Kasemɔ Yehowa Mɔbɔnalɛ Lɛ

“No hewɔ lɛ nyɛnaa mɔbɔ, tamɔ bɔ ni nyɛtsɛ lɛ hu naa mɔbɔ lɛ.”—LUKA 6:36.

 1. Farisifoi lɛ jie amɛhe kpo akɛ mɛi ni enaaa mɔbɔ yɛ mɛɛ gbɛ nɔ?

EYƐ mli akɛ Nyɔŋmɔ bɔ adesai yɛ esubaŋ nɔ moŋ, shi bei pii lɛ, amɛkaseee emɔbɔnalɛ lɛ. (1 Mose 1:27) Ákɛ nɔkwɛmɔnɔ lɛ, susumɔ Farisifoi lɛ ahe okwɛ. Ákɛ kuu lɛ, amɛnáaa he miishɛɛ kwraa beni Yesu jɛ mɔbɔnalɛ mli etsá nuu ko ni enine kome egbo lɛ yɛ Hejɔɔmɔ Gbi lɛ nɔ lɛ. Yɛ no najiaŋ moŋ lɛ, amɛtee Yesu yinɔ apãm “bɔ ni amɛaafee ni amɛkpata ehiɛ.” (Mateo 12:9-14) Yɛ be kroko hu mli lɛ, Yesu tsá nuu ko hu ni afɔ́ lɛ shwilafo lɛ. Shikome ekoŋŋ lɛ, “Farisifoi lɛ ateŋ mɛi komɛi” enaaa nɔ hewɔ ni esa akɛ amɛná miishɛɛ yɛ Yesu musuŋtsɔlɛ lɛ hewɔ. Shi moŋ, amɛwie amɛshi lɛ akɛ: “Nuu nɛɛ jɛɛɛ Nyɔŋmɔ ŋɔɔ, ejaakɛ eyeee hejɔɔmɔ gbi lɛ.”—Yohane 9:1-7, 16.

 2, 3. Mɛni Yesu kɛ wiemɔ ni ewie akɛ, ‘Nyɛkwɛa ni nyɛhiɛ ahia nyɛhe nɔ yɛ Farisifoi lɛ amãsha lɛ hewɔ’ lɛ tsɔɔ?

² Farisifoi lɛ asu ni ji mɔbɔnalɛ ni amɛbɛ lɛ bafee efɔŋ ni amɛfee amɛshi adesai kɛ esha ni amɛfee amɛshi Nyɔŋmɔ. (Yohane 9:39-41) Yiŋtoo kpakpa hewɔ ni Yesu bɔ ekaselɔi lɛ kɔkɔ akɛ, “Nyɛkwɛa ni nyɛhiɛ ahia nyɛhe nɔ” yɛ nɛkɛ kuu ni wóɔ amɛhe nɔ nɛɛ kɛ jamɔ kui krokomɛi, tamɔ Sadukifoi lɛ “amãsha lɛ hewɔ” lɛ. (Mateo 16:6) Akɛ mãsha tsuɔ nii yɛ Biblia lɛ mli kɛdamɔɔ shi kɛhaa esha loo fitemɔ. No hewɔ lɛ Yesu miitsɔɔ akɛ “woloŋmalɔi kɛ Farisifoi” lɛ atsɔɔmɔ lɛ baanyɛ afite jamɔ krɔŋŋ. Yɛ mɛɛ gbɛ nɔ? Kɛ shishinumɔ akɛ etsɔɔ gbɔmɛi lɛ ní amɛbu Nyɔŋmɔ Mla lɛ yɛ amɛmlai kɛ kusum nifeemɔi ni amɛ diɛŋtsɛ amɛtsɔɔ lɛ pɛ anaa, yɛ be mli ni amɛkpooɔ “nii ni he jaraa,” ní mɔbɔnalɛ fata he lɛ. (Mateo 23:23) Nɛkɛ jamɔ ni tamɔ kusum nifeemɔ nɛɛ ha Nyɔŋmɔ jamɔ batsɔ jatsu ni tsii diɛŋtsɛ.

³ Yɛ ebɛbua ni kɔɔ bi nyenyeŋtswi lɛ he lɛ fã ni ji enyɔ lɛ mli lɛ, Yesu kpá Yudafoi ajamɔ mli hiɛnyiɛlɔi lɛ asusumɔi fɔji lɛ ahe mama. Yɛ abɛbua lɛ mli lɛ, tsɛ lɛ ní feɔ Yehowa he mfoniri lɛ, miisumɔ waa ni ekɛ ebinuu lɛ he ake lɛ. Shi gbekɛ nuu lɛ nyɛminuu onukpa, ni feɔ “Farisifoi kɛ woloŋmalɔi lɛ” ahe mfoniri lɛ, hiɛ henumɔi ni yɔɔ sɔrɔto kwraa yɛ sane lɛ he.—Luka 15:2.

Nyɛminuu Mlifu

 4, 5. Bi nyenyeŋtswi lɛ nyɛminuu lɛ “laaje” yɛ mɛɛ shishinumɔ naa?

⁴ “Shi ebi nukpa lɛ yɛ ŋmɔshi. Ni beni ebaa ni ebabɛŋkɛ shia lɛ, enu saŋkui kɛ jooi ahe; ni etsɛ tsuji lɛ ekome kɛba, ni ebi lɛ akɛ: Mɛni afeɔ nɛɛ? Ni ekɛɛ lɛ akɛ: Onyɛmi lɛ eba, ni otsɛ egbe tsinabi ni ewo fɔ lɛ, ejaakɛ eshɛ edɛŋ kpintiŋŋ. Ni emli fu, ni ekpɛlɛɛɛ shia lɛ yaa.”—Luka 15:25-28.

⁵ Eyɛ faŋŋ akɛ, jeee bi nyenyeŋtswi lɛ pɛ yɔɔ naagba yɛ Yesu abɛbua lɛ mli. “Bihii enyɔ ni afee amɛhe mfoniri yɛ biɛ lɛ fɛɛ elaaje,” taakɛ wolo ko kɛɔ lɛ, “mɔ kome lɛ, kɛtsɔ nii ni ejaaa gbɛ, ní ba lɛ shi lɛ nɔ, kɛ mɔ kroko lɛ, kɛtsɔ jalɔ ni ebuɔ lɛ diɛŋtsɛ ehe, ní haaa ená sɛɛyoomɔ lɛ nɔ.” Kadimɔ akɛ jeee akɛ bi nyenyeŋtswi lɛ nyɛminuu lɛ náaa miishɛɛ kɛkɛ, shi moŋ “emli fu” hu. Hela wiemɔ ni akɛtsu nii kɛha “mlifu” lɛ shishifã diɛŋtsɛ etsɔɔɔ doo akɛ eji mlifu ni akɛbolɔɔ, shi moŋ etsɔɔ shihilɛ ni yɔɔ daa yɛ jwɛŋmɔ lɛ mli. Eyɛ faŋŋ akɛ, bi nyenyeŋtswi lɛ nyɛminuu lɛ kɛ dɔlɛ ni ehe shi waa wo emli, no hewɔ lɛ enu he akɛ esaaa akɛ ayeɔ mɔ ko ni yɛ anɔkwale mli lɛ, kulɛ esaaa akɛ eshiɔ shia kwraa lɛ sɛɛkuu he gbi jurɔ.

 6. Bi nyenyeŋtswi lɛ nyɛminuu lɛ feɔ namɛi ahe mfoniri, ni mɛni hewɔ?

⁶ Bi nyenyeŋtswi lɛ nyɛminuu lɛ feɔ mɛi ni mli fu yɛ musuŋtsɔlɛ kɛ henumɔ ni Yesu jie kpo etsɔɔ eshafeelɔi lɛ he lɛ ahe mfoniri diɛŋtsɛ. Yesu mɔbɔnalɛ lɛ tsirɛɛɛ gbɔmɛi ni buɔ amɛ diɛŋtsɛ amɛhe jalɔi nɛɛ kwraa; nakai nɔŋŋ hu amɛsusuuu miishɛɛ ni anáa yɛ ŋwɛi kɛ́ akɛ eshafeelɔ ko he ke lɛ lɛ he. Shi moŋ, Yesu mɔbɔnalɛ lɛ tée amɛ mlifu shi, ni amɛbɔi ‘nibii fɔji jwɛŋmɔ’ yɛ amɛtsuii amli. (Mateo 9:2-4) Be ko lɛ, Farisifoi lɛ amlifu lɛ naa wa waa aahu akɛ amɛhã ayatsɛ nuu ko ni Yesu tsá lɛ lɛ kɛba ni “amɛshwie lɛ” kɛjɛ kpeehe lɛ—ni tsɔɔ faŋŋ akɛ amɛshwie lɛ kwraa! (Yohane 9:22, 34) Taakɛ bi nyenyeŋtswi lɛ nyɛminuu lɛ, ní “ekpɛlɛɛɛ shia lɛ yaa” lɛ ji lɛ, Yudafoi ajamɔ mli hiɛnyiɛlɔi lɛ je gbɛ amɛkpoo kwraa beni amɛná hegbɛ akɛ ‘amɛkɛ mɛi ni nyaa lɛ aaanya’ lɛ. (Romabii 12:15) Yesu tee nɔ ekpá amɛsusumɔi fɔji lɛ ahe mama beni eyaa nɔ yɛ ebɛbua lɛ mli lɛ.

Susumɔ ni Ejaaa

 7, 8. (a) Bi nyenyeŋtswi lɛ nyɛminuu lɛ laaje bi ni eji lɛ shishinumɔ kwraa yɛ mɛɛ gbɛ nɔ? (b) Bi nukpa lɛ tamɔɔɔ etsɛ yɛ mɛɛ gbɛ nɔ?

⁷ “No hewɔ lɛ etsɛ je kpo ni ebakpa lɛ fai. Shi ehere nɔ ni ekɛɛ etsɛ lɛ akɛ: ‘Kwɛ, afii abɔ sɔŋŋ ni misɔmɔo, ni mitɔ̃ko okita ko nɔ dã, ni mi lɛ, ohako mi tookpakpo ko tete dã, koni mikɛ mishieŋtsɛmɛi lɛ aná tsuijurɔ; shi ŋmɛnɛ ni nɛkɛ obi nɛɛ ní kɛ ajwamaŋi eyaye onii lɛ ba lɛ, ogbe tsinabi ni éwo fɔ lɛ oha lɛ.’ ”—Luka 15:28-30.

⁸ Bi nyenyeŋtswi lɛ nyɛminuu lɛ kɛ nɛkɛ wiemɔi nɛɛ tsɔɔ faŋŋ akɛ elaaje anɔkwa shishinumɔ ni yɔɔ bi ni eji lɛ he lɛ kwraa. Esɔmɔ etsɛ lɛ tamɔ bɔ ni nitsulɔ sɔmɔɔ enitsumɔtsɛ lɛ pɛpɛɛpɛ. Taakɛ ekɛɛ etsɛ lɛ: “Misɔmɔo.” Lɛɛlɛŋ, binuu onukpa nɛɛ shiko shia ni etɔ̃ko etsɛ kita ko nɔ dã. Shi ani suɔmɔ ji nɔ ni kanyaa toiboo ni efeɔ lɛ? Ani ená anɔkwa miishɛɛ yɛ etsɛ lɛ sɔɔmɔ mli, aloo yɛ no najiaŋ moŋ lɛ, ekpalaŋ fiofio kɛtee shikpilikpiifeemɔ diɛŋtsɛ mli, ni eheɔ ehe eyeɔ akɛ eji binuu kpakpa akɛni etsuɔ nitsumɔi ni esa akɛ etsu “yɛ ŋmɔshi” lɛ hewɔ kɛkɛ? Kɛ́ eji binuu ni etuu ehe eha lɛɛlɛŋ lɛ, mɛni hewɔ ejieee etsɛ lɛ jwɛŋmɔ pɛpɛɛpɛ kpo lɛ? Beni aha lɛ hegbɛ ní ekɛaajie mɔbɔnalɛ kpo etsɔɔ enyɛminuu lɛ, mɛni hewɔ gbɛ ko kwraa bɛ etsui mli kɛha musuŋtsɔlɛ lɛ?—Okɛto Lala 50:20-22 he.

 9. Tsɔɔmɔ bɔ ni Yudafoi ajamɔ mli hiɛnyiɛlɔi lɛ tamɔ bi nukpa lɛ amɛha lɛ mli.

⁹ Yudafoi ajamɔ mli hiɛnyiɛlɔi lɛ tamɔ binuu onukpa nɛɛ pɛpɛɛpɛ. Amɛheɔ amɛyeɔ akɛ amɛyeɔ Nyɔŋmɔ anɔkwa akɛni amɛkɛ amɛhe kpɛtɛɔ mlai ahe shɛii lɛ hewɔ. Eji anɔkwale akɛ, toiboo he miihia. (1 Samuel 15:22) Shi bɔ ni amɛmaa nitsumɔi anɔ mi fe nine lɛ ha jamɔ ni amɛjáa Nyɔŋmɔ lɛ batsɔ nifeemɔ folo ko kɛkɛ ní henumɔ bɛ mli, kponɔgbɛ hetuu-kɛhamɔ ko kɛkɛ ni anɔkwa mumɔŋ shihilɛ bɛ mli. Kusum nifeemɔi ehe amɛjwɛŋmɔi fɛɛ. Amɛbɛ suɔmɔ ko kwraa yɛ amɛtsuii amli. Hɛɛ, amɛbu gbɔmɛi foji lɛ akɛ amɛtamɔ amɛnaji ahe mulu, ni amɛkɛ heguɔgbee po tsɛɔ amɛ akɛ gbɔmɛi ní “alomɔ amɛ.” (Yohane 7:49) Yɛ anɔkwale mli lɛ, te aaafee tɛŋŋ ní Nyɔŋmɔ aaaná nitsulɔi ni tamɔ nɛkɛ lɛ anitsumɔi ahe miishɛɛ, beni amɛtsui etsi ehe kɛjɛ ehe kwraa lɛ?—Mateo 15:7, 8.

10. (a) Mɛni hewɔ wiemɔi ni ji, “Mɔbɔnalɛ mitaoɔ, ni jeee afɔle” lɛ ji ŋaawoo ni sa jogbaŋŋ lɛ? (b) Te mɔbɔnalɛ ni abɛ lɛ ji hiɛdɔɔ sane eha tɛŋŋ?

¹⁰ Yesu kɛɛ Farisifoi lɛ akɛ “nyɛyaa ni nyɛyakasea nɔ ni ji enɛ shishi: ‘Mɔbɔnalɛ mitaoɔ, ni jeee afɔle!’ ” (Mateo 9:13; Hoshea 6:6) Nibii ní amɛkɛyeɔ klɛŋklɛŋ gbɛhe lɛ efutu, ejaakɛ kɛ́ mɔbɔnalɛ bɛ lɛ, sɛɛnamɔ ko kwraa baŋ amɛ afɔleshaai lɛ ahe. Enɛ ji hiɛdɔɔ sane diɛŋtsɛ, ejaakɛ Biblia lɛ kɛɔ akɛ akaneɔ “yiwalɔi” lɛ afataa mɛi ni Nyɔŋmɔ buɔ amɛ akɛ ‘amɛsa gbele’ lɛ ahe. (Romabii 1:31, 32) No hewɔ lɛ, ebɛ naakpɛɛ akɛ Yesu wie akɛ ákɛ kuu lɛ, nɔ ni baaba jamɔ mli hiɛnyiɛlɔi lɛ anɔ ji naanɔ hiɛkpatamɔ. Eka shi faŋŋ akɛ, amɛ yiwalɛ subaŋ lɛ ji nɔ ni titri ni ha amɛfee mɛi ni sa nɛkɛ kojomɔ nɛɛ. (Mateo 23:33) Shi ekolɛ abaanyɛ aye abua aŋkroaŋkroi komɛi yɛ kuu nɛɛ mli. Yɛ ebɛbua lɛ naamuu mli lɛ, Yesu bɔ mɔdɛŋ akɛ eeetsake Yudafoi nɛɛ asusumɔ kɛtsɔ wiemɔi ni tsɛ lɛ kɛ ebinuu onukpa lɛ wie lɛ nɔ. Nyɛhaa wɔkwɛa bɔ ni efee enɛ eha.

Tsɛ ko Mɔbɔnalɛ

11, 12. Te tsɛ lɛ ni yɔɔ Yesu abɛbua lɛ mli lɛ ka akɛ ekɛ ebinuu onukpa lɛ baasusu saji ahe eha tɛŋŋ, ni mɛni ekolɛ ehe hiaa yɛ wiemɔ kuku ni ji “onyɛmi” lɛ ni tsɛ lɛ kɛtsu nii lɛ mli?

¹¹ “Ni ekɛɛ lɛ akɛ: Mibi, bo lɛ, okɛ mi yɔɔ daa nɛɛ, ni nɔ fɛɛ nɔ ni miyɔɔ lɛ onɔŋ; shi esa akɛ wɔnya ni wɔmii ashɛ wɔhe; ejaakɛ onyɛmi nɛɛ gbo, ni ehiɛ etsɛ̃ ekoŋŋ, elaaje, ni ana lɛ.”—Luka 15:31, 32.

¹² Kadimɔ akɛ tsɛ lɛ kɛ wiemɔ ni ji “onyɛmi” lɛ tsu nii. Mɛni hewɔ? Ojogbaŋŋ, kaimɔ akɛ mra mli kɛtsɔ hiɛ, beni ekɛ etsɛ lɛ wieɔ lɛ, binuu onukpa lɛ tsɛ́ bi nyenyeŋtswi lɛ akɛ “obi”—jeee “minyɛmi.” Etamɔ nɔ ni ekpɛlɛɛɛ weku tsakpãa ni yɔɔ ekɛ enyɛmi lɛ teŋ lɛ nɔ kwraa. No hewɔ lɛ, amrɔ nɛɛ, nɔ ni tsɛ lɛ kɛɔ ebi nukpa lɛ ji akɛ: ‘Jeee akɛ eji mibinuu kɛkɛ. Onyɛmi ni, bo diɛŋtsɛ oheloo kɛ lá. Oyɛ yiŋtoo kpakpa ni ooodamɔ nɔ oná esɛɛkuu lɛ he miishɛɛ!’ Esa akɛ kulɛ Yesu shɛɛ sane lɛ afee faŋŋ kɛha Yudafoi ahiɛnyiɛlɔi lɛ. Eshafeelɔi ni amɛgbe amɛhe guɔ lɛ ji ‘amɛnyɛmimɛi’ diɛŋtsɛ. Yɛ anɔkwale mli lɛ, “gbɔmɔ ko bɛ shikpɔŋ lɛ nɔ, ni ji jalɔ, ni feɔ ekpakpa ni efeee esha.” (Jajelɔ 7:20) Belɛ, Yudafoi ni ale amɛ waa lɛ yɛ yiŋtoo kpakpa ni amɛaadamɔ nɔ amɛná miishɛɛ kɛ́ eshafeelɔi tsake amɛtsui.

13. Mɛɛ sanebimɔ ni sa hesusumɔ jogbaŋŋ bɔ ni Yesu abɛbua lɛ ba naagbee trukaa lɛ shiɔ ehaa wɔ?

¹³ Yɛ tsɛ lɛ faikpamɔ lɛ sɛɛ lɛ, abɛbua lɛ ba naagbee trukaa. Etamɔ nɔ ni Yesu miitao ni etoibolɔi lɛ diɛŋtsɛ amu saji anaa amɛha amɛ diɛŋtsɛ amɛhe. Bɔ fɛɛ bɔ ni bi nukpa lɛ fee enii eha lɛ fɛɛ sɛɛ lɛ, sanebimɔ ni kã toibolɔi lɛ ateŋ mɔ fɛɛ mɔ hiɛ ji akɛ, ‘Ani obaaná miishɛɛ ni anáa yɛ ŋwɛi kɛ́ eshafeelɔ ko tsake etsui lɛ eko?’ Kristofoi ni yɔɔ ŋmɛnɛ lɛ hu yɛ hegbɛ ni amɛkɛaajie bɔ ni amɛhaa nakai sanebimɔ lɛ hetoo amɛhaa lɛ kpo amɛtsɔɔ. Yɛ mɛɛ gbɛ nɔ?

Nyɔŋmɔ Mɔbɔnalɛ lɛ Kasemɔ Ŋmɛnɛ

14. (a) Mɛɛ gbɛ nɔ wɔbaanyɛ wɔkɛ Paulo ŋaawoo ni anaa yɛ Efesobii 5:1 lɛ atsu nii yɛ, yɛ mɔbɔnalɛ he sane lɛ mli? (b) Mɛɛ Nyɔŋmɔ mɔbɔnalɛ lɛ he shishinumɔ ni ejaaa esa akɛ wɔkwɛ wɔhe nɔ jogbaŋŋ yɛ he?

¹⁴ Paulo wo Efesobii lɛ ŋaa akɛ: “Nyɛfea Nyɔŋmɔ kaselɔi, tamɔ bii ni asumɔɔ.” (Efesobii 5:1) No hewɔ lɛ, akɛ Kristofoi lɛ, esa akɛ wɔjie hiɛsɔɔ kpo yɛ Nyɔŋmɔ mɔbɔnalɛ lɛ he, ni wɔdu wɔwo wɔtsuii amli tɔ̃ɔ, koni no sɛɛ lɛ wɔjie su nɛɛ kpo yɛ bɔ ni wɔkɛ mɛi krokomɛi yeɔ haa lɛ mli. Shi kɛlɛ, kɔkɔbɔɔ he miihia jogbaŋŋ. Esaaa akɛ anuɔ Nyɔŋmɔ mɔbɔnalɛ lɛ shishi akɛ ebaa bɔ ni hiɛdɔɔ yɔɔ esha ko mli lɛ shi. Ákɛ nɔkwɛmɔnɔ lɛ, ekolɛ mɛi komɛi yɛ ní kɛ yiŋflɛflɛfeemɔ baasusu akɛ, ‘Kɛ́ mifee esha lɛ, manyɛ masɔle maha Nyɔŋmɔ be fɛɛ be kɛha eshaifaa, ni ebaana mi mɔbɔ.’ Subaŋ ni tamɔ nɛkɛ baafee nɔ ni Biblia ŋmalɔ Yuda tsɛ́ lɛ akɛ ‘ŋɔ ni aŋɔɔ wɔ-Nyɔŋmɔ duromɔ lɛ abɔɔ nyenyeŋtswi’ lɛ. (Yuda 4) Eyɛ mli akɛ mɔbɔnalɔ ji Yehowa moŋ, shi kɛ́ ekɛ eshafeelɔi ni tsakeee amɛtsui lɛ miiye lɛ, “ehaaa mɔ ko mɔ ko aye ehe kwraa.”—2 Mose 34:7; okɛto Yoshua 24:19; 1 Yohane 5:16 he.

15. (a) Mɛni hewɔ ehe hiaa ni onukpai lɛ titri ahiɛ mɔbɔnalɛ he jwɛŋmɔ ni ŋmɛɔ pɛpɛɛpɛ mli lɛ? (b) Eyɛ mli akɛ amɛŋmɛŋ efɔŋfeemɔ ni hiɛ kã he lɛ gbɛ moŋ, shi mɛni esa akɛ onukpai lɛ abɔ mɔdɛŋ akɛ amɛaafee, ni mɛni hewɔ?

¹⁵ Yɛ gbɛ kroko nɔ lɛ, ehe miihia ni wɔkwɛ wɔhe nɔ jogbaŋŋ nakai nɔŋŋ koni wɔkafee nɔ kroko lɛ hu kɛteke nɔ—koni wɔkafee keketee ní wɔkaná kojomɔ henumɔ hu wɔshi mɛi ni jieɔ anɔkwa tsuitsakemɔ kɛ dɔlɛ ni Nyɔŋmɔ gbeyeishemɔ yɔɔ mli kpo yɛ eshai ni amɛfee lɛ ahewɔ lɛ. (2 Korintobii 7:11) Akɛni akɛ Yehowa tooi lɛ akwɛmɔ ewo onukpai lɛ adɛŋ hewɔ lɛ, ehe miihia ni amɛhiɛ susumɔ ni ŋmɛɔ pɛpɛɛpɛ mli yɛ enɛ gbɛfaŋ, titri lɛ kɛ́ amɛmiitsu kojomɔ saji ahe nii. Esa akɛ aha Kristofoi asafo lɛ he atse be fɛɛ be, ni eja gbɛ yɛ Ŋmalɛ naa akɛ ‘ajie mɔ fɔŋ lɛ’ kɛtsɔ shwiemɔ ni aaashwie lɛ kɛjɛ asafo lɛ mli lɛ nɔ. (1 Korintobii 5:11-13) Yɛ nakai beaŋ nɔŋŋ lɛ, ehi jogbaŋŋ akɛ aaajie mɔbɔnalɛ kpo kɛji akɛ nɔdaamɔ nɔ ni yɔɔ faŋŋ yɛ kɛha nakai feemɔ. No hewɔ lɛ eyɛ mli akɛ onukpai lɛ eŋmɛɛɛ efɔŋfeemɔ ni hiɛ kã he lɛ gbɛ moŋ, shi amɛbɔɔ mɔdɛŋ akɛ amɛaatao suɔmɔ kɛ mɔbɔnalɛ gbɛ, yɛ jalɛsaneyeli husui amli. Amɛhiɛ hiɔ amɛhe nɔ yɛ Biblia shishitoo mla nɛɛ he be fɛɛ be, akɛ: “Kojomɔ mli lɛ, mɔ ni enaaa mɔbɔ lɛ anaŋ lɛ mɔbɔ: shwã mɔbɔnalɛ shwãa eshiɔ kojomɔ.”—Yakobo 2:13; Abɛi 19:17; Mateo 5:7.

16. (a) Okɛ Biblia lɛ atsu nii ni okɛtsɔɔ bɔ ni Yehowa sumɔɔ ni mɛi ni etɔ̃ lɛ aku amɛsɛɛ kɛba eŋɔɔ ekoŋŋ lɛɛlɛŋ. (b) Wɔbaanyɛ wɔtsɔɔ akɛ wɔ hu wɔhereɔ eshafeelɔi ni tsakeɔ amɛtsui lɛ kɛbaa ekoŋŋ yɛ mɛɛ gbɛ nɔ?

¹⁶ Bi nyenyeŋtswi lɛ abɛbua lɛ feɔ lɛ faŋŋ akɛ Yehowa shweɔ ni mɛi ni duɔ gbɛ lɛ aku amɛsɛɛ amɛba eŋɔɔ. Yɛ anɔkwale mli lɛ, ekpãa ninefɔ̃ɔ mli ehaa amɛ aahu kɛyashiɔ be mli ni amɛtsɔɔ faŋŋ akɛ hiɛnɔkamɔ ko kwraa bɛ kɛha amɛ. (Ezekiel 33:11; Maleaki 3:7; Romabii 2:4, 5; 2 Petro 3:9) Taakɛ bi nyenyeŋtswi lɛ tsɛ lɛ ji lɛ, Yehowa kɛ woo haa mɛi ni kuɔ amɛsɛɛ amɛbaa lɛ, ni ehereɔ amɛ kɛbaa ekoŋŋ akɛ weku lɛ mli bii diɛŋtsɛ kɛmɔ shi. Ani ookase Yehowa yɛ enɛ gbɛfaŋ? Kɛ́ ahe heyelilɔ ko ni ashwie lɛ be saŋŋ nɛ kɛba asafo lɛ mli ekoŋŋ lɛ, te ofeɔ onii yɛ he ohaa tɛŋŋ? Wɔle momo akɛ ‘miishɛɛ baa yɛ ŋwɛi.’ (Luka 15:7) Shi ani miishɛɛ baa shikpɔŋ nɔ, yɛ nyɛ asafo lɛ mli, yɛ otsui mli po? Aloo, taakɛ bi nukpa ni yɔɔ abɛbua lɛ mli lɛ fee lɛ, ani edɔɔ wɔ fioo, tamɔ nɔ ni esaaa akɛ ahereɔ mɔ ko ni kulɛ esaaa akɛ eshiɔ Nyɔŋmɔ asafoku lɛ kwraa kɛyaa lɛ ekoŋŋ?

17. (a) Mɛɛ shihilɛ ko ba Korinto yɛ klɛŋklɛŋ afii oha lɛ mli, ni te Paulo wo mɛi ni yɔɔ asafo lɛ mli lɛ ŋaa ní amɛtsu sane lɛ he nii amɛha tɛŋŋ? (b) Mɛni hewɔ anyɛɔ akɛ Paulo ŋaawoo lɛ tsuɔ nii lɛ, ni wɔbaanyɛ wɔkɛtsu nii ŋmɛnɛ yɛ mɛɛ gbɛ nɔ? (Kwɛmɔ akrabatsa ni yɔɔ ninejurɔgbɛ lɛ hu.)

¹⁷ Bɔni afee ni eye ebua wɔ ní wɔpɛi wɔ diɛŋtsɛ wɔmli wɔkwɛ yɛ enɛ gbɛfaŋ lɛ, susumɔ nɔ ni ba aaafee afi 55 Ŋ.B. yɛ Korinto lɛ he okwɛ. Yɛ naagbee lɛ, nuu ko ni yɔɔ jɛmɛ, ní ashwie lɛ kɛjɛ asafo lɛ mli lɛ tsake kɛba jeŋba kpakpa shihilɛ mli ekoŋŋ. Mɛni esa akɛ nyɛmimɛi lɛ afee? Ani esa akɛ amɛbu etsuitsakemɔ lɛ kɛ yiŋkɔshikɔshifeemɔ, ní amɛya nɔ amɛkpoo lɛ? Nɔ ni tamɔɔɔ nakai lɛ, Paulo wo Korintobii lɛ hewalɛ akɛ: “Agbɛnɛ nyɛŋɔfaa lɛ, ni nyɛshɛjea emii moŋ, koni ŋkɔmɔyeli tuutu lɛ akabasu etsui. No hewɔ lɛ miikpa nyɛ fai ni nyɛha nyɛsuɔmɔ lɛ mli awa yɛ enɔ.” (2 Korintobii 2:7, 8) Bei pii lɛ, hiɛgbele kɛ nijiaŋwujee henumɔi nyɛɔ eyeɔ efɔŋfeelɔi ni etsake amɛtsui lɛ anɔ kwraa. No hewɔ lɛ, ehe miihia ni ama nɔ mi aha mɛnɛɛmɛi akɛ amɛnanemɛi heyelilɔi lɛ kɛ Yehowa hu sumɔɔ amɛ. (Yeremia 31:3; Romabii 1:12) Enɛ he miihia waa. Mɛni hewɔ?

18, 19. (a) Korintobii lɛ tsɔɔ kɛtsɔ hiɛ akɛ amɛjie mlihilɛ kpo tsɔ̃ yɛ mɛɛ gbɛ nɔ? (b) Mɔbɔnalɛ ni abɛ lɛ baanyɛ aha ‘Satan nine ashɛ’ Korintobii lɛ ‘anɔ’ yɛ mɛɛ gbɛ nɔ?

¹⁸ Beni ewoɔ Korintobii lɛ ŋaa akɛ amɛjie eshaifaa kpo lɛ, yiŋtoi ni Paulo kɛha lɛ ateŋ ekome ji akɛ, “koni satan akaye wɔ amim, ejaakɛ ejwɛŋmɔi lɛ aŋɔteee wɔ.” (2 Korintobii 2:11) Mɛni etsɔɔ lɛ? Ojogbaŋŋ, ehe bahia ni Paulo atsɔ hiɛ akã Korintobii asafo lɛ hiɛ akɛ amɛjie mlihilɛ kpo tsɔ̃. Amɛŋmɛ nɛkɛ nuu nɛɛ nɔŋŋ gbɛ ni eeya nɔ kɛ esha ni efeɔ lɛ ni enaaa ehe toigbalamɔ ko. Enɛ ni amɛfee lɛ hewɔ lɛ, asafo lɛ—titri lɛ emli onukpai lɛ—kɛ amɛhe yawo Satan dɛŋ, ejaakɛ kulɛ ebaasumɔ ni ekɛ asafo lɛ awo heguɔgbee shihilɛ mli.—1 Korintobii 5:1-5.

¹⁹ Kɛ́ amɛkpalaŋ kɛtee afã kroko lɛ hu kwraa ni amɛsumɔɔɔ ni amɛkɛ mɔ ni etɔ̃ ní eshwa ehe lɛ he ake lɛ lɛ, no lɛ Satan nine baashɛ amɛnɔ ekoŋŋ kɛjɛ afã kroko hu. Yɛ mɛɛ gbɛ nɔ? Kɛ shishinumɔ akɛ ebaanyɛ ekɛ amɛ keketeefeemɔ kɛ yitsoŋwalɛ lɛ atsu nii yɛ gbɛ fɔŋ nɔ. Kɛ́ eshafeelɔ ni eshwa ehe lɛ baafee mɔ ni ‘ŋkɔmɔyeli tuutu miisu etsui’—aloo taakɛ Today’s English Version eŋma lɛ, “eye ŋkɔmɔ aahu akɛ enijiaŋ je wui kwraa lɛ”—kwɛ sɔ̃ ni tsii diɛŋtsɛ ni onukpai lɛ baatere yɛ Yehowa hiɛ! (Okɛto Ezekiel 34:6; Yakobo 3:1 he.) Yɛ be mli ní ebɔ esɛɛnyiɛlɔi lɛ kɔkɔ yɛ “bibii nɛɛ ateŋ mɔ kome” nanetɔ̃tɔ̃mɔ he lɛ sɛɛ lɛ, Yesu kɛ yiŋtoo kpakpa wie akɛ: “Nyɛkwɛa nyɛhe ni ahia! Kɛji onyɛmi tɔ̃ onɔ lɛ, kã ehiɛ; ni kɛji eshwa ehe lɛ, ŋɔɔfa lɛ.”a—Luka 17:1-4; wɔma efã ko nɔ mi.

20. Kɛ́ eshafeelɔ ko tsake etsui lɛ, miishɛɛ baa ŋwɛi kɛ shikpɔŋ nɔ fɛɛ yɛ mɛɛ gbɛ nɔ?

²⁰ Mɛi akpei abɔ ni kuɔ amɛsɛɛ kɛbaa jamɔ krɔŋŋ mli ekoŋŋ daa afi lɛ daa shi waa yɛ mɔbɔnalɛ ni Yehowa ekpã mli eha amɛ lɛ he. “Mikaiii mishihilɛ mli be kroko ní miná nɔ ko kwraa he miishɛɛ tamɔ nɛkɛ dã,” taakɛ nyɛmiyoo Kristofonyo ko wie yɛ hemɔ ni ahe lɛ kɛba asafo lɛ mli ekoŋŋ lɛ he lɛ. Yɛ anɔkwale mli lɛ, emiishɛɛ lɛ jijeɔ yɛ ŋwɛibɔfoi lɛ ateŋ. Eba akɛ wɔ hu wɔɔfata ‘miishɛɛ ni baa yɛ ŋwɛi’ kɛji eshafeelɔ ko tsake etsui lɛ he. (Luka 15:7) Kɛ́ wɔfee nakai lɛ, belɛ wɔmiikase Yehowa mɔbɔnalɛ lɛ.

[Shishigbɛ niŋmai]

Kɛha Emlitii

◻ Bi nyenyeŋtswi lɛ nyɛminuu lɛ tamɔ Yudafoi ajamɔ mli hiɛnyiɛlɔi lɛ yɛ mɛɛ gbɛ nɔ?

◻ Bi nyenyeŋtswi lɛ nyɛminuu lɛ laaje bi ni eji lɛ he anɔkwa shishinumɔ yɛ mɛɛ gbɛ nɔ?

◻ Kɛ́ wɔmiisusu Nyɔŋmɔ mɔbɔnalɛ lɛ he lɛ, mɛɛ hei enyɔ esaaa akɛ wɔfeɔ nii kɛtekeɔ nɔ?

◻ Wɔbaanyɛ wɔkase Nyɔŋmɔ mɔbɔnalɛ lɛ ŋmɛnɛ yɛ mɛɛ gbɛ nɔ?

[Akrabatsa ni yɔɔ baafa 17]

‘NYƐHAA NYƐSUƆMƆ LƐ MLI AWAA YƐ ENƆ’

Paulo kɛɛ Korintobii asafo lɛ yɛ efɔŋfeelɔ ni ashwie lɛ, ni tsake etsui lɛ he akɛ: “Miikpa nyɛ fai ni nyɛha nyɛsuɔmɔ lɛ mli awa yɛ enɔ.” (2 Korintobii 2:8) Hela wiemɔ ni atsɔɔ shishi akɛ ‘aha emli awa’ lɛ ji mla naa wiemɔ ko ni shishi ji “awo mli hewale.” Hɛɛ, ehe miihia ni mɛi ni mɛi ni aheɔ amɛ kɛbaa asafo lɛ mli ekoŋŋ lɛ anu he akɛ asumɔɔ amɛ, ni ákɛ aahere amɛ atuu ekoŋŋ akɛ asafo lɛ mli bii.

Shi kɛlɛ, esa akɛ wɔkai akɛ asafo lɛ mli bii lɛ ateŋ mɛi babaoo leee shihilɛi diɛŋtsɛ ni ba ni ha ashwie mɔ lɛ kɛjɛ asafo lɛ mli loo asaa ahe lɛ kɛba asafo lɛ mli ekoŋŋ lɛ. Kɛfata he lɛ, ekolɛ mɛi komɛi yɛ asafo lɛ mli ni mɔ ni eshwa ehe lɛ nɔ fɔŋ feemɔ lɛ sa amɛhe diɛŋtsɛ loo eye amɛ awui—ekolɛ yɛ be kpalaŋŋ ko mli. No hewɔ lɛ, akɛni saji nɛɛ dɔɔ amɛ waa hewɔ lɛ, kɛ́ atswa adafi akɛ asaa ahe mɔ lɛ kɛba asafo lɛ mli ekoŋŋ lɛ, shishinumɔ yɛ he akɛ wɔwieŋ wiemɔi ni wɔkɛaahere lɛ ekoŋŋ lɛ amrɔ nɔŋŋ, kɛyashi be mli ni wɔɔnyɛ wɔfee nakai yɛ wɔkɛ mɔ lɛ diɛŋtsɛ teŋ.

Kwɛ hemɔkɛyeli hewalɛwoo nɔ̃ ni eji kɛha mɛi ni ahe amɛ kɛba asafo lɛ mli ekoŋŋ lɛ akɛ amɛaale akɛ ahereɔ amɛ kɛbaa ekoŋŋ akɛ Kristofoi asafo lɛ mli bii! Wɔbaanyɛ wɔwo mɛi ni eshwa amɛhe nɛɛ hewalɛ kɛtsɔ sane ni wɔkɛ amɛ aaagba kɛ naannyobɔɔ mli ŋɔɔmɔ ni wɔkɛ amɛ aaaná yɛ Maŋtsɛyeli Asa lɛ nɔ, yɛ shiɛmɔ nitsumɔ lɛ mli, Kɛ bei krokomɛi hu ni sa mli lɛ nɔ. Nɛkɛ gbɛ ni wɔtsɔɔ nɔ wɔhaa suɔmɔ ni wɔyɔɔ wɔhaa suɔlɔi nɛɛ mli waa, loo wɔwoɔ mli hewalɛ lɛ, etsɔɔɔ akɛ belɛ wɔmiibu hiɛdɔɔ ni yɔɔ eshai ni amɛfee lɛ amli lɛ akɛ nɔ ko ni he ehiaaa. Shi moŋ, wɔfataa ŋwɛibɔfoi akpekpei abɔ lɛ ahe kɛnáa miishɛɛ yɛ anɔkwale ni eji akɛ amɛkpoo eshafeemɔ gbɛ lɛ ni amɛku amɛsɛɛ kɛba Yehowa ŋɔɔ lɛ he.—Luka 15:7.

[Mfoniri ni yɔɔ baafa 15]

Bi nukpa lɛ sumɔɔɔ ni ená miishɛɛ yɛ enyɛminuu lɛ sɛɛkuu lɛ he