Fɔlɔi Nyɛbua Nyɛbii Ahe!

YƐ NIGERIA nɔtsamɔ skul ko mli lɛ, gbekɛyoo ko ni ale lɛ waa yɛ bɔlɛnamɔ he jeŋba shara hewɔ lɛ sumɔɔ ni egba enanemɛi skulbii lɛ saji ni kɔɔ bɔlɛnamɔ he. Tsofai ni etsɔɔ akɛ abaanyɛ akɛjie musu lɛ ateŋ ekome ji dãa diŋ ni naa wa ni akɛ tawa efutu mli, ni emli efĩ waa. Saji ni ehalaa kɛjɛɔ woji ni wieɔ bɔlɛnamɔ he lɛ naa enanemɛi nikaselɔi lɛ pii ajwɛŋmɔ nɔ hewalɛ. Mɛi komɛi bɔi kaa-kɛ-kwɛmɔ kɛtsɔ bɔlɛnamɔ nɔ, ni amɛteŋ mɔ kome ná musu. Bɔni afee ni ejie musu lɛ, eyanu dãa diŋ ni naa wa kɛ tawa ni afutu lɛ. Yɛ ŋmɛlɛtswai fioo komɛi asɛɛ lɛ, ebɔi lá shwee. Egbo yɛ helatsamɔhe lɛ yɛ gbii fioo komɛi asɛɛ.

Yɛ jeŋ ni wɔyɔɔ mli ŋmɛnɛ lɛ, gbekɛbii pii kpaaa bɔlɛnamɔ he wiemɔ, ni amɛkɛ naagbai baa toibolɔi ni heɔ nɔ fɛɛ nɔ amɛyeɔ lɛ anɔ. Namɛi esa akɛ gbekɛbii aya amɛŋɔɔ kɛha anɔkwale nilee ni baabu amɛhe? Kwɛ bɔ ni ehi, kɛji akɛ amɛtee amɛfɔlɔi ni sheɔ Nyɔŋmɔ gbeyei, ni sɔ̃ kã amɛnɔ akɛ amɛlɛ amɛ yɛ “Yehowa tsɔsemɔ kɛ ŋaawoo lɛ mli” lɛ aŋɔɔ.—Efesobii 6:4, NW.

Afrikabii Asu yɛ Bɔlɛnamɔ He Nitsɔɔmɔ He

Yɛ je lɛŋ fɛɛ lɛ, ewa kɛha fɔlɔi akɛ amɛkɛ amɛbii aaagba saji ni kɔɔ bɔlɛnamɔ he. Enɛ ji anɔkwale titri yɛ Afrika. Donald, ni ji tsɛ ko ni yɔɔ Sierra Leone lɛ kɛɛ akɛ: “Etamɔ nɔ ni atsuuu he nii kwraa. Ejeee nɔ ko ni fata Afrikabii akusum he akɛ afee nakai.” Nigeriayoo ko ni atsɛɔ lɛ Confident kpɛlɛ nɔ akɛ: “Mifɔlɔi buɔ bɔlɛnamɔ akɛ nɔ ko ni esaaa akɛ atsĩɔ tã yɛ faŋŋ mli kwraa; aahi yɛ kusum naa.”

Yɛ Afrika kusumii anaa lɛ asusuɔ akɛ eji yakayaka wiemɔ akɛ aaatsĩ nibii ni kɔɔ bɔlɛnamɔ he lɛ atã, tamɔ hamɔ, mai loo tsũiasɛɛyaa. Kristofonyo ko ni ji nyɛ lɛ tsĩ ebiyoo ko naa koni ekɛ wiemɔ “bɔlɛnamɔ” akɛtsu nii, shi ebaanyɛ ekɛ wiemɔ “ajwamaŋbɔɔ” atsu nii. Nɔ ni tamɔɔɔ nakai lɛ, Nyɔŋmɔ Wiemɔ ni ji Biblia lɛ wieɔ bɔlɛnamɔ, kɛ fɔmɔ nii ahe yɛ faŋŋ mli. (1 Mose 17:11; 18:11; 30:16, 17; 3 Mose 15:2) Yiŋtoo ni yɔɔ enɛ sɛɛ lɛ jeee ni efee wɔ naakpɛɛ loo ni wɔmii ashɛ wɔhe, shi moŋ koni ebu Nyɔŋmɔ webii lɛ ahe ni etsɔɔ amɛ nii.—2 Timoteo 3:16.

Yɛ kusumii ni ahiɔ ni eji lɛ sɛɛ lɛ, Nigeria tsɛ ko tsɔɔ yiŋtoo kroko hewɔ ni fɔlɔi komɛi tsiɔ amɛhe kɛjɛɔ he lɛ mli akɛ: “Kɛ mikɛ mibii lɛ gba bɔlɛnamɔ he sane lɛ ebaanyɛ egbala amɛ ewo bɔlɛnamɔ jeŋba shara mli.” Shi ani saji ni kɔɔ bɔlɛnamɔ he ni yɔɔ Biblia lɛ mli, ni yɔɔ nyam lɛ woɔ gbekɛbii hewalɛ koni amɛfee oya ni amɛka amɛkwɛ? Dabi, efee nakai. Yɛ anɔkwale mli lɛ, eeenyɛ efee moŋ akɛ, nilee fioo pɛ ni gbekɛbii lɛ yɔɔ lɛ moŋ haa amɛkɛ amɛhe woɔ naagba mli. Biblia lɛ kɛɔ akɛ, “Nilee [ni damɔ anɔkwa nilee nɔ] yɛ kɛha hebuu.”—Jajelɔ 7:12, NW.

Yɛ Yesu abɛbua lɛ mli lɛ, akɛni nuu nilelɔ ko na wɔsɛɛ ahum ni baatswa lɛ hewɔ lɛ, ema etsũ yɛ tɛsaa nɔ, yɛ be mli ni nuu kwashia ko ma etsũ yɛ shia nɔ ni ena amanehulu lɛ. (Mateo 7:24-27) Nakai nɔŋŋ fɔlɔi Kristofoi ni le akɛ amɛbii kɛ je lɛŋ bɔlɛnamɔ shihilɛ ni egbee shi ni tamɔ ahum he nɔnyɛɛi baakpe lɛ wajeɔ amɛbii kɛ anɔkwa nilee kɛ saneshishinumɔ ni baaye abua amɛ koni amɛdamɔ naa.

Afrikayoo ko kɛ yiŋtoo kroko hewɔ ni fɔlɔi kɛ amɛbii egbaaa bɔlɛnamɔ he sane lɛ ha: “Beni miji gbekɛ lɛ, mifɔlɔi ni ji Odasefoi lɛ kɛ mi egbaaa bɔlɛnamɔ he saji, no hewɔ lɛ ebako mijwɛŋmɔ mli pɛŋ akɛ mikɛ mibii agba enɛɛmɛi ahe saji.” Shi kɛlɛ, nɔnyɛɛi ni kã gbekɛbii ni yɔɔ ŋmɛnɛ lɛ anɔ lɛ da kwraa fe nɔ ni kã gbekɛbii ni hi shi yɛ afii 10 loo 20 ni eho lɛ amli lɛ anɔ. Enɛ bɛ naakpɛɛ. Nyɔŋmɔ Wiemɔ lɛ egba efɔ̃ shi akɛ, “naagbee gbii lɛ amli lɛ . . . , gbɔmɛi fɔji kɛ shishiulɔi aaawo wu yɛ efɔŋ mli; amɛlakaa mɛi ni amɛ hu alakaa amɛ.”—2 Timoteo 3:1, 13.

Nɔ ni haa naagba lɛ mli waa hu ji akɛ, gbekɛbii pii sumɔɔɔ, aloo amɛnyɛɛɛ amɛkɛ amɛhe afɔ amɛfɔlɔi anɔ. Mɛi enyɔ ateŋ sanegbaa lɛ efɔɔɔ omanyeyeli yɛ saji bibii amli po. Gbekɛ ko ni eye afii 19 lɛ ye ŋkɔmɔ akɛ: “Mikɛ mifɔlɔi egbaaa nibii ahe saji. Sanegbaa kpakpa bɛ mi kɛ mitsɛ teŋ. Ebooo mi toi.”

Ekolɛ gbekɛbii baashe gbeyei akɛ saji ni amɛaabibii yɛ bɔlɛnamɔ he lɛ kɛ saji fɔji baaba. Gbekɛyoo ko ni eye afii 16 lɛ kɛɛ: “Yɛ bɔ ni mifɔlɔi feɔ amɛnii amɛhaa yɛ bɔlɛnamɔ mli naagbai ahe saji ahe hewɔ lɛ, mikɛ amɛ egbaaa enɛɛmɛi ahe saji. Be ko ni eho lɛ minyɛmiyoo onukpa lɛ bi Awo saji komɛi ni kɔɔ bɔlɛnamɔ he. Yɛ nɔ najiaŋ ni Awo aaaye abua lɛ kɛtsu naagba lɛ he nii moŋ lɛ, ebaná susumɔi ni ehiɛ lɛ he jwɛŋmɔ fɔŋ. Bei pii lɛ Awo tsɛɔ mi ni ebiɔ mi minyɛmiyoo lɛ he saji, ni bei komɛi lɛ, ekaa lɛ ekwɛɔ. Akɛni misumɔɔɔ ni malaaje suɔmɔ ni Awo yɔɔ kɛha mi lɛ hewɔ lɛ, mikɛ lɛ ewieee minaagbai ahe.”

Mɛni Hewɔ Esa akɛ Akɛ Tsɔsemɔ Aha?

Ní wɔkɛ bɔlɛnamɔ he tsɔsemɔ ni fa bɔ ni sa aaaha wɔbii lɛ jeee nɔ ko ni ja kɛkɛ ni wɔmiifee, shi eji nifeemɔ ni mlihilɛ yɔɔ mli. Kɛ fɔlɔi etsɔɔɔ amɛbii bɔlɛnamɔ he nii lɛ, mɛi krokomɛi baatsɔɔ amɛ—bei babaoo lɛ efeɔ oya dani fɔlɔi lɛ yɔseɔ, ni ekɛ Nyɔŋmɔ shishitoo mlai kpaaa gbee kwraa. Gbekɛyoo ko ni eye afii 13 bɔ ajwamaŋ, ejaakɛ eskulnyo ko kɛɛ lɛ akɛ kɛ́ eŋmɛɛɛ obalayoo fro ni eji lɛ he lɛ, wɔsɛɛ lɛ ebaapiŋ waa diɛŋtsɛ. Akɛɛ lɛ akɛ: “Akɛ sakisi baafo oŋaliŋa kɛjɛ ofɔmɔhe.” Yɛ sɛɛ mli beni abi lɛ nɔ hewɔ ni ekɛɛɛ enyɛ ni ji Kristofonyo lɛ nɔ ni enu lɛ, gbekɛyoo lɛ ha hetoo akɛ akɛ onukpai egbaaa saji ni tamɔ nakai kwraa.

Nigeria gbekɛyoo ko kɛɛ akɛ: “Miskul nanemɛi lɛ ka koni amɛkɔne miyiŋ akɛ bɔlɛnamɔ ji nɔ ko ni esa akɛ adesai fɛɛ ni hiɛ kã shi lɛ kɛ amɛhe awo mli. Amɛkɛɛ mi akɛ kɛ mikɛ mihe wooo bɔlɛnamɔ mli bianɛ lɛ, no lɛ, kɛ miye afii 21 lɛ mabɔi hela ko ni baaye mifɔmɔhe awui lɛ namɔ. Enɛ hewɔ lɛ, amɛkɛɛ ehi akɛ ana bɔlɛ dani abote gbalashihilɛ mli, bɔni afee ni atsi he kɛjɛ oshara ni yɔɔ gbeyei ni tamɔ nakai lɛ he.”

Sanegbaa kpakpa ni ekɛ efɔlɔi lɛ gba lɛ ha eyɔse sɔrɔtofeemɔ ni yɔɔ nɔ ni ekase yɛ shia lɛ mli. “Taakɛ mifɔɔ feemɔ lɛ, mitee shia ni miyakɛɛ minyɛ nɔ ni amɛkɛɛ mi yɛ skul lɛ.” Enyɛ nyɛ ekpee apasa saji lɛ anaa.—Okɛto Abɛi 14:15 he.

Fɔlɔi saa amɛbii koni amɛyɔse shihilɛi ni oshara yɔɔ mli, koni amɛyɔse gbɔmɛi ni sumɔɔ koni amɛlaka amɛ lɛ kɛtsɔ nilee ni he hiaa koni akɛye abua gbekɛbii, koni amɛná Nyɔŋmɔ he nilee yɛ saji ni kɔɔ bɔlɛnamɔ he, ni amɛkɛaaha lɛ nɔ. Eyeɔ ebuaa ni abuɔ amɛhe kɛjɛɔ tsuiŋdɔlɛ ni yɔɔ bɔlɛnamɔ mli tsɛ̃ŋɛmɔ helai kɛ hɔŋɔɔ ni ataooo lɛ he. Ehaa amɛnaa bulɛ kɛhaa amɛhe, ni mɛi krokomɛi buɔ amɛ. Ehaa amɛyeɔ amɛhe kɛjɛɔ jwɛŋmɔ ni haoɔ mɔ kɛ yeyeeyefeemɔ he. Ehaa amɛnaa gbɔmɔtsoŋ hewalɛ kpakpa, amɛhiɛɔ bɔlɛnamɔ he jwɛŋmɔ kpakpa, ni ehaa amɛnaa miishɛɛ yɛ sɛɛ mli beni amɛbote gbalashihilɛ mli. Ebaanyɛ eye ebua amɛ koni amɛna shidaamɔ kpakpa yɛ Nyɔŋmɔ hiɛ. Ni kɛ gbekɛbii lɛ ná mɔ hesusumɔ ni suɔmɔ yɔɔ mli ni amɛfɔlɔi jieɔ lɛ kpo amɛtsɔɔ amɛ lɛ, ebaanyɛ etsirɛ amɛ koni amɛkɛ bulɛ ni mli kwɔ aha amɛ, ni amɛsumɔ amɛ babaoo.

Sanegbaa Kpakpa

Esa akɛ gbɔmɛi enyɔ teŋ sanegbaa aya nɔ, bɔni afee ni fɔlɔi kɛ tsɔsemɔ ni he hiaa amɛbii lɛ aha ni amɛtsu he nii. Ja fɔlɔi ele nibii ni yɔɔ amɛbii lɛ ajwɛŋmɔi kɛ amɛtsui amli, no lɛ, ŋaawoo ni sa lɛ he baŋ sɛɛnamɔ tsɔ, ni ebaafee tamɔ datrɛfonyo ni ebɔ mɔdɛŋ eŋma tsofa eha mɔ ko ni eleee bɔ ni helatsɛ lɛ hela lɛ ji diɛŋtsɛ. Esa akɛ fɔlɔi ale nibii diɛŋtsɛ ni amɛbii susuɔ he, kɛ amɛhenumɔi, bɔni afee ni amɛtsɔmɔ ŋaawolɔi kpakpai. Ehe miihia ni amɛnu nɔnyɛɛi kɛ naagbai ni amɛbii lɛ kɛkpeɔ kɛ sanebimɔi ni gbaa amɛnaa lɛ shishi. Ehe miihia ni abo gbekɛbii toi jogbaŋŋ, ‘ni afee oya kɛ ninumɔ, ni ahumi shi kɛ wiemɔ.’—Yakobo 1:19; Abɛi 12:18; Jajelɔ 7:8.

Eheɔ be, tsuishitoo, kɛ mɔdɛŋbɔɔ yɛ fɔlɔi agbɛfaŋ koni amɛná amɛkɛ amɛbii lɛ ateŋ wekukpaa ni yɔɔ gbagbalii, ni ji wekukpaa ko ni baaha gbekɛbii ajie amɛhenumɔi akpo amɛtsɔɔ, ni amɛhiɛ mli daa. Shi kwɛ bɔ ni ehi kɛ nine nyɛ eshɛ enɛ nɔ! Afrika Anaigbɛ tsɛ ko ni yɔɔ bii enumɔ lɛ kɛɛ: “Miji tsɛ kɛ gbɔmɔ ko ni akɛ lɛ yeɔ yitsoŋ sane. Gbekɛbii lɛ kɛ mi gbaa nɔ fɛɛ nɔ he saji yɛ faŋŋ mli, ní bɔlɛnamɔ he saji fata he. Gbekɛbiiyei lɛ po kɛ mi gbaa amɛyitsoŋ saji. Wɔheɔ be ni wɔkɛ amɛ gbaa amɛnaagbai lɛ ahe saji. Amɛhu amɛkɛ mi naa miishɛɛ ni amɛnaa lɛ mli ŋɔɔmɔ.”

Bola, ni ji ebiyei lɛ ateŋ mɔ kome kɛɛ: “Mikɛ nɔ ko eteee mitsɛ. Ataa susuɔ wɔhe ni enuɔ wɔ shishi. Ebolɔɔɔ ewooo wɔ loo ni ekɛ wɔ aaaye yɛ mlifu naa yɛ be mli ni wɔtɔ̃ po. Yɛ nɔ najiaŋ ni emli aaafu lɛ, esusuɔ sane lɛ he, ni etsɔɔ wɔ nɔ ni esa akɛ wɔfee, aloo nɔ ni kulɛ esaaa akɛ wɔfeɔ. Efɔɔ Youth (Obalahii kɛ Obalayei) wolo lɛ kɛ Weku Miishɛɛ wolo kɛ nitsumɔ.”a

Kɛ aaahi lɛ, ehi akɛ fɔlɔi kɛ amɛbii lɛ aaaje bɔlɛnamɔ he sanegbaa shishi beni amɛji gbekɛbii. Enɛ tswaa shishitoo nɔ kɛhaa sanegbaa ni baaya nɔ yɛ naagbai ni fɔɔ baa yɛ be mli ni amɛye afii 13 kɛyaa lɛ efɔɔ shi. Kɛ ajeee sanegbaa shishi mra lɛ, bei komɛi lɛ ewaa akɛ aaaje shishi yɛ sɛɛ mli, shi abaanyɛ afee nakai. Nyɛ ko ni yɔɔ bii enumɔ lɛ kɛɛ: “Mimia mihiɛ koni mawie he kɛyashi be mli ni yɛ naagbee lɛ egbaaa minaa dɔŋŋ ni asaŋ egbaaa gbekɛ lɛ hu naa.” Akɛni nyɔnyɛɛ lɛ naa wa waa hewɔ lɛ, bɔ fɛɛ bɔ ni fee lɛ mɔdɛŋbɔi ni tamɔ nɛkɛ lɛ he baaba sɛɛnamɔ.

Amɛyɛ Hebuu kɛ Miishɛɛ

Gbekɛbii ahiɛ sɔɔ fɔlɔi ni jɛɔ suɔmɔ mli amɛkɛ nilee ni baabu amɛhe saa amɛ lɛ. Susumɔ nɔ ni Afrika Yehowa Odasefoi komɛi wie lɛ he okwɛ:

Beni Mojisola eye afii 24 lɛ ekɛɛ: “Mada minyɛ shi daa. Ekɛ bɔlɛnamɔ he nitsɔɔmɔ ni he hiaa lɛ ha mi yɛ be ni sa mli. Eyɛ mli akɛ be ni eho lɛ, mihiɛ gboɔ yɛ be mli ni ewieɔ nakai saji lɛ ahe moŋ, shi amrɔ nɛɛ, minaa nibii kpakpai ni minyɛ efee eha mi lɛ.”

Iniobong kɛfata he akɛ: “Minaa miishɛɛ daa gbi, kɛ miku misɛɛ misusu nɔ ni Awo efee eha mi kɛtsɔ bɔlɛnamɔ he tsɔsemɔ ni fa bɔ ni sa ni ekɛha mi lɛ nɔ lɛ. Ebafee yelikɛbuamɔ nɔ̃ ko ni he hiaa waa ni miikudɔ mi kɛmiiya yoofeemɔ mli. Miwo shi akɛ mafee nakai nɔŋŋ maha mibii wɔsɛɛ.”

Kunle ni eye afii 19 lɛ kɛɛ: “Mifɔlɔi eye ebua mi ni midamɔ nɔnyɛɛi ni baa kɛjɛɔ je lɛŋ yei ni taoɔ ni amɛkɛ mi ana bɔlɛ lɛ naa. Eji jeee tsɔsemɔ ni amɛkɛha mi lɛ kulɛ, migbee eshafeemɔ mli. Mihiɛ baasɔ nɔ ni amɛfee lɛ daa gbi.”

Christiana kɛɛ: “Miná bɔlɛnamɔ he sane ni mikɛ minyɛ gba lɛ he sɛɛ babaoo. Abu mihe kɛjɛ helai ni yɔɔ gbeyei kɛ hɔŋɔɔ ni ataooo lɛ ahe, ni minyɛ mifee nɔkwɛmɔnɔ kpakpa mifɔ shi kɛha minyɛmimɛi yei kɛ hii bibii lɛ koni amɛnyiɛ sɛɛ. Gbɔmɛi hu buɔ mi, ni wu ni mikɛbaahi shi wɔsɛɛ lɛ hu baabu mi. Nɔ ni fe fɛɛ lɛ, miyɛ mikɛ Yehowa Nyɔŋmɔ teŋ wekukpaa kpakpa yɛ ekitai lɛ ni miyeɔ nɔ lɛ hewɔ.”

Bola ni atsĩ etã kɛtsɔ hiɛ lɛ, kɛɛ: “Miyɛ klasnyo ko ni kɛɛ akɛ ehe ehiaaa ni abote gbalashihilɛ mli dani ana bɔlɛnamɔ mli ŋɔɔmɔ. Kɛha lɛ lɛ, eji shwɛmɔ. Shi kɛlɛ, ena akɛ ejeee shwɛmɔ beni ená musu ni enyɛɛɛ ekɛ wɔ aŋma naagbee kaa ni afee yɛ skul lɛ. Eji mibɛ tsɛ kpakpa ko ni baakudɔ mi kulɛ, ekolɛ manyɛ mafee tamɔ lɛ, ni mikɛ shihilɛ ni mli wa baakpe.”

Kwɛ bɔ ni eji jɔɔmɔ, kɛ́ fɔlɔi Kristofoi ye bua amɛbii ni amɛbatsɔmɔ “nilelɔi kɛha yiwalaheremɔ” yɛ jeŋ ni eye bɔlɛnamɔ he sɛkɛ nɛɛ mli! (2 Timoteo 3:15, NW) Amɛ tsɔsemɔ ni damɔ Biblia nɔ lɛ tamɔ kuɛnii ni jara wa ni akɛwulaa gbekɛbii ni haa amɛhe feɔ fɛo yɛ Nyɔŋmɔ hiɛ lɛ. (Abɛi 1:8, 9) Gbekɛbii nuɔ he akɛ amɛyɛ shweshweeshwe, ni fɔlɔi naa tsui ni nyɔɔ mɔ mli mli ŋɔɔmɔ. Afrika tsɛ ko ni bɔɔ mɔdɛŋ daa gbi koni sanegbaa akã ekɛ ebii bibii lɛ ateŋ lɛ kɛɛ: “Wɔyɛ jwɛŋmɔŋ toiŋjɔlɛ. Wɔyɛ hekɛnɔfɔɔ akɛ wɔbii lɛ le nɔ ni saa Yehowa hiɛ; je lɛŋ bii nyɛŋ alaka amɛ. Wɔyɛ hekɛnɔfɔɔ akɛ amɛfeŋ nɔ ko ni kɛ piŋmɔ baaba weku lɛ nɔ. Miida Yehowa shi akɛ amɛtsu hekɛnɔfɔɔ ni wɔyɔɔ yɛ amɛmli lɛ he nii.”

[Shishigbɛ niŋmai]

[Mfoniri ni yɔɔ baafa 10]

Gbekɛbii Kristofoi ni nine shɛɔ saji ni damɔ Biblia nɔ kɛjɛɔ amɛfɔlɔi adɛŋ lɛ baanyɛ amɛkpoo saji kɔɔdɔŋi ni gbekɛbii krokomɛi gbaa amɛ lɛ