Amɛfee Yehowa Suɔmɔnaa Nii

Yesu Ná Be Eha Gbekɛbii

ESHWƐ fioo ni Yesu afii etɛ kɛ fã sɔɔmɔ lɛ baaba enaagbee. Etsɛŋ ni ebaabote Yerusalem ni epiŋ yɛ hejaramɔ gbele mli. Ele nɔ ni kã ehiɛ ni baaba lɛ jogbaŋŋ, ejaakɛ ekɛɛ ekaselɔi lɛ akɛ: “Akɛ gbɔmɔ bi lɛ aaawo gbɔmɛi adɛŋ, ni amɛaagbe lɛ.”—Marko 9:31.

Eka shi faŋŋ akɛ, Yesu baasumɔ ni ekɛ gbi fɛɛ gbi, ŋmɛlɛtswaa fɛɛ ŋmɛlɛtswaa, be fɛɛ be ni eshwɛ lɛ atsu nii jogbaŋŋ. Ehe miihia ni ekwɛ ekaselɔi lɛ anɔ lolo. Yesu na akɛ ŋaawoo ni mli wa ni kɔɔ heshibaa kɛ oshara ni yɔɔ ni baatɔtɔ amɛnaji lɛ he lɛ he miihia amɛ waa lolo. (Marko 9:35-37, 42-48) Gbalashihilɛ, gbalamlitsemɔ, kɛ oshijayeli he tsɔsemɔ hu he miihia amɛ. (Mateo 19:3-12) Akɛni Yesu le akɛ etsɛŋ ni ebaagbo hewɔ lɛ, ŋwanejee ko bɛ he akɛ ekɛ hehiamɔ gbala saji amli fitsofitso etsɔɔ ekaselɔi lɛ. Be ji nɔ ni he hiaa waa—anɔkwale ko ni ha nɔ ni Yesu fee kɛnyiɛ sɛɛ lɛ fee nɔ ni sa kadimɔ waa diɛŋtsɛ lɛ.

Yesu Here Gbekɛbii Atuu

Biblia mli sane lɛ kɛɔ akɛ: “Amɛkɛ gbekɛbii bibii ba eŋɔɔ, koni etara amɛhe.” Beni kaselɔi lɛ na enɛ lɛ, amɛha amɛle oya nɔŋŋ akɛ amɛkpɛlɛɛɛ. Ekolɛ amɛsusu akɛ Yesu he hiaa tsɔ, aloo ebɛ dekã kwraa ni ekɛaasusu gbekɛbii ahe. Shi agbɛnɛ kwɛ bɔ ni ebaafee kaselɔi lɛ naakpɛɛ eha beni Yesu mlifu amɛ lɛ! Ekɛɛ amɛ akɛ: “Nyɛhaa gbekɛbii lɛ abaa miŋɔɔ, ni nyɛkatsia amɛ gbɛ; ejaakɛ gbɔmɛi ni tamɔ nakai anɔ ji Nyɔŋmɔ maŋtsɛyeli lɛ.” Kɛkɛ ni Yesu kɛfata he akɛ: “Lɛɛlɛŋ, miikɛɛ nyɛ akɛ, Mɔ fɛɛ mɔ ni heee Nyɔŋmɔ maŋtsɛyeli lɛ tamɔ gbekɛ bibioo ko lɛ, eboteŋ mli kwraa.”—Marko 10:13-15, NW.

Yesu na sui kpakpai komɛi yɛ gbekɛbii lɛ amli. Bei pii lɛ amɛsumɔɔ ni amɛbote saji amli veveeve, ni amɛheɔ saji amɛyeɔ. Amɛkpɛlɛɔ amɛfɔlɔi awiemɔi anɔ, ni amɛfaa amɛhe po yɛ gbekɛbii krokomɛi ahiɛ. Bɔ ni amɛkpɛlɛɔ nii anɔ amɛhaa, bɔ ni anyɛɔ atsɔɔ amɛ nii ni amɛboɔ toi lɛ ji nɔ ko ni esa akɛ mɛi fɛɛ ni miisumɔ akɛ amɛbote Nyɔŋmɔ Maŋtsɛyeli lɛ mli lɛ akase. Taakɛ Yesu kɛɛ lɛ, “gbɔmɛi ni tamɔ nɛkɛ anɔ ji Nyɔŋmɔ maŋtsɛyeli lɛ.”—Okɛto Mateo 18:1-5, NW he.

Shi jeee nɔkwɛmɔnɔ kɛkɛ Yesu kɛ nɛkɛ gbekɛbii nɛɛ feɔ. Sane lɛ fee lɛ faŋŋ akɛ, Yesu sumɔɔ ni ehi gbekɛbii ateŋ lɛɛlɛŋ. Marko bɔ amaniɛ akɛ, Yesu ‘loo amɛ atuu, ni ekɛ eniji shwie amɛnɔ, ni ejɔɔ amɛ.’ (Marko 10:16) Marko pɛ wie suɔmɔ he fitsofitso kɛfata he akɛ Yesu ‘loo gbekɛbii lɛ atuu.’a No hewɔ lɛ, Yesu fee nii fe bɔ ni onukpai ni kɛ gbekɛbii lɛ ba Yesu ŋɔɔ akɛ ekɛ ‘eniji ashwie’ amɛnɔ kɛkɛ lɛ kpa gbɛ.

Mɛni hewɔ ehe hiaa ni Yesu kɛ ‘eniji ashwie’ gbekɛbii lɛ anɔ? Wiemɔ ko bɛ biɛ ni tsɔɔ jamɔŋ nifeemɔ ko, tamɔ baptisimɔ. Eyɛ mli akɛ yɛ bei komɛi amli lɛ, niji ni akɛshwieɔ mɔ nɔ lɛ tsɔɔ halamɔ ni ahala mɔ ko kɛha nitsumɔ moŋ, shi yɛ ekrokomɛi amli lɛ etsɔɔ jɔɔmɔ kɛkɛ ni akɛmiiha. (1 Mose 48:14; Bɔfoi lɛ Asaji 6:6) No hewɔ lɛ, ekolɛ Yesu miijɔɔ gbekɛbii lɛ kɛkɛ.

Yɛ nifeemɔ fɛɛ nifeemɔ mli lɛ, Marko kɛ wiemɔ ni mli wa ni tsɔɔ “jɔɔmɔ” (ka·teu·lo·geʹo) tsu nii, ni ekɛtsɔɔ nɔ ko ni mli wa. Enɛ tsɔɔ akɛ Yesu jɛ suɔmɔ kɛ miishɛɛ mli ejɔɔ gbekɛbii lɛ waa diɛŋtsɛ. Eyɛ faŋŋ akɛ enaaa gbekɛbii lɛ akɛ jatsu ko ni fiteɔ mɔ be.

Nikasemɔ Kɛha Wɔ

Gbɛ ni Yesu tsɔ nɔ ekɛ gbekɛbii kɛ onukpai ye eha lɛ ejeee amɛnijiaŋ wui, asaŋ ebaaa amɛ shi hu. Wolo ko tsɔɔ akɛ: “Ekolɛ eŋmɔɔ kɛ miishɛɛ diɛŋtsɛ.” Belɛ ebɛ naakpɛɛ mɔ akɛ onukpai kɛ gbekɛbii fɛɛ nu he akɛ amɛyɛ shweshweeshwe yɛ emasɛi. Kɛ wɔsusu Yesu nɔkwɛmɔnɔ lɛ he lɛ, wɔbaanyɛ wɔbi wɔhe akɛ, ‘Ani gbɔmɛi naa mi akɛ mɔ ni anyɛɔ abɛŋkɛɔ lɛ?’ ‘Ani mibɛ dekã kwraa, ni no hewɔ lɛ mɛi krokomɛi anifeemɔ kɛ amɛhesusumɔ gbaaa mináa?’ Kɛ wɔná gbɔmɛi ahe miishɛɛ yɛ anɔkwale mli lɛ, ebaatsirɛ wɔ koni wɔkɛ wɔhe aha, tamɔ Yesu fee lɛ. Mɛi krokomɛi baana bɔ ni wɔyɔɔ amɛhe miishɛɛ yɛ anɔkwale mli lɛ, ni amɛbaabɛŋkɛ wɔ.—Abɛi 11:25.

Taakɛ Marko sane lɛ tsɔɔ lɛ, Yesu náa miishɛɛ akɛ eeehi gbekɛbii ateŋ. Etamɔ nɔ ni ená be ni ekwɛ amɛ, be mli ni amɛshwɛɔ, ejaakɛ etsĩ amɛshwɛmɔi lɛ ekomɛi atã yɛ ebɛbuai lɛ ateŋ ekome mli. (Mateo 11:16-19) Ekolɛ gbekɛbii ni Yesu jɔɔ amɛ lɛ ateŋ mɛi komɛi darako kwraa bɔ ni amɛhiɛ aaasɔ mɔ ni eji, kɛ nibii ni etsɔɔ amɛ lɛ. Shi enɛ haaa ni enu he akɛ efite ebe. Ená be eha gbekɛbii lɛ, ejaakɛ esumɔɔ amɛ. Ekolɛ gbekɛbii ni Yesu kɛkpe yɛ esɔɔmɔ nitsumɔ lɛ mli lɛ ateŋ mɛi pii bahere suɔmɔ ni eyɔɔ kɛha amɛ lɛ nɔ kɛtsɔ ekaselɔi ni amɛbatsɔmɔ yɛ sɛɛ mli lɛ nɔ.

Kɛji akɛ Yesu ná be eha gbekɛbii yɛ ewala shihilɛ mli naagbee otsii ni mli wa waa lɛ amli lɛ, belɛ eka shi faŋŋ akɛ wɔbaanyɛ wɔná be kɛha amɛ yɛ wɔbe he gbɛjianɔtoo ni dekã bɛ mli lɛ mli. Esa akɛ wɔjwɛŋmɔ ahi mɛi ni ehia amɛ titri lɛ anɔ, tamɔ awusai nɛkɛ. Eji anɔkwale akɛ gbekɛbii fɛɛ yaa amɛhiɛ, kɛji aná be aha amɛ, ni eji nɔ ni Yehowa sumɔɔ ákɛ wɔsumɔ amɛ, ni wɔye wɔbua amɛ jogbaŋŋ bɔ ni wɔɔnyɛ.—Lala 10:14.

[Shishigbɛ niŋmai]