Bei kɛ Yinɔi yɛ Yehowa Dɛŋ
“Jeee nyɛhe sane ko ji akɛ nyɛaale bei loo yinɔi lɛ ni tsɛ lɛ eto yɛ lɛ diɛŋtsɛ ehewalɛ mli lɛ.”—BƆFOI LƐ ASAJI 1:7.
1. Te Yesu hã ebɔfoi lɛ asanebimɔi ni kɔɔ be he lɛ ahetoo eha tɛŋŋ?
MƐNI baanyɛ afee nɔ ni sa babaoo aha mɛi ni “dɔmɔɔ ŋtsɔi ni amɛyeɔ ŋkɔmɔ yɛ nihiinii fɛɛ ni afeɔ” yɛ Kristendom teŋ lɛ kɛ shikpɔŋ muu lɛ fɛɛ nɔ lɛ fe ni amɛaabi be mli ni gbɛjianɔtoo fɔŋ nɛɛ baaba naagbee ni akɛ Nyɔŋmɔ jalɛ jeŋ hee lɛ ato najiaŋ? (Ezekiel 9:4; 2 Petro 3:13) Yesu bɔfoi lɛ bi lɛ saji ni kɔɔ be he beni eshwɛ fioo ni ebaagbo lɛ, kɛ agbɛnɛ yɛ eshitee lɛ sɛɛ. (Mateo 24:3; Bɔfoi lɛ Asaji 1:6) Shi, yɛ hetoo-hamɔ mli lɛ, Yesu haaa amɛ nɔ ni amɛaadamɔ nɔ amɛbu bei. Eha amɛ okadi ni nibii pii yɔɔ mli yɛ sane lɛ ekome mli, ni yɛ ekroko lɛ mli lɛ ekɛɛ, ‘jeee amɛhe sane ko ji akɛ amɛle bei loo yinɔi ni Tsɛ lɛ eto yɛ ehewalɛ mli lɛ.’—Bɔfoi lɛ Asaji 1:7.
2. Mɛni hewɔ abaanyɛ awie akɛ Yesu leee be ni e-Tsɛ lɛ toɔ kɛhaa nibii ni baaba yɛ naagbee be lɛ mli lɛ be fɛɛ be lɛ?
2 Eyɛ mli akɛ Yesu ji Yehowa Bi koome moŋ, shi jeee be fɛɛ be lɛ diɛŋtsɛ lɛ eleɔ e-Tsɛ lɛ be kɛha nifeemɔi. Yɛ egbalɛ ni kɔɔ naagbee gbii lɛ ahe lɛ mli lɛ, Yesu kɛ heshibaa kpɛlɛ nɔ akɛ: “Shi no gbi lɛ kɛ no ŋmɛlɛtswaa lɛ mɔ ko mɔ ko leee he eko, bɔfoi ni yɔɔ ŋwɛi lɛ tete leee, [ni bi lɛ tete leee,] ja mitsɛ kome kɛkɛ.” (Mateo 24:36) Yesu miisumɔ ni eto etsui shi emɛ ni e-Tsɛ lɛ ajie be pɔtɛɛ ni akɛ hiɛkpãtãmɔ baaba nibii agbɛjianɔtoo fɔŋ nɛɛ nɔ lɛ kpo etsɔɔ lɛ.a
3. Mɛni wɔbaanyɛ wɔkase kɛjɛ sanebimɔi ni kɔɔ Nyɔŋmɔ yiŋtoo he lɛ ahetoo ni Yesu hãa lɛ mli?
3 Abaanyɛ ayɔse nibii enyɔ kɛjɛ gbɛ ni Yesu tsɔ nɔ eha sanebimɔi ni tsɔɔ be mli ni nibii ni kɔɔ Nyɔŋmɔ yiŋtoo he lɛ baaba mli aha lɛ ahetoo lɛ mli. Klɛŋklɛŋ lɛ, ákɛ Yehowa yɛ be ni eto; nɔ ni ji enyɔ lɛ, ákɛ lɛ ekome pɛ etoɔ be lɛ, ni etsuji lɛ nyɛŋ akpa gbɛ akɛ abaatsɔ hiɛ atswa amɛ ebei loo yinɔi lɛ ahe adafi pɔtɛɛ ko.
Yehowa Bei kɛ Yinɔi
4. Mɛni ji Hela wiemɔi ni atsɔɔ shishi akɛ “bei” kɛ “yinɔi” ni yɔɔ Bɔfoi lɛ Asaji 1:7 lɛ ashishinumɔ?
4 Mɛni ji “bei” kɛ “yinɔi” lɛ shishi? Be he wiemɔi srɔtoi enyɔ yɛ Yesu wiemɔi ni aŋmala yɛ Bɔfoi lɛ Asaji 1:7 lɛ mli. Hela wiemɔ ni atsɔɔ shishi akɛ “bei” lɛ shishinumɔ tsɔɔ “be yɛ esɛɛkɛlɛ mli,” be sɛɛkɛlɛ ko (kakadaŋŋ loo kuku). “Yinɔi” ji wiemɔ ko ni tsɔɔ be ni ato ama shi, yinɔ pɔtɛɛ ko, loo be ko, ni akɛ nibii komɛi ekadi lɛ. W. E. Vine wie nɛkɛ shishijee wiemɔi enyɔ nɛɛ ahe akɛ: “Yɛ Bɔfoi lɛ Asaji 1:7 lɛ, ‘Tsɛ lɛ eto be yɛ Lɛ diɛŋtsɛ ehewalɛ mli,’ bei (chronos), bei lɛ asɛɛkɛlɛmɔ, kɛ yinɔi (kairos) lɛ, bei ni akɛ nibii komɛi ni baa yɛ mli kadiɔ lɛ.”
5. Mɛɛ be Yehowa tswa E-yiŋtoo akɛ ebaakpata jeŋ ni ekpɔtɔ lɛ hiɛ lɛ he adafi etsɔɔ Noa, ni mɛɛ nitsumɔ ni bɔ he enyɔ Noa tsũ?
5 Dani Nu Afua lɛ aaaba lɛ, Nyɔŋmɔ to afii 120 be kɛha jeŋ ni ekpɔtɔ ni adesai kɛ bɔfoi atuatselɔi ni tsake amɛhe lɛ kɛba lɛ. (1 Mose 6:1-3) Noa ni sheɔ Nyɔŋmɔ gbeyei lɛ eye afii 480 yɛ nakai be lɛ mli. (1 Mose 7:6) Ebɛ bi ni ehi shi nakai afii 20 kroko. (1 Mose 5:32) Yɛ sɛɛ mli kwraa, beni Noa bihii lɛ edara ni amɛbote gbalashihilɛ mli lɛ sɛɛ dani Nyɔŋmɔ kɛɛ Noa E-yiŋtoo akɛ ebaajie efɔŋfeemɔ kɛjɛ shikpɔŋ lɛ nɔ. (1 Mose 6:9-13, 18) Yɛ no mli po lɛ, eyɛ mli ákɛ akɛ nitsumɔi ni bɔ he enyɔ ni ji adeka ni eeekpɛ kɛ shiɛmɔ ni eeeshiɛ eha eyinɔbii lɛ wo Noa dɛŋ moŋ, shi Yehowa ejieee ebe ni eto he gbɛjianɔ lɛ kpo etsɔɔɔ lɛ.—1 Mose 6:14; 2 Petro 2:5.
6. (a) Mɛɛ gbɛ nɔ Noa tsɔɔ yɛ akɛ eshĩ saji ni kɔɔ be he lɛ yɛ Yehowa dɛŋ? (b) Te wɔɔfee tɛŋŋ wɔnyiɛ Noa nɔkwɛmɔnɔ lɛ sɛɛ?
6 “Noa fee nakai; bɔ ni Nyɔŋmɔ fã lɛ lɛ, nakai pɛpɛɛpɛ efee”—afii nyɔŋmai abɔ—ekolɛ afii nyɔŋmai enumɔ. “Hemɔkɛyeli” Noa kɛfee nakai, ni eleee be pɔtɛɛ lɛ. (1 Mose 6:22; Hebribii 11:7) Yehowa haaa ele be pɔtɛɛ ni nibii baaba lɛ aahu kɛyashi beni eshwɛ otsi ni Nu Afua lɛ baaje shishi lɛ. (1 Mose 7:1-5) Noa hekɛnɔfɔ̃ɔ kɛ hemɔkɛyeli ni ma shi shiŋŋ ni eyɔɔ yɛ Yehowa mli lɛ ha enyɛ eshi bei ahe saji lɛ yɛ Nyɔŋmɔ dɛŋ. Ni kwɛ bɔ ni Noa baada shi aha beni enu Yehowa hebuu he yɛ Nu Afua lɛ mli kɛ sɛɛ mli beni efã kpo kɛjɛ adeka lɛ mli kɛba shikpɔŋ ni atsuu nɔ lɛ nɔ lɛ! Akɛni kpɔmɔ he hiɛnɔkamɔ ko ni tamɔ nakai yɔɔ hewɔ lɛ, ani esaaa akɛ wɔnáa hemɔkɛyeli ni tamɔ nɛkɛ yɛ Nyɔŋmɔ mli?
7, 8. (a) Te fee tɛŋŋ ni majimaji kɛ jeŋ hewalɛi ba shihilɛ mli? (b) Mɛɛ gbɛ nɔ Yehowa tsɔ̃ ‘eto bei ni eto gbɔmɛi ashihilɛhei ahusui’ yɛ?
7 Yɛ Nu Afua lɛ sɛɛ lɛ, Noa seshibii lɛ ateŋ mɛi pii kpoo Yehowa anɔkwa jamɔ lɛ. Akɛni oti ni ma amɛhiɛ ji ni amɛhi he kome hewɔ lɛ, amɛje maŋtiase ko kɛ mɔ̃ɔ ko kɛha apasa jamɔ tswaa shishi. Yehowa to eyiŋ akɛ be eshɛ ni esa akɛ ekɛ ehe awo mli. Efutu amɛwiemɔ lɛ ni ‘egbɛ amɛ eshwã kɛjɛ Babel kɛtee shikpɔŋ lɛ fɛɛ nɔ.’ (1 Mose 11:4, 8, 9) Yɛ sɛɛ mli lɛ, wiemɔ kui lɛ batsɔmɔ maji, ekomɛi ŋɔ maji krokomɛi ni amɛbatsɔmɔ kpokpaa nɔ hewalɛi, kɛ jeŋ hewalɛi po.—1 Mose 10:32.
8 Yɛ eyiŋtoo he nitsumɔ kɛ gbeekpamɔ naa lɛ, yɛ bei komɛi amli lɛ Nyɔŋmɔ tsɔɔ maŋ husui, kɛ be ni maŋ ko baaye nɔ aloo ákɛ jeŋ hewalɛ. (1 Mose 15:13, 14, 18-21; 2 Mose 23:31; 5 Mose 2:17-22; Daniel 8:5-7, 20, 21) Bɔfo Paulo wie Yehowa bei kɛ yinɔi lɛ fã nɛɛ he beni ekɛɛ Hela jeŋ nilelɔi ni yɔɔ Ateene lɛ akɛ: “Nyɔŋmɔ ni fee je lɛ kɛ emli nibii fɛɛ, . . . lá kome eŋɔfee gbɔmɛi adesai fɛɛ, ni amɛhi shikpɔŋ lɛ fɛɛ hiɛ, ni yinɔi ni eto lɛ kɛ amɛshihilɛhei lɛ ahusui lɛ ekpɛ mli eto momo.”—Bɔfoi lɛ Asaji 17:24, 26.
9. Yehowa ‘etsake bei kɛ yinɔi’ yɛ maŋtsɛmɛi ahe yɛ mɛɛ gbɛ nɔ?
9 Enɛ etsɔɔɔ akɛ Yehowa ji mɔ ni kɛ maŋkwramɔŋ kunimyelii kɛ tsakemɔi ni yaa nɔ yɛ jeŋmaji lɛ ateŋ lɛ baa. Ni kɛlɛ, ebaanyɛ ni ekɛ ehe awo mli kɛ eesumɔ lɛ nakai koni ekɛtsu eyiŋtoo he nii. No hewɔ lɛ gbalɔ Daniel, ni baana Babilonia Jeŋ Hewalɛ lɛ naagbee kɛ Medo-Persia ni akɛbaato najiaŋ lɛ wie Yehowa he akɛ: “Lɛ ji mɔ ni tsakeɔ be kɛ yinɔ, lɛ ekpáa maŋtsɛmɛi, ni esaa ewoɔ maŋtsɛmɛi, lɛ ehaa ŋaalelɔi leɔ ŋaa, ni nilelɔi hu leɔ nii.”—Daniel 2:21; Yesaia 44:24-45:7.
‘Be lɛ Miibɛŋkɛ’
10, 11. (a) Be enyiɛ Yehowa to kɛtsɔ hiɛ akɛ be ni ekɛbaakpɔ̃ Abraham seshibii lɛ kɛjɛ nyɔŋyeli mli? (b) Mɛni tsɔɔ akɛ Israelbii lɛ leee be pɔtɛɛ nɔ ni abaakpɔ̃ amɛ lɛ?
10 Yehowa kɛ nɔ ni fe afii ohai ejwɛ to afi pɔtɛɛ ni ekɛbaaba Mizraim Jeŋ Hewalɛ lɛ nɔ maŋtsɛ lɛ shĩ ni ekpɔ̃ Abraham seshibii lɛ kɛjɛ nyɔŋyeli shishi. Beni ejieɔ eyiŋtoo lɛ kpo etsɔɔ Abraham lɛ, Nyɔŋmɔ wo shi akɛ: “Na ole akɛ oseshibii aaatsɔmɔ gbɔi yɛ shikpɔŋ ni jeee amɛnɔ̃ nɔ; ni amɛaasɔmɔ amɛ, ni nomɛi aaawa amɛyi afii ohai ejwɛ. Shi nakai jeŋmaŋ lɛ hu ni amɛaasɔmɔ lɛ, mi lɛ makojo amɛ, ni no sɛɛ lɛ amɛkɛ nii babaoo aaaje kpo.” (1 Mose 15:13, 14) Yɛ be mli ni emuaa Israel yinɔsane ni ekɛha yɛ Akuashɔŋ lɛ hiɛ lɛ naa lɛ, Stefano wie nɛkɛ afii 400 be nɛɛ he, ni ekɛɛ akɛ: “Shi beni shiwoo lɛ ni Nyɔŋmɔ kã Abraham he kita lɛ be lɛ shɛ lɛ, maŋ lɛ bada, ni amɛyi fa yɛ Mizraim shikpɔŋ lɛ nɔ, kɛyashi beyinɔ ni maŋtsɛ kroko ni leee Yosef lɛ bate shi yɛ Mizraim.”—Bɔfoi lɛ Asaji 7:6, 17, 18.
11 Nɛkɛ Farao hee nɛɛ fee Israelbii lɛ nyɔ̃ji. No mli lɛ Mose eŋmako Mose Klɛŋklɛŋ Wolo lɛ, eyɛ mli akɛ eeenyɛ eba akɛ, akɛ Yehowa shiwoi ni ekɛha Abraham lɛ eha kɛtsɔ naabu loo eŋmalamɔ nɔ. Yɛ no feemɔ mli po lɛ, etamɔ nɔ ni saji ni Israelbii lɛ le lɛ haaa amɛnyɛ amɛbu be pɔtɛɛ ni abaajie amɛ kɛjɛ yiwaa shishi lɛ. Nyɔŋmɔ le be ni ebaajie amɛ, shi eyɛ faŋŋ akɛ akɛɛɛ Israelbii ni naa nɔ̃ lɛ. Wɔkaneɔ akɛ: “Ni eba mli akɛ nakai gbii pii lɛ amli lɛ Mizraim maŋtsɛ lɛ bagbo, ni Israelbii lɛ dɔmɔ ŋtsɔi yɛ nyɔŋyeli lɛ hewɔ, ni amɛfó amɛtsɛ Nyɔŋmɔ; ni amɛnyɔŋyeli lɛ mli fómɔ-kɛ-tsɛmɔ lɛ yashɛ Nyɔŋmɔ ŋɔɔ. Ni Nyɔŋmɔ nu amɛ ŋkɔmɔyeli bolɔmɔ lɛ, ni Nyɔŋmɔ kai ekpaŋmɔ ni ekɛ Abraham kɛ Isak kɛ Yakob kpaŋ lɛ; ni Nyɔŋmɔ kwɛ Israelbii lɛ, ni Nyɔŋmɔ kɔ amɛyi tɛ.”—2 Mose 2:23-25.
12. Yɛ mɛɛ gbɛ nɔ Stefano tsɔɔ akɛ Mose fee nii kɛtsɔ Yehowa be lɛ hiɛ?
12 Abaanyɛ ana nilee ni abɛ yɛ be pɔtɛɛ ni Israel kpɔ̃mɔ baaba lɛ he lɛ hu kɛjɛ Stefano wiemɔ lɛ naamuu mli. Beni ewieɔ Mose he lɛ ekɛɛ akɛ: “Shi beni eye afii nyɔŋmai ejwɛ lɛ, eba eyiŋ akɛ eeeyasara enyɛmimɛi Israelbii lɛ. Ni beni ena akɛ aafee amɛteŋ mɔ ko efɔŋ lɛ, efã ehe, ni etɔ mɔ ni afeɔ lɛ efɔŋ lɛ he owele ni egbe Mizraimnyo lɛ. Shi esusuɔ akɛ enyɛmimɛi lɛ aaayoo sɛɛ akɛ Nyɔŋmɔ miitsɔ enine nɔ ehere amɛ; shi amɛyooo sɛɛ.” (Bɔfoi lɛ Asaji 7:23-25; wɔma efã ko nɔ mi.) Mose fee nii afii 40 kɛtsɔ Nyɔŋmɔ be lɛ hiɛ. Stefano tsɔɔ akɛ ehe bahia ni Mose amɛ afii 40 kroko dani Nyɔŋmɔ ‘tsɔ enine nɔ ehere Israelbii lɛ yiwala.’—Bɔfoi lɛ Asaji 7:30-36.
13. Yɛ mɛɛ gbɛ nɔ shihilɛ ni wɔyɔɔ mli lɛ tamɔ Israelbii lɛ anɔ̃ lɛ dani akpɔ̃ amɛ kɛjɛ Mizraim lɛ?
13 Eyɛ mli akɛ ‘be kɛha shiwoo lɛ mlibaa miibɛŋkɛ’ ni Nyɔŋmɔ eto nakai afi pɔtɛɛ lɛ ema shi moŋ, shi esa akɛ Mose kɛ Israel fɛɛ kɛ hemɔkɛyeli atsu nii. Esa akɛ amɛmɛ be ni Yehowa eto lɛ, eyɛ faŋŋ akɛ amɛnyɛŋ amɛtsɔ hiɛ amɛbu be lɛ he akɔntaa. Wɔ hu wɔyɛ nɔmimaa akɛ wɔkpɔ̃mɔ kɛmiijɛ ŋmɛnɛŋmɛnɛ nibii agbɛjianɔtoo fɔŋ lɛ mli lɛ miibɛŋkɛ. Wɔle akɛ “naagbee gbii lɛ” mli wɔyɔɔ lɛ. (2 Timoteo 3:1-5) No hewɔ lɛ, ani esaaa akɛ wɔsumɔɔ akɛ wɔɔjie wɔhemɔkɛyeli kpo ni wɔmɛ be ni Yehowa eto kɛha egbi wulu lɛ? (2 Petro 3:11-13) Kɛkɛ lɛ taakɛ Mose kɛ Israelbii lɛ ji lɛ, wɔbaalá anunyam lala ni kɔɔ kpɔ̃mɔ he, kɛha Yehowa yijiemɔ.—2 Mose 15:1-19.
‘Beni Be lɛ Shɛ Lɛ’
14, 15. Te wɔfeɔ tɛŋŋ wɔleɔ akɛ Nyɔŋmɔ to be kɛha e-Bi lɛ koni eba shikpɔŋ nɔ, ni mɛni gbalɔi kɛ ŋwɛibɔfoi po tao akɛ amɛaale?
14 Yehowa eto be ni e-Bi koome lɛ baaba shikpɔŋ nɔ akɛ Mesia lɛ ema shi. Paulo ŋma akɛ: “Beni be falɛ lɛ shɛ lɛ, Nyɔŋmɔ tsu lɛ diɛŋtsɛ ebi lɛ kɛba, yoo ko bafɔ lɛ, eba mla shishi.” (Galatabii 4:4) Enɛ ji Nyɔŋmɔ shiwoo akɛ ebaatsu Seshi ko—‘Shilo, mɔ ni majimaji lɛ aaabo lɛ toi lɛ’ mlibaa.—1 Mose 3:15; 49:10.
15 Nyɔŋmɔ gbalɔi lɛ—ŋwɛibɔfoi po—bi “be” ni Mesia lɛ baapue yɛ shikpɔŋ nɔ koni yiwalaheremɔ hegbɛ aba aha adesai eshafeelɔi lɛ he sane. Petro kɛɛ: “Nɛkɛ walaheremɔ nɛɛ, gbalɔi ni gba yɛ duromɔ ni ba nyɛnɔ lɛ he lɛ tao sɛɛgbɛ, ni amɛbi shi, ni amɛsaa amɛbi be lɛ shi, be ni kɛ bɔ ni Kristo mumɔ ni yɔɔ amɛmli lɛ jie tsɔ̃ɔ, beni eyeɔ amanehului ni baaba Kristo nɔ kɛ anunyamii ni baaba yɛ nomɛi asɛɛ lɛ ahe odase etoɔ lɛ. . . . Nii hu ni ŋwɛibɔfoi tete shweɔ akɛ amɛaana mli lɛ.”—1 Petro 1:1-5, 10-12.
16, 17. (a) Mɛɛ gbalɛ nɔ Yehowa tsɔ̃ ni ekɛye ebua klɛŋklɛŋ afii oha lɛ mli Yudafoi lɛ koni amɛkpa Mesia lɛ baa gbɛ? (b) Daniel wolo lɛ ná Yudafoi lɛ agbɛkpamɔ yɛ Mesia lɛ he lɛ nɔ hewalɛ yɛ mɛɛ gbɛ nɔ?
16 Yehowa etsɔ egbalɔ Daniel—nuu ni ehemɔkɛyeli hosooo—lɛ nɔ ekɛ gbalɛ ko ni kɔɔ “otsii nyɔŋmai kpawo” he ehã. Nakai gbalɛ lɛ baaha klɛŋklɛŋ afii oha lɛ mli Yudafoi lɛ ale akɛ Mesia ni awo shi yɛ ehe lɛ puemɔ lɛ miibɛŋkɛ. Gbalɛ lɛ fã jaje akɛ: “Kɛjɛ beyinɔ ni wiemɔ aaaje kpo akɛ aku sɛɛ ayasaa ni ama Yerusalem ekoŋŋ lɛ kɛyashi Mesia Hiɛnyiɛlɔ lɛ nɔ lɛ, efeɔ otsii kpawo, agbɛnɛ hu otsii nyɔŋmai ekpaa kɛ enyɔ.” (Daniel 9:24, 25, NW) Yudafoi, Katolik, kɛ Protestant woloŋlelɔi kpɛlɛɔ nɔ akɛ “otsii” ni atsĩ tã yɛ biɛ lɛ tsɔɔ otsii ni ji afii. “Otsii” 69 (afii 483) ni yɔɔ Daniel 9:25 lɛ je shishi yɛ afi 455 D.Ŋ.B., beni Persia Maŋtsɛ Artashasta fã Nehemia akɛ ‘eku esɛɛ eyatswa Yerusalem ekoŋŋ lɛ.’ (Nehemia 2:1-8) Amɛba naagbee afii 483 sɛɛ—yɛ afi 29 Ŋ.B., beni abaptisi Yesu ni akɛ mumɔ krɔŋkrɔŋ fɔ lɛ mũ, ni yɛ no hewɔ lɛ ebatsɔ Mesia, loo Kristo lɛ.—Mateo 3:13-17.
17 Kɛji akɛ klɛŋklɛŋ afii oha lɛ mli Yudafoi lɛ le be pɔtɛɛ mli ni afii 483 lɛ je shishi lɛ, no lɛ anyɛɛɛ ale. Shi beni Yohane Baptisilɔ lɛ je esɔɔmɔ lɛ shishi lɛ, “maŋ lɛ hiɛ kã nɔ, ni mɛi lɛ fɛɛ susuɔ yɛ amɛtsuiiaŋ yɛ Yohane he akɛ benɛ lɛ ji Kristo lɛ.” (Luka 3:15) Biblia he nilelɔi komɛi kɛ gbɛkpamɔ nɛɛ toɔ Daniel gbalɛ lɛ he. Beni ewieɔ kuku nɛɛ he lɛ, Matthew Henry ŋma akɛ: “Akɛɔ wɔ yɛ biɛ . . . bɔ ni gbɔmɛi lɛ mu sane naa, kɛjɛ Yohane sɔɔmɔ nitsumɔ lɛ kɛ ebaptisimɔ lɛ mli, ni amɛsusu Mesia lɛ he, ni amɛsusu ehe tamɔ akɛ eyɛ agbo naa kpaakpa. . . . Daniel otsii nyɔŋmai kpawo lɛ miiba naagbee agbɛnɛ.” French wolo ko ni atsɛɔ lɛ Manuel Biblique ni Vigouroux, Bacuez kɛ Brassac ŋma lɛ kɛɔ akɛ: “Gbɔmɛi le akɛ otsii nyɔŋmai kpawo ni ji afii ni Daniel kɛma shi lɛ miibɛŋkɛ amɛnaagbee; efeee mɔ ko mɔ ko naakpɛɛ akɛ eeenu ni Yohane Baptisilɔ lɛ miijaje akɛ Nyɔŋmɔ maŋtsɛyeli lɛ ebɛŋkɛ.” Yudanyo woloŋlelɔ Abba Hillel Silver ŋma akɛ taakɛ nakai gbii lɛ amli “be he akɔntabuu ni ale jogbaŋŋ” ji lɛ, “aakpa Mesia lɛ gbɛ kɛjɛ afi 25 kɛyashi 50 Ŋ.B. lɛ teŋ gbɛ.”
Saji ni Ba —Jeee Be He Akɔntaabuu
18. Yɛ be mli ni Daniel gbalɛ lɛ ye ebua Yudafoi lɛ koni amɛyɔse be ni amɛbaanyɛ amɛkpa be ni Mesia lɛ baapue lɛ gbɛ lɛ, mɛni ji odaseyeli ni tsɔɔ mɔ yiŋ fe fɛɛ akɛ Yesu ji Mesia lɛ?
18 Eyɛ mli akɛ eyɛ faŋŋ akɛ be he akɔntaabuu ye ebua Yudafoi lɛ koni amɛná be ni esa akɛ Mesia lɛ apue lɛ he nilee moŋ, shi nibii ni ba yɛ no sɛɛ lɛ tsɔɔ akɛ eyeee ebuaaa koni etsɔ amɛteŋ mɛi pii ayiŋ yɛ Mesia ni Yesu ji lɛ he. Nɔ ni shɛɛɛ afi dani egbo lɛ, Yesu bi ekaselɔi lɛ akɛ: “Namɔ mɛi lɛ kɛɔ akɛ miji?” Amɛha hetoo akɛ: “Yohane, baptisilɔ lɛ; ni mɛi komɛi kɛɔ akɛ: Elia; ni mɛi komɛi hu kɛɔ akɛ: Blema gbalɔi lɛ eko ni éte shi ekoŋŋ.” (Luka 9:18, 19) Wɔbɛ nɔ ko ni áŋma áfɔ̃ shi ni tsɔɔ akɛ Yesu tsɛ wiemɔi asɛɛ kɛjɛ mfonirifeemɔŋ otsii ahe gbalɛ lɛ mli pɛŋ koni ekɛtsɔ̃ɔ akɛ lɛ ji Mesia lɛ. Shi ekɛɛ yɛ be kome ko mli akɛ: “Shi mi lɛ, miyɛ odase ni fe Yohane nɔ lɛ; ejaakɛ nitsumɔi lɛ ni tsɛ lɛ eha mi akɛ migbe naa lɛ, nakai nitsumɔi ni mitsuɔ lɛ nɔŋŋ yeɔ mihe odase akɛ tsɛ lɛ tsu mi.” (Yohane 5:36) Yɛ nɔ najiaŋ ni eeefee be he akɔntaabuu ni akɛha lɛ, Yesu shiɛmɔ lɛ, enaakpɛɛ nii lɛ, kɛ saji ni bɔle egbele lɛ he (naakpɛɛ duŋ ni wo lɛ, sɔlemɔtsu lɛ mli muhɔɔ ni mli gba enyɔ lɛ, kɛ shikpɔŋhosomɔ) lɛ yeɔ odase akɛ lɛ ji Mesia ni Nyɔŋmɔ tsũ lɛ lɛ.—Mateo 27:45, 51, 54; Yohane 7:31; Bɔfoi lɛ Asaji 2:22.
19. (a) Te Kristofoi aaafee tɛŋŋ amɛle akɛ Yerusalem hiɛkpatamɔ lɛ ebɛŋkɛ? (b) Mɛni hewɔ hemɔkɛyeli babaoo he hiaa mra be mli Kristofoi ni jo foi kɛjɛ Yerusalem lɛ lolo lɛ?
19 Nakai nɔŋŋ hu yɛ Yesu gbele sɛɛ lɛ, akɛ nɔ ko ni mra be mli Kristofoi lɛ aaatsɔ nɔ amɛbu Yudafoi anibii agbɛjianɔtoo lɛ naagbee ni baaba lɛ he akɔntaa haaa amɛ. Eji anɔkwale akɛ Daniel gbalɛ ni kɔɔ mfoniri-feemɔŋ otsii lɛ ahe lɛ tsi nakai gbɛjianɔtoo lɛ hiɛkpatamɔ tã. (Daniel 9:26b, 27b) Shi enɛ baaba mli yɛ “otsii nyɔŋmai kpawo” lɛ sɛɛ (455 D.Ŋ.B.–36 Ŋ.B.). Yɛ gbɛ kroko nɔ lɛ, beni klɛŋklɛŋ Jeŋmajiaŋbii lɛ batsɔmɔ Yesu sɛɛnyiɛlɔi yɛ afi 36 Ŋ.B. lɛ sɛɛ lɛ, Daniel yitso 9 lɛ kɛ be he akɔntaabuu ko ni tekeɔ afi 36 Ŋ.B. haaa Kristofoi lɛ. Kɛha amɛ lɛ, saji ni ba lɛ baatsɔɔ akɛ etsɛŋ ni Yudafoi agbɛjianɔtoo lɛ baaba naagbee, shi jeee be he akɔntaabuu. Nakai saji lɛ ni Yesu gba fɔ̃ shi lɛ anaagbee je shishi kɛjɛ afi 66 Ŋ.B., beni Roma asraafoi lɛ yatutua Yerusalem ní agbɛnɛ amɛku amɛsɛɛ lɛ. Enɛ kɛ hegbɛ hã Kristofoi anɔkwafoi ni feɔ toiboo ni yɔɔ Yerusalem kɛ Yudea lɛ koni ‘amɛjo foi kɛya gɔji lɛ anɔ.’ (Luka 21:20-22) Akɛni amɛbɛ be he akɔntaabuu he kadimɔnii hewɔ lɛ, nakai mra be mli Kristofoi lɛ leee be mli ni Yerusalem hiɛkpatamɔ lɛ baaba. Kwɛ hemɔkɛyeli ni ehé akɛ amɛaashi amɛshiai, ŋmɔji, kɛ nitsumɔhei ni amɛyahi shi yɛ Yerusalem sɛɛ aaafee afii ejwɛ, kɛyashi be mli ni Roma asraafoi lɛ kũ amɛsɛɛ yɛ afi 70 Ŋ.B., ni amɛbakpata Yudafoi agbɛjianɔtoo lɛ hiɛ!—Luka 19:41-44.
20. (a) Te wɔɔfee tɛŋŋ ni Noa, Mose, kɛ klɛŋklɛŋ afii oha lɛ mli Kristofoi lɛ ni yɔɔ Yudea lɛ anɔkwɛmɔnii lɛ he aaaba sɛɛnamɔ aha wɔ? (b) Mɛni wɔbaasusu he yɛ nikasemɔ ni nyiɛ sɛɛ lɛ mli?
20 Taakɛ Noa, Mose, kɛ klɛŋklɛŋ afii oha lɛ mli Kristofoi ni yɔɔ Yudea lɛ ji lɛ, wɔ hu ŋmɛnɛ wɔbaanyɛ wɔshi bei lɛ kɛ yinɔi lɛ wɔwo Yehowa dɛŋ yɛ hekɛnɔfɔ̃ɔ mli. Nɔ ni wɔheɔ wɔyeɔ akɛ naagbee be lɛ mli wɔyɔɔ lɛ, ni ákɛ wɔkpɔmɔ miibɛŋkɛ lɛ damɔɔɔ be he akɔntaabuu folo kɛkɛ nɔ, shi moŋ edamɔ shihilɛ mli saji diɛŋtsɛ ni haa Biblia mli gbalɛi baa mli lɛ anɔ. Agbɛnɛ hu, eyɛ mli akɛ be ni Kristo eba lɛ mli wɔyɔɔ lɛ moŋ, shi wɔyeko wɔhe kɛjɛko hiamɔ ni ehe ehia akɛ wɔjie hemɔkɛyeli kpo ni wɔya nɔ wɔsara lɛ he. Esa akɛ wɔya nɔ wɔhi shi akɛ mɛi ni kɛ miishɛɛ kpaa saji ni ágba áfɔ̃ shi yɛ Ŋmalɛi lɛ amli lɛ gbɛ. Enɛ baafee sane ni abaasusu he yɛ nikasemɔ ni nyiɛ sɛɛ lɛ mli.
[Shishigbɛ niŋmai]
Yɛ Emlitii Mli Lɛ
◻ Mɛni Yesu kɛɛ ebɔfoi lɛ yɛ Yehowa bei kɛ yinɔi ahe?
◻ Bei enyiɛ Noa kɛtsɔ hiɛ ele be ni Nu Afua lɛ baaje shishi?
◻ Mɛni tsɔɔ akɛ Mose kɛ Israelbii lɛ leee be pɔtɛɛ mli ni abaakpɔ̃ amɛ kɛjɛ Mizraim?
◻ Te wɔɔfee tɛŋŋ ni Biblia mli nɔkwɛmɔnii ni kɔɔ Yehowa bei kɛ yinɔi ahe lɛ ahe aba sɛɛnamɔ aha wɔ?
[Mfoniri ni yɔɔ baafa 11]
Noa hemɔkɛyeli ye ebua lɛ ni eshi saji ni kɔɔ be he lɛ yɛ Yehowa dɛŋ