Ohiɛ Ahi Ohe Nɔ Ni Ofee Ekãa!
“No hewɔ lɛ nyɛsaraa, ejaakɛ nyɛleee nɔ̃ gbi loo nɔ̃ ŋmɛlɛtswaa [lɛ].”—MATEO 25:13.
1. Mɛni bɔfo Yohane kpáa gbɛ?
YESU wo shi yɛ naagbee sanegbaa ni yɔɔ Biblia lɛ mli lɛ mli akɛ: “Miiba oyá.” Ebɔfo Yohane here nɔ akɛ: “Amen! Hɛɛ, ba, Nuntsɔ Yesu.” Bɔfo lɛ yiŋ efeee lɛ kɔshikɔshi akɛ Yesu baaba. Yohane fata bɔfoi ní bi Yesu akɛ: “Mɛɛ be mli nibii nɛɛ baaba, ni mɛni baafee ba ni oba [Hela, pa·rou·siʹa] lɛ kɛ nibii agbɛjianɔtoo lɛ naagbee lɛ he okadi?” lɛ ahe. Hɛɛ, Yohane kɛ hekɛnɔfɔɔ kpá ba ni Yesu baaba wɔsɛɛ lɛ gbɛ.—Kpojiemɔ 22:20; Mateo 24:3, NW.
2. Yɛ ba ní Yesu eba lɛ gbɛfaŋ lɛ, mɛɛ shihilɛ yɔɔ sɔlemɔi lɛ amli?
2 Afɔɔɔ hekɛnɔfɔɔ ní tamɔ nɛkɛ namɔ gbii etɛ nɛɛ. Sɔlemɔi babaoo yɛ amɛ tsɔɔmɔ ni kɔɔ Yesu “baa” lɛ he, shi amɛmli bii lɛ ateŋ mɛi fioo ko pɛ kpáa gbɛ. Amɛhiɔ shi yɛ nakai gbɛ nɔ hu. Wolo ko ni atsɛɔ lɛ The Parousia in the New Testament lɛ wie akɛ: “Hewalɛ kpakpa bibioo pɛ Parousia hiɛnɔkamɔ lɛ kɛ́wo sɔlemɔ lɛ shihilɛ, esusumɔ, kɛ enitsumɔ mli. . . . Hiamɔ kɛ oyaiyeli henumɔ ní mli wa, ní esa akɛ sɔlemɔ lɛ kɛtsu enitsumɔi ni ji tsuitsakemɔ kɛ maŋsɛɛ sanekpakpa jajemɔ lɛ egbɔjɔ, kɛji elajeko kwraa lɛ.”[1] Shi jeee nakai eji kɛha mɔ fɛɛ mɔ!
3. (a) Te anɔkwa Kristofoi nuɔ pa·rou·siʹa lɛ he amɛhaa tɛŋŋ? (b) Mɛni titri wɔbaasusu he agbɛnɛ?
3 Yesu anɔkwa kaselɔi lɛ kɛ hiɛdɔɔ miikpa nibii agbɛjianɔtoo fɔŋ nɛɛ naagbee lɛ gbɛ. Beni wɔkɛ anɔkwayeli feɔ nakai lɛ, ehe miihia ní wɔná nɔ fɛɛ nɔ ni kɔɔ ba ní Yesu eba lɛ he lɛ he jwɛŋmɔ kpakpa ni wɔtsu he nii hu pɛpɛɛpɛ. No baaye abua wɔ ní ‘wɔhiɛ mli kɛwula shi ní ahere wɔyiwala.’ (Mateo 24:13) Beni ekɛ gbalɛ ní wɔnaa yɛ Mateo yitsei 24 kɛ 25 lɛ haa lɛ, Yesu kɛ ŋaawoo ní nilee yɔɔ mli, ní wɔbaanyɛ wɔkɛtsu nii kɛha wɔ naanɔ sɛɛnamɔ lɛ ha. Abɛbuai komɛi yɛ yitso 25 lɛ mli ní ekolɛ ole, tamɔ nɔ ni kɔɔ oblayei nyɔŋma (oblayei nilelɔi kɛ kwashiai) lɛ ahe, kɛ talentai lɛ ahe abɛbua lɛ. (Mateo 25:1-30) Mɛɛ gbɛ nɔ nakai abɛbuai lɛ ahe baanyɛ aba sɛɛnamɔ aha wɔ yɛ?
Ohiɛ Ahi Ohe Nɔ, Tamɔ Bɔ ni Oblayei Enumɔ lɛ Ji Lɛ!
4. Mɛni ji oti ni yɔɔ oblayei lɛ ahe abɛbua lɛ mli?
4 Ekolɛ obaasumɔ ní osaa okane oblayei lɛ ahe abɛbua ní wɔnaa yɛ Mateo 25:1-13 lɛ ekoŋŋ. Hé ni sane lɛ ba yɛ ji Yudafoi ayookpeemɔ wulu ko shishi, ni ayemforo wu lɛ tee ayemforo lɛ tsɛ shia koni eyaŋɔ yoo lɛ kɛba ayemforo wu lɛ shia (loo etsɛ shia). Ekolɛ lalafolɔi kɛ lalɔi fata mɛi ni tee ayemforokpeemɔ lɛ shishi lɛ ahe, ni aleee be pɔtɛɛ ni akɛ ayemforo lɛ baashɛ shi. Yɛ abɛbua lɛ mli lɛ, oblayei nyɔŋma mɛ aahu kɛyashi nyɔɔŋteŋ kɛha ayemforo wu lɛ shishɛɛ. Amɛteŋ mɛi enumɔ kɛ kwashiafeemɔ eŋɔɔɔ kane mli mu ní fa kɛbaaa, no hewɔ lɛ esa akɛ amɛya ní amɛyahe eko. Mɛi krokomɛi enumɔ lɛ jɛ nilee mli amɛkɛ mu wo tɔi amli kɛba, koni amɛnyɛ amɛkɛwo amɛkanei lɛ amli kɛ́ ehe miihia ní amɛfee nakai beni amɛmɛɔ lɛ. Mɛi enumɔ nɛɛ pɛ yɔɔ ní amɛfee klalo beni ayemforo wu lɛ bashɛ shi lɛ. No hewɔ lɛ, amɛ pɛ aŋmɛ amɛ gbɛ ni amɛtee okpɔlɔŋmɛɛ lɛ shishi. Beni oblayei kwashiai enumɔ lɛ ku amɛsɛɛ lɛ, no mli lɛ amɛkpe sɛɛ tsɔ fe bɔ ni amɛbaanyɛ amɛbote mli.
5. Mɛɛ ŋmalɛi yeɔ ebuaa wɔ ni wɔnuɔ oblayei lɛ ahe abɛbua lɛ he mfonirifeemɔŋ shishinumɔ lɛ shishi?
5 Abaanyɛ anu abɛbua nɛɛ fãi pii ashishi akɛ eji mfonirifeemɔ kɛkɛ. Ákɛ nɔkwɛmɔnɔ lɛ, Ŋmalɛi lɛ wieɔ Yesu he akɛ ayemforo wu. (Yohane 3:28-30) Yesu kɛ lɛ diɛŋtsɛ ehe to maŋtsɛ bi ko ní aŋmɛ yookpeemɔ okpɔlɔ ko aha lɛ lɛ he. (Mateo 22:1-14) Ni Biblia lɛ kɛ Kristo toɔ wu he. (Efesobii 5:23) Nɔ ni yɔɔ miishɛɛ ji akɛ, eyɛ mli akɛ awieɔ Kristofoi ní afɔ amɛ mu lɛ ahe yɛ hei krokomɛi ákɛ Kristo “ayemforo” moŋ, shi abɛbua lɛ etsĩii ayemforo tã. (Yohane 3:29; Kpojiemɔ 19:7; 21:2, 9) Shi kɛlɛ, ewieɔ oblayei nyɔŋma he, ni akɛ mɛi ni afɔ amɛ mu lɛ toɔ oblayoo fro ní atsɛ ehe baa kɛha Kristo he yɛ hé kroko.—2 Korintobii 11:2.a
6. Mɛɛ ŋaawoo Yesu kɛha beni emuɔ oblayei lɛ ahe abɛbua lɛ naa lɛ?
6 Yɛ otii nɛɛ kɛ bɔ ni amɛshishinumɔ ji yɛ gbalɛ mli lɛ sɛɛ lɛ, eka shi faŋŋ akɛ shishitoo mlai kpakpai yɛ ní wɔbaanyɛ wɔkase kɛjɛ abɛbua nɛɛ mli. Ákɛ nɔkwɛmɔnɔ lɛ, kadimɔ akɛ Yesu mu naa kɛ nɛkɛ wiemɔi nɛɛ, akɛ: “No hewɔ lɛ nyɛsaraa, ejaakɛ nyɛleee nɔ̃ gbi loo nɔ̃ ŋmɛlɛtswaa [lɛ].” No hewɔ lɛ abɛbua lɛ haa wɔnaa bɔ ni ehe hiaa ní wɔteŋ mɔ fɛɛ mɔ ashi kpe, ní ehiɛ ahi ehe nɔ yɛ gbɛjianɔtoo fɔŋ nɛɛ naagbee ni baa lɛ he. Ŋwanejee ko bɛ he akɛ naagbee nɛɛ miiba, eyɛ mli akɛ wɔnyɛŋ wɔtsɔɔ be pɔtɛɛ moŋ. Yɛ enɛ gbɛfaŋ lɛ, kadimɔ sui ní oblayei akui enyɔ lɛ jie lɛ kpo lɛ jogbaŋŋ.
7. Mɛɛ shishinumɔ naa oblayei ni yɔɔ abɛbua lɛ mli lɛ ateŋ mɛi enumɔ jie amɛhe kpo akɛ kwashiai?
7 Yesu kɛɛ akɛ: “Mɛi enumɔ lɛ kwashiaiŋ.” Ani akɛni amɛheee amɛyeee akɛ ayemforo wu lɛ miiba lɛ hewɔ? Ani amɛshi kɛtee amɛyadi miishɛɛnamɔi asɛɛ? Aloo ani alaka amɛ? Jeee enɛɛmɛi ateŋ eko kwraa. Yesu wie akɛ nɛkɛ mɛi enumɔ nɛɛ “[tee] akɛ amɛyaakpee ayemforo wu.” Amɛle akɛ eeba, ni amɛsumɔ ní amɛfata he, ní amɛná “yookpeemɔhe” okpɔlɔŋmɛɛ lɛ po mli gbɛfaŋnɔ. Ni kɛlɛ, ani amɛsaa amɛhe jogbaŋŋ bɔ ni sa? Amɛmɛ lɛ be saŋŋ, kɛyashi “nyɔɔŋ teŋ,” shi amɛfeko klalo kɛha epuemɔ lɛ, be fɛɛ be ni nakai be lɛ aaafee—kɛji eeeba mra loo esɛɛ baatsɛ fe bɔ ni amɛkpa gbɛ kɛjɛ shishijee lɛ.
8. Oblayei ni yɔɔ abɛbua lɛ mli lɛ ateŋ mɛi enumɔ jie amɛhe kpo akɛ amɛji nilelɔi yɛ mɛɛ gbɛ nɔ?
8 Mɛi krokomɛi enumɔ—ní Yesu tsɛ amɛ nilelɔi lɛ—hu kɛ amɛkanei ní amɛsũ je kpo kɛtee, ní amɛmiikpa ayemforo wu lɛ puemɔ gbɛ. Esa akɛ amɛ hu amɛmɛ, shi amɛ lɛ, “nilelɔi” ji amɛ. Hela wiemɔ ni atsɔɔ shishi akɛ “nilelɔi” lɛ baanyɛ ahiɛ shishinumɔ ni tsɔɔ “hiɛtɛ̃lɔ, jwɛŋlɔ, mɔ ni le nii diɛŋtsɛ.”[2] Mɛi enumɔ nɛɛ ma nɔ mi akɛ nilelɔi ji amɛ, yɛ mu kɛ tɔi ní amɛkɛba koni amɛkɛwo amɛkanei lɛ amli kɛ́ ehe miihia lɛ hewɔ. Yɛ anɔkwale mli lɛ, amɛjwɛŋmɔ yɛ klalo ní amɛfee kɛmɛɔ ayemforo wu lɛ nɔ, aahu akɛ amɛsumɔɔɔ ní amɛha mɔ ko amɛmu lɛ eko. Amɛhiɛ ní yɔɔ amɛhe nɔ nɛɛ jeee nɔ ni egba afã, taakɛ jɛmɛ ni amɛyɔɔ ní amɛfee klalo kɛmɔ shi beni ayemforo wu lɛ bashɛ shi lɛ yeɔ he odase lɛ. Mɛnɛɛmɛi, “mɛi ní esaa amɛhe eto lɛ kɛ lɛ tee yookpeemɔhe lɛ, ni aŋa shinaa lɛ.”
9, 10. Mɛni ji oti ni yɔɔ oblayei lɛ ahe abɛbua lɛ mli, ni mɛɛ saji esa akɛ wɔbi wɔ diɛŋtsɛ wɔhe?
9 Jeee hesaamɔ kɛha yookpeemɔ he nikasemɔ Yesu kɛhaa lɛ, ni asaŋ jeee nii ní ayɔɔ, ní akɛ mɛi krokomɛi aaaja lɛ hu he ŋaawoo ekɛhaa lɛ. Oti ní ewieɔ he lɛ ji: “No hewɔ lɛ nyɛsaraa, ejaakɛ nyɛleee nɔ̃ gbi loo nɔ̃ ŋmɛlɛtswaa [lɛ].” Bi ohe akɛ, ‘Ani mihiɛ yɛ mihe nɔ lɛɛlɛŋ yɛ ba ni Yesu eba lɛ he?’ Wɔheɔ wɔyeɔ akɛ Yesu miiye maŋtsɛ yɛ ŋwɛi bianɛ, shi te wɔjwɛŋmɔ yɔɔ anɔkwale ní eji akɛ ‘etsɛŋ ni gbɔmɔ Bi lɛ baaba yɛ ŋwɛi atatui lɛ anɔ kɛ hewalɛ kɛ anunyam babaoo’ lɛ nɔ wɔha tɛŋŋ? (Mateo 24:30) Beni eshɛ “nyɔɔŋ teŋ lɛ,” eka shi faŋŋ akɛ, no mli lɛ ayemforo wu lɛ shishɛɛ be lɛ ebɛŋkɛ kwraa fe beni oblayei lɛ tee klɛŋklɛŋ akɛ amɛyaakpee lɛ lɛ. Nakai nɔŋŋ, beni gbɔmɔ Bi lɛ baashɛ shi ní ebakpata amrɔ nɛɛ gbɛjianɔtoo fɔŋ lɛ hiɛ lɛ ebɛŋkɛ kwraa fe beni wɔbɔi ebaa lɛ gbɛkpamɔ lɛ. (Romabii 13:11-14) Ani wɔtee nɔ wɔhiɛ ehi wɔhe nɔ, ni wɔhiɛ ehi wɔhe nɔ jogbaŋŋ po beni be lɛ bɛŋkɛɔ lɛ?
10 Fãmɔ ní akɛha akɛ, “nyɛsaraa” lɛ toiboo biɔ ní wɔhiɛ ahi wɔhe nɔ be fɛɛ be. Oblayei enumɔ hã amɛmu lɛ tã, ni amɛje kpo akɛ amɛyaahe eko. Nakai nɔŋŋ ekolɛ nibii baagbala Kristofonyo ko jwɛŋmɔ, ni no hewɔ lɛ efeŋ klalo kɛmɔŋ shi kɛha Yesu shishɛɛ ní ebɛŋkɛ lɛ. Eba lɛ nakai yɛ klɛŋklɛŋ afii oha lɛ mli Kristofoi komɛi agbɛfaŋ. Ebaanyɛ eba mɛi komɛi anɔ ŋmɛnɛ. No hewɔ lɛ, nyɛhaa wɔbia wɔhe akɛ, ‘Ani eeba minɔ nakai?’—1 Tesalonikabii 5:6-8; Hebribii 2:1; 3:12; 12:3; Kpojiemɔ 16:15.
Hã Ohiɛ Ahi Ohe nɔ Beni Naagbee lɛ Bɛŋkɛɔ Lɛ
11. Mɛɛ abɛbua Yesu tsá nɔ ekɛha, ni etamɔ mɛni pɛpɛɛpɛ?
11 Yɛ ebɛbua ní nyiɛ sɛɛ lɛ mli lɛ, Yesu fee babaoo fe hewalɛ ní ewo esɛɛnyiɛlɔi lɛ ní amɛhiɛ ahi amɛhe nɔ lɛ kɛkɛ. Beni ewie oblayei nilelɔi kɛ kwashiai lɛ ahe egbe naa lɛ, egba amɛ talentai lɛ ahe abɛbua lɛ hu. (Kanemɔ Mateo 25:14-30.) Enɛ je benai lɛ ahe abɛbua ní tsɔ̃ hiɛ, ní Yesu gba amɛ akɛni mɛi babaoo “[susuɔ] akɛ amrɔ lɛ nɔŋŋ Nyɔŋmɔ maŋtsɛyeli lɛ baapue” lɛ, yɛ gbɛ̀i babaoo nɔ.—Luka 19:11-27.
12. Mɛni ji oti ni yɔɔ talentai lɛ ahe abɛbua lɛ mli?
12 Yɛ talentai lɛ ahe abɛbua lɛ mli lɛ, Yesu wie nuu ko ní dani ebaafã gbɛ kɛya maŋsɛɛ lɛ, etsɛ́ tsuji etɛ kɛba lɛ he. Etu talentai enumɔ ewo amɛteŋ mɔ kome dɛŋ, mɔ kroko hu enyɔ, kɛ naagbee mɔ lɛ, ekome pɛ—“bɔ ni mɔ fɛɛ mɔ aaanyɛ akwɛ.” Ekolɛ enɛ miitsɔɔ jwiɛtɛi talenta, ni ji shika pɔtɛɛ ko ní nakai beaŋ lɛ, ejara shɛɔ nɔ ni apaafonyo baanyɛ aná yɛ afii 14 mli lɛ—shika babaoo diɛŋtsɛ![3] Beni nuu lɛ ku esɛɛ lɛ, eha tsuji lɛ babu nɔ ni amɛfee yɛ nakai ‘be kakadaŋŋ’ ní ekafã gbɛ lɛ mli lɛ he akɔntaa. Klɛŋklɛŋ tsuji enyɔ lɛ hã nɔ ni atu awo amɛdɛŋ lɛ jara ku ebɔ he toi enyɔ. Eha amɛ “ahekoo,” ni ewo amɛteŋ mɔ fɛɛ mɔ shi akɛ ebaaha lɛ gbɛnaa nii babaoo, ni emu ewiemɔ lɛ naa akɛ: “Botemɔ onuntsɔ miishɛɛ lɛ mli.” Beni ewieɔ akɛ enuntsɔ lɛ yɛ shɛii tsɔ lɛ, tsulɔ ni ahã lɛ talenta kome lɛ kɛ talenta lɛ tsuuu nɔ ko ni he yɔɔ sɛɛnamɔ. Ekɛ shika lɛ yato, ni ekɛyahaaa shikatolɔi lɛ po koni ená eshika lɛ kɛ ehe kpá. Nuntsɔ lɛ tsɛ lɛ “tsulɔ fɔŋ kɛ anihaolɔ” ejaakɛ ete shi ewo enuntsɔ lɛ nibii ashweremɔ. Enɛ hewɔ lɛ, ahe talenta lɛ yɛ edɛŋ, ni ashwie lɛ kɛtee agbó lɛ sɛɛ, ni “jɛi yaafo kɛ nyanyɔji ashishikpemɔ” baahi.
13. Yesu tsɔɔ akɛ etamɔ nuntsɔ ni yɔɔ abɛbua lɛ mli lɛ yɛ mɛɛ gbɛ nɔ?
13 Shikome ekoŋŋ lɛ, abaanyɛ anu enɛ mli otii lɛ ashishi yɛ mfonirifeemɔŋ shishinumɔ naa. Ákɛ nɔkwɛmɔnɔ lɛ, Yesu, ní nuu ní fã gbɛ kɛtee maŋsɛɛ lɛ fee ehe mfoniri lɛ, baashi ekaselɔi lɛ, ni ebaaya ŋwɛi, ni ebaamɛ be kakadaŋŋ kɛyashi be mli ni enine baashɛ maŋtsɛyeli hewalɛ nɔ.b (Lala 110:1-4; Bɔfoi lɛ Asaji 2:34-36; Romabii 8:34; Hebribii 10:12, 13) Shi, shikome ekoŋŋ lɛ, wɔbaanyɛ wɔyoo nikasemɔ loo shishitoo mla ní mli lɛɛ, ní esa akɛ wɔteŋ mɔ fɛɛ mɔ kɛtsu nii yɛ wɔshihilɛ mli. Mɛni ji no?
14. Mɛɛ nɔ ko ni he hiaa waa talentai lɛ he abɛbua lɛ maa nɔ mi?
14 Kɛ́ wɔhiɛnɔkamɔ ji wala ní gbele bɛ mli yɛ ŋwɛi jio, naanɔ wala yɛ paradeiso shikpɔŋ nɔ jio, wɔnaa faŋŋ yɛ Yesu abɛbua lɛ mli akɛ esa akɛ wɔya nɔ wɔmia wɔhiɛ yɛ Kristofoi anitsumɔi amli. Yɛ anɔkwale mli lɛ, abaanyɛ amu shɛɛ sane ni yɔɔ abɛbua nɛɛ mli lɛ naa yɛ wiemɔ kome pɛ mli: mɔdɛŋbɔɔ. Bɔfoi lɛ fee nɔkwɛmɔnɔ amɛfɔ̃ shi kɛjɛ Pentekoste afi 33 Ŋ.B. kɛbaa. Wɔkaneɔ akɛ: “Ni [Petro wie] wiemɔi krokomɛi pii ekɛye odase ni ekɛwo amɛ ŋaa akɛ: Nyɛhaa aherea nyɛyiwala kɛjɛa yinɔ kɔ̃ɔdɔ̃ŋ nɛɛ mli.” (Bɔfoi lɛ Asaji 2:40-42) Ni kwɛ yibii kpakpai diɛŋtsɛ ni jɛ emɔdɛŋbɔɔ lɛ mli kɛba! Beni mɛi krokomɛi fataa bɔfoi lɛ ahe yɛ Kristofoi ashiɛmɔ nitsumɔ lɛ mli lɛ, amɛ hu amɛjie mɔdɛŋbɔɔ kpo, ni sanekpakpa lɛ “[shwere] yɛ jeŋ muu lɛ fɛɛ mli.”—Kolosebii 1:3-6, 23; 1 Korintobii 3:5-9.
15. Esa akɛ wɔkɛ oti titri ni yɔɔ talentai lɛ he abɛbua lɛ mli lɛ atsu nii yɛ mɛɛ gbɛ krɛdɛɛ nɔ?
15 Hã nɔ ni abɛbua nɛɛ mli sane lɛ tsɔɔ lɛ ahi ojwɛŋmɔ mli—ba ní Yesu eba lɛ he gbalɛ. Wɔyɛ nɔmimaa babaoo ní tsɔɔ akɛ Yesu pa·rou·siʹa lɛ miiya nɔ, ni etsɛŋ ni ebaashɛ naagbee kwraa. Kaimɔ bɔ ni Yesu kɛ “naagbee lɛ” tsá nitsumɔ ní ehe hiaa ni Kristofoi atsu lɛ he wiemɔ nɔ lɛ, akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ní akɛye jeŋmaji lɛ fɛɛ odase; ni no dani naagbee lɛ aaaba.” (Mateo 24:14) Akɛni enɛ yɛ wɔjwɛŋmɔ mli hewɔ lɛ, tsuji lɛ ateŋ namɔ wɔtamɔ? Bi ohe akɛ: ‘Ani abaaná yiŋtoo ní aaadamɔ nɔ amu sane naa akɛ mitamɔ tsulɔ ní kɛ nɔ ni atu awo edɛŋ lɛ yato, ní ekolɛ eyatsu lɛ diɛŋtsɛ enibii ni he hiaa lɛ lɛ ahe nii lɛ? Aloo ani anaa faŋŋ akɛ mitamɔ mɛi kpakpai kɛ anɔkwafoi lɛ? Ani mitu mihe fɛɛ miha Nuntsɔ lɛ nibii lɛ ashweremɔ be fɛɛ be?’
Ohiɛ Ahi Ohe nɔ ní Ofee Ekãa yɛ Be ni Eba lɛ Mli
16. Mɛɛ shɛɛ sane abɛbuai enyɔ ní wɔsusu he lɛ hiɛ kɛha bo?
16 Hɛɛ, yɛ amɛ mfonirifeemɔ kɛ gbalɛ shishinumɔ lɛ sɛɛ lɛ, nɛkɛ abɛbuai enyɔ nɛɛ kɛ hewalɛwoo ni yɔɔ faŋŋ, ní jɛɔ Yesu diɛŋtsɛ daaŋ lɛ hãa wɔ. Eshɛɛ sane lɛ ji enɛ: Ohiɛ ahi ohe nɔ; ná ekãa, titri yɛ be mli ni anaa Kristo pa·rou·siʹa lɛ he okadi lɛ. No ji amrɔ nɛɛ. No hewɔ lɛ, ani wɔhiɛ yɛ wɔhe nɔ ni wɔmiifee ekãa lɛɛlɛŋ?
17, 18. Mɛɛ ŋaawoo kaselɔ Yakobo kɛha yɛ ba ní Yesu eba lɛ he?
17 Yesu nyɛbi nuu Yakobo fataaa he yɛ Mu Gɔŋ lɛ nɔ ní ebaanu Yesu gbalɛ lɛ; shi sɛɛ mli lɛ, ebaná ele, ni enu bɔ ni ehe hiaa hã lɛ shishi jogbaŋŋ. Eŋma akɛ: “No hewɔ lɛ, nyɛŋmɛa nyɛtsui shi, anyɛmimɛi, kɛyashia be ní Nuntsɔ lɛ eba lɛ. Naa! Hulɔ lɛ mɛɔ shikpɔŋ nɔ nibaa nii ní jara wa lɛ, ni eŋmɛɔ etsui shi yɛ he kɛyashiɔ beyinɔ ní enáa agbiɛnaa kɛ gbo nunɛmɔ lɛ. Belɛ nyɛ hu nyɛŋmɛa nyɛtsui shi; nyɛwoa nyɛtsuii ekãa, ejaakɛ ba ní Nuntsɔ lɛ eba lɛ eshɛ etã.”—Yakobo 5:7, 8, NW.
18 Beni ekɛ nɔmimaa eha akɛ Nyɔŋmɔ kɛ fɔbuu kojomɔ baaba mɛi ni kɛ nii ní amɛná lɛ tsuɔ nii yɛ gbɛ fɔŋ nɔ lɛ anɔ sɛɛ lɛ, Yakobo wo Kristofoi hewalɛ ní amɛkafee mɛi ni bɛ tsuishitoo beni amɛmɛɔ Yehowa ní ebafee nii lɛ. Kristofonyo ni etooo etsui shi lɛ baanyɛ atɔ ehe owele yɛ mɛi anɔ, tamɔ nɔ ni esa akɛ lɛ diɛŋtsɛ ejaje tɔmɔi ní amɛtɔ̃ lɛ. Shi, esaaa akɛ ebaa lɛ nakai, ejaakɛ bɔ fɛɛ bɔ ni fee lɛ, kojomɔ be lɛ baashɛ kɛ̃. Hulɔ he nɔkwɛmɔnɔ lɛ feɔ enɛ he mfoniri, taakɛ Yakobo tsɔɔ mli lɛ.
19. Mɛɛ tsuishitoo nɛkɛ Israelnyo hulɔ baanyɛ aná?
19 Esa akɛ Israelnyo hulɔ ní dũɔ dumɔ wu lɛ amɛ, klɛŋklɛŋ lɛ ní ebaa fɔ́ lɛ aje kpo kɛjɛ sũ lɛŋ, no sɛɛ lɛ, ní nɔ ni adũ lɛ ada, kɛ naagbee lɛ, nikpamɔ lɛ. (Luka 8:5-8; Yohane 4:35) Be, kɛ ekolɛ yiŋtoo po yɛ kɛha yeyeeyefeemɔ yɛ nakai nyɔji lɛ amli fɛɛ. Ani agbiɛnaa nugbɔ lɛ baanɛ, ni ebaanɛ jogbaŋŋ hu? Ni gbo nugbɔ lɛ hu? Ani kooloi bibii aloo ahum baafite dumɔ nii lɛ? (Okɛto Yoel 1:4; 2:23-25 he.) Ni kɛlɛ, yɛ fɛɛ mli lɛ, Israelnyo hulɔ lɛ baanyɛ ekɛ ehe afɔ̃ Yehowa kɛ adebɔɔ naa tsakemɔi ni bɔleɔ ehe, ní eto he gbɛjianɔ lɛ nɔ. (5 Mose 11:14; Yeremia 5:24) Hulɔ lɛ tsuishitoo lɛ baanyɛ afee gbɛkpamɔ yɛ hekɛnɔfɔɔ mli lɛɛlɛŋ. Ekɛ hemɔkɛyeli le akɛ nɔ ni emɛɔ lɛ baaba. Ebaaba lɛɛlɛŋ!
20. Wɔbaanyɛ wɔjie tsuishitoo kpo, yɛ Yakobo ŋaawoo lɛ kɛ gbeekpãmɔ naa yɛ mɛɛ gbɛ nɔ?
20 Eyɛ mli akɛ ekolɛ hulɔ lɛ leɔ be mli ni nikpamɔ be lɛ baashɛ moŋ, shi klɛŋklɛŋ afii oha lɛ mli Kristofoi lɛ nyɛɛɛ abu akɔntaa ní amɛna be mli ní ba ní Yesu eba lɛ baashɛ. Shi, ebaaba kɛ̃. Yakobo ŋma akɛ: “Ba ní Nuntsɔ lɛ eba [Hela, pa·rou·siʹa] lɛ eshɛ etã.” Beni Yakobo ŋmala nakai wiemɔi lɛ, no mli lɛ, ba ní Kristo eba lɛ he okadi wulu, loo nɔ ni anaa yɛ jeŋ fɛɛ lɛ, ejeko kpo. Shi amrɔ nɛɛ eje kpo faŋŋ! No hewɔ lɛ te esa akɛ wɔnu he yɛ be nɛɛ mli wɔha tɛŋŋ? Aana okadi lɛ faŋŋ diɛŋtsɛ. Wɔmiina. Wɔbaanyɛ wɔkɛɛ kɛ nɔmimaa akɛ, ‘Miina akɛ okadi lɛ miiba mli.’ Wɔbaanyɛ wɔkɛ nɔmimaa akɛɛ akɛ, ‘Wɔyɛ ba ní Nuntsɔ lɛ eba lɛ mli, ni enaagbee lɛ eshɛ etã.’
21. Mɛni wɔtswa wɔfai shi jogbaŋŋ akɛ wɔbaafee?
21 Akɛni nakai ji sane lɛ hewɔ lɛ, wɔyɛ yiŋtoo ni mli wa titri ní wɔɔdamɔ nɔ wɔŋɔ Yesu abɛbuai enyɔ ní wɔsusu he nɛɛ amli nikasemɔi ni he hiaa titri lɛ wɔto wɔtsuii amli ní wɔkɛtsu nii. Ekɛɛ: “No hewɔ lɛ nyɛsaraa, ejaakɛ nyɛleee nɔ̃ gbi loo nɔ̃ ŋmɛlɛtswaa [lɛ].” (Mateo 25:13) Ŋwanejee ko bɛ he akɛ, amrɔ nɛɛ ji be ní esa akɛ wɔná ekãa yɛ wɔ Kristofoi asɔɔmɔ lɛ mli. Nyɛhaa wɔtsɔɔa yɛ wɔshihilɛ mli daa akɛ wɔnuɔ oti ní Yesu wieɔ he lɛ shishi. Nyɛhaa wɔhiɛ ahia wɔhe nɔ! Nyɛhaa wɔfea ekãa!
[Shishigbɛ niŋmai]
a Kɛ́ ootao abɛbua lɛ mli mfonirifeemɔ saji lɛ amlitsɔɔmɔ fitsofitso lɛ, kwɛmɔ God’s Kingdom of a Thousand Years Has Approached, ní Watchtower Bible and Tract Society of New York, Inc. fee lɛ, baafai 169-211.
b Kwɛmɔ God’s Kingdom of a Thousand Years Has Approached, baafai 212-56.
Ani Okaiɔ?
◻ Mɛɛ shɛɛ sane titri ko oná kɛjɛ oblayei nilelɔi lɛ kɛ kwashiai lɛ ahe abɛbua lɛ mli?
◻ Mɛɛ ŋaawoo ní he hiaa titri Yesu kɛhaa bo, kɛtsɔ talentai lɛ ahe abɛbua lɛ nɔ?
◻ Otsuishitoo lɛ kɔɔ pa·rou·siʹa lɛ he, tamɔ Israelnyo hulɔ lɛ nɔ̃ lɛ ji lɛ pɛpɛɛpɛ yɛ mɛɛ gbɛ nɔ?
◻ Mɛni hewɔ be ní wɔyɔɔ mli nɛɛ ji miishɛɛ be ní he hiaa waa titri lɛ?
[Mfonirii ni yɔɔ baafa 23]
Mɛni okaseɔ kɛjɛɔ oblayei lɛ kɛ talentai lɛ ahe abɛbuai lɛ amli?