Mɛni Hewɔ Esa Akɛ Oye Oshiwoi Anɔ?

BERNARD BARUCH, ni ji maŋsɔɔlɔ nukpa ŋaawolɔ ni egbo lɛ wie akɛ: “Nyɛfɔa oshiki nyɛhaa mɔ ni kɛ shiwoo fioo haa lɛ; ebaaha wɔnine anyɛ shi fioo pɛ.”[1] Etamɔ nɔ ni yɛ jeŋ ni wɔyɔɔ mli ŋmɛnɛ nɛɛ mli lɛ, awoɔ shi koni aku mli. Ebaanyɛ efee gbalashihilɛ mli kitakamɔi, nitsumɔ mli yelikɛfuamɔi, loo shi ni awoɔ akɛ abaaná be babaoo aha gbekɛbii lɛ. Nɔ ko ni aku hiɛ afɔ̃ nɔ yɛ jeŋ fɛɛ lɛ ji nɔ ni kɔɔ wiemɔ ko ni afɔɔ wiemɔ akɛ, “Abuɔ mɔ ko akɛ gbɔmɔ kpakpa kɛtsɔ bɔ ni mɔ lɛ yeɔ eshiwoi anɔ ehaa lɛ nɔ.”

Eji anɔkwale akɛ mɛi babaoo etoko amɛyiŋ akɛ amɛbaaye amɛshiwoi anɔ. Mɛi krokomɛi hu kɛ oyaiyeli woɔ shi ní amɛnyɛŋ amɛye nɔ loo amɛkuɔ amɛshiwoi amli ejaakɛ no ji gbɛ ni waaa kwraa ni amɛbaanyɛ amɛtsɔ nɔ.

Wɔkpɛlɛɔ nɔ akɛ, shiwoo ni aaaye nɔ lɛ baanyɛ afee kaa kɛji akɛ nibii ni aleee ni baa trukaa te shi. Shi ani shiwoo ni akuɔ mli lɛ fiteɔ nii diɛŋtsɛ? Ani esa akɛ okɛ hiɛdɔɔ asusu oshiwoi ahe? Yehowa Nyɔŋmɔ nɔkwɛmɔnɔ ní wɔɔsusu he kuku lɛ baaye abua wɔ koni wɔna nɔ hewɔ ni esa akɛ wɔkɛ hiɛdɔɔ asusu sane nɛɛ he lɛ.

Yehowa Yeɔ Eshiwoi Anɔ

Wɔjáa Nyɔŋmɔ ní egbɛi diɛŋtsɛ kɛ eshiwoi ni ehaa ebaa mli lɛ náa tsakpaa gbagbalii lɛ. Yɛ Biblia beaŋ lɛ, bei pii lɛ, gbɛi tsɔɔ nɔ̃ gbɔmɔ ni mɔ ko ji. Enɛ hu ji anɔkwale yɛ gbɛi Yehowa, ni shishi ji “Ehaa Ebaa Mli” lɛ gbɛfaŋ.[2] No hewɔ lɛ, ŋwɛi gbɛi lɛ kɔɔ susumɔ ni ahiɛ akɛ Nyɔŋmɔ baaye eshiwoi anɔ ni etsu eyiŋtoi ahe nii lɛ he.

Ákɛ mɔ ni hiɔ shi yɛ egbɛi lɛ naa lɛ, Yehowa ye eshiwoi fɛɛ ní ewo blema Israel maŋ lɛ nɔ. Yɛ nɔ ni kɔɔ nɛkɛ shiwoi nɛɛ ahe lɛ, Maŋtsɛ Salomo kpɛlɛ nɔ akɛ: “Aaajɔɔ Yehowa, mɔ ni eha emaŋ Israel he ejɔ lɛ, taakɛ bɔ ni ewo shi lɛ pɛpɛɛpɛ; shiwoi fɛɛ ni etsɔ etsulɔ Mose nine nɔ ewo lɛ, emli wiemɔ kome folo efeko yaka.”​—1 Maŋtsɛmɛi 8:⁠56.

Anyɛɔ akɛ he fɔ̃ɔ Yehowa nɔ aahu akɛ, bɔfo Paulo nyɛ ewie akɛ: “Beni Nyɔŋmɔ wo Abraham shi lɛ, akɛni ebɛ mɔ ko ni fe lɛ diɛŋtsɛ ni eeekã lɛ kita hewɔ lɛ, ekã lɛ diɛŋtsɛ ehe kita.” (Hebribii 6:​13) Hɛɛ, Yehowa gbɛi lɛ diɛŋtsɛ kɛ mɔ ni eji lɛ kɛ nɔmimaa haa akɛ ekuŋ ehiɛ eshwieŋ eshiwoi anɔ, eyɛ mli akɛ ebaaha elaaje nɔ ko ni esumɔɔ waa po. (Romabii 8:​32) Anɔkwale ni eji akɛ Yehowa yeɔ eshiwoi anɔ lɛ kɛ hiɛnɔkamɔ ni bafeɔ tamɔ sɛkɛ kɛha wɔsusuma, loo wɔwala lɛ haa wɔ.​—Hebribii 6:⁠19.

Yehowa Shiwoi kɛ Wɔ Wɔsɛɛ

Wɔhiɛnɔkamɔ, wɔhemɔkɛyeli, kɛ wɔshihilɛ diɛŋtsɛ fɛɛ damɔ Yehowa shiwoi lɛ amlibaa nɔ. Mɛɛ hiɛnɔkamɔ wɔsumɔɔ waa? “Yɛ [Nyɔŋmɔ] shiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:​13) Ŋmalɛi lɛ hu kɛ nɔ ni wɔɔdamɔ nɔ wɔná hemɔkɛyeli haa akɛ, “gbohiiashitee baaba, ni jalɔi kɛ mɛi ni ejaaa fɛɛ baate shi.” (Bɔfoi lɛ Asaji 24:​15) Ni wɔbaanyɛ wɔná nɔmimaa akɛ nɔ ko yɛ ni fe ŋmɛnɛŋmɛnɛ shihilɛ nɛɛ. Yɛ anɔkwale mli lɛ, nɔ ni bɔfo Yohane tsɛɔ lɛ ‘nii ni awo he shi lɛ’ ji “naanɔ wala lɛ.” (1 Yohane 2:​25) Shi Yehowa shiwoi ni yɔɔ e-Wiemɔ lɛ mli lɛ kɔɔɔ wɔsɛɛ be he pɛ. Amɛkɛ shishinumɔ baa wɔdaa gbi shihilɛi amli bianɛ po.

Lalatsɛ lɛ lá akɛ: “Yehowa ebɛŋkɛɔ mɛi fɛɛ ni tsɛɔ lɛ lɛ, . . . eboɔ amɛbolɔmɔ toi.” (Lala 145:​18, 19) Nyɔŋmɔ maa nɔ mi ehaa wɔ hu akɛ, “ehaa mɔ ni egbɔjɔ lɛ hewalɛ, ni mɔ ni bɛ nyɛmɔ lɛ ehaa ehewalɛ fáa.” (Yesaia 40:​29) Ni kwɛ bɔ ni eshɛjeɔ mɔ mii akɛ wɔɔle akɛ ‘Nyɔŋmɔ haŋ aka wɔ fe bɔ ni wɔɔnyɛ, shi moŋ ekɛ kaa lɛ nɔŋŋ aaaje gbɛ aha wɔ ni wɔje mli hu’! (1 Korintobii 10:​13) Kɛ́ wɔná eshiwoi nɛɛ ateŋ eko mlibaa mli niiashikpamɔ lɛ, wɔbaanyɛ wɔna akɛ, Yehowa ji mɔ ko ni abaanyɛ akɛ he afɔ̃ enɔ kwraa. Yɛ sɛɛnamɔi ni wɔnine shɛɔ nɔ kɛjɛɔ shiwoi babaoo ni Nyɔŋmɔ kɛha ni eye nɔ lɛ gbɛfaŋ lɛ, te esa akɛ wɔbu shi ni wɔwoɔ lɛ lɛ tɛŋŋ?

Ní Wɔɔye Shiwoi ni Wɔwo Nyɔŋmɔ lɛ Anɔ

Ŋwanejee ko bɛ he akɛ, wɔhenɔjɔɔmɔ kɛha Nyɔŋmɔ ji shiwoo ni he hiaa fe fɛɛ ni wɔɔnyɛ wɔfee. Kɛtsɔ enɛ ni wɔfeɔ lɛ nɔ lɛ, wɔtsɔɔ akɛ wɔmiisumɔ ni wɔsɔmɔ Yehowa kɛya naanɔ. Yɛ be mli ni Nyɔŋmɔ kitai lɛ waaa lɛ, ekolɛ jeee be fɛɛ be eyɔɔ mlɛo akɛ aaafee esuɔmɔnaa nii, ní wɔhi shi taakɛ wɔfeɔ yɛ nibii agbɛjianɔtoo fɔŋ nɛɛ mli lɛ. (2 Timoteo 3:​12; 1 Yohane 5:⁠3) Shi shii abɔ ni ‘wɔkɛ wɔnine emɔ tsinakɔi mli’ ni wɔbatsɔmɔ Yehowa tsuji ni ejɔɔ amɛhe nɔ kɛ e-Bi, Yesu Kristo kaselɔi nɛɛ, esaaa akɛ wɔkuɔ wɔkuɛ wɔkwɛɔ nibii ni yɔɔ je lɛ mli ni wɔshi yɛ wɔsɛɛ lɛ kɔkɔɔkɔ.​—Luka 9:⁠62.

Kɛ́ wɔsɔle wɔha Yehowa lɛ, ekolɛ ebaatsirɛ wɔ koni wɔwo lɛ shi akɛ wɔbaawuu koni wɔye gbɔjɔmɔ ko nɔ kunim, wɔná Kristofoi asu, loo wɔya wɔhiɛ yɛ teokrase nitsumɔi lɛ eko mli. Mɛni baaye abua wɔ koni wɔnyɛ wɔdi shiwoi nɛɛ asɛɛ?​—Okɛto Jajelɔ 5:​2-⁠5 he.

Anɔkwa shiwoi jɛɔ tsui lɛ kɛ jwɛŋmɔ lɛ mli. No hewɔ lɛ, nyɛhaa wɔmaa wɔshiwoi ni wɔwoɔ Yehowa lɛ nɔ mi kɛtsɔ wɔtsui mli saji anaa ni wɔɔgbele wɔha lɛ, ni wɔjɛ anɔkwale mli wɔjie wɔgbeyeishemɔi, shwelɛi, kɛ gbɔjɔmɔi akpo wɔtsɔɔ lɛ lɛ nɔ. Sɔlemɔ ni wɔɔsɔle yɛ wɔshiwoi ahe lɛ baawaje wɔ koni wɔye nɔ. Wɔbaanyɛ wɔbu wɔshiwoi kɛha Nyɔŋmɔ lɛ akɛ nyɔji. Kɛ nyɔji lɛ da lɛ, ebiɔ ni awo lɛ fiofio. Nakai nɔŋŋ hu shiwoi babaoo ni wɔwoɔ Yehowa lɛ baahe be dani ebaaba mli. Shi kɛ wɔkɛ nɔ ni wɔbaanyɛ wɔha lɛ lɛ haa lɛ daa lɛ, wɔtsɔɔ akɛ wɔhiɛ edɔ yɛ nɔ ni wɔkɛɛ lɛ he, ni ebaajɔɔ wɔ nakai nɔŋŋ.

Wɔbaanyɛ wɔtsɔɔ akɛ wɔkɛ hiɛdɔɔ susuɔ wɔshiwoi ahe kɛtsɔ sɔlemɔ ni wɔɔfɔ sɔlemɔ yɛ he lɛ nɔ, ekolɛ daa gbi. Enɛ baajie lɛ kpo atsɔɔ wɔ ŋwɛi-Tsɛ lɛ akɛ wɔyeɔ anɔkwa. Ebaafee kaimɔ nɔ̃ hu kɛha wɔ daa. David fee nɔkwɛmɔnɔ fɛfɛo efɔ̃ shi yɛ enɛ gbɛfaŋ eha wɔ. Ekpa Yehowa fai yɛ lala mli akɛ: “Nyɔŋmɔ, bo mibolɔmɔ toi, feemɔ toi oha misɔlemɔ lɛ!  . . . No lɛ malá majie ogbɛi lɛ yi daa nɛɛ, ni maye mishiwoi lɛ anɔ daa jenamɔ!”​—Lala 61:​2, 9.Ga Bible

Wɔshiwoi Anɔ ní Wɔɔye lɛ Tswaa Hekɛnɔfɔɔ Emaa Shi

Kɛ́ esaaa akɛ wɔbuɔ shiwoi ni wɔwoɔ Nyɔŋmɔ lɛ akɛ nɔ ko bibioo lɛ, no lɛ abaanyɛ akɛɛ nakai nɔŋŋ yɛ nɔ ni wɔwoɔ nanemɛi Kristofoi lɛ ahe. Esaaa akɛ wɔkɛ Yehowa yeɔ yɛ gbɛ kome nɔ kɛ wɔnyɛmimɛi lɛ yɛ gbɛ kroko nɔ. (Okɛto 1 Yohane 4:​20 he.) Yesu kɛɛ yɛ e-Gɔŋ nɔ Shiɛmɔ lɛ mli akɛ: “Shi nyɛhaa nyɛwiemɔ afea: Hɛɛ, hɛɛ! dabi, dabi!” (Mateo 5:​37) Ní wɔɔná nɔmimaa akɛ anyɛɔ akɛ he fɔ̃ɔ wɔwiemɔ nɔ be fɛɛ be lɛ ji gbɛ kome ni wɔtsɔɔ nɔ ‘wɔfeɔ mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ.’ (Galatabii 6:​10) Shiwoo fɛɛ shiwoo ni wɔyeɔ nɔ lɛ tswaa hekɛnɔfɔɔ emaa shi.

Bei pii lɛ, nii ni shiwoo ni akuɔ mli lɛ fiteɔ lɛ daa kɛji shika fata he. Kɛji Kristofonyo ko miiwo nyɔmɔ ko, eetsu nɔ ko, loo eetsu jarayeli yelikɛfuamɔ ko he nii lɛ, esa akɛ eye eshiwoo lɛ nɔ. Enɛ saa Nyɔŋmɔ hiɛ ni ewajeɔ hekɛnɔfɔɔ ni he hiaa babaoo kɛji nyɛmimɛi ‘baafee ekome kɛhi shi lɛ!’​—Lala 133:⁠1.

Shi kɛlɛ, kɛji atsuuu yelikɛfuamɔi ahe nii lɛ, ebaanyɛ eye asafo lɛ kɛ agbɛnɛ aŋkroaŋkroi ni ekɔɔ amɛhe tɛ̃ɛ lɛ awui. Nɔkwɛlɔ gbɛfalɔ ko wie akɛ: “Nitsumɔi amli béi​—ni bei pii lɛ yelikɛfuamɔi ni abuɔ akɛ kɛ hoo lɛ, kuu kome yeee anɔkwa yɛ mli lɛ kɛbaa lɛ​—bafeɔ nɔ ni mɔ fɛɛ mɔ leɔ. Nɔ ni jɛɔ mli baa ji akɛ, egbálaa nyɛmimɛi ateŋ, ni shihilɛ ni yɔɔ Maŋtsɛyeli Asa lɛ nɔ lɛ bafeɔ kpɛŋŋ.”[3] Kwɛ bɔ ni ehe hiaa akɛ wɔɔsusu yelikɛfuamɔ ni wɔfeɔ lɛ ahe jogbaŋŋ koni wɔkɛwo wolo nɔ!a

Esa akɛ wɔkwɛ jogbaŋŋ hu beni wɔhɔɔ guɔyeli nibii ni jara wa loo wɔjieɔ nitsumɔi ni akɛ he aaawo mli lɛ yi, titri lɛ kɛji akɛ wɔbaaná nakai jarayeli lɛ he sɛɛ. Nakai nɔŋŋ ehe miihia ni wɔkwɛ jogbaŋŋ koni wɔkawo nibii komɛi ahe sɛɛnamɔi ahe tsɔ̃ loo tsofai komɛi ahe sɛɛnamɔi ahe loo wɔkɛ nibii ni baajɛ nitsumɔ ko mli aba lɛ ahe shiwoi ní nyɛŋ aba mli ha. Esa akɛ suɔmɔ atsirɛ Kristofoi koni amɛgbála oshara fɛɛ oshara ni yɔɔ mli lɛ mli kɛmɔ shi. (Romabii 12:​10) Akɛni nyɛmimɛi babaoo yɔɔ niiashikpamɔ fioo yɛ nitsumɔ mli hewɔ lɛ, ekolɛ amɛkɛ amɛhe baafɔ̃ wɔŋaawoo nɔ ejaakɛ wɔkɛ amɛ yɛ hemɔkɛyeli kome mli. Kwɛ nii ni ebaafite kɛji akɛ aha nɛkɛ hekɛnɔfɔɔ nɛɛ fite!

Ákɛ Kristofoi lɛ, wɔnyɛŋ wɔŋɔ jarayeli nifeemɔi ní anɔkwayeli bɛ mli lɛ, loo wɔkuɔ wɔhiɛ wɔfɔ̃ɔ sɛɛnamɔi kpakpai ni mɛi krokomɛi baaná lɛ anɔ. (Efesobii 2:​2, 3; Hebribii 13:​18) Kɛji wɔɔná Yehowa nɔkpɛlɛmɔ akɛ gbɔi yɛ ‘ebuu lɛ mli lɛ,’ belɛ, esa akɛ wɔfee mɛi ni anyɛɔ akɛ he fɔ̃ɔ wɔnɔ. ‘Kɛji wɔkã kita ni wɔmiina amane yɛ mli po lɛ, wɔtsakeŋ.’​—Lala 15:​1, 4.

Kojolɔ Yefta ni jɛ Israel lɛ wo shi akɛ kɛji Nyɔŋmɔ ha eye Amonbii lɛ anɔ kunim lɛ, ekɛ mɔ klɛŋklɛŋ ni kɛ lɛ baakpe yɛ be mli ni ejɛ ta lɛ nɔ ebaa lɛ baashã shãa afɔle aha Yehowa. Nakai mɔ lɛ bafee Yefta bi koome lɛ, shi ekuuu ehiɛ eshwieee ewiemɔ lɛ nɔ. Ekɛ ebiyoo ni jɛ etsui mli ekpɛlɛ nɔ lɛ ha kɛha sɔɔmɔ kwraa yɛ Nyɔŋmɔ sɔlemɔwe lɛ​—ni ji afɔle ni ŋwanejee ko bɛ he akɛ eshãa mɔ ni ejara wa yɛ gbɛ̀i srɔtoi anɔ lɛ.​—Kojolɔi 11:​30-​40.[4]

Asafoŋ nɔkwɛlɔi titri sɔ̃ kã amɛnɔ akɛ amɛye amɛyelikɛfuamɔi anɔ. Taakɛ 1 Timoteo 3:⁠2 lɛ tsɔɔ lɛ, esa akɛ nɔkwɛlɔ lɛ afee mɔ ni “anaŋ ehe sane ko atã.” Nɛkɛ ji bɔ ni atsɔɔ Hela wiemɔ ni eshishi ji “anyɛɛɛ afo sane afɔ̃ enɔ, anyɛɛɛ ashwa lɛ, anyɛɛɛ ashwie ehiɛ shi” lɛ shishi. “Jeee akɛ etsɔɔ akɛ nuu lɛ hiɛ gbɛi kpakpa kɛkɛ, shi esa nakai hu.” (A Linguistic Key to the Greek New Testament)[5] Akɛni esa akɛ nɔkwɛlɔ lɛ afee mɔ ni anaŋ ehe sane ko atã hewɔ lɛ, esa akɛ anyɛ akɛ he afɔ̃ eshiwoi anɔ be fɛɛ be.

Gbɛ̀i Krokomɛi ní Wɔɔtsɔ Nɔ Wɔye Wɔshiwoi Anɔ

Te esa akɛ wɔbu shi ni wowoɔ mɛi ni jeee nanemɛi Kristofoi lɛ wɔha tɛŋŋ? Yesu kɛɛ: “Nakai nyɛhaa nyɛla atsoa yɛ gbɔmɛi ahiɛ, koni amɛna nyɛnifeemɔnii kpakpai lɛ, ni amɛwo nyɛtsɛ ni yɔɔ ŋwɛi lɛ hiɛ nyam.” (Mateo 5:​16) Kɛ wɔye odase akɛ wɔyeɔ wɔwiemɔ nɔ lɛ, ekolɛ, wɔbaagbala mɛi krokomɛi kɛba wɔ-Kristofoi ashɛɛ sane lɛ he. Yɛ bɔ ni mlai ni kɔɔ anɔkwayeli he lɛ egbee shi yɛ je lɛŋ fɛɛ sɛɛ lɛ, mɛi babaoo kã he amɛbuɔ anɔkwayeli lolo. Wɔshiwoi anɔ ni wɔyeɔ lɛ ji gbɛ kome ni wɔkɛjieɔ suɔmɔ kɛha Nyɔŋmɔ kɛ naanyo gbɔmɔ lɛ kpo ni wɔkɛhaa mɛi ni sumɔɔ jalɛ nifeemɔ lɛ náa he miishɛɛ.​—Mateo 22:​36-​39; Romabii 15:⁠2.

Yɛ amɛ afi 1998 sɔɔmɔ afi lɛ mli lɛ, Yehowa Odasefoi kɛ nɔ ni fe ŋmɛlɛtswai akpekpei akpe kome jaje Nyɔŋmɔ Maŋtsɛyeli lɛ he sanekpakpa lɛ yɛ faŋŋ mli. (Mateo 24:​14) Ekolɛ mɛi komɛi baakpoo nɛkɛ shiɛmɔ nɛɛ kɛji wɔyeee wɔnitsumɔi amli shiwoi anɔ loo yɛ saji krokomɛi amli. Akɛni wɔdamɔ Nyɔŋmɔ ni wieɔ anɔkwale lɛ najiaŋ hewɔ lɛ, mɛi kpaa wɔ gbɛ ni wɔfee nii yɛ anɔkwayeli mli. Kɛ́ wɔfee mɛi ni anyɛɔ akɛ he fɔ̃ɔ wɔnɔ kɛ anɔkwafoi lɛ, ‘wɔwulaa Nyɔŋmɔ ni ji wɔyiwalaherelɔ lɛ tsɔɔmɔ lɛ yɛ nibii fɛɛ mli.’​—Tito 2:⁠10.

Yɛ wɔsɔɔmɔ nitsumɔ lɛ mli lɛ, wɔnáa hegbɛi ní wɔkɛaaye wɔwiemɔ nɔ beni wɔku wɔsɛɛ kɛyasara mɛi ni jie miishɛɛ kpo yɛ Maŋtsɛyeli shɛɛ sane lɛ he lɛ. Kɛ wɔkɛɛ akɛ wɔbaaba ekoŋŋ lɛ, no lɛ esa akɛ wɔfee nakai. Wɔsɛɛ ni wɔɔku taakɛ wɔwo shi lɛ ji gbɛ ni ‘wɔkɛkamaaa mɛi ni sa ejurɔfeemɔ lɛ.’ (Abɛi 3:​27) Nyɛmi yoo ko tsɔɔ sane lɛ mli yɛ nɛkɛ gbɛ nɔ: “Bei babaoo lɛ, mikɛ mɔ ko ni yɔɔ wiemɔ lɛ he miishɛɛ kpeɔ ni ekɛɔ mi akɛ, Odasefonyo ko wo lɛ shi akɛ ebaasaa eba ekoŋŋ shi efeee nakai. Eji anɔkwale akɛ, mile akɛ ekolɛ shiatsɛ lɛ bɛ shia loo ákɛ shihilɛi lɛ haaa anyɛ aku sɛɛ. Shi misumɔɔɔ ni maha mɔ ko akɛɛ enɛ yɛ mihe, no hewɔ lɛ, mibɔɔ mɔdɛŋ fɛɛ ni manyɛ koni mana gbɔmɔ lɛ yɛ shia ekoŋŋ. Miheɔ miyeɔ akɛ, kɛ miha mɔ ko nijiaŋ je wui lɛ, esaa Yehowa kɛ minyɛmimɛi lɛ fɛɛ he yɛ gbɛ gbonyo nɔ.”

Yɛ bei komɛi amli lɛ, ekolɛ wɔnuŋ he akɛ wɔku wɔsɛɛ ejaakɛ wɔmu sane naa akɛ mɔ lɛ bɛ he miishɛɛ diɛŋtsɛ. Nakai nyɛmi yoo lɛ nɔŋŋ tsɔɔ mli akɛ: “Mibɔɔɔ mɔdɛŋ akɛ makojo miishɛɛ abɔ ni aná. Mi diɛŋtsɛ miniiashikpamɔ etsɔɔ mi akɛ bei pii lɛ, klɛŋklɛŋ nii ni wɔyooɔ yɛ amɛhe lɛ ejaaa. No hewɔ lɛ, mibɔɔ mɔdɛŋ ni maná jwɛŋmɔ kpakpa, ni mibuɔ mɔ fɛɛ mɔ akɛ mɔ ni baanyɛ abatsɔ nyɛmi nuu loo nyɛmi yoo.”[6]

Yɛ Kristofoi asɔɔmɔ lɛ mli kɛ hei krokomɛi babaoo lɛ, ehe miihia ni wɔtsɔɔ akɛ abaanyɛ akɛ he afɔ̃ wɔwiemɔ nɔ. Hɛɛ, nibii komɛi akɛɛmɔ waaa tamɔ efeemɔ. Nilelɔ lɛ kɛɛ akɛ: “Mɛi babaoo ateŋ mɔ fɛɛ mɔ kɛ mɔ ko ni sumɔɔ lɛ kpeɔ; shi namɔ aaana mɔ ni ji anɔkwafo?” (Abɛi 20:⁠6) Kɛ wɔtswa wɔfai shi lɛ, wɔbaanyɛ wɔye wɔwiemɔi anɔkwa.

Jɔɔmɔi Babaoo Jɛɔ Nyɔŋmɔ Ŋɔɔ

Gbɛ ni aaaje awo shi ni ayeee nɔ lɛ jeee anɔkwayeli, ni abaanyɛ akɛto tsɛk ni aŋma ni abɛ shika yɛ shikatoohe ni akɛaawo lɛ he. Shi kwɛ nyɔmɔwoi kɛ jɔɔmɔi ni wɔnáa kɛjɛɔ wɔshiwoi ni wɔyeɔ nɔ lɛ mli! Jɔɔmɔ kome kɛha ha ní ohaa anyɛɔ akɛ he fɔ̃ɔ onɔ lɛ ji henilee kpakpa. (Okɛto Bɔfoi lɛ Asaji 24:​16 he.) Yɛ nɔ najiaŋ ni wɔɔhao wɔhe yɛ fɔbuu henumɔ he lɛ, wɔtsui nyɔɔ wɔmli ni wɔnáa toiŋjɔlɛ. Kɛfata he lɛ, kɛ́ wɔye wɔwiemɔi anɔ lɛ, wɔhaa asafo lɛ ekomefeemɔ ni damɔ hekɛnɔfɔɔ nɔ lɛ yaa hiɛ. “Anɔkwale wiemɔ” ni wɔwieɔ lɛ hu haa anaa wɔ akɛ Nyɔŋmɔ ni wieɔ anɔkwa lɛ sɔɔlɔi.​—2 Korintobii 6:​3, 4, 7.

Yehowa yeɔ ewiemɔ nɔ, ni enyɛɔ “apasa lilɛi.” (Abɛi 6:​16, 17) Kɛ́ wɔkase wɔ ŋwɛi-Tsɛ lɛ, wɔtsiɔ wɔbɛŋkɛɔ lɛ. Belɛ eji anɔkwale akɛ, wɔyɛ nɔ ni wɔɔdamɔ nɔ wɔye wɔshiwoi anɔ.

[Shishigbɛ niŋmai]

[Mfonirii ni yɔɔ baafa 10]

Yefta ye eshiwoo nɔ, eyɛ mli akɛ nakai feemɔ wa waa kɛha lɛ

[Mfonirii ni yɔɔ baafa 11]

Kɛ́ ówo shi akɛ obaaku osɛɛ lɛ, saamɔ ohe jogbaŋŋ ni ofee nakai