Awo Be Kakadaŋŋ ni Akɛtao Nibii Amli lɛ He Nyɔmɔ

“YEHOWA? Namɔ Yehowa ji?” Silvia ni eye afii kpaanyɔ lɛ na gbɛi lɛ yɛ Armenia Biblia ko, ni ji weku jwetri ni gbekɛ yoo fioo ko kɛtsɔɔ lɛ lɛ mli. Ebi mɛi kɛkpa shi, shi mɔ ko bɛ Yerevan, Armenia, he ni eyɔɔ lɛ ni baanyɛ atsɔɔ lɛ mɔ ni Yehowa ji—jeee efɔlɔi lɛ, jeee etsɔɔlɔi lɛ, ni jeee osɔfoi ni yɔɔ sɔlemɔ ni yɔɔ maŋ lɛ mli lɛ tete po.

Silvia bada, egbe skul naa, ni ená nitsumɔ, shi eleee mɔ ni Yehowa ji lolo. Ákɛ oblayoo fioo lɛ, esa akɛ ejo foi kɛshi Armenia, ni yɛ be ko sɛɛ lɛ eyaje Poland, ni ekɛ abobalɔi krokomɛi hi tsũ bibioo ko mli. Gbɔi fɔɔ mɛi ni ekɛ yɔɔ tsũ lɛ mli lɛ ateŋ mɔ kome saramɔ daa. Silvia bi akɛ: “Ogbɔi lɛ namɛi ni?” Hetoo lɛ ji akɛ: “Amɛji Yehowa Odasefoi, ni amɛba biɛ koni amɛbatsɔɔ mi Biblia lɛ.”

Silvia tsui nya kɛ miishɛɛ beni enu gbɛi ni ji Yehowa lɛ. Yɛ naagbee lɛ, eje shishi ebɔi mɔ ni Yehowa ji kɛ nɔ̃ suɔmɔ Nyɔŋmɔ ni eji lɛ kasemɔ. Shi etsɛɛɛ ni ehe bahia ni eshi Poland. Eyatao teemɔhe yɛ Denmark, yɛ Baltic Ŋshɔ lɛ sɛɛ. Ehewɔ nibii fioo komɛi pɛ ehiɛ, shi nɔ ni futu lɛ ji Biblia he woji ni Yehowa Odasefoi fee. Silvia na Buu Mɔɔ Asafo lɛ nitsumɔhe niji lɛ adrɛs srɔtoi ni ato naa yɛ wolo lɛ ekome sɛɛ. No ji nibii ni eyɔɔ lɛ ateŋ ekome ni he hiaa waa—nɔ ni baaha ele Yehowa!

Akɛ Silvia tee abobalɔi nsara ko mli yɛ Denmark, ni amrɔ nɔŋŋ lɛ ebɔi Yehowa Odasefoi asɛɛgbɛ taomɔ. Kɛtsɔ adrɛs srɔtoi ni ato naa ni ehiɛ lɛ nɔ lɛ, ele akɛ Buu Mɔɔ Asafo lɛ nitsumɔhe nine ni yɔɔ Denmark lɛ yɛ maŋ ni ji Holbæk lɛ mli. Shi nɛgbɛ ji nɛkɛ he nɛɛ? Akɛ Silvia tee nsara kroko mli kɛtsɔ oketeke nɔ, beni ayaa yɛ gbɛ lɛ nɔ lɛ, oketeke lɛ yatsɔ Holbæk! Shikome ekoŋŋ lɛ, etsui nya kɛ miishɛɛ.

No sɛɛ etsɛɛɛ yɛ hulutsoo gbi lɛ eko mli lɛ, Silvia fo oketeke lɛ kɛku sɛɛ kɛtee Holbæk ni enyiɛ kɛjɛ oketeke shidaamɔhe lɛ kɛtee nitsumɔhe nine lɛ. Ekaiɔ akɛ: “Beni mibote abɔɔ lɛ mli lɛ, mita shi yɛ sɛi ko nɔ ni mikɛɛ mihe akɛ, ‘Paradeiso nɛ!’ ” Akɛ miishɛɛ here lɛ atuu yɛ nitsumɔhe nine lɛ ni yɛ naagbee lɛ ená lɛ diɛŋtsɛ e-Biblia mli nikasemɔ.

Shi shimɔ kɛmiiya hei srɔtoi nyiɛ sɛɛ kɛba. Kɛjɛ abobaa nsarai srɔtoi amli lɛ, ehe bahia ni Silvia ayatao Yehowa Odasefoi asɛɛ gbɛ koni esaa eje enikasemɔ lɛ shishi shii abɔ ekoŋŋ. Ni kɛlɛ, yɛ afii enyɔ sɛɛ lɛ, no mli lɛ ekase nii babaoo bɔ ni ebaanyɛ ejɔɔ ewala nɔ eha Yehowa. Abaptisi lɛ ni no sɛɛ etsɛɛɛ ni ekɛ ehe wo be-fɛɛ sɔɔmɔ nitsumɔ lɛ mli. Yɛ afii 1998 mli lɛ, Denmark nɔyeli hegbɛi lɛ ha lɛ shihilɛhe.

Amrɔ nɛɛ Silvia eye afii 26 ni eesɔmɔ yɛ nakai he ni kaiɔ lɛ paradeiso lɛ, yɛ Yehowa Odasefoi anitsumɔhe nine ni yɔɔ Denmark lɛ. Nɔ ni ekɛɔ amrɔ nɛɛ ji: “Mɛni makɛɛ? Mibɔi Yehowa sɛɛgbɛ taomɔ be mli ni miji gbekɛ yoo fioo tɔ̃ɔ. Amrɔ nɛɛ mina lɛ. Misusu he akɛ masumɔ ni mikɛ miwala be fɛɛ atsu nii yɛ esɔɔmɔ lɛ mli, ni naa mi yɛ Betel. Misɔlemɔ ji akɛ biɛ baafee mishia yɛ afii ni baaba lɛ amli!”