Yehowa Gbɛtsɔɔmɔ Ni Mikɛ Miishɛɛ Kpɛlɛɔ Nɔ

Taakɛ Ulysses V. Glass Gba

Eji be ko ni yɔɔ srɔto kwraa. No mli lɛ nikaselɔi 127 pɛ ni gbeɔ nikasemɔ naa lɛ yɔɔ klas lɛ mli, shi mɛi ni ba lɛ ji toibolɔi 126,387 ni yɔɔ miishɛɛ ni ejɛ maji nyɔŋmai abɔ mli kɛba. No mli lɛ eji Buu Mɔɔ Biblia Gilead Skul klas ni ji 21 lɛ nikasemɔ naagbee nifeemɔ ni yaa nɔ yɛ Yankee Stadium ni yɔɔ New York City lɛ, yɛ July 19, 1953. Mɛni hewɔ ni no ji nifeemɔ ko ni sa kadimɔ waa yɛ mishihilɛ mli lɛ? Ha magba bo mishihilɛ mli sane fioo ko.

AFƆ́ mi yɛ Vincennes yɛ Indiana, U.S.A., yɛ February 17, 1912 aaafee afii enyɔ dani afɔ́ Mesia Maŋtsɛyeli lɛ, taakɛ atsɔɔ mli yɛ Kpojiemɔ 12:​1-5 lɛ. Yɛ afi ni tsɔ̃ hiɛ lɛ mli lɛ, no mli lɛ mifɔlɔi ebɔi Biblia lɛ kɛ Studies in the Scriptures wolokpoi lɛ kasemɔ. Daa Hɔgbaa leebi lɛ, Ataa kaneɔ nakai woji lɛ eko mli saji etsɔɔ weku lɛ, kɛkɛ lɛ, wɔgba he sane.

Awo kɛ nɔ ni ekaseɔ lɛ yeɔ ebuaa koni ekɛkudɔ ebii lɛ asusumɔ. Esumɔɔ mɔ sane waa​—⁠emli jɔ waa, esumɔɔ waa koni eye ebua mɔ. Wɔyi bafee ejwɛ yɛ nakai beaŋ, shi Awo kpã esuɔmɔ lɛ mli eha akutsoŋ gbekɛbii krokomɛi lɛ hu. Ená be eha wɔ. Enáa he miishɛɛ akɛ eeegba wɔ Biblia mli saji, ni ekɛ wɔ feɔ ekome kɛláa.

Efɔ̃ɔ nine etsɛɔ mɛi krokomɛi babaoo hu ní sɔmɔɔ yɛ nakai beaŋ akɛ be-fɛɛ sɔɔlɔi lɛ kɛbaa wɔshia. Amɛhiɔ shi gbi kome loo gbii enyɔ pɛ, ni bei pii lɛ, amɛfeɔ kpeei ni amɛhaa wiemɔi yɛ wɔshia. Mɛi ni wɔsumɔɔ titri ji mɛi ni kɛ mfonirii tsuɔ nii ni amɛgbaa wɔ saji lɛ. Yɛ be ko mli yɛ afi 1919 lɛ, aaafee afi kome beni klɛŋklɛŋ jeŋ ta lɛ eba naagbee lɛ, nyɛmi nuu ni basara wɔ lɛ ha ewiemɔi lɛ kɔ wɔ ni ji gbekɛbii lɛ ahe titri. Egba krɔŋkrɔŋfeemɔ​—⁠nɔ ni amrɔ nɛɛ wɔtsɛɔ lɛ yɛ gbɛ ni ja jogbaŋŋ nɔ akɛ henɔjɔɔmɔ lɛ he sane​—⁠ni eye ebua wɔ koni wɔnu bɔ ni esaa wɔshihilɛi ahe ehaa lɛ shishi. Sɛɛ mli yɛ nakai gbi lɛ gbɛkɛ beni mitee miyakã shi lɛ, misɔle miha miŋwɛi Tsɛ lɛ ni mikɛɛ lɛ akɛ miisumɔ ni masɔmɔ lɛ daa.

Shi kɛlɛ, yɛ afi 1922 sɛɛ lɛ, shihilɛ mli nibii krokomɛi fee tamɔ nɔ ni eetsake nakai yiŋkpɛɛ lɛ kɛmiiya gbɛhe ni ji enyɔ mli. Wɔfã kɛjɛ hekome kɛtee he kroko ni wɔkɛ Yehowa webii lɛ asafo ko kwraa ebɔɔɔ. No mli lɛ Ataa etee koni eyatsu oketekei agbɛjegbɛ he nii ni etsuɔ lɛ. Biblia lɛ ni wɔkaseɔ lɛ tsaraaa nɔ nɔtonɔto. Mikɛ mihe wo skul nikasemɔi amli koni wɔsɛɛ lɛ matsɔ̃ jarayeli nibii ahe adafitswalɔ, ni no mli lɛ miito gbɛjianɔ koni maya univɛsiti kpakpa ko.

Jwɛŋmɔ ni Mihiɛ yɛ Shihilɛ He lɛ Tsakemɔ

Yɛ afi 1930 afii lɛ teŋgbɛ lɛ, je lɛ je shishi ekɛ ehe wo jeŋ fɛɛ tawuu mli ekoŋŋ. No mli lɛ wɔyɛ Cleveland, Ohio, beni Yehowa Odasefoi lɛ ateŋ mɔ ko ba wɔshia lɛ. Wɔbɔi nɔ ni wɔkase beni wɔji gbekɛbii lɛ he susumɔ waa kɛ hiɛdɔɔ. Minyɛmi nuu nukpa, Russell hiɛ dɔɔ waa titri, ni lɛ ji klɛŋklɛŋ mɔ ni abaptisi. No mli lɛ mijeee mɔ ni hiɛ dɔɔ, shi yɛ February 3, 1936 lɛ, abaptisi mi hu. Hiɛsɔɔ ni miyɔɔ kɛha nɔ ni henɔjɔɔmɔ kɛha Yehowa tsɔɔ lɛ bɔi daa, ni miikase bɔ ni mafee koni makpɛlɛ Yehowa gbɛtsɔɔmɔ nɔ. Nakai afi lɛ nɔŋŋ nɔ lɛ, abaptisi minyɛmimɛi yei enyɔ Kathryn kɛ Gertrude hu. Wɔ fɛɛ wɔkɛ wɔhe wo be-fɛɛ sɔɔmɔ lɛ mli akɛ gbɛgbalɔi.

Shi kɛlɛ, no etsɔɔɔ akɛ wɔsusuuu nɔ kroko he kwraa dɔŋŋ. Mibo toi jogbaŋŋ beni minyɛmi nuu lɛ ŋa lɛ kɛɛ mi akɛ, gbekɛ yoo ko ni he yɔɔ fɛo waa ni gbɛi ji Ann “ni ená ekãa waa” akɛni enu anɔkwale lɛ he sane lɛ baaba kpeei yɛ wɔshia lɛ. No mli lɛ, Ann miitsu nii akɛ woloŋmalɔ yɛ mla nitsumɔhe ko, ni yɛ afi kome mli lɛ abaptisi lɛ. No mli lɛ mitoko gbɛjianɔ akɛ mabote gbalashihilɛ mli, shi eyɛ faŋŋ akɛ Ann etuu ehe kwraa eha anɔkwale lɛ. Eesumɔ ni ekɛ ehe awo Yehowa sɔɔmɔ mli waa. Ejeee mɔ ko ni baakɛɛ kɔkɔɔkɔ akɛ, “Ani manyɛ mafee?” Yɛ no najiaŋ lɛ, ebaabi akɛ, “Mɛni ji gbɛ ni hi fe fɛɛ ni manyɛ matsɔ nɔ kɛtsu he nii?” Ni etswaa efai shi akɛ ebaatsu he nii kɛmɔ shi. Nakai jwɛŋmɔ ni hi ni ená lɛ sa mihiɛ waa. Kɛfata he lɛ, ehe yɛ fɛo waa, ni nakai eji lolo. Ebatsɔ miŋa, ni etsɛɛɛ ni ebatsɔ mihefatalɔ yɛ gbɛgbamɔ sɔɔmɔ nitsumɔ lɛ mli.

Tsɔsemɔ ni He Yɔɔ Sɛɛnamɔ akɛ Gbɛgbalɔi

Ákɛ gbɛgbalɔi lɛ wɔkase nɔ̃ diɛŋtsɛ ni haa wɔmii shɛɔ nii ni wɔyɔɔ lɛ he, yɛ be mli ni wɔnibii etã kɛ be mli ni wɔná nibii babaoo hu. (Filipibii 4:​11-13) Gbi ko lɛ, je miina, ni wɔbɛ nɔ ko kwraa ni wɔbaaye. No mli lɛ sɛnt enumɔ pɛ wɔhiɛ. Wɔbote tsinaloo shwapo ko mli, ni mibi akɛ, “Ani obaanyɛ oha wɔ tsinaloo sɛnt enumɔ?” Ekwɛ wɔ, kɛkɛ ni efolɔ bibii ejwɛ eha wɔ. Miheɔ miyeɔ akɛ efá fe sɛnt enumɔ, ni no ha wɔná niyenii.

Efɔɔ kaa akɛ wɔkɛ yiwaa ni naa wa kpeɔ yɛ be mli ni wɔtsuɔ wɔ sɔɔmɔ nitsumɔ lɛ. Yɛ maŋ ko ni bɛŋkɛ Syracuse, New York lɛ mli lɛ, no mli lɛ wɔmiijara dɛhiɛmɔ woji yɛ gbɛjegbɛ lɛ nɔ, ni wɔwowoo adafitswaa woji koni wɔkɛgbala mɛi ajwɛŋmɔ kɛba maŋshiɛmɔ kpee krɛdɛɛ ko shishi. Hii kakalɔi enyɔ ko bamɔ mi, ni amɛfee mi basabasa. Polisifonyo ji amɛteŋ mɔ kome, shi ewooo enitsumɔ atade lɛ, ni etsuuu nibimɔ ni mikɛfɔ̃ ehiɛ akɛ makwɛ ekadimɔ nii lɛ he nii. Nɔŋŋ kɛkɛ ni Grant Suiter ni jɛ Brooklyn Betel lɛ ba ni ebakɛɛ akɛ wɔbaaya polisifoi anitsumɔhe lɛ koni wɔyatsu saji ahe nii. Kɛkɛ ni etswa Asafo lɛ nitsumɔhe ni yɔɔ Brooklyn lɛ tɛlifoŋ, ni afã wɔyi enyɔ lɛ koni wɔkɛ adafitswaa woji kɛ dɛhiɛmɔ woji aya ekoŋŋ nakai gbi lɛ nɔŋŋ koni adamɔ no nɔ akɛye sane lɛ. Taakɛ akpaa gbɛ lɛ, amɔmɔ wɔ. Shi kɛlɛ, beni wɔkɛɛ polisifoi lɛ akɛ wɔbaasama amɛ akɛni amɛmɔmɔ wɔ yɛ gbɛ ni mla ekpɛlɛɛɛ nɔ hewɔ lɛ, amɛŋmɛɛ wɔhe.

Enɔ jetsɛremɔ lɛ, osɔfo lɛ kanya oblahii kɛ oblayei basabasafeelɔi ni eye kɛjɛ afii nyɔŋma kɛ etɛ kɛyaa lɛ ni amɛbatutua wɔ yɛ kpeehe lɛ, shi polisifoi lɛ ejieee amɛhiɛ kpo po. Gbekɛbii ni ebuuu mɔ nɛɛ kɛ tsei ni akɛtswaa bɔɔl lɛ shimɔ shikpɔŋ ni akɛ tso fee lɛ nɔ, ni amɛtsirɛ toibolɔi lɛ ekomɛi kɛjɛ sɛii lɛ anɔ kɛgbee shi, ni amɛyadamɔ wiemɔ kpoku lɛ nɔ, ni amɛwó Amerika aflaŋaa ko nɔ kɛtee ŋwɛi ni amɛbolɔ akɛ, “Nyɛŋãa aflaŋaa lɛ! Nyɛŋãa aflaŋaa lɛ!” Kɛkɛ ni amɛbɔi “Beer Barrel Polka” lala lɛ lamɔ. Amɛha akpa kpee lɛ kwraa. Wɔmiiná nɔ ni Yesu tsɔɔ lɛ mli niiashikpamɔ diɛŋtsɛ beni ekɛɛ: “Akɛni nyɛjɛɛɛ je lɛŋ, shi mi moŋ mihala nyɛ kɛjɛ je lɛŋ lɛ, no hewɔ je lɛ nyɛ̃ɔ nyɛ lɛ.”​—⁠Yohane 15:⁠19.

Maŋshiɛmɔ lɛ ji wiemɔ diɛŋtsɛ ni J. F. Rutherford, ní no mli lɛ eji Buu Mɔɔ Asafo lɛ sɛinɔtalɔ lɛ ha ni amɔmɔ awo kpãa nɔ lɛ. Mi kɛ Ann hi nakai maŋ lɛ mli gbii fioo komɛi ni wɔkɛtsɛ mɛi kɛba koni amɛbabo wiemɔ ni abaaha lɛ toi yɛ amɛshiai amli. Mɛi fioo pɛ kpɛlɛ nɔ.

Wɔhe ni Wɔkɛha Kɛha Maŋsɛɛ Sɔɔmɔ

Etsɛɛɛ ni hegbɛi heei anaa gbele kɛha sɔɔmɔ lɛ. Afɔ̃ minyɛmi nuu Russell, kɛ eŋa Dorothy nine akɛ gbalashihilɛ mli hefatalɔi koni amɛya klɛŋklɛŋ Gilead Skul klas lɛ yɛ afi 1943, ni no sɛɛ lɛ akɛ amɛ tee Cuba akɛ maŋsɛɛ sanekpakpa shiɛlɔi. Minyɛmi yoo Kathryn tee klas ni ji ejwɛ lɛ. Akɛ lɛ hu tee Cuba. Sɛɛ mli lɛ atsake lɛ ekoŋŋ kɛtee Dominican Republic, no sɛɛ lɛ, akɛ lɛ tee Puerto Rico. Ni mi kɛ Ann hu?

Beni wɔnu Gilead Skul lɛ he kɛ anɔkwale ni eji akɛ Asafo lɛ miisumɔ ni etsu maŋsɛɛ sanekpakpa shiɛlɔi kɛya shikpɔji krokomɛi anɔ lɛ, wɔnu he akɛ wɔkɛ wɔhe baaha kɛha maŋsɛɛ sɔɔmɔ nitsumɔ. Klɛŋklɛŋ lɛ, wɔsusu he ni wɔ diɛŋtsɛ wɔsumɔɔ ni wɔya lɛ he, ekolɛ wɔbaaya Mexico. Shi sɛɛ mli lɛ, wɔkpɛ wɔyiŋ akɛ ekolɛ ebaafee nɔ ni hi moŋ akɛ wɔɔmɛ koni Asafo lɛ aha wɔ he ko beni wɔtee Gilead Skul lɛ wɔgbe naa lɛ. Wɔyɔse akɛ enɛ ji gbɛjianɔtoo ni Yehowa kɛmiitsu nii.

Afɔ̃ wɔ nine kɛtee Gilead Skul klas ni ji ejwɛ lɛ. Shi beni eshwɛ fioo ni abaaje nikasemɔ lɛ shishi lɛ, N. H. Knorr ni no mli lɛ eji Buu Mɔɔ Asafo lɛ sɛinɔtalɔ lɛ, baná ele nibii ni Ann nyɛɛɛ afee yɛ kuumɔ hela ni eye yɛ egbekɛbiiashi lɛ hewɔ. Ekɛ mi wie he, ni ekpɛ eyiŋ akɛ ebafeŋ nɔ ni nilee yɔɔ mli akɛ eeeha wɔyasɔmɔ yɛ maŋ kroko.

Aaafee afii enyɔ sɛɛ beni mitsuɔ nitsumɔ ni tsɔɔ kpeefeemɔ hiɛ lɛ, Nyɛminuu Knorr na mi ekoŋŋ ni ebi kɛji wɔyɛ he miishɛɛ lolo akɛ wɔɔya Gilead. Ekɛɛ mi akɛ akɛ wɔ eyaŋ maŋsɛɛ; no mli lɛ nɔ kroko yɛ ejwɛŋmɔŋ. No hewɔ lɛ beni aŋmalaa gbɛi kɛha klas ni ji nɛɛhu lɛ yɛ February 26, 1947 lɛ, akɛ wɔ fata nikaselɔi akuu lɛ he.

Hiɛ kpaŋ nakai gbii ni wɔye yɛ Gilead lɛ nɔ kɔkɔɔkɔ. Wɔkase mumɔŋ nibii babaoo. Wɔná naanyobɔɔ ni sɛɛ tsɛɔ. Shi mihe ni mikɛwo skul lɛ mli lɛ tee shɔŋŋ fe nakai.

Kɛjɛ Washington Kɛtee Gilead

Gilead Skul lɛ yɛ ehee kwraa lolo. United States nɔyeli lɛ leee skul lɛ yiŋtoi bɔ ni sa, no hewɔ lɛ atée sanebimɔi babaoo shi. Asafo lɛ miisumɔ ni ená najiaŋdamɔlɔ ko yɛ Washington, D.C. Jɛmɛ ji he ni akɛ wɔ tee nyɔji fioo komɛi asɛɛ beni wɔgbe Gilead naa lɛ. Aha mi nitsumɔ akɛ mɔ ni baaye ebua koni aná gbɛfãa gbɛŋmɛɛ he wolo aha mɛi ni afɔ̃ amɛ nine kɛbaa Gilead ni jɛ maji krokomɛi anɔ lɛ koni amɛná mla naa woji koni anyɛ akɛ mɛi ni egbe nikasemɔ naa lɛ aya maŋsɛɛ kɛha maŋsɛɛ sanekpakpa shiɛmɔ nitsumɔ lɛ. Maŋ onukpai lɛ ekomɛi ahe jɔ waa, ni amɛyeɔ amɛbuaa wɔ. Mɛi krokomɛi hu he tsɛ̃ɔ Odasefoi waa. Amɛteŋ mɛi fioo ni yɔɔ maŋkwramɔŋ susumɔi ni naa wa lɛ kɛɛ faŋŋ akɛ wɔkɛ kui ni amɛbuɔ amɛ akɛ amɛsaaa lɛ yɛ nɔ ko feemɔ.

Nuu ko ni mitee enitsumɔhe lɛ wie eshi wɔ waa diɛŋtsɛ akɛni wɔŋaaa aflaŋaa lɛ loo wɔkɛ wɔhe wooo tawuumɔ mli lɛ hewɔ. Beni ebolɔ fioo egbe naa lɛ, mikɛɛ agbɛnɛ akɛ: “Miisumɔ ni oná ole akɛ, ni ole hu akɛ Yehowa Odasefoi kɛ mɔ ko mɔ ko wuuu ta yɛ je nɛŋ. Wɔkɛ wɔhe wooo je lɛŋ saji amli. Wɔkɛ wɔhe wooo amɛtai kɛ amɛ maŋkwramɔŋ saji amli. Wɔkɛ wɔhe wooo maŋ saji amli kwraa. Wɔ́ye naagbai ni nyɛkɛkpeɔ lɛ nɔ kunim momo; wɔyɛ ekomefeemɔ yɛ wɔ gbɛjianɔtoo lɛ mli. . . . Amrɔ nɛɛ mɛni otaoɔ ni wɔfee? Ani ootao ni wɔku wɔ sɛɛ koni wɔfee wɔnii tamɔ nyɛ, ni wɔŋmɛɛ wɔnɔ lɛ he?” Ekɛɛɛ nɔ ko dɔŋŋ yɛ no sɛɛ.

Ato gbɛjianɔ ni wɔkɛ gbii enyɔ atsu nii daa otsi, koni wɔkɛya nɔyeli lɛ nitsumɔhei. Kɛfata he lɛ, wɔmiisɔmɔ akɛ gbɛgbalɔi krɛdɛɛi. Yɛ nakai be lɛ mli lɛ, nɔ ni fata enɛ he ji ŋmɛlɛtswai 175 ni wɔɔye yɛ shiɛmɔ nitsumɔ lɛ mli daa nyɔɔŋ nɔ (sɛɛ mli lɛ atsake kɛtee ŋmɛlɛtswai 140), no hewɔ lɛ bei pii lɛ wɔyaa shiɛmɔ aahu kɛyashiɔ beni jenamɔ yi ewa. Wɔnáa miishɛɛ. Wɔkɛ wekui pii amli bii fɛɛ fee nikasemɔi babaoo ni ŋɔɔ, ni amɛtee hiɛ jogbaŋŋ. Mi kɛ Ann kpɛ wɔyiŋ akɛ wɔfɔ́ŋ, shi kɛ́ wɔɔwie yɛ mumɔŋ gbɛfaŋ lɛ, jeee bii kɛkɛ wɔyɔɔ, shi, wɔyɛ nabii kɛ nanakansowai hu. Kwɛ bɔ ni wɔnáa amɛhe miishɛɛ yɛ wɔtsuii amli!

Yɛ afi 1948 naagbee gbɛ lɛ, minine shɛ nitsumɔ kroko hu nɔ. Nyɛminuu Knorr tsɔɔ mli akɛ, Nyɛminuu Schroeder ni heɔ mɛi kɛbaa skul lɛ ni eji Gilead Skul nitsɔɔlɔi lɛ ateŋ mɔ kome lɛ naŋ dekã, ejaakɛ ekɛbaatsu nitsumɔ kroko hu ni he hiaa, no hewɔ lɛ, akɛɛ mi akɛ mitsɔɔ Gilead klas srɔtoi lɛ nii kɛ́ ehe miihia. Mikɛ gbeyeishemɔ ku sɛɛ kɛtee Gilead ekoŋŋ yɛ South Lansing, New York yɛ December 18, ni Ann fata he. Klɛŋklɛŋ lɛ, wɔhiɔ Gilead otsii fioo ko pɛ yɛ be komɛi amli, kɛkɛ lɛ wɔ́ku wɔ sɛɛ kɛtee Washington. Shi kɛlɛ, yɛ naagbee lɛ be ni miyeɔ yɛ Gilead fáa fe be ni miyayeɔ yɛ Washington lɛ.

Yɛ nɛkɛ be nɛɛ mli taakɛ mitsĩ tã kɛtsɔ hiɛ lɛ, ni Gilead klas ni ji 21 lɛ gbe nikasemɔ naa yɛ Yankee Stadium yɛ New York. No hewɔ lɛ, ákɛ nitsɔɔlɔi lɛ ateŋ mɔ kome lɛ, miná hegbɛ akɛ mikɛ mihe baawo nakai nikasemɔ naagbee nifeemɔ lɛ mli.

Sɔɔmɔ yɛ Jeŋ Fɛɛ Nitsumɔhe Yitso Lɛ

Yɛ February 12, 1955 lɛ, akɛ sɔɔmɔ nitsumɔ kroko hu wo wɔdɛŋ. Wɔbatsɔmɔ Betel weku lɛ mli bii yɛ Yehowa gbɛjianɔtoo ni anaa lɛ jeŋ fɛɛ nitsumɔhe yitso lɛ. Shi mɛni ji nɔ ni enɛ baatsɔɔ? Titri lɛ, ní wɔɔsumɔ akɛ wɔɔtsu nitsumɔ fɛɛ nitsumɔ ni akɛaawo wɔdɛŋ lɛ, ní wɔkɛ wɔhe aaawo nitsumɔi ni biɔ ni wɔkɛ mɛi krokomɛi afee ekome lɛ mli. Shi, wɔ́fee nakai pɛŋ, shi amrɔ nɛɛ wɔbaafee kuu ko ni da kwraa fe nakai lɛ mli bii​—⁠jeŋ fɛɛ nitsumɔhe yitso lɛ Betel weku lɛ. Wɔkɛ miishɛɛ kpɛlɛ nitsumɔ hee nɛɛ nɔ akɛ Yehowa gbɛtsɔɔmɔ lɛ he odaseyeli.

Minitsumɔ lɛ fã ko ni da lɛ kɔɔ adafitswaa saji ahe. Akɛni asumɔɔ saji ni téeɔ nii ahe susumɔ shi waa kɛ saji ni nine shɛɔ nɔ kɛjɛɔ hei ni esaaa hewɔ lɛ, adafitswaa nitsumɔhei lɛ eŋmala nibii ni esaaa kwraa yɛ Yehowa Odasefoi ahe. Wɔbɔ mɔdɛŋ koni wɔjaje nakai shihilɛ lɛ.

Nyɛminuu Knorr miisumɔ ni ená nɔmimaa akɛ wɔ fɛɛ wɔyɛ nitsumɔ babaoo ni wɔbaatsu, no hewɔ lɛ akɛ nitsumɔi krokomɛi hu ha. Ekomɛi biɔ ni mikɛ tsɔsemɔ ni miná akɛ jarayeli nibii ahe nitɛŋlɔ lɛ atsu nii jogbaŋŋ kɛmɔ shi. Ekrokomɛi hu kɔɔ Asafo lɛ redio nitsumɔhe WBBR lɛ he. Nitsumɔ yɛ ni abaatsu yɛ sinii ni Asafo lɛ feɔ lɛ he. Shi, teokrase yinɔsane hu fata Gilead nikasemɔ lɛ he, shi amrɔ nɛɛ, aatsu nitsumɔi babaoo koni akɛha Yehowa webii babaoo ale nakai ŋmɛnɛŋmɛnɛ teokrase gbɛjianɔtoo lɛ yinɔsane he saji fitsofitso koni aha maŋbii hu nine ashɛ enɛ nɔ. Nɔ kroko hu ni fata Gilead tsɔsemɔ lɛ he ji maŋshiɛmɔ, ni nitsumɔ he miihia koni akɛha nyɛmimɛi ni yɔɔ asafoi lɛ amli lɛ ale nibii bibii ni kɔɔ maŋshiɛmɔ he nɔ ko. No hewɔ lɛ nitsumɔi babaoo yɛ ni abaatsu.

Gilead Nitsumɔ ni Mikɛ Mihe Woɔ Mli Daa

Yɛ afi 1961 lɛ, akɛni abaatsɔse nɔkwɛlɔi gbɛfalɔi kɛ nitsumɔhe nine mli nitsulɔi wɔsɛɛ ko hewɔ lɛ, ajie Gilead Skul lɛ kɛtee Brooklyn, he ni Buu Mɔɔ Asafo lɛ nitsumɔhei wuji lɛ yɔɔ lɛ. Misaa miba skultsũ lɛ mli ekoŋŋ​—⁠amrɔ nɛɛ, jeee akɛ nitsɔɔlɔ ni yeɔ mɔ ko najiaŋ, shi, ákɛ nitsɔɔlɔi akuu lɛ mlinyo. Mɛɛ hegbɛ po nɛ! Miyɛ nɔmimaa waa akɛ Gilead Skul lɛ ji nikeenii ni jɛ Yehowa ŋɔɔ, nikeenii ni egbɛjianɔtoo muu ni anaa lɛ fɛɛ ená he sɛɛ.

Yɛ Brooklyn lɛ, Gilead klas srɔtoi lɛ yɛ hegbɛi ni nikaselɔi ni yɔɔ tsutsu klas srɔtoi lɛ amli lɛ náaa eko. Ayɛ nitsɔɔlɔi babaoo ni ayafɔ̃ɔ amɛ nine kɛbaa, ni akɛ Nɔyeli Kuu lɛ mli bii bɔɔ waa ni akɛ nitsumɔhe yitso lɛ Betel weku lɛ bɔɔ waa diɛŋtsɛ. Eji nɔ ni waaa hu kɛha nikaselɔi lɛ akɛ amɛaaná ɔfis nifeemɔi amli tsɔsemɔ yɛ Betel shia lɛ nitsumɔi amli, kɛ wojiafeemɔhe lɛ nitsumɔ lɛ fãi srɔtoi amli.

Yɛ afii ni eho lɛ amli lɛ, nikaselɔi srɔtoi ji mɛi ni baa, ni nakai nɔŋŋ eji yɛ nitsɔɔlɔi lɛ agbɛfaŋ. Atsake he ni skul lɛ yɔɔ lɛ shii abɔ hu. Amrɔ nɛɛ eyɛ Patterson ni yɔɔ New York lɛ hei fɛfɛji lɛ amli.

Nikaselɔi lɛ Kɛ Nitsumɔ

Ebafee mlifilimɔ ni tamɔ nɛkɛ akɛ aaatsɔɔ klasbii nɛɛ anii! Biɛ ji he ni oblahii kɛ oblayei ni bɛ gbɛjianɔtoo momo nɛɛ mli nibii ni afeɔ lɛ ahe miishɛɛ lɛ yɔɔ. Amɛshiɔ amɛweku, amɛnanemɛi, amɛshia, kɛ gbɔmɛi ni wieɔ amɛmaŋ wiemɔ. Kɔɔyɔŋ tsakemɔ, niyenii​—⁠nɔ fɛɛ nɔ baafee nɔ ko ni yɔɔ srɔto. Amɛleee maŋ nɔ he ni amɛaaya po, shi oti ni ma amɛhiɛ ji ni amɛfee maŋsɛɛ sanekpakpa shiɛlɔi. Ehe ehiaaa ni okanya gbɔmɛi ni tamɔ nakai lɛ dã.

Kɛ mitee skulbii lɛ atsũ lɛ mli lɛ, oti ni ma mihiɛ be fɛɛ be ji ni maha nikaselɔi lɛ aná miishɛɛ. Mɔ ko kwraa bɛ ni kaseɔ nii jogbaŋŋ kɛ eeshe gbeyei ni ehao. Lɛɛlɛŋ, no mli lɛ nitsɔɔlɔ ji mi, shi mile bɔ ni eji kɛ oji nikaselɔ. Míta nakai sɛii lɛ anɔ pɛŋ. Shi, amɛkaseɔ nii waa ni amɛkase nibii babaoo yɛ Gilead, shi miisumɔ ni amɛná miishɛɛ hu.

Mile akɛ kɛ́ amɛtee amɛ nitsumɔi amli lɛ, nibii komɛi ahe baahia amɛ koni amɛye omanye. Hemɔkɛyeli ni mli wa he miihia amɛ. Heshibaa he miihia amɛ​—⁠babaoo diɛŋtsɛ. Ehe miihia ni amɛkase bɔ ni amɛkɛ mɛi krokomɛi baaye aha, koni amɛkpɛlɛ shihilɛi anɔ, koni amɛkɛ eshai ake kwraa. Ehe miihia ni amɛya nɔ amɛjie mumɔ lɛ yibii lɛ kpo. Ehe miihia ni amɛsumɔ gbɔmɛi koni amɛsumɔ nitsumɔ ni atsu amɛ akɛ amɛyatsu lɛ. Nomɛi ji nibii ni mibɔɔ mɔdɛŋ akɛ mama nɔ mi daa maha nikaselɔi lɛ beni amɛyɔɔ Gilead lɛ.

Minyɛɛɛ male nikaselɔi abɔ ni mitsɔɔ amɛ nii. Shi mile bɔ ni minuɔ he mihaa amɛ. Beni mitsɔɔ amɛ nii nyɔji enumɔ lɛ sɛɛ lɛ, mibasumɔ amɛsane waa. Kɛkɛ lɛ beni mikwɛɔ be mli ni amɛhoɔ yɛ wiemɔ kpoku lɛ nɔ, ní amɛheɔ amɛ nikasemɔ yijiemɔ woji yɛ nikasemɔ naagbee gbi lɛ nɔ lɛ, mile akɛ amɛgbe nikasemɔ lɛ naa yɛ omanyeyeli mli, ni etsɛŋ ni amɛbaashi kɛya. Etamɔ nɔ ni miweku lɛ mli bii lɛ ateŋ mɛi komɛi miishi mi kɛmiiya. Te ooofee tɛŋŋ otsĩ ohe naa koni okasumɔ gbɔmɛi ni miisumɔ ni amɛkɛ amɛhe aha koni amɛtsu nitsumɔ ni oblahii kɛ oblayei nɛɛ baatsu lɛ asane?

Afii komɛi asɛɛ, beni amɛba koni amɛbasara mi lɛ, minuɔ ni amɛmiigba miishɛɛ babaoo ni amɛ ná yɛ sɔɔmɔ lɛ mli lɛ he sane, ni mileɔ akɛ amɛmiitsu nitsumɔ lɛ lolo, ni amɛmiifee nɔ ni atsɔse amɛ ákɛ amɛfee lɛ. Te no haa minuɔ he mihaa tɛŋŋ? Miikɛɛ bo akɛ, eji miishɛɛ sane diɛŋtsɛ.

Wɔsɛɛ Be lɛ Gbɛkpamɔ

Mihiŋmɛii enaaa nii jogbaŋŋ bianɛ, ni minaa nijiaŋwujee ni jɛɔ enɛ mli kɛbaa lɛ. Minyɛɛɛ matsɔɔ nii dɔŋŋ yɛ Gilead skultsũ lɛ mli. Klɛŋklɛŋ lɛ, eji tsakemɔfeemɔ ko ni wa kɛha mi yɛ mishihilɛ mli, shi yɛ mishihilɛ mli fɛɛ lɛ, mikase bɔ ni akpɛlɛɔ shihilɛi anɔ ni akɛhiɔ shi. Bei pii lɛ misusuɔ bɔfo Paulo kɛ ‘ŋmei ko ni yɔɔ eheloo mli’ lɛ he. Paulo sɔle shii etɛ koni ajie lɛ kɛjɛ nakai amanehulu lɛ mli, shi Nuntsɔ lɛ kɛɛ lɛ akɛ: “Miduromɔ lɛ fá hao, ejaakɛ mihewalɛ lɛ, gbedeefeemɔ mli eyeɔ emuu yɛ.” (2 Korintobii 12:​7-10) Paulo tee nɔ ekɛhi shi. Kɛ enyɛ efee nakai lɛ, belɛ esa akɛ mabɔ he mɔdɛŋ. Eyɛ mli akɛ mitsɔɔɔ klasbii anii dɔŋŋ moŋ, shi miida shi akɛ minyɛɔ minaa nikaselɔi lɛ lolo, ní amɛmiiya kɛmiiba daa gbi. Bei komɛi lɛ minyɛɔ mikɛ amɛ gbaa sane, ni no haa mimli filiɔ mi yɛ mitsui mli, kɛji akɛ miisusu mumɔ kpakpa ni amɛjieɔ lɛ kpo lɛ he lɛ.

Nɔ ni yɔɔ wɔsɛɛ be mli lɛ ji naakpɛɛ nɔ ko ni esa kɛ asusu he. Aato shishi amrɔ nɛɛ. Gilead ená gbɛfaŋnɔ wulu ko waa yɛ mli. Yɛ amanehulu kpeteŋkpele lɛ sɛɛ beni aaagbele woji ni awie he yɛ Kpojiemɔ 20:12 lɛ naa lɛ, akɛ afii akpe baatsɔse mɛi waa diɛŋtsɛ yɛ Yehowa gbɛ̀i anɔ. (Yesaia 11:⁠9) Shi jeee no po ji naagbee lɛ. Yɛ anɔkwale mli lɛ, eji shishijee kɛkɛ. Abaaná nibii babaoo ni abaakase yɛ Yehowa he, ni abaafee nibii babaoo aahu kɛya naanɔ be mli ni wɔnaa akɛ eyiŋtoi baa mli lɛ. Miyɛ nɔmimaa waa diɛŋtsɛ akɛ, Yehowa baaha shiwoi wuji fɛɛ ni ekɛha lɛ aba mli, ni miisumɔ ni mahi jɛmɛ koni maná Yehowa gbɛtsɔɔmɔi ni akɛbaaha wɔ yɛ nakai beaŋ lɛ nɔkpɛlɛmɔ mli gbɛfaŋnɔ.

[Mfoniri ni yɔɔ baafa 26]

Gilead nikasemɔ naagbee yɛ Yankee Stadium ni yɔɔ New York lɛ yɛ afi 1953

[Mfoniri ni yɔɔ baafa 26]

Gertrude, mi, Kathryn, kɛ Russell

[Mfoniri ni yɔɔ baafa 26]

N. H. Knorr (abɛkugbɛ tɔ̃ɔ) kɛ M. G. Henschel ni mikɛ amɛ miitsu nii yɛ kpee he gbɛjianɔtoo mli

[Mfoniri ni yɔɔ baafa 26]

Yɛ WBBR adafitswaa nitsumɔhe lɛ

[Mfoniri ni yɔɔ baafa 29]

Yɛ Gilead skultsũ lɛ mli

[Mfoniri ni yɔɔ baafa 31]

Mi kɛ Ann, nyɛsɛɛ nɛɛ nɔŋŋ