Biblia Shishitsɔɔmɔ ko Ni Tsake Je Lɛ

Beni Nyɔŋmɔ gbalɔ Mose je Biblia lɛ ŋmaa shishi yɛ nɔ ni fe afii 3,500 ni eho nɛ lɛ, no mli lɛ, maŋ bibioo kome pɛ baanyɛ akane. (5 Mose 7:7) Enɛ ba lɛ nakai ejaakɛ no mli lɛ, Ŋmalɛi lɛ yɛ nakai maŋ lɛ shishijee wiemɔ ni ji Hebri lɛ pɛ mli. Shi kɛlɛ, enɛ baatsake yɛ be ni sa mli.

BIBLIA mli shɛɛ sane ni egbɛ eshwã kɛ hewalɛ kpakpa ni ená yɛ gbɔmɛi anɔ kɛtsɔ afii ohai abɔ lɛ mli lɛ ba lɛ nakai titri yɛ eklɛŋklɛŋ shishitsɔɔmɔ—ni ji Septuagint lɛ hewɔ. Mɛni hewɔ afee? Ni ani abaanyɛ akɛɛ yɛ gbɛ ni ja nɔ akɛ enɛ ji Biblia ni tsake je lɛ?

Shishitsɔɔmɔ ni Jɛ Mumɔŋ?

Beni aŋɔ Yudafoi lɛ nom yɛ Babilon yɛ afii ohai kpawo kɛ afii ohai ekpaa D.Ŋ.B. lɛ mli lɛ sɛɛ lɛ, amɛteŋ mɛi babaoo hi shi yɛ blema Israel kɛ Yuda shikpɔŋ lɛ sɛɛ. Kɛha Yudafoi ni afɔ amɛ yɛ nomŋɔɔ shihilɛ mli lɛ, Hebri wiemɔ lɛ batsɔ wiemɔ ni afɔɔɔ wiemɔ. Beni shɛɔ afii ohai etɛ D.Ŋ.B. lɛ, no mli lɛ Yudafoi akuu ko yɛ Alexandria, Mizraim—ni ji hei ni atsuɔ Hela Maŋtsɛyeli mli kusumii nibii ahe nii waa yɛ lɛ. Nakai Yudafoi lɛ na bɔ ni ehe hiaa akɛ atsɔɔ Ŋmalɛi Krɔŋkrɔŋi lɛ ashishi kɛya Hela wiemɔ, ni yɛ nakai beaŋ lɛ eji amɛmaŋ wiemɔ lɛ mli.

Kɛbashi nakai beaŋ lɛ, no mli lɛ aŋmala Biblia mli shɛɛ sane ni ajɛ mumɔŋ akɛha lɛ yɛ Hebri wiemɔ mli, kɛ fioo ko hu yɛ Aramaik mli. Ani Nyɔŋmɔ Wiemɔ lɛ ni aaatsɔɔ shishi kɛya wiemɔ kroko mli lɛ baaha hewalɛ ni eyɔɔ akɛ ajɛ ŋwɛi aŋma lɛ aba shi, ni ekolɛ, ebaaha atsɔɔ shishi yɛ gbɛ ni ejaaa nɔ? Ani Yudafoi ni atuu Wiemɔ ni jɛ mumɔŋ lɛ awo amɛdɛŋ lɛ baaŋmɛ gbɛ koni atsɔɔ shɛɛ sane lɛ shishi yɛ gbɛ ni ejaaa nɔ kɛtsɔ shishitsɔɔmɔ nɔ?—Lala 147:19, 20; Romabii 3:1, 2.

Nɛkɛ saji ni henumɔi yɔɔ mli nɛɛ teɔ gbeyeishemɔ shi. Ni kɛlɛ, tsui ni aye akɛ Yudafoi lɛ nuŋ Nyɔŋmɔ Wiemɔ lɛ shishi dɔŋŋ lɛ baye nibii krokomɛi fɛɛ nɔ. Akpɛ yiŋ koni atsɔɔ Torah lɛ—ni ji klɛŋklɛŋ Biblia mli woji enumɔ ni Mose ŋmala lɛ shishi kɛya Hela wiemɔ mli. Akɛ blema adesãi bahà shishitsɔɔmɔ diɛŋtsɛ lɛ nɔ. Taakɛ Letter of Aristeas lɛ tsɔɔ lɛ, Mizraim nɔyelɔ Ptolemy II (285-246 D.Ŋ.B.) lɛ tao Mose Woji Enumɔ (aloo Torah) lɛ eko ní átsɔɔ shishi kɛtee Hela wiemɔ mli momo koni ekɛto edehei awojiatoohe lɛ. Ekɛ nitsumɔ wo Yudafoi woloŋlelɔi 72, ni amɛjɛ Israel amɛba Mizraim lɛ adɛŋ, ni amɛgbe shishitsɔɔmɔ lɛ naa yɛ gbii 72 mli. Kɛkɛ ni akane nɛkɛ shishitsɔɔmɔ nɛɛ atsɔɔ Yudafoi akutsei lɛ, ni amɛjaje akɛ eŋɔɔ ni eja pɛpɛɛpɛ. Sɛɛ mli lɛ, wiemɔ he woo ni akɛha yɛ sane nɛɛ mli lɛ tsɔɔ akɛ ajara shishitsɔɔlɔi lɛ fɛɛ awo tsũi srɔtoi amli, shi kɛlɛ, amɛshishitsɔɔmɔi lɛ je amɛhe, ni srɔto ko bɛ niŋmaa okadii lɛ amli po. Yɛ kusum nifeemɔ ni kɔɔ shishitsɔɔlɔi 72 lɛ he hewɔ lɛ, abale nɛkɛ Hela Biblia shishitsɔɔmɔ nɛɛ akɛ Septuagint, ni damɔ Latin wiemɔ ni shishi ji “Nyɔŋmai Kpawo” lɛ nɔ lɛ.

Woloŋlelɔi babaoo ni yɔɔ ŋmɛnɛŋmɛnɛ beaŋ lɛ kpɛlɛɔ nɔ akɛ Letter of Aristeas lɛ ji apokrifa niŋmaa. Amɛheɔ amɛyeɔ akɛ shishitsɔɔmɔ lɛ shishijee lɛ baaa kɛjɛɛɛ Ptolemy II lɛ ŋɔɔ, shi moŋ kɛjɛ Alexandria Yudafoi akuu lɛ mli hiɛnyiɛlɔi lɛ aŋɔɔ. Shi Yudafonyo jeŋnilelɔ Philo ni yɔɔ Alexandria lɛ kɛ Yudafonyo yinɔsaneŋmalɔ Josephus kɛ Talmud lɛ fɛɛ jie hemɔkɛyeli titri ni Yudafoi ni hi shi yɛ klɛŋklɛŋ afii oha lɛ mli lɛ yɔɔ lɛ kpo akɛ ajɛ mumɔŋ ni aŋma Septuagint lɛ taakɛ klɛŋklɛŋ Ŋmalɛi lɛ ji lɛ. Ŋwanejee ko bɛ he akɛ, nɛkɛ hemɔkɛyelii nɛɛ ba lɛ nɛkɛ yɛ mɔdɛŋ ni abɔ koni akɛkpɛlɛ Septuagint lɛ nɔ yɛ Yudafoi akuu ni yɔɔ jeŋ fɛɛ lɛ mli.

Eyɛ mli akɛ Mose woji enumɔ lɛ pɛ akɛje shishitsɔɔmɔ lɛ shishi moŋ, shi yɛ naagbee lɛ, abatsɛ Hebri Ŋmalɛi lɛ fɛɛ ni atsɔɔ shishi kɛtee Hela wiemɔ mli lɛ akɛ Septuagint. Akɛ afii oha loo nɔ̃, ni fa fe nakai ni nyiɛ sɛɛ lɛ tsɔɔ woji krokomɛi ni eshwɛ lɛ shishi. Yɛ nɔ najiaŋ ni eeefee nitsumɔ ko ni kɛ ehe kpãa gbee lɛ, Septuagint muu lɛ fɛɛ batsɔ nitsumɔ ko ni atsu lɛ fiofio ni kɛ amɛhe kpãaa gbee. Shishitsɔɔlɔi lɛ anyɛmɔi kɛ nilee ni amɛyɔɔ yɛ Hebri wiemɔ lɛ he lɛ yɛ srɔto. Woji lɛ ekomɛi yɛ ni atsɔɔ shishi ŋmiiŋmi, ni bei komɛi lɛ eyaa shɔŋŋ tsɔ, yɛ be mli ni shishitsɔɔmɔi lɛ ekomɛi yɛ mlɛo. Amɛteŋ fioo ko yɛ shishitsɔɔmɔi kakadaji kɛ shishitsɔɔmɔi kukuji amli. Beni shɛɔ afii ohai enyɔ D.Ŋ.B. lɛ naagbee mli lɛ, no mli lɛ abaanyɛ akane Hebri Ŋmalɛi lɛ fɛɛ yɛ Hela wiemɔ mli. Yɛ amɛhe ni kpãaa gbee lɛ fɛɛ sɛɛ lɛ, ekãa ni amɛná akɛ amɛaatsɔɔ Hebri Ŋmalɛi lɛ ashishi kɛya Hela wiemɔ mli lɛ tee shɔŋŋ fe bɔ ni shishitsɔɔlɔi lɛ baanyɛ akpa gbɛ.

Yafet yɛ Shem Bui lɛ Amli?

Beni ewieɔ Septuagint lɛ he lɛ, Talmud lɛ tsɛ 1 Mose 9:27 yisɛɛ akɛ: ‘Ha Yafet ahi Shem bui lɛ amli.’ (Megillah 9b, Babylonian Talmud) Talmud lɛ tsɔɔ yɛ mfonirifeemɔ gbɛ nɔ akɛ, kɛtsɔ bɔ ni Septuagint ni yɔɔ Hela wiemɔ lɛ mli lɛ ŋɔɔ eha lɛ nɔ hewɔ lɛ, Yafet (Yavan tsɛ, ni Helabii lɛ jɛ emli lɛ) hi shi yɛ Shem (Israel maŋ lɛ blema tsɛ lɛ) bui lɛ amli. Shi kɛlɛ, abaanyɛ akɛɛ hu akɛ, kɛtsɔ Septuagint lɛ nɔ lɛ, Shem hi shi yɛ Yafet bui lɛ amli. Yɛ mɛɛ gbɛ nɔ?

Yɛ Alexander Kpeteŋkpele lɛ kunimyeli lɛ sɛɛ yɛ afii ohai ejwɛ D.Ŋ.B lɛ naagbee mli lɛ, abɔ mɔdɛŋ waa koni agbɛ Hela wiemɔ lɛ kɛ ehiŋmɛigbelemɔ nifeemɔ lɛ ashwã yɛ shikpɔji ni aye amɛnɔ lɛ nɔ. Atsɛ nɛkɛ nifeemɔ nɛɛ akɛ Hela hiŋmɛigbelemɔ. Yudafoi lɛ nu he akɛ amɛbajeɔ kusum niseniianiifeemɔ shishi yɛ be kɛ bei amli. Kɛji akɛ Hela hiŋmɛigbelemɔ nifeemɔ kɛ jeŋ nilee aaashwere lɛ, no lɛ, abaabule Yudafoi lɛ ajamɔ lɛ diɛŋtsɛ shishi kwraa. Mɛni ji nɔ ni baanyɛ ekɛ nɛkɛ tutuamɔ nɛɛ aba naagbee?

Beni ewieɔ nɔ̃ kome ni baanyɛ afee nɔ ni kanya Yudafoi lɛ ni ha amɛtsɔɔ Septuagint lɛ shishi lɛ he lɛ, Max Margolis ni ji Yudafonyo Biblia shishitsɔɔlɔ lɛ wieɔ akɛ: “Kɛ eeeba lɛ akɛ, wɔɔŋɔ yiŋtoo lɛ wɔfɔ Yudafoi akuu lɛ nɔ po lɛ, yiŋtoo kroko baanyɛ ahi sɛɛ, ni no ji, koni agbele Yudafoi lɛ a-Mla lɛ naa atsɔɔ Jeŋmajiaŋbii lɛ, ni akɛkɔne je lɛ yiŋ akɛ Yudafoi lɛ yɛ kusum ko ni nɔ kwɔ fe Hellas [Hela] nilee lɛ.” Hebri Ŋmalɛi lɛ ni aaaha maŋ bii ni wieɔ Hela wiemɔ lɛ nine ashɛ nɔ lɛ baanyɛ afee hefamɔ kɛ nifeemɔ ni akɛwuɔ ashiɔ nɔ ko.

Alexander susumɔi yɛ Hela hiŋmɛigbelemɔ nifeemɔi ahe lɛ eha Hela wiemɔ ebafee majimaji ateŋ wiemɔ yɛ je lɛ mli. Beni Romabii lɛ babutu enɔyeli lɛ po lɛ, Hela wiemɔ (loo, Koine) ni mɛi fɛɛ wieɔ lɛ, bafee wiemɔ ni akɛyeɔ jara kɛ nɔ ni akɛgbaa sane yɛ majimaji lɛ amli. Kɛji akɛ enɛ ba lɛ nakai kɛtsɔ mɔdɛŋ ni aje gbɛ abɔ lɛ nɔ jio, loo ejɛ adebɔɔ naa jio lɛ, mɛi babaoo ní amɛjeee Yudafoi ni tsutsu ko lɛ amɛleee Nyɔŋmɔ kɛ Yudafoi a-Mla lɛ bakpɛlɛ Septuagint Hebri Ŋmalɛi lɛ ashishitsɔɔmɔ lɛ nɔ. Nɔ ni jɛ mli kɛba lɛ yɛ naakpɛɛ.

Mɛi ni Etsake Kɛba Yuda Jamɔ Mli kɛ Nyɔŋmɔ Gbeyeishelɔi

Beni shɛɔ klɛŋklɛŋ afii oha Ŋ.B. lɛ, Philo baanyɛ aŋma akɛ, jeee Yudafoi lɛ ateŋ pɛ kɛkɛ “akɛ bulɛ haa Mose mla lɛ yɛ eŋɔɔmɔ kɛ enunyam lɛ mli, shi moŋ yɛ maji krokomɛi lɛ fɛɛ amli.” Beni ewieɔ Yudafoi ni yɔɔ Palestina sɛɛ yɛ klɛŋklɛŋ afii oha lɛ mli he lɛ, Yudafonyo yinɔsaneŋmalɔ Joseph Klausner kɛɔ akɛ: “Ewa akɛ aaahe aye akɛ, nɛkɛ Yudafoi akpekpei abɔ ni naa ebakpe shi amɛ diɛŋtsɛ nɛɛ jɛ Palestina maŋ bibioo nɛɛ pɛ mli. Mɔ ko nyɛŋ aje he ŋwane akɛ nɛkɛ yifalɛ nɛɛ hu ba kɛtsɔ hii kɛ yei babaoo ni tsake kɛba Yuda jamɔ lɛ mli lɛ hewɔ.”

Shi kɛlɛ, nɛkɛ otii ni tsirɛɔ mɔ nɛɛ ewieee sane lɛ fɛɛ he fitsofitso. Woloŋmalɔ Shaye J. D. Cohen, ni ji Yudafoi ayinɔsane he nilelɔ lɛ kɛɛ akɛ: “Jeŋmaji abii pii, ni hii kɛ yei fata he tsake kɛba Yuda jamɔ mli yɛ afii oha D.Ŋ.B. lɛ naagbee mli kɛ klɛŋklɛŋ afii ohai enyɔ Ŋ.B. Ni kɛlɛ, mɛi babaoo lolo ji jeŋmajiaŋbii ni kpɛlɛ Yuda jamɔ mli nifeemɔi komɛi anɔ shi amɛtsakeee kɛbaaa mli.” Klausner kɛ Cohen fɛɛ tsɛ nɛkɛ mɛi ni tsakeee nɛɛ akɛ Nyɔŋmɔ gbeyeishelɔi, ni ji wiemɔ ni fɔɔ kpojee yɛ Hela woji amli yɛ nakai bei lɛ amli.

Mɛni ji srɔtofeemɔ ni yɔɔ mɔ ni etsake kɛba Yuda jamɔ mli kɛ Nyɔŋmɔ gbeyeishelɔ teŋ? Mɛi ni etsake kɛba Yuda jamɔ mli lɛ ji mɛi ni etsake diɛŋtsɛ, ni abuɔ amɛ akɛ Yudafoi yɛ nɔ fɛɛ nɔ mli ejaakɛ amɛkpɛlɛ Israel Nyɔŋmɔ lɛ nɔ (amɛkpoo Nyɔŋmɔi krokomɛi fɛɛ), afolɔ amɛ ketia, ni amɛbafata Israel maŋ lɛ he. Nɔ ni tamɔɔɔ no lɛ, Cohen wieɔ yɛ Nyɔŋmɔ gbeyeishelɔi lɛ ahe akɛ: “Eyɛ mli akɛ nɛkɛ jeŋmajiaŋbii nɛɛ he Yudafoi anifeemɔi lɛ babaoo amɛye ni amɛkpɛlɛ nɔ ni amɛkɛbulɛ ha Yudafoi a-Nyɔŋmɔ lɛ yɛ gbɛ̀i srɔtoi anɔ moŋ, shi amɛbuuu amɛhe akɛ Yudafoi ni mɛi krokomɛi hu ebuuu amɛ akɛ Yudafoi.” Klausner wie amɛhe akɛ “amɛdamɔ gbɛ teŋ,” ejaakɛ amɛkpɛlɛ Yudafoi ajamɔ lɛ nɔ, ni “amɛkpɛlɛɔ ekusumii lɛ fãi komɛi anɔ . . . shi amɛbatsɔmɔɔɔ Yudafoi kwraa kɛmɔɔɔ shi.”

Ekolɛ, mɛi komɛi baná Nyɔŋmɔ he miishɛɛ ejaakɛ amɛkɛ Yudafoi ni kɛ amɛhe ewo maŋsɛɛ sanekpakpa shiɛmɔ nitsumɔ mli lɛ gba sane loo amɛna bɔ ni esoro amɛ yɛ jeŋba, kusum, kɛ nifeemɔ mli lɛ hewɔ. Ni kɛlɛ, Septuagint lɛ ji dɛŋdade titri ni ye ebua nɛkɛ Nyɔŋmɔ gbeyeishelɔi nɛɛ koni amɛkase Yehowa Nyɔŋmɔ he nii. Eyɛ mli akɛ gbɛ ko gbɛ ko bɛ ni aaatsɔ nɔ akɛaale Nyɔŋmɔ gbeyeishelɔi ni yɔɔ klɛŋklɛŋ afii oha lɛ mli ayibɔ diɛŋtsɛ moŋ, shi Septuagint lɛ egbɛ nileei komɛi ni kɔɔ Nyɔŋmɔ he lɛ eshwã Roma Nɔyeli lɛ mli ni sanebimɔ ko bɛ he. Kɛtsɔ Septuagint lɛ nɔ lɛ, ato shishitoo nii ni he hiaa ama shi.

Septuagint lɛ Ye Ebua ni Akɛsaa Gbɛ Lɛ

Septuagint lɛ ná gbɛfaŋnɔ ni he hiaa waa yɛ Kristojamɔ shɛɛ sane lɛ gbɛɛ-kɛ-shwãmɔ mli. Yudafoi ni wieɔ Hela lɛ ateŋ mɛi babaoo yɛ jɛmɛ beni atoɔ Kristofoi asafo lɛ shishi yɛ Pentekoste afi 33 Ŋ.B. Mɛi ni etsake kɛba Yuda jamɔ lɛ mli hu fata mɛi ni batsɔmɔ Kristo kaselɔi lɛ ahe yɛ nakai mra be lɛ mli. (Bɔfoi lɛ Asaji 2:5-11; 6:1-6; 8:26-38) Akɛni Yesu bɔfoi lɛ kɛ kaselɔi krokomɛi aniŋmaai ni jɛ mumɔŋ lɛ yiŋtoo ji koni eyashɛ gbɔmɛi ni yɔɔ he fɛɛ he lɛ ŋɔɔ bɔ ni aaanyɛ hewɔ lɛ, aŋmala yɛ Hela wiemɔ mli.a No hewɔ lɛ, Hebri Ŋmalɛi lɛ ayisɛɛ babaoo ni atsɛ ni je kpo yɛ Kristofoi a-Hela Ŋmalɛi lɛ amli lɛ damɔ Septuagint lɛ nɔ.

Yɛ Yudabii diɛŋtsɛ kɛ mɛi ni etsake kɛba Yuda jamɔ mli lɛ sɛɛ lɛ, mɛi krokomɛi yɛ sɛɛ ni amɛfee klalo akɛ amɛbaakpɛlɛ Maŋtsɛyeli shɛɛ sane lɛ nɔ. Kornelio Jeŋmajiaŋnyo lɛ, “Nyɔŋmɔ jalɔ ni, ni ekɛ ewe lɛ fɛɛ sheɔ Nyɔŋmɔ gbeyei, ni efeɔ maŋbii lɛ ejurɔ pii, ni ekpaa Nyɔŋmɔ fai daa.” Yɛ afi 36 Ŋ.B. lɛ, Kornelio, eweku lɛ, kɛ mɛi krokomɛi ni ebua amɛhe naa yɛ ewe lɛ ji klɛŋklɛŋ Jeŋmajiaŋbii ni abaptisi amɛ akɛ Kristo sɛɛnyiɛlɔi. (Bɔfoi lɛ Asaji 10:1, 2, 24, 44-48; okɛto Luka 7:2-10 he.) Beni bɔfo Paulo fã gbɛ kɛtee Asia Bibioo lɛ kɛ Hela fɛɛ lɛ, eshiɛ etsɔɔ Jeŋmajiaŋbii babaoo ni sheɔ Nyɔŋmɔ gbeyei momo lɛ kɛ ‘Helabii ni jaa Nyɔŋmɔ’ lɛ fɛɛ. (Bɔfoi lɛ Asaji 13:16, 26; 17:4) Mɛni hewɔ Kornelio kɛ Jeŋmajiaŋbii krokomɛi lɛ fee klalo akɛ amɛaakpɛlɛ sanekpakpa lɛ nɔ lɛ? Septuagint lɛ ye ebua ni akɛsaa gbɛ lɛ. Woloŋlelɔ ko susu he akɛ Septuagint lɛ “ji nakai wolo titri ko ni ekaaa aahu akɛ yɛ no sɛɛ lɛ, anyɛŋ anu Kristendom kɛ anaigbɛ kusumii lɛ ashishi.”

Septuagint lɛ Laaje “Ehewalɛ Lɛ”

Yɛ naagbee mli lɛ, Septuagint lɛ ni akɛtsu nii kɛmɔ shi lɛ tee basabasafeemɔ shi yɛ Yudafoi lɛ ateŋ. Akɛ nɔkwɛmɔnɔ lɛ, beni amɛkɛ Kristofoi lɛ gbaa sane lɛ, Yudafoi lɛ kɛɛ akɛ Septuagint lɛ shishitsɔɔmɔ lɛ ejaaa. Beni shɛɔ afii ohai enyɔ Ŋ.B. lɛ, Yudafoi akuu lɛ kpoo shishitsɔɔmɔ ni tsutsu ko lɛ ajie yi akɛ ejɛ mumɔŋ lɛ kwraa. Rabifoi lɛ kpoo shishitsɔɔlɔi 72 adesã lɛ, ni amɛtsɔɔ akɛ: “Eba lɛ be ko akɛ, onukpai enumɔ tsɔɔ Torah lɛ shishi amɛha Maŋtsɛ Ptolemy yɛ Hela wiemɔ mli, ni nakai gbi lɛ ji shade gbonyo kɛha Israel taakɛ gbi nɔ ni afee tsina shika amaga lɛ ji, ejaakɛ anyɛŋ atsɔɔ Torah lɛ shishi ni eja pɛpɛɛpɛ.” Bɔni afee ni ama rabifoi lɛ asusumɔi lɛ anɔkpɛlɛmɔ ni yɔɔ kpɛŋŋ lɛ nɔ mi waa lɛ, rabifoi lɛ kɛ hegbɛ ha koni afee shishitsɔɔmɔ hee kɛya Hela wiemɔ mli. Mɔ ko ni etsake kɛba Yuda jamɔ mli, ni atsɛɔ lɛ Aquila, ni ji rabifonyo Akiba kaselɔ lɛ tsɔɔ shishi yɛ afii ohai enyɔ Ŋ.B.

Yudafoi lɛ kɛ Septuagint lɛ kpa nitsumɔ, shi ebafee “Kpaŋmɔ Hee” lɛ shishitoo nɔ kɛha Katolik Sɔlemɔ ni teɔ shi lɛ kɛyashi akɛ Jerome Latin Vulgate bato najiaŋ. Eyɛ mli akɛ anyɛŋ akɛ shishitsɔɔmɔ ko ato klɛŋklɛŋ nɔ lɛ najiaŋ kɔkɔɔkɔ moŋ, shi Septuagint lɛ tsu gbɛfaŋnɔ ko ni he hiaa yɛ Yehowa Nyɔŋmɔ he nilee kɛ e-Maŋtsɛyeli lɛ kɛtsɔ Yesu Kristo nɔ lɛ gbɛɛ-kɛ-shwãmɔ mli he nii. Septuagint lɛ ji Biblia shishitsɔɔmɔ ko ni tsake je lɛ lɛɛlɛŋ.

[Shishigbɛ niŋmai]

[He ni Mfoniri ni yɔɔ baafa 29 lɛ Jɛ]

Courtesy of Israel Antiquities Authority

[Mfoniri ni yɔɔ baafa 31]

Mɛi babaoo ni Paulo shiɛ etsɔɔ amɛ lɛ nu “Septuagint” lɛ shishi