ lɛ naa mifeɔ nii nɛɛ fɛɛ yɛ! Heremɔ mi nɔ, Yehowa, heremɔ mi nɔ, koni nɛkɛ maŋ nɛɛ ana ale akɛ bo Yehowa ji Nyɔŋmɔ, ni akɛ bo nɔŋŋ oha amɛtsui ekpale kɛba ekoŋŋ!”—1 Maŋtsɛmɛi 18:30-37.
7, 8. (a) Te Yehowa ha Elia sɔlemɔ lɛ hetoo eha tɛŋŋ? (b) Mɛni akɛ nii ni tee nɔ yɛ Karmel Gɔŋ lɛ nɔ lɛ tsu?
7 Yɛ Elia sɔlemɔ lɛ hetoohamɔ mli lɛ, ‘Yehowa la lɛ jɛ ŋwɛi bayi shi, ni eshã shãa afɔle lɛ kɛ lai lɛ kɛ tɛi lɛ kɛ sũ lɛ ni elɛmɔ nu ni yɔɔ bu lɛ mli lɛ.’ Gbɔmɛi lɛ kɛ amɛhiɛ bumɔ shi ni amɛkɛɛ: “Yehowa ji anɔkwa Nyɔŋmɔ lɛ! Yehowa ji anɔkwa Nyɔŋmɔ lɛ!” (1 Maŋtsɛmɛi 18:38, 39, NW) Kɛkɛ ni Elia kpɛ yiŋ ko ni yɔɔ shiŋŋ. Efã akɛ: “Nyɛmɔmɔa Baal gbalɔi lɛ; nyɛkahaa amɛteŋ mɔ kome folo miijoa foi!” Beni agbe amɛ yɛ Kishɔn faa lɛ naa sɛɛ lɛ, atatui ni edi tũu yi ŋwɛi obɔ. Yɛ naagbee lɛ, nugbɔ ni tue babaoo lɛ ha nuhɔmɔ lɛ ba naagbee!—1 Maŋtsɛmɛi 18:40-45; okɛto 5 Mose 13:1-5 he.
8 Mɛɛ gbi ni yɔɔ nyam po nɛ! Yehowa eye kunim yɛ nɛkɛ Nyɔŋmɔyeli he kaa nɛɛ mli. Agbɛnɛ, nɛkɛ nibii nɛɛ tsɔ Israelbii lɛ ateŋ mɛi pii atsuii kɛba Nyɔŋmɔ ŋɔɔ ekoŋŋ. Elia ye anɔkwa akɛ gbalɔ yɛ enɛ kɛ gbɛ̀i krokomɛi anɔ, ni lɛ diɛŋtsɛ lɛ etsuɔ gbalɛ mfoniri ko he nii.
“Gbalɔ Elia Lɛ” Kpaako Ebaaba?
9. Mɛni agba afɔ shi yɛ Maleaki 3:23, 24?
9 Yɛ sɛɛ mli lɛ, Nyɔŋmɔ gba kɛtsɔ Maleaki nɔ akɛ: “Naa, matsu gbalɔ Elia kɛaaba nyɛŋɔɔ, dani Yehowa gbi wulu kpele ni he yɔɔ gbeyei lɛ aaashɛ. Ni eeedɔrɔ tsɛmɛi atsuii kɛba amɛbii ahe, kɛ bii hu atsuii kɛba amɛtsɛmɛi ahe, koni mikaba ni mibaha shikpɔŋ lɛ ye musu.” (Maleaki 3:23-24) Elia hi shi aaafee afii 500 dani awie nakai wiemɔi lɛ. Akɛni eji gbalɛ hewɔ lɛ, Yudafoi ni hi shi yɛ Ŋ.B. klɛŋklɛŋ afii oha lɛ mli lɛ miikpa Elia baa gbɛ koni ebaha eba mli.—Mateo 17:10.
10. Namɔ ji Elia ni agba ehe sane afɔ shi lɛ, ni te wɔfeɔ tɛŋŋ wɔleɔ?
10 Belɛ, namɔ ji Elia ni baa nɛɛ? Ajie mɔ ni eji lɛ kpo beni Yesu Kristo kɛɛ akɛ: “Kɛjɛ Yohane baptisilɔ lɛ yinɔ kɛbaa nɛɛ, hewalɛ naa aŋɔɔ ŋwɛi maŋtsɛyeli lɛ, ni hewalɔi gbalaa lɛ hewalɛ naa. Shi gbalɔi lɛ fɛɛ kɛ mla lɛ gba kɛbashi Yohane nɔ. Ni kɛji nyɛmiisumɔ akɛ nyɛaamɔ mli lɛ, mɔ nɛɛ ji Elia ni baaba lɛ.” Hɛɛ, Yohane Baptisilɔ lɛ ji Elia henɔ ni agba afɔ̃ shi lɛ. (Mateo 11:12-14; Marko 9:11-13) Ŋwɛibɔfo ko ekɛɛ Yohane tsɛ, Zakaria, akɛ Yohane baaná “Elia mumɔ kɛ ehewalɛ” lɛ, ni “esaa maŋ ni efee klalo eto [Yehowa, NW].” (Luka 1:17) Baptisimɔ ni Yohane fee lɛ ji mɔ lɛ tsuitsakemɔ yɛ esha ni efee eshi Mla lɛ, ni baanyiɛ Yudafoi lɛ ahiɛ kɛya Kristo ŋɔɔ lɛ he okadi yɛ faŋŋ mli. (Luka 3:3-6; Galatabii 3:24) No hewɔ lɛ, Yohane nitsumɔ lɛ ‘fee gbɔmɛi klalo kɛha Yehowa.’—Luka 3:6.
11. Mɛni Petro wie yɛ ‘Yehowa gbi’ lɛ he yɛ Pentekoste, ni mɛɛ be eba mli?
11 Yohane Baptisilɔ lɛ nitsumɔ akɛ “Elia” lɛ tsɔɔ akɛ ‘Yehowa gbi’ lɛ ebɛŋkɛ. Bɔfo Petro hu tsɔɔ bɔ ni gbi ni Nyɔŋmɔ baate shi ashi ehenyɛlɔi lɛ, ni ebaa ewebii ayi lɛ ebɛŋkɛ eha. Etsɔɔ mli akɛ naakpɛɛ nibii ni ba yɛ Pentekoste afi 33 Ŋ.B. lɛ ji Yoel gbalɛ ni kɔɔ Nyɔŋmɔ mumɔ lɛ ni aaafɔse ashwie shi lɛ he lɛ mlibaa. Petro tsɔɔ akɛ enɛ baaba mli dani “[Yehowa, NW] gbi wulu ni yɔɔ nyam lɛ aaaba.” (Bɔfoi lɛ Asaji 2:16-21; Yoel 3:1-5) Afi 70 Ŋ.B. Yehowa ha e-Wiemɔ lɛ ba mli kɛtsɔ hã ni ehã Roma asraafoi lɛ tsu ŋwɛi fɔbuu he nii amɛshi maŋ ni kpoo e-Bi lɛ nɔ lɛ.—Daniel 9:24-27; Yohane 19:15.
12. (a) Mɛni Paulo kɛ Petro fɛɛ wie yɛ ‘Yehowa gbi’ ko ni baa lɛ he? (b) Mɛni hewɔ nɔ̃ ko ni damɔ shi kɛha Elia nitsumɔ lɛ baaba kɛ̃ lɛ?
12 Shi kɛ̃lɛ, babaoo yɛ ni baaba, yɛ afi 70 Ŋ.B. sɛɛ. Bɔfo Paulo kɛ “[Yehowa, NW] gbi” ni baa lɛ to ba ni Yesu Kristo eba lɛ he. Agbɛnɛ hu bɔfo Petro wie nakai gbi lɛ he ni ekɛto “ŋwɛi hee kɛ shikpɔŋ hee” ni yɔɔ wɔsɛɛ be mli lɛ he. (2 Tesalonikabii 2:1, 2; 2 Petro 3:10-13) Hã ahi ojwɛŋmɔ mli akɛ, Yohane Baptisilɔ lɛ tsu nitsumɔ ko ni tamɔ Elia nɔ̃ lɛ dani ‘Yehowa gbi’ lɛ ba yɛ afi 70 Ŋ.B. Kɛ abua enɛɛmɛi fɛɛ naa lɛ, etsɔɔ akɛ nɔ̃ kroko hu ni damɔ shi kɛha nii ni Elia tsu lɛ baaba. Mɛni ji no?
Amɛyɛ Elia Mumɔ Lɛ
13, 14. (a) Mɛni yɔɔ ni je amɛhe yɛ Elia nitsumɔi lɛ kɛ ŋmɛnɛŋmɛnɛ beaŋ Kristofoi ni afɔ amɛ mu lɛ anɔ̃ lɛ he? (b) Mɛni Kristendom hemɔkɛyeli kwalɔi lɛ efee?
13 Jeee akɛ Elia nitsumɔ lɛ tamɔ Yohane Baptisilɔ lɛ nitsumɔi lɛ nɔŋŋ, shi etamɔ nɔ ni Kristofoi ni afɔ amɛ mu lɛ tsuɔ yɛ jaramɔ bei nɛɛ ni kɛ mɔ yaa “[Yehowa, NW] gbi” lɛ mli lɛ hu. (2 Timoteo 3:1-5) Akɛ mɛi ni yɔɔ Elia mumɔ kɛ hewalɛ lɛ, amɛji mɛi ni kɛ anɔkwayeli fiɔ anɔkwa jamɔ sɛɛ waa. Ni mɛɛ hiamɔ sane po enɛ efee nɛkɛ! Yɛ Kristo bɔfoi lɛ agbele sɛɛ lɛ, hemɔkɛyeli kwamɔ kwɛ̃ kɛjɛ anɔkwa Kristojamɔ mli, taakɛ Baal jamɔ shwere yɛ Israel yɛ Elia gbii lɛ amli lɛ. (2 Petro 2:1) Mɛi ni kɛɔ akɛ Kristofoi ji amɛ lɛ je shishi akɛ amɛkɛ apasa tsɔɔmɔi kɛ nifeemɔi aaafutu Kristojamɔ. Akɛ nɔkwɛmɔnɔ lɛ, amɛkpɛlɛ wɔŋjalɔi atsɔɔmɔ ni ŋmalɛ fiii sɛɛ akɛ gbɔmɔ yɛ susuma ni gbooo lɛ nɔ. (Jajelɔ 9:5, 10; Ezekiel 18:4) Kristendom hemɔkɛyeli kwalɔi lɛ ekpa anɔkwa Nyɔŋmɔ kome lɛ gbɛi, ni ji Yehowa, kɛ nitsumɔ. Yɛ no najiaŋ lɛ, amɛmiija Triniti moŋ. Ámɛkpɛlɛ Baal nifeemɔ ni ji Yesu kɛ enyɛ Maria he amagai ni amɛkulaa shi amɛhaa amɛ lɛ hu nɔ. (Romabii 1:23; 1 Yohane 5:21) Shi jeee fɛɛ nɛ.
14 Kɛjɛ afii ohai 19 lɛ mli kɛbaa lɛ, Kristendom sɔlemɔi lɛ amli hiɛnyiɛlɔi lɛ je shishi amɛwie amɛyiŋ ni feɔ amɛ kɔshikɔshi yɛ Biblia lɛ fãi babaoo he lɛ ahe. Akɛ nɔkwɛmɔnɔ lɛ, amɛkpoo nibɔɔ he sane ni yɔɔ Mose Klɛŋklɛŋ wolo lɛ mli lɛ, ni amɛjie sutsakemɔ ni akaa yiŋ awieɔ lɛ yi, ni amɛtsɛ lɛ akɛ “jeŋ nilee.” Enɛ kɛ Yesu Kristo kɛ ebɔfoi lɛ atsɔɔmɔi lɛ kpãaa gbee kwraa. (Mateo 19:4, 5; 1 Korintobii 15:47) Shi taakɛ Yesu kɛ eklɛŋklɛŋ sɛɛnyiɛlɔi lɛ ji lɛ, Kristofoi ni akɛ mumɔ efɔ amɛ mu ni yɔɔ ŋmɛnɛ lɛ fiɔ Biblia mli sane ni kɔɔ nibɔɔ he lɛ sɛɛ.—1 Mose 1:27.
15, 16. Namɛi ena mumɔŋ niyenii ni baa daa mli ŋɔɔmɔ ni tamɔɔɔ Kristendom, ni kɛtsɔ mɛni nɔ?
15 Beni je lɛ bote “naagbee be lɛ” mli lɛ, kɛkɛ ni mumɔŋ hɔmɔ ko batutua Kristendom. (Daniel 12:4; Amos 8:11, 12) Shi, Kristofoi ni afɔ amɛ mu lɛ akuu fioo lɛ na mumɔŋ niyenii be fɛɛ be kɛjɛ Nyɔŋmɔ ŋɔɔ “yɛ be ni sa nɔ,” tamɔ bɔ ni Yehowa kwɛ koni alɛ Elia yɛ egbii lɛ amli hɔmɔ be lɛ mli lɛ. (Mateo 24:45; 1 Maŋtsɛmɛi 17:6, 13-16) Be ko lɛ, ale amɛ akɛ Majimaji Ateŋ Biblia Kaselɔi, shi yɛ sɛɛ mli lɛ nɛkɛ Nyɔŋmɔ tsuji anɔkwafoi nɛɛ anine shɛ Ŋmalɛ naa gbɛi ni ji Yehowa Odasefoi lɛ nɔ.—Yesaia 43:10.
16 Elia hi shi yɛ egbɛi, ni eshishi ji “Mi-Nyɔŋmɔ Ji Yehowa” lɛ naa. Ákɛ Yehowa tsuji ni yɔɔ shikpɔŋ nɔ lɛ awolo titri lɛ, Buu-Mɔɔ lɛ etee nɔ ekɛ Nyɔŋmɔ gbɛi lɛ etsu nii be fɛɛ be. Yɛ anɔkwale mli lɛ, nɔ ni ji enyɔ ni akala (August 1879) lɛ kɛ hekɛnɔfɔɔ wie akɛ wolo tɛtɛrɛɛ lɛ yɛ Yehowa ákɛ esɛɛfilɔ. Wolo nɛɛ kɛ Buu Mɔɔ Asafo lɛ woji krokomɛi kpaa Kristendom kɛ Babilon Kpeteŋkpele, ni ji jeŋ apasa jamɔ maŋtsɛyeli lɛ jamɔi krokomɛi lɛ ahe mama, yɛ be mli ni amɛfiɔ anɔkwale ni Nyɔŋmɔ Wiemɔ ni ji Biblia lɛ ji lɛ sɛɛ lɛ.—2 Timoteo 3:16, 17; Kpojiemɔ 18:1-5.
Anɔkwa ni Aye yɛ Kaa Shishi
17, 18. Te Izebel fee enii yɛ Baal gbalɔi lɛ ni agbe amɛ lɛ he eha tɛŋŋ, shi mɛɛ gbɛ nɔ atsɔ aye abua Elia?
17 Osɔfoi lɛ anifeemɔ yɛ amɛhe mama ni akpa lɛ he lɛ tamɔ nɔ ni Izebel fee beni enu akɛ Elia egbe Baal gbalɔi lɛ. Etsu ni akɛ shɛɛ sane yaha Yehowa gbalɔ anɔkwafo lɛ, ni ekã kitã akɛ ebaaha agbe lɛ. Enɛ jeee hegbeyeiwoo folo ko kɛkɛ, ejaakɛ no mli lɛ Izebel egbe Nyɔŋmɔ gbalɔi lɛ ateŋ mɛi pii momo. Gbeyeishemɔ hewɔ lɛ, Elia jo foi kɛtee wuoyi-anaigbɛ, ni etee Beersheba. Eshi etsulɔ lɛ yɛ jɛmɛ, ni etee ehiɛ lolo kɛtee ŋa lɛ nɔ, ni eesɔle ni egbo. Shi Yehowa kwako egbalɔ lɛ. Ŋwɛibɔfo ko jie ehe kpo etsɔɔ Elia koni esaa lɛ kɛha gbɛfaa kakadaŋŋ ni kɛ lɛ baaya Horeb Gɔŋ lɛ nɔ lɛ. No hewɔ lɛ, enine shɛ niyenii nɔ kɛha gbii 40 gbɛfaa ni fe kilomitai 300 lɛ. Beni Nyɔŋmɔ jie ehewalɛ kɛtsɔ̃ ahum ni naa wa, shikpɔŋhosomɔ, kɛ la kpeteŋkpele ko ni yɔɔ gbeyei lɛ nɔ lɛ sɛɛ lɛ, ewie etsɔɔ lɛ yɛ Horeb. Yehowa bɛ nibii ni ajie lɛ kpo nɛɛ amli. Amɛji emumɔ krɔŋkrɔŋ loo enifeemɔ hewalɛ lɛ kpojiemɔi. Kɛkɛ ni Yehowa wie etsɔɔ egbalɔ lɛ. Susumɔ bɔ ni niiashikpamɔ nɛɛ wo Elia hewalɛ eha lɛ he okwɛ. (1 Maŋtsɛmɛi 19:1-12) Kɛji akɛ wɔ, taakɛ Elia ji lɛ, eba lɛ akɛ wɔbashe gbeyei ko beni anɔkwa jamɔ henyɛlɔi miiwo wɔhe gbeyei hu? Esa akɛ eniiashikpamɔ lɛ aye abua wɔ ni wɔyoo akɛ Yehowa kwaaa ewebii lɛ.—1 Samuel 12:22.
18 Nyɔŋmɔ fee lɛ faŋŋ akɛ Elia yɛ nitsumɔ ni ebaatsu lolo akɛ gbalɔ. Agbɛnɛ hu, eyɛ mli akɛ Elia susu akɛ ekome pɛ ji anɔkwa Nyɔŋmɔ lɛ jalɔ yɛ Israel moŋ, shi Yehowa tsɔɔ lɛ akɛ gbɔmɛi 7,000 yɛ ni amɛkulako shi amɛhako Baal. Kɛkɛ ni Nyɔŋmɔ tsu Elia kɛtee enitsumɔ lɛ nɔ. (1 Maŋtsɛmɛi 19:13-18) Taakɛ Elia ji lɛ, anɔkwa jamɔ henyɛlɔi baagbɔbi wɔ. Wɔbaafee mɛi ni awaa amɛyi waa, taakɛ Yesu gba fɔ shi lɛ. (Yohane 15:17-20) Yɛ bei komɛi amli lɛ wɔnáŋ nɔ ni yaa nɔ lɛ he miishɛɛ. Shi kɛ̃lɛ, wɔbaanyɛ wɔtamɔ Elia, ni nine shɛ ŋwɛi nɔmimaa nɔ, ni agbɛnɛ etee nɔ eŋmɛ etsui shi yɛ anɔkwayeli mli yɛ Yehowa sɔɔmɔ mli lɛ.
19. Mɛɛ niiashikpamɔ Kristofoi ni afɔ amɛ mu lɛ tsɔ mli yɛ Jeŋ Ta I be lɛ mli?
19 Yɛ yiwaa ni naa wa waa ni tee nɔ yɛ Jeŋ Ta I be lɛ mli hewɔ lɛ, Kristofoi ni afɔ amɛ mu lɛ ateŋ mɛi komɛi ŋmɛɛ amɛhe amɛha gbeyeishemɔ ni amɛkpa shiɛmɔ. Amɛtɔ̃ yɛ amɛsusumɔ akɛ amɛ shikpɔŋ nɔ nitsumɔ lɛ eba naagbee lɛ mli. Shi Nyɔŋmɔ kpooo amɛ. Shi moŋ, ekɛ mɔbɔnalɛ kwɛ amɛ, taakɛ ekɛ niyenii ha Elia lɛ. Taakɛ Elia ji lɛ, anɔkwafoi ni afɔ amɛ mu lɛ kpɛlɛ ŋwɛi kãmɔ nɔ, ni amɛkɛ amɛhe wo nitsumɔ ni amɛkpa tsumɔ lɛ mli ekoŋŋ. Agbele amɛhiŋmɛi yɛ hegbɛ kpeteŋkpele ni ji Maŋtsɛyeli shɛɛ sane lɛ ni aaashiɛ lɛ he.
20. Mɛɛ hegbɛ akɛhaa mɛi ni yeɔ anɔkwa tamɔ Elia lɛ ŋmɛnɛ?
20 Yesu tsɔɔ nitsumɔ ni akɛbaabɔle jeŋ muu fɛɛ, ni abaagbe naa dani nibii agbɛjianɔtoo fɔŋ nɛɛ aba enaagbee lɛ mli yɛ egbalɛ ni kɔɔ ba ni eba lɛ he lɛ mli. (Mateo 24:14) Ŋmɛnɛ, Kristofoi ni afɔ amɛ mu lɛ kɛ amɛnanemɛi akpekpei abɔ ni kpaa gbɛ akɛ amɛbaaná wala yɛ shikpɔŋ nɔ paradeiso mli lɛ miitsu nɛkɛ nitsumɔ nɛɛ. Maŋtsɛyeli-shiɛmɔ nitsumɔ ni atsuɔ kɛyashi be mli ni aaagbe naa lɛ ji hegbɛ ni akɛha mɛi ni yeɔ anɔkwa tamɔ Elia lɛ pɛ.
Feemɔ Anɔkwafo Tamɔ Elia
21, 22. (a) Mɛɛ nitsumɔ Kristofoi ni afɔ amɛ mu lɛ nyiɛɔ hiɛ ŋmɛnɛ? (b) Mɛni yeɔ buaa ni anyɛɔ atsuɔ shiɛmɔ nitsumɔ nɛɛ, ni mɛni hewɔ ehe hiaa lɛ?
21 Shwɛɛnii ni ji anɔkwa Kristofoi ni afɔ amɛ mu lɛ akuu fioo lɛ etsu gbɛnaa nii ni kã amɛnɔ, ni ji Yesu Kristo ni awo lɛ Maŋtsɛ lɛ nibii ni yɔɔ shikpɔŋ nɔ lɛ anɔkwɛmɔ he nii kɛ ekãa ni tamɔ Elia nɔ̃ lɛ. (Mateo 24:47) Ni nɔ ni fe afii 60 nɛ, ni Nyɔŋmɔ kɛ mɛi ni afɔ amɛ mu nɛɛ etsu nii, koni amɛnyiɛ gbɔmɛi ni ekɛ naanɔ wala yɛ shikpɔŋ nɔ paradeiso he hiɛnɔkamɔ ni yɔɔ naakpɛɛ lɛ eha amɛ lɛ akaselɔfeemɔ nitsumɔ lɛ hiɛ. (Mateo 28:19, 20) Kwɛ shi ni gbɔmɛi akpekpei abɔ nɛɛ baanyɛ ada akɛ, kɛ akɛaato he lɛ, mɛi ni afɔ amɛ mu lɛ ateŋ mɛi fioo ni eshwɛ lɛ kɛ ekãa kɛ anɔkwayeli miitsu amɛ gbɛnaa nii lɛ ahe nii!
22 Gbɔmɛi ni yeee emuu tsu nɛkɛ Maŋtsɛyeli-shiɛmɔ nitsumɔ nɛɛ he nii, ni amɛfee enɛ yɛ hewalɛ ni Yehowa kɛhaa mɛi ni tsɔɔ sɔlemɔ nɔ amɛkɛ amɛhiɛ fɔɔ enɔ lɛ mli. Kaselɔ Yakobo kɛɛ akɛ: “Elia ji gbɔmɔ adesa tamɔ wɔ nɔŋŋ,” yɛ be mli ni ekɛ gbalɔ lɛ nɔkwɛmɔnɔ ni kɔɔ sɔlemɔ he lɛ tsuɔ nii koni ekɛtsɔɔ hewalɛ ni jalɔ sɔlemɔ yɔɔ lɛ mli lɛ. (Yakobo 5:16-18) Jeee be fɛɛ be Elia gbaa loo efeɔ naakpɛɛ nii. Eyɛ adesa henumɔi kɛ gbɔjɔmɔi ni wɔyɔɔ eko lɛ nɔŋŋ eko, shi esɔmɔ Nyɔŋmɔ yɛ anɔkwayeli mli. Akɛni wɔ hu wɔyɔɔ Nyɔŋmɔ yelikɛbuamɔ ni ewajeɔ wɔ hewɔ lɛ, wɔbaanyɛ wɔye anɔkwa tamɔ Elia.
23. Mɛni hewɔ wɔyɔɔ yiŋtoo kpakpa ni wɔɔdamɔ nɔ wɔye anɔkwa ni wɔna jwɛŋmɔ kpakpa lɛ?
23 Wɔyɛ yiŋtoo kpakpa ni wɔɔdamɔ nɔ wɔye anɔkwa ni wɔna jwɛŋmɔ kpakpa. Kaimɔ akɛ, Yohane Baptisilɔ lɛ tsu nitsumɔ ko ni tamɔ Elia nɔ̃ lɛ dani ‘Yehowa gbi’ lɛ ba yɛ afi 70 Ŋ.B. Nakai nɔŋŋ Kristofoi ni afɔ amɛ mu lɛ kɛ Elia mumɔ kɛ hewalɛ etsu nitsumɔ ko ni Nyɔŋmɔ kɛha lɛ yɛ shikpɔŋ muu lɛ fɛɛ nɔ. Enɛ tsɔɔ faŋŋ akɛ ‘Yehowa gbi’ wulu lɛ ebɛŋkɛ.
Te Obaaha Hetoo Oha Tɛŋŋ?
◻ Mɛɛ gbɛ nɔ atsɔ aye Nyɔŋmɔ ni Yehowa ji lɛ he odase yɛ Karmel Gɔŋ lɛ nɔ?
◻ Namɔ ji ‘Elia ni baaba’ lɛ, ni mɛni etsu?
◻ Ŋmɛnɛŋmɛnɛ beaŋ Kristofoi ni afɔ amɛ mu lɛ etsɔɔ akɛ amɛyɛ Elia mumɔ lɛ yɛ mɛɛ gbɛ nɔ?
◻ Mɛni hewɔ wɔbaanyɛ wɔye anɔkwa tamɔ Elia lɛ?
[Akrabatsa ni yɔɔ baafa 15]
Mɛɛ Ŋwɛi Elia Kwɔ Kɛtee lɛ?
“NI EBA mli akɛ beni [Elia kɛ Elisha] nyiɛ kɛyaa ni amɛwieɔ lolo lɛ, naa, la shwiili kɛ la okpɔŋɔi ba, ni amɛbagbala amɛyi enyɔ lɛ amɛmli; ni Elia tsɔ̃ lasuogbele mli kɛtee ŋwɛi”—2 Mantsɛmɛi 2:11.
Mɛni ji wiemɔ “ŋwɛi” lɛ shishi yɛ sane nɛɛ mli? Yɛ bei komɛi amli lɛ wiemɔ lɛ tsɔɔ Nyɔŋmɔ kɛ ebii ni ji ŋwɛibɔfoi lɛ amumɔŋ shihilɛhe lɛ. (Mateo 6:9; 18:10) “Ŋwɛi” hu baanyɛ adamɔ shi aha jeŋ muu fɛɛ ni wɔkɛ wɔhiŋmɛii naa lɛ. (5 Mose 4:19) Ni Biblia lɛ kɛ wiemɔ nɛɛ tsuɔ nii ekɛtsɔɔ wɔ atatuiaŋ he ni loofɔji filikiɔ kɛtsɔɔ ni kɔɔyɔɔ tswaa yɛ lɛ.—Lala 78:26; Mateo 6:26.
Te ŋwɛi nɛɛ amli nɔ ni gbalɔ Elia kwɔ kɛtee lɛ? Eyɛ faŋŋ akɛ ajie lɛ kɛtsɔ wɔ atatui nɛɛ amli kɛtee jeŋ kutruku nɛɛ fã kroko nɔ. Elia yɛ shikpɔŋ nɔ lolo yɛ no sɛ afii pii, ejaakɛ eŋma wolo ekɛyaha Maŋtsɛ Yehoram ni jɛ Yuda lɛ. (2 Kronika 21:1, 12-15) Ákɛ Elia ekwɔɔɔ kɛyaaa mumɔŋ shihilɛhe ni Yehowa Nyɔŋmɔ yɔɔ lɛ, Yesu Kristo tsɔɔ mli yɛ sɛɛ mli beni ejaje akɛ: “Mɔ ko ekwɔko kɛyako ŋwɛi, akɛ ja mɔ ni jɛ ŋwɛi kpeleke shi lɛ, gbɔmɔ bi lɛ ni yɔɔ ŋwɛi lɛ,” ni ji akɛ, Yesu diɛŋtsɛ. (Yohane 3:13) Agbele gbɛ ni kɛ mɔ yaa ŋwɛi wala mli lɛ naa aha adesai ni yeee emuu lɛ klɛŋklɛŋ kwraa yɛ Yesu Kristo gbele, eshitee, kɛ kwɔ ni ekwɔ kɛtee ŋwɛi lɛ sɛɛ.—Yohane 14:2, 3; Hebribii 9:24; 10:19, 20.