“Nyɔŋmɔ Shihilɛ Gbɛ” 1998-1999 Kpee lɛ Ebɛŋkɛ!

AATO kpeei ohai abɔ he gbɛjianɔ kɛjɛ May 1998 kɛyashi January 1999 yɛ jeŋ fɛɛ. Eka shi faŋŋ akɛ abaafee gbii etɛ henaabuamɔ—kɛjɛ Sohaa kɛyashi Hɔgbaa—nɛɛ ateŋ ekome yɛ maŋtiase ni kɛ oshia jɛkɛɛɛ mli. Yɛ hei pii lɛ akɛ lala baaje gbɛjianɔtoo lɛ shishi leebi 9:30 yɛ gbi lɛ eko fɛɛ eko nɔ.

Sohaa leebi gbɛjianɔtoo lɛ kɛ amaniɛbɔi ni kɔɔ bɔ ni Maŋtsɛyeli shiɛmɔ nitsumɔ lɛ yaa nɔ ehaa yɛ je lɛŋ hei sɔrɔtoi amli lɛ ahe saji otii lɛ baaha. Ni abaama kpee lɛ saneyitso lɛ nɔ mi yɛ wiemɔ krɛdɛɛ ni ji “Kristo Kpɔmɔ Nɔ Lɛ—Nyɔŋmɔ Gbɛ Kɛha Yiwalaheremɔ” lɛ nɔ mi.

Shwane mli lɛ, wiemɔi ni tsara nɔ, ni ji “Fɔlɔi—Nyɛjwɛŋa Nyɔŋmɔ Gbɛ̀i lɛ Anɔ Nyɛtsɔɔa Nyɛbii” lɛ kɛ ŋaawoi ni kɔɔ bɔni aaafee akanya gbekɛbii koni amɛsumɔ Yehowa ni amɛsɔmɔ lɛ lɛ baaha. Shwane gbɛjianɔtoo lɛ baaba naagbee kɛ wiemɔ ni ji, “Ani Wala yɛ Gbele Sɛɛ?”

Yɛ Hɔɔ leebi gbɛjianɔtoo lɛ mli lɛ, abaawie Yehowa Odasefoi akaselɔ-feemɔ nitsumɔ lɛ he, ni abaatsu he nii yɛ fãi sɔrɔtoi etɛ mli, “Ní Aaaye Abua Gbɔmɛi Koni Amɛnyiɛ Gbɛ Kɛha Wala lɛ Nɔ,” “Gbɔmɛi ni Nine Aaashɛ Amɛnɔ lɛ He Kaa,” kɛ “Ní Aaatsɔɔ Kaselɔi lɛ Nibii Fɛɛ ni Kristo Ewo He Kita Lɛ.” Kɛ agbe leebi gbɛjianɔtoo lɛ naa lɛ, abaato gbɛjianɔ koni abaptisi kaselɔi heei.

Wiemɔ ni ji “Shihilɛ ni Bɛ Naagbee ni Aaahi Jwɛŋmɔ Mli Kɛsɔmɔ,” ni akɛbaaje Hɔɔ shwane gbɛjianɔtoo lɛ shishi lɛ baawo sɔlemɔ ni wɔkɛaasusu yiŋtoo ni wɔ diɛŋtsɛ wɔyɔɔ hewɔ ni wɔsɔmɔɔ Nyɔŋmɔ lɛ mli hewalɛ. Wiemɔi ni ji, “Hiɛsɔɔ ni Aaaná Aha ‘Nikeenii yɛ Gbɔmɛi Amli’ ni Tsɔɔ Nyɔŋmɔ Gbɛ He Nii Lɛ” kɛ “Jeŋba—Jiemɔ Emomo lɛ ni Owo Ehee Lɛ” kɛ nilee ni yɔɔ Efesobii yitso 4 lɛ mli kuku fɛɛ kuku baaha. No sɛɛ lɛ, akɛ Ŋmalɛ naa ŋaawoo baaha yɛ wiemɔ ni ji “Nyɛhia Shi Akɛ Mɛi ni Je Lɛŋ Muji ko Bɛ Nyɛhe” kɛ agbɛnɛ hu, yɛ wiemɔi etɛ ni tsara nɔ ni yitso ji “Obalahii kɛ Obalayei—Nyɛnyiɛa Nyɔŋmɔ Gbɛ lɛ Nɔ” lɛ amli. Wiemɔ ni ji “Bɔlɔ Lɛ—Esu kɛ Egbɛi Lɛ,” kɛ shwane gbɛjianɔtoo lɛ baaba naagbee.

Yɛ Hɔgbaa leebi gbɛjianɔtoo lɛ mli lɛ, akɛ wiemɔi etɛ ni tsara nɔ, ni baasusu naagbee yitsei ni yɔɔ Biblia wolo ni ji Ezekiel lɛ mli lɛ ahe, kɛ amɛ gbalɛ mlibaa baaha. Akɛ Hebri obalahii etɛ lɛ anɔkwayeli lɛ he drama ni awo amɛbeaŋ atadei kɛmiifee baamu leebi gbɛjianɔtoo lɛ naa. Maŋshiɛmɔ ni ji, “Gbɛ Kome Pɛ ni Kɛ Mɔ Yaa Naanɔ Wala Mli” lɛ ji shwane kpee lɛ mli sane oti.

Yɛ anɔkwale mli lɛ, obaaya hiɛ yɛ mumɔŋ, kɛ otee gbii etɛ lɛ fɛɛ. Aakpee bo kɛ miishɛɛ kɛmiiba emli nifeemɔi lɛ fɛɛ shishi, ni yɛ anɔkwale mli lɛ, abiŋ bo ni owo eko kwraa he nyɔmɔ. Yaana Yehowa Odasefoi a-Maŋtsɛyeli Asa ni yɔɔ he ni oyɔɔ lɛ, aloo ŋmaa kɛmaje wolo tɛtrɛɛ nɛɛ feelɔi lɛ koni atsɔɔ bo he ni bɛŋkɛ oshia lɛ ni abaafee yɛ.