Namɔ ‘Yiwala Abaahere’?
“Mɔ fɛɛ mɔ ni aaabo atsɛ [Yehowa, “NW”] gbɛi lɛ, aaahere eyiwala.”—BƆFOI LƐ ASAJI 2:21.
1. Mɛni hewɔ Pentekoste afi 33 Ŋ.B. ji gbi ni sa kadimɔ waa yɛ yinɔsane mli lɛ?
PENTEKOSTE afi 33 Ŋ.B. fee be ni sa kadimɔ waa yɛ jeŋ yinɔsane mli. Mɛni hewɔ? Ejaakɛ afɔ́ maŋ hee ko yɛ nakai gbi lɛ nɔ. Klɛŋklɛŋ lɛ, kulɛ ejeee maŋ ni da agbo—eji Yesu kaselɔi 120 pɛ ni amɛbua amɛhe naa yɛ ŋwɛitsu ko nɔ yɛ Yerusalem. Shi ŋmɛnɛ, maŋ ni afɔ́ lɛ yɛ nakai ŋwɛitsu lɛ nɔ lɛ kɛ wɔ yɛ lolo, yɛ be mli ni hiɛ ekpa jeŋmaji ni hi shi yɛ nakai beaŋ lɛ amli babaoo nɔ. Nɛkɛ anɔkwa sane nɛɛ he miihia waa kɛha wɔ fɛɛ, ejaakɛ nɛkɛ maŋ nɛɛ ji maŋ ni Nyɔŋmɔ ehala akɛ efee edasefonyo yɛ adesai ahiɛ.
2. Mɛɛ naakpɛɛ nifeemɔi kadi maŋ hee lɛ fɔmɔ?
2 Beni nakai maŋ hee lɛ ba shihilɛ mli lɛ, nibii ni he hiaa ba mli ni ewo Yoel gbalɛ wiemɔi lɛ obɔ. Wɔkaneɔ nibii ni ba nɛɛ ahe sane yɛ Bɔfoi lɛ Asaji 2:2-4 lɛ akɛ: “Trukaa lɛ gbɛɛmɔ ko ni tamɔ ahum ni tswaa waa jɛ ŋwɛi ba, ni ebayi shia he ni amɛtara lɛ fɛɛ obɔ̃. Ni lilɛii ni agbalagbalaa mli ni tamɔ lalilɛii pue; ni ebatara amɛyiteaŋ ekomekome; ni Mumɔ krɔŋkrɔŋ bayimɔ amɛ fɛɛ amɛmli obɔ̃bɔ̃, ni amɛbɔi wiemɔi sɔrɔtoi sɔrɔtoi awiemɔ, taakɛ bɔ ni Mumɔ lɛ ŋɔwo amɛnaa lɛ.” Nɛkɛ gbɛ nɔ tsɔ̃ ni nakai hii kɛ yei anɔkwafoi 120 lɛ batsɔmɔ mumɔŋ maŋ, nɔ ni bɔfo Paulo tsɛ́ lɛ yɛ sɛɛ mli akɛ “Nyɔŋmɔ Israel lɛ” mli klɛŋklɛŋ bii.—Galatabii 6:16.
3. Mɛɛ Yoel gbalɛ ba mli yɛ Pentekoste afi 33 Ŋ.B.?
3 Gbɔmɛi asafo babaoo ko babua amɛhe naa koni amɛtao nɔ ni “ahum ni tswaa waa” lɛ ji, ni bɔfo Petro tsɔɔ mli ehã amɛ akɛ Yoel gbalɛi lɛ ateŋ ekome miiba mli. Mɛɛ gbalɛ ni? Ojogbaŋŋ, bó nɔ ni ekɛɛ lɛ toi: “Nyɔŋmɔ kɛɛ: ‘Ni aaaba mli yɛ naagbee gbii lɛ anɔ, akɛ mafɔse mi-Mumɔ lɛ eko mashwie heloo fɛɛ nɔ, ni nyɛbihii kɛ nyɛbiyei lɛ aaagba, ni nyɛbalahii lɛ aaana ninaai, ni nyɛnukpai lɛ aaala lamɔi; ni asaŋ mitsuji hii kɛ mitsuji yei lɛ anɔ hu mafɔse mi-Mumɔ lɛ eko mashwie yɛ nakai gbii lɛ anɔ, ni amɛaagba. Ni maha naakpɛɛ nii aba ŋwɛi ni okadii hu aba shikpɔŋ lɛ nɔ, lá kɛ la kɛ lasu lamɔ. Hulu aaatsɔ̃ duŋ, ni nyɔɔŋtsere aaatsɔ̃ lá dani [Yehowa, NW] gbi wulu ni yɔɔ nyam lɛ aaaba. Ni aaaba mli akɛ mɔ fɛɛ mɔ ni aaabo atsɛ́ [Yehowa, NW] gbɛi lɛ, aaahere eyiwala.’ ” (Bɔfoi lɛ Asaji 2:17-21) Anaa wiemɔi ni Petro tsɛ́ yisɛɛ nɛɛ yɛ Yoel 3:1-5, ni amɛ mlibaa tsɔɔ akɛ be miitã kɛha Yudafoi amaŋ lɛ. “[Yehowa, NW] gbi wulu ni yɔɔ nyam,” ni ji akɔntaabuu be kɛha Israel ni yeee anɔkwale lɛ ebɛŋkɛ. Shi namɔ yiwala abaahere loo yi baaná wala? Ni mɛni he mfoniri enɛ fee?
Gbalɛ Mlibaai Enyɔ
4, 5. Yɛ nibii ni baa lɛ ahewɔ lɛ, mɛɛ ŋaawoo Petro kɛha, ni mɛni hewɔ anyɛɔ akɛ ŋaawoo lɛ tsuɔ nii kɛtekeɔ egbii lɛ?
4 Nyɔŋmɔ mumɔŋ Israel shwere yɛ afii ni nyiɛ afi 33 Ŋ.B. sɛɛ lɛ amli, shi heloonaa Israel maŋ lɛ shwereee. Yɛ afi 66 Ŋ.B. lɛ, heloonaa Israel fã ta eshi Roma. Yɛ afi 70 Ŋ.B. lɛ, Israel hiɛ kpata, ni ashã Yerusalem kɛ esɔlemɔtsu lɛ fɛɛ butuu. Petro kɛ ŋaawoo fɛfɛo hã yɛ nakai amanehulu ni baa lɛ hewɔ, yɛ Pentekoste afi 33 Ŋ.B. Beni etsɛɔ Yoel wiemɔi asɛɛ ekoŋŋ lɛ, ewie akɛ: “Mɔ fɛɛ mɔ ni aaabo atsɛ́ [Yehowa, NW] gbɛi lɛ, aaahere eyiwala.” Esa akɛ Yudanyo fɛɛ Yudanyo diɛŋtsɛ akpɛ eyiŋ akɛ ebaatsɛ Yehowa gbɛi lɛ. Nɔ ni fata enɛ he ji gbɛtsɔɔmɔi ni Petro tee nɔ ekɛha lɛ toiboo akɛ: “Nyɛtsakea nyɛtsuii amli ni nyɛteŋ mɔ fɛɛ mɔ aha abaptisi lɛ awo Yesu Kristo gbɛi amli, koni aŋɔ nyɛhe eshai lɛ afa nyɛ.” (Bɔfoi lɛ Asaji 2:38) Esa akɛ Petro toibolɔi lɛ akpɛlɛ Yesu nɔ akɛ Mesia, mɔ ni ákɛ maŋ lɛ, Israel ekpoo lɛ lɛ.
5 Nakai Yoel gbalɛ wiemɔi lɛ ná hewalɛ kpele yɛ heshibalɔi anɔ yɛ klɛŋklɛŋ afii oha lɛ mli. Shi kɛlɛ, amɛnáa mɛi anɔ hewalɛ ni da fe nakai ŋmɛnɛ ejaakɛ taakɛ nibii ni yaa nɔ yɛ afii ohai 20 nɛɛ mli lɛ tsɔɔ lɛ, Yoel gbalɛ lɛ ená emlibaa ni ji enyɔ. Nyɛhaa wɔkwɛa bɔ ni eba lɛ eha.
6. Mɛi ni ji Nyɔŋmɔ Israel lɛ bɔi kpojee faŋŋ beni afi 1914 bɛŋkɛɔ lɛ yɛ mɛɛ gbɛ nɔ?
6 Yɛ bɔfoi lɛ agbele sɛɛ lɛ, jwɛi ni ji amale Kristojamɔ baha Nyɔŋmɔ Israel nɔ. Shi mɛi ni nɛkɛ mumɔŋ maŋ nɛɛ ji lɛ bafee faŋŋ shikome ekoŋŋ, yɛ naagbee be lɛ ni je shishi yɛ afi 1914 lɛ mli. Enɛɛmɛi fɛɛ fee Yesu abɛbua ni kɔɔ ŋmãa lɛ kɛ jwɛi lɛ ahe lɛ mlibaa. (Mateo 13:24-30, 36-43) Beni afi 1914 bɛŋkɛɔ lɛ, Kristofoi ni afɔ amɛ mu lɛ bɔi amɛhe tsimɔ kɛmiijɛ Kristendom ni yeee anɔkwa lɛ he, ni amɛkɛ ekãa kpoo epasa tsɔɔmɔi lɛ ni amɛshiɛ “jeŋmaji abe lɛ” naagbee ni baa lɛ amɛtsɔɔ. (Luka 21:24) Shi klɛŋklɛŋ jeŋ ta lɛ, ni fɛ́ yɛ afi 1914 lɛ tée saji komɛi ni amɛfeko klalo yɛ he lɛ ashi. Mɛi pii gbɔjɔ amɛnitsumɔ mli yɛ nɔnyɛɛ babaoo ni akɛba amɛnɔ lɛ hewɔ, ni mɛi komɛi ŋmɛɛ saji ahe ni akɛsaa. Beni shɛɔ afi 1918 lɛ, no mli lɛ amɛ shiɛmɔ nitsumɔ lɛ sɛɛ efo kwraa.
7. (a) Mɛɛ nifeemɔ ko ni tamɔ Pentekoste afi 33 Ŋ.B. ba yɛ afi 1919? (b) Kɛjɛ afi 1919 kɛbaa lɛ, mɛɛ hewalɛ Nyɔŋmɔ mumɔ lɛ fɔsemɔ ená yɛ Yehowa tsuji anɔ?
7 Shi kɛlɛ, no sɛɛ etsɛɛɛ tsɔ̃. Kɛjɛ afi 1919 kɛbaa lɛ, Yehowa je shishi ni efɔse emumɔ lɛ eshwie ewebii anɔ yɛ gbɛ ni hã akai Pentekoste afi 33 Ŋ.B. lɛ nɔ. Shi kɛlɛ, yɛ afi 1919 mli lɛ, awieee lilɛii sɔrɔtoi ni ahum hu etswaaa. Wɔnuɔ shishi kɛjɛɔ Paulo wiemɔi ni yɔɔ 1 Korintobii 13:8 lɛ akɛ be ni akɛfeɔ naakpɛɛ nii lɛ eho etee jeeŋmɔ. Shi Nyɔŋmɔ mumɔ lɛ je kpo faŋŋ yɛ afi 1919 beni asaa awo Kristofoi anɔkwafoi lɛ hewalɛ ekoŋŋ yɛ kpee wulu ni afee yɛ Cedar Point, Ohio, U.S.A. lɛ shishi, ní amɛbɔi Maŋtsɛyeli lɛ he sanekpakpa shiɛmɔ nitsumɔ lɛ ekoŋŋ lɛ. Yɛ afi 1922 mli lɛ, amɛku amɛsɛɛ kɛtee Cedar Point ekoŋŋ, ni akɛ hewalɛwoo wiemɔ nɛɛ waje amɛ akɛ “Nyɛtswaa, nyɛtswaa, nyɛtswaa Maŋtsɛ lɛ kɛ emaŋtsɛyeli lɛ he adafi.” Taakɛ eba yɛ klɛŋklɛŋ afii oha lɛ mli lɛ, anyɛ je lɛ nɔ ni eyɔse nɔ ni jɛ Nyɔŋmɔ mumɔ lɛ fɔsemɔ mli kɛba lɛ. Kristofonyo fɛɛ Kristofonyo ni ejɔɔ ehe nɔ—hii kɛ yei, onukpai kɛ gbekɛbii fɛɛ—bɔi ‘gbaa’ ni tsɔɔ akɛ, amɛjaje “Nyɔŋmɔ niwuji lɛ” amɛtsɔɔ. (Bɔfoi lɛ Asaji 2:11) Taakɛ Petro fee lɛ, amɛwo heshibalɔi lɛ ŋaa akɛ: “Nyɛhaa aherea nyɛyiwala kɛjɛa yinɔ kɔ̃ɔdɔ̃ŋ nɛɛ mli.” (Bɔfoi lɛ Asaji 2:40) Mɛɛ gbɛ nɔ mɛi ni baabo toi lɛ baatsɔ amɛfee nakai? Kɛtsɔ Yoel wiemɔi ni anaa yɛ Yoel 3:5 lɛ toiboo nɔ, akɛ: “Mɔ fɛɛ mɔ ni aaatsɛ Yehowa gbɛi anɔ lɛ, aaahere eyiwala.”
8. Te nibii etee nɔ eha Nyɔŋmɔ Israel kɛjɛ afi 1919 kɛbaa nɛɛ tɛŋŋ?
8 Kɛjɛ nakai shishijee afii lɛ amli kɛbaa nɛɛ, Nyɔŋmɔ Israel lɛ nitsumɔ etee hiɛ waa. Etamɔ nɔ ni mɛi ni afɔ amɛ mu lɛ anaabuamɔ lɛ eyashɛ shɔŋŋ, ni kɛjɛ 1930 afii lɛ amli kɛbaa nɛɛ, heshibalɔi asafo babaoo ni yɔɔ shikpɔŋ nɔ hiɛnɔkamɔ hu eje kpo faŋŋ. (Kpojiemɔ 7:3, 9) Amɛ fɛɛ amɛnáa oyaiyeli henumɔ ko, ejaakɛ Yoel 3:1, 2 lɛ mlibaa ni ji enyɔ lɛ tsɔɔ akɛ wɔbɛŋkɛ Yehowa gbi ni yɔɔ gbeyei waa, beni abaakpata jeŋ muu fɛɛ jamɔ, maŋkwramɔ, kɛ jarayeli nibii agbɛjianɔtoo ko hiɛ lɛ he kpaakpa diɛŋtsɛ. Wɔyɛ yiŋtoo kpakpa diɛŋtsɛ ni wɔɔdamɔ nɔ ‘wɔtsɛ Yehowa gbɛi lɛ’ kɛ hemɔkɛyeli ni eye emuu kɛmɔ shi akɛ ebaahere wɔyiwala!
Mɛɛ Gbɛ nɔ Wɔɔtsɔ Wɔtsɛ Yehowa Gbɛi Lɛ?
9. Mɛni ji nibii ni fata Yehowa gbɛi lɛ ni aaatsɛ lɛ he lɛ ekomɛi?
9 Mɛni abiɔ yɛ Yehowa gbɛi lɛ tsɛmɔ mli? Yoel 3:1, 2 lɛ mli sane lɛ yeɔ ebuaa wɔ ni wɔhaa nakai sanebimɔ lɛ hetoo. Ákɛ nɔkwɛmɔnɔ lɛ, Yehowa booo mɔ fɛɛ mɔ ni tsɛɔ lɛ lɛ toi. Yehowa tsɔ egbalɔ kroko, ni ji Yesaia nɔ ekɛɛ Israel akɛ: “Kɛ́ nyɛgbɛ nyɛniji amli lɛ, maŋɔ mihiɛ matee nyɛ; ni kɛ́ nyɛsɔle babaoo tete lɛ, miboŋ nyɛ toi.” Mɛni hewɔ Yehowa sumɔɔɔ ni eboɔ lɛ diɛŋtsɛ emaŋ lɛ toi lɛ? Lɛ diɛŋtsɛ etsɔɔ nɔ hewɔ akɛ: “Nyɛniji ahe eyimɔ kɛ lá!” (Yesaia 1:15) Yehowa boŋ mɛi ni eye lá yi sɔ̃ loo amɛfeɔ esha lɛ toi kɔkɔɔkɔ. No hewɔ ni Petro kɛɛ Yudafoi lɛ yɛ Pentekoste akɛ amɛtsake amɛtsui lɛ. Wɔnaa yɛ Yoel 3:1, 2 lɛ mli sane lɛ mli akɛ Yoel hu mãa tsuitsakemɔ nɔ mi. Ákɛ nɔkwɛmɔnɔ lɛ, wɔkaneɔ yɛ Yoel 2:12, 13 lɛ akɛ: “Kɛlɛ agbɛnɛ hu Yehowa kɛɛ: ‘Nyɛkpalea kɛbaa miŋɔɔ kɛ nyɛtsui muu lɛ fɛɛ, yɛ ŋmãahilɛ kɛ yaafo kɛ ŋkɔmɔyeli mli! Ni nyɛtserɛa nyɛtsui, shi jeee nyɛtadei, ni nyɛkpalea kɛbaa Yehowa, nyɛ-Nyɔŋmɔ lɛ, ŋɔɔ! shi durolɔ kɛ mlitsɔlɔ ji lɛ, emli fuuu mra, ni emɔbɔnalɛ fá.’ ” Kɛjɛ afi 1919 kɛbaa lɛ, Kristofoi ni afɔ amɛ mu lɛ efee amɛnii yɛ wiemɔi nɛɛ kɛ gbeekpamɔ naa. Amɛtsake amɛtsuii yɛ nibii ni amɛnyɛɛɛ amɛfee lɛ ahewɔ, ni amɛtswa amɛfai shi akɛ amɛŋmɛɛŋ saji ahe ni amɛkɛsaa, ni amɛgbɔjɔŋ amɛnitsumɔ lɛ hu mli dɔŋŋ. Enɛ gbele gbɛ kɛha Nyɔŋmɔ mumɔ lɛ fɔsemɔ. Esa akɛ aŋkroaŋkroi fɛɛ ni miisumɔ ni amɛtsɛ Yehowa gbɛi lɛ ni ebo amɛ toi lɛ anyiɛ nakai gbɛ lɛ nɔŋŋ nɔ.
10. (a) Mɛni ji anɔkwa tsuitsakemɔ? (b) Te Yehowa hereɔ anɔkwa tsuitsakemɔ nɔ ehaa tɛŋŋ?
10 Kaimɔ akɛ, anɔkwa tsuitsakemɔ tsɔɔ babaoo fe kɛɛmɔ ni aaakɛɛ kɛkɛ akɛ, “Edɔ mi waa.” Israelbii lɛ fɔɔ amɛ kponɔgbɛ atadei lɛ tserɛmɔ ni amɛkɛtsɔɔ bɔ ni amɛhenumɔi amli wa hã. Shi Yehowa kɛɔ akɛ: “Nyɛtserɛa nyɛtsui, shi jeee nyɛtadei.” Anɔkwa tsuitsakemɔ baa kɛjɛɔ tsui mli, kɛjɛɔ wɔ gbɔmɔtso lɛ mligbɛ tɔ̃ɔ. Nɔ ni fata no he ji efɔŋfeemɔ ní wɔɔkpoo, taakɛ wɔkaneɔ yɛ Yesaia 55:7 lɛ akɛ: “Hã ni mɔ fɔŋ akwa egbɛ̀i lɛ, ni nɔshafeelɔ akwa ejwɛŋmɔi lɛ, ni eku esɛɛ kɛba Yehowa ŋɔɔ.” Etsɔɔ nyɛ̃ɛ ni aaanyɛ̃ esha, taakɛ Yesu fee lɛ. (Hebribii 1:9) No sɛɛ lɛ, wɔkɛ wɔhe fɔ̃ɔ Yehowa nɔ akɛ ebaadamɔ kpɔmɔ afɔleshaa lɛ nɔ ekɛ wɔhe ake wɔ, ejaakɛ Yehowa lɛ, “durolɔ kɛ mlitsɔlɔ ji lɛ, emli fuuu mra, ni emɔbɔnalɛ fá.” Ebaakpɛlɛ wɔ jamɔ, ni ji wɔ mumɔŋ niyenii afɔle kɛ ŋmãa afɔle lɛ nɔ. Kɛ́ wɔtsɛ egbɛi lɛ, ebaabo wɔ toi.—Yoel 2:14.
11. Mɛɛ gbɛhe esa akɛ anɔkwa jamɔ aná yɛ wɔshihilɛ mli?
11 Yesu hã wɔ nɔ kroko hu yɛ Gɔŋ nɔ Shiɛmɔ lɛ mli ni esa akɛ wɔha ehi wɔjwɛŋmɔ mli, beni ewie akɛ: “Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu.” (Mateo 6:33) Esaaa akɛ wɔbuɔ wɔ jamɔ lɛ akɛ nɔ ko ni he ehiaaa, nɔ ko ni wɔtsuɔ he nii yɛ gbɛ bibioo pɛ nɔ ákɛ nɔ ni wɔkɛtsĩɔ wɔ henilee naa koni ekakojo wɔ. Nyɔŋmɔ sɔɔmɔ sa klɛŋklɛŋ gbɛhe yɛ wɔshihilɛ mli. Enɛ hewɔ lɛ, Yehowa tee nɔ ewie kɛtsɔ Yoel nɔ akɛ: “Nyɛkpãa tɛtɛrɛmantɛrɛ yɛ Zion! . . . Nyɛbuaa maŋ lɛ naa, nyɛfea asafo lɛ krɔŋkrɔŋ, nyɛkpeea onukpai kɛbakpea, nyɛbuaa gbekɛbii kɛ mɛi ni yeɔ fufɔ lɛ anaa! ayemforo wu aje kpo kɛjɛ esɛɛtsuŋ, ni ayemforo hu ajɛ epiaŋ aje kpo!” (Yoel 2:15, 16) Eji nɔ ni fɔɔ kaa akɛ mɛi heei ni ebote gbalashihilɛ mli lɛ gbalaa amɛjwɛŋmɔ kɛyaa amɛhe nɔ, ni mɔ nɛ kwɛɔ mɔ nɛ pɛ. Shi yɛ amɛ gbɛfaŋ po lɛ, esa akɛ Yehowa sɔɔmɔ aba klɛŋklɛŋ. Esaaa akɛ nɔ kroko kwraa yeɔ klɛŋklɛŋ gbɛhe yɛ wɔhe naa ni wɔɔbua yɛ jamɔ mli kɛha wɔ Nyɔŋmɔ lɛ, kɛ egbɛi ni wɔɔtsɛ lɛ hiɛ.
12. Mɛɛ hegbɛ kɛha shweremɔ anaa yɛ Kaimɔ lɛ he amaniɛbɔɔ kɛha nyɛsɛɛ afi lɛ mli?
12 Beni enɛ yɔɔ wɔjwɛŋmɔ mli lɛ, nyɛhaa wɔsusua yibɔ ko ni afi 1997 Yehowa Odasefoi Ajeŋ Fɛɛ Sɔɔmɔ Afi Akɔntaabuu lɛ jie lɛ kpo lɛ he wɔkwɛa. Nyɛsɛɛ afi lɛ, wɔná yifalɛ ni fe fɛɛ, ni ji Maŋtsɛyeli shiɛlɔi 5,599,931—ni ji yijielɔi asafo babaoo diɛŋtsɛ! Mɛi ni ba Kaimɔ lɛ shishi lɛ ayifalɛ ji 14,322,226—ni fa fe shiɛlɔi ayibɔ lɛ kɛ mɛi aaashɛ akpekpei kpaanyɔ kɛ fã. Yibɔ nɛɛ tsɔɔ hegbɛ babaoo ni yɔɔ kɛha shweremɔ. Gbɔmɛi akpekpei kpaanyɔ kɛ fã nɛɛ ateŋ mɛi babaoo kɛ Yehowa Odasefoi miikase Biblia lɛ momo, ákɛ mɛi ni yɔɔ wiemɔ lɛ he miishɛɛ loo gbekɛbii ni abaptisi amɛfɔlɔi. Amɛteŋ mɛi pii yɛ ni no ji klɛŋklɛŋ kwraa ni amɛyaa kpee. Jɛmɛ ni amɛba lɛ ha Yehowa Odasefoi ná hegbɛ fɛfɛo ni amɛkɛaale amɛ jogbaŋŋ, koni amɛkɛ amɛhe ahã ni amɛye amɛbua amɛ ni amɛya hiɛ babaoo. Agbɛnɛ, mɛi komɛi hu yɛ ni baa Kaimɔ lɛ shishi daa afi, ni ekolɛ amɛbaa kpeei krokomɛi fioo hu amɛfataa he, shi amɛyaaa hiɛ. Eji anɔkwale akɛ, wɔkɛ miishɛɛ miihere gbɔmɛi nɛɛ atuu ni amɛkɛ wɔ aya kpee. Shi wɔmiiwo amɛ hewalɛ ni amɛjwɛŋ Yoel gbalɛ wiemɔi lɛ ahe jogbaŋŋ, ni amɛsusu nibii krokomɛi ni esa akɛ amɛfee kɛfata he lɛ ahe, koni amɛná nɔmimaa akɛ kɛ́ amɛtsɛ́ Yehowa gbɛi lɛ, ebaabo amɛ toi.
13. Kɛ́ wɔmiitsɛ Yehowa gbɛi lɛ momo lɛ, mɛɛ gbɛnaa nii kã wɔ nɔ yɛ mɛi krokomɛi agbɛfaŋ?
13 Bɔfo Paulo mã Nyɔŋmɔ gbɛi lɛ tsɛmɔ lɛ fã kroko hu nɔ mi. Yɛ wolo ni eŋma eyaha Romabii lɛ mli lɛ, etsɛ́ Yoel gbalɛ wiemɔi lɛ asɛɛ akɛ: “Mɔ fɛɛ mɔ ni aaabo atsɛ́ [Yehowa, NW] gbɛi lɛ, aaahere eyiwala.” Kɛkɛ ni esusu saji ahe akɛ: “Te aaafee tɛŋŋ ni amɛaabo amɛtsɛ́ mɔ ni amɛheko lɛ amɛyeko lɛ? ni te aaafee tɛŋŋ ni amɛaahe mɔ ni amɛnuko ehe sane lɛ amɛyeŋ? ni asaŋ te aaafee tɛŋŋ ni amɛaanu kɛ́ shiɛlɔ ko bɛ lɛ?” (Romabii 10:13, 14) Hɛɛ, ehe miihia ni mɛi krokomɛi ni amɛbaleko Yehowa kɛbashi amrɔ nɛɛ lɛ atsɛ́ egbɛi lɛ. Gbɛnaa nii kã mɛi ni le Yehowa momo lɛ anɔ, jeee ni amɛshiɛ pɛ kɛkɛ, shi moŋ ni amɛya ni amɛkɛ nakai yelikɛbuamɔ lɛ ayahã amɛ.
Mumɔŋ Paradeiso
14, 15. Mɛɛ paradeiso mli jɔɔmɔi Yehowa webii náa mli ŋɔɔmɔ akɛni amɛtsɛɔ egbɛi lɛ yɛ gbɛ ni saa ehiɛ nɔ lɛ hewɔ?
14 Nakai ji bɔ ni mɛi ni afɔ amɛ mu lɛ kɛ tooi krokomɛi lɛ fɛɛ susuɔ saji ahe, ni no hewɔ lɛ, Yehowa jɔɔ amɛ. “Yehowa aaaye eshikpɔŋ lɛ he awuŋa, ni eeena emaŋ lɛ mɔbɔ.” (Yoel 2:18) Yɛ afi 1919 mli lɛ, Yehowa jie ekãa kɛ musuŋtsɔlɛ kpo etsɔɔ emaŋ lɛ beni esaa ekɛ amɛ ba ekoŋŋ, ní ekɛ amɛ ba enɔyelihe ni ji mumɔŋ nitsumɔ mli lɛ. Mumɔŋ paradeiso nɛ lɛɛlɛŋ, ni Yoel tsɔɔ mli jogbaŋŋ yɛ wiemɔi nɛɛ amli akɛ: “Kaashe gbeyei, shikpɔŋ! omli afilio ni onyã; ejaakɛ Yehowa efee nibii wuji! Nyɛkashea gbeyei, nyɛ ŋaŋ kooloi! shi ŋa nɔ jwɛfɔ́ lɛ miifrɔke, shi tsei miiwo amɛyibii, ni agbamitso kɛ weintso hu miijie amɛmli hewalɛ lɛ miihã! Ni nyɛ, Zionbii, nyɛmli afilia nyɛ ni nyɛnyãa yɛ Yehowa, nyɛ-Naanyɔŋmɔ lɛ, mli! ejaakɛ eha nyɛ tsɔɔlɔ ni kɛ nyɛ yaa jalɛ mli, ni eha gbo kɛ agbiɛnaa enɛ eha nyɛ yɛ klɛŋklɛŋ nyɔŋ lɛ nɔ. Ni ŋmãagbeemɔhei lɛ aaayimɔ obɔ̃bɔ̃ kɛ ŋmãa, ni bui lɛ aaaho kɛ wein kɛ mu.”—Yoel 2:21-24.
15 Mɛɛ mfoniri ni yɔɔ fɛo waa nɛ! Abaahã yeli nibii etɛ ni he hiaa fe fɛɛ kɛha shihilɛ yɛ Israel—ŋmãa, mu, kɛ wein—aba babaoo diɛŋtsɛ, kɛ kooloi babaoo hu. Nakai gbalɛ wiemɔ lɛ miiba mli yɛ mumɔŋ gbɛ nɔ, yɛ wɔ gbii nɛɛ amli. Yehowa hãa wɔ mumɔŋ niyenii ni he hiaa wɔ lɛ fɛɛ. Ani wɔ fɛɛ wɔmli efiliii wɔ yɛ nibii babaoo ni Nyɔŋmɔ kɛhaa wɔ nɛɛ he? Lɛɛlɛŋ, taakɛ Maleaki gba efɔ̃ shi lɛ, wɔ-Nyɔŋmɔ lɛ ‘egbele ŋwɛi samfɛji lɛ anaa, ni efɔse jɔɔmɔ eshwie wɔnɔ aahu ni eteke nɔ.’—Maleaki 3:10.
Nibii Agbɛjianɔtoo ko Naagbee
16. (a) Mɛni Yehowa mumɔ lɛ fɔsemɔ tsɔɔ kɛhaa wɔbe nɛɛ? (b) Mɛni baaba wɔsɛɛ?
16 Beni egba paradeiso shihilɛ ni Nyɔŋmɔ webii yɔɔ mli lɛ efɔ̃ shi lɛ sɛɛ ni Yoel gba Yehowa mumɔ lɛ fɔsemɔ lɛ hu efɔ̃ shi. Beni Petro tsɛ́ gbalɛ nɛɛ sɛɛ yɛ Pentekoste lɛ, ewie akɛ eba mli “yɛ naagbee gbii lɛ anɔ.” (Bɔfoi lɛ Asaji 2:17) Nyɔŋmɔ mumɔ lɛ ni afɔse ashwie shi yɛ nakai beaŋ lɛ tsɔɔ akɛ Yudafoi anibii agbɛjianɔtoo lɛ naagbee gbii lɛ eje shishi. Nyɔŋmɔ mumɔ lɛ ni afɔse ashwie Nyɔŋmɔ Israel nɔ yɛ afii ohai 20 nɛɛ mli lɛ tsɔɔ akɛ wɔyɛ jeŋ muu fɛɛ nibii agbɛjianɔtoo lɛ naagbee gbii lɛ amli. Yɛ enɛ hewɔ lɛ, mɛni ji nɔ ni baaba wɔsɛɛ? Yoel gbalɛ lɛ yaa nɔ ekɛɔ wɔ akɛ: “Mahã ana naakpɛɛ nii yɛ ŋwɛi kɛ shikpɔŋ lɛ nɔ: lá kɛ la kɛ lasu kutuu. Hulu aaatsɔ duŋ, ni nyɔɔŋtsere aaatsɔ lá, dani Yehowa gbi wulu ni he yɔɔ gbeyei lɛ aaaba.”—Joel 3:3, 4.
17, 18. (a) Mɛɛ Yehowa gbi ni he yɔɔ gbeyei ba Yerusalem nɔ? (b) Bɔ ni nɔmimaa yɔɔ Yehowa gbi ni he yɔɔ gbeyei ni baaba wɔsɛɛ lɛ he lɛ tsirɛɔ wɔ ni wɔfeɔ mɛni?
17 Yɛ afi 66 Ŋ.B. lɛ, nɛkɛ gbalɛ mli wiemɔi nɛɛ bɔi mlibaa yɛ Yudea beni nibii ní anyɛɛɛ naa atsĩ nɛɛ baa, kɛbɛŋkɛɔ Yehowa gbi wulu ni he yɔɔ gbeyei lɛ naagbee kwraa yɛ afi 70 Ŋ.B. lɛ. Kwɛ bɔ ni eeefee gbeyei yɛ nakai beaŋ akɛ mɔ ko aaafata mɛi ni wooo Yehowa gbɛi lɛ hiɛ nyam lɛ ahe! Ŋmɛnɛ, nibii ni yɔɔ gbeyei tamɔ nakai nɔŋŋ jwere wɔhiɛ, beni Yehowa baakpata nɛkɛ jeŋ nibii agbɛjianɔtoo muu nɛɛ hiɛ kwraa lɛ. Shi kɛlɛ, abaanyɛ aye he kɛjɛ mli. Gbalɛ lɛ yaa nɔ ekɛɔ akɛ: “Aaaba mli akɛ mɔ fɛɛ mɔ ni aaatsɛ Yehowa gbɛi anɔ lɛ, aaahere eyiwala; shi Zion gɔŋ lɛ nɔ kɛ Yerusalem lɛ, yiwalaheremɔ aaahi jɛi, bɔ ni Yehowa kɛɛ lɛ, ni mɛi ni Yehowa tsɛɔ lɛ aaahi mɛi ni eje mli lɛ ateŋ.” (Yoel 3:5) Yehowa Odasefoi miida shi waa diɛŋtsɛ akɛ amɛle Yehowa gbɛi lɛ, ni amɛyɛ hekɛnɔfɔɔ kɛmɔ shi akɛ, kɛ́ amɛtsɛ́ egbɛi lɛ, ebaahere amɛyiwala.
18 Shi, mɛni baaba kɛji Yehowa gbi kpeteŋkpele ni yɔɔ gbeyei lɛ ba je nɛɛ nɔ yɛ emlifu ni naa wa lɛ mli? Abaasusu no he yɛ naagbee nikasemɔ lɛ mli.
Ani Okaiɔ?
◻ Mɛɛ be Yehowa fɔse emumɔ lɛ eshwie ewebii lɛ anɔ klɛŋklɛŋ?
◻ Mɛni ji nibii ni kɔɔ Yehowa gbɛi lɛ tsɛmɔ he lɛ ekomɛi?
◻ Mɛɛ be Yehowa gbi kpeteŋkpele ni he yɔɔ gbeyei lɛ ba heloonaa Israel nɔ?
◻ Yehowa jɔ́ɔ mɛi ni tsɛɔ egbɛi lɛ ŋmɛnɛ lɛ yɛ mɛɛ gbɛ nɔ?
[Mfoniri ni yɔɔ baafa 15]
Afɔ́ jeŋmaŋ hee yɛ Pentekoste afi 33 Ŋ.B.
[Mfoniri ni yɔɔ baafa 16, 17]
Yɛ afii oha nɛɛ shishijee gbɛ lɛ, Yehowa fɔse emumɔ lɛ eshwie ewebii anɔ ni eha Yoel 3:1, 2 lɛ ba mli
[Mfoniri ni yɔɔ baafa 18]
Esa akɛ aye abua gbɔmɛi ni amɛtsɛ́ Yehowa gbɛi lɛ