Jɛɛ Otsuiŋ Okɛke
“Nakai nɔŋŋ mitsɛ ni yɔɔ ŋwɛi lɛ hu aaaŋɔfee nyɛ, kɛji nyɛteŋ mɔ fɛɛ mɔ eŋɔɔɔ enyɛmi nɔtɔ̃mɔ ekeee lɛ kɛjɛɛɛ etsuiŋ lɛ.”—MATEO 18:35.
1, 2. (a) Eshafeelɔ ko ni ale lɛ jogbaŋŋ lɛ jie hiɛsɔɔ ni eyɔɔ kɛha Yesu lɛ kpo yɛ mɛɛ gbɛ nɔ? (b) Mɛɛ sane oti ko Yesu wie he yɛ nɔ ni afee aha lɛ nɛɛ hewɔ?
EBAANYƐ efee yoo ajwamaŋ, ejeee mɔ ni oookpa gbɛ akɛ ooona lɛ yɛ Nyɔŋmɔ jálɔ ko shia. Kɛji akɛ mɛi komɛi ahe jɔ̃ amɛhe akɛ amɛaana lɛ yɛ jɛmɛ lɛ, belɛ nɔ ni efee lɛ po haa mɔ jijaa babaoo. Etsi kɛbɛŋkɛ nuu ni ejeŋba nɔ kwɔ fe mɔ fɛɛ mɔ lɛ, ni ejie ehiɛsɔɔ kpo kɛha enitsumɔi lɛ, ekɛ eyaafonui fɔ́ enaji ahe ni ekɛ eyitsɔi tsumɔ.
2 Nakai nuu ni atsɛɔ lɛ Yesu lɛ, tsiii ehe kɛjɛɛɛ yoo nɛɛ ni ale akɛ “eshafeelɔ ji lɛ” yɛ maŋ lɛ mli lɛ he. Shi Simon, Farisifonyo ní eshia ni lɛ, susuɔ eshafeelɔ ni yoo lɛ ji lɛ he. Yesu ha lɛ hetoo kɛtsɔ hii enyɔ ko ni hiɛ nifililɔ ko nyɔmɔ lɛ ahe sane ni egba lɛ nɔ. Mɔ kome hiɛ nyɔmɔ babaoo—aaafee apaafonyo afii enyɔ nyɔmɔwoo. Mɔ kroko lɛ hiɛ nakai nyɔmɔ lɛ mlijaa nyɔŋma mli ekome—eshɛɛɛ nyɔji etɛ nyɔmɔwoo. Akɛni amɛteŋ mɔ ko mɔ ko nyɛɛɛ awo nyɔmɔ lɛ hewɔ lɛ, “eŋɔke amɛyi enyɔ lɛ fɛɛ.” Eyɛ faŋŋ akɛ, mɔ ni áŋɔ babaoo ake lɛ lɛ yɛ yiŋtoo babaoo ni eeedamɔ nɔ ejie suɔmɔ kpo etsɔɔ. Yɛ be mli ni ekɛ yoo lɛ mlihilɛ nifeemɔ lɛ eto he lɛ sɛɛ lɛ, Yesu kɛ shishitoo mla nɛɛ fata he akɛ: “Mɔ ni aŋɔ fioo afa lɛ lɛ, esumɔɔ fioo.” Kɛkɛ ni ekɛɛ yoo lɛ akɛ: “Áŋɔ ohe eshai áfao!”—Luka 7:36-48.
3. Mɛni ni kɔɔ wɔ diɛŋtsɛ wɔhe ehe hiaa ni wɔsusu he?
3 Bi ohe akɛ, ‘Eji mi ji yoo lɛ aloo miyɛ shihilɛ ni tamɔ nakai nɔŋŋ mli ni ana mi mɔbɔ nɛkɛ kulɛ, ani mafee keketee ni mikɛ sane ekeee mɛi krokomɛi?’ Ekolɛ obaaha hetoo akɛ, ‘Dabi kwraa!’ Kɛlɛ, ani oheɔ oyeɔ lɛɛlɛŋ akɛ osumɔɔ ni okɛ sane ake? Ani no ji osu kɛ baŋ titri? Ani ofɔɔ nakai feemɔ amrɔ nɔŋŋ, ni ani mɛi krokomɛi baanyɛ atsɔɔ akɛ oji mɔ ni kɛ sane keɔ? Nyɛhaa wɔkwɛa nɔ hewɔ ni esa akɛ wɔteŋ mɔ fɛɛ mɔ asusu nɛkɛ sane nɛɛ he yɛ faŋŋ mli lɛ.
Eshaifaa He Miihia —Ni Ákpã Mli Aha Wɔ
4. Mɛɛ anɔkwa sane ni kɔɔ wɔ diɛŋtsɛ wɔhe esa akɛ wɔkpɛlɛ nɔ?
4 Oyeee emuu, taakɛ bɔ ni ole jogbaŋŋ lɛ. Kɛji akɛ abi bo lɛ, obaakpɛlɛ nɔ po, ni ekolɛ obaakai wiemɔi ni anaa yɛ 1 Yohane 1:8 lɛ, akɛ: “Kɛji wɔkɛɛ akɛ esha ko bɛ wɔhe lɛ, wɔ diɛŋtsɛ wɔhe wɔshishiuɔ, ni anɔkwale lɛ bɛ wɔmli.” (Romabii 3:23; 5:12) Mɛi komɛi yɛ ni amɛjie amɛ eshafeemɔ kpo kɛtsɔ eshai kpeteŋkpelei ni haa mɔ he jɔ̃ɔ lɛ lɛ anɔ. Shi kɛji akɛ oleee akɛ oyeɔ fɔ yɛ enɛɛmɛi amli po lɛ, bei kɛ gbɛi pii yɛ kɛ̃ ni oshɛɛɛ Nyɔŋmɔ taomɔ nii ahe—ofee esha. Ani jeee nakai eji?
5. Esa akɛ wɔda Nyɔŋmɔ shi yɛ mɛni hewɔ?
5 No hewɔ lɛ, oshihilɛ baatamɔ bɔ ni bɔfo Paulo tsɔɔ mli lɛ akɛ: “Ni nyɛ ni nyɛji gbohii yɛ nyɛnɔtɔ̃mɔi lɛ kɛ nyɛheloo foo lɛ mli lɛ, eha nyɛ kɛ [Yesu] fɛɛ wala, ni ekɛ nyɛnɔtɔ̃mɔi lɛ fɛɛ efa nyɛ.” (Kolosebii 2:13; Efesobii 2:1-3) Kadimɔ wiemɔ kuku, ‘ekɛ nyɛnɔtɔ̃mɔi lɛ fɛɛ efa nyɛ’ lɛ. Enɛ kɔɔ nibii babaoo he. Wɔteŋ mɔ fɛɛ mɔ yɛ yiŋtoo ni fa ni eeedamɔ nɔ ekpa fai taakɛ David fee lɛ, akɛ: “Yehowa, ogbɛi lɛ hewɔ lɛ ŋɔɔ minɔsha lɛ ofa mi, ejaakɛ eda.”—Lala 25:11, wɔma efã ko nɔ mi.
6. Wɔbaanyɛ wɔná nɔmimaa yɛ mɛni he yɛ Yehowa kɛ eshaifaa gbɛfaŋ?
6 Te ooofee tɛŋŋ ni bo—aloo wɔteŋ mɔ ko—nine aaashɛ eshaifaa nɔ hu? Nɔ titri lɛ ji akɛ Yehowa Nyɔŋmɔ miisumɔ ni ekɛke. Anaa enɛ akɛ eji esubaŋ. (2 Mose 34:6, 7; Lala 86:5) Shishinumɔ yɛ he akɛ Nyɔŋmɔ aaakpa gbɛ akɛ wɔɔtsɔ wɔhe kɛba eŋɔɔ ni wɔbakpa lɛ fai, ni wɔbi ni ekɛke wɔ. (2 Kronika 6:21; Lala 103:3, 10, 14) Ni eto gbɛjianɔ koni ená mla nɔdaamɔ nɔ ni eeedamɔ nɔ ekɛ eshaifaa ni tamɔ nɛkɛ ahã—Yesu kpɔmɔ afɔleshaa lɛ.—Romabii 3:24; 1 Petro 1:18, 19; 1 Yohane 4:9, 14.
7. Esa akɛ osumɔ akɛ oookase Yehowa yɛ mɛɛ gbɛ nɔ?
7 Esa akɛ ona nɔkwɛmɔnɔ ni tsɔɔ bɔ ni esa akɛ okɛ gbɔmɛi krokomɛi aye aha lɛ yɛ bɔ ni Nyɔŋmɔ sumɔɔ ni ekɛ sane ake lɛ mli. Paulo gbala jwɛŋmɔ kɛtee enɛ nɔ, ni eŋma akɛ: “Nyɛmli ahia ahaa nyɛhe, nyɛmusuŋ atsɔ̃a nyɛ yɛ nyɛhe, nyɛŋɔ-fafaa nyɛhe, taakɛ bɔ nɔŋŋ ni Nyɔŋmɔ ŋɔfa nyɛ yɛ Kristo mli lɛ.” (Efesobii 4:32) Ŋwanejee ko bɛ he akɛ, sane ni Paulo maa nɔ mi lɛ kɔɔ nii ni wɔɔkase kɛjɛ Nyɔŋmɔ nɔkwɛmɔnɔ lɛ mli lɛ he, ejaakɛ kuku ni nyiɛ sɛɛ lɛ yaa nɔ akɛ: “No hewɔ lɛ nyɛfea Nyɔŋmɔ kaselɔi, tamɔ bii ni asumɔɔ.” (Efesobii 5:1) Ani onaa tsakpãa lɛ? Yehowa Nyɔŋmɔ kɛke bo, no hewɔ lɛ—Paulo kɛ nɔmimaa susuɔ akɛ—ehe miihia ni nyɛkase Lɛ, ni “nyɛmusuŋ atsɔ̃a nyɛ yɛ nyɛhe, nyɛŋɔ-fafaa” mɛi krokomɛi. Shi bi bo diɛŋtsɛ ohe akɛ, ‘Ani miifee nakai? Kɛji akɛ ejeee mibɔɔ su lɛ, ani miitsu gbɛ ni tamɔ nɛkɛ he nii, ni miimia mihiɛ diɛŋtsɛ ni makase Nyɔŋmɔ akɛ mɔ ni kɛ eshai keɔ?’
Ehe Miihia ni Wɔtsu Eshaifaa He Nii
8. Mɛni esa akɛ wɔyɔse yɛ gbɔmɛi srɔtoi ni yɔɔ wɔ asafo lɛ mli lɛ ahe?
8 Ebaafee nɔ ni hi akɛ wɔɔsusu akɛ yɛ Kristofoi asafo lɛ mli lɛ, bei fioo komɛi shɛɔ ni esa akɛ wɔtsu Nyɔŋmɔ gbeyeishemɔ gbɛ ni ji eshaifaa he nii. Shi shihilɛ lɛ diɛŋtsɛ yɛ srɔto. Wɔkpɛlɛɔ nɔ akɛ wɔnyɛmimɛi hii kɛ yei Kristofoi lɛ miibɔ mɔdɛŋ ni amɛnyiɛ Yesu nɔkwɛmɔnɔ ni ji suɔmɔ lɛ sɛɛ. (Yohane 13:35; 15:12, 13; Galatabii 6:2) Amɛkɛ be kakadaŋŋ etsu nii, ni amɛmiitsu nii lolo, koni amɛkwa gbɛ ni jeŋ fɔŋ nɛɛ tsɔɔ nɔ ejwɛŋɔ, ewieɔ, ni efeɔ enii lɛ. Amɛmiisumɔ ni amɛjie gbɔmɔ hee lɛ kpo amɛtsɔɔ diɛŋtsɛ. (Kolosebii 3:9, 10) Kɛlɛ, wɔnyɛŋ wɔku wɔhiɛ wɔshwie anɔkwale ni eji akɛ, gbɔmɛi ni yeee emuu yɔɔ jeŋ muu fɛɛ asafo lɛ kɛ asafo fɛɛ asafo mli lɛ nɔ. Kɛji akɛ aaawie fɛɛ he lɛ, amɛhi kwraa fe bɔ ni amɛji tsutsu lɛ, ni kɛlɛ amɛkã he amɛji mɛi ni yeee emuu.
9, 10. Mɛni hewɔ esaaa akɛ efeɔ wɔ naakpɛɛ kɛ́ naagbai te shi yɛ nyɛmimɛi ateŋ?
9 Nyɔŋmɔ jeɔ gbɛ ekɛɔ wɔ yɛ Biblia lɛ mli akɛ, wɔbaanyɛ wɔkpa emuu ni ayeee gbɛ yɛ asafo lɛ mli, yɛ wɔnyɛmimɛi hii kɛ yei lɛ ateŋ. Ákɛ nɔkwɛmɔnɔ lɛ, susumɔ Paulo wiemɔi ni áŋma afɔ̃ shi yɛ Kolosebii 3:13 lɛ he, akɛ: “Kɛji mɔ ko kɛ mɔ ko ná sane ko lɛ, nyɛnanaa nyɛhaa nyɛhe ni nyɛkɛfafaa nyɛhe, taakɛ bɔ ni [Yehowa, NW] hu ŋɔfa nyɛ lɛ, nakai nyɛ hu nyɛfea.”
10 Esa kadimɔ akɛ, Biblia lɛ kaiɔ wɔ yɛ tsakpãa ni kã eshai ni Nyɔŋmɔ kɛke wɔ lɛ kɛ gbɛnaa nii ni kã wɔnɔ kɛ bɔ ni ehe hiaa ni wɔkɛ mɛi krokomɛi anɔ̃ ake amɛ lɛ teŋ lɛ he yɛ biɛ. Mɛni hewɔ eji kaa lɛ? Ejaakɛ Paulo kpɛlɛ nɔ akɛ ekolɛ ‘mɔ ko kɛ mɔ ko ená sane.’ Eyɔse akɛ shihilɛi nɛɛ baahi shi. Ekolɛ amɛhi shi yɛ klɛŋklɛŋ afii oha lɛ mli, yɛ Kristofoi ni ji “hetselɔi” ni yɔɔ ‘hiɛnɔkamɔ ni aŋɔto aha amɛ yɛ ŋwɛi’ lɛ po ateŋ. (Kolosebii 1:2, 5) No hewɔ lɛ, ani wɔbaanyɛ wɔsusu akɛ ebaafee srɔto ŋmɛnɛ, yɛ be mli ni anɔkwa Kristofoi lɛ ateŋ mɛi babaoo bɛ mumɔ lɛ odaseyeli akɛ amɛji “Nyɔŋmɔ halamɔbii, mɛi krɔŋkrɔŋi kɛ suɔmɔmɛi” lɛ? (Kolosebii 3:12) No hewɔ lɛ, esaaa akɛ wɔmuɔ sane naa akɛ nɔ ko yɛ ni ehiii kwraa yɛ wɔ asafo lɛ mli kɛji akɛ mɛi kɛ amɛhe náa sane—mlifui yɛ nɔ fɔŋ feemɔ pɔtɛɛ ko loo nɔ ni asusuɔ kɛkɛ he.
11. Kaselɔ Yakobo hɛle wɔ shi yɛ mɛni he?
11 Yesu nyɛ bi Yakobo wiemɔi lɛ hu tsɔɔ akɛ esa akɛ wɔkpa gbɛ akɛ kɛ hoo lɛ, wɔkɛ shihilɛi komɛi baakpe ni baabi ni wɔkɛ sane ake wɔnyɛmimɛi lɛ. “Namɔ ji nilelɔ kɛ sanesɛɛkɔlɔ yɛ nyɛteŋ? Ha ni ekɛ jeŋba kpakpa atsɔɔ lɛ diɛŋtsɛ enitsumɔi lɛ yɛ nilee kpoofeemɔ mli. Shi kɛ awuŋayeli fɔŋ kɛ béi yɛ nyɛtsui mli lɛ, nyɛkashwãa ni nyɛmalea nyɛshia anɔkwale lɛ.” (Yakobo 3:13, 14) “Awuŋayeli fɔŋ kɛ béi” yɛ anɔkwa Kristofoi atsuii amli? Hɛɛ, Yakobo wiemɔi lɛ tsɔɔ faŋŋ akɛ enɛɛmɛi te shi yɛ klɛŋklɛŋ afii oha lɛ mli asafo lɛ mli ni ebaaba lɛ nakai ŋmɛnɛ.
12. Mɛɛ naagba te shi yɛ blema Filipi asafo lɛ mli?
12 Enɛ he nɔkwɛmɔnɔ diɛŋtsɛ yakɔ Kristofoi enyɔ ni áfɔ amɛ mu ni hiɛ gbɛi kpakpa akɛ mɛi ni bɔ mɔdɛŋ waa amɛkɛ Paulo tsu nii yɛ ekomefeemɔ mli lɛ ahe. Ekolɛ obaakai akɛ okane Evodia kɛ Sintika, Filipi asafo lɛ mli bii nɛɛ ahe sane pɛŋ. Eyɛ mli akɛ atsɔɔɔ sane lɛ mli fitsofitso moŋ, shi Filipibii 4:2, 3 tsɔɔ akɛ naagba ko yɛ amɛteŋ. Ani eje shishi kɛ wiemɔ ko ni asusuuu he, ni mlihilɛ bɛ mli ni awie, wekunyo ko ni asusuɔ akɛ abuuu lɛ, aloo awuŋayeli ko ni tamɔ akaŋshii he odaseyeli? Bɔ fɛɛ bɔ ni eji lɛ, ebatsɔ hiɛdɔɔ sane aahu akɛ Paulo nu he yɛ shɔŋŋ yɛ Roma. Ekolɛ naahilɛ bakã mumɔŋ nyɛmimɛi yei enyɔ lɛ ateŋ, ni nɔ ni jɛ mli ba ji bɛŋkɛmɔ ni amɛbɛŋkɛɛɛ amɛhe yɛ kpeei ashishi aloo amɛwieɔ amɛhe efɔŋ amɛtsɔɔ amɛnanemɛi.
13. Mɛni eeenyɛ efee akɛ no saa Evodia kɛ Sintika teŋ, ni mɛni wɔkaseɔ kɛjɛɔ enɛ mli?
13 Ani enɛ tamɔ sane ko ni ole jogbaŋŋ, tamɔ nɔ ko ni ba mɛi komɛi ateŋ yɛ osafo lɛ mli, aloo nɔ ko ni kɔɔ ohe? Ekolɛ naagba ko ni tamɔ nakai yɛ bianɛ po yɛ gbɛ bibioo ko nɔ. Mɛni wɔbaanyɛ wɔfee? Yɛ blema sane lɛ gbɛfaŋ lɛ, Paulo wo nyɛmimɛi yei enyɔ ni amɛjɔɔ amɛhe nɔ lɛ hewalɛ akɛ “amɛjwɛŋmɔ afee ekome yɛ Nuntsɔ lɛ mli.” Ekolɛ amɛkpɛlɛ nɔ akɛ amɛbaasusu sane lɛ he, koni amɛsaa amɛteŋ, koni amɛjie suɔmɔ ni amɛyɔɔ akɛ amɛkɛ sane aaake lɛ kpo, koni amɛkase Yehowa eshaifaa su lɛ diɛŋtsɛ. Nɔ ko bɛ ni wɔɔdamɔ nɔ wɔjwɛŋ nɔ kroko fe akɛ Evodia kɛ Sintika ye omanye, ni wɔ hu wɔbaanyɛ wɔye omanye. Abaanyɛ akɛ eshaifaa su nɛɛ atsu nii yɛ omanyeyeli mli ŋmɛnɛ.
Ha Toiŋjɔlɛ Ahi Shi—Okɛ Sane Ake
14. Mɛni hewɔ bei pii lɛ ehi akɛ aaaŋmɛɛ mɛi ateŋ béi lɛ he ni aku hiɛ afɔ̃ nɔ kɛkɛ lɛ?
14 Mɛni ebiɔ diɛŋtsɛ ákɛ akɛ sane aaake beni naagba ko kã okɛ Kristofonyo kroko teŋ lɛ? Abaanyɛ awie faŋŋ akɛ, gbɛ kome ko ni yɔɔ mlɛo bɛ, shi Biblia lɛ kɛ nɔkwɛmɔnii ni yeɔ ebuaa kɛ ŋaawoo ni anyɛɔ atsuɔ he nii diɛŋtsɛ haa. Nɔ titri ni ajieɔ yi—eyɛ mli akɛ ebɛ mlɛo akɛ aaakpɛlɛ nɔ ni akɛtsu nii—ji ni aha hiɛ akpa sane lɛ nɔ, aha efee nɔ ni eho. Bei pii lɛ, kɛji akɛ naagba ko yɛ, taakɛ eba yɛ Evodia kɛ Sintika teŋ lɛ, mɔ fɛɛ mɔ nuɔ he akɛ mɔ kroko lɛ sane ejaaa aloo lɛ tɔ̃mɔ lɛ jɛ titri. No hewɔ lɛ, yɛ shihilɛ ni tamɔ nakai mli lɛ, ekolɛ obaasusu jogbaŋŋ akɛ, mɔ ni sa shwamɔ titri loo efee efɔŋ waa ji Kristofonyo kroko lɛ. Kɛlɛ, ani obaanyɛ oŋmɛɛ sane lɛ he kɛtsɔ esha ni okɛaake lɛ nɔ? Yɔsemɔ akɛ kɛji akɛ enɛ baanyɛ afee anɔkwale diɛŋtsɛ akɛ Kristofonyo kroko lɛ etɔ̃ kwraa po lɛ, bo oyɔɔ hegbɛ titri mli ni ooonyɛ oha sane lɛ aho akɛ akɛ́ke ni éba naagbee.
15, 16. (a) Te Mika tsɔɔ bɔ ni Yehowa ji lɛ mli eha tɛŋŋ? (b) Mɛni Nyɔŋmɔ ‘hiɛ ni ekuɔ efɔ̃ɔ nɔtɔ̃mɔ nɔ’ lɛ tsɔɔ?
15 Nyɛkahaa wɔhiɛ jeɔ Nyɔŋmɔ ni ji wɔ nɔkwɛmɔnɔ yɛ eshaifaa mli lɛ nɔ. (Efesobii 4:32–5:1) Yɛ E-nɔkwɛmɔnɔ akɛ mɔ ni kuɔ ehiɛ efɔ̃ɔ nɔtɔ̃mɔ nɔ lɛ gbɛfaŋ lɛ, gbalɔ Mika ŋma akɛ: “Namɔ ji Mawu tamɔ bo ni ŋɔɔ nɔ̃sha efaa, ni ekuɔ ehiɛ efɔ̃ɔ egbɛfaŋnɔ lɛ mli mɛi ni eshwɛ lɛ amlatɔ̃mɔ nɔ? Ehiɛŋ emlifu lɛ mli kɛyaŋ naanɔ, ejaakɛ enáa mɔbɔnalɛ tsui.”—Mika 7:18.
16 Akɛni etsɔɔ akɛ Yehowa ji mɔ ni ‘kuɔ ehiɛ efɔ̃ɔ mlatɔmɔ nɔ’ hewɔ lɛ, no etsɔɔɔ akɛ Biblia lɛ miikɛɛ akɛ enyɛɛɛ ekai tɔ̃mɔi lɛ, tamɔ mɔ ko ni miiye hela ni haa ehiɛ kpaa nibii komɛi anɔ. Susumɔ Samson kɛ David, mɛi enyɔ ni tɔ̃ tɔ̃mɔi ni hiɛdɔɔ yɔɔ mli lɛ asaji lɛ he okwɛ. Nyɔŋmɔ nyɛ ekai nakai eshai lɛ yɛ be kakadaŋŋ sɛɛ; wɔle amɛ eshai lɛ ekomɛi po, ejaakɛ Yehowa ha aŋma afɔ̃ shi yɛ Biblia lɛ mli. Kɛlɛ, wɔ-Nyɔŋmɔ ni kɛ eshai keɔ lɛ jie mɔbɔnalɛ kpo etsɔɔ mɛi enyɔ lɛ, ni ekɛ amɛ eha wɔ akɛ hemɔkɛyeli he okadii ni sa kasemɔ.—Hebribii 11:32; 12:1.
17. (a) Mɛɛ nifeemɔ baanyɛ aye abua wɔ koni wɔku wɔhiɛ wɔfɔ̃ mɛi krokomɛi atɔ̃mɔi loo eshai anɔ? (b) Kɛji akɛ wɔbɔ nakai feemɔ he mɔdɛŋ lɛ, belɛ wɔmiikase Yehowa yɛ mɛɛ gbɛ nɔ? (Kwɛmɔ shishigbɛ niŋmaa.)
17 Hɛɛ, Yehowa nyɛ ‘eku ehiɛ efɔ̃’a tɔ̃mɔi anɔ, taakɛ David kɛɛ lɛ shii abɔ akɛ efee lɛ. (2 Samuel 12:13; 24:10) Ani wɔbaanyɛ wɔkase Nyɔŋmɔ yɛ enɛ mli, ni wɔmiisumɔ ni wɔku wɔhiɛ wɔfɔ̃ tɔ̃ ni wɔnanemɛi tsuji tɔ̃ɔ wɔnɔ akɛ adesai ni yeee emuu lɛ anɔ? Susumɔ ohe akɛ ota kɔɔyɔŋ lɛlɛ ko ni ewo foi kɛnyiɛ ni miihe afã mli. Beni ojie ohiɛ okwɛ samfɛlɛ lɛ mli lɛ, ona okutsoŋnyo ko ni damɔ he ni efãa kɛtsɔɔ lɛ masɛi ni kɛ elilɛi ebato enaa tamɔ gbekɛ ni ebuuu mɔ. Ole akɛ emli efu ni bo ji mɔ ni yɔɔ ejwɛŋmɔ mli. Aloo ekolɛ esusuuu ohe kwraa po. Fɛɛ sɛɛ lɛ, beni kɔɔyɔŋ lɛlɛ lɛ bɔleɔ shi ni ewoɔ ehe nɔ kɛyaa ŋwɛi lɛ, ohoɔ nuu ni tamɔ kpɔ bibioo ko kɛkɛ agbɛnɛ lɛ he yɛ ŋwɛi shɔŋŋ. Beni aaashɛ ŋmɛlɛtswaa kome pɛ lɛ oyashɛ shitooi ohai abɔ, ni oshi enifeemɔ ni woɔ omli la lɛ yɛ shɔŋŋ. Nakai nɔŋŋ hu bei pii lɛ ebaanyɛ eye ebua wɔ ni wɔkɛ tɔ̃mɔ ake kɛ́ wɔbɔ mɔdɛŋ akɛ wɔɔtamɔ Yehowa koni wɔkɛ nilee aku wɔhiɛ wɔfɔ̃ tɔ̃mɔ nɔ lɛ. (Abɛi 19:11) Ani bu ni abuuu wɔ lɛ efeŋ nɔ ko ni he ehiaaa kwraa yɛ biɛ afii nyɔŋma loo afii ohai enyɔ kɛmiibote Afii Akpe lɛ mli? Mɛni hewɔ okũuu ohiɛ oshwieee nɔ kɛkɛ?
18. Kɛji akɛ etamɔ nɔ ni wɔnyɛɛɛ wɔku wɔhiɛ wɔfɔ̃ nɔtɔ̃mɔ nɔ lɛ, mɛɛ ŋaawoo wɔbaanyɛ ni wɔkɛtsu nii?
18 Ekolɛ be ni efɔɔɔ kaa mli osɔle yɛ sane lɛ he ni obɔ mɔdɛŋ koni okɛke, shi onuɔ he akɛ onyɛɛɛ ofee nakai. Kɛkɛ lɛ mɛni? Yesu wo hewalɛ ni aya mɔ kroko lɛ ŋɔɔ koni abɔ mɔdɛŋ asaa béi lɛ yɛ teemɔŋ koni toiŋjɔlɛ aba. “No hewɔ lɛ, kɛji okɛ onɔkeenɔ lɛ baaŋmɛ afɔleshaa latɛ lɛ nɔ, ni okai yɛ jɛi akɛ onyɛmi kɛo teŋ yɛ sane ko lɛ, shi onɔkeenɔ lɛ yɛ jɛi yɛ afɔleshaa latɛ lɛ hiɛ, ni oya okɛ onyɛmi lɛ ayakpata dã, koni oba ni okɛ onɔkeenɔ lɛ abaha.”—Mateo 5:23, 24.
19. Mɛɛ su esa akɛ wɔná, ni mɛɛ su esa akɛ wɔkwa, yɛ be mli ni wɔtaoɔ wɔkɛ wɔnyɛmi teŋ toiŋjɔlɛ lɛ?
19 Nɔ ni sa kadimɔ lɛ, Yesu ekɛɛɛ akɛ yaa onyɛmi lɛ ŋɔɔ ni oyatsɔ eyiŋ akɛ oyeɔ bem ni ákɛ lɛ eyeɔ fɔ. Ekolɛ nakai sane lɛ ji. Shi eeenyɛ etsɔɔ babaoo akɛ tɔ̃mɔ yɛ mɔ fɛɛ mɔ he. Fɛɛ sɛɛ lɛ, esaaa akɛ oti lɛ feɔ akɛ aaya ni ayaha mɔ kroko lɛ akpɛlɛ etɔ̃mɔ nɔ, ni taakɛ eji lɛ koni aba lɛ shi. Kɛji akɛ nɛkɛ oyaatsu sane lɛ he nii lɛ, no lɛ bɔ fɛɛ bɔ ni eji lɛ oyeŋ omanye. Asaŋ oti lɛ jeee ni ati tɔ̃mɔ ni tee nɔ diɛŋtsɛ lɛ aloo nɔ ni asusuɔ kɛkɛ lɛ mli fitsofitso. Kɛji akɛ sane lɛ he susumɔ yɛ mlijɔlɛ yɛ Kristofoi asuɔmɔ mli jie lɛ kpo akɛ shishinumɔ ni yabaaa ji nɔ ni hɔ naagba lɛ teŋ diɛŋtsɛ lɛ, nyɛyi enyɔ lɛ fɛɛ nyɛbaanyɛ nyɛbɔ mɔdɛŋ ni nyɛsaa sane lɛ. Shi kɛji akɛ sane lɛ he susumɔ kɛ gbeekpamɔ ni yeɔ emuu baaa po lɛ, ani enɛ bafeɔ nɔ ni he hiaa be fɛɛ be? Ani efeŋ nɔ ni hi akɛ kɛ hoo lɛ nyɛteŋ mɔ fɛɛ mɔ baanyɛ akpɛlɛ nɔ akɛ nyɛmiisumɔ diɛŋtsɛ ni nyɛsɔmɔ wɔ-Nyɔŋmɔ ni kɛ eshai keɔ lɛ? Kɛji akɛ okɛ shihilɛ ni tamɔ nakai diɛŋtsɛ kpe lɛ, ebaafee mlɛo kɛha nyɛteŋ mɔ fɛɛ mɔ akɛ eeekɛɛ kɛjɛ etsui mli akɛ, “Edɔ mi waa akɛ yɛ emuu ni wɔyeee hewɔ lɛ béi ni tamɔ nɛkɛ ba wɔteŋ. Ofainɛ, ha wɔŋmɛɛ he.”
20. Mɛni wɔbaanyɛ wɔkase kɛjɛ bɔfoi lɛ anɔkwɛmɔnɔ lɛ mli?
20 Kaimɔ akɛ béi ba bɔfoi lɛ ateŋ, tamɔ beni amɛteŋ mɛi komɛi yasumɔ ni amɛná woo babaoo lɛ nɛkɛ. (Marko 10:35-39; Luka 9:46; 22:24-26) Enɛ tée naataomɔ shi yɛ amɛteŋ, ekolɛ edɔ amɛ, ni amɛmli fu waa. Shi amɛnyɛ amɛku amɛhiɛ amɛfɔ̃ gbeekpamɔi ni bɛ ni tamɔ nɛkɛ nɔ, ni amɛtee nɔ amɛtsu nii yɛ ekomefeemɔ mli. Sɛɛ mli lɛ amɛteŋ mɔ kome ŋma akɛ: “Mɔ ni taoɔ akɛ etsɛ yɛ jeŋ ni ena gbii kpakpai lɛ, ha emɔ elilɛi mli kɛjɛ efɔŋ he, kɛ enaabu hu, koni ekawie apasa wiemɔ; ewi efɔŋ ni efee ekpakpa, etao hejɔlɛ ni enyiɛ no sɛɛ.”—1 Petro 3:10, 11.
21. Mɛɛ ŋaawoo ni mli kwɔ waa ni kɔɔ eshaifaa he Yesu kɛha?
21 Wɔtsɔ hiɛ wɔkadi nifeemɔ gbɛ ko ni yaa nɔ be fɛɛ be: Nyɔŋmɔ kɛ eshai pii ni wɔfee tsutsu lɛ ke wɔ, no hewɔ lɛ, esa akɛ wɔkase lɛ ni wɔkɛ wɔnyɛmimɛi atɔ̃mɔi ake amɛ. (Lala 103:12; Yesaia 43:25) Shi nifeemɔ gbɛ ni yaa nɔ daa nɛɛ fã kroko yɛ. Beni ekɛ sɔlemɔ nɔkwɛmɔnɔ lɛ ha sɛɛ lɛ, Yesu kɛɛ akɛ: “Shi kɛji nyɛkɛ mɛi atɔ̃mɔi fa amɛ lɛ, nyɛtsɛ ni yɔɔ ŋwɛi lɛ kɛaafa nyɛ hu.” Nɔ ni fe afi sɛɛ lɛ, eku sɛɛ eti nɔ titri ni he hiaa lɛ mli, etsɔɔ ekaselɔi lɛ bɔ ni asɔleɔ, akɛ: “Okɛ wɔhe eshai afa wɔ, ejaakɛ wɔ hu wɔkɛfaa mɔ fɛɛ mɔ ni tɔ̃ɔ wɔnɔ.” (Mateo 6:12, 14; Luka 11:4) Kɛkɛ ni beni eshwɛ gbii fioo ni ebaagbo lɛ, Yesu kɛfata he akɛ: “Be fɛɛ be ni nyɛdamɔ shi nyɛsɔleɔ lɛ, kɛ nyɛkɛ mɔ ko yɛ sane ko lɛ nyɛŋɔfaa lɛ, koni nyɛŋwɛi tsɛ lɛ hu aŋɔ nyɛtɔ̃mɔi lɛ afa nyɛ.”—Marko 11:25.
22, 23. Suɔmɔ ni wɔyɔɔ akɛ wɔkɛ tɔ̃mɔ aaake lɛ baanyɛ asa wɔ wɔsɛɛ he yɛ mɛɛ gbɛ nɔ?
22 Hɛɛ, wɔgbɛkpamɔ akɛ wɔnine baaya nɔ ashɛ Nyɔŋmɔ dɛŋ eshaifaa nɔ lɛ damɔ bɔ ni wɔsumɔɔ ni wɔkɛ wɔnyɛmimɛi atɔ̃mɔi ake amɛ lɛ nɔ titri. Kɛji akɛ béi te shi yɛ Kristofoi ateŋ lɛ, bi ohe akɛ, ‘Ani Nyɔŋmɔ dɛŋ eshaifaa ni maná lɛ he ehiaaa babaoo fe tsɔɔmɔ ni matsɔɔ akɛ nyɛmi nuu ko loo nyɛmi yoo ko tɔ̃ yɛ bulɛ fioo ko, tɔ̃mɔ bibioo ko, aloo adesa ni yeee emuu lɛ su ko ni ejie lɛ kpo lɛ hewɔ?’ Ole hetoo lɛ.
23 Shi kɛji akɛ hiɛdɔɔ babaoo yɛ sane lɛ mli fe mɔ kɛ mɔ teŋ tɔ̃mɔ loo naagba ko hu? Ni mɛɛ be akɛ Yesu ŋaawoo ni aŋma afɔ̃ shi yɛ Mateo 18:15-18 lɛ tsuɔ nii? Nyɛhaa wɔsusua nɛkɛ saji nɛɛ ahe yɛ enɛ sɛɛ.
[Shishigbɛ niŋmaa]
a Woloŋlelɔ ko kɛɔ akɛ “ajie” Hebri abɛbua wiemɔ ni akɛtsu nii yɛ Mika 7:18 lɛ “kɛjɛ gbɛfalɔ ko ni hoɔ kɛyaa kɛkɛ ni enaaa nɔ ko ni esumɔɔɔ akɛ egbalaa ejwɛŋmɔ kɛyaa nɔ lɛ subaŋ mli. Jwɛŋmɔ ni ajieɔ lɛ kpo lɛ jeee ákɛ Nyɔŋmɔ enaaa esha, aloo ákɛ ebuɔ enɛ akɛ sane bibioo ni he ehiaaa, shi moŋ ákɛ ekadiii enɛ yɛ saji pɔtɛɛ komɛi amli kɛ yiŋtoo akɛ ebaagbala toi yɛ he; ákɛ egbalaaa toi, shi ekɛkeɔ.”—Kojolɔi 3:26; 1 Samuel 16:8.
Ani Okaiɔ?
◻ Yɛ mɛɛ gbɛ nɔ Yehowa kɛ eshaifaa he nɔkwɛmɔnɔ haa wɔ koni wɔnyiɛ sɛɛ?
◻ Mɛni esa akɛ wɔkai yɛ gbɔmɛi srɔtoi ni yɔɔ asafo lɛ mli lɛ ahe?
◻ Bei pii lɛ, mɛni esa akɛ wɔnyɛ wɔfee yɛ bulɛ ni abɛ kɛha wɔ kɛ tɔ̃mɔi ahe?
◻ Kɛji akɛ ehe miihia lɛ, mɛni wɔbaanyɛ wɔfee koni wɔha toiŋjɔlɛ aba wɔkɛ wɔnyɛmi teŋ?
[Mfoniri ni yɔɔ baafa 15]
Kɛji akɛ béi ba okɛ Kristofonyo ko teŋ lɛ, bɔɔ mɔdɛŋ ni oŋmɛɛ he; beni be shwieɔ mli lɛ, sane lɛ baafee nɔ ni he ehiaaa dɔŋŋ